“Wa Mo Akpi Nyemu He, Wa Du He Ngbangbaturũ Yo”

“Gu ida nga ga aKatoriko naringbisapa Yangara Apai Biama: Kpio, Sapangbangaa, Iferno, na Ngbangbaturũ.”—Catholicism, George Brantl ambakadi fugoho.

ONI kparia gupai nga, rogo gi yangara apai du biama tipa ngbatunga aboro re, kpotosende dagbaha te. Si airiwonga tirani te bambiko Katoriko Kanisa, gbiati dungu kura akanisa, si naida kuti gu bipai nga uru nikadu kinaho i nika gbarasa kpotosende. Kura buku sa nafura tipa gipai re ziazia tii gu riipai nga “Digido Zegino” kini yaa: “Gu Kanisa Nga ga Katoriko idi kuti gupai nga, gi zegino du awere re, a wa Mbori amangihe na wa duhe re, anga si nika banga abanga kindi te.” (Dictionnaire de Théologie Catholique) Gu vovo katekisimo nga ga aKatoriko nafura tipa gipai re a kini yaa: “Gi zegino re . . . nika go ago kusayo.” Ono ka singia gi kpotosende re nika go ago kusayo, ginipai tie nika manga tipa gu kidohe nga ga Ziazia Kekeapai tipa paradizo kpotosende?

Ziazia Kekeapai nafura ziazia tipa gu paradizo nika ye ku auru kpotosende. Nikpiapai, gu nebi nangia Yesaya aringbisipa kpotosende gbiati araki auruhe ngba gi gene re: “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te; bambiko wa gu rame nga ga ngua wo rame gimi aboro nikadu, gimi siasia aboro ará zezeredi tipa gbanga rago mbiko gu mangapai nga ga beyo.” (Yesaya 65:21, 22) Agu aYuda Mbori afu gi mokido re fuyo aima rugatiyo na gupai wenengai nga, gayo ringara, gbiati kpotosende naabaha dunduko, si nika daada rogo kura uru sa niparadizo tipa ngbatunga aboro naagbia weneapai rogoho nyeanye kindi.

Atambuahe 37 nanyakasapa gi maabangirise re. Si nayaa: “Bayee aboro adía kumbo ringara.” (Atambuahe 37:11) Anga gi veresi re nafura tipa kina karaga aYisaraere kurogo Ringara Mokido tipa regbo ngbutuko te. Kina gu bangisa Atambuahe re nayaa: “Ruru aboro adía kumbo ringara, ki nye anye kindi.” (Atambuahe 37:29)a Oni kparia gupai nga, gi Atambuahe re nayawee nyenye unga auru kpotosende nikangia mosoro tipa “bayee aboro.” Rogo gu Ziazia Kekeapai du rogo Faransée, sakapai tipa gi veresi re nayawee gu fugo i saha nga “bayee,” “si na bakere rogoyo ti ni susi gu duhe nani re; si nakoda agu aboro adunga gene beyo ya, agu aboro narungo watadu aguyo akurayo arungosi yo tipa [Yekova], agu aboro duna umbasitise na kini ra fu Mbori.”

Auru Kpotosende Watadu Ngbangbaturũ Yo?

Rogo gu Tungusapai Nadu rii Bagangara yo, Yesu amangi mokido nga gu natingida rani naapa gu veresi di ani he ki kehe kuari re. Ko ayaa: “Aboro maku nga bayee aboro, bambiko i adú ni adikumbo zegino.” (Matayo 5:5) Berewe a, kpotosende nikangia nyenye mosoro tipa ruru aboro. Ono tie, Yesu afura ziazia fu gako amokedi ya ko nika ndu ka mbakada ba tipa yo ‘rogo ga [Bako] bambu yo,’ sidu, i nika ndu ka sungo naako ngbangbaturũ yo. (Yoane 14:1, 2; Ruka 12:32; 1 Petero 1:3, 4) Wai tie si aida ani girogo pa agu akidohe du tipa agu amaku nikadu auru kpotosende? Ya mo daha ada areme boro moibangirini tipaha, na ada duhe tipa yo?

Dungu bawene abawiriki Ziazia Kekeapai nayawee gu “zegino” Yesu afura tipaha rogo gu Tungusapai Nadu rii Bagangara yo, na zavura gu ringara gumbayo paha rogo Atambuahe 37, si nga kungbo afugo masaku gbua. Kumba nga F. Vigouroux aya rogo buku sa wee agi averesi re nayugopa “masaku tipa ngbangbaturũ na Kanisa.” (Bible de Glaire) Tipa M. Lagrange tigako, nga baweteke Ziazia Kekeapai niboro Faranza, ko ayawee “anga agi akidohe re tipa bayee aboro dikumbo gu kpotosende i araka auruhe re, rogo gi sino mangaapai re watadu gu nika ye yo nga bawenehe te, ono si tipa gu kindo nga ga ngbangbaturũ nikadu rogo gu ba ani ainonga baraha ya.” Tipa kura baweteke Ziazia Kekeapai, ko aya tigako wee si nga “fugo masaku tipa agu apai nga ga ngbangbaturũ.” Gu kurayo nayawee, Ziazia Kekeapai namangasunge na “gu ringara mokido nangia Kanana nigu ringara narukuba gu kporo du ariyo, nga ga Mbori kindo, nga gu i ka fuhe fu bayee aboro. Na si a nga rogo gupai yo du rogo Atambuahe 37 na rogo kura apapara Ziazia Kekeapai.” Ya mo si naida ani gu niipo kuti gu digisopai ngawee, ga Mbori akidohe akodanga pa raka aboro auru kpotosende tee?

Nyenye Ringbisapai Tipa Kpotosende

Ti tonatonaha, kpotosende adu nikodikodihe nibasa kuti ga Mbori ringbisapai tipa aboro. Bake apapara Atambuahe akepai ki yaa: “Angbangbaturũ nga ga Yekova angbangbaturũ, ono kpotosende ko afu fu awiri aboro.” (Atambuahe 115:16) Sidu, ga Mbori bambata ringbisapai tipa ngbatunga aboro adu nikodikodihe kuti kpotosende, angianga kuti ngbangbaturũ ya. Yekova afu gu sunge fu gu bambata arogotise nadu ue nga ga kiiso ati Edene si rengbe rogo kpotosende dunduko. (Bambata Pai 1:28) Anga gi ringbisapai re adu tipa guru regbo te. Yekova anyakasihe rogo Fugoko nga kpotosende anye anye kindi: “Rikaaboro sa nasusa, kura rikaaboro ki niye, ono kpotosende nyeanye kindi.”—Batungusipai 1:4; 1 Pekapai 16:30; Yesaya 45:18.

Ga Mbori akodihe atinga ku ime yo te, bambiko ko nga Bahe Kisusi, na ko nakidohe ka digiso afugoko. Ziazia Kekeapai namangasunge naapa wai mai naana ka ringbisapa wai ga Mbori akidohe amanga a wa ko agumbaha. Mbori nagumba gupai rogoho yo nga: “Wa mai nana ngbangbaturũ yo na morogumba ku sende no, ka si akaraga nga tihe koyo berewe ya, ono si natuda kpotosende, ahe ki kuru mbiko ho ki nisono, . . . wo gimi apai nga gu nakura ngbare yo; si akáraga nga tihe fere gbua te, ono si anyása gu pai ngba ti re, ki kpatare rogo gu pai mi akedi he tipa ha.” (Yesaya 55:10, 11) Ho Mbori akido aboro ni, bete regbo rengbe arengba ka susa mbata fu agu apai ko akidopaha re mangi, ono si azanganga manga te. Si ‘nakaragatihe’ fuko fuo nyasaha gaha sunge.

Nirengo, rago aima “ngba” ti Yekova ka kusa kpotosende tipa ngbatunga aboro. Ti digido gu sita uru nga ga kusa ahe, ko ayawee ahe dunduko “[a]du ni wene he gbe.” (Bambata Pai 1:31) Pa aria kpotosende kurogo nyenye paradizo nigu papara ga Mbori ringbisapai atamanganga ya. Wa vura duhe wo, ga Mbori akidohe ‘akaraganga tihe fuko zanga sangbanaha te.’ Agu akidohe dunduko du tipa wene raka auru kpotosende rogo zereda na bandahe nyeanye kindi, si nigupai nika manga amanga.—Atambuahe 135:6; Yesaya 46:10.

Ga Mbori Ringbisapai Aenga Manga Te

Gu ingapai nangia ga bambata avungurani, nangia Adamu na Eva, si arugusi ga Mbori ringbisapai tipa ka sa kpotosende niparadizo. Fuo i basasangbaa, i ado yo kusayo ati Edene yo. Si ki ta du were, ka i arengbanga berewe kadu rogo digisidigisi ga Mbori ringbisapai tipa rengberengbe aboro raki rogo paradizo kpotosende ya. Wa si avura duwo, Mbori amangi mbakadapai tipa ka nyasa na gako ringbisapai. Wai ko amangihe?—Bambata Pai 3:17-19, 23.

Gupai namangi Edene yo, si wakina gupai du tipa gu boro natona ka dua gani bambu rogo wene dagbangua. Fuo maa ni kina mburuhe gbua, kura boro ki ye ki gbataka gu mburu bambu re kusayo. Kuba gupai nga gu boro re gindigo gani sunge-dua bambu, gupai ni amangaha nga ka guari ka nyasa sunge gu bambu re. Ka si vura du nga gi vovo sunge re naida kura ahe, anga pai ho nika gbarasapaha te.

Wakina gure a, Mbori ambakadipai tipa ka digiso gako ringbisapai. Ngbutuko fuo bambata avungurani mangi ingapai, ko atakipande maabangirise tipa atitayo, nga gu ‘tunga’ si adu nga ko nika mbakada agu apai gbere. Rogo digiso gi sangbanebi re, bambata gu tunga re angia Wiri Mbori, nga Yesu, naye ku auru kpotosende ka fu gako unga nimotumo tumorii tipa ka batasa ngbatunga aboro. (AGaratio 3:16; Matayo 20:28) Si adu nga, fuo i zingisi Yesu na ko ki ga ku ngbangbaturũ yo, ko nika zogarago ni Bakindo ga Mbori Kindo. Nibambataha, ko nga bayee boro nadiakumbo kpotosende kodihe na gu siasia ruru aboro i ka zingisa yo i ga ku ngbangbaturũ yo tipa kadu ni abazogo rogo gi Kindo re. (Atambuahe 2:6-9) Fuo bete regbo kusa, gi zogarago re nika dia agu apai nga ga kpotosende kubehe tipa ka nyasa na ga Mbori bambata ringbisapai ka sa kpotosende niparadizo. Dungu amirioni bayee aboro nika “dia kumbo ringara” na gu rogoyo ngawee i nika gbia undo be gu zogarago nga ga gi Kindo du tiibe Yesu Kristo gbiati gako abadiazogarago re.—Bambata Pai 3:15; Daniere 2:44; Amokedi 2:32, 33; Yugoti 20:5, 6.

“Rogo Kpotosende Wa Mo Akpi Nyemu He, Wa Du He Ngbangbaturũ Yo”

Gu mokedi nangia Yoane abi gi pa batasa aboro duna apaparaha ue re rogo gu yuguyugupai i ayuguhe fuko. Ko abi abakindo i nasusungu rii ambatabakindo, nga aguyo i asia yo dagba ga Kristo ruru abawiriki. Ziazia Kekeapai nafura ziazia tipa agi abadiazogarago na Kristo re kini yawee i ‘azogarago auru kpotosende’ ni abakindo. (Yugoti 5:9, 10) Oni kparianga agu apai ue Mbori amangasunge nani ka digiso gako ringbisapai, nga gu Kindo nga ga ngbangbaturũ nika karaga agu apai nga ga kpotosende kubaha tiibe Yesu Kristo na gako abadiazogarago. Agi ambakadapai nga ga Mbori re nasa gupai nga i karaga Paradizo kubaha ringbisihe kuti ga Mbori ringbisapai.

Rogo ga Yesu kpia kparakpee, ko apehe fu gako abawiriki i kparikpee tipa i mangi gupai Mbori akpinyemuhe “rogo kpotosende wa [ko] akpi nyemu he, Wa du he ngbangbaturũ yo.” (Matayo 6:9, 10) Gine kangia rogo agi afugoyo re ka kpotosende go kusa watadu ka singia kpotosende naru gbua kuba ngbangbaturũ? Wakina gure a, ya mo si ruaru ka ruru aboro dunduko ga gu ngbangbaturũ yo? Gupai Mbori akpinyemuhe, si ziazia rogo Ziazia Kekeapai, tona ti gu pangbangaa du tipa kusaahe ki da ti gu yuguyugupai du rogo gu buku nga Yugoti. Kpotosende nika da niparadizo, nga gupai Mbori naringbisihe tipaha. Si nga gupai Mbori nakidohe ka mangaha. Gu ruru aboro du auru kpotosende, i nakparakpee tipa si mangi.

Nyenye unga auru kpotosende nga gupai gu Mbori nga Bakusiahe ‘asanga pako wasa ya’ aringbisipai tipaha ti bambata regbo. (Maraki 3:6; Yoane 17:3; Yakoba 1:17) Tipa regbo susi kama agarã, gi magazini re, nga Ngbaõbambu Sinziri, si aima digo nisakipai tipa gi papara ga Mbori ringbisapai du ue re. Gipai re nasa rani ani girogo gu ga Mbori akidohe du tipa karaga agu apai nga ga kpotosende kubaha du rogo Ziazia Kekeapai. Ani nayamba roni oni wisigi gipai re berewe kumbatayo, singia nimanga oni sakapai na aDezire Yekova watadu ka ke waraga fu abakeke gi magazini re.

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Ziazia Kekeapai nafura ziazia tipa sigira Paradizo auru kpotosende kumbatayo

[Gu kpiahe du ti kpewaraga 7]

Ya mo ka ga Yesu kpee adu na rogoyo ti ni ka si adu nga kpotosende nika go ago?