Ani Mongo Kiisipa Rimo Yekova Kina Sa

“Ako, ani táasi rimo Yekova na oni, ani mongo kíisi pa rimoko!”—ATAMBUAHE 34:3.

1. Gini wene kpiapai Yesu amoihe ti regbo gako sunge auru kpotosende?

ROGO gu yuru nadu rogo Nisana ti rameru 14 rogo gu garã nangia 33 F.B.K., Yesu na gako amokedi abiki abia sambuo Yekova rogo gu vurubambu nadu kuari yo Yerusarema yo. (Matayo 26:30) Si angia yangara regbo fu Yesu ko bi gu bia re na gako amokedi. Ono tie, si adaada ko digisi gako dunguratise naayó ngba gu gene re. Ti tonatona ga Yesu sunge tungusapai auru kpotosende dakuti digidoho, ko anaataasapa Bako na kini yugu rimoko zaaza fu aboro. (Matayo 4:10; 6:9; 22:37, 38; Yoane 12:28; 17:6) Gupai nzunzu ko anaamangaha nga ka gumba gupai berewe bake apapara Atambuahe agumbaha ki yaa: “Ako, ani táasi rimo Yekova na oni, ani mongo kíisi pa rimoko!” (Atambuahe 34:3) Nga gu wene kpiapai tipa ani mangihe wa ko!

2, 3. (a) Wai ani aino gupai nga Atambuahe namba 34 na sangbanebi rogoho? (b) Gini apai ani ka wisigoho rogo gi papara kekepai re na rogo gu naye fuoho?

² Fuo susa bete aminiti fuo gu regbo Yesu abi abia sambuohe na gako amokedi re, gu mokedi nangia Yoane abi gupai ko aabingo ho mbata ya. Ko abi gupai nga i banga Bairako gbiati kura abakuondiko ue kuti angua tipa i kpiki. Ga aRomo abanzengere akuadi ndu agu abakuondiko nadu ue re tipa i kpiki niipo. Ono tie, fugoko nayawee i akuonga ndu Yesu te. Ho abanzengere ayeni fuo Yesu tipa ka kuadi anduko, i abi gupai nga ko ima kpi. Rogo ga Yoane buku Wene Pangbangaa, ko afura tipa gupai re ya si angia digisidigisi gu kura papara Atambuahe nga namba 34 nga gu nayaa: “Memeko akita nga wa sa te.”—Yoane 19:32-36; Atambuahe 34:20.

³ Atambuahe namba 34 na dungu weneapai rogoho tipa aKristano. Sidu, rogo gi papara kekepai re na rogo gu naye fuoho, ani nika wisigo agu apai Davide adu rogoho ho ko ake gu bia Atambuahe re ni na ki wisigi agu apai a du rogoho nga gu nika ngarasa rani.

Pa Ora Davide be Saura

4. (a) Tipagine i ambedi Davide ti ni tipa ko zogo aYisaraere gizo kumbatayo? (b) Tipagine Saura aye ti ni ‘ka kpinyemu’ Davide bakere gbe?

⁴ Ho Davide aduni niparanga, Saura adu ni Bakindo ringara aYisaraere yo. Ono tie, Saura abasasangba Yekova, Yekova ki gindigo ko. Mbiko gi nduhe re, gu nebi nangia Samuere aya fuko wee: “Yekova siri gu ngbi nga ga aYisaraere be ro areme, ki fu he fu gu kuaro, nga gu ni ngba ki susi ro.” (1 Samuere 15:28) Kusa, Yekova arugu Samuere ko ndu ka mbeda Davide ninzeme, nangia gu wiri Yisai nangia kiaro tipa ko du ni bakindo kuba Saura. Vuru gu regbo re, Mbori adi gako toro kusayo ti Bakindo Saura, ko kini mo ka nye na gberarago tiko. Fuo du apai were tipa Saura, i aye na Davide nangia bawene bataki woro ahe ko taki manzigo tipa ka fu wasa fu Saura, na Saura “ki nikpi nyemu ko bakere.”—1 Samuere 16:11, 13, 21, 23.

5. Tipagine Saura atona soga Davide ti ni, na gine si asa Davide ko mangihe?

⁵ Wa regbo aandu, Yekova aduna Davide. Yekova aundoko ko dibe gu ngburunga Fereseto nangia Goriata na kini songodiko si ki da ti gupai nga rimoko wo ringara aYisaraere yo tipa gako birĩ sovura. Ono tie, ga Yekova maku kurii Davide asa gupai nga Saura naakpi Davide akpi, na ko kini tona kaa soga ko. Baraho Davide aataka kundi ni barabangiri Saura, Saura azumudiko bara ue na baso. Davide aneke gu baso re bara ue ka si asonga ko ya. Fuo asada Saura tiko ka imo Davide ti gu biata regbo, Davide akparia gupai tie nga si naida ko oro ka bata. Mbiko wa Saura akpasaka Davide kindi tipa ka zioko ka imoko, Davide adiberã niyangaraha ka gbata bagbuko rogo kura ringara kia ti gu nangia ga aYisaraere.—1 Samuere 18:11; 19:9, 10.

6. Tipagine Saura azinahe ti ni i imi araki rogo gu bakporo nangia Nobo?

⁶ Wa Davide aandu kuti ngbanda ringara aYisaraere, ko asungu tooni rogo gu bakporo nangia Nobo, yo gu ga Yekova bamburokoo nangia ga irisombori adu ni. Wa gopai ayugoho, ga Davide paranga akumba nagasi ko koyo, na ko ki sanahe yo tipa i fu riahe fuko na gako akumba. I agumba gupai fu Saura ngawee gu gbiamotumo nangia ga gu bakporo re afu riahe fu Davide na gako akumba na ki fu gu basape fuko a nangia ga Goriata. Fuo ima ngbadu Saura, ko andu na vura ki imi araki rogo gu bakporo re dunduko kodihe na aboromotumo 85.—1 Samuere 21:1, 2; 22:12, 13, 18, 19; Matayo 12:3, 4.

Gu Kura Oto Bekpio

7. Tipagine Gata angianga wene ba ti ni tipa Davide gbu rogoho ya?

⁷ Davide aguari Nobo yo ka ora ku ringara aFereseto yo ku dioyo baturõho adu wa amairo 25 na ki sana Bakindo Akisa tipa ka gbu kpuko yo rogo gu gbata nangia Gata, nangia ga Goriata ringara. Si nawira Davide aberẽhe ya Gata nikangia gu yangara rago Saura nikaa yengo kurogoho ka gbata ko ya. Ono tie, fuöho aturanga te ga bakindo Gata amoyambu ki kparia Davide ki inihe ya ko du naimi gu gayó boro nangia Goriata. Fuo Davide gi gupai nga aboro ima inopai tipa ko, ko ‘adu na bakere gunde be Akisa bakindo Gata.’—1 Samuere 21:10-12.

8. (a) Gine Atambuahe 56 agumbaha furani tipa gupai namangi Davide Gata yo? (b) Wai Davide abati bekpio wa vunde nibati kpakpu mbia yo?

⁸ Fuo gure, aFereseto azi Davide. Si nawira gi regbo re du Davide asari gu bia Atambuahe ko azungodi Yekova rogoho ki yaa: “Mo uka aumere ku rogo ga mangu ime!” (Atambuahe 56:8, gbiati gu kekepai du bariihe rogo NW.) Rogo gi gene re, ko ayugupa gako kido ya bangiri Yekova agonga ti gako rungo te ono ko aangera angera fuoko rogo nyemuse na ki bandako. Davide atibirĩ a ka nanga bakindo aFereseto. Ko amangi tiko wa irapupo. Fuo Bakindo Akisa bi gipai re, ko abira gako amoyambu tipa ye yó na “irapupo” fuoko. Si tie ziazia nga, Yekova aima fu maku fu Davide tipa gi gako mangaapai re. I ado Davide kusayo rogo gu bakporo re fuo bata ko wa vunde nibati kpakpu mbia yo.—1 Samuere 21:13-15.

9, 10. Tipagine Davide ake Atambuahe namba 34 ti ni, na gini kura boro pani avura du berãko yo ho ko aasara gu bia ni re?

⁹ Ziazia Kekeapai agumbanga ha furani singia ga Davide akumba amongo ndu naako ku Gata yo watadu i asungu kina ringara aYisaraere yo mbembedii na Gata kaa sinzirirago patiko te. Ka si vura du nga kina ginipai nadu, i aima du na bakere ngbarago ho i akoditiyó ni berewe fuo ya Davide fuyó wee Yekova aima batasa ko berewe. Gupai namangi re angia mburu sara gu bia Atambuahe nga namba 34, a wa gu kekepai du bariihe rogo NW ayugoho. Rogo gu bambata averesi du saba rogo gu bia Atambuahe re, Davide ataasirimo Yekova tipa batasako na kini yambu abadiangbako i mongo kiisipa rimo Yekova naako nigu Boro nabatasa Gako aboro.—Atambuahe 34:3, 4, 7.

¹⁰ Davide na gako akumba agbu rogo siimbia dagba abaagangara Adurama yo, nadu Yisaraere yo, baturõho adu wa amairo bawe ku uroyo ti Gata. Yo du agu aYisaraere rago angbanga tiyó na agu apai naamanga tiibe ga Saura zogarago ya ayeni ka kodatiyo na aDavide. (1 Samuere 22:1, 2) Pa agu aboro re navura du berã Davide yo ho ko asari gu bia ni du rogo Atambuahe 34:8-22. Agu atingidapai du rogo agu averesi re ninyanyakipa pai tipa rani areme, sidu, ani nika gbia undo agbia bakere be wisigo ani gi bia Atambuahe re sirisiri.

Ya Mo Oni Wa Davide?

11, 12. Gini ndupai duho berani tipa ka nye kaa sambuo Yekova kindi?

¹¹ “Mi asambua Yekova ti arago dunduko; tambuako adu ngbare kindi.” (Atambuahe 34:1) Ho Davide aaraka ni nvuo yo nigu boro i aima do ni kusayo dagba aboro, ko aima du nirengo na zingo dungu ahe tiko. Ono tie, wa agi afugo du kuari re ayugoho, anga bakabangirise tipa aũzegino ko amoihe kuba sambuo Yekova te. Nangbaa gu kpiapai re tipa rani ho du ani ni rogo arungo! Singia ani sukuru yo, ba sunge yo, na akuarani aKristano, watadu ani gene tungusapai yo, gupai si aida ani duna bakere nyemuhe gbe nga kaa sambuo Yekova. Oni berẽnga tipa gu bazagino nduapai si aida ti ni ani naasambuo ko! Nikpiapai, anga zingo ho ti agu ahe rengbe ani ka kura baraha nivovoho watadu ka gbia ngbarago behe dagba gu iiriwo ahe Yekova akusihe te. Na ani berẽnga pa agu ahe ko namangihe rogo gu gene nga ga gu gako riigbu du auru kpotosende! Wa vura duhe nga aboro nga airazangarengba, Yekova ima mangasunge naayó ngba iiriwo gene ti gi gaani regbo re. Wai du gu mangaapai nga ga Mbori ka i ringbisihe kuti agu aboro akurayó nasa yó ni ambori kaa iriso yó? Ya mo oni aidanga kuti gupai Davide agumbaha te, nga gu nayaa: “Ako Gbia, kura ambori adu nga ho wa mo dagba ambori te, a nga kura mangaapai ho du wa gamo mangaapai a te.”—Atambuahe 86:8.

¹² Wakina Davide, gu ga Yekova mangaapai adunga gu waha ya nafõngbaduraniyo ani naasambuoko kindi. Kurigure, ani na ngbarago ka ino gupai nga, ga Mbori Kindo awere vurube Yesu Kristo, nga ga Davide nyenye Dikumbo. (Yugoti 11:15) Si nayugo gupai nga, digido gi zegino re ima mbeda kada. Sidu, gu raka nga ga aboro du bangeyo wa abirioni sita, si ngbapai. Anga regbo adunga wo mbata zingo aduho tipa ani takipande ga Mbori Kindo fu ngbatunga aboro rogoho naapa gupai si nika mangaha wa gu duhe awere re te, na ka undo yó i tona ka sambuo Yekova na ani. Sidu, gupai si aida ani peresihe mbatayo nga ka mangasunge na agu amamu dunduko ka kuru furani tipa ka ngarasa aboro i di gi “wene pangbanga” re kugume mbata regbo nika susa.—Matayo 24:14.

13. (a) Da Davide aasambuo tiko rogo ní yo, na gini ngbatunga aboro nakaragapai kuti ni? (b) Wai bayee aboro aye kurogo gu dungurati nga ga aKristano areme?

¹³ “Mbisimore nasambua tihe rogo Yekova yo; rungorungo aboro gi pa ha, ki ngi angi.” (Atambuahe 34:2) Davide asambuongo tiko herẽ tipa agu apai ko amangihe nitiko te. Nikpiapai, ko asambuongo tiko tipa wai ko abiriki bakindo Gata te. Ko aini gupai ngawee Yekova du nabandako ho ko aduni Gata yo na ko abati mbiko ga Yekova undo. (Asanza 21:1) Sidu, anga ko aasambuo kina tiko te, ono Yekova ko aasambuo tiko rogo ko yo. Gi ga Davide mangaapai re asa gupai nga bayee aboro ye fuo Yekova. Yesu anaataasarimo Yekova wakina gure, na si aye na aboro umbasitise fuo Yekova, nga agu aboro rengbe boro arengba ka yugopai fuyó. Rogo agi aʹuru re, gu bayee aboro du dagba arikaaboro naye kurogo gu dungurati nga ga mbedimbedi aKristano du rogo dungu aringara, nga gu dungurati du Yesu nga Riihe. (AKorosaio 1:18) Ho gi bayee aboro re abi gupai ni nga ga Mbori amoyambu nga bayee aboro nataasarimoko, na ho i agia gu pangbangaa ni nga ga Ziazia Kekeapai nga gu ga Mbori toro aundo yó i girogoyo, si nafõngbaduyo yo.—Yoane 6:44; Amokedi 16:14.

Adunguratise Nanyakasa Gaani Idapase

14. (a) Ya mo si arengbe bangiri Davide ko naasambuo Yekova nikina nisako? (b) Gini kpiapai Yesu amoihe nibipa dunguratise tipa irisombori?

¹⁴ “Ako, ani táasi rimo Yekova na oni, ani mongo kíisi pa rimoko!” (Atambuahe 34:3) Si aarengbanga bangiri Davide ko naasambuo Yekova nikina nisako te. Ko ayambu abadiangbako ngangaraa i koditiyo naako ka mangaha wo. Teketeke a, Yesu Kristo, nga Bakerepa Davide, aduna ngbarago kaa sambuo Yekova dagba dungu aboro, bambutiria yo, ti regbo apumbo tii ga Mbori yekaru Yerusarema yo, na dagba apefuoko. (Ruka 2:49; 4:16-19; 10:21; Yoane 18:20) Nga gu mamu ngaha ani pefuo gu kpiapai nga ga Yesu rogo sambuo Yekova na akuarani aidipase ti agu aregbo dunduko regboho kaani da, ono gbe, ti gi regbo re ‘wa bi ani he ya gu regbo re [digido gi zegino re,] si nambeda’ wa pai!—AEbere 10:24, 25.

15. (a) Gine gupai namangi Davide aye nani kurii gako akumba? (b) Wai ani agbia undo mbiko du pati gaani adunguratise?

¹⁵ “Mi agbata Yekova, ko ki karaga pai fere, ki batasi re be gimi agunde dunduko.” (Atambuahe 34:4) Gipai namangi Davide re, si aduna nyanyakipaha fuko, mbiko ko asusi kumbatayo na fugo kini yaa: “Gi rungorungo boro re akpari, Yekova ki gi pa ni, ki batasi ni be agu apai nafuda ni dunduko.” (Atambuahe 34:6) Ho ani akodatirani ni na akuarani aidipase, ani na dungu amamu berani ka gumba agu apangbangaa nika sonosa rani dagbarani nga agu apangbangaa du tipa wai Yekova aundo rani ani hi kpakarakpakaraapai. Gipai re nanyakasa gu idapase nga ga akuarani aidipase, a wa afugo Davide anyakasi gu idapase nangia ga abadiangbako. Nibi gupai namangi Davide, abadiangbako ‘angere koyo du [Yekova] ni, kpakpuyo kidu imaima; ka pa mungo adunga ti kpakpuyo ya.’ (Atambuahe 34:5) Wa i avura kaa ora be Bakindo Saura, i aadunga na zee te. I aduna kido ya Mbori naasongoda Davide, na kpakpuyo kidu imaima. Wakina gure a, gu vovo aboro duna nyemu rengo tiyó gbiati aguyo niima du nga ndikidi aKristano, i nangera kube Yekova tipa ko songodi yó. Wa duhe nga i nitiyo aima bi gako undo tipa yó, si du kpakpuyo aki ti ni imaima kini yugupa gu gayó diaberã mangiyó ho tipa ka nye niruruyo fuko.

Oni Duna Tambuahe Tipa gu Undo Amaraika Afuhe

16. Wai Yekova namangisunge na gako amaraika ka banda rani?

¹⁶ “Ga Yekova maraika navo gbu pati agu yo nagunde ti ko [na ko] ki batasi yo.” (Atambuahe 34:7) Davide aabingo ho ngawee Yekova arengbe ka batasa kina ko sa te. Rengo ngaha nga, Davide angia ga Yekova mbedimbedi boro, i asiako ko zogo aYisaraere gizo kumbatayo. Ono ko aima ino gupai nga Yekova namangasunge na gako amaraika kaa sinzirirago kurii airisiko dunduko, gu kikindigi payo na gu umba payo dunduko. Rogo gi gaani regbo re, ndikidi airisimbori aima bi gupai nga Yekova nabanda yó abanda. Ani dinga agu apai namangi Germani yo, Angola yo, Malawi yo, Mozambique yo, na rogo kura aringara nikpiapai, nga agu aringara abazogo aguari rogoho na vura tipa ka nyasa riipa aDezire Yekova kpäkäyä. I adogotiyo adoga gbua. Kuba gure, ga Yekova aboro rogo agu aringara re aazugo kumbatayo kindi wa i amongo nikiisipa rimo Mbori. Tipagine? Bambiko Yekova aamangasunge na gako amaraika ka banda yó na ka ruga yó.—AEbere 1:14.

17. Rogo gini agene ga Mbori amaraika aundo rani?

¹⁷ Kurigure, ga Yekova amaraika rengbe arengba ka aria apai tipa ka sa agu aboro nasa akurayó i koto, i rogodi yó kusayo dagba ga Yekova aboro. (Matayo 13:41; 18:6, 10) Wa vura duhe nga ani ainonga gupai amaraika amangaha te, i namangapai amanga ka rogoda kura apai kusayo nga gu rengbe ka kiso gene ga Mbori sunge berani. Na i nabanda rani abanda a be agu apai rengbe ka gbarasapa gaani pagume dagbarani na Yekova. Gu nyakipaha gbe nga i naruga rani tingba sunge takapande “nyenye pangbanga” fu ngbatunga aboro dunduko, kodihe na aguyo du rogo agu aba ani amanga gaani sunge rogoho tiiworo kereapai. (Yugoti 14:6) Rogo agu abuku du mburuhe rii Ziazia Kekeapai aDezire Yekova naakusaha, i aima digo niyugu gu gopai duho tipa gu undo amaraika afuhe.a Ngbatunga agu apangbangaa re ima nge ka si aidanga ani basapaha abasa gbua ki yawee kungbopai du mangi nisaha ya.

18. (a) Gine si aidaha berani tipa ani gbia undo be gu bandahe nga ga amaraika? (b) Gine ani ka wisigoho rogo gu papara kekepai naye fuo gere?

¹⁸ Tipa ani naagbia undo kindi be agu arugute gbiati bandahe nga ga amaraika, si naida ani nye kindi kuti kiisopa rimo Yekova ka aboro vura kaa soga rani vurũ. Oni tingidi gupai nga, ga Yekova maraika nasinzirirago kina ‘pati agu aboro nagunde tiko.’ Rogo gupai yo re nga gine? Gine nga gunde ti Mbori, na wai rengbe ani ka sonosaha? Tipagine Mbori aida ti ni ani gunde tiko? Ani nika sakapai tipa agi asanahe re rogo gu papara kekeapai naye fuo gere.

[Gu rukutu kekeapai du bandu kpewaraga yo]

Gaoni Karagapai Nga Gine?

• Gini aʹasada Davide ahihe ho ko aduni niparanga?

• Wakina Davide, gine nga gu bambatapai ani abakabangirani tipaha?

• Wai ani abi agu adunguratise nga ga aKristano?

• Wai Yekova amangasunge na gako amaraika ka undo rani?

[Map on page 24]

(For fully formatted text, see publication)

Rama

Gata

Zikeraga

Giba

Yerusarema

Adurama

Keira

Eburone

Zipi

Berengua yo

Maona

Nobo

Betereme

Enegedi

Karumera

Baime Tikpo

Gbakigbaki kpiarago: Based on maps copyrighted by Pictorial Archive (Near Eastern History) Est. and Survey of Israel

[Gu kpiahe du ti kpewaraga 25]

Wa Davide avurangia yambayamba boro, ko anaakiisopa rimo Yekova akiiso