Asanahe be Agedihe

Gu gumbagumbapai nga, “unga . . . ti ko ni tiko,” rogoyo nga gine?

Ziazia Kekeapai nafura tipa Yesu Kristo ya ko na “unga . . . ti ko ni tiko,” na tipa apefuo ko ya i ‘na unga kpotoyo yo.’ (Yoane 5:26; 6:53) Wa vura duhe were, anga agi averesi du ue re na rogo yo kina sa te.

Yesu ayaa: “Bambiko wa du unga ti Mbori nga Ba ni tiko, kina wo ko afu he fu Wiriko a unga du ti ko ni tiko.” Mbata fu Yesu gumba gi iiriwo afugo re, ko yaa: “Mi nagumba ha fu roni, ni rengo, ni rengo, gu ni ka gi gi pai, ki idi pa gu ko nakedi re, nyenye unga du adu be ni. . . . Ragoho nada, si awere, ho kangba aboro ka gia fugo Wiri Mbori ni; agu yo ka gi he i du adu ni ungayo.” Herẽ, Yesu aafura tipa gu iiriwo tandu Bako afuhe fuko, nga gu tandu du beko ka sa aboro i duna wene ngbanya dagbayo na Mbori. Na kurii gure, Yesu rengbe arengba ka zingisa agu aboro nara ara rogo kpio yo na ki fu unga fuyo i raki berewe. Tipa Yesu, gu fugo nga “[ko na] unga . . . ti ko ni tiko,” rogoyo nga, i aima fu gi tandu nga ga gama unga fu aboro re fuko. Wa du unga ti Mbori nga Ba ni tiko, “kina wo ko afu he fu Wiriko a unga du ti ko ni tiko.” (Yoane 5:24-26) Ginipai tigaha tipa apefuo ko?

Fuo susa regbo wa garã sa kusa, Yesu afura fu agu aboro naadegatuyo kuti ko niyaa: “Mi nagumba ha fu roni, ni rengo, ni rengo, ka oni ari nga pasio Wiri boro ki mbiri kureko ya, unga du nga kpotoroni yo te. Gu ni ka ri pasiore ki mbiri kurere nyenye unga du adu be ni; mi azíngisa ni azingisa ti yangara rame.” (Yoane 6:53, 54) Herẽ, Yesu aringbisi padu ‘unga kpoto boro yo’ kuti “nyenye unga.” Agu afugo du gumbagumbaha kina sa na gu fugo nga ‘unga kpotoroni yo,’ si gu du adu rogo kura aba rogo Ziazia Kekeapai i akehe rogo pa-Giriki. Kpiaapai ue tipaha gere nga, ‘tikpo kpotoroni yo’ na “gu pai ki da kpotoyo yo rengbe na gayo ingapai nga mosoro ho.” (Marako 9:50; ARomo 1:27) Tipa gi gumbagumbaapai ue re, agu afugo re ayugonga gupai nga, boro na tandu beni ka fu tikpo fu kura aboro watadu ni na pagbia beni ka fu mbusa fu kura boro tipa gani ingapai te. Kuba gure, si nayugopa rengba he naabaha zanga gu kpa koyo. Sidu, gu fugo nga ‘unga kpotoroni yo,’ a wa duhe rogo Yoane 6:53 nayugo pa gbia boro unga rogo apai dunduko.

Ho Yesu aafura ni tipa padu apefuo ko na unga kpotoyo yo, ko afura tipa kpotoko gbiati kureko. Kusa, ho ko aasigira Ga Gbia Riahe Nga ga Nyemu ni, ko afura berewe tipa kpotoko na kureko na ki zinahe fu agu apefuo ko si adu nga i nika du rogo vovo mokido i ri gu kpakuta narukuba kpotoko na ki mbiri gu imekakue narukuba kureko. Ya mo gipai re nayugo gupai nga, kina mbedimbedi aKristano sa, du rogo vovo mokido na Yekova Mbori nika gbia unga rogo apai dunduko wa gure? Oó. Garã sa nasusi dagba agu afugo ue ko agumbaha re. Agu aboro nagi agu afugo Yesu du nikekehe rogo Yoane 6:53, 54 ainonga wiripai tipa gu pumbo si adu nga i nikaa mangaha na agarã dunduko kini kodi gu kpiahe narukuba kpoto Yesu na kureko ti regboho te.

Kuti Yoane kapita 6, Yesu aringbisipa kpotoko mbata kuti manu, kini yaa: ‘Wa abaroni avura ri manu ngbakungba yo, i akpiki akpika. Gi kpokuta re nga gu naye ngbangbaturũ yo, ka boro rihe, ni kpinga te. Mi nga gu unga kpokuta naye ngbangbaturũ yo. Ka boro ri gi kpokuta re, ni nyeanye ni ungani kindi.’ Kpoto Yesu gbiati kureko, angia agu ahe paha aima kio kisusi ndikidi manu. Rogo gini gene? Rogo gu gene nga, ko afu ungako tipa gu “unga nga ga aboro zegino dũ,” kini sa aboro i rengbe ka gbia nyenye unga.a Sidu, gu fugo du tipa ‘unga kpotoroniyo’ du rogo Yoane 6:53, si tipa agu aboro dunduko nagbia nyenye unga singia ngbangbaturũ yo watadu auru kpotosende herẽ.—Yoane 6:48-51.

Ti gini regbo apefuo Kristo nika gbia unga kpotoyo yo, watadu ka duni ungayo rogo apai dunduko? Tipa agu adikumbo Kindo nga mbedimbedi aKristano, si amanga ho i ka zingisa yo ni tipa raka ngbangbaturũ yo ni agu atoro ka kpinga ya. (1 AKorindo 15:52, 53; 1 Yoane 3:2) Ga Yesu “kura akandoro” tigaami agbia unga rogo apai dunduko ti digido gako Zogarago Tipa Agarã Kutu. Ti gu regbo re, i aima asada yo, ki bi yo niruru yo, na ki ima takapande yo niruru yo ya i ima rẽ tipa nyenye unga rogo Paradiso kpotosende.—Yoane 10:16; Yugoti 20:5, 7-10.

[Gu rukutu kekeapai du bandu kpewaraga yo]

[Gu kpiahe du ti kpewaraga 9]

Ndikidi aKristano dunduko rengbe arengba ka duna ‘unga kpotoyo yo’