Ya Mo Oni Ayugokpia Ga Mbori Taarimo?
“Ani nayugo gu taarimo nga ga Gbia wa ngana.”—2 AKORINDO 3:18.
1. Ginipai Mose abihe, na ginipai namangi fuo gure?
MOSE adu nisako tutuurũ ariyo rii Bagangara Sinai yo rogo kura uru sa, Mbori ki idipa gupai fuko naamanganga mbata ya. Si angia baiiriwopai sa dagba gu iiriwoapai dunduko aboro abihe. Yekova aidihe fuko ko bi gupai kura boro abingo ho mbata ya, nga ga Yekova taarimo. Rengo ngaha nga, Mose abingo Yekova ngburungburu nibangiriko te. Mbori nibaʹiiriwo ko kisusi si ki sa gupai nga, boro ho rengbe ka biko ni ki nye kindi niunga ni te. Kuba gupai nga Mose bi Yekova ngburungburu, Yekova amoi ‘beko’ ni ũdadahe ka dada Mose daho Ko asusi ni mbembedii naako, zanga kapa, nimanga ko sunge na gu maraika naandusunge kubako angianga kina boro Yekova nasusi ya. Fuo gure, Yekova ambugene fu Mose ko bi mboimboi gi gako yuguyugu taarimo re. Yekova afura a na Mose rogo maraika yo. Ziazia Kekeapai naringbisapa agu apai namangi fuo gure niyaa: “Ho Mose azorõ ni ri Bagangara Sinai yo . . . kpakpuko [a]du imaima mbiko wa ko afura na Yekova.”—Gate 33:18–34:7, 29.
2. Ginipai gu mokedi nangia Pauro akehe tipa gu taarimo aKristano ayugoho?
2 Oni berẽnga pa tironi kurii gu bagangara yo re na Mose. Nairiwo wai ka si adu ka bi gu kurekure ngbanyaa nga ga guko duna Tanduapai dũ na ka degatue kuti afugo ko! Nga gu mamu kangiaha ka zora kusende yo rii Bagangara Sinai yo tibararoni ue na Mose, nangia azaro rogo gu Ndiko nga ga mokido! Ono tie, ya mo oni ini gupai nga, rogo kura agene, ndikidi aKristano nayugokpia ga Mbori taarimo ayugo, rogo gu gene susi gu asusa a Mose abi ga Mbori taarimo ngbaha na ki yuguhe? Gu nyanyakipa rengo re gudu rogo waraga sa gu mokedi nangia Pauro akehe. Ko ake gupai nga, mbedimbedi aKristano “nayugo gu taarimo nga ga Gbia wa ngana.” (2 AKorindo 3:7, 8, 18) Rogo gu kura agene, agu aKristano duna gu maabangirise nga ga raka auru kpotosende, i nayugokpia ga Mbori taarimo ayugo a.
Gu Gene AKristano Ayugokpia ga Mbori Taarimo Ngbaha
3. Wai ani naini Yekova rogo agu agene nga gu naadunga be Mose ya?
3 Wai ka ani wiri rengba ka yugokpia ga Mbori taarimo? Ani abingo Yekova watadu ka gia fugo ko rogo gu gene Mose agihe te. Ono wa vura duhe wo, ani ima duna inohe tipa Yekova nga gu naadunga be Mose ya. Yesu akuranga ni Masiya mbata fu susa agarã mbembedii wa 1,500 fuo kpio Mose te. Nisangbana gipai re, Mose aarengbanga ka ino wai kumbatayo ga Mbori Ndiko nikadu nidigisidigisihe rogo Yesu yo te, nga guko nakpi ka tumo aboro be gu gbegbere rungosiro nga ga ingaapai gbiati kpio. (ARomo 5:20, 21; AGaratio 3:19) Kurii gure, Mose arengbe gbua ka bi kina bete ngbanyaa ga Yekova ringbisapai, nga gu du nikodikodihe kuti gu Kindo nga ga Masiya, gbiati gu Paradiso si nika ye nani. Rogo gi gene re, ani abinga ga Yekova taarimo na ndikidi bangirani te, ono ani nabihe na gu bangirani nga ga idapase du mburuhe rii gu yugopai nga ga Ziazia Kekeapai. Kurii gure berewe, ani ima gia fugo Yekova, angianga ngba maraika ya, ono rogo Ziazia Kekeapai yo, gbe rogo abuku Wene Pangbangaa, nga gu naringbisapa ga Yesu yugopai gbiati gako sunge tungusapai nibawenehe.
4. (a) Wai mbedimbedi aKristano ayugokpia ga Mbori taarimo? (b) Rogo gini agene rengbe agu aboro duna gu maabangirise nga ga raka auru kpotosende ka yugokpia ga Mbori taarimo?
4 Wa vura duhe nga, aKristano ayugonga kpia ga Mbori taarimo ni gupai nga imarago nakí imaima kpakpuyo yo te, kpakpuyo yo nahaasarago ahaasa wenengai wa i afura fu kura aboro tipa ga Yekova irisiirisi asino gbiati aringbisapai. Nibipa gaani regbo, gu nebi nangia Yesaya afura tipa pai kumbatayo ya, ga Mbori aboro “ataka pande pa . . . [ga Yekova] taarimo [ataka] ku dagba arikaaboro.” (Yesaya 66:19) Kurii gure, rogo 2 AKorindo 4:1, 2, ani nagedaha kini yaa: “Wa du ani na gi mangapase re tie . . . , ani ambu gu okooko apai nga ga zee, ka ani ata nga rogo biriki ya, ka ani amanga nga pai na ga Mbori pai ni biriki ya; ono mbiko yugo rengo ani nambakada rimorani fu aboro dunduko ku bangiri Mbori.” Agu aboro gbe Pauro aafura tipa yo re, i nangia mbedimbedi aKristano, nangia “amangipa vovo ndika.” (2 AKorindo 3:6) Ono ga aKristano sunge tungusapai aima manga ariapai tipa badungu aboro adunga bagida bangeyo ti ni ya, nga aguyo gbia gu maabangirise nga ga nyenye unga auru kpotosende. Gayo sunge tungusapai, nga ga agu ariko du ue re, akodanga yugokpia ga Yekova taarimo kina rogo gupai i ayugoho sa te, ono si nayugoho ayugo a rogo gayo mangaapai yo. Si nga gaani sunge na nipa irisa fu rani ka yugokpia gu taarimo nga ga gu Mbori nga Bahe Kisusi!
5. Gine gaani zugo rogo toroyo afu gopai tipaha?
5 Areme, i natungusa gu taasitaasi wene pangbangaa du tipa ga Mbori Kindo rogo aringara auru kpotosende dunduko, a wa Yesu agumbaha ya si amanga kumbatayo. (Matayo 24:14) Aboro wa duku yo nibasasa dagba rikaaboro, dagba angbatunga, dagba aboro, na dagba aboro na afugoyo nibakiakia, i ima karagapai zaaza kuti wene pangbangaa na ki ima aria gayo araka tipa ka manga gupai Mbori akpinyemuhe. (ARomo 12:2; Yugoti 7:9) Wa kina agu aKristano nadumbata, i arengbanga ka onga zanga fugo tipa agu apai i nagihe na ki bihe te. (Amokedi 4:20) Susi gupai naamanganga mbata rogo ga aboro raka ya, aboro bangeyo nasusi amirioni sita, nayugokpia ga Mbori taarimo areme. Ya mo oni dagbayo? Gu zugo rogo toroyo nga ga ga Mbori aboro, si nafu gu gopai adunga kango ti ni ya tipa gako mamu kuriyo gbiati bandahe. Gupai nga, ga Yekova toro gudu na ani, si nga gu bakere gopai kisusi, bambiko bakere aome gu duho nasovura kuti rani. Awere, ani bingo ndu gupai du ga Yekova toro ti ni nirengo kurii rani.
I Aongosanga ga Mbori Aboro ti Fugo Te
6. Tipagine si aida idapase ti ni gbiati wingbaduse tipa ka ru kubara Yekova yo?
6 Ani yaa i yambu roni ku ngbangaa yo oni ye kadu nideziree kuti kere bakuondiko. Oni ini gupai nga, gu bakuondiko re na riigbu beko na bakere ome ti ni, na ko nika mangasunge na agu ahe dunduko du beko ka kiso gene-beroni tipa oni ka kusa gako gbegbere abirĩ. Tipa oni du nideziree kuti ngbatunga bakuondiko wa gini re, si naida wingbaduse gbiati kido nga, abazogorago abanda roni abanda beni. Ani rogopai duwa kina gure teketeke. Nimanga ani dezirepai tipa Yekova na gako ringbisapai, gure nga ani namanga deziree kuti Satana Bakitingbanga, kini yugu ko ni baimi-aboro na ni iraziree, nga banangi aboro auru kpotosende dunduko. (Yoane 8:44; Yugoti 12:9) Tipa oni ru kubara Yekova yo na kini sovura kuti Satana, si naida oni duna idapase na wingbaduse tibaraha ue dũ.
7. Wai du bakio gu ome nga ga Satana kurii aboro, na ginipai ko aʹasada ka mangaha?
7 Rengo ngaha nga, Yekova nga Bakerepa Boro kisusi. Gako ome nibakerehe gbe susi gu nga ga Satana. Ani rengbe kadu naa kido ya Yekova arengbanga kina kungbo rengba ka banda rani sa te ono ko naida aida a ka banda rani wa ani nakakuti mangasunge fuko na ziazia kpotoraniyo. (2 Pekapai 16:9) Wa vura duhe wo, Satana nga gbia adaimona na ni gbia gu zegino nga ga ngbatunga aboro nyaga tiyo kusayo ti Mbori. (Matayo 12:24, 26; Yoane 14:30) Nidu Satana nidingisodingiso ko ku auru kpotosende na kidu na “bakere zinga,” ko nasovura nikerehe kuti ga Yekova amoyambu, na kini mangisunge na gu zegino du awere kutii beko ka asada ka kiso ngba agu aboro dunduko natungusa wene pangbangaa. (Yugoti 12:7-9, 12, 17) Waidu ko amanga gipai re? Ko namangaha ngba agene kandara biata.
8, 9. Wai Satana amangasunge na gu nyemuse adunga na patatamana ya, na tipagine si aida ti ni ani du na rubangirise ka sia agu aboro ani kaa sungo naayo?
8 Gene sa dagba agu akuraha Satana aʹasada ka gbeberã rani kusayo ngbaha, si nga agu abakabangirise nga ga raka. Rogo gi yangara arame re, aboro satiyo ni akpinyemu marã, akpinyemu kina tiyo, na ni akpinyemu weneapai. I nga akpinyemu Mbori te. (2 Timoteo 3:1-4) Nirimiso yo tiyo dũ kurogo agu apai nga ga raka namanga na aʹuru dũ, badungu aboro kisusi ‘akparianga’ pa gu wene pangbangaa ani aye nani fuyo te. Si ziazia nga, i na nyemu wirika rengo rogo Ziazia Kekeapai te. (Matayo 24:37-39) Ngbatunga gu sino berã du ti agu aboro du pati rani re rengbe ka gbandaka niipo dagbarani, kini sa rani ani du zezeree rogo toroyo. Ka ani idihe nitirani ka sonosa nyemu aũzegino gbiati nyemu gu weneapai nga ga raka, gaani nyemuse tipa Mbori azera zera.—Matayo 24:12.
9 Tipa gi ndupai re, aKristano naasia abakureayo na rubangirise. Bakindo Soromo akepai ki yaa: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima[ha] azía yo wa sa.” (Asanza 13:20) Ani ‘naatanga’ na kina agu aboro nayugokpia ga Mbori taarimo. Si nirengo nga bawenepai ka mangaha wo. Wa ani naadungura tirani na awirinarani nga ga toro yo kupati gaani adunguratise na ti gu kura aregbo, ani nagbia ngarasahe rogo gayo nyemuse, gayo idapase, gayo ngbarago, na gayo tatamana. Ngbatunga wene kodatise wa gure nanyakasa gaani diaberã tipa ani kpatagara kuti gaani sunge tungusapai.
10. Rogo gini agene Satana namangisunge na sawiahe kuti agu aboro nayugokpia ga Mbori taarimo?
10 Ue gene nga gu Satana aʹasada tiko ngbaha ka rugusa aKristano naabayo ti yugokpia ga Mbori taarimo, si nga sawiahe. Ka gi gene-birĩ re ya iriwonga tirani ya. Ti regbo ga Yesu Kristo sunge tungusapai auru kpotosende, aboro asawia ko, i amamu ko, ki bisira pako, ki mangi ko nibasamongo, ki payasi pako, na zavura ki sukudi ko na sure a. (Marako 5:40; Ruka 16:14; 18:32) Agu aKristano nadumbata adu a ni agu aboro i anaasawia yo. (Amokedi 2:13; 17:32) Agu amoyambu nga ga Yekova yo duti gi gaani regbo re, i nagbiatiyo agbia na ngbatunga asengahe wa kina gure. Kuti sangba gu mokedi nangia Petero, ko ayawee aboro nikaa yamba yo nga “zire anebi.” Ko afura tipaha kumbatayo ki yaa: “Ti yangara arame airasawia nikaye ki nipeke agu apai boroyo akpi nyemu he, niya, ‘Wari du gu kidohe ni [du] tipa ye ko berewe? Bambiko, . . . ahe dunduko nanye wa si adu rago tonatona manga ahe.’ ” (2 Petero 3:3, 4) I nasawia ga Mbori aboro wa i ni agu aboro apenga rengo ya. Aboro nabi agu arugute du tipa manga ruruapai du rogo Ziazia Kekeapai wa kurupai. Tipa dungu aboro, gupai ani atungusaha, si nga kungbo pamungo. (1 AKorindo 1:18, 19) Wa du ani ni aKristano, ani rengbe arengba ka gbiatirani na sawia sukuru yo, ba gaani asunge yo, na ti kura aregbo, zavura dagba gaani aborokporo a. Zanga gunde, ani nandu kumbatayo kindi kaa yugokpia ga Mbori taarimo rogo gaani tungusapai, kini inihe a wa Yesu ainihe ya Fugo Mbori nga rengo.—Yoane 17:17.
11. Wai Satana namangisunge na rungosiro ka asada ka ongosa fugo aKristano ti sunge tungusapai?
11 Gu biata gene-birĩ nga gu Satana amangasunge nani niasadatise ka ongosa rani nani ti fugo, si nga sogote watadu rungosiro. Yesu aya fu apefuoko wee: “[Aboro afuka] roni sa gberãngbi; ki iimi roni. Rika aboro asóga roni asoga dunduko tipa rimore.” (Matayo 24:9) Nirengo, nidu ani ni aDezire Yekova, ani aima gbiatirani na gbegbere arungosiro rogo dungu arago auru kpotosende. Ani ima ino gupai nga, Yekova aima fura tipaha kumbatayo bakuru kusayo nga sogote, watadu wingbaa, amaapai amaa dagba agu aboro namangasunge fu Mbori na aguyo namangasunge fu Satana Bakitingbanga. (Bambata Pai 3:15) Ani ima ino gupai a nga, ni ka ani kuti gaani ruru mangaapai ti regbo asada, gure nga ani namanga dezirepai tipa ga Yekova bakere pagbia rogo haurago. Pa ino ani gipai re rengbe ka nyakasa rani zavura ti gu regbo du ani rogo kere fudifudiapai. Anga rungosiro ho rengbe ka ongosa fugo rani aongosa kindi ti tungusapai te, ka ani kakuti nyanyaki diaberã kaa yugokpia gu taarimo nga ga Mbori.
12. Tipagine si aida ti ni ani ningi angi wa nye ani niruru rani barabangiri ga Satana sogote?
12 Ya mo oni nasogote gu zomiahe nga ga zegino na kini yugu gupai nga oni niruru roni zavura gupai nga aboro nasawia roni na kini sogote roni vurũ? Ka si du wo, oni na ndupai beroni ka ngi watadu kadu na ngbarago. Yesu akido agu aboro si adu nga i aida kaa pekafuo ko ki yaa: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re. Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe: bambiko kina wo i amangi [agu] anebi nadu mbata fu roni.” (Matayo 5:11, 12) Gaoni hipai nafu gu gopai nga, ga Yekova ziazia toro duna bakere ome, si kurii roni, kini fu ome fu roni tipa oni naayugokpia gako taarimo.—2 AKorindo 12:9.
Gaani Ome Tipa Hipai Gbiati Undo Naye Be Yekova
13. Gine nga bangua ndupai nasa rani ani hipai rogo gaani sunge tungusapai nga ga aKristano?
13 Banguapai sa dagba akuraha nga gu ani ahipai ti ni tingba sunge tungusapai nga, ani nakpinyemu Yekova na kidu na ngbarago ka yugokpia gako taarimo. Aboro naida gbe ka wirika mangapai wa kina gu kura aboro i akpinyemu yo na kini fu irisa fuyo, na anga boro ho rengbe tipa aboro wiriki mangapai wa ni susi Yekova Mbori te. Bambiko gako bakere nyemuse nitiko tipa aboro, ko akedi Wiriko ku auru kpotosende no tipa ko mangi dezirepai tipa rengo na ka batasa aboro giasangbaa bekpio. (Yoane 3:16; 18:37) Wa kina Mbori, ani nakpinyemu gupai nga, ngbatunga aboro dunduko sa gayo berã na ki gbia bata; si nga ndu gupai ani atungusapai ti ni fuyo. (2 Petero 3:9) Gi nyemupai re, kodihe kuti gaani nyanyaki diaberã ka wirika mangapai wa Mbori a, si nafõ rani ani kpatagara kuti yugokpia gako taarimo rogo gaani sunge tungusapai yo.
14. Wai Yekova anyakasa rani ani hipai tingba gaani sunge tungusapai?
14 Ono tie, bakere gbe, gaani ome tipa hipai rogo gu sunge tungusapai nga ga aKristano naye be Yekova. Ko nabanda rani na kini nyakasi rani na gako toro, gako riigbu, na rogo gako Fugo nga Ziazia Kekeapai. Yekova ‘nafu hipai’ fu agu aboro naida ka yugokpia gako taarimo. Ko nakaragapai kuti gaani akpee na kini fu tatamana fu rani tipa ani sovura kuti aʹasada. (ARomo 15:5; Yakoba 1:5) Kurii gure, Yekova ambunga gene tipa gu asada omerani arẽnga nani ya si mangi rani te. Ka ani akido kuti Yekova, ko ambakada gene ambakada fu rani tipa ani naandu kumbatayo kindi kaa yugokpia gako taarimo.—1 AKorindo 10:13.
15. Gine naundo rani ani hipai?
15 Hipai tingba gaani sunge tungusapai nayugo gopai yaa ga Mbori toro gudu kurii rani. Ani yugungo ho na kpiapai: Ani yaa kura boro sana roni oni tona kparaka kura ngbatunga kpakuto sa kini tanga nani ti akporo gbua zanga dia marã tipaha. I fu arugute fu roni oni mangi gipai re ngba gaoni marã na ti regbo gaoni ongoda ti sunge. Kurii gure, ni kina ipo, oni naino gupai nga, bange aboro gbua nikina umbayo naida gaoni kpakuto; na kura aboro nika sovura aso a kuti gaoni aʹasadatise ka kparakaha. Ya mo oni naberãha ya oni rengbe ka susa kumbatayo kindi na gu sunge re zanga pirigo? Si nawira gupai nga, oni manginga ha wo te. Ono, wa vura duhe wo, si vura du nga oni aima digo nimangi asadatise kaa takapande wene pangbangaa ngba gaoni amarã na ti gaoni aregbo ongoda tipa dungu agarã, zavura abawe agarã a. Tipagine oni amangihe ti ni? Anga oni amangihe wo bambiko oni akpinyemu Yekova, na rogo gako toroyo ko ki fu maku kurii gaoni asadatise niundo ko roni oni hipai tee? Ii, nirengo!
Gu Sunge Si Aida Ani Tingidipaha
16. Hipai tingba gaani sunge tungusapai na gini rogoyo ti ni tipa rani na tipa agu aboro nadegatuyo kuti rani?
16 Gu sunge nga ga vovo mokido, si nga nyanyakipa gamahe. (2 AKorindo 4:7) Teketeke a, gu sunge tungusapai nga ga aKristano gu kura avusende amangaha awere rogo zegino, si nga gayo kumuko. Wa oni nikaa hipai kindi tingba gaoni sunge tungusapai, oni arengba rengba, ‘ka bátasa tironi na aguyo nagiapaha ngbaroni’ a wa Pauro akehe fu Timoteo. (1 Timoteo 4:16) Oni berẽnga tipa guhe nga rogo gupai yo re. Gu wene pangbangaa oni atungusaha, si nafu gu mamu fu kura aboro nga ga raka nyeanye kindi. Oni rengbe ka mbakada nyanyaki kodatise nga ga bakure na agu aboro oni aundo yo rogo toroyo. Oni berẽnga pa iriwo gu ngbarago nikangiaha nga oni raki nyeanye kindi rogo Paradiso na agu aboro oni aundo yo i wirikipai tipa Mbori! Zanga kapa, bangiriyo agonga wagusa ti gu gaoni asadatise oni amangihe ka undo yo te. Si adu nirengo nibeedi ndupai tipa oni duna ngbarago.
17. Tipagine du gi gaani regbo ti ni du awere re nikparakparaha rogo gu raka nga ga aboro?
17 Oni naraka rogo kparakpara regbo nga ga ga aboro raka. Anga kura regbo ho berewe i nika tungusa wene pangbangaa rogoho rogo gu zegino aboro nanyaga tiyo rogoho ti Mbori re te. Noa araki rogo ngbatunga zegino wa gure, na ko ki bihe si nasusi kusayo. Nga gu ngbarago ko adu nirengo nani ka ino gupai nga, ko amangi gupai Mbori akpinyemuhe rogo idapase nimbakada ko bakurungba, nga gu nasa gupai nga ko bati na gako aborokporo! (AEbere 11:7) Oni rengbe arengba a tigaoni kadu na ngbatunga gu ngbarago re. Oni berẽnga pa wai oni kadu rogo vovo zegino wa oni kaa ngera kusayo kini berẽkurii gu gaoni mangaapai nadu vuru gi yangara arame yo re, kini ini gupai nga, oni amangi agu apai oni arengbe ka mangaha ka sonosa agu apai nani nga ga Kindo.
18. Gini kidohe gbiati ngarasahe Yekova afuhe fu gako amoyambu?
18 Fuo duhe tie wa gure, ani kanga kina kuti yugokpia ga Mbori taarimo. Pa manga ani he wo aduni gupai ani kaa tingidaha nyeanye kindi. Yekova natingidapa gaani asunge atingida a. Ziazia Kekeapai nafu gi ngarasahe re: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi. Ani ki nikpi nyemu oni yugu ngbatunga gu ngarã re ni ba sa sa dati hika oni be maabangirise, dati kina digida rame, ya ka oni du nga na nyomoro ya, ono oni du ni awiriki agu yo du ni adikumbo akidohe mbiko idapase na hipai.”—AEbere 6:10-12.
Oni Rengbe ka Sakarogoyo?
• Wai aKristano ayugokpia gu taarimo nga ga Mbori?
• Gine nga bete agu agene-birĩ Satana amangasunge nani rogo gako asadatise ka ongosa ga Mbori aboro ti sunge tungusapai?
• Gini gopai duho nayugo gupai nga, ga Mbori toro gudu kurii rani?
[Gu kpiahe du ti kpewaraga 9]
Kpakpu Mose ayugukpia taarimo
[Gu kpiahe du ti kpewaraga 10]
Ani nayugokpia gu taarimo nga ga Mbori rogo gaani sunge tungusapai