‘Bayee Aboro Adia Kumbo Zegino’—WAI SI KA MANGA?

“SI NAWIRA gupai nga, oni ima rugatironi na pa gu ga Yesu fugo nafu ngbarago nga, ‘bayee aboro adía kumbo zegino.’ Ono kuti bibi agu apai dunduko aboro amangaha kuti akurayo na kuti kpotosende, ginihe oni aberãha ya si nika nye bayee aboro di kumboho?”—Matayo 5:5; Atambuahe 37:11.

Myriam, nga dee sa dagba aDezire Yekova, amangisunge na gi sanahe re tipa ka tona sakapai na ni rogo Ziazia Kekeapai na boro. Gu kumba ri afura fuko akaragapai ki ya kangia Yesu agumba gi kidohe re, kpotosende du wa ka si du nigu ũkumbo rẽarẽ na gu rimoho re, angianga kuädikuädi rago watadu bate nga gu ka aboro arakanga rogoho ya te.

Gure adu nirengo nigu karagapai duna wene maabangirise. Ono ya mo ani na ndupai berani tipa kadu na ngbatunga gu wene maabangirise re? Ii nirengo, ndupai kinaho berani, bambiko Ziazia Kekeapai nafu nyanyaki nduapai fu rani ani idi kuti gupai nga, gu kidohe re adaada nirengo. Nirengo, digisidigisi gu kidohe re mbembedii nikodikodihe kuti ga Mbori ringbisapai tipa rikaaboro na tipa kpotosende. Na i nakido rani ya gupai ringbisi Mbori he, ko amangaha amanga. (Yesaya 55:11) Sidu tie, gu sanahe nakura nga, ga Mbori bambata ringbisapai nangia gine tipa rikaaboro, na wai si kadu nidigisidigisihe?

Ga Mbori Nyenye Ringbisapai Tipa Kpotosende

Yekova Mbori akusi kpotosende tipa kparakpara ringbisapai. “Bambiko ya Yekova wẽ, nga gu ko namangi angbangbaturũ (ko nga Mbori!), nambakadi kpotosende ki mangi he (ko anyakasi he; ko amanga nga ha ni kungba he te, ko ambakadi he aboro niraki rogo ho!): ko ya, ‘Mi nga Yekova, kura ni ho berewe te.’” (Yesaya 45:18) Sidu, i akusi kpotosende nikparakparaha tipa aboro niraki rogoho. Kurii gipai re, si nga ga Mbori ringbisapai tipa kpotosende du ninyenye kporo tipa ngbatunga aboro. “Mo namoi amburu kpotosende ka i agbisa nga ha waragoagira ya.”—Atambuahe 104:5; 119:90.

Ga Mbori ringbisapai a tipa kpotosende niyuguyuguhe rogo gu sunge ko afuhe fu gu bambata aboro nadu tibarayo ue. Yekova aya fu aAdamu na Eva wee: “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.” (Bambata Pai 1:28) Kpotosende, nga guhe Mbori afuhe fu aAdamu na Eva, si adu nga si nika du niguhe nikangia nyenye kporo tipa yo na tipa atitayo. Bake apapara Atambuahe aya mbata fu dungu akama agarã kusayo wee: “Angbangbaturũ nga ga Yekova angbangbaturũ, ono kpotosende ko afu fu awiri aboro.”—Atambuahe 115:16.

Tipa ka gbia gu bawene maabangirise re, si aida aAdamu na Eva gbiati atitayo a, i idi kuti Yekova Mbori nga Bakusiahe na Bafu-Unga, wa i aduku nibasasa, na nigayo Bakindo na ki idi ka irisa sangbako. Yekova ambunga gene tipa kapa kuti gipai re te ho ko afu gu zinahe ni fu gu kumba re nga: “Agu angua du ati yo dunduko mo nirí zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bambata Pai 2:16, 17) Tipa aAdamu na Eva naaraka kindi rogo ati Edene, si aidi i irisi gu taata zinahe Mbori agumbaha ziazia re. Ka pa manga yo ho wo adu nigayo yugo tambuahe tipa agu apai dunduko gu Bayo du ngbangbaturũ yo amangihe fuyo.

Ho aAdamu na Eva ataino aino ni kini basasangba Mbori ni kuo yo gu ndiko ko afuhe fuyo, nirengo i asa giiyo na gu boro nafu agu ahe dunduko fuyo nadu beyo. (Bambata Pai 3:6) Rogo manga yo gipai re, i agbarasipa bawene kpuyo nga ga Paradiso nga gu naadunga tipa kina yo sa ya ono tipa yo na atitayo a. (Aromo 5:12) Ya mo gu basasangbaa nangia ga gu bambata aboro ue re akandasi ga Mbori ringbisapai nga gu ko aidaha ho ko aakusa kpotosende ni?

Mbori Nga gu Boro A’arianga Gani Apai Ya

Kungba gako nebi nangia Maraki, Mbori ayaa: “Mi nga Yekova mi asa nga pa re wa sa te.” (Maraki 3:6) Nisakapai riipa gi veresi re, wene bawiriki Ziazia Kekeapai nga Louis Fillion ni boro Faranza, agumba gupai nga, gi takapandepai re, si mbembedii nikodikodihe kuti digisidigisi ga Mbori akidohe. Fillion akepai ki yaa: “Yekova arengbe arengba ka gbarasa gu gako aboro kusayo nasamungu, . . . ono bambiko wa ko arengbanga ka aria gako akidohe ya, ka kina ginipai vura manga, si du ko airisi agu akidohe airisa ti ni ko akidoho bakuru kusayo.” Ga Mbori akidohe, kangia si fu bangisa boro, watadu fu rikaaboro, watadu fu ngbatunga aboro dunduko, ka bangiriko gonga ti ni te ono si aduadu nidigisidigisihe ti regboho. Ziazia Kekeapai nayaa: “Ko atingidi pa gako zungahe nye anye kindi, gu pai ko arugu he fu arika ngbatunga aboro wa kutu sa.”—Atambuahe 105:8.

Wai tie rengbe ani ka ino nirengo nga, Yekova a’arianga gako bambata ringbisapai nibipa kpotosende te? Ani rengbe kadu na kido tipa gipai re bambiko rogo gu Fugo Mbori yo naabaha dunduko gako ziazia toro adu kugiipa kehe, nga Ziazia Kekeapai, ani nabi atingidapai yo tipa ga Mbori ringbisapai ka fu kpotosende fu agisangbaa. (Atambuahe 25:13; 37:9, 22, 29, 34) Kurii gure, Ziazia Kekeapai naringbisapa agu aboro Yekova nafu maku fuyo ni agu aboro ngbaa bayo angba, i nibasasa ki susungu kina ‘tii gayo abakakue na tii gayo vurumo a, a nga boro sa nika gundesi yo te.’ (Mika 4:4; Yezekere 34:28) Agu boro sia Yekova yo, i “adúdua abambu ki niraki rogo; i arũka bakakue aati yo ki niri zuzuhe.” I adu na ngbarago tiyo, na zavura na agu anyaa a du nvuo yo.—Yesaya 11:6-9; 65:21, 25.

Ziazia Kekeapai nayugo mboimboi ga Mbori kidohe rogo kura gene. Ti regbo gu zogarago nangia ga Bakindo Soromo, gu rikaaboro nga aYisaraere agbia ngbarago be pazereda na kumuko. Ti regbo gako zogarago, “aYudo ki nisungu zezeredi na aYisaraere, aboro dunduko ki nisungu tii gayo bakakue na tii gayo vurumo, tona Dana yo ki da kina ku Beta-saba yo, ti agu arago dunduko nangia ga Soromo.” (1 Abakindo 4:25) Ziazia Kekeapai nayawee Yesu nga “bahe ti Soromo,” na nifura bake apapara Atambuahe kumbatayo tipa gako zogarago, ko ayaa: “Rurupai zuga ti ragoko, zereda ki du kpaima, daho diwi ka adu nga ni ho ya.” Ti gu regbo re, ‘zende ahe azúka rogo ringara kpaima; si adu wó ri abaagangara yo.’—Ruka 11:31; Atambuahe 72:7, 16.

Niirisa fugo ko, Yekova Mbori asa gupai nirengo nga, gu ũkumbo kido ko he tipaha re anga duhe aduho gbua te, ono ko ima karagaha berewe naabaha nibawenehe kurogo gu ngbanyaha si adu rogoho mbata. Rogo Yugoti 21:4, Fugo Mbori naya fu rani wee, rogo gu vovo zegino kido yo he tipaha fu aboro, Mbori “awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.” Guhe kido Mbori rani tipaha re, adu nirengo nga kina boro Paradiso.—Ruka 23:43.

Wai ka Gbia gu Ũkumbo Kido Yo He Tipaha

I a’aria kpotosende kurogo paradiso ti regbo gu zogarago nika du ngbangbaturũ yo kini zogorago auru kpotosende, nga gu Kindo du Yesu Kristo ni gaha Bakindo. (Matayo 6:9, 10) Gupai gu Kindo re nika mangaha nibambatapai nga ka ‘gbarasa agu aboro nagbarasa kpotosende.’ (Yugoti 11:18; Daniere 2:44) Fuo gure ,Yesu Kristo ni “Gbia Zereda,” adigiso gi sangbanebi re: “Kia pa gako zoga aboro na pa zereda digidaha adú nga ti ni te.” (Yesaya 9:6, 7) Tiibe gu zogarago nga ga Kindo re, amirioni aboro, kodi yo na aguyo i nika karaga yo berewe kurogo unga rogo gu gene nga ga zingabekpio, aduna gu mamu beyo nga ga dia kumbo ringara.—Yoane 5:28, 29; Amokedi 24:15.

Ada nika rengba tipa gbia gu bawene iiriwo ũkumbo re? Oni wisiginga afugo Yesu: “Aboro maku nga bayee aboro, bambiko i adú ni adikumbo zegino.” (Matayo 5:5) Rogo gupai yo nga kadu nibayee boro nga gine? Agu abuku nasakarogo afugo yo naringbisapa “bayee aboro” ni agu aboro duna pazereda, zanga zizinga, duna umbasitise, afuranga bakere ya, watadu agu aboro duna gunde a. Ono tie gu bambata fugo aGiriki mangi yo sunge nani, si na bakere rogoyo ti ni. Gu buku nasakarogo afugoyo nga New Testment Wordbook, William Barclay akehe, si nayaa: “Bayee boro na nyanyaki ome hipai tini.” Si nayugopa gu sino berã nga gu nasa boro ni hi gupai imisi kurani ni nani na zanga ni berẽpa irabape he, si dunduko nga sangbana gu wene pagume du ni nani na Mbori, na gu pagume re kidu ni mburu ome fu ni.—Yesaya 12:2; AFiripoio 4:13.

Gu boro du nibayee ni, ni naida kuti ga Mbori arugute rogo gani raka yo naabaha; ni akonganga kuti manga kina gupai ni aberãha te watadu kuti ga kura aboro aberã te. Ni a nga gu boro ka i yugupai ayugo funi, naida aida Yekova yugupai funi. Gu bake apapara Atambuahe nangia Davide akepai ki yaa: “[Yekova] nangbe fu bayee aboro ku mbata yo rogo ruru sarangbanga, ko nayugo pa gako gene fu bayee aboro a.”—Atambuahe 25:9; Asanza 3:5, 6.

Mo adu dagba gu “bayee aboro” nika dia kumbo zegino? Nimanga oni asadatise ka ino Yekova na gupai ko akpinyemuhe rogo kakaka wisigo Fugo ko, na nimanga oni sunge na agu apai oni awirikaha, oni a tigaoni, oni rengbe arengba ka ngera kumbatayo tipa diakumbo paradiso kpotosende na ki raki rogoho nyeanye kindi.—Yoane 17:3.

[Gu kpiahe du ti kpewaraga 5]

Ga Mbori ringbisapai tipa kpotosende, si ziazia rogo gu sunge ko afu he fu aAdamu na Eva

[Gu kpiahe du ti kpewaraga 6]

Gu zereda gbiati ngbabase nadu ti regbo ga Soromo zogarago ayugupai kumbatayo tipa gu ũkumbo kido yo he tipaha

[Gu kpiahe du ti kpewaraga 6]

Avusende na gangara ku giirago yo: Pictorial Archive (Near Eastern History) Est.; Anzungbo: Hai-Bar, Yotvata, Yisaraere; basopobino: Garo Nalbandian

[Gu kpiahe du ti kpewaraga 7]

Gu vovo zegino rurupai nika du rogoho, si kumbatayo, oni adu rogoho?