“Oni Du Na Wesewese Nyemuse Na Akuaroni”

“Tipa gu nyemuse nga ga awirina oni du na wesewese nyemuse na akuaroni.”—AROMO 12:10, NW.

1, 2. Gini ngbatunga pagume mokedi sa gbiati gu mokedi nangia Pauro adu nani dagbayo na awirinayo?

VURU agu agarã 43 dunduko Don adihe kutingba sunge nimokedi kurogo agu aringara nga ga Far East, i aini ko tipa gu nyemuse ko adu nani tipa agu aboro ko anatungusapai fuyo. Baraho pii ko ni awere rii barame kaa sota na gu kaza du digidoho nga kina kpio, bete agu aboro nawirikipai beko mbata amangi gbanga nunguro ka ndu ka bi ko ka gumba gupai fuko nga, “Kamsahamnida, kamsahamnida!” du rogoyo rogo pa aboro Korea nga, “Tambuahe foro, tambuahe foro!” Gu wesewese nyemuse Don adu nani tipa yo aima zio ngbaduyo yo.

² Anga gi kpiapai du tipa Don re, si tipa kina ko nisako te. Rogo bambata sa kama agarã, gu mokedi nangia Pauro ayugu dudunguro nyemuse tipa agu aboro nangia abadiangbako. Pauro afu tiko ka ndusunge yo. Wa ko avurangia boro kakaka idapase, ko aduadu a nga bayee boro na kini ngere angera fuo aboro a, “wa de namanga pa awiriri.” Ko ake waraga fu gu dungurati nadu Tesaronike yo ki yaa: ‘Ani akpinyemu roni akpi, anga pa fu kina ga Mbori wene pangbangaa fu roni nangba tirani sa te, ono pa mbisimorani a, bambiko oni aye ka ngba ti rani gbe.’ (1 ATesaroniko 2:7, 8) Kusa, ho Pauro ayani fu agu awirinako nadu Efesa yo wee i abinga ko berewe te, i arikito nikpee “ki nikpari akpara ni aume, gbe, i ki moi goyo auru gorõ Pauro, ki dungo ko.” (Amokedi 20:25, 37) Si tie ziazia nga, gu pagume nadu dagba Pauro na awirinako adu nibakerehe gbe kisusi gu gbua nga padu yo na bangisa idapase beyo. I aduna nyemuse dagbayo wesewese.

Wesewese Nyemuse Gbiati Nyemuse

3. Wai du agu afugo du rogo Ziazia Kekeapai nga nyemuse gbiati wesewese nyemuse na wiratise dagbaha?

³ Rogo Ziazia Kekeapai yo, agu asino nga wesewese nyemuse, berãpa akurase, gbiati duna nunga aboro, ya rogoyo mbembedii kina sa na gu bawene sino aKristano nga nyemuse. (1 ATesaroniko 2:8; 2 Petero 1:7, NW) Wa kina akpakpu gu bawene mbia-fongo naki kurekure, agi asinombori re dunduko namangasunge sa ka kusa wene sangbanaha. Anga si nadungura aKristano tipa kina koditiyo sa te, ono si nambedisa yo a na Bayo du ngbangbaturũ yo. Sidu, gu mokedi nangia Pauro angarasi akurako aidipase ki yaa: ‘Ka gaoni nyemuse du nga nibiriki ya. Rogo gu nyemuse nga ga awirina, oni du na wesewese nyemuse na akuaroni.’—ARomo 12:9, 10, NW.

4. Gine nga rogo gu fugo nga, “oni du na wesewese nyemuse na akuaroni”?

⁴ Gu fugo Giriki Pauro amangisunge nani i asaha nga “oni du na wesewese nyemuse na akuaroni,” si nga gu fugo duna apaparaha ue, paparaha sa na gu rogoyo nga pabakure na gu kuraha na gu rogoyo nga gu nyemuse du dagba agume. A wa gu kura kumba duna bakere inohe rogo Ziazia Kekeapai asakarogoyo, ko nayawee rogo gipai re yo nga “si naida i ini aKristano tipa gayo nyemuse, na dawedawe kodatise, gbiati songodatise dagbayo na gayo aborokporo.” Ya mo wo gu oni aberã tipa agu awirinaroni nga aKristano? Si naida dawedawe pagume, du fu akurase na pagume, du nigu sino moipai dagba agu aboro du rogo dungurati. (AGaratio 6:10) Sidu, gu buku nga Vovo Ndiko Rogo gu Pa-Ngirisi Du Awere Nga gu, J. B. Phillips asaha, nasa gu fugo du rogo ARomo 12:10 nga: “Ani du na ndikidi dawedawe pagume dagbarani na akuarani wa gu du dagba awiri vuse-sa.” Na gu kuraha nga, gu Ziazia Kekeapai Nga ga Yerusarema (rogo pa-Ngirisi), si nayaa: “Oni kpinyemu tironi teketeke wa gu si aida awiri vuse-sa naamangaha.” Ii, anga aKristano nakpinyemu tiyo mbiko si nga gu rurupai si aida i mangihe watadu si nidingisoro fuyo ka mangaha te. Rogo “wene kpi nyemu awirina” angianga ningbanyabangirise ya, si naida ani ‘kpinyemu akuarani kakaka na kpotoraniyo dũ.’—1 Petero 1:22.

‘Mbori Nayugopa Kpinyemu Akuaroni fu Roni’

5, 6. (a) Wai Yekova namangisunge na kikindigi adunguratise nga ga dungu aringara ka yugopai fu gako aboro tipa gu wesewese nyemuse nga ga aKristano? (b) Wai gu pagume du dagba awirina anyaka vuru gbanga regbo susi gu nidu mbata?

⁵ Wa vura duhe nga ‘gu nyemuse du ti dungu aboro’ rogo gi zegino re ima zera, Yekova nayugopai fu gu gako aboro du areme i ‘kpinyemu tiyo dagbayo.’ (Matayo 24:12; 1 ATesaroniko 4:9) Gu kikindigi adunguratise nga ga dungu aringara aDezire Yekova namangaha nafu gu kpiapai susi akuraha tipa gi yugopai re. Ti aregbo gi kikindigi adunguratise re, agu aDezire du rogo gu dagbarago re nagbia agu awirina yee rogo tuturu aringara, na i kini rogodi yo ku kpuyo yo, watadu kini diyo kugume kurogo gayo akporo. Ti regbo kura bakere dunguratise i amangihe bambeda kusayo, bete awirina aye rogo agu aringara aboro ayugonga gayo aberã rogoho gbaiga ya. Kristano sa nga guko naaundo sunge mbakada avurubambu-rame tipa awirina ayaa: “Ho agi awirina re aye ni mbata, i aduna bakere gunde gbiati zee . . . Ono fuo arame sita kusa ho i apaa ni kuti awirinayo ka ga, i gbiati agu awirina i azoro kpuyo yo re aadungo tiyo dagbayo na kini kpari ni aume. I abi tiyo rogo ngbatunga gu nyemuse nga ga aKristano nga gu bangiriyo nika rengbanga ka go ti ni ya.” Pa dia boro awirinani kugume, zanga bipa agu apai du tipa yo, rengbe ka manga bawenepai kisusi funi na fu gani gino a.—ARomo 12:13.

⁶ Agi apangbangaa namangi ti regbo kikindigi adunguratise re angia wene iiriwo apangbangaa nirengo. Ono tie, dawedawe pagume nasona dagba aKristano kisusi gure ho i akodatiyo ni ka mangasunge fu Yekova tipa gbanga regbo. Ho ani aino awirinarani ni wenengai gbe, ani rengbe tie ka bi wene asinoyo dunduko na kikiipaha, agu asinoyo nga ga pe rengo, gu nasa rani ani kido kutiyo, gayo kakuti manga rurupai, gayo weneringise, gayo wene sino nga ga gamaahe, gayo berãpa kura aboro, gayo nunga tipa aboro, na pa zanga yo gbangbati. (Atambuahe 15:3-5; Asanza 19:22) Mark, nga gu wirina namangisunge nimokedi rogo gu pavuru Afirika du ku Uroyo, ayaa: “Pa koda ani berani na awirina dunduko kuti sunge nasa rani ani mbakadi gu pagume ka gberanga ya.”

7. Ginipai si aida ani mangihe tipa ka gbia ngbarago be gu wesewese nyemuse nga ga aKristano du rogo dungurati?

⁷ Tipa agu aboro du rogo dungurati rengbe kadu na ngbatunga gu pagume re na ki bandaha, si naida i du mbembedii na akurayo. Nidu ani dedede pati agu adunguratise nga ga aKristano, si nasa rani ani nyakasi gu pagume du dagbarani na awirinarani. Padu ani pati adunguratise yo mbata fu regbo tonaha kini fura na awirinarani, na kini karagapai ti regbo adunguratise, na kini fura berewe na yo fuo nyasaha, si nasa rani ani ngarasi tirani dagbarani kuti “nyemuse na [kuti] wene mangaapai.” (AEbere 10:24, 25) Wirina ni bakumba rogo dungurati Amerika yo ayaa: “Mi natingida gupai na ngbarago nga, ho mi aduni ni gude, gaani aborokporo anidu dedede dagba agu aboro nanakura kusa Bambu Kindo yo, bambiko i anagbia ngbarago be wene fugodagbase na awirinayo tipa gbanga regbo wa si anirengbe.”

Ya Mo Si Naida “Oni Za Ngbaduroniyo”?

8. (a) Ginipai Pauro aaberãha ho ko anyakasi aboro Korinda ni i “za ngbaduyo yo”? (b) Ginipai rengbe ani ka mangaha ka sonosa wesewese nyemuse dagbarani rogo dungurati?

⁸ Tipa ani rengbe ka yugo gu wesewese nyemuse re wenengai gbe, si naida ani “za ngbaduraniyo.” Gu mokedi nangia Pauro ake waraga fu gu dungurati nadu Korinda yo ki yaa: “Ani aza ngbaduraniyo. Ani akisanga ngbadurani beroni te.” Pauro angarasi yo i “za ngbaduyo yo,” nikaragapai kuti gako nyemuse. (2 AKorindo 6:11-13, NW) Ya mo oni rengbe a ka “za ngbaduroniyo” rogo gaoni wesewese nyemuse na kura aboro? Si aidanga oni pidi kina kura aboro i ye fuo roni te. Rogo gu ga Pauro waraga ko akehe fu aRomo, ko akodi pa gu zingo duho tipa du boro na wesewese nyemuse na kura aboro kuti gi rugute re: “Nibipa fu irisa dagbase, oni perembatayo rogo yugoho.” (ARomo 12:10, NW) Tipa ka yugo irisa fu kura aboro, oni rengbe ka guari nibambata boro ka paakuti yo pati dunguratise yo. Oni rengbe ka yamba yo a i ye ka gasa roni ku gene sunge tungusapai yo watadu ka sungo na oni tipa mbakada agu apai oni andu ka sakapai tipaha pati dunguratise yo. Pa manga oni he wo nambakada gene tipa gaoni wesewese nyemuse sono.

9. Gini apai bete aboro amangihe na akurayo aKristano kadu niwene abakure susi gu nidu mbata? (Oni kodi gu kpiaapai namangi rogo gaoni dagbarago.)

⁹ Aborokporo gbiati gu kura aboro du rogo dungurati, i rengbe arengba a ka ‘za ngbaduyo yo’ nindu yo ka biko akurayo, watadu ka yamba yo tipa riahe, na ka kodatiyo na yo rogo wene mangaapai. (Ruka 10:42; 14:12-14) Kumba du rimoko nga Hakop naambakada apai ti kura aregbo tipa tooni badona awirina kuru ka táã nduyo tooni. Ko nayawee gu badona aboro re nakoda “aboro dunduko, agude na sosono aboro, kodihe na agu avunguagude adunga na abadiarogatise beyo ya. Aboro dunduko ninaaga ku kporo yo na ngbarago tiyo, na gayo pagume ki nyaki susi gu nadu mbata.” Wa du ani ni aKristano, anga si naida ani mangi asadatise nyanyakii kadu nikina aidipase na akuarani sa te, ono si naida ani du a nindikidi abakurea yo.—3 Yoane 14.

10. Ginipai rengbe ani ka mangaha ka gaani pagume du nifudifudihe?

¹⁰ Ono tie, ti kura aregbo, gu zangarengba du tirani rengbe ka saha nikpakarakpakarapai ani zi abakure na kidu na wesewese nyemuse dagbarani. Ginipai rengbe ani ka mangaha fuo du pai wa gure? Nibambatapai, ani rengbe ka kpara fu Mbori tipa ka gbia wene pagume dagbarani na awirinarani. Gupai Mbori akpinyemuhe nga gako amoyambu naasungo na akurayo rogo nyemuse, sidu ko akaragapai akaraga sa ngbatunga gu ruru ziazia akpee re. (1 Yoane 4:20, 21; 5:14, 15) Si naida a ani mangipai na ngbanyaa kuti gaani akparakpee. Ric, nga gu batungusipambori ninaata ata du Afirika yo pavuruhe ku Uroyo, natingidapa gu wirina gu sinoko nga ga zizinga aturuso kura aboro aturuso kusayo tiko. Ric nayaa: “Kuba gupai nga mi he sungo na gu wirina re, mi adiberã ka ino ko wenengai gbe. Mi aini gupai nga, bavungu gu wirina re angia nyanyaki bafurugute. Fuo ruga mi tire na wai gi wirina re amangi nyanyaki asadatise ka diabe gi sinoko re na ki ini bakio wai ko nambakadi sinoko, rago angba tire na ko bakere gbe. Ani azi wene bakure dagbarani na ko.”—1 Petero 4:8.

Oni Yugu Gaoni Nyemuse fu Aboro!

11. (a) Gine si aida aboro mangihe rogo dungurati si sonosi gu wesewese nyemuse du dagbayo? (b) Tipagine pa onga boro kii narengbe ti ni ka gbarasa pani rogo toroyo?

¹¹ Areme, dungu aboro naraka gayo raka zanga i sonosi dawedawe pagume dagbayo na boro. Nagbere gupai re! Si aidanga gupai re du wo rogo gu dungurati nga ga aKristano te. Anga gu ndikidi nyemuse nga ga awirina nga gu kungbo zezeredi afugo i agumbaha gbiati irisiirisi sino mangapai te; na anga si a nga pa fura boro zaaza kisusi gu gene ni naafura mbata ngbaha te. Kuba gure, si naida ani du na nyemu ka za ngbaduraniyo fuyo, a wa Pauro amangihe fu aKorindo, na kini yugu gupai fu akuarani aidipase nga, ani nirengo naida kina weneapai naamanga fuyo. Wa avuranga du he nisino raka nga aboro dunduko du zaaza na akurayo ya, ono pa onga boro kii kisusi, si adanga funi te. Ziazia Kekeapai naza rani niyaa: “Gu ni nakpara tini nagbata kina gu pai ni akpi nyemu he, ka zinga kuti gu bawenepai nga ga sarangbanga dunduko.”—Asanza 18:1.

12. Tipagine du wene fugodagbase ti ni ninyanyakipa pai tipa ka sonosa dawedawe pagume rogo dungurati?

¹² Fugodagbase zanga biriki nga nyanyakipa pai tipa ndikidi pabakure. (Yoane 15:15) Ani dunduko naida agu abakure ani ka vota agu apai du ngbaduraniyo fuyo. Kurii gure, wa ani kaa ino akuarani wenengai, si nika du fu rani taata ani mangiapai tipa ka dia agu azingo du tiyo kusayo. Ho ani angera ni ngba gi gene re tipa ka mangapai tipa gu zingo nga ga akuarani, gure nga ani nasonosa gu wesewese nyemuse du dagbarani, na ani ki ini pa rengo afugo Yesu nga gu nayaa: “Ngbarago ho gbe rogo gamahe susi gu duhe rogo diaha.”—Amokedi 20:35, NW; AFiripoio 2:1-4.

13. Ginipai rengbe ani ka mangaha ka yugo gupai nani nga, ani na ndikidi wesewese nyemuse dagbarani na awirinarani?

¹³ Tipa gaani wesewese nyemuse rengbe ka undo aboro, si naida ani yuguhe ayugo. (Asanza 27:5) Ho du gaani wesewese nyemuse dagbase ni na akuarani ni ndikidihe, kpakpu rani nayugoho ayugo, na si rengbe ka fõngbadu kura aboro yo i karagapai sani. Tatamanatatamana kumba akepai ki yaa: “Gu imarago nga ga bangirise nangiisa kpoto boro yo.” (Asanza 15:30) Agu apai boro ata berãha aberã kini mangihe, si nasonosa wesewese nyemuse asonosa a. Wa vura duhe nga, boro ho ka ngbe ndikidi wesewese nyemuse dagbani na kurani te, guhe boro agamaha na ngbaduniyo dunduko, si nakiiso gu wesewese nyemuse akiiso du dagbayo. Gu kadisi kedi boro ho, gu waraga ke boro ho, ‘gu fugo gumba boro ho ti regboho,’ agi apai dunduko re si rengbe arengba ka yugopa gu bakere nyemuse du boro nani tipa kurani. (Asanza 25:11; 27:9) Fuo zio ani bakure kindi na kura aboro, ani du wa ka ani bandaha nindu ani kumbatayo kindi kaa yugo gu nyemuse zanga gbangbati. Gbe ho du agu abakurearani ni re rogo zingo, si naida ani du pati yo ka undo yo. Ziazia Kekeapai nayaa: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”—Asanza 17:17.

14. Ginipai rengbe ani ka mangaha ka si wiri gupai nga boro akaraganga pai fu rani kuti gaani nyemuse tipa ni te?

¹⁴ Ka pe rengo, ani arengbanga ka maa gupai ku berã rani yo nga ani nika mbeda na agu aboro dunduko du rogo dungurati te. Kuti sino raka gu kura aboro kinaho ani ka mbeda na yo susi gu kurayo. Sidu, ka kura boro wiri wa ni ambedanga na oni gbe wa gu oni aidaha te, ka oni gunga niipo kuti gu digisopai nga, pai kina tironi nanyaga ni kusayo ya watadu ni du na pai tini ya. Na ka oni asadinga ngbaome ka sigira pagume dagbaroni na ni ya. Ka oni afura na ni dedede rogo sino pabakure kuho ni aidaha kuho ni, gure nga oni mbugene nizakizakihe tipa ka sonosa mbembedi pagume bakere gbe susi gure kumbatayo gizo.

“Ngba Mo ti Re Gbe”

15. Sangbana tambua boro nga gine, watadu sangbana zingo ho?

¹⁵ Zanga kapa, Yesu aima duna ngbarago tiko ti regbo gako bapatiza ho ko agi agu afugo ni naye ngbangbaturũ yo naayaa: “Ngba mo ti re gbe”! (Marako 1:11) Zanga kapa, agi afugo Ba Yesu agumbaha ka yugo gupai nani nga ko ima idapa Yesu re, aima nyakasa ga Yesu ida ya Bako nakpinyemu ko akpi nirengo. (Yoane 5:20) Si nafu kina gberarago nga, bete aboro agianga ngbatunga agu afugo nga ga tambuahe re ngba agu aboro i afu irisa fuyo na kini kpinyemu yo te. Degude nga Ann nayaa: “Dungu aparanga wa kina mi adunga na gayo aborokporo ti ngisa idapase na yo ya. . . . Kina bisirapa rani ani naagiaha ho du ani ni kporo yo. Gipai re nafu kina gberarago fu rani.” Ono tie, ho i asatiyo ni ni aKristano rogo dungurati, i nagbia ngbarago be agu aboro nga gayo aborokporo rogo toroyo, nasongoda yo na kini ngere fuo yo wa abayo, wa anayo, na wa awirinayo.—Marako 10:29, 30; AGaratio 6:10.

16. Tipagine angbanga gu sino nga ga bisirapa boro ti ni ya?

¹⁶ Rogo gu sino mangaapai nga ga kura aboro, avunguagude, sosono aboro, na abayugupai, i atambuanga agude na ngbaduyo yo dunduko tipa agu apai i amangaha te, bambiko i naberãha ya ngbatunga gu tambua agude re rengbe ka sa yo ni aboro sakparakpa watadu ka sa yo nirukoo. Ngbatunga agu aberã re rengbe arengba kadu na ome kurii agu aborokporo nga aKristano gbiati agu aboro du rogo dungurati a. Ho i atambua gude ni tipa gu gumbapai mangi ni he watadu tipa gu kurapai, gi sosono aboro re rengbe ka yaa: “Si ningba angba, ono si naida mo mangihe wenengai susi gure!” Watadu i rengbe ka yugopa gupai gbere tiyo fu gude ngba kura gene. Dunguyo naida kuti gupai nga, nimanga yo pai were, i nangarasa agu agude re i mangi asadatise na omeyo du ka mbakada apai si ngba ti gu mangi yo. Ono tie, gi gene mangapai re naaye dedede na gu sangbanaha angbanga ya, mbiko si rengbe ka sa aparanga i gindigo asunge na gu nduhe nga i arẽnga ka mangaha wa gu sosono aboro aidaha te.

17. Tipagine si aida ti ni ani gbata amamu ka tambua kura aboro?

¹⁷ Ono tie, si aidanga i tambuahe boro kinaho sa i aida ka fu rugute ni funi te. Ndikidi tambua boro nasonosa wesewese nyemuse dagba aborokporo na rogo dungurati, si kini ngarasi aparanga i ndu fuo agu awirina duna inohe tipa gbia arugute beyo. Sidu, kuba ani mbu gu sino mangaapai nga ga aboro si naaruga rani tipa wai si aida ani naamanga aboro, ani “ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” Ani naatambua aboro a wa Yekova amangaha.—AEfeso 4:24.

18. (a) Rukutu agudee, wai si aida oni bi agu arugute sosono aboro afuhe? (b) Tipagine du sosono aboro ti ni na rubangirise tipa wai i afu arugute?

¹⁸ Tipa roni nga rukutu agudee, ka oni danga kuti gu digisopai nga, ka sosono aboro fu arugute fu roni, si nayugo gupai nga i nasoga roni asoga ya. (Batungusipai 7:9) Anga wo duhe te! Si nawiraha nirengo nga, gu berãpa roni du tiyo na gu bakere nyemu roni du tiyo si du nasa yo i fu agu arugute re. Ka si adunga wo ya, gine ka sa yo i guari ka gbarasa gayo regbo ka fura fu roni tipa gupai re? Niino sosono aboro agu asangbana rengbe afugo ka mangaha, sidu i, gbe agu abaakumba nga ga dungurati yo, nadia bakere regbo ka berã na ka fu kpee mbatafu fu yo rugute, mbiko i naida sa ka manga kina wenepai.—1 Petero 5:5.

“Yekova na Bakere Wesewese Nyemuse Tiko”

19. Tipagine agu aboro narungo be gberarago narengbe ti ni ka ngera kube Yekova tipa ko songodi yo?

¹⁹ Gu kereapai namangi bete aboro nasa yo i berẽ ya pa yugo yo wesewese nyemuse fu kura aboro nika ndu na yo sa kina kura gberango. Si naida wingbaduse beyo gbiati idapase tipa i rengbe berewe ka za ngbaduyo yo fu aboro. Ono si aidanga bangiriyo go ti gupai nga, Yekova “aturã nga na ani wa sa te” te. Ko nayamba rani ani mbedi na ko. (Amokedi 17:27; Yakoba 4:8) Ko ima rugatiko a na pa agu apai ani agunde behe, na ko nakido rani ka songoda rani na ka undo rani. Fugo gu bake papara Atambuahe nangia Davide nakido rani niyaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”—Atambuahe 34:18.

20, 21. (a) Wai ani aino gupai nga, ani rengbe arengba kadu na dawedawe pagume dagbarani na Yekova? (b) Ginipai si aida boro mangihe tipa ka gbia dawedawe pagume dagbani na Yekova?

²⁰ Dawedawe pagume na Yekova nga gu nyanyakipa pagume kisusi rengbe ani ka sonosaha. Ono ya mo ngbatunga gu pagume re ni gupai nirengo rengbe ani arengba ka gbiaha? Ii, ani rengbe arengba. Ziazia Kekeapai nayugo wai fu rani ruru akumba na adee abi tiyo mbembedii gbe na gu Barani du ngbangbaturũ yo. I abanda gu wene afugo i anagumbaha tipa si fu kido fu rani ya ani rengbe arengba a ka mbeda na Yekova.—Atambuahe 23, 34, 139; Yoane 16:27; ARomo 15:4.

²¹ Ani rengbe arengba wa du ani nibasasa ka manga agu apai Yekova aidaha berani tipa ani zi bakure na ko. Davide asanahe ki yaa: “Ako Yekova, da ka sungu rogo ga bamburoko? . . . Gu ni nata nzunzu, ki nimangi rurupai, ki nigumba rengo kpotoni yo.” (Atambuahe 15:1, 2; 25:14) Wa ani abi gupai nga, pa manga ani sunge fu Mbori naye na wene azuzuhe na si kini sa ko ko naayugo gene fu rani na kini banda rani, ani nika ye ka ino gupai nga, ‘Yekova na bakere wesewese nyemuse tiko, na bakere inapai.’—Yakoba 5:11, NW.

22. Gini ngbatunga pagume Yekova aida gako aboro gbia ngbarago behe?

²² Nairiwo gu maku du ani nani mbiko gupai nga Yekova na nyemu kadu na pagume na ani nga kpakpa aboro! Ya mo si aidanga tie ani du na wesewese nyemuse dagbarani na akuarani tee? Mbiko ga Yekova undo, ani dunduko nibasasa rengbe arengba ka koda berani tipa ka sa akuarani aKristano i gbia ngbarago be gu wesewese nyemuse du dagbarani nga gaani sino nga agu awirina nga aKristano. Tiibe ga Mbori Kindo, agu aboro dunduko nika du auru kpotosende nika du rogo gi wesewese nyemuse re nyeanye kindi.

Oni Rengbe ka Sakarogoyo?

• Gini ngbatunga sino mangaapai si aida si du dagba agu aboro du rogo gu dungurati nga ga aKristano?

• Wai rengbe ani nibasasa ka koda berani kuti gu wesewese nyemuse dagbase duti agu aboro du rogo dungurati?

• Wai ndikidi tambua boro asonosa gu wesewese nyemuse nga ga aKristano?

• Wai ga Yekova wesewese nyemuse tipa rani asongoda rani na kini banda rani?

[Gu kpiahe du ti kpewaraga 31]

Ya mo oni rengbe ka “za ngbaduroniyo” rogo gaoni wesewese nyemuse na akuaroni?