Gbata Gu ‘Mbia Fongo Areme Duna Bakere Genoho’
“Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ.”—MATAYO 24:14.
1, 2. (a) Ginipai agu aYuda nadu ti rago Yesu aberẽhe tipa ga Mbori Kindo? (b) Ginipai Yesu amangihe tipa ka sa aboro i gbia ruru giarogopai tipa ga Mbori Kindo, na gine nangia sangbanaha?
GU KINDO nga ga Mbori angia gu banguapai aYuda aduna bakere nyemu fugo tipaha ho Yesu aduni auru kpotosende. (Matayo 3:1, 2; 4:23-25; Yoane 1:49) Ono tie, ti tonatonaha, dungu aboro naaruganga tiyo wenengai naapa bakio agu apai rengbe gu Kindo re ka mangaha gbiati gaha ome ya; na i agianga rogo gupai yo a nga si nga gu zogarago nga ga ngbangbaturũ te. ( Yoane 3:1-5) Zavura gu bete aboro nasa tiyo ni apefuo Yesu, i aruganga tiyo a wenengai na guhe nangia ga Mbori Kindo watadu ka rugatiyo naapa gupai si aida i mangihe ka gbia gu maku nga ga duti zogarago na Kristo te.—Matayo 20:20-22; Ruka 19:11; Amokedi 1:6.
2 Wa regbo aandu, Yesu aayugo dungu apai fu gako abawiriki nizerangbaduse, kodihe na gu sanza du tipa gu mbia fongo duna bakere genoho nga gu ani awisigipai tipaha rogo gu papara kekepai ye mbata fu gere, kini yugu nyakapa manga boro asadatise wa ni agbata gu kindo nga ga ngbangbaturũ. (Matayo 6:33; 13:45, 46; Ruka 13:23, 24) Zanga kapa, gipai re aima fõngbaduyo yo bakere gbe, mbiko ngbutuko fuo gupai re, i amangisunge zanga nyomoro ningangara atakipande gu wene pangbangaa nga ga Kindo na kini tungusihe kakaka rogo tuturu arago auru kpotosende, nga gu rengo gu buku nga Amokedi afu goapai tipaha kpaima.—Amokedi 1:8; AKorosaio 1:23.
3. Nibipa agu apai du ti gaani regbo, ginipai Yesu agumbaha tipa ga Mbori Kindo?
3 Ginipai tie du tipa areme? Agu amaku nga ga paradiso kpotosende ga Mbori Kindo nika ye nani, i moihe barabangiri dungu aboro. Rogo ga Yesu nyanyakipa sangbanebi tipa ‘digido gi zegino re,’ ko afura zukazuka ki yaa: “Gi wene pangbanga nga ga ngbi re i atungusa ha atungusa rogo zegino dunduko mbiko ndika fu arikaaboro dũ; ragoho ki digi adiga” watadu fuo gure, digido zegino ki da. (Matayo 24:3, 14; Marako 13:10) Ko asakirogoyo fuyo a ya i amanga gi banaru sunge re amanga kpakarakpakarapai gbiati kere arungosi ki vura duho ka kiso gene beyo vurũ. Wa si avura du wo, ko akido yo na agi afugo re: “Ono gu ni nikaru ki da ho ragoho ka diga ni, ni abáta abata.” (Matayo 24:9-13) Agi apai re dunduko naida ngbatunga gu mbu boro pa gani apai gbiati futise tipa pai nadu ti gu babagiahe nandu nunguro du pako rogo ga Yesu sanza. Ya mo aboro ho areme nayugo ngara gbiati idapase wa ngbatunga gure rogo gbata ga Mbori Kindo?
Gu Ngbarago Duti Boro be Ino Ni Rengo
4. Gine nga sangbana gu rengo nga ga Kindo areme kurii aboro?
4 Gu babagiahe du pako rogo ga Yesu sanza aduna bakere ngbarago tiko ho ko abi guhe ni ko akpariaha nigu ‘mbia fongo duna bakere genoho.’ Gu ngbarago ko adu nani asako ko mangi agu apai dunduko ko arengbe ka mangaha tipa ka ngbe gu mbia fongo re. (AEbere 12:1) Areme, gu rengo du tipa Mbori na tipa gako Kindo nafõngbadu aboro yo na kini ye na yo koyo du Mbori ni teketeke wa kina gure a. Gipai re nasa rani ani tingidi agu apai gu wirina nga Alexander Hugh Macmillan agumbaha. Macmillan, nga gu boro nakepai rogo gako buku nga Faith on the March, tipa wai ko agbata Mbori nga kina boro ko na ka gbata gene ka ino ga Mbori ringbisapai tipa ngbatunga aboro. Ko ayaa: “Gupai mi nabihe, dungu akutu aboro nagbiaha kindi rogo agarã nibasasa. Na i nga aboro wa kina roni na mi, mbiko i dagba arikaaboro dunduko, angbatunga aboro, ngbatunga arika badona aboro rogo gayo raka na agarã yo nibakiakia a. Gu rengo nga ga Kindo, si tipa aboro dunduko. Si naye na ngbatunga aboro dunduko koyo du Mbori ni.”
5. Gini wene asangbana sunge ani abihe rogo gu tingidapa sunge nga ga garã tipa gu garã nga 2004?
5 Ani nabi rengo gupai re nga, wa agarã asaka, gu wene pangbangaa du tipa ga Mbori Kindo nasa gu dungu akutu aboro duna ruru ngbaduyo yo i kpara gayo raka fu Yekova na kini mangi gupai ko akpinyemuhe. Gu garã nga ga sunge nangia ga 2004 natona rogo Mbirinvuo rogo 2003 da kurogo Buza rogo 2004, adu a wa kina agu agarã naye mbata fuhe. Vuru agu adiwi 12 re, aboro du bangeyo nga 262,416 ayugu gupai gbaiga nga i aima kpara gayo raka fu Yekova nizio yo bapatiza. Gipai re amangi rogo aringara 235, nga agu aringara aDezire Yekova aawisigo Ziazia Kekeapai na aboro rogoho rogo aposo nibasasa bangeyo adati 6,085,387. Na ndu wisigopai na agi aboro du apai tipa yo nibakiakia, du rogo dungu aringara na atunga yo gbiati afugoyo nibakiakia re, angia ka undo yo i di gu rengo kugume nafu unga du rogo Fugo Mbori.—Yugoti 7:9.
6. Ginihe nasa bange agu aboro naye kurogo rengo yo si nye kaa zugo kindi vuru agu agarã susi?
6 Gine nasa agi apai re dunduko si mangi? Anga kapa ho nga Yekova du naye na gi ruru ngbadu aboro yo duna nyemu gbia nyenye unga re koyo du ko ni te. (Yoane 6:65; Amokedi 13:48) Wa vura duhe wo, si aidanga ani umbasipa gu nyakasatise kuti sunge niumbasitise kini mangihe zanga nyomoro agu aboro nagbata Kindo afu bee tipaha te. Ho garã gu wirina nga Macmillan adani ti 79, ko akepai ki yaa: “Tona ti gu bambata regbo mi awirikipai tipa agu akidohe du fu aborokaza na fu gu ngbatunga aboro du ngba kpio, gimi maabangirise rogo gu pangbangaa Ziazia Kekeapai ayuguhe re agbandakanga kusayo te. Natona nibasa ti gu regbo re, mi adiberã ka gbata gu kura apai Ziazia Kekeapai ayugoho tipa wai ka mi rengbe ka undo gu kura aboro duwa mi nga agu aboro nagbata inohe tipa Yekova nga gu Mbori duna Tanduapai dũ, na tipa gako wene ringbisapai tipa ngbatunga aboro.”
7. Gini pangbangaa nga kpiapai tipa gu ngbarago gbiati nyemu sunge du ti agu aboro nagbia gu rengo nga ga Ziazia Kekeapai?
7 Ani nabi gu kakaka nyemu mangaapai re areme dagba ga Yekova amoyambu. Nikpiapai, ani dinga Daniela naraka rogo gbata nga Vienna du Austria yo. Ri ayaa: “Natona ho mi aduni nitooni degude, Mbori ningia bawene bakureami kisusi. Wo mi anaida na aregbo dunduko ka ino rimoko, mbiko tipa re, pa yamba yo ko nga ‘Mbori’ ayugonga ko bangire nindikidi boro te. Ono tie, si aidi mi pidi regbo mbata daho garãre adani ti 17, nga gu regbo aDezire Yekova aye ti ni ku ngbadimo kpurani yo. I asakirogo agu apai dunduko fere mi aida ka inoho tipa Mbori gbiati rimoko. Niyangaraha, mi agbia rengo, na si kidu fere nibawenepai kisusi! Rago angba tire kisusi si ki sa re mi tona tungusapai fu aboro dunduko.” Gi gari ngara re aimanga te si ki sa akurari sukuru yo i naasawia ri. Daniela ayaa: “Si adu fere wa mi nabi gu sangbanebi nga ga Ziazia Kekeapai si nidigi, . . . mbiko mi aima wirika gupai Yesu agumbaha ya aboro asoga apefuo ko asoga na kini rungosiyo tipa rimoko. Gipai re airiwo tire na mi kidu na bakere ngbarago a.” Ngbutuko fuo gupai re, Daniela akpara gari raka fu Yekova, ki zi bapatiza, na ki tona ka gbata gene tipa gu sásá nga ga mangasunge nimokedi rogo kura ringara. Fuo Daniela di kumba, ri gbiati kumbaari nga Helmut, atona sunge tungusapai dagba aboro agu aringara nga Afirika, China, Philippine, na India nga aguyo naaraka Vienna yo. Daniela na Helmut namangasunge tungusapai awere ni amokedi Afirika yo pavuruhe ku dioyo.
Omeyo Abatanga Te
8. Gine nga gene sa dagba akuraha nafu mosoro fu dungu aboro i nayugu gayo nyemuse ngbaha tipa Mbori gbiati pa gayo kakuti gako Kindo?
8 Nirengo, sunge mokedi nga gene sa dagba agu akuraha ga Yekova aboro ayugo gayo nyemuse ngbaha areme tipa Mbori naapa ka yo kuti gako Kindo. Wa kina gu babagiahe du pako rogo ga Yesu sanza, agu aboro nasia gi sunge re ka mangaha, i na nyemu ka ndu nunguro kurogo agu arago du tutuurũ tipa ka manga agu asunge nga ga Kindo yo. Rengo ngaha nga, anga agi amokedi re nandu agi anunguro re tipa ka gbata agu apangbangaa nga ga Kindo te; gi pangbangaa re nga gupai i andu nani fu aboro kurogo tuturu arago auru kpotosende, kini yugupai fu agi aboro re na kini undo yo i sa tiyo niga Yesu Kristo abawiriki. (Matayo 28:19, 20) Rogo dungu aringara, si naida i hi agu arungo du kia. Ono i nagbia mosoro agbia kpaima tipa gayo hipai.
9, 10. Gini weneapai namanga fu amokedi i agbia ngbarago behe rogo ngbatunga gu tuturu aringara duwa Central African Republic?
9 Nikpiapai, ani dinga gu ringara nga Central African Republic, nga gu ringara bange agu aboro naye rogoho gugorö kupati Tingidapa Kpio Yesu adu nga 16,184, nga gu bange aboro duwa bara saba ti bange agu abatungusipa Kindo du yo. Wa duhe nga dungu apapara gu ringara re na karaba rogoho te, aboro namanga gayo asunge dedede kina zegiyo tii nzereme angua yo. Sidu, kinawo a amokedi amanga gayo asunge, nga kaa nungusa wisigo Ziazia Kekeapai na aboro tii nzereme angua yo. Anga gupai ngba zagi ti ni nga si zeredi rago rogoho na si duna imarago rogoho sa te, gu kurapai kinaho berewe ngbaa zagi ti ni. Aboro na bakere nyemu Ziazia Kekeapai tiyo rogo gu ringara re, sidu, dungu aboro yo nafura tipa agu apai nga ga pambori. Sidu gupai ngbaa zagi ti ni berewe nga, dedede, agu aboro nasusa ti gene naru ka rugatiyo na gupai awirina amangaha tii ngua yo, na i kini rimisi tiyo taata kurogo wirikapai.
10 Ngba gi gene re, ho mokedi sa aanungusa wisigo Ziazia Kekeapai ni na boro zagi, paranga kumba nga guko naraka gii gene kubani aye fuo yo ki yawee, wa duhe nga i naayambanga ko te, si naida gu mokedi re ye a ku kpuko yo tipa ka wisigo Ziazia Kekeapai na ko. Rengo ngaha, gipai re ase gi mokedi re kina mbatayo, na gi paranga re nasona rogo gako wirikapai niipo. Rogo gu ringara re, wo apurusi naarugusa aDezire bangiri agene, angianga tipa ka fu waraga yambahe tipa ngbangaa fuyo watadu ka zio yo i tumo ya, ono ka sana yo tipa gu vovo amagazini nga Ngbaõbambu Sinziri gbiati Awake! watadu ka fu tambuahe fuyo tipa gu papara kekepai i agedihe nafu bakere ngbarago fuyo.
11. Wa vura du fudifudiapai tingba sunge tungusapai, wai agu amokedi ima mangasunge tungusapai tipa dungu agarã aberã tipa gayo sunge?
11 Dungu agu aboro natona sunge amokedi mbata fu agarã 40 watadu 50 kusayo namanga gu sunge re kindi niruru yo wa du rago re. Nangbaa gi kpiapai nga ga idapase gbiati kakutipai re! Vuru agu agarã 42 susi, arogotise ue amangisunge ni amokedi rogo aringara biata. Kumba nayaa: “Fudifudiapai aduadu. Nikpiapai, ani asovura na mararia tipa agarã 35. Ono wa si avura du wo, ani abiranga tirani tipa gaani diaberã kadu ni amokedi te.” Diako nagbia gupai kuti gure nga: “Dungu apai adu kinaho ani aduna tambuahe tipaha ti aregbo dũ. Nikpiapai, sunge tungusapai naye na ngbarago fu rani, na si nidu fu rani taata ani gbia aboro ka tona wisigo Ziazia Kekeapai na yo. Ho oni abi abawirikipai ni i kini ye kupati adunguratise na kini inidi tiyo na kura aboro, si wa kina gu kodatise nga ga aborokporo.”
‘Ahe Dunduko I Abihe wa Si Aingi Ainga Beyo’
12. Wai boro ayugo gupai nga ni nabi ga Mbori Kindo na ndikidi kikiipaha?
12 Ho gu babagiahe nandu nunguro abi gu mbia fongo ni nadu na bakere genoho, ‘ko andu ki babagi agu ahe dunduko nadu beko na ki ngbe gu mbia fongo re.’ (Matayo 13:46) Gi padu boro na nyemu mbu agu ahe paha avura kio bangirini re nga sino agu aboro nzunzu nabi ga Mbori Kindo na kikiipaha. Nidu gu mokedi nangia Pauro nigu boro nika zogarago na Kristo rogo gako Kindo, ko ayaa: “Ni rengo, ahe dunduko si adu nga bangire ni he te mbiko gu wene pai nga inida Kristo Yesu gi Gbia. Mbiko ko ahe aingi be re dunduko si ki du bangire wa kina mirĩ ahe [watadu kungbo ahe], ya mi bi Kristo.”—AFiripoio 3:8.
13. Wai kumba sa rogo gu ringara nga Czech Republic ayugupa gako nyemuse tipa ga Mbori Kindo?
13 Teketeke a, dungu aboro areme namanga a’ariapai rogo gayo raka tipa ka gbia agu amaku nga ga Kindo. Nikpiapai, rogo Tanvuo 2003, bangerekurii abayugupai garãko adu ti gu regbo re nga 60 rogo gu ringara nga Czech Republic akuru bara gu buku du mburuhe rii Ziazia Kekeapai nga Gu Inohe Nandu [na Boro] sa Nyenye Unga. Fuo geda ko ho, ko andu nibasa fuo agu aDezire Yekova nadu rogo gako dagbarago tipa i tona wisigo Ziazia Kekeapai na ko. Ko asono rogo toroyo wenengai na ka fuöho aturanga ya ko ki tona kaa du pati adunguratise dunduko. Ono tie, ginipai tipa gupai ko asogima mangaha nga ka ru tipa i sia ko nibaira gbata na fuo gure, ki ru i sia ko nibakerepa boro rogo sunge birĩ zogarago? Ko asia gupai nga ka ora gene kurapai kia ti gure, nga kadu nibatakipande ga Mbori Kindo. Ko ayaa, “Mi afuku dungu agu abuku du mburuhe rii Ziazia Kekeapai fu gimi agudesukuru.” Ko ayugu kpia pa gako kparatise fu Yekova nizio ko bapatiza ti regbo bakere dunguratise rogo Bamburu rogo 2004.
14. (a) Ginipai gu wene pangbangaa nga ga Kindo nasa dungu amirioni aboro i mangihe? (b) Gini nyanyakipa asanahe si aida ani dunduko nibasasa sasana tirani nani?
14 Dungu amirioni kura aboro rogo zegino dunduko amangipai tipa wene pangbangaa nga ga Kindo ngba kina gu bangisa gene re. I akuru kusayo rogo gbegbere zegino, ki uru kuru borose kusayo, ki mbu agu abakureayo nadumbata, na ki mbu agu apai nga ga zegino i aaorafuoho. (Yoane 15:19; AEfeso 4:22-24; Yakoba 4:4; 1 Yoane 2:15-17) Tipagine i amangi agi apai dunduko re ti ni? Bambiko i nabi agu amaku nga ga ga Mbori Kindo na kikiipaha susi gu kura ahe dunduko rengbe gi zegino re ka fuhe. Oni naberã kina gupai re tipa gu wene pangbangaa nga ga Kindo? Gipai re nafõ roni oni mangi agu a’ariapai si aida oni mangihe rogo gaoni sino raka, rogo gaoni wene sino mangaapai, na rogo gaoni asásá tipa si du na ngbanyaa na gupai Yekova akpinyemuhe? Pa manga oni he wo nika ye na bazagino amaku fu roni awere na daa kumbatayo.
Sunge Ke Ahe Ima Dati Yangara Paparaha
15. Ginipai i agumbaha nisangbanebi ya si ga Mbori aboro nikaa mangaha rogo yangara arame?
15 Bake apapara Atambuahe akepai ki yaa: “Gamo aboro afú tiyo foro zaaza rago ngbe mo kumbatayo fu gamo rimbasa aborovura.” Agu aboro fuu tiyo nakoda agu ‘ariivura nga ga paranga aboro duwa ndomo’ gbiati “bakere rimbasa” nga ga ‘adee nga aguyo natakapande wene pangbangaa.’ (Atambuahe 68:11; 110:3, NW ) Rogo gi yangara arame re, gine ningia sangbana gu sunge gu ga Yekova aboro nga akumba na adee, aparanga na sosono aboro nambupa kura gayo apai amangaha zanga nyomoro?
16. Oni funga kpiapai tipa wai ga Mbori amoyambu afu tiyo ka undo kura aboro i wirikipai tipa ga Mbori Kindo.
16 Nazakigene, nga natakipande Kindo ti aregbo dũ, anabakabangiiri India yo tipa wai awirina nika undo agu airangbiängä bangeyo nasusi amirioni ue du rogo gu ringara re i wirikipai tipa ga Mbori Kindo. (Yesaya 35:5) Ri adiberã tipa ka ke rimori rogo sukuru nga ga fugo nibee tipa ka wirika gu fugo re. Fuo gure, ri arengbe ka gumbapa gu maabangirise nga ga Kindo fu dungu airangbiängä, na i ki sigira abadona wisigo Ziazia Kekeapai nga ga aboro fugo nibee. Vuru bete aposo, dungu airangbiängä atona kaa ye kupati agu adunguratise i amangaha tii Bambu Kindo yo. Kusa, kporo pumbo diadee yo, gi nazakigene re agbia paranga kumba nangia irangbiängä naye Calcutta yo, nga gu kumba nadu na dungu asanahe ngbako na kidu na bakere nyemu wirika kura apai tipa Yekova. Ono tie, kpakarakpakarapai aduho. Gi paranga re aida ka karaga tiko ku Calcutta yo, baturõho adu wa akirometere 1,600, tipa ka rimo bakere sukuru yo, ono ka aDezire adunga yo naini fugo nibee ka wisigipai na ko ya. Nibakere asadatise, ko azungadi bako tipa ko ruho ka idaha fuko ko ndu tipa sukuru kurogo gu gbata nga Bangalore tipa wa ka ko susi kumbatayo na gako wirikapai yo nga ga Ziazia Kekeapai. Ko asono rogo toro yo wenengai, fuo susa regbo wa garã sa, ko akpara gako raka fu Yekova. Ko aguari tigako a ka tona kaa wisigo Ziazia Kekeapai na kura airangbiängä, kodihe na gu kurako i aima du na ko nga abakure mbu yo rukutu. Gu biroo nga ga be-basunge du India yo nambakadapai awere tipa abazakigene naawirika fugo nibee tipa ka undo agu aboro re.
17. Oni penga pa gupai nzunzu nangarasa roni du rogo gu tingidapa sunge nga ga gu garã sunge nga 2004 du ti kpewaraga tona ti 21 ki da kurogo 24.
17 Tona ti kpewaraga 21 da kurogo 24 rogo gi magazini re, oni nika bi gu tingidapa sunge nga ga zegino du tipa ga aDezire Yekova sunge tungusapai rogo gu garã nga ga sunge nga 2004. Oni dinga bete regbo ka wisigoho, na ki binga gu gopai tipa tironi nayugo gupai nga, ga Yekova aboro rogo zegino areme ima maaberã yo nyanyakii tipa gbata ‘gu mbia fongo duna bakere genoho.’
“Oni Gbáta Gako Ngbi Mbata”
18. Ginipai Yesu akodanga ha kurogo gu gako sanza nadu tipa gu babagiahe nandu nunguro ya, na tipagine ko akodanga ha ti ni ya?
18 Ka ani karaga tirani berewe ka wisigo gu ga Yesu sanza du tipa gu babagiahe nandu nunguro, ani nika bi gupai nga, Yesu agumbanga pa wai gi babagiahe re nikaa raka fuo baga ko gako ahe dunduko te. Ono tie, ruhe aru kura aboro sanahe ki yaa: ‘Wai gu babagiahe re nika gbia riahe, arokoo, na bambu wa ko aima baga ahe dunduko kusayo tiko? Gini undo gu kikiipa mbia fongo re narengbe ka fuhe fuko?’ Agu asanahe re rengbe kadu nga agu asanahe daada boro sanaha nibipa agu apai du tipa borose. Ono ya mo Yesu anyakasanga gako abawiriki ki yaa: “Oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni” tee? (Matayo 6:31-33) Gu mangupai du rogo gu sanza re nga si naida boro ra na goni fu Mbori na kini tungusipa Kindo ngangaraa. Ya mo pai ho rengbe ani ka wirikaha behe?
19. Gini banguapai rengbe ani ka wirikaha du rogo ga Yesu sanza tipa gu mbia fongo duna bakere genoho?
19 Singia wiriki ani gipai du tipa gi iiriwo wene pangbangaa nga ga Kindo re bambeda kusayo watadu ani aima digo niwirikipai tipaha na kini tungusipa gaha amaku fu aboro tipa dungu agarã, si naida ani susi kumbatayo kindi ka maa ga Mbori Kindo ni gupai du nyemuhe tirani ani amaaberã rani fuoho. Agi aregbo re nga kpakarakpakara aregbo, ono ani na nyanyaki nduapai berani ka ida kuti gupai nga, gipai nga ga Kindo ani agbataha re, si nga kina boro ndikidipai na ka i ringbisinga ha na kurapai te, wa kina gu mbia fongo babagiahe akuru baraha. Agu apai namanga rogo zegino gbiati digisidigisi gu sangbaanebi nga ga Ziazia Kekeapai, si nigu goapai zanga kango tipaha nga ani naraka rogo ‘digido gi zegino re.’ (Matayo 24:3) Wa kina gu babagiahe nandu nunguro, ani naayugonga agu apai nga ga Kindo zaaza na ngbaduraniyo dũ na kidu na ngbarago rogo gu mamu du berani nga ga takapande wene pangbangaa.—Atambuahe 9:1, 2.
Oni Natingidaha?
• Vuru agu agarã susi, gine nafubee tipa kiiso bange ndikidi airisimbori?
• Gini sino berã ani abihe dagba agu aboro namangasunge ni amokedi?
• Gini a’ariapai aboro amangihe rogo gayo raka mbiko wene pangbangaa nga ga Kindo?
• Gini kikiipa pai rengbe ani ka wirikaha be ga Yesu sanza tipa gu mbia fongo duna bakere genoho?
[Gu kpiahe du ti kpewaraga 26]
I fu maku kpaima fu agu amokedi du areme wa kina gu babagiahe nandu nunguro
[Gu kpiahe du ti kpewaraga 27]
“Gamo aboro afú tiyo foro zaaza”