I Araba Yo Tipa Manga Dezirepai Sirisiri

“Oni adu ni adezirere, Yerusarema yo na Yuda yo a Somorona yo, na digida sende yo.”—AMOKEDI 1:8.

1, 2. Gine nangia gu sunge i afuhe fu Petero, na da nafuhe fuko?

¹‘YESU nangia boro Nazareta aya fu rani wee ani nitungusipai fu aboro, na kini gumba gupai nga, ko du nga gu boro Mbori aya tipa ko wee ko nika du ni basapungbangaa unga aboro na kangba aboro.’ (Amokedi 10:38, 42) Gu mokedi nangia Petero agumba agu afugo re fu Korunerio gbiati gako aborokporo ka sakarogo pa gu sunge fuyo Yesu afuhe fuko nibatungusi wene pangbangaa.

² Gini regbo Yesu afu gu sunge re fuko? Si nawira, Petero avura kaa berã tipa gupai Yesu agumbaha fuo zinga ko bekpio ngbutuko mbata fu dakpa ko ku ngbangbaturũ yo. Ti gu regbo re, Yesu aya fu gako ruru abawiriki wee: “Oni adu ni adezirere, Yerusarema yo na Yuda yo a Somorona yo, na digida sende yo.” (Amokedi 1:8) Ono tie, tipa bete regbo mbata fu gupai re, Petero aima ino gupai nga, mbiko du ko niga Yesu bawiriki, si aidi ko naafura fu kura aboro tipa gako idapase kuti Yesu.

I Araba Yo Tipa Agarã Biata

3. Gini iiriwopai Yesu amangihe, na gini yambahe ko ayambu aPetero na Andarea nani?

³ Tipa dungu adiwi fuo zio Yesu bapatiza rogo gu garã nangia 29 F.B.K., ko atungusipai rogo gu ba aPetero na wirinako nangia Andarea anamangasunge zio atĩo rogoho rogo gu Baime nga Gariraya. Yesu aye fuo yo fuo manga yo sunge sasasa yuru zanga zio wiri he. Wa si avura du wo, Yesu aya fuyo: “[Oni] túrã ha ku dudungura ime yo, ki zumu gaoni apio ka zia atĩo.” Ho i amangi gupai ni Yesu agumbaha fuyo re, “i ki zi dungu atĩo gbe; gayo apio ki nisipi asipa.” Fuo bi yo gu iiriwopai re, gunde azi Petero, ono Yesu angarasi ko niyaa: “Ka mo gúnde nga ya; mo nikazia aboro ni ungayo ku mbata yo.”—Ruka 5:4-10.

4. (a) Wai Yesu araba gako abawiriki tipa i naamanga dezirepai? (b) Gini kparakparapai si adu nga si nika du dagba ga Yesu sunge tungusapai na ga gako abawiriki?

⁴ Nibasa, aPetero na Andarea, gbiati aYakoba na Yoane, nangia awiri Zebedayo, ambu gayo akurungba kini pekefuo Yesu. Tipa agarã nambedi kuti biata, i anagasa Yesu ku gene gako atua nga ga tungusapai yo na ko kini raba yo i kuru ni abatungusi wene pangbangaa. (Matayo 10:7; Marako 1:16, 18, 20, 38; Ruka 4:43; 10:9) Ti digido gu regbo re, rogo Nisana ti rameru 14, rogo gu garã nangia 33 F.B.K., Yesu aya fuyo: “Gu ni ka idi pa re, agu apai mi amanga ni mangi he amanga a; ni mangi apai amanga bakere susi gere.” (Yoane 14:12) Si adu nga, ga Yesu abawiriki nika manga dezirepai sirisiri wa kina gu ko amangihe ono nibakerehe kisusi gako. A wa i ainihe ngbutuko fuo gu regbo re, si adu nga i gbiati vovo abawiriki nga aguyo nika du gizo, si aida gupai beyo nga i naamanga dezirepai fu “arikaaboro dunduko,” dakuti “digida zegino.”—Matayo 28:19, 20.

5. Rogo gini agene rengbe ani ka gbia undo be gu yugopai Yesu afuhe fu apefuo ko?

⁵ Ani naraka ti ‘digido zegino.’ (Matayo 24:3) Anga ani wa gu ga Yesu bambata abawiriki re te, anga ko herẽ tipa ani ndu na ko ku gene tungusapai yo kini bi ko ko nitungusipai fu aboro te. Wa vura duhe wo, ani rengbe arengba kindi ka gbia undo be gu gako yugopai ko ayuguhe nigeda ani paha rogo Ziazia Kekeapai gbiati agu arugute ko afuhe fu apefuo ko. (Ruka 10:1-11) Ono tie, gi papara kekepai re nika sakapai tipa gu nyanyakipa pai berewe kia Yesu ayuguhe fu gako abawiriki, nga ruru bipai tipa sunge tungusapai.

Berãpa Aboro

6, 7. Gini sino Yesu nasa gako sunge tungusapai si du niwenehe, na wai rengbe ani ka wirika manga wa ko rogo gipai re?

⁶ Tipagine Yesu amangi wene dezirepai ti ni wa ngbatunga gure? Nduhe sa dagba agu akuraha nga gu bakere nyemuse ko adu nani tipa aboro gbiati berã payo. Bake apapara Atambuahe afura tipa Yesu kumbatayo ya ko adu na “nunga rurungbura boro . . . ti ko na irazingo ahe a.” (Atambuahe 72:13) Ko aima digiso gu sangbanebi re nirengo. Ziazia Kekeapai nafura tipa gupai namangi ti kura regbo niyaa: “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” (Matayo 9:36) Zavura kere aboro ingapai, i aima inopa gako nyemuse na i ki mbedi koyo du ko ni.—Matayo 9:9-13; Ruka 7:36-38; 19:1-10.

⁷ Ani areme a, ani amanga wene dezirepai ka ani du na nunga aboro tirani wa kina gure. Mbata fu ani ndu ku gene tungusapai yo, tipagine ka ani aberãnga mbata ti ni tipa wai gbe du aboro na zingo tiyo tipa gu pangbangaa ani andu nani re fuyo ya? Oni berẽnga pa gu kpakarakpakaraapai du yo rogoho kina Kindo sa nika mbakadaha. Oni diberã kadu na kina wene berã tipa aboro dunduko, mbiko wa oni ainonga gu boro nika dia gu pangbangaa re kugume ya. Mo ini wari gu kura boro oni andu fuo ni re ni niima digo kaa kpara fu Mbori tipa ko kedi boro wa oni ni ye ka undo ni!

Nyemuse Nafõngbadukoyo

8. Niwirika apefuo Yesu kaa mangapai wa ko, gine nasa yo i naatungusa wene pangbangaa?

⁸ Gu wene pangbangaa Yesu anatakapandehe adu tipa manga gupai Yekova akpinyemuhe, nga pa ziasi rimoko, naapa dia gbarasarimo kusayo ti gako bakere pagbia. Si angia agu angbangaa nyakipaha gbe nabi ngbatunga aboro dũ. (Matayo 6:9, 10) Mbiko wa Yesu akpinyemu Bako, si du nasako ko duna nyemu kakuti gako ruru mangaapai dakuti digido gako raka na ka manga dezirepai tipa Kindo sirisiri, nga gu Kindo nika nyasa naapa agu angbangaa re. (Yoane 14:31) Mbiko wa du agu apefuo Yesu du areme na kina gu bangisa nyemupai re tiyo, si nasa yo i naatungusapai zanga nyomoro. Gu mokedi nangia Yoane ayaa: “Gi nga du [ani] na nyemu Mbori re, nga ka ani kuti gako rugute,” kodihe na gu rugute du tipa tungusa wene pangbangaa gbiati sa aboro ni abawiriki.—1 Yoane 5:3; Matayo 28:19, 20.

9, 10. Kupati kpinyemu Mbori, gini kura nyemuse berewe nafõ rani ani mangi dezirepai sirisiri?

⁹ Yesu aya fu apefuo ko wee: “Si ngia oni nakpinyemu re, oni ka kuti gi rugute. Gu ni du gi rugute be ni ni ki ka kuti ni, kina ni nakpi nyemu re.” (Yoane 14:15, 21) Sidu, si naida nyemu Yesu fõngbaduraniyo ani guari ka manga dezirepai tipa rengo na ka manga gu kura apai Yesu azinahe tipaha. Ti kura regbo sa ti agu aregbo Yesu anakura fu aboro fuo zingisa yo ko bekpio, ko angarasi Petero ki yaa: “Mo nirígi gimi wiri akandoro. . . . Mo nibánda gimi akandoro. . . . Mo nirigi gimi akandoro.” Gine ka fõngbadu Petero yo ko mangi gupai re? Yesu ayugu karagapai sa gu sanahe re ho ko adogodi sana Petero ni niyaa: “Mo nakpi nyemu re? . . . Mo nakpi nyemu re? . . . Mo nakpi nyemu re?” Ii, si adu nga, ga Petero nyemuse tipa Yesu, gako wesewese nyemuse tipa ko, nika fõngbadukoyo ko mangi dezirepai sirisiri ka gbata ga Yesu “wiri akandoro” na fuo gure, kini banda ra.—Yoane 21:15-17.

¹⁰ Areme, ani ainidonga tirani na Yesu wa gu nadu tipa Petero te. Wa vura duhe wo, ani kindi na dudunguro giarogopai tipa gupai Yesu amangihe tipa rani. Gu bakere nyemuse nasako ko “hia kpio tipa aboro dunduko,” nafõngbaduraniyo afõ. (AEbere 2:9; Yoane 15:13) Gupai nafõ rani ngbaduraniyo, si wa kinagu nafõ Pauro ho ko akepai ni nayaa: “Mbiko nyemu Kristo nasoda rani; . . . ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.” (2 AKorindo 5:14, 15) Ani nayugo gupai nga, ani nabipa ga Yesu nyemuse tipa rani na kikiipaha na ani nakpinyemu ko tipa gipai re nibi ani pa gu sunge ko afuhe fu rani na nyanyakipaha, nga manga dezirepai sirisiri. (1 Yoane 2:3-5) Si aidanga ani bi sunge tungusapai gbua kpasiaka si kidu wa ani nabipa ga Yesu motumo gbua ni umbapa pai te.—AEbere 10:29.

Kakuti Maaberã Kuti Nyanyakipa Pai

11, 12. Ginipai Yesu aye tipaha kurogo zegino, na wai ko amoiberã ko kina kuti ni?

¹¹ Ho Yesu aru ni barabangiri Pondio Pirato, ko ayaa: “Gi pai [re] i avungu re sa ni re, gi pai [re] mi aye sa ni . . . ku zegino, nga ka du ni dezire rengo.” (Yoane 18:37) Yesu ambunga pai si nyaga berã ko kusayo ti manga dezirepai tipa rengo te. Si nangia gupai Mbori akpinyemuhe beko.

¹² Nirengo, Satana aima asada Yesu rogo gipai re. Ngbutuko fuo ga Yesu bapatiza, Satana apepa maa Yesu nibakerepa boro rogo zegino, nga ka fu “angbi fu ko zegino dunduko, na gaha taarimo.” (Matayo 4:8, 9) Kusa, aYuda aida ka maa ko ni Bakindo. (Yoane 6:15) Bete aboro rengbe ka berãkuriipa gu weneapai ka mangi wa ka Yesu aidi naapa gu pagbia re, isoke kini berẽ ya fuo du ko nigu bakindo nga boro, ka ko amangi dungu weneapai amanga fu ngbatunga aboro. Ono tie, Yesu aká ngbatunga gu berã re aká. Ko adungura berã ko kina kuti manga dezirepai tipa rengo.

13, 14. (a) Gine naarengbanga ka nyaga berã Yesu kusayo ti manga ko gako sunge ya? (b) Wa Yesu avurangia rungorungo boro nibipa aũzegino, ginipai ko amangihe?

¹³ Kurii gure, pa orafuo aũkumuko anyaganga berã Yesu kusayo te. Nisangbana gipai re, ko arakanga gu raka nga ga kumuko te. Kporo adunga beko nangia gako te. Ti kura regbo sa, ko ayaa: “Ayaro be anya, agu azire du ari yo bambu be ra; ono Wiri boro . . . [na] ba be ko ka maa riko ku auru he te.” (Matayo 8:20) Ho Yesu akpi ni, gu yangara kikiipahe i ake paha nadu beko, angia gu gako rokoo ga aRomo abanzengere aba ake tipaha. (Yoane 19:23, 24) Sidu tie, Yesu angia mumungo boro? Wagusa te!

¹⁴ Yesu amangi gupai gu irakumuko kisusi nafu undo amanganga ha ya wa rago aenge aenga kindi. Pauro ayaa: “Oni ini gu undahe nga ga gaani Gbia Yesu Kristo ya, [wa] ko avura du ni ira ũkumuko vurũ, ko asa tiko ni boro rungo tipa roni, ya oni ye ka du ni aira ũkumuko mbiko gako rungo.” (2 AKorindo 8:9; AFiripoio 2:5-8) Wa Yesu avurangia rungorungo boro nibipa aũzegino, ko azaki ngbadimo fu aboro umbasitise i gbia ngbarago be nyenye unga nirengberengbe aboro. Nairiwo gu tambuahe du ani nani fuko! Na nga gu bakere ngbarago du ani nani tipa gu mosoro ko adihe re mbiko pa ka ko kuti manga gupai Mbori akpinyemuhe!—Atambuahe 40:8; Amokedi 2:32, 33, 36.

15. Ginihe kiipaha gbe kisusi kumuko?

¹⁵ Agu aKristano namanga asadatise nyanyakii areme ka wirika mangaapai wa Yesu aidanga ka mbu pa orafuo aũkumuko si nyaga yo kusayo te. (1 Timoteo 6:9,10) I ima ida gupai nga, kumuko nasa raka asa si du dodoromaa fu boro, ono i ima ino gupai nga, pa gbia yo nyenye unga arunga riipa kumuko te. Ho Kristano akpi ni, gani akumuko nga ga zegino amanganga wiripai funi te a wa ga Yesu baukadi amanganga wiripai fuko ho ko akpi ni ya. (Batungusipai 2:10, 11, 17-19; 7:12) Ho Kristano akpi ni, gu yangara he kiipaha du beni nga gani pagume dagbani na Yekova gbiati Yesu Kristo.—Matayo 6:19-21; Ruka 16:9.

Sogote Azeresanga Kpotokoyo Te

16. Wai Yesu asovura kuti gu sogote aboro aasoga ko nani?

¹⁶ Pa sogote aboro Yesu asanga ko ko mbu maaberã ko tipa manga dezirepai tipa rengo te. Na zavura pa ino ko gupai nga, gako sunge tungusapai nika ndu na ko sa gu kpio nga ga motumo azeresanga kpotokoyo te. Pauro aya tipa Yesu wee: “[Ko ahi] wagiwagi ngua mbiko gu ngbarago nadu fu ko ku mbata yo, ki basa pa gaha zee, ki ima sunga pati kumbabe gu mbata nga ga Mbori.” (AEbere 12:2) Oni kparia gupai nga, Yesu ‘abasapa zee.’ Ko adunga nifudifudi ko be gupai asogo ko aberãha tipa ko te. Gupai ko amoiberã ko kuti ni nga pa manga gupai Mbori akpinyemuhe.

17. Ginipai rengbe ani ka wirikaha be ga Yesu hipai?

¹⁷ Nimanga Pauro sunge naapa ga Yesu hipai, ko angarasi aKristano ki yaa: “Oni mákia pako wenengai nga gu ko nahi pa gu gumbarimo nga ga aboro ingapai kuti ko, oni ka du na mbugo tigaoni, ki nirungbura rogo gaoni aberã.” (AEbere 12:3) Rengo ngaha nga, ome boro nabata abata be sogote ni gbiati sawia ni na a’uru dũ. Pa nye ani kuti sovura kuti gu sosoda rani zegino asosoda rani nani rengbe arengba ka batasa ome rani, isoke si rengbe ka ye be agu agume rani nangarasa rani ya ani mbu rengo ki “mangi gupai nika undo rani.” Ono tie, wa kina Yesu, ani nangera kube Yekova tipa ko songodi rani mbiko ani ima diaberã ka maa kina Kindo mbata rogo gaani raka.—Matayo 6:33; ARomo 15:13; 1 AKorindo 2:4.

18. Gini wenepai rengbe ani ka wirikaha be agu afugo Yesu ko agumbaha fu Petero?

¹⁸ Yesu ayugu gupai nga, ko aidanga ka mbupai si nyaga ko kusayo te ho ko atona ka fura ni tipa pakpio ko fu gako abawiriki. Petero angarasi Yesu ya kpio “turu atura” tiko na ki kido ko ya ‘gipai re ayenga sa ko te.’ Yesu aká ki zanga degatuko kuti gupai narengbe ka rungburasi gako diaberã ka manga gupai Yekova akpinyemuhe. Ko asa giiko na Petero ki ya fuko: “Mo ké ku gii re yo, Satana! Asada nga mo fere; bambiko ga Mbori pai bangiro te, kina ga aboro apai du bangiro.” (Matayo 16:21-23) Ani dinga berã dedede wa kina gure ka ká agu aberã nga ga aboro. Kuba ida na gayo apai, ani mbu ga Mbori berã si naayugo gene fu rani ti aregbo dunduko.

Ga Mbori Kindo Nika Ye na Ndikidi Aundo fu Aboro

19. Wa Yesu avura du nga bamangi iiriwoapai, gine nangia gako bangua sunge?

¹⁹ Yesu amangi dungu iiriwoapai ka yugo gupai nani nga, ko angia Masiya. Zavura kpikpi aboro, ko aima zingisa yo a. Gu mangaapai re aye na ndurumo aboro fuo ko, ono Yesu ayenga tie ku auru kpotosende ka manga gu sunge nga ga mbakadapa wene sino raka dagba aboro te. Ko aye ka manga dezirepai tipa rengo. Ko aima ino gupai nga, agu aundo nga ga aũzegino dunduko ko anafukaha fu aboro, si adu gbua tipa regbo ngbutuko. Ko aima ino gupai a nga, zavura agu aboro ko azingisi yo re, i akpiko akpiko berewe. Kina manga dezirepai tipa rengo sa narengbe ka sa ko ko undo bete aboro i gbia nyenye unga.—Ruka 18:28-30.

20, 21. Gini bipai du ndikidi aKristano nani nibipa ringbisa manga weneapai zanga naga kina kubani kisusi?

²⁰ Areme, bete aboro namanga asadatise ka wirika manga gu weneapai Yesu amangihe nizaka yo abambungua watadu ka manga gu kura asunge naundo rungorungo aboro. Rogo gu kura bete apai, aboro nibasasa natumo bakere marã tipa ka manga agi asunge re, watadu i namanga gipai re ni maa yo gayo raka ngba kerepai, sidu ani na tambuahe tipa gi gayo ndikidi sunge-undo re; ono tie, agu aundo dunduko i afukaha, si gbua tipa regbo ngbutuko. Kina ga Mbori Kindo sa nika ye na nyenye ziga fu aboro. Sidu, tipa aDezire Yekova tigayo, i moiberã yo gbe kina kuti manga dezirepai fu aboro tipa gu rengo du tipa gu Kindo re.

²¹ Rengo ngaha nga, ndikidi aKristano namanga weneapai amanga fu aboro. Pauro akepai ki yaa: “Were, momu nimángi rani tie, ani ki mangi gu pai amanga ngba angba fu aboro dunduko, fu kina agu yo gbe du ku idapase yo [na ani].” (AGaratio 6:10) Ti aregbo kerepai watadu ho du boro ni rogo zingo, ani akeesanga ti ‘manga gupai ngba angba’ fu akuarani aboro watadu agu awirinarani nga aKristano te. Wa vura duhe wo, ani namaa berã rani gbe kina kuti gupai si aida ani moihe kuti ni, nga manga dezirepai tipa rengo.

Ani Wirikipai be ga Yesu Kpiapai

22. Tipagine aKristano atungusapai ti ni fu akurayo aboro?

²² Pauro akepai ki yaa: “Rungo du fere ka mi atungusa nga wene pangbanga ya.” (1 AKorindo 9:16) Ko adunga kpasiaka kuti sunge tungusa wene pangbangaa te, pa tungusa ko ho angia unga fuko na fu agu aboro naagiaha. (1 Timoteo 4:16) Ani nabi gaani sunge tungusapai ngba kina gu bangisa gene re. Ani naida ka undo akuarani aboro. Ani naida ka yugo gaani nyemuse tipa Yekova. Ani naida ka yugo gopa gaani nyemuse tipa Yesu na gaani tambuahe tipa gu bakere nyemuse ko ayuguhe fu rani. Sidu, ani natungusa wene pangbangaa, na rogo gi gene re, ani arakanga “tipa manga gu nyemuahe nga ga aboro te, ono tipa manga sangba Mbori.”—1 Petero 4:1, 2.

23, 24. (a) Ginipai ani awirikaha be gu iiriwopai nangia ga zio atĩo? (b) Ada areme namanga dezirepai sirisiri?

²³ Wa kina Yesu, ani ambunga gaani bangua sunge ho kura aboro asawia rani ni watadu ho i azinga ni kuti rani na gaani pangbangaa te. Ani nawirikapai be gu iiriwopai Yesu amangihe ho ko ayambu aPetero na Andarea ni i ye ka pefuo ko. Ka pepai nimasaku, ani ima bi gupai nga, ka ani irisi sangba Yesu ki bafu gaani apio kurogo gu ime nawira atĩo rogoho te, ani azio atĩo azio. Dungu agu abaziatĩo nga aKristano azi dungu atĩo rogo agu aime nawiri wa atĩo adunga rogoho te fuo manga yo sunge rogo agu aba re tipa dungu agarã. Gu kurayo andu kurogo agu aba nadu na dungu atĩo rogoho na ki zi ra yo kpaima. Ka ani vura kaa manga kina ginipai, ani ambunga mangasunge dezirepai tipa rengo te. Gupai ini ani he nga, anga papara zegino ho Yesu natakipande gupai tipaha nga, sunge tungusapai ima nyasa rogoho te.—Matayo 24:14.

²⁴ Bange agu aDezire nga ga Yekova yo awere susi mirioni sita namangasunge rogo aringara susi 230. Gu Ngbaõbambu Sinziri nikangia ga Wegebe ti rameru 1, rogo 2005, nika du na tingidapa gu gayo mangaapai nga ga garã rogo zegino dunduko tipa gu garã nga ga sunge nga 2004. Gu tingidapa sunge re nika yugopa ga Yekova maku kurii sunge tungusapai. Vuru gu yangara regbo nye koyo fu gi zegino re, ani ndunga ka dia agu afugo ku ngbaduraniyo nga ga Pauro du rogo agi afugo nafõngbadu boro yo re: “Mo nitúngusi pai; mo ké na ni.” (2 Timoteo 4:2) Ani susinga kumbatayo kindi kaa manga dezirepai sirisiri daho Yekova nika ya ni wee gu sunge re nyasi.

Tona rogo gi garã re, Tingidapa Sunge Nga ga Garã Nga ga ADezire Yekova Rogo Zegino Dunduko, akuranga berewe rogo gu Ngbaõbambu Sinziri nga ga Ngi ti rameru 1 te. Kuba gure, i nikaa kusaha rogo gu kusikusihe nga ga Wegebe ti rameru 1.

Oni Rengbe ka Karagapai Sa Agi Asanahe Re?

• Wai rengbe ani ka gbia undo be gu yugopai Yesu ayuguhe fu gako abawiriki?

• Gine nangia ga Yesu sino berã tipa agu aboro ko anatungusapai fuyo?

• Gine nafõngbaduraniyo ani mangi dezirepai sirisiri?

• Rogo gini agene rengbe ani ka maaberã rani kina kuti manga gupai Mbori akpinyemuhe, a wa Yesu amangihe?

[Gu kpiahe du ti kpewaraga 25]

Gu bambatapai Yesu aye ku auru kpotosende tipaha nga ka manga dezirepai tipa rengo

[Gu kpiahe du ti kpewaraga 26]

ADezire Yekova namaa berã yo gbe kuti manga dezirepai sirisiri