Aboro Maku Nga Agu Aboro Nafu Taarimo Fu Mbori
“Ako Gbia, agu arikaaboro dunduko mo amangi yo i aye ka fu irisa bara bangiro, i ataasa rimoro.”—ATAMBUAHE 86:9.
1. Tipagine rengbe ani ti ni ka fu taarimo fu Mbori rogo gu gene susi gu rengbe agu ahe adunga unga rogoho ya ka mangaha?
YEKOVA ima rẽ tipa agu aboro dunduko ko akusi yo gbiati agu ahe ko akusihe fu taarimo fuko. Baraho agu ahe zanga unga ko akusihe ataasarimoko ni kukiri, ono tipa rani nga aboro, ani na tandu berani ka sakapai berã rani yo, ka giarogopaiyo, ka yugo tambuahe, na ka irisombori na agu afugo aboro agiaha agia. Sidu tie, ani du bake papara Atambuahe aafura fu rani niyaa: “Oni ta ngbaroni ni ngbarago fu Mbori, zegino dunduko; oni bi bia taarimoko ku ari; oni mbakadi tambuako ni taasitaasi he!”—Atambuahe 66:1, 2.
2. Ada karagapai kuti gu zinahe i azinahe nani tipa aboro taasirimo Mbori, na tipagine karaga yo pai ti ni?
2 Agu aboro naká ka ida kuti gupai nga Mbori kina ti ni, watadu naká ka fu taarimo fuko, i ngee kisusi. Wa vura duhe wo, rogo aringara 235, agu aDezire nga ga Yekova yo du bangeyo susi amirioni sita nayugo gupai tigayo nga, i nabi ‘gu ga Mbori asino abi ka aboro abinga ha ya’ rogo agu ahe ko amangihe, na i ima ‘gia’ gu dezirepai gu kusikusiahe zanga unga amangaha kukiri. (ARomo 1:20; Atambuahe 19:2, 3) Niwisigo yo Ziazia Kekeapai, i ima yee a ki ini Yekova na kini kpinyemu ko. Atambuahe 86:9, 10 afura tipa gipai re kumbatayo ki yaa: “Ako Gbia, agu arikaaboro dunduko mo amangi yo i aye ka fu irisa bara bangiro, i ataasa rimoro. Bambiko mo nga bahe, mo namanga iiriwo apai, kina ro sa nga Mbori.”
3. Wai “bakere rimbasa aboro” ‘amanga pa Mbori uru na yuru’?
3 Yugoti 7:9, 15 naringbisapa “bakere rimbasa aboro” nga airisimbori wa kina gure ya i “namanga pa [Mbori] uru na yuru rogo gako yekaru.” Anga si nga wee Mbori naida gako amoyambu naataasarimoko ataasa kindi uru na yuru zanga piriga te, ono gupai namanga nga, agu aboro nairisiko, i rogo gu riigbu rengbe rogo zegino dunduko. Ho duhe ni nga yuru rogo kura aringara, gu regbo re nga regbo imarago ga Mbori amoyambu amanga dezirepai rogoho rogo kura papara kpotosende. Rogo gi gene re, ani rengbe ka yawee uru na yuru, aboro kinaho nataasarimo Yekova. Ngbutuko kumbatayo, “agu ahe dunduko du na omeonga” nika taasarimo Yekova ataasa. (Atambuahe 150:6) Ono tie, ti gi regbo re, ginipai rengbe ani wa du ani nibasasa ka mangaha ka taasarimo Mbori? Gini kpakarakpakaraapai rengbe ani ka gbia tirani nani? Na gini amaku napido agu aboro nataasarimo Mbori? Nikaragapai kuti gi sanahe re, ani wisiginga gu pangbangaa du rogo Ziazia Kekeapai tipa gu tunga nangia aGada.
Gu Kpakarakpakarapai Nadu Mbata
4. Gini kpakarakpakarapai gu tunga nangia aGada agbiatiyo nani?
4 Mbata fu i rimi kurogo Ringara Mokido, gu tunga nangia aGada asanahe tipa Mose idihe fuyo i sungu rogo gu ringara nadu mbiti Yaradene yo ku uroyo nangia ba rika anyaa. (Pa Geda Aboro 32:1-5) Pa raka yo rogo gu rago re ayugu gupai nga, wo kereapai nikaa gbia yo. Gu Ngboongborago nga ga Yaradene nadu ku diayo arengbe ka banda aguyo naaraka yo, nga gu rago ka abanzengere arengbanga ka yara rogoho ka ziorago ya. (Yosua 3:13-17) Ono, tipa agu aringara nadu mbiti Yaradene yo ku uroyo, kumba nga George Adam Smith naya rogo buku nga The Historical Geography of the Holy Land wee: “Agu aringara re nigu tumbatumba rago nga ringara Arabia, nikpazakpazaha na ka he adunga ho nakiso gene rogoho ya. Nisangbana gipai re, wo aboro naaye dedede kaa ti na vura rii agu aringara re, bete aguyo naaye nibadungu yo kurogoho na agarã dunduko na rimbasa gayo anyaa tipa ami riki rogoho.”
5. Ginipai Yakobo angarasi atita Gada i mangihe ho avurayo ka zubo yo ni?
5 Wai gu tunga nangia aGada arengbe ka raka rogo ngbatunga yososo fudifudiapai wa gure? Dungu akama agarã bakuru kusayo, wa gu titayo nangia Yakobo aasamba, ko afura tipa pai kumbatayo ki yaa: “Gada, rikavura nikamanga ko, ono ko amanga yo amanga.” (Bambata Pai 49:19) Ti bambata gigi agu afugo re, si nazeresa kina kpoto boro yo. Ono tie, rogoyo nzunzu angia zinahe fu gu tunga nangia aGada i sovura kuti avurayo. Yakobo arugusipai bangiriyo ya ka i sovura kuti avura yo, agu avurayo re aora aora beyo kusayo nizee, ii, na aGada kini do fuo yo giiyo yo.
Gu Kpakarakpakaraapai Du Areme Nibipa Gaani Irisombori
6, 7. Wai du agu apai du tipa aKristano areme wa kina gu nadu tipa gu tunga nangia aGada?
6 Wa kina gu tunga nangia aGada, sungu ani asungo nga aKristano areme gbaiga fu gu sosodaapai gbiati gu fudifudiapai du rogo ga Satana zegino; anga iiriwopai ho nabanda rani be sota nani te. (Eyobo 1:10-12) Dungu rani si aida ani sovura na diabese tipa kaa ndu ku sukuru yo kindi, na mangasunge ka gbia agu ahe nika songoda rani rogo raka, na ka sonosa awirani. Si aidanga a ani basapa gu fudifudiapai namanga kina boro rani te watadu ngbatunga gu du tiikpotoraniyo. Si naida gu kura aboro hi ‘kiwe tiikpotoyo yo’ rogo gu ngbatungaha nga kere gbara. (2 AKorindo 12:7-10) Gu kura aboro narungo be gu berã nga kiinga payo te. Gu ‘gbegbere aregbo’ nga ga gbinza rengbe ka ká na agu aKristano nga sosono aboro ti manga yo sunge na ome wa gu i anamangaha mbata.—Batungusipai 12:1.
7 Fugo gu mokedi nangia Pauro natingida rani na gupai nga, “[ani nasota na] atandu, sa azogo zegino nga ga gi bitimo re sa rimbasa agu atoro nga ga gbegberẽpai yo rogo agu arago du ngbangbaturũ yo.” (AEfeso 6:12) Zanga piriga, du ani adu gbaiga fu ‘gu toro nga ga zegino,’ nga gu sino nga ga samungu na ga iraira mangaapai nga gu Satana gbiati gako adaimona aurugoho. (1 AKorindo 2:12; AEfeso 2:2, 3) Wa kina gu bagunde ti Mbori nangia Roto, gu wasiwasi apai agu aboro du pati rani agumbaha na gu i amangaha areme rengbe arengba ka fu gberarago fu rani. (2 Petero 2:7) Anga he ho a nabanda rani be gu ga Satana vura ko asoho ngburungburu kuti rani te. Satana nasovura na gu yangara mbedimbedi aKristano, nga agu aboro “naka kuti ga Mbori rugute, na . . . kuti gu dezire pai nga ga Yesu.” (Yugoti 12:17) Satana nasovura aso a kuti “kura akandoro” rogo agu angbatungaha nga ka zahe ti gayo sunge tungusapai gbiati rungosiyo.—Yoane 10:16.
Ani Zogo Riirani fu Satana Watadu Ani Sovura Kutiko?
8. Wai si aida ani mangipai kuti gu zubo rani Satana azubo rani nani?
8 Gine si aida si du nga gaani mangapai kuti gu zubo rani Satana azubo rani nani? Wa kina gu tunga nangia aGada bakuru kusayo re, si naida ani du nyanyakii rogo toroyo ka sovura kutiko na ngbanyaa kuti agu arugute Mbori afuhe. Si nipa gberarago nga, gu kura aboro ima zera fu gu fudifudiapai nga ga raka i agbiatiyo nani, kini basapa gu gayo asunge nga ga toro. (Matayo 13:20-22) Dezire sa agumba ndu gupai aboro naangenga ba gayo dunguratise ti ni ya ki yaa: “Ome awirina nabata abata nirengo be agu apai nafuda yo. I dunduko nifudifudiyo rogo gayo aberã.” Rengo ngaha nga, aboro areme na dungu nduapai nabatasa omeyo. Sidu, si taata fu boro ni bi irisombori nigu kura sunge mbuko, nigu rorõi tindiro si aida ni tindihe. Ono tie, ya mo gupai re nga wene ngera kutipai, niruru bipai?
9. Wai pa tinda boro ga Yesu domia afu ongoda funi?
9 Ani wisiginga gupai Yesu agumbaha fu gu rimbasa aboro nadu ti ragoko, nga gu rimbasa aboro zanga kapa, gu fudifudiapai nga ga raka aima batasa omeyo. Ko ayaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni.” Ya mo Yesu ayawee i nika gbia ongoda nimbu yo mangasunge fu Mbori? Wagusa te, Yesu ayaa: “Oni dí gi gonga ku gorõroni, ki wiriki pai bere; bambiko bayee boro nga mi nga irazerangbaduse, oni ki bi ongoda tipa mbisimoroni.” Gu gonga gumba yo paha herẽ, si nga ngua-domia watadu marã, niguhe naundo boro ni tindi rorõi tindiro watadu naundo nyaa u tindi tindiro. Ono tipagine ka boro aidi ti ni ka tinda ngbatunga gu kura tindiro re? Anga ani ima ‘mbu be dungu apai tee’? Ii, ono i rengbe ka sa gu fugo du rogo fugo Giriki re ka gedaha a nga: “Mo ye ani tindi gi domia na mo.” Ono oni berẽnga gipai re: Yesu napepa fu tiko ka undo rani ani tindi gaani atindiro na ko! Si aidanga ani tindihe nisarani te.—Matayo 9:36; 11:28, 29; 2 AKorindo 4:7.
10. Gine nga sangbana gaani a’asadatise ka fu taarimo fu Mbori?
10 Ho ani asa tirani ni niga Yesu abawiriki, gure nga ani tona sovura kuti Satana. Yakoba 4:7 nakido rani niyaa: “Oni ká fu bakitingbanga, ko ki oro be roni.” Anga gipai re rogoyo nga pa mangaha nitaatapai te. Pa manga boro sunge fu Mbori naida bakere asadatise. (Ruka 13:24) Ono Ziazia Kekeapai nafu gi kidohe re fu rani rogo Atambuahe 126:5 niyaa: ‘Agu aboro nami tunga ni aume i aké ahe na wawa ngbarago!’ Ii, ani airisonga gu Mbori adunga na tambuahe tiko ya te. Ko ‘nafu mosoro afu fu agu aboro nagbata ko,’ na kini fu maku fu agu aboro nataasarimoko.—AEbere 11:6.
Fu Taarimo fu Mbori Ni Abatungusipa Kindo
11. Wai sunge tungusapai abanda rani be Satana?
11 Yesu azinahe ki yaa: “Oni ndú . . . ki sa arikaaboro dunduko ni abawiriki.” Sunge tungusapai nga bangua gene ka fu “motumo tambuahe” fu Mbori. (Matayo 28:19; AEbere 13:15) Pa ‘voda ani ndurani na gu ũsunge nga wene pangbangaa nga ga zereda,’ nigu nyanyakipa ‘gaani ũvura’ ani adiaha tipa si banda rani be Satana. (AEfeso 6:11-15) Pa taasa ani rimo Mbori tingba gaani sunge tungusapai nga bawene gene ka nyakasa gaani idapase. (2 AKorindo 4:13) Si naundo rani ka berã rani ameranga gene kungboapai yo ya. (AFiripoio 4:8) Pa manga ani sunge tungusapai na akuarani airisimbori naundo rani ani gbia ngbarago be wene kodatise na yo.
12, 13. Wai rengbe sunge tungusapai dedede nga ga aborokporo ka undo yo? Oni yuguhe na kpiapai.
12 Sunge tungusapai rengbe arengba a kadu nigu wene mangaapai nga ga aborokporo i akoda beyo kuti ni. Rengo ngaha nga, si naida i mbu agude a i nge ambaro rengbe arengba zanga zadaha nitorotiri. Ono tie, tipa gu sunge tungusapai nga ga aborokporo, si aidanga i mbuhe si du ni gupai i amangaha nidingisoro gbua te. Avunguagude rengbe ka sa sunge tungusapai nigu sunge nafu ngbarago niraba yo awiriyo tipa i ini wai ka fura na aboro ngbadimo kpuyo. Ya mo rago naangbanga ti agude ho i nimangi gupai ni wenengai ini yo ho tee? Avunguagude rengbe ka undo awiriyo i gbia ngbarago tingba sunge tungusapai nizanga sosoda yo tipa i mangi agu apai susi omeyo.—Bambata Pai 33:13, 14.
13 Kurii gure, agu aborokporo kodi tiyo sa ka tambua Mbori nambakada gayo pagume si du dawedawe. Oni wisiginga gupai nadu tipa wirinarani nga guri kumbaari angianga boro ndikidi idapase ya ambu ri na kporo gbiati agude bisue. Fuo du apai tipa ri were, si aidi ri asadi ka gbata sunge-marã tipa ka ruho ka gbia ahe tipa tiri na awiiri. Ya mo omeri abati be agi apai re si ki sa ri ri mbupa raba awiiri rogo toroyo? Ri nayaa: “Mi anawisigo Ziazia Kekeapai gbiati agu abuku du mburuhe rii Ziazia Kekeapai zanga manga nyomoro tingbaha na kini asadi tire ka manga gupai mi agedaha. Mi anadia agude na mi dedede kupati adunguratise yo na ku gene sunge tungusapai yo a nitanga ani nani ti akporo. Gine nangia sangbana gimi asadatise? Awire dunduko tibarayo bisue zi bapatiza.” Pa rimiso oni tironi wenengai kurogo sunge tungusapai rengbe ka undo roni wa kina gure a rogo gaoni asadatise ka raba awironi “ni ga Gbia rabahe na rugahe.”—AEfeso 6:4.
14. (a) Wai rengbe agude ka taasarimo Mbori sukuru yo? (b) Gine rengbe ka undo aparanga ka ‘zee manginga yo na tungusa wene pangbangaa ya’?
14 Aparangaa, kangia oni naraka rogo gu ringara irangbii azangahe rogoho ti manga dezirepai sukuru yo ya, oni nafu taarimo fu Mbori yo nimanga oni dezirepai fu akuaroni, watadu oni nambu gunde be aboro si ká na oni ti mangaha? (Asanza 29:25) Degude du garãri nga 13 naraka Puerto Rico yo akepai ki yaa: “Zee azionga re ti tungusapai sukuru yo te mbiko mi ima ino gupai nga, gupai mi atungusaha re, si nga rengo. Vuru gaani bambu wirikapai yo, wo mi naatutumba bere kuari dedede ka gumba gupai wiriki mi he rogo Ziazia Kekeapai. Ho du mi ni na regbo bere, mi nindu ku bambu banda abuku yo tipa gedaha ka geda gu buku nga Young People Ask.”a Ya mo Yekova afu maku furi na gari asadatise? Ri natingidaha niyaa: “Ti kura aregbo, agu akuare du ani na yo rogo bangisa riko nasana re na asanahe na tipa wirina gu buku re a.” Kangia oni naamanganga gipai re te, isoke si avura ida gupai beroni tie nga oni “kpária pa gu he nga ga Mbori nyemu he du ni wene he, nzunzu, ni ziazia ha” nikakaka sirisiri wisigopai nisase. (ARomo 12:2) Fuo ida oni kuti gupai zanga kapa nga, gupai wiriki oni he re, si nga rengo, ‘zee amanganga roni na wene pangbangaa te.’—ARomo 1:16.
‘Zakizaki Ngbadimo’ Tipa Sunge
15, 16. Gini ‘bakere ngbadimo nazaka tipa asunge’ bete aKristano arimihe, na gini amaku gbia yo ho?
15 Gu mokedi nangia Pauro akepai ya ‘bakere ngbadimo adu nizazaha’ fuko tipa sunge. (1 AKorindo 16:9) Ya mo agu apai du tipa roni si rengbe ka mbu roni oni tona manga kura asunge? Nikpiapai, pa rimo oni sunge tungusapai kaa mangaha ti aregbo dunduko watadu nimoundo bazakigene naida oni naakpara asaa 70 watadu 50 rogo adiwi nibasasa tipa sunge tungusapai. A wa du sino aboro, agu aKristano du rogo dungurati, i na tambuahe tipa gu wene sunge abazakigene amangaha. Ono tie gu rengo nga, i nadia bakere regbo ku gene sunge tungusapai yo asanga yo i naabi tiyo wa payo gu kii akio ti ga awirinayo te. Kuba gure, i nasonosa gu sino berã Yesu angarasi apefuo ko i du nani nga: “Ani nga mumungo amoyambu; ani mangi kina gu nga gaani pai.”—Ruka 17:10.
16 Sunge tungusapai nibazakigene naida boro rugu tini nisani, ni mbakadi agu apai du tipa tini, kidu na nyemu ka mbupa kura gani apai. Ono tie, agu amaku du tipaha, si rẽarẽ nani. Paranga dee ni nazakigene du rimori nga Tamika ayaa: “Pa rengba mi ka yugo Fugo Mbori nzunzu fu aboro nga ndikidi maku fere. . . . Ho mo atungusapai ni ni nazakigene, mo namangasunge na Ziazia Kekeapai bakere gbe. Awere wa mi atanga ti akporo na tungusapai, mi ima ino agu averesi rẽ na airakporo nibasasa.” (2 Timoteo 2:15) Kura nazakigene du rimori nga Mica ayaa: “Pa bi mi wai rengo a’aria ga aboro raka si ngba, nga gu kura iiriwo maku.” Paranga du rimoko nga Matthew nafura wa kina gure tipa gu ngbarago boro agbiaha “wa ni abi boro ni naye kurogo rengo yo. Anga gu kura ngbatunga ngbarago ho rengbe ka dia baha te.”
17. Wai Kristano sa adibe gu gbegbere aberã ri adu nani tipa sunge tungusapai ninazakigene?
17 Oni rengbe ka berãpa tona sunge tungusapai nibazakigene? Isoke oni vura du na nyemu ka mangaha wo ono oni nabi tironi wa rẽnga oni te. Wirina du rimori nga Kenyatte idi gupai nga: “Mi aduna iraira aberã tipa sunge tungusapai ni nazakigene. . . . Mi anabi tire wa mi arẽnga te, mbiko mi ainonga wai ka tona fugo na boro te watadu ka sakapai na yo rogo Ziazia Kekeapai a te.” Ono tie, abaakumba asia gu nazakigene naima ino sunge tungusapai wenengai ri naagasa Kenyatte ku genehe yo. Kenyatte nayaa: “Sunge tungusapai na ri angia pa ngbarago. . . . Si aba nyemu tungusapai tire ni nazakigene.” Isoke ka i ngarasi roni tooni na ki yugupai fu roni tooni, oni rengbe arengba a ka du na nyemu tungusapai ni bazakigene.
18. Gini amaku rengbe ka ye fu agu aboro natona sunge tungusapai ni amokedi?
18 Sunge tungusapai nibazakigene rengbe ka zaka ngbadimo kura amamu sunge. Nikpiapai, bete agu aboro nga arogotise rengbe ka rẽ tipa i raba yo i kuru ni amokedi ka ndu ka tungusapai rogo gu ringara angianga gayo ya. Amokedi du wa ka i inidi tiyo na agu apai du rogo vovo ringara, isoke si rengbe ka ida gupai beyo nga i wiriki vovo fugo-aboro, i wiriki vovo sino raka, na ka inido tiyo na vovo ariahe a. Ono tie, agu amaku naye fuyo fuo manga yo agu apai re nasa agi apai angbakanga re ya nikina taatapai gbua. Mildred, nga gu mokedi ima sona rogo inohe natungusapai Mexico yo nayaa: “Mi abiranga tire ti gu diaberã mi amangihe ki sa tire ni mokedi te. Si nga gupai mi aima duna nyemuhe tire mbure kindi nitooni degude.” Gini amaku nafu ngbarago furi? Ri nayaa: “Si nikpakarakpakarapai boro bi boro ka wisigo Ziazia Kekeapai na ni ringara kpurani yo. Herẽ, mi nidu na aboro bere biama ti bangisa regbo nga aguyo nakura ku gene sunge tungusapai yo!”
19, 20. Wai mangasunge Beteere yo, mangasunge dudua abambu kini tanga nani rogo dungu aringara, wirikapai rogo gu Sukuru Du Tipa Yugopai fu Amoyambu, aye na maku fu dungu aboro?
19 Bakere amaku naye aye a fu agu aboro namangasunge Beteere yo rogo abe-basunge nga ga aDezire Yekova. Sven, nga paranga wirina namangasunge Germani yo, naya tipa gako sunge Beteere yo wee: “Mi bi gupai nga, mi namanga gu sunge nafu nyenye undo. Mi rengbe arengba ka mangasunge na agu abirĩ sunge du bere rogo sunge zegino. Ono ka gure adu wa maa boro gani marã kurogo gu baigo marã, marã andu andu ka nyasa kusayo rogoho.” Rengo ngaha nga, pa fu boro tini tipa ka undo sunge gbua zanga zio marã, ni gupai naida boro mbupa kura gani apai. Ono tie Sven nayaa: “Ho mo andu ni ku kporo yo, mo naino gupai aino nga, agu apai dunduko mo nimangihe rogo gu uru re, mo nimangihe fu Yekova. Sidu, gupai re naye na ‘iiriwo’ ngbarago foro.”
20 Gu kura awirina agbia ngbarago be mangasunge dudua abambu kini tanga nani rogo dungu aringara, nga dudua abambu be-basunge rogo agu aringara angianga gayo ya. Arogotise ue nga aguyo ima mangasunge rogo aringara muambe angianga gayo ringara ya akepai ki yaa: “Agu awirina du herẽ, i nga wene sino aboro kisusi. Kina rago nika gbera tirani ho ani ka ga ni, gure nikangia gu muambe bange regbo ‘rago nagbere’ tirani. Nangbaa agu apai namangi fu rani re!” Berewe, gu Sukuru Du Tipa Yugopai fu Amoyambu gu duho a. Agu awirina nga abakuparanga rẽ tipaha, i naraba yo rogo gi sukuru re na agu apai nga ga toro. Wirina sa nga guko nanyasi gi sukuru re akepai ki yaa: “Kina rire yo navundo wa mi a’asada tire ka gbata gu gene ka mi tambua roni rogoho tipa gi iiriwo sukuru re. Gini riigbu dunga ho rogo zegino rengbe ka manga gu bakere asadatise re ka yugopai fu aboro wa gure?”
21. Gini kpakarakpakarapai aKristano dunduko agbiatiyo nani rogo gayo sunge fu Mbori?
21 Ii, dungu angbadimo duho nizakizakihe tipa asunge. Rengo ngaha nga, dungu rani arengbanga ka mangasunge Beteere yo watadu rogo gu ringara angianga gaani ya te. Yesu nitiko aima ida kuti gupai re ya aKristano nika ‘zuka’ nibakiakia mbiko agu apai du tipa yo nibakiakia. (Matayo 13:23) Wa du ani ni aKristano, gupai si aidaha berani tie nga, ka asada tirani wenengai ka manga gupai rengbe omerani nani rogo mangasunge fu Yekova a wa rengbe agu apai du tipa rani ka mbugene fu rani ani mangihe. Ho ani amangaha ni, gure nga ani nafu taarimo fu Yekova, na ani rengbe kadu na kido nga si nafu ngbarago afu fuko. Oni wisiginga gupai du tipa Ethel, nga sosono wirinarani naraka rogo gu kporo nga ga gu sosono aboro riigbu-fu-undo angera fuo yo. Ri namanga dezirepai dedede fu agu aboro du ri na yo rogo gi kporo re na kini mangi dezirepai rogo terefuni a. Wa gari gbinza navura maa ngbanda ti agu apai rengbe ri ka mangaha, ri natungusapai atungusa na ngbaduriyo dunduko.—Matayo 22:37.
22. (a) Gine nga gu kura agene rengbe ani rogoho ka taasarimo Mbori? (b) Gini iiriwo regbo napido rani kumbatayo?
22 Ono tie, oni tingidi gupai nga, tungusapai nga gene sa gbua dagba gu kura apai ani ataasarimo Yekova ngbaha. Nidu ani ni wene kpiapai rogo gaani mangaapai na ti bibi rani ti kpoto rani ho ani amanga gu gaani sunge nga ga zegino ni, ho du ani ni sukuru yo, na ho du ani ni kpurani yo, ani nasa ngbadu Yekova si ngi. (Asanza 27:11) Asanza 28:20 nakidohe niyaa: “Gu boro du yososo ni akpátari be maku.” Sidu si naida ani ‘mi tunga bakere’ rogo gaani sunge fu Mbori, mbiko ani ima ino gupai nga, ani agbia bakere amamu agbia ka ani mangihe wo. (2 AKorindo 9:6) Ka ani mangihe wo, si adu fu rani nimamu kadu ti unga ti gu iiriwo regbo “agu ahe dunduko du na omeonga” nika fu taarimo fu Yekova, nga gu taarimo rẽ ko nani gbe!—Atambuahe 150:6.
[Gu rukutu kekeapai du bandu kpewaraga yo]
a Questions Young People Ask—Answers That Work nga gu buku aDezire Yekova akusihe.
Oni Natingidaha?
• Wai ga Mbori aboro amangasunge fuko ‘uru na yuru’?
• Gini kpakarakpakarapai gu tunga nangia aGada agbiatiyo nani, na gine gupai re ayugoho fu aKristano areme?
• Wai sunge tungusapai aundo rani be Satana?
• Gini ‘zakizaki ngbadimo’ kura aboro arimihe, na gini amaku i agbia ngbarago behe?
[Gu kpiahe du ti kpewaraga 31]
Tungusapai nibazakigene rengbe ka zaka gene agu amamu sunge nakoda:
1. Mangasunge dudua abambu kini tanga nani rogo dungu aringara
2. Sunge Beteere
3. Sunge amokedi