Oni Naasona Kindi Rogo Gaoni Nyemuse Nga Ga Awirina

‘Oni ta rogo nyemuse yo, a wa Kristo akpinyemuroni a.’—EF. 5:2.

1. Gini nyanyakipa sino Yesu aya si aboro nika ino gako abawiriki ti ni?

GU SUNGE nga ga tungusa wene pangbanga kini tanga nani ti akporo, si nga gupai aboro aino aDezire Yekova ti ni. Wa vura duhe wo, Yesu agumbapa kurapai kia ya si aboro ka ino gako ndikidi abawiriki ti ni. Ko ayaa: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”—Yo. 13:⁠34, 35.

2, 3. Gini sangbanapai rengbe gu nyemuse du dagba awirina kadu nani kurii agu aboro naye tipa agu adunguratise nga ga aKristano?

² Anga aboro ho duna ngbatunga gu nyemuse du rogo gu riigbu nga ga ndikidi aKristano te. A wa manyeti naagbe marã kuti ni, kinawo a gu nyemuse du dagba ga Yekova aboro asayo i du na kodatise si kini sa agu aboro nabiyo i ye kurogo rengo yo. Oni bingo gupai namangi Marcelino nga boro Cameroon. Ko avurari ba gako sunge yo. Tifuo vurari bangiriko, aboro atona kaa gumba gupai nga i anoko ano na mangu. Kuba gupai nga gako aboro-kanisa gbiati gu pasita nadu yo fu wasa fuko, i ado ko kusayo rogo gayó kanisa. Ho boro sa dagba aDezire Yekova ayambuko ni tipa dunguratise, ko aduadu dindikodindiko ka ndu koyo, mbiko ko aidanga aboro do ko berewe wa gu nadumbata te.

³ Ono kina ngbako nazere be gupai namangi Bambu Kindo yo. I adiko kugume ngba wene gene na ko ki gbia bakere wasa be gu yugopai nga ga Ziazia Kekeapai ko agihe. Ko atona kaa ndu kupati adunguratise yo naabaha na kini ndu kumbatayo na gako wisigo Ziazia Kekeapai, na niyangaraha, i ki bapatiziko rogo gu garã nangia 2006. Awere, ko nayugo rengo fu gako aborokporo na amurakporo gbiati kura dungu aboro. Ko naida gupai nga ka yugo kina ngbatunga gu nyemuse i ayuguhe fuko re fu agu aboro ko awisigo Ziazia Kekeapai naayó.

4. Tipagine si aida ani ‘nita ti ni rogo nyemuse yo’ wa Pauro agumbaha?

⁴ Gu nyemuse re ima ngba gbe na si naida ani mangi nyanyaki asadatise tipa ka bandaha. Oni bingo gipai re: Dee ndu ku gene age yo rogo kere zere ki gindo ba we ki sungu pati ni nisungudi gari age. Gu we re ima ri wenengai si ki sa gupai nga, gu kura aboro du gayó go age pati gari, i ye fuori ka faadaha. Ono ya mo ka agu aboro nafaada gu we re afõnga ngbaha kini ye na anyake kuti ni ya, si tidinga watadu ka biso tee? Teketeke a, gu wene nyemuse du rogo dungurati rengbe arengba ka zera ka si du nga ani amanganga nyanyaki asadatise wa du ani nibasasa tipa ka nyakasaha te. Ono wai rengbe ani ka nyakasaha? Gu mokedi nangia Pauro ayaa: “Oni . . . [ta] rogo nyemuse yo, a wa Kristo akpi nyemu roni a, ki fu tiko tipa rani, nirũ he ni motumo fu Mbori ni gu fuõhe nga guzuguzu fuõhe.” (Ef. 5:2) Ono gu sanahe tie ani aida ka makiaha nga, ‘Ngba gini agene rengbe ani ka ta rogo nyemuse?’

“Oni Zá Ngbaduroni”

5, 6. Tipagine Pauro anyakasi agu aKristano ti ni nadu Korinda yo i ‘za ngbaduyó’?

⁵ Pauro akepai fu agu aKristano nadu Korinda yo ki yaa: “Ako aKorindo, ani agumba pai fu roni zukazuka, ani aza ngbadurani fu roni. Ani akisa nga ngbadurani fu roni te, ono oni akisi ngbaduroni fu rani. Mi nagumba pai fu roni awere a wa ka oni du ni awire; oni yúgu apai fu rani a wa ani ayugu he fu roni, oni zá ngbaduroni fu rani!” (2 Kor. 6:⁠11-13) Tipagine Pauro angarasi aKorindo ti ni i za ngbaduyó?

⁶ Oni makianga wai gu dungurati nadu Korinda yo atona. Pauro andu ku Korinda yo ti digido gu garã nangia 50 F.B.K. Wa vura duhe nga Pauro atona gako sunge tungusapai na kpakaraapai, ko arunga gene te. Vuru umba regbo gbua, badungu aboro rogo gu gbata re naidi kuti wene pangbanga. Pauro asungu yo tipa ‘garã sa na adiwi sita’ kaa yugopai fu aboro na kini nyakasi awirina rogo gu vovo dungurati re. Si tie ziazia nga Pauro adu na bakere nyemuse koyo du agu awirina ni nadu Korinda yo. (Amo. 18:⁠5, 6, 9-11) I anaairisa ko na kidu na bakere nyemuse koyo du ko ni. Wa si avura duwo, bete aboro adu kinaho naane ane tiko. Isoke i aaidanga na gu rugute ko afuhe fuyó te. (1 Kor. 5:⁠1-5; 6:⁠1-10) Isoke aguyo aidi kuti gupai agu amokedi agumbaha naabi tiyó nga i nangia “ndikidi” amokedi. (2 Kor. 11:⁠5, 6) Pauro aida gupai nga awirinako dunduko du na nyemuse ko yo du ko ni. Si du ko aya ti ni fuyó wee i ‘za ngbaduyó’ nimbeda koyo du ko ni gbiati akurayó aidipase.

7. Wai rengbe ani ka ‘za ngbadurani’ rogo yugo nyemuse?

⁷ Na ani tigaani? Wai rengbe ani ka ‘za ngbadurani’ rogo yugo nyemuse? Si nidu dedede nitaatapai fu agu aboro du garãyo kina sa watadu agu aboro du tunga yó sa i yugu nyemuse dagbatiyo. Na aguyo duna bangisa bipai tipa aũmbaro nadia bakere regbo wa sa. Ka si du nga gu nyemuapai du ani nani nakpara rani akpara ti kura awirina, si naida ani ‘za ngbadurani.’ Si adu nipatatamana ka ani sana tirani nga: ‘Ya mo mi nigu boro natungusapai na kini kodi tire na kina agu aboro nga wene abakureami? Ho du mi ni Bambu Kindo yo, mi naadia regbo nikina guruhe na vovo aboro mbiko mi naabihe nga si naida si di regbo adia tipa i da ni abakureami? Ya mo mi naafu sene fu sosono aboro na paranga aboro dunduko rogo dungurati?’

8, 9. Wai rengbe gu ga Pauro rugute du rogo ARomo 15:7 ka undo rani ani sonosi nyemuse dagbarani na awirina?

⁸ Nibi gupai nga ga fu sene, agu apai Pauro akehe fu aRomo rengbe arengba ka undo rani ani du na wene bipai tipa awirinarani. (Oni gedi ARomo 15:7.) Ti agu aregbo nadumbata kusayo, ho boro anidi gino ni ku kpuni yo, ní anidu na bakere ngbarago na ki yuguhe fu gaani gino nga ní na ngbarago. Wakina gure a, Kristo ima dia rani kurogo gako dungurati, na si naida ani wirikiko nidia ani akuarani kugume.

⁹ Wa ani kaa fu sene fu awirinarani Bambu Kindo yo na rogo kura aba, ani ngere tipa agu aboro ani aabingo yó were ya watadu aguyo ani afuranga naayó were ya. Si angba wai ka oni di bete regbo ka fura naayó! Ti gu kura regbo dunguratise, si naida oni mangi kina gu bangisapai re na kura aboro. Oni nika dia kina umba regbo gbua oni ki fura na awirinaroni dunduko. Ka si du nga oni agbianga regbo tipa ka fura na awirina dunduko rogo uru sa te, ka oni bakingo bangirani ya. Ka oni kpingo pai mbiko gupai nga boro naafunga sene furoni ya te.

10. Gini banyanyakipa momu du fu aboro dũ rogo dungurati, na wai rengbe ani ka gbia undo behe?

¹⁰ Fu sene fu boro nga gu bambatapai boro amangaha mbata fu ní di kurani kugume. Si a nga gupai rengbe ka za gene fu wene fugodagbase na nyenye bakure. Nikpiapai, aboro naayamba rimoyo fu awirinayo ba kikindigi adunguratise yo tipa ka tona fugo naayó na kidu na gu berã nga i abi tiyó abi berewe. Agu awirina namanga Sunge Dudua ABambu Kindo na aguyo ninaafu undo fu agu aboro du rogo zingo, i naada niwene abakure mbiko gu wene asino i abihe ti akurayó ho i amangasunge ni naayó. Dungu amomu du rogo ga Yekova riigbu ka zio nyenye bakure. Ka ani ‘za ngbadurani,’ gaani nyemuse nisono kina kumbatayo na ki kodi rani wa sa rogo ndikidi irisombori.

Si Naida Ani Di Regbo Tipa Kura Aboro

11. Wa duhe rogo Marako 10:⁠13-​16, gini kpiapai Yesu amoihe furani?

¹¹ AKristano dunduko si aida i di regbo tipa kaa fura na kura aboro a wa Yesu anaamangaha. Oni bingo gupai Yesu agumbaha ho gako abawiriki aza avunguagude ni ka i yengo na awiriyo fuoko ya. Ko ayaa: “Oni hé rukutu agude i ye fuo re; ka oni káraga nga yo ya; bambiko i wa avuru ga Mbori ngbii.” Fuoho, “ko ki aka yo beko, ki moi beko auru yo, ki fu maku fu yo.” (Mk. 10:⁠13-16) Oni makianga pa wai agu agude re aduna ngbarago ka bi gu nyemuse gu Bawene Bayugupai nga Yesu re ayuguhe fuyó.

12. Gini apai rengbe ka ká na ani ti fura na aboro?

¹² AKristano nibasasa si aida i sana tiyó nga, ‘Ya mo mi naadia regbo tipa kura aboro, watadu mi naamanga tire dedede nga regbo bere te?’ Kura asino kinaho agberanga ya, ono si rengbe arengba ka kiso gene fugodagbase. Nikpiapai, ka ani asungo kini nofodi kina gaani aterefuni watadu kaa sungo na kina giri manzigo turani yo ho du ani ni na aboro, si rengbe arengba ka sa yó i berẽ gupai nga nyemu sungo naayó tirani te, watadu nyemu fugo naayó tirani te. Rengo ngaha nga, ‘regbo onga kii’ kina ti ni. Ono ho du ani ni na aboro, si ngba angba ani sa gu regbo re niregbo “fura.” (Batu. 3:7) Kura boro rengbe ka yaa, “Kura aregbo kinaho angbanga fugo tire ya” watadu “Mi naafuranga wiso te.” Wa vura du agi apai re nikina rengo, ka ani duna gu nyemuse “agbata nga gaha pai” ya, ani fura afura na aboro si ki vura du vurũ nga ani aidanga ka fura ti gu regbo re te.—1 Kor. 13:5.

13. Gini ngbatunga sino Pauro anyakasi Timoteo ko du nani ko yo du agu awirinako ni nga aKristano?

¹³ Pauro arugu Timoteo ko naairisa agu aboro dunduko nadu rogo dungurati. (Oni gedi 1 Timoteo 5:⁠1, 2.) Wakina Timoteo, si naida ani niirisi gu sosono aboro airisa du rogo dungurati kini biyo wa abarani na anarani, kini bi paranga aboro wakina boro agu awirinarani ani akuru sa naayó rukumbu yo. Ka ani duna ngbatunga gu sino re tirani, awirinarani nigundenga berani te.

14. Gine nga agu aundo ani agbiaha be wene fugo na aboro?

¹⁴ Ho ani ape agu apai ni fu aboro rengbe ka sonosa yó rogo toro yo, si rengbe arengba ka sa yó i du wenengai berãyo yo na ki sa yó i sono rogo toro yo. Wirina sa namangasunge rogo be-basunge atingidipa wai sosono awirina rogo gu be-basunge re anaadia regbo tipa kaa fura naako ho ko ayeaye ni nivovo boro. Agu afugo i anaagumbaha fuko asako ko bi tiko nga ko angia kina boro gu Betere re nzunzu. Awere, kina gu bangisapai re ko amangaha na agu aboro du rogo gu be-basunge re.

Umbasitise Naye na Zereda

15. Ginipai nayugo nani nga ani rengbe arengba ka gbiatirani na tagbagapai?

¹⁵ Agu awirina nangia Euodia na Sunduke aduna tagbagapai dagbayó ka i ainongo wai ka mbakadaha ya. (Frp. 4:⁠2, 3) APauro na Barunaba adari gbanga kango si ki sa gupai nga i kparaka tipa bete regbo. (Amo. 15:⁠37-39) Agi apangbanga re nayugo gupai furani nga, kura aregbo kinaho tagbagapai akura kura dagba ndikidi airisimbori. Yekova nayugo gupai furani si aida ani mangihe ka nyasa riipa agu atagbagapai re na ki ngba berewe kina wai ani anidu. Ono tipa ka gbia gu undo re, he kinaho Yekova aidaha berani.

16, 17. (a) Wai umbasitise aundo rani ani mbakadi gu tagbagapai kuru dagbarani? (b) Wai gu pangbanga du tipa wai Yakobo aye ka gbia Esau ayugopa nyakapa umbasitise?

¹⁶ Ani yanga wee oni naida ka mera na bakurearoni na motoro. Mbata fu oni tona oto, oni duwa ka oni zingisi motoro mbata na gaha rifungura. Tipa aboro mbakadi gu tagbagapai du dagbayó a, si naida i mangisunge na rifungura. Gu rifungura re nga umbasitise. (Oni gedi Yakoba 4:⁠10.) A wa ani ka bihe rogo agu akpiapai naye re, umbasitise nasa agu aboro duna tagbagapai i mangi agu apai du rogo Ziazia Kekeapai.

¹⁷ Agarã aima susa wa 20 tingbafuo zinga Esau mbiko ko akpa ti gbia gako aũkumbo na ko kini gbata Yakobo ka imoko. Regbo ada tipa agu awirina re gbiatiyo berewe fuo gu gbanga regbo re, ono ‘Yakoba aagunde agunde kidu na rungo gbe.’ Ko aberẽ gupai nga Esau nika imoko aimo. Ti gu regbo i agbiatiyo, Yakoba amangi gupai nazeresi kina ngba Esau. ‘Ko atumusa ku sande’ ho ko ambedi ni na unvurako. Ginipai namangi tingbafuo gure? ‘Esau aoro ka ngbisa ko, ki dungo ko, ki ti ku goko yo ki nyoro pangbako, i kini kpari niʹaume.’ Boro ho berewe nadu naapa sovura riniyo te. Gu umbasitise Yakobo adu nani nasa Esau ko mbu gu gbegberẽ berã ko adu nani tipa wirinako nga Yakobo.—Bam. P. 27:41; 32:⁠3-8; 33:⁠3, 4.

18, 19. (a) Tipagine si aida ti ni ani du nibambata boro ka manga gupai Ziazia Kekeapai agumbaha ka tagbagapai kuru dagbarani? (b) Ka ani asadi ka mbakada tagbagapai dagbarani na boro ono ka ani agianga tirani ya, tipagine si aidanga ani zingi ti ni ya?

¹⁸ Ziazia Kekeapai na dungu wene arugute rogoho tipa wai ka nyasa riipa tagbagaapai. (Mt. 5:⁠23, 24; 18:⁠15-17; Ef. 4:⁠26, 27)a Ka ani adunga na umbasitise ya, nyasa riipa tagbagapai kpakara akpakara furani. Ka ani sungudingo kina gu boro du tagbagapai dagbarani na ní ní ye ka ho mbupai baraho du gu rifungura nga umbasitise ni kina berani yo ya.

¹⁹ Ka si du nga ani guari ka ndu fuo gu boro du tagbagapai dagbarani na ní ka ani agianga tirani ya, si aidanga ngbadurani imi te. Si rengbe kadu nga gu boro re nika aria gani berã aʹaria kusa. Awirina Yosefa amangi fuko gbegberẽe. Si aima dia gbanga regbo i kini ye ka biko nibakerepa boro Ezipeta yo. Niyangaraha, i asa kpotoyo yo ki hõmbupai beko. Yosefa ambupai fuyó, na gu ga Yakobo aborokporo re ki da nigu rikaaboro nadu na rimo Yekova riyo. (Bam. P. 50:⁠15-21) Pa banda ani zereda dagbarani na awirinarani naye na kodatise gbiati ngbarago kurogo dungurati.—Oni gedi AKorosaio 3:⁠12-​14.

Ani Yugu Nyemuse “Rogo Mangapai yo na Rogo Rengo Yo”

20, 21. Ginipai ani awirikaha be gupai Yesu amangihe nga ka zunda ndu gako abawiriki?

²⁰ Rogo gu yuru nadumbata fu kpi Yesu, ko aya fu gako abawiriki wee: “Mi yugu [kpia]pai fu roni, oni nimangi wa mangi mi furoni.” (Yo. 13:15) Ko ape gipai re tingbafuo zundako ndu gako abawiriki naanidu 12. Gupai Yesu amangihe re aangianga kungbo wene sino gbua te. Mbata fu Yoane gumbapa zunda Yesu ndu gako abawiriki, ko akepai ki yaa: “Ko nakpi nyemu gu gako aboro akpi nadu zegino, ko anakpi nyemu yo akpi kindi dati yangara rago.” (Yo. 13:1) Gu nyemuse Yesu adu nani tipa gako abawiriki nasako ko zundu nduyo nga gu sunge kina akanga anaamangaha. Si aaida gako abawiriki nimangihe kinawo dagbayó. Ii, si naida ndikidi nyemuse fõngbaduraniyo ani ndusunge awirinarani.

²¹ Gu mokedi nangia Petero, nadu dagba agu aboro Wiri Mbori azundu nduyo, ko aima ino rogo gupai yo Yesu amangihe re. Fuo dungu agarã, Petero akepai ki yaa: “Wa du wo du he oni azíasi mbisimoroni rogo gia sangba rengo dati wene kpi nyemu awirina, oni kpí nyemu akuaroni akpi kakaka kpotoroni yo.” (1 Pet. 1:22) Gu mokedi nangia Yoane nadu a kina dagba agu aboro Wiri Mbori azundu nduyo akepai ki yaa: “Gi rukutu agude, ka ani du nga na nyemuse kina rogo fugo yo, ni mirãse a ya; kina rogo mangapai yo na rogo rengo yo.” (1 Yo. 3:18) Si angba wai ka ani yugu gaani nyemuse tipa awirinarani rogo mangapai yo.

[Gu rukutu kekeapai du bandu kpewaraga yo]

Oni Natingidaha?

• Wai rengbe ani ka ‘za ngbadurani’ rogo yugo nyemuse?

• Ginipai rengbe ka undo rani ani di regbo tipa kura aboro?

• Wai umbasitise aundo rani ani mbakadi gu tagbagapai kuru dagbarani?

• Ginipai si aida si fõngbaduraniyo ani berẽpa akuarani?

[Gu kpiahe du ti kpewaraga 24]

Oni di akuaroni aidipase kugume

[Gu kpiahe du ti kpewaraga 26]

Ka oni henga dia regbo tipa kura aboro ya