Aboro Nasoga Yo Zanga Nduhe

“I asogo re . . . zanga nduhe.”—YOANE 15:25.

1, 2. (a) Tipagine si akpakara ti ni bangiri kura aboro ho i abi gupai ni nga, aboro nafura gbegberee bara aKristano, ono tipagine si aidanga ngbatunga agu afugo re iriwo ti ni tirani ya? (b) Gu fugo nga “soga,” gini rogoyo ani ka wisigoho rogo gi papara kekepai re? (Oni bi gu rukutu kekepai du kuari re tipa karagapai.)

ADEZIRE YEKOVA namanga asadatise nyanyakii ka raka ringbisihe kuti agu arugute adunga ngburungburu ya du rogo Fugo Mbori. Nisangbana gipai re, aboro natambua rimoyo rogo dungu aringara. Ono tie, ti kura aregbo, aboro agumbanga rengo tipa yo te. Nikpiapai, boro biroo rogo gu zogarago nga ga Russia rogo gu bagbata nga St. Petersburg ayaa: “Aboro afura fu rani tipa aDezire Yekova ya i nga aboro gu sangisangi pambori naoka tiyo aoka na gayo mangaapai na kini yere goro agude yo na kini imi tiyo.” Ono tie, fuo manga ko sunge na aDezire Yekova pati gayo bakere dunguratise nga ga dungu aringara, gi bangisa boro biroo re ayaa: “Awere, gupai bi mi he tie nga i wa kina kura aboro, i namoma amoma tingbayo . . . I nga aboro zereda nasungo na aboro zanga fudatise, na kidu na nyemuse dagbayo bakere gbe.” Ko agbia gupai kuti ni nga: “Mi aruganga tire na gupai nzunzu aboro ape ngbatunga agu ziree re ti ni ti rimoyo te.”—1 Petero 3:16.

² Ga Mbori amoyambu agbianga ngbarago ho aboro akitangbaanga yo ni niwia ya i nga gbegbere sino aboro te, ono wa vura duhe wo, si airiwonga tiyo ka bi aboro i nigumba gbegbereapai bara yo te. Yesu aima ruga apefuo ko mbata ki yaa: “Ka aboro asoga roni asoga zegino, oni ini aina ya i aima soga re mbata i nikasoga roni. . . . Ono mangi gere gu pai da ti rengo du ni keke he rogo gayo rugute yo, ya ‘I asogo re asoga zanga nduhe.’”a (Yoane 15:18-20, 25; Atambuahe 35:19; 69:4) Mbata fu gu regbo re, ko aima ya fu gako abawiriki wee: “Ka i ya ti baira kporo Barazebuba, i ape he kina wo ki susi tipa agu yo du rogo gako kporo!” (Matayo 10:25) AKristano ima rugatiyo na gupai nga, pa hi yo ngbatunga agu agbarasarimo re nga papara agu arungo nga ga “wagiwagi ngua” nga gu i aidipaha ho i asatiyo ni ni apefuo Kristo.—Matayo 16:24.

3. Wai du bakio gu rungosi aboro arungosi ndikidi airisimbori nani?

³ Pa rungosi ndikidi airisimbori ningia kuru mbakupai, naima tona ti kina rago “Ebere nangia ruru boro.” (Matayo 23:34, 35) Si naangianga agu arungosi aboro nimangi ndikidi airisimbori nani gbua ti kina kura regbo ki mbuhe te. Yesu ayawee ‘aboro dunduko nika soga’ apefuo ko tipa rimoko. (Matayo 10:21, 22) Kurii gure, gu mokedi nangia Pauro akepai ya ga Mbori amoyambu dunduko, kodihe na ani wa du ani nibasasa, si aida ani moiberã rani tipa rungosi be aboro. (2 Timoteo 3:12) Gine nga ndu gi rungosi re?

Mburu gu Sogote Adunga Nduhe ti ni Ya

4. Wai Ziazia Kekeapai ayugo mburu agu asogote dunduko adunga nduhe ti ni ya?

⁴ Fugo Mbori nayugo gupai fu rani nga, natona ti kina tonatona ga aboro raka, boro gu duho i abinga ni ya nga batona gbegbereapai kuti ndikidi airisimbori. Ani wisiginga pa gu kere kpio gu bambata boro-idapase nangia Ebere akpihe. Ziazia Kekeapai nayawee gu wirinako nangia Kaina nangia baimiaboro, ‘aenge yo du’ Satana Bakitingbanga ni nga gbegbere sino boro. (1 Yoane 3:12) Kaina adi asino Satana kutiko, na Satana ki mangisunge na ko tipa ka manga gako gbegbereapai. Ziazia Kekeapai nayugopa ga Satana sunge a wa ko azubo Eyobo gbiati Yesu Kristo. (Eyobo 1:12; 2:6, 7; Yoane 8:37, 44; 13:27) Gu buku nga Yugoti narogoda akapa kusayo tipa gu boro nga mburu gu rungosi namanga apefuo Yesu kini yugu ni ziazia niyaa: “Bakitingbanga nikaba agu roni ku bambukisa yo, i asadi roni.” (Yugoti 2:10; gu kekepai duni pigipigihe re, ani du pigihe.) Ii, Satana nga mburu agu asogote dunduko adunga nduhe ti ni ya i asoga ga Mbori aboro nani.

5. Gine du kugii gu sogote Satana asoga ndikidi airisimbori nani?

⁵ Gine nga ndu gupai nasa Satana ko naasogote ndikidi airisimbori? Rogo gu birĩ Satana ambakadihe, nga gu nayugopa gu kere rekangose du tiko, si nasako ko zi tiko kindi kuti manga abaangira na “nyenye Bakindo,” nga Yekova Mbori. (1 Timoteo 1:17; 3:6) Ko natikango ya Mbori namaa agu arugute fu gako azogo nakiso gene apai beyo nga gu adanga fuko ko moihe fuyo ya, na anga aboro ho namangasunge fu Mbori na wene nduhe te, ono i namangaha ningbaduse tipa gu mosoro i agbiaha tipa kina tiyo. Satana ayawee ka i fu mamu fuko ko asadi aboro, ko rengbe arengba ka sa aboro dunduko kusayo ti mangasunge fu Mbori. (Bambata Pai 3:1-6; Eyobo 1:6-12; 2:1-7) Nikita Satana ngbaanga Yekova ya ko nga barungosi aboro, niiraziree, na niiramungo, Satana nagbata gene ka manga abaangira ka da nibakerepa bakindo wa kina Yekova. Rogo gi gene re, gu kere nyemu irisoko du tiko ko aida aboro irisi ko nani, kini mo ka zingisa gako zinga kuti ga Mbori amoyambu.—Matayo 4:8, 9.

6. (a) Wai du ani nibasasa nikodikodi rani kurogo gu sakapai du tipa ga Yekova bakere pagbia? (b) Wai pa gia ani rogo gi sakapai re aundo rani ani kakuti gaani ruru mangaapai? (Oni bi sanduki ti kpewaraga 12.)

⁶ Oni nabi wai gi ngbangaa re akoda gaoni raka? Nidu oni niga Yekova moyambu, oni avura bi gupai nga, wa vura duhe nga pa manga oni gupai Mbori akpinyemuhe naida bakere asadatise, gu mosoro naye fu roni be mangaha ima kio kisusi. Ono tie, ginipai ka oni mangihe ka agu apai du tipa roni saha fu roni nikpakarakpakarapai ka oni aandu kumbatayo kindi kaa irisa ga Yekova andiko gbiati agu arugute adunga ngburungburu ya watadu pa manga oni he ni gupai nika imisa roni aimisa? Na ginipai ka oni mangihe ka si wiri wa oni agbianga undo ti manga sunge fuko te? Ya mo oni ada kuti gu digisopai nga, ngbangaa ha fu roni oni susi kumbatayo kaa mangasunge fu Yekova tee? Watadu nyemu Yekova na pa bi oni gako wene asino na paha kuari nika sa roni oni naandu kumbatayo kindi kaa ta ngba gako agene? (Pa Fu Rugute ni Ue he 10:12, 13) Nimbu Yekova gene fu Satana ko ye na arungosi kurii rani, gure nga Yekova nafu amamu fu rani wa du ani nibasasa ani fuku akaragapai sa ga Satana soapai kuti Yekova.—Asanza 27:11.

“Ho Aboro ka Paa Ni na Oni”

7. Gine nga birĩ sa dagba agu akuraha Satana amangasunge nani ka nyaga rani kusayo ti Yekova?

⁷ Ani wisiginga gu kura birĩ wenengai Satana amangasunge nani rogo gako asadatise ka songoda apai kubara ko yo rogo gi ngbangaa re, nga kaa gumba aziree ti rimo aboro. Yesu aya tipa Satana wee ko nga ‘iraziree nga baha.’ (Yoane 8:44) Gu rimo naringbisapa Bakitingbanga, si na rogoyo ti ni nga “gu boro nagumba aziree ti rimo akurani,” si kini yugu ko nigu boro nga bangbasia bagumba aziree tipa Mbori, na tipa fugo ko, na tipa ziazia rimoko. Bakitingbanga namanga apai ni gbegbere biriki, gumba aziree ti rimo aboro, gumba aziree ti rimo Yekova na tipa gako bakere pagbia, na kini mangisunge na gi bangisa abirĩ re ka fura gbegberee bara ga Mbori ruru amoyambu. Nidungura Satana agbarasarimo kurii aDezire, ko rengbe ka sa kere asada si du nimbumbuhe fuyo i hihe.

8. Wai Satana aye na gbarasarimo kurii Eyobo, na gine nangia sangbanaha?

⁸ Ani wisiginga gupai namangi Eyobo, du rogo rimoko yo nga “Ũsogote.” Fuo Satana gbarasipa ga Eyobo ahe dunduko, ki imi awiriko, na ki ukadi ko na kaza, Satana asa Eyobo aboro bi ko wa gu boro Mbori aafu mbusa funi tipa gani ingapai. Wa aboro avura nifu irisa afu mbata fu Eyobo, ono tie fuo tona gu regbo a’asada re, i atona kaa payasi pako, zavura agumeko gbiati bawene abakureako a. (Eyobo 19:13-19; 29:1, 2, 7-11) Kurii gure, nimanga Satana sunge na agu aboro namangi tiyo ya i nga abafu wasa fu Eyobo, ko agbata gene ka ‘gbarasapa ga Eyobo idapase na afugo,’ kini kitingbaanga ko ya ko ima manga kere ingapai na kini bira ko ngburungburu ni boro ingapai. (Eyobo 4:6-9; 19:2; 22:5-10, oni ringbisingaha na NW) Nairiwo wai gupai re afu gberarago fu Eyobo!

9. Wai Satana asa Yesu aboro bi ko wa boro ingapai nangia ko?

⁹ Nidu Wiri Mbori nibangbasia basongodi ga Yekova bakere pagbia, si du ko ada ti ni nigu boro Satana asoga ni gbe. Ho Yesu aye ni ku auru kpotosende, Satana agbata gene ka gbarasa rimoko a wa ko amangihe tipa Eyobo, kini yugu Yesu fu aboro wa boro ingapai. (Yesaya 53:2-4; Yoane 9:24) Aboro anaya tiko wee ko angia bakpibuda, boro aramana na kini yawee ko aduna ‘daimona tiko.’ (Matayo 11:18, 19; Yoane 7:20; 8:48; 10:20) I akitingbaanga ko niziree ya ko agbere ngbako yo fu Mbori. (Matayo 9:2, 3; 26:63-66; Yoane 10:33-36) Gipai re aima fu gberarago fu Yesu, mbiko ko aima ino ya si naye na kina gbarasarimo fu Bako. (Ruka 22:41-44) Niyangaraha, i abanga Yesu kuti ngua wagu bakuondiko i atiwa ni. (Matayo 27:38-44) Wa Yesu akakuti gako ruru mangaapai, ko ahi “gu iraira afugo aboro ingaapai agumbaha.”—AEbere 12:2, 3.

10. Wai yangara mbedimbedi aKristano ningia ga Satana sásá ti gi gaani regbo du awere re?

¹⁰ Rogo gi gaani regbo re, gu yangara aboro nga mbedimbedi apefuo Kristo i da a ni agu aboro Bakitingbanga asoga yo. I naringbisapa Satana ni “bakitingbanga awirinarani [awirina Kristo] . . . nga gu ko nakiti ngbanga awirinarani barangba gaani Mbori . . . uru na yuru.” (Yugoti 12:9, 10) Wa duhe nga i aima ba Satana kusayo ngbangbaturũ yo na ki dingiso ko kina ku auru kpotosende, ko ima kiiso gako asadatise ka sa awirina Kristo bangiri aboro ni agu aboro i nagindigo yo na ki rẽ na kina basa payo. (1 AKorindo 4:13) Rogo kura aringara, i naya tipa yo ni kitangbaangase wee i nga kere sino aboro sangisangi pambori, a wa aboro anafura bara agu aKristano nadu rogo bambata sa kama agarã. (Amokedi 24:5, 14; 28:22) A wa ani nibihe ti tonatona gi kekepai re, aboro aima digo nigumba gbegbereapai ti rimoyo rogo agu aporopoganda nga aziree. Ono, wa vura duhe wo, “be taarimo na wasiro, be gbegberẽ pande na wene pande,” mbedimbedi awirina Kristo, kodihe na agu akurayo nga “kura akandoro” nasongoda yo, na niumbasitise, i ima diaberã ka ‘kakuti ga Mbori rugute, na ka kakuti gu dezirepai nga ga Yesu.’—2 AKorindo 6:8; Yoane 10:16; Yugoti 12:17.

11, 12. (a) Gine rengbe kadu nga ndu bete agu agbarasarimo aKristano arungo behe? (b) Rogo gini agene rengbe aboro ka rungosi Kristano tipa gani idapase?

¹¹ Rengo ngaha nga, anga agu agbarasarimo dunduko ga Mbori amoyambu arungo behe si naye mbiko kina manga yo “rurupai” te. (Matayo 5:10) Bete agu akuraha nayeaye nisangbana gaani zangarengba. Anga mosoro ho fu rani ka ‘ani ingi i kini taki rani tipaha ani kini hihe te.’ Ono tie, si “nga wenepai [bangiri Yekova] . . . ka boro hi arungosi, ki nihi he gbua, mbiko wa du pa Mbori bangirini.” (1 Petero 2:19, 20) Dagba gini apai rengbe gipai re ka manga?

¹² Aboro amangi fu bete aKristano gbegberee mbiko i aká ka rimiso tiyo kurogo gu sino kpara-boro natagbagatihe na sangba Ziazia Kekeapai. (Pa Fu Rugute ni Ue he 14:1) Wo aboro naafu arimowia fu agu aDezire nga aparanga mbikopa ka yo kuti ga Yekova ruru andiko tipa mangaapai. (1 Petero 4:4) Niingahe, aboro naya ti gu kura aKristano nga avunguagude wee i ni “agu aboro angeranga fuo awiriyo ya” watadu ni agu “aboro namanga gbegberee fu awiriyo” mbiko wa agi avunguagude re agbata gu ziga fu awiriyo adunga kure rogoho ya kuba gu du na kure rogoho. (Amokedi 15:29) Gu kura aboro du agumeyo nga awirinarani aKristano gbiati aguyo nga gayo amurakporo agindigo agi awirinarani re na gu yangara nduhe gbua nga da naya i satiyo niga Yekova amoyambu. (Matayo 10:34-37) Ngbatunga agu aboro re dunduko napefuo gu kpiapai anebi gbiati Yesu nitiko amoihe rogo hi agu arungosi naadanga tipa aboro rungosiyo nani ya.—Matayo 5:11, 12; Yakoba 5:10; 1 Petero 2:21.

Hi Arungosi

13. Gine rengbe ka undo rani ani nye kindi nyanyakii rogo toroyo ani ki vura du rogo arungosi vurũ?

¹³ Ho du ani ni tii bakere rungosi tipa gaani idapase, kpotoraniyo rengbe ka zera, a wa si amangi gu nebi nangia Yeremaya, na ani ki bi tirani wa ani arengbanga ka ndu kumbatayo kindi kaa mangasunge fu Mbori te. (Yeremaya 20:7-9) Ginipai rengbe ka undo rani ani nye kindi nyanyakii rogo toroyo fuo du ani rogo ngbatungapai wa gure? Oni gbata gene ka bi apai wa gu Yekova abihe. Ko nabi agu aboro nye kindi niruru yo fuo susa asada, ni agu aboro nga abadibepai, angianga ni agu aboro vura nadibeyo ya. (ARomo 8:37) Oni asadi ka maa kpia agu aboro ku berã roni yo nasongodi ga Yekova bakere pagbia baraho Bakitingbanga aapayasi payo ni ngba gu gbegbere agene nadu beko, nga ngbatunga agu akumba gbiati adee nadu wa Ebere, Eyobo, navungu Yesu nangia Maria, na gu kura ruru aboro nadu bakuru kusayo, kodihe a na agu akuarani amoyambu du ti gi gaani regbo re. (AEbere 11:35-37; 12:1) Oni berẽkurii gu gayo agene i akakuti gayo ruru mangaapai ngbaha. Gu bakere nduroo nga ga ruru aboro re nabaya rani ani ndu ka koda tirani na yo rii tambara yo, yo i ka fu gu mosoro ni fu agu aboro dibe zegino mbiko gayo idapase.—1 Yoane 5:4.

14. Wai rengbe kakaka kparakpee ka nyakasa rani ani nye niruru rani?

¹⁴ Ka gu ‘sakapai du ku kpotoraniyo du nibadunguhe,’ si naida ani kpari fu Yekova kakaka, mbiko ko afu wasa afu fu rani na ki nyakasi rani. (Atambuahe 50:15; 94:19) Na kurii gure, Yekova afu gu tatamana afu fu rani ani aidaha tipa ka sovura na diabese kuti agu a’asada du ani rogoho na ka undo rani ani moiberã rani kuti gu ngbangaa du tipa gako bakere pagbia, nga gupai du kugii gu sogote aboro asoga gako amoyambu nani adunga nduhe ti ni re ya. (Yakoba 1:5) Yekova rengbe arengba ka fu “gu zereda [fu rani] nga ga Mbori nagasi rugatinapai dunduko.” (AFiripoio 4:6, 7) Gi zereda Mbori afuhe re, si nasa rani ani nye zezeredii na bangisa berã sa ho du ani ni rogo kere asada, na ka si ambunga rani ani zere ki tona kaa bakabangirani watadu kaa gunde ya. Be gu undo nga ga ga Yekova ziazia toro, ko rengbe arengba ka songoda rani rogo agu apai dunduko ko ambugene fuhe si ye sa rani.—1 AKorindo 10:13.

15. Gine rengbe ka undo rani ani he duna kere zinga tirani ho du ani ni rogo arungosi?

¹⁵ Gine rengbe ka undo rani ka ngbadurani iminga fu agu aboro nasoga rani zanga nduhe ya? Ani tingidi gupai nga, agu aboro nga abangbasia asogo rani, i nga Satana gbiati adaimona. (AEfeso 6:12) Wa bete aboro avura niini aino kini rungosi rani, dungu agu aboro nasoga ga Mbori aboro re ainongo gupai nzunzu i amangaha te, watadu kura aboro nasa yo i naamangaha. (Daniere 6:4-16; 1 Timoteo 1:12, 13) Gupai Yekova aidaha nga ngbatunga “aboro” dunduko gbia mamu na ki “bati . . . ki ye sa gu inahe nga ga rengo.” (1 Timoteo 2:4) Nirengo, bete agu aboro nanasoga rani mbata ima sa tiyo awere ni agu awirinarani nga aKristano nisangbana bi yo gaani ruru sino mangaapai. (1 Petero 2:12) Kurii gure, ani rengbe arengba ka wirikapai be gu kpiapai Yosefa amoihe nangia wiri Yakobo. Wa Yosefa avura rungo bakere gbe be gu mangaapai nangia ga awiribako, ko akpinga pai kutiyo te. Tipagine ko amanganga ha ti ni wo ya? Bambiko ko akparia ga Yekova mangaapai rogo gupai re, wa Yekova aa’aria apai tipa ka digiso Gako ringbisapai. (Bambata Pai 45:4-8) Teketeke wa kina gure a, si rengbe kadu nga Yekova nambu gu rungosi si aidanga ani rungo behe ya si ye sa rani tipa ko mangi gupai nika ye na taarimo fuko.—1 Petero 4:16.

16, 17. Tipagine si aidanga ti ni ani naabakabangirani tipa gu asadatise asogo rani amangaha ka rugusa sunge tungusapai ya?

¹⁶ Si aidanga ani naabakabangirani kisusi ka si wiri wa asogo rani gu du adu na diabese rogo rugusa wene pangbangaa ti nduge kumbatayo te. Yekova nazigizo arikaaboro awere na gu dezirepai gako amoyambu amangaha rogo zegino dunduko, sidu agu ahe ngba angba bangirise nakura akura wa ko azigizo arikaaboro. (Agai 2:7) Kristo Yesu, nga Bawene Babanda Avusende, ayaa: “Gimi akandoro nagia fugore, mi ini ra, ami ki nipeke re. Mi nafu nyenye unga fu ra; . . . a nga boro sa ka tuka ra be re te.” (Yoane 10:27-29; gu kekepai duni pigipigihe re, ani du pigihe.) Ziazia amaraika nakoda beyo akoda a kurogo gi bakere sunge keahe nga ga toro re. (Matayo 13:39, 41; Yugoti 14:6, 7) Sidu, anga pai ho asogorani agumbaha watadu i amangaha rengbe ka gbarasapa ga Mbori ringbisapai te.—Yesaya 54:17; Amokedi 5:38, 39.

¹⁷ Dedede, gu asadatise ningia ga asogorani, si naa’ariatihe ka manga kina gupai ani aidaha. Rogo dagbarago sa Afirika yo, dungu kere aziree aboro agbandakaha tipa aDezire Yekova, kodihe na gu nga i nga airisi Bakitingbanga. Mbiko gipai re, ti agu aregbo dunduko aDezire anaye kua Grace yo, ri anioro ka gbu gii gari bambu yo daho i ka ga ni. Rogo kura uru sa, gayo pasita atumba buku sa kuari dagba gaani abuku na ki ya fu agu aboro dunduko nasusungu wee ka i gedinga ha ya mbiko si nika sa yo i mbu gayo idapase. Gipai re azingisi nyemu ino pai tipa gaani abuku kpoto Grace yo. Ti gu kura regbo aDezire aye ku kpuri, kuba gupai nga ri gbu, ri atona fugo na yo na ri ki di wirina gu gaani buku pasita aza yo ti gedaha re. I atona wisigo Ziazia Kekeapai na ri, na ri ki zi bapatiza rogo 1996. Grace nadia gari regbo awere kaa gbata agu aboro i avura ingisa yo na aziree tipa aDezire Yekova.

Oni Nyakasi Gaoni Idapase Awere

18. Tipagine si aida ti ni ani nyakasi gaani idapase mbata fu kere asada kuru, na wai rengbe ani ka mangaha?

¹⁸ Wa duhe nga Satana rengbe ka zubo rani na sogote zanga nduhe ti agu aregbo dunduko ngbaa tiko, si ninyanyakipa pai ani nyakasi gaani idapase wa du rago re. Wai rengbe ani ka mangaha? Gu tingidapai naye rogo gu ringara aboro arungosi ga Yekova aboro rogoho ayaa: “Pai sa ima da fu rani awere ziazia, nga: Agu aboro namanga gu weneapai nga ga toro dedede na nabi rengo nga ga Ziazia Kekeapai na paha kuari, si ambunga fuyo ka ru ngutete ho asada aye ni sa yo te. Ono agu aboro nakpa ti adunguratise ti ‘wene regbo’ na atungusanga pai dedede ya, na nambupa manga ruruapai tipa rukutu apai, i dedede nati ho ‘kere’ asada aye ni kuriyo.” (2 Timoteo 4:2) Kangia oni bi agu apai si aida oni mbakadi apai rogoho, oni mangi bakere asadatise ka mangaha zanga keesa.—Atambuahe 119:60.

19. Gine gu kakuti ruru mangaapai nga ga ga Mbori amoyambu amangaha ho du yo ni rogo gu sogote zanga nduhe?

¹⁹ Gu kakuti ruru mangaapai nga ga ndikidi airisimbori tiibe amandoro nga ga arungosi Satana aye nani kutiyo nga nyanyaki dezirepai tipa rupa ga Yekova bakere pagbia, na tipa rẽ ko nani na tipa paduhe niruruhe. Padu yo niruru yo nafu ngbarago fu Mbori. Ka aboro vura dungura agbarasarimo kuriyo, ‘zee amanga nga Mbori tipa yo, wa i a’ya ti ko gayo Mbori nga ko’ te, nga gu boro du gako kiki kuari auru kpotosende na kuari ti ngbangbaturũ. Nirengo, nibi gupai du tipa ngbatunga gu ruru aboro re dunduko, ruhe aru ani ya tipa yo wee: ‘Zegino arengbanga tipa yo te.’—AEbere 11:16, 38.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Da du kugii agu asogote aboro asogote ndikidi airisimbori nani adanga tipa i naasogote yo nani ya?

• Wai Satana amangisunge na gbarasarimo rogo asadatise ka sa Eyobo gbiati Yesu i mbu kakuti gayo ruru mangaapai?

• Wai Yekova anyakasa rani ani ru ngutete ho Satana asoga rani ni?

[Sanduki/Gu sura du ti kpewaraga 12]

I Akparia Gupai Nzunzu Du Sakapai Tipaha

Boro sa dagba aDezire Yekova Ukraine yo, nga gu ringara irangbii arugusi sunge tungusapa Kindo rogoho tipa agarã susi 50 ayaa: “Si aidanga aboro bi gupai aDezire Yekova adu rogoho re gbua ya aboro naguari ka rungosiyo te. . . . Dungu agu aboro-biroo re aamanga kina gayo sunge gbua. Ho gu kura zogarago kia azi ringara ni yo, agu aboro-biroo re angbe na gu vovo zogarago re, ono tipa rani, ani anye wa kinagu ani adu mbata. Ani akparia gupai nga, i aima yugo gu boro nzunzu fu rani rogo Ziazia Kekeapai nga mburu gaani fudifudiapai.

“Sidu ani abinga tirani gbua wa agu aboro-wenesa gbegbere sino aboro aguari kaa rungosi yo te. Gupai naundo rani ani hipai nga ziazia giarogopai tipa gu ngbangaa naenge ati Edene yo, nga gu sakapai nadu tipa du Mbori na rengo beko ka zogarago. . . . Ani arunga ka songoda ngbangaa tipa kina agu apai nangba tirani nga aboro sa te, ono ani aru ka songoda ngbangaa tipa agu apai a nga ga Bakerepa Bakindo. Ani aima giarogo gu ndikidi ngbangaa yo nadu tipa gupai re wenengai gbe. Gipai re nasa rani ani du nyanyakii na ki sa rani ani kakuti gaani ruru mangaapai kereapai ki vura nimangi rani vurũ.”

[Gu kpiahe du ti kpewaraga 9]

Da nadu kugii gu gbarasarimo aboro agbarasirimo Yesu nani?

[Gu kpiahe du ti kpewaraga 11]

Eyobo, Mary, na ga Mbori amoyambu rogo gi gaani regbo du awere re, wa Stanley Jones, asongodi ga Yekova bakere pagbia

[Gu kpiahe du ti kpewaraga 12]

I azi Victor Popovych rogo 1970