Mbori Nangera Angera Nirengo Fuo Roni

SI NISINO aboro nga boro kpari fu Mbori tipa undo ho du boro ni rogo tunguotunguopai. Si wo mbiko ko ‘nga bahe, duna tandu kpaima; na gako rugatinapai nibasukasukaha.’ (Atambuahe 147:5) Ko rogo gu ba ngba kisusi ka undo rani ani sovura na diabese kuti gu fudifudiapai du ani rogoho. Kurii gure, Ziazia Kekeapai nasana rani ani ‘uka agu apai du kpotoroniyo ku barabangiriko.’ (Atambuahe 62:8) Ono tie, tipagine duhe ti ni nga, dungu aboro na gu berã nga Mbori akaraganga pai sa gayo akpee te? Ya mo rogoyo nga wee ko angeranga fuo aboro tee?

Kuba gupai nga oni gu niipo ka bira Mbori ya ko amanganga pai sa gaoni arungo te, oni tingidinga pa gu regbo oni adu ni gude. Ya mo ho avunguroni anamanganga agu apai ni dunduko oni anaidaha ya, oni abira yo ya i akpinga nyemu roni tee? Dungu agude namanga amanga wo. Ono tie, fuo sona oni, oni aduna tambuahe mbiko aboro nayugo nyemuse rogo dungu agene na pa manga avungugude agu apai dunduko gude aidaha nigu mangaapai nga ga nyemuse nirengo te.

Teketeke wa kina gure a, ka Yekova akaraganga pai fu rani ti aregbo dunduko wa gu ani aidaha ya, anga rogoyo nga wee ko nabasa gaani apai abasa te. Rengo nga, Mbori nangera angera fuo rani rogo dungu agene.

‘Ani Ni Ungarani Mbiko Ko’

Bambatapai nga, ‘ani ni ungarani, kini ta kidu ho ti ni’ mbiko Mbori. (Amokedi 17:28) Pa fu ko unga fu rani nayugopa gako nyemuse nirengo fu rani!

Kurii gure, Yekova nafuka agu ahe afuka fu rani ani aidaha tipa kaa raka. Ani nagedaha wa gere: “Mo nasonosa nvuo tipa anya, na kpepasio tipa boro; ya ni kusi riahe sendeyo.” (Atambuahe 104:14) Nirengo, Bakusirani namanga kura apai susi gu gbua nga ka fuka agu ahe fu rani nasongoda gaani raka. Niweneringise, ko nafu ‘mai fu rani ngbangbaturũ yo, na rago ida riahe gbe, ki hihisi kpotoraniyo na riahe gbiati ngbarago.’—Amokedi 14:17.

Wa vura duhe wo, bete aboro rengbe kaa baka kina bangiriyo ya, ‘Kangia Mbori nakpinyemu aboro akpi bakere gbe wa gure, tipagine tie ko ambu rani ti ni ani naarungo?’ Oni ini karagapai sa gu sanahe re?

Ya Mo Mbori Si Aida I Bira Ko?

Bakere agu apai ngbatunga aboro arungo behe naye be kina yo nitiyo. Nikpiapai, aboro ima ino pa gu mangimangiapai wenengai rengbe ka imisa aboro. Wa vura ino yo ho, i natabi gbegbere sangbana wasiwasi kodaba abi kini mangi wasiwasi kodaba, gbiati sangbana kpibuda na sangbana ingamangasunge na kere angua, ima vugundö, ima kere ambaro, na agu akuraha. Kangia sangbana gu kereapai re nayeaye na ima kpotose, da si aida i bira ni? Mbori? Watadu gu boro amanganga pai rogo tatamana ya? Gu Fugo Mbori gako toro adu kugiipa kehe nayaa: ‘Ka i nanginga roni ya; i asawianga Mbori te, bambiko guhe rũ boro kinaha ni ka kehe a.’—AGaratio 6:7.

Kurii gure, aboro dedede naimisa akurayo. Ho rikaaboro atakapande vura ni ya i ima zuboho kuti akurayo, nirengo anga Mbori si aida i birako tipa gu rungo nika ye fu aboro nisangbana gu vura re te. Ho bakuondiko azubo kurani boro-ringara ni, ya mo Mbori si aida i birako tipa gu kerepai nika manga watadu tipa gu kpio boro nika ye nisangbana gupai re? Wagusa te! Ho gu bazogo nazoga aboro ngbaome arungosi agu aboro ni du tii beko na kini imi yo, ya mo si naida ani bira Mbori tipaha? Ka ani mangihe wo, si runga fu rani te.—Batungusipai 8:9.

Ono tie, ginipai tipa gu dungu aboro naraka rogo kere zingo watadu nakoba be gomoro? Ya mo Mbori si aida i birako? Oó. Gi kpotosende du ani auruhe re nakusa gu bakio riahe susi gu rengbe tipa ka riga aboro dunduko nani. (Atambuahe 10:2, 3; 145:16) Iraira kparaka agu ahe Mbori afuhe kpaima nasa gomoro gbiati zingo si gbandaka rogo arago yasika. Gu gbangbati du ti aboro naká na gupai nga i mbakadi gupai re.

Mburupai

Ono tie, da si aida i bira ni ho kaza azio boro ni watadu ho ni akpi ni be gbinza? Si airiwo bangironi ka ino gupai nga, zavura gupai re a, anga Mbori si aida i birako tipaha tee? Mbori akusanga aboro tipa i gbinza na kini kpiki te.

Ho Yekova amoi gu bambata aboro ue nangia Adamu na Eva ni ati Edene yo, ko afu gu maabangirise fuyo nga ga raka nyeanye kindi rogo paradiso auru kpotosende. Ono tie, ko aida gupai nga, kina agu aboro duna tambuahe tipa agu ahe ko afuhe fuyo naaraka auru kpotosende. Si du ko akodi pa gayo raka ti ni kumbatayo kuti giasangbaa. Si adu nga, Adamu na Eva nika rakaa rogo Paradiso kinaho sa ka i aara ni kutiibe Bakusiyo nga boro nyemuse.—Bambata Pai 2:17; 3:2, 3, 17-23.

Si nafu kina gberarago nga, Adamu na Eva asamungu kuti Mbori. Eva asia gupai nga ka degaturi kuti Satana Bakitingbanga. Ko ape ziree furi ya Mbori aká ká na wenehe beri. Sidu, ri kini mo ka maa nduri ngba gene ranirii kini asadi tiri kadu “wa kina Mbori, niini wenepai na gbegberẽpai.” Adamu akodi tiko kuti ri rogo gari samungu.—Bambata Pai 3:5, 6.

Ho i aingipai ni ngba gi gene re, Adamu na Eva ayugu gupai nga, i arẽnga ka raka nyeanye kindi te. I arungo be gu kere sangbana nga ga ingapai. Omeyo abati na kpotoyo ki daputa, i ki kpiki niyangaraha. (Bambata Pai 5:5) Wa si avura du wo, gayo samungu aduna gu kura gbegbere asangbanaha kisusi gure. Ani narungo kindi be asangbana gu ingaapai nangia ga Adamu na Eva. Gu mokedi nangia Pauro akepai ki yaa: “Gbegberẽpai [“ingapai,” NW] akuru ku zegino mbiko boro sa [Adamu], kpio ki du mbiko gbegberẽpai [“ingapai,” NW]; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Ii, mbiko gu samungu nangia ga Adamu na Eva, ingapai gbiati kpio agbandaka wa riri-kaza dagba ngbatunga aboro dunduko.

Gu Banyanyaki Gopai Nayugo Gupai Nga, Mbori Nangera Angera Fuo Rani

Ya mo gupai re nayugo gupai nga, i aima gbarasa ngbatunga aboro nyeanye kindi? Oó, awere tie ani nika wisigo gu banyanyaki gopai nayugo gupai nga, Mbori nangera angera fuo rani. Mbori aguari ka manga gupai ko afu kikiipa motumo rogoho bakere gbe tipa ka ruho ka tumori ngbatunga aboro be ingapai na bekpio. Gu mosoro nadu tipa gu tumorii re angia ga Yesu rengberengbe unga, nga gu ko akpinyemu ka fuhe nitiko tipa rani. (ARomo 3:24) Sidu, gu mokedi nangia Yoane akepai ki yaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Nisangbana gi bawene mangaapai nga ga nyemuse re, Mbori azaki gene fu rani berewe wa gu nadu mbata tipa ani du na maabangirise tipa nyenye unga. Pauro akepai fu aRomo ki yaa: ‘Mbiko gu diapai rii nangia ga boro sa sangbanaha angia takapande aboro niruru yo sa unga.’—ARomo 5:18.

Ani rengbe kadu na gu kido tie nga, ti ga Mbori ringbisiringbisi regbo, rungo adunga berewe gbiati kpio auru Kpotosende te. Kuba gure, agu apai gumba yo paha rogo Yugoti, si nga agu apai nikaa manga: “Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugoti 21:3, 4) Oni rengbe ka yaa, ‘Mi adunga ti unga ho si ka manga ni te.’ Ono tie, ka oni vura kpi akpi, Mbori azingisa roni azingisa bekpio. (Yoane 5:28, 29) Si nga gupai Mbori naringbisipaha tipa rani, na si nga gupai nika manga. Nairiwo gu ziree ngaha ka yaa Mbori angeranga fuo ngbatunga aboro te!

“Oni Mbedi na Mbori”

Si ni gupai nafu wasa ka ino gupai nga, Mbori aima tona ka manga gupai nika zeresa gu rungo gizo ngbatunga aboro ambu behe na ki mbakadihe nyeanye kindi. Ono ginipai tie tipa gu raka du awere? Ginipai ka ani mangi ka badiangbarani kpi watadu wirani ti nikaza? Anga gi regbo re nga ga Mbori regbo ka dia kaza gbiati kpio kusayo te. Ziazia Kekeapai nayugo gupai nga, si naida ani pidi gu regbo ko ka manga gupai re ti ni. Ono Mbori ambunga rani zanga undo te. Gu bawiriki nangia Yakoba ayaa: “Oni mbédi na Mbori, ko ki mbedi na oni.” (Yakoba 4:8) Ii, Bakusirani nayamba rani ani zi dawedawe pagume na ko, na agu aboro nazioho na ko, i akpanga ti ino pa gako undo te, zavura ti agu aregbo du yo rogo bakere fudifudiapai vurũ.

Ono wai tie ani nika mbeda na Mbori? Bakindo Davide asana sanahe wa kina ngbatunga gure mbata fu agarã biata kutu bakuru kusayo niyaa: “Ako Yekova, . . . da ka anye ri ga kparakpara ziazia bagangara?” (Atambuahe 15:1) Davide akaragapai sa gako sanahe nisako ho ko asusi ni kumbatayo kini yaa: “Gu ni nata nzunzu, ki nimangi rurupai, ki nigumba rengo kpotoni yo; nga gu ni agbarasa nga rimo boro ya, amanga nga kurani gbigbita ya, agumba nga gbigbitapai kuti rimo kurani a ya.” (Atambuahe 15:2, 3) Ka pehe rogo kura afugo, Yekova nadia agu aboro kugume nandu ngba gu gene Adamu na Eva akáha. Ko nambeda na agu aboro namanga gupai ko akpinyemuhe.—Pa Fu Rugute ni Ue he 6:24, 25; 1 Yoane 5:3.

Wai rengbe ani ka manga gupai Mbori akpinyemuhe? Ani du wa ka ani wiriki gupai ‘du niwenehe ngba bangiri Mbori nga Batasirani,’ na fuo gure ani ki siapa mangapai na ngbanyaa kuti ni. (1 Timoteo 2:3) Gupai re nakoda wirika ruru inohe rogo Fugo Mbori nga Ziazia Kekeapai. (Yoane 17:3; 2 Timoteo 3:16, 17) Kungbo ngbarangbara geda Ziazia Kekeapai gbua arengbanga kuho te. Si naida ani wiriki mangapai wa agu aYuda nadu rogo bambata sa kama agarã Beroya yo nga aguyo nagi Pauro wa ko aatungusapai. Ko akepai tipa yo ki yaa: “Agi yo re i ngba ti agu yo nadu Tesaronike yo, wa i adi pai wenengaĩ ka berã ha, niwisigi Ziazia Kekeapai na uru, si ngia agi apai wo re.”—Amokedi 17:11.

Teketeke kinawo areme a, sirisiri wisigo Ziazia Kekeapai nanyakasa gaani idapase kuti Mbori na kini undo rani ani zi dawedawe pagume dagbarani na ko. (AEbere 11:6) Si naundo rani a ani du na tambuahe tipa wai nzunzu Yekova amangapai na ngbatunga aboro, angianga ka fu kina gu ziga nika fu undo gbua ngbutuko ya, ono gupai ko amangaha gbe nga ka undo agu aboro dunduko gizo duna nyemu rengo tiyo.

Oni wisiginga gupai namangi tipa gu bete aKristano nadu na dawedawe pagume dagbayo na Mbori. Degude du garãri nga 16 du rimori nga Danielle ayaa: “Mi nakpinyemu Yekova bakere gbe, na dungu apai duho mi atambua ko tipaha. . . . Ko afu re fu agu aboro duna ndikidi nyemuse tipa ko i vungu re, nga agu aboro nyemuse yugupai fere na ngbanyaa kuti Fugo ko.” Kristano Uruguay yo akepai ki yaa: “Ngbadure hi be tambuahe fu Yekova, na mi natambua ko tipa gako weneringise arẽnga aboro tipaha ya na tipa gako bakure.” Zavura rukutu agude, Mbori nadia yo adia kugume a. Degude nga Gabriela du garãri saba ayaa: “Mi nakpinyemu Mbori susi agu ahe du rogo gi zegino re naabaha dunduko! Gimi Ziazia Kekeapai kina ti ni du tipa re. Mi na nyemu ka wirikapai tipa Mbori na tipa Wiriko.”

Areme, rogo zegino dunduko, dungu aboro idi na ngbaduyo yo dunduko kuti gupai bake papara Atambuahe agumbaha ki yaa: “Si ni wene he fere ka mbeda na Mbori.” (Atambuahe 73:28) I aundo yo i sovura na diabese kuti gu kpakarakpakaraapai i agbiatiyo nani awere, na i na maabangirise tipa ka raka nyeanye kindi rogo Paradiso auru kpotosende. (1 Timoteo 4:8) Tipagine ka oni amaanga ha ti ni nigaoni sásá ka ‘mbeda na Mbori’ ya? Nirengo, Ziazia Kekeapai nanyakasa gupai fu rani nga: “Ko aturã nga na ani wa sa te.” (Amokedi 17:27) Ii, Mbori nangera angera nirengo fuo roni!

[Gu kpiahe du ti kpewaraga 5]

Rogo dungu agene, Yekova nayugo gupai nga ko naberãpa rani aberã

[Gu kpiahe du ti kpewaraga 7]

Zavura kina rukutu agude, i rengbe arengba ka mbeda na Mbori

[Gu kpiahe du ti kpewaraga 7]

Areme, gupai Yekova amangaha nga ka undo rani ani hipai. Ti gako ringbisiringbisi regbo, ko adia kaza gbiati kpio kusayo