“Ga Ngbarago Dú Rogo Yekova Yo”

“Ga ngbarago dú rogo Yekova yo a, ko afú agu ahe foro du nyemu he kpotoro yo.” —Atambuahe 37:4.

1, 2. Da nga Mburu ndikidi ngbarago, na wai afugo Bakindo Davide agbeberã rani kuti gi rengo re?

“ABORO ngbarago nga agu aboro inipa gayo zingo nga ga toro, . . . Aboro maku nga airahipai. . . . Aboro maku nga aboro azarõ.” Kodihe kuti kura ringbisapa agu aboro duna ngbarago, agi afugo re, angia gu nyanyakipa bangua afugo Yesu atona gako Tungusapai nani nga gu nadu rii Bagangara yo a wa gu bake wene pangbangaa nangia Matayo akehe. (Matayo 5:3-11, oni ringbisingaha na NW.) Afugo Yesu nakido rani na gupai nga, ani rengbe arengba ka gbia ngbarago.

² Gu bia tambuahe Davide asarihe nangia Bakindo agu aYisaraere nadu mbata, nagbeberã rani kuti Yekova nigu boro nga Mburu ndikidi ngbarago. Davide ayaa: “Ga ngbarago dú rogo Yekova yo a, ko afú agu ahe foro du nyemu he kpotoro yo.” (Atambuahe 37:4) Ono wai rengbe pa ino boro Yekova na dungu apapara sinoko ka ye na “ngbarago” funi? Wai pa wisigo ani gupai Yekova namangihe na gu ko ka mangaha kumbatayo rogo nyasa gako ringbisapai afu gu maabangirise fu rani nga ga gbia ‘agu ahe du nyemuhe tirani’? Pa wisigo ani Atambuahe 37 sirisiri na gu futufutuapai du tipaha tona ti gu bambata veresi ki da kodi gu 11 ha, nafu akaragapai sa gu sanahe re.

‘Ka Mo Kpinga Boro Ya’

3, 4. Gini rugute Davide afuhe rogo Atambuahe 37:1, na tipagine daha ada ti ni areme ani irisihe?

³ Ani naraka rogo ‘gbegbere aregbo,’ nga gu regbo gbegbereapai namoipai rogoho. Ani ima bi afugo Pauro si nada ti rengo nga gu fugo ko nayaa: “Gbegbere aboro agbérã ki susi na airanangahe a, ki ninangi aboro, aboro ki ninangi yo a.” (2 Timoteo 3:1, 13) Si nitaatapai ani kpi gbegbere aboro mbiko i wiri wa i na diabese na mbikopa gayo kumuko. Agu apai re dunduko rengbe ka fuda berã rani, kini vurasi gu bangirani nga ga toro. Oni kparianga wai gu tonatona afugo du rogo Atambuahe 37 aruga rani tipa gi kerepai rengbe arengba ka manga re: “Ka mo nizingisi nga tiro tipa amangi gbigbitapai ya, ka mo nikpi nga pai kuti agu yo namanga irairapai a ya [“ka oni kpinga gbegbere aboro ya,” NW]!”

⁴ Na a’uru dũ, agu aũgbandaka apangbangaa du rogo zegino natakapande gu dungu iraira mangaapai na iraira asarangbangaa fu rani namanga. Agu aboro namanga biriki rogo sunge bagaahe, namangaha zanga i fu mbusa fuyo. Akuondiko nanze ti vuro agu aboro adunga gene beyo ka banda tiyo be apai ya. Agu aboro naimo akurayo nanye zanga i ini ada nga yo watadu ka irangbii vura ino yo, i afunga mbusa fuyo te. Ngbatunga gu kpiaapai nga ga irasi asarangbangaa re dunduko rengbe ka ye na imisiringbaduse fu rani na ki fudi berã rani. Agu apai nawira wa du gbegbere aboro adu na diabese rogo gayo apai, rengbe ka sa rani ani tona kaa kpi yo. Ono ya mo padu ani na gberarago tirani nika mbakada gupai re? Wa sangbana gi ga gbegbere aboro mangaapai re apido yo apido, ndu kpi yo nga gine? Nirengo, anga ndupai ho berani tipa ‘ngbadurani naaima’ kutiyo te. Tipagine adunga ndupai ti ni berani ya?

5. Tipagine ringbisi yo gbegbere aboro ti ni kuti nvuo?

⁵ Bake Atambuahe akaragapai ki yaa: “I adewa yo mbembedi wa nvuo, i ki paya wa iwo kpepasio.” (Atambuahe 37:2) Fogo iwo nvuo rengbe ka du nibawene he, ono akpehe aimanga te si ki nyokora na ki ugu. Kinawo a duhe tipa agu aboro namanga gbegbereapai. Gu kumuko du beyo re, si anyenga anye fuyo kindi te. Ho i akpiko ni, gu gayo akumuko nga aũdii re aundonga yo berewe te. Niyangaraha, aboro dunduko i ka sarangbangaa yo asara ngba ruru gene. Pauro akepai ki yaa: “Mosoro ingapai nga kpio.” (ARomo 6:23) Agu aboro namanga gbegbereapai gbiati aguyo dunduko angianga ruru yo ya, adia gayo “mosoro” adia niyangaraha. Gipai re nirengo nga gu sino raka adunga na maku rogoho ya!—Atambuahe 37:35, 36; 49:16, 17.

6. Ginipai rengbe ani ka wirikaha be Atambuahe 37:1, 2?

⁶ Wa duhe tie were, ya mo si naida ani mbu pa agu aũkumuko nga ga amangi gbegbereapai nika go ago si naafuda rani? Gupai rengbe ani nirengo ka wirikaha rogo gu bambata averesi ue nga ga Atambuahe 37 du re: Ka oni mbunga pa gu diabese du gbegbere aboro nani si nyaga roni kusayo ti gu gene sia oni he nga ga mangasunge fu Yekova ya. Kuba gure, oni moiberã roni kina kuti agu amaku na asásá nga ga toro.—Asanza 23:17.

“Mo Kída Kuti Yekova, ki Mangi Wenepai”

7. Tipagine si aida ti ni ani kido kuti Yekova?

⁷ Fugo bake Atambuahe nazungodi rani niyaa: “Mo kída kuti Yekova, ki mangi wenepai.” (Atambuahe 37:3a) Ho du ani ni rogo bakabangirise watadu akapa a, si naida ani kido kuti Yekova nyanyakii. Ko nga gu Boro rengbe ka banda rani rogo toroyo rogo apai dunduko. Mose akepai ki yaa: “Gu [boro] nanye rogo gu barondo nga ga gu Ko nga Bahe ki susi, ninasunga tii kirima gu Ko du na tandu apai dũ.” (Atambuahe 91:1) Ho du ani ni nifudifudi rani be gu mangimangiapai nga ga kuondiko namaapai rogo gi zegino re, si naida ani kido kuti Yekova susi gu nidu mbata. Ho ngbaringo ndurani niwo ni, ani nidu na ngbarago wa bakurearani niye ki undo rani. Teketeke a, ho ani adiaberã ni tipa kaa ta niruru rani, ani naida Yekova naasongoda rani wa ani ata.—Yesaya 50:10.

8. Wai rengbe pa rimiso boro tini kurogo gu sunge nga ga aKristano nga ga tungusapai ka undo ni ka pa gu kumuko nga ga gbegbere aboro afudanga ni ya?

⁸ Ziga sa dagba agu akuraha nga gu nasa boro ka ni dunga nifudifudi ni be pa gu kumuko nga ga gbegbere aboro ya nga, ni fu tini tipa sunge tungusapai kini gbata agu aboro du wa avusende na kini undo yo i ye ka du na ruru inohe tipa ga Yekova ringbisapai. Wa gbegbere mangimangiapai akio kina kumbatayo, si naida ani fu tirani tipa undo aboro susi gu nidu mbata. Gu mokedi nangia Pauro ayaa: “Ka bangironi go nga ti manga wene pai na fuka ahe ya; bambiko ngbatunga gi rũhe re, si ngba ti Mbori.” Gu “[ba]wene pai” kisusi rengbe ani ka mangaha fu aboro nga ka tungusa gu taasitaasipa wene pangbangaa fuyo du tipa ga Mbori Kindo. Gaani sunge tungusapai nirengo nga gu “motumo [nga ga] tambuahe.”—AEbere 13:15, 16; AGaratio 6:10.

9. Oni sakinga rogo gu ga Davide fugo nga, “nye rogo ringara.”

⁹ Davide aandu na gako fugo kumbatayo kindi niyaa: “Mo kída kuti Yekova, ki mangi wenepai; si mo ka nye rogo ringara ti ni, ki du ni bandabanda ro [“na kini mangi rurupai,” NW].” (Atambuahe 37:3b) Gu “ringara” gumba yo paha nadu ti rago Davide re, angia gu ringara Yekova afuhe fu aYisaraere, nangia Ringara Mokido. Ti rago ga Soromo zogarago, gu ringara re atona Dana yo nodiyo ki da ku Bera-saba yo ku sudiyo. Si nga gu ringara aYisaraere anaraka rogoho. (1 Abakindo 4:25) Rogo agu arago dunduko ani araka rogoho rogo zegino areme, ani namaabangirani tipa ye gu vovo zegino nga ga ruruapai, ti gu regbo re, kpotosende naabaha dunduko nika da ni paradiso. Ono ti gi regbo re, barani gu ngba angba rogo toroyo.—Yesaya 65:13, 14.

10. Gine nga sangbana gaani ‘ruru mangaapai’?

¹⁰ Gine nikangia sangbana gaani ‘ruru mangaapai’? Gu sanza ga Mbori toro adu kugiipa kehe natingida rani na gupai nga: “Gu boro namanga ruruapai, ni agbia dungu amaku agbia.” (Asanza 28:20, NW) Pa kpatagara ani kuti tungusa wene pangbangaa rogo agu arago ani araka rogoho na kini tungusihe fu agu aboro rengbe ani ka tungusaha fuyo, naye aye na amosoro nirengo fu rani be Yekova. Nikpiapai, Frank na diako nga Rose, azi sunge zakagene mbata fu agarã 40 kusayo rogo gbata Scotland yo ku nodiyo. Gu umba bange aboro nadu na nyemu rengo tiyo rogo gu gbata re aima gbandaka kusayo mbata fu aFrank na diako ndu koyo. Zanga gunde, agi arogotise ni azakigene re atona gu sunge nga ga tungusapai gbiati sa aboro ni abawiriki. Awere, dungurati gu duho rogo gu gbata re nazugo kina kumbatayo. Nirengo, Yekova aima fu maku fu agi arogotise re tipa gayo ruru mangaapai. Ni umbasitise, Frank nayaa: “Gu babakere maku kisusi gbia ani he, . . . si gbua nga ani kindi rogo rengo yo na kini mangi ga Yekova sunge kindi.” Ii, ho ani ‘amanga rurupai ni,’ ani nagbia dungu amaku na ki duna tambuahe tipaha.

“Ga Ngbarago Dú Rogo Yekova Yo”

11, 12. (a) Wai rengbe ani ka gbia “ngbarago . . . rogo Yekova yo”? (b) Gini sásá rengbe oni ka maaha nibipa wisigopai nisase, na gini sangbanaha rengbe ka manga?

¹¹ Tipa ani rengbe ka nyakasa gaani pagume dagbarani na Yekova na ki banda gaani kido kutiko, si naida gaani “ngbarago dú rogo Yekova yo.” (Atambuahe 37:4a) Wai ani agbiaha? Kuba gupai nga ani dingiso tirani na kina pa agu apai du tipa rani, si naida ani naamaa berã rani kina kuti Yekova, ka agu apai ngaha re vura kpakara wai vurũ. Gene sa dagba agu akuraha rengbe ani ka mangaha rogoho, nga ka dia regbo ka geda Fugo ko. (Atambuahe 1:1, 2) Wa oni naageda Ziazia Kekeapai, si naaye na ngbarago fu roni? Si afu ngbarago fu roni ka oni agedaha na gu sásá nga oni naida ka wirika kura apai tipa Yekova. Tipagine ka oni arunga ti ni tooni fuo geda oni wiri paparaha ki sana tironi na gu sanahe naye re ya, ‘Gine gi papara kekepai re ayugoho fere tipa Yekova?’ Oni rengbe ka bihe nga si nafu undo ka oni du na kpewaraga beroni tipa ka kepai rogoho ho oni ageda Ziazia Kekeapai ni. Ti agu aregbo dunduko oni kaani ru tooni ka berãkurii gupai gedi oni he, oni ke gupai nika tingida roni na pa gu wene asino Yekova kuru oni baraha. Rogo kura Atambuahe, Davide abi bia ki yaa: “Mo niídi he ya agu apai du ngbare na gu makia pai du ku kpotore yo si ngba bangiro, Ako Yekova, gi mbia, nga gu ko natumo re.” (Atambuahe 19:14) Pa dungura ani berã rani wa gere kuti Fugo Mbori, ni gupai ‘ngba angba’ tiko, na si ngba angba tirani a.

¹² Wai rengbe ani ka gbia ngbarago be gaani wisigopai gbiati berãkuriipai? Ani rengbe ka maa pa wirikapai bakere gbe tipa Yekova na tipa gako agene ni gaani sásá a wa rengbe ani ka wirikaha. Agu abuku du wa The Greatest Man Who Ever Lived na Draw Close to Jehovaha nafu gu dungu apai rengbe ani kaa berãkuriihe na kini fu tambuahe fu Yekova. Davide nakido ruru aboro ya, tipa Yekova tigako, ‘ko afú agu ahe afu fu roni du nyemuhe kpotoroniyo.’ (Atambuahe 37:4b) Gi ngbatunga kido re du navura sa gu mokedi nangia Yoane ko ke agu afugo nga: “Mbiko gere ani rengbe ka du zukazuka fu ko [“si du du ani ti ni na kido kutiko,” NW], nga, ani ini ka ani ho gu he ku sangba gako nyemuhe yo, ko gi pa rani agia. Ka ani ini ya ko nagia pa rani, gu he ka ani ho, ani ini aina ya agu ahe ani ho be ko si be rani.”—1 Yoane 5:14, 15.

13. Wai sunge tungusapa Kindo namoipai rogo dungu aringara rogo agu agarã susi bambeda kusayo?

¹³ Ni agu aboro kakuti gayo ruru mangaapai, gupai du ani na bakere nyemuhe tirani nga ka bi ga Yekova bakere pagbia i nadi gbarasarimo kusayo ti ni. (Asanza 27:11) Ya mo ngbaduraniyo ahinga be ngbarago wa ani agia gupai nga, awirinarani namanga sunge tungusapai awere bakere gbe rogo agu aringara i aazoga aboro rogoho mbata ngbaome tee? Ani namaabangirani nyanyakii ka bi gu kura ranirii genehe nika zaka fu rani mbata fu digido gi zegino re. Dungu gu ga Yekova amoyambu naraka Putu yo na Amerika yo natungusapai kakaka fu agude-sukuru, fu agu aboro oro kurogo agu aringara re be vura, na fu gu kura tata aboro naraka rogo agu aringara re na kini gbia ngbarago be gu ranirii nga ga irisombori du yo. Gupai du ani na bakere nyemuhe tirani nga, wa agi aboro re nika karagatiyo ku ringara kpuyo yo niyangaraha, i nyenga anye kaa hasarago kindi na gu imarago nga ga rengo rogo agu arago irangbii aima zahe rogoho ti gaani sunge tungusapai gbaiga.—Matayo 5:14-16.

“Mo Fu Ga Pai ku Be Yekova”

14. Gini gopai duho nayugo gupai nga, ani rengbe arengba ka kido kuti Yekova?

¹⁴ Nangbaa gu ongoda ani agbiaha be ino gupai nga, gaani abakabangirise na gupai nawira wa si nga rorõi tindiro, i rengbe arengba ka diaha kusayo! Rogo gini gene? Davide ayaa: “Mo fú ga pai ku be Yekova; ki kida kuti ko a, ko amánga pai tipa ha.” (Atambuahe 37:5) Rogo gaani adungurati, ani na bakere gopai berani tipa Yekova ya ko nigu boro rengbe ani arengba ka kido kutiko tipa undo. (Atambuahe 55:22) Agu aboro namangasunge Kindo ti aregbo dunduko, singia i nga abazakigene, agu ababiapai ninaata ata, amokedi, abaundosunge Beteere yo, i dunduko rengbe ka gumbaha nigayo rengo nga Yekova nangera angera fuo yo. Tipagine ka oni afuranga ti ni fu aguyo ini oni yo i gumbanga pa wai Yekova aundo yo fu roni ya? Zanga kapa, oni nika gia dungu apangbangaa agia nga gu nayugo gupai nga, zavura ti regbo fudifudiapai, Yekova anaundo yo aundo. Ko naafu agu ahe afu fuyo nasongoda raka.—Atambuahe 37:25; Matayo 6:25-34.

15. Wai gu ruru mangaapai nga ga ga Mbori aboro ahasarago?

¹⁵ Ho ani asa Yekova ni nigu boro ani kaa kido kutiko zanga kapa, ani rengbe fuo gure tie ka bi gu kura afugo nga gu bake Atambuahe akehe niparengo, nga gu nayaa: “Ko aye na ga diapairi wa imarago, na gu pai ru foro wa bebere auru.” (Atambuahe 37:6) Wa du ani ni aDezire Yekova, aboro naagumbanga rengo dedede tipa rani te. Ono Yekova nazaka bangiri agu aboro duna ruru ngbaduyo yo tipa ka undo yo i kparia gupai nga, nyemu Yekova gbiati nyemu akuarani du nafõrani ani guari sa gu gaani sunge tungusapai ani amangaha gbaiga re. Ti kina gu bangisa regbo re, gaani wene ruru sino mangaapai, wa dungu aboro avura nibisirapaha, si ni okõokõpai te. Yekova nabanda rani ti regbo agu asogote gbiati arungosi dunduko aboro amanga rani nani. Nisangbana gipai re, gu ruru mangaapai nga ga ga Mbori aboro nahasarago wa ima uru bebere uru.—1 Petero 2:12.

“Mo Ongo Kii . . . ki Sungudi Ko Zezeredi”

16, 17. Na ngbanya kuti Atambuahe 37:7, gi regbo du ani rogoho re nga regbo gine, na tipagine?

¹⁶ Gu fugo bake Atambuahe naye fuo gure nga: “Mo ongo kii bara bangiri Yekova, ki sungudi ko zezeredi; ka mo nizingisi nga tiro tipa gu ni u au rogo gani apai ya, tipa gu boro namanga sangba gbegbere aberã a ya!” (Atambuahe 37:7) Herẽ, Davide anyakasipa gupai nga, si naida ani sungudi ga Yekova sarangbangaa na zerangbaduse. Wa digido gi zegino re avuranga ye kindi ya, anga si nga ndupai fu rani tipa ani naakpakanahe te. Ya mo ani abinga gupai nga, ga Yekova inapai gbiati gako zerangbaduse ima kio kisusi gu ani aberẽ paha mbata tee? Ka ani rengbenga ka yugo gupai nga, ani a nasungudo Yekova na zerangbaduse wa ani afu tirani tipa sunge tungusa wene pangbangaa mbata fu digido gi zegino re da tee? (Marako 13:10) Awere tie nga regbo ani he mangaapai gbarakagbaraka, nga gu mangapai rengbe ka bengeta rani na ngbarago na ka barani angbakanga rogo toroyo ya. Awere nga regbo ani sovura nyanyakii susi gu nidu mbata kuti gu gbegbere ome maapai kurii aboro ga Satana zegino amaaha. Na gi regbo re nga regbo tipa ani banda tirani gigirii rogo gaani mangaapai na ki zanga manga gupai nika gbarasapa gaani ruru mangapai barabangiri Yekova. Ani kakuti danda wasiwasi aberã kusayo rirani yo. Ani ne iraira mangaapai na adee watadu na akumba na dagbarani na akuarani.—AKorosaio 3:5.

¹⁷ Davide afu rugute ki yaa: “Mo mbu pa zinga, ki he erã! Ka mo nizingisi nga tiro ya, mbiko si nakusa kina manga gbigbitapai. Bambiko i agbandaka amangi gbigbitapai agbandaka; ono agu [aboro] nasunguda Yekova i adia kumbo ringara.” (Atambuahe 37:8, 9) Ii, ani rengbe ka du na kido kini moibangirani tipa gu regbo ima mbeda awere, ho Yekova nika dia irairaapai ni kusayo auru kpotosende gbiati agu aboro namangaha.

“Fuo Rago Ngbutuko”

18, 19. Wai Atambuahe 37:10 anyakasa roni?

¹⁸ “Fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te.” (Atambuahe 37:10) Nairiwo wai agu afugo re angarasa rani wa ani ambeda na digido gi zegino re na nikangia digido gu raka a nga ga gu gbegbere sino aboro nara niriyo zanga Yekova! Gu ngbatunga azogarago dunduko aboro ambakadihe, aima kpa nikerehe ti fu undo fu aboro. Ani awere nambeda na gu regbo aboro nika karagatiyo kutii ga Mbori zogarago, nga gu Kindo nga ga Yekova tiibe Yesu Kristo. Si nika ye na apai dunduko kutii gaha arugute na ki rogodi agu aboro kusayo dunduko nasogote ga Mbori Kindo.—Daniere 2:44.

¹⁹ Rogo vovo zegino tii gu zogarago nga ga ga Mbori Kindo, oni arengbanga ka bi “gbegbere [sino] boro” te, ka oni vura gbata ni agbata sirisiri vurũ. Nirengo, agu aboro dunduko nika samungu kuti Yekova ti gu regbo re, i arogoda yo kusayo nikina boro ipo. Anga boro ho nga guni nika zubo gako bakere pagbia watadu nika ká ka ra kutii gako pagbia i ka mbu ni ni naaraka yo te. Gaoni amurakporo dunduko nika du na aberã kina sa wa i aida ka fu ngbarago fu Yekova. Nairiwo wai ba aboro nika ngba ti gu regbo re, mbiko arifangura, agu angbunduru i akiso angbadimo nani, na agu apai dunduko rengbe ka gbarasapa ngbarago na naye na bakabangirise, adunga yo berewe te.—Yesaya 65:20; Mika 4:4; 2 Petero 3:13.

20, 21. (a) Ada nga gu “bayee aboro” du payo rogo Atambuahe 37:11, na wari i agbia ‘wenepia ni kpaima’? (b) Gini amaku nikangia gaani ka ani wiriki Bakerepa Davide?

²⁰ Fuo gupai re, “bayee aboro adía kumbo ringara.” (Atambuahe 37:11a) Ono ada nga gi “bayee aboro” re? Gi “bayee aboro” re nga agu aboro nasungudo Yekova ko mbakadi gu irairaapai dunduko aboro amanga yo nani. “[I a]du na ngbarago tipa gu wenepia du kpaima.” (Atambuahe 37:11b) Zavura kina awere, ani nabi zereda abi kpaima rogo gu paradiso nga ga toro nga gu du rogo gu dungurati nga ga ndikidi aKristano.

²¹ Wa i avuranga kusa rani kusayo tii arungosi kindi ya, ani nasongoda tirani asongoda dagbarani na kini fu wasa fu agu akuarani duna gberarago tiyo. Nisangbana gipai re, ga Yekova aboro akpakananga he tipa agu apai namanga yo te. Agu awirina i asia yo nibabanda avusende nangera fuo rani rogo toroyo ninyemuse, na ti kura aregbo, i nangera angera nirengo fuo rani rogo agu apai nabipa kpotorani, si kini sa rani ani hi arungosi tipa manga rurupai. (1 ATesaroniko 2:7, 11; 1 Petero 5:2, 3) Nakiipa gu zereda du ani nani re! Ani a na gu maabangirise berani nga ga raka nyeanye kindi rogo gu Paradiso nga ga zereda ima mbeda ka ye. Fuo duhe tie were, ani wirikinga Bakerepa Davide, nga Kristo Yesu, nga guko gako ngara tipa ga Yekova sunge asa ko ko mangisunge niruruhe dati kpioko. (1 Petero 2:21) Nimanga ani he a wo, ani nikaa ndu kumbatayo kindi na ngbarago, kini taasirimo gaani Mbori, nga Yekova, nga gu boro ani agbia ngbarago rogo ko yo.

[Gu rukutu kekeapai du bandu kpewaraga yo]

• Ginipai wiriki oni he be Atambuahe 37:1, 2?

• Wai rengbe oni ka gbia “ngbarago . . . rogo Yekova yo”?

• Gini gopai duho nayugo gupai nga, ani rengbe arengba ka kido kuti Yekova?

[Asanahe nga ga wisigopai]

[Gu kpiahe du ti kpewaraga 23]

“Mo kída kuti Yekova, ki mangi wenepai”

[Gu kpiahe du ti kpewaraga 25]

“Bayee aboro adía kumbo ringara”