“I Angbe Roni Ni Mosoro”
“I angbe roni ni mosoro. Oni taasi rimo Mbori tie ni bororoni.”—1 AKORINDO 6:20.
1, 2. (a) Kuti ga Mose Ndiko, wai si aida aboro mangi fu agu akanga nangia aYisaraere? (b) Gini siapai nadu barabangiri gu kanga nanakpinyemu bairani?
BUKU sa nayaa: “Sunge kanga aima maapai rogo gu zegino nadumbata na aboro ki ima ida nani.” (Holman Illustrated Bible Dictionary) Si nagbia gu kurapai kuti gure nga: “Gu gene gbia mosoro nangia ga Ezipeta, ga ringara aGiriki, na ga Roma anaruriipa gu sunge nangia ga akanga. Rogo gu bambata kama agarã nangia ga aKristano, boro sa dagba aguyo biata Itaria yo na boro sa dagba aboro bisue rogo kura aba angia kanga.”
2 Wa si avura du nga, sunge akanga aduadu rogo gu ringara aYisaraere nadumbata, ga Mose Ndiko aduna mbakadapai rogoho tipa boro naabanda agu akanga abanda nangia aEbere. Nikpiapai, gu Ndiko re aidanga gupai nga gu kanga nangia Yisaraere mangisunge kanga tipa agarã susi sita te. Si adu nga, rogo gu saba garã, ni duwa ka ni “ga ni rini gbua.” Ono tie, agu arugute nadu tipa mangasunge na akanga adu niwenehe gbe na ninunga si ki da ti gupai nga, ga Mose ndiko fu agi arugute re: “Ka kanga ya nzunzu, ‘Mi nakpi nyemu bairare, diare, na awire; mi aga nga ni rire te,’ bairani ki ye na ni koyo du Mbori ni, ki ye na ni ku ngbadimo, watadu ku pati ngua ngbadimo bairani ki koro tuni na kofodi [mbereke]; ni ki du ni gako kanga nye anye kindi.”—Gate 21:2-6; Pa Amotumo 25:42, 43; Pa Fu Rugute ni Ue he 15:12-18.
3. (a) Gini ngbatunga sunge kanga agu aKristano nadu rogo bambata sa kama agarã aidipa rimiso tiyo kurogoho? (b) Gine nafõngbaduraniyo ani mangisunge fu Mbori?
3 Gu mbakadapai nadu tipa boro nisani sia gupai nga ka mangasunge nikanga fu kurani, angia yuguyugu mboimboipai kumbatayo tipa gu ngbatunga sunge kanga du aKristano rogoho areme. Nikpiapai, agu abakeke Ziazia Kekeapai nangia aPauro, Yakoba, Petero, na Yuda afura tipa tiyo ya i angia ga Mbori akanga na niga Kristo akanga a. (Tito 1:1; Yakoba 1:1; 2 Petero 1:1; Yuda 1) Pauro atingidi agu aKristano nangia aTesaroniko na gupai nga i ‘asa tiyo ti kpiaahe koyo du Mbori ni, ka manga pa unga Mbori [ni akanga fuko].’ (1 ATesaroniko 1:9) Gine nafõngbadu agu aKristano yo re i idi ka mangasunge ni akanga fu Mbori? Gine nangia gupai nanifõngbadu gu Yisaraere yo naningia kanga ni mbu gani ranirii ki nye kindi nikanga fu kurani? Ya mo si angianga nyemu bairani tee? Mburu gu sunge kanga nga ga aKristano nimoimoihe rii nyemuse tipa Mbori. Ho ani ayeni ka ino ndikidi unga Mbori na kini kpinyemu ko, asinoko nika fõngbaduraniyo ani mangisunge fuko ‘na kpotoraniyo dũ, na mbisimorani dũ.’ (Pa Fu Rugute ni Ue he 10:12, 13) Ono tie, gine padu boro niga Mbori kanga na niga Kristo kanga a akodaha? Wai gipai re amanga ariapai rogo gaani raka na a’uru dunduko?
‘Oni Mangi Apai Dunduko Si Naataasa Rimo Mbori’
4. Wai ani ada niga Mbori akanga na niga Kristo akanga a?
4 I naringbisapa kanga ya ni nga “gu boro nara kutiibe kurani watadu kutiibe kura aboro kuti sangba ndiko na si kidu funi nidingisoro ka irisa sangba bairani watadu abairani rogo apai dunduko.” Ani nasa tirani niga Yekova akanga kuti ndiko ho ani akpara gaani raka ni fuko na ki zi bapatiza. Gu mokedi nangia Pauro asakirogopaiyo ya “oni adu nga ni gaoni yo te; bambiko i angbe roni ni mosoro.” (1 AKorindo 6:19, 20) Sidu, gu mosoro re nga ga Kristo motumo tumorii, mbiko rii mburu gupai re du Mbori adia rani ti ni nigako amoyambu, singia ani nga mbedimbedi aKristano watadu ani nga abadiangbayo duna gu maabangirise nga ga raka auru kpotosende. (AEfeso 1:7; 2:13; Yugoti 5:9) Si ki ta du were, tona ti gu regbo ani azi bapatiza, ani ningia ‘ga Gbia aboro.’ (ARomo 14:8) Wa duhe nga i aima ngbe rani na gu kikiipa mosoro nga kure Yesu Kristo, ani ada a nigako akanga na si kidu fu rani nidingisoro ka iriso gako arugute.—1 Petero 1:18, 19.
5. Nidu ani ni agu akanga nga ga Yekova yo, gini nyanyakipa sunge fu yo fu rani, na wai rengbe ani ka mangaha?
5 Akanga duwa ka i irisi sangba bairayo. Ani nisarani sa tirani ni akanga fu Bairarani mbiko gaani nyemuse tipa ko. Bambata Yoane 5:3 nayaa: “Gi nga du [ani] na nyemu Mbori re, nga ka ani kuti gako rugute. Gako rugute asusa nga omerani te.” Tipa rani tie, gaani giasangbaa nga gopai tipa gaani nyemuse gbiati ra ani na gorani fuko. Si nayugotihe ziazia rogo agu apai dunduko ani amangaha. Pauro ayaa: “[Singia] ri he tie, na mbira he, na gu pai oni ka manga ha dunduko, oni mángi he dunduko sa taasa rimo Mbori.” (1 AKorindo 10:31) Rogo agu apai ani amangaha rogo gaani raka na a’uru dunduko, zavura rogo rukutu apai, ani naida ka yugo gupai nga, ani ‘namangapa Gbia.’—ARomo 12:11.
6. Wai padu ani niga Mbori akanga amanga ariapai rogo gaani adiaberã rogo raka? Oni yugunga ha na kpiapai.
6 Nikpiapai, ho ani amanga diaberã ni, si naida ani du na rubangirise tipa ka ino gupai Bairarani akpinyemuhe nga Yekova du ngbangbaturũ yo. (Maraki 1:6) Agu adiaberã du nikpakarakpakaraha rengbe ka maa rani ti asada ka bihe singia ani na nyemu ka giasangba Mbori. Fuo duhe tie wo, ya mo ani nika irisa gako arugute kuba manga gupai du kpotoraniyo “nangi ahe ki susi ahe dunduko” na duna “kere kaza”? (Yeremaya 17:9) Ngbutuko fuo Melisa nga devurukporo zi bapatiza ki dani Kristano, paranga kumba atona ka kpinyemuri. Ko awiri wene sino boro, na kurii gure, ko angia gu boro naawisigo Ziazia Kekeapai na aDezire Yekova. Wa si avura du wo, bakumba afura na Melisa tipa gu tatamana du ti pefuo ga Yekova arugute ka manga rogatise “kina rogo Gbia yo.” (1 AKorindo 7:39; 2 AKorindo 6:14) Melisa aidi kuti gupai nga: “Si adunga fere taata ka manga gi rugute re te. . . . Ono mi adiberã ka mangaha na gu nduhe nga, wa duhe nga mi aima kpara gimi raka fu Mbori tipa ka manga gupai ko akpinyemuhe, si naida mi irisi gu gako arugute du ziazia.” Wa ri aaberãkurii gupai nakuru kuyangura kusa, ri ayaa: “Mi na ngbarago tire gbe mbiko mi amangi agu arugute re. Si aimanga te gu kumba re ki mbu wisigopai. Wa ka mi anye kindi fuo gu kumba re, ka mi du awere nga dia gu kumba du gako ida kia ti gimi.”
7, 8. (a) Tipagine si aidanga ti ni ani naabaka bangirani kisusi tipa fu ngbarago fu aboro ya? (b) Oni yugunga ha na kpiapai wai rengbe ani ka diabe gunde be aboro.
7 Nidu ani niga Mbori akanga, si aidanga ani du ni akanga fu aboro te. (1 AKorindo 7:23) Rengo ngaha nga, anga boro ho sa dagbarani naida aboro zanga kpinyemu ni te, ono tie, si naida ani moi gupai ku berã rani yo nga, aKristano na agu andiko beyo du kia ti ga agu aboro du rogo zegino. Pauro asanahe ki yaa: “Mi nagbata pai ka ngba . . . bangiri aboro?” Gupai ko adigisi fugo ko nani nga: “Ka mi angba angba ti aboro kindi, mi adu nga ni ga Kristo moyambu [watadu kanga] te.” (AGaratio 1:10) Si adanga fu rani ani zere fu gu soapai nga ga akuarani tipa ka fu ngbarago fu aboro te. Ginipai tie ka ani mangihe ho aboro asosoda rani ni ani ngbe naayo?
8 Ani binga gu kpiapai du tipa Elena nga paranga dee ni Kristano du Spain yo. Dungu akurari ri adu naayo rogo riko sukuru yo angia agu aboro nanafu kure fu kura aboro. I aima ino gupai nga, Elena, nga boro sa dagba aDezire Yekova arengbanga ka fu kure fu boro te na ri arengbanga ka diaha a kutii kpotoriyo te. Ho mamu akuru ni furi tipa ri sakirogo gari bipai tipa kure fu agu agude nadu rogo gari riko, Elena aidi ka fura fuyo tipaha. Elena nayaa: “Ka pe rengo, mi aagunde agunde tipa mangaha. . . . Ono mi ambakadi gupai mi aandu ka gumbaha re wenengai gbe na sangbanaha kidu ni iiriwoho. Dungu agude rogo gimi riko aduna irisa tipa re, na gaani bayugupai ki ya fere wee rago aima ngba tiko na gupai mi aamangaha re. Kurii apai dunduko, mi aduna ngbarago tire mbiko mi asongodi rimo Yekova na ki sakirogo ndu gimi bipai ziazia a wa duhe rogo Ziazia Kekeapai.” (Bambata Pai 9:3, 4; Amokedi 15:28, 29) Ii, mbiko padu ani niga Mbori akanga na niga Kristo akanga a, ani kia ti kura aboro. Sidu, rogo dungu apai, ka ani mbakaditirani wenengai ka songoda gaani ida ngba iriiri gene, aboro afu irisa afu fu rani tipa gaani ida.—1 Petero 3:15.
9. Ginipai ani awirikaha be gu maraika nakuru fu gu mokedi nangia Yoane?
9 Pa tingida ani gupai nga, ani nga ga Mbori akanga rengbe a ka undo rani ani nye ni aboro umbasitise. Ti kura regbo sa, iriwo gu Yerusarema nga ga ngbangbaturũ nadu rogo yuguyugupai ati ti gu mokedi nangia Yoane ko ki tumusa ka iriso gu maraika naye na fugo Mbori fuko rogo gu yuguyugupai re. Ono tie, gu maraika re aya fuko: “Ka mo mángi nga gure ya! Ani nga amoyambu na mo na agu awirinamo nga anebi, na agu yo naka kuti gu pai du rogo gi kitabu re. Mo írisi [kina] Mbori.” (Yugoti 22:8, 9) Nangbaa gu wene kpiapai gu maraika re amoihe tipa ga Mbori akanga dunduko! Si rengbe kadu nga gu kura aKristano gu duho duna kparakpara asunge beyo rogo dungurati. Wa vura duhe wo, Yesu ayaa: “Gu ni nakpi nyemu ka du ni bahe dagba roni, ni adú ni gaoni moyambu. Gu ni nakpi nyemu ka du mbata yo fu roni, ni adú ni gaoni kanga.” (Matayo 20:26, 27) Wa du ani ni apefuo Yesu, ani dunduko nga gako akanga.
“Gupai Mangi Ani He re, Si Nga Kina Gupai Si Aida Ani Mangihe”
10. Oni funga kpiaapai nga ga Ziazia Kekeapai nayugo gupai nga, si anadunga taata fu ga Mbori ruru amoyambu ti aregbo dunduko i mangi gupai ko akpinyemuhe te.
10 Anga pa manga gupai Mbori akpinyemuhe ti aregbo dunduko nitaataha fu kpakpa aboro te. Gu nebi nangia Mose aduna ndundu ka irisa sangba Yekova ho Yekova asana ko ni tipa ko ndu ka kusa awiri aYisaraere kusayo be sunge akanga be aEzipeto. (Gate 3:10, 11; 4:1, 10) Ho Yekova afu sunge ni fu Yona tipa ko ndu ka takapande ga Yekova sapangbangaa kuti aboro Nineve, ko “aguari ka ora ku Tarusisa yo ti bangiri Yekova.” (Yona 1:2, 3) Baruka, nangia ga Yeremaya bakeapai, akpakanahe ya omeko abati be ndusunge fu Yeremaya. (Yeremaya 45:2, 3) Wai si aida ani mangipai ho agu apai ani akpinyemuhe aso kina vura ni na gupai Mbori akpinyemu ani mangihe? Gu yugopai na kpiapai Yesu ayuguhe nafu karagapai fu rani sani.
11, 12. (a) Oni gumbanga gu ga Yesu yugopai na kpiapai niguruhe du nikekehe rogo Ruka 17:7-10. (b) Ginipai ani awirikaha be ga Yesu yugopai na kpiapai?
11 Yesu afura tipa gu kanga nangerefuo ga bairako rimbasa avusende ati yo rogo kura uru sa pitipiti. Ho gu kanga re ayeni ku kporo omeko nabati fuo manga ko sunge kakaka tipa asaa wa 12, bairako ayambanga ko ko ye ka sungo sande ka ngba be wene riahe nga ga nyemu te. Kuba gure, bairako ayaa: “Mo mbakadi ahe mi ri he, mo ki tapa tiro, ki niru pati re daho mi ka ri he ni ki mbiri he; fuo gure mo ki ri riahe ki mbirí he.” Gu kanga re arengbe ka manga agu apai ko aida ka mangaha kina fuo manga ko sunge fu bairako mbata. Fuo gure, Yesu adigisi gu yugopai na kpiapai re niyaa: “Sidu kinawo a, ho oni ka manga agu apai ni dunduko i afuhe fu roni, oni yaa, ‘Ani nga kungbo akanga gbua. Gupai mangi ani he re, si nga kina gupai si aida ani mangihe.’ ”—Ruka 17:7-10, NW.
12 Yesu amanganga gi yugopai na kpiapai re ka yugo gupai nani nga Yekova nabipa gupai ani amangaha rogo gako sunge nitaatapai te. Ziazia Kekeapai naya ziazia wee: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko.” (AEbere 6:10) Kuba gure, gupai Yesu aida ka yugoho na gu kpiapai re nga kanga arengbanga ka fu ngbarago fu tini watadu ka maaberã ni kina fuo agu apai nafu ngbarago funi te. Ho ani akpara gaani raka ni fu Mbori na ki sia gupai nga ani naida kadu nigako akanga, gure nga ani aima ida ka maa gupai ko akpinyemuhe mbata fu gaani. Sidu, ani duwa ka ani moi gupai Mbori akpinyemuhe mbata fu gaani.
13, 14. (a) Rogo gini apai si aida ani sovura kuti gu nyemuapai du tirani ki dibehe? (b) Tipagine si aida ti ni ani mbu gupai Mbori akpinyemuhe si mangi kuba gaani?
13 Pa geda ani Fugo Mbori dedede gbiati agu abuku nga ga ‘ruru kangara moyambu’ rengbe ka ida bakere asadatise berani. (Matayo 24:45) Si rengbe kadu wo kangia gedapai niima du mbata fu rani nikpakarakpakarapai watadu kangia gu buku si aida ani gedihe re nafura tipa “gu dudungura apai nga ga Mbori.” (1 AKorindo 2:10) Fuo duhe tie were, ya mo si aidanga ani gbata regbo tipa wisigopai nisase tee? Si rengbe ka ida gupai berani nga ani moi arugute ani kaa irisaha tipa sungo sande ka dia regbo kuti wisigopai. Ka ani amanganga ha wo ya, wai ka ani rengbe ka hia gu “nyanyaki riahe du tipa sosono aboro”?—AEbere 5:14.
14 Ginipai tipa agu aregbo ani aye ba sunge yo kidu na mbugo fuo manga ani sunge tipa gbanga regbo? Si idi gupai berani nga ani asadi tirani a’asada ka ndu kupati agu adunguratise nga ga aKristano. Watadu pa tungusa ani pai fu agu aboro ani ainonga yo ya ni gupai adunga ani na nyemuhe ya. Pauro aima kparia gupai nga, aregbo rengbe arengba kaduho si aida ani tungusi wene pangbangaa angianga mbiko ‘ani siaha’ ka mangaha ya. (1 AKorindo 9:17) Ono tie, ani namanga agi apai re mbiko Yekova, nga gu Bairarani du ngbangbaturũ yo, ko naya fu rani wee ani mangihe. Ya mo ani naadunga na ngbarago tirani ti aregbo dunduko gbiati wasa fuo manga ani asadatise ka wisigopai, ka ndu kupati adunguratise yo, na ka tungusapai tee?—Atambuahe 1:1, 2; 122:1; 145:10-13.
Ka Oni ‘Ngerenga Kusayo’ Tipa agu Apai Du Yo Ya
15. Wai Yesu amoi kpiapai nga ga ra boro naa goni fu Mbori?
15 Yesu Kristo ayugupa gako ra naa gose fu Bako du ngbangbaturũ yo ngba wene gene kisusi. Yesu aya fu gako abawiriki wee: “Mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.” (Yoane 6:38) Ho ko aduni rogo egera rogo gu ati nangia Getesemane, ko akparikpee ki yaa: “Ako Buba, ka si du wo, gi inga guari pati re re. Ono, ka si du nga wa mi akpi nyemu he ya, wa kina mo akpi nyemu he.”—Matayo 26:39.
16, 17. (a) Wai si aida ani bi agu apai ani aima sa giirani nani? (b) Oni yugunga wai afugo Pauro aruaru ho ko aringbisipa agu apai ni “wa kina mirĩ ahe” ka mangi fuko gizo.
16 Yesu Kristo nakpinyemu ani nye niruru rani kuti gaani diaberã kadu niga Mbori akanga. Ko ayaa: “A nga gu ni sa ka ni nadia sunge ku beni ki ngere ku sa yo, ka re na rima ku rogo ga Mbori ngbi yo te.” (Ruka 9:62) Anga pa kpasaka ani berã tipa agu apai ani aima mbuhe kusayo nigiirani nga wenepai ka mangaha ho ani andusunge ni fu Mbori te. Kuba gure, si naida ani bi agu ahe na kikiipaha gbia ani he wa ani asia gupai nga ani naida kadu niga Mbori akanga. Pauro akepai fu AFiripoio ki yaa: “Ni rengo, ahe dunduko si adu nga bangire ni he te mbiko gu wene pai nga inida Kristo Yesu gi Gbia. Mbiko ko ahe aingi be re dunduko si ki du bangire wa kina mirĩ ahe, ya mi bi Kristo.”—AFiripoio 3:8.
17 Oni berẽnga pa agu ahe Pauro abihe ni mirĩ ahe gbua na ki mbuhe tipa ka gbia agu amosoro nangia ga toro mbiko padu ko niga Mbori kanga. Anga kina gu dodoroma raka nga ga zegino watadu kina agu apai nga ga zegino nafu wasa sa ko ambuhe te, ono ko ambu gu pagbia a ka ko agbiaha ni barumbatayo rogo gu pambori nga ga aYuda. Wa ka Pauro anye kindi rogo gu pambori nga ga aYuda, si nawira ka ko adaada ti gu pagbia nadu wa ga Simona, nangia wiri Gamariere nangia ga Pauro bayugupai. (Amokedi 22:3; AGaratio 1:14) Simona ada nibarumbatayo nga ga Farusi ko, na ki mangi nyanyakipa apai, wa ko avura kaa kapa akapa kuti gu samungu aYuda aguari nani kuti aRomo rogo 66-70 F.B.K. vurũ. Si nawira aYuda watadu agu aborovura nangia ga aRomo yo, i naimiko ti ngba gu vura re.
18. Oni funga kpiapai tipa wai gu wene mangaapai nga ga toro, afu mosoro fu boro.
18 Dungu aDezire Yekova ima manga gu bangisapai Pauro amoi kpiaha re. Kumba nga Jean nayawee: “Vuru bete agarã yo fuo mbu mi sukuru, mi agbia sunge nigu bakerepa bakeapai nangerakurii asunge tiibe nyanyakipa basapungbangaa Rondoni yo. . . . Mi anagbia ngbarago be gimi sunge na kini zi bakere marã ti ni, ono ngbadureyo, mi aima ino gupai nga, gupai ka ngba nga ka mangasunge fu Yekova susi gu mi amangaha wa du rago re. Niyangaraha, mi ambu sunge na ki tona sunge tungusapai nibazakigene. Mi na ngbarago tire mbiko mi aima manga gu diaberã re mbata fu susa agarã awere kusayo wa 20! Gimi sunge tungusapai ti aregbo dũ ima mbakada gimi raka susi gu ka sunge bakeapai amangihe. Anga kurapai ho rengbe ka fu ngbarago fu boro susi gu nga ni bi wai Fugo Yekova a’aria ga aboro raka te. Pa manga boro gi sunge re nga wenepai nirengo. Kiinga agu ahe ani afuhe fu Yekova ringbisihe na gu ani adiaha beko te.”
19. Gine si aida si du nga gaani diaberã, na tipagine?
19 Agu apai du tipa rani rengbe ka ariatihe wa regbo andu. Ono tie, gaani kparatise fu Mbori a’arianga tihe te. Ani kindi nga ga Yekova akanga, na ko nambuhe fu kina rani ani sia wai si aida ani mangisunge wenengai gbe na gaani ome, abirĩ, gbiati gu kura ahe du berani. Sidu, gu diaberã ani amangaha tipa agi apai re rengbe ka yugopa gu nyemuse du ani nani tipa Mbori. Si nayugopa bakio wai a du ani na nyemu ka mbupa kura gaani apai tipa gako sunge. (Matayo 6:33) Zanga bipa agu apai du tipa rani, ya mo si aidanga ani diberã ka fu kina guhe ngbaa gbe fu Yekova tee? Pauro akepai ki yaa: “Si ngia gu ni du zaza rogo pa fu gamahe, Mbori aida pa gamahe be boro wa du pa agu ahe du be ni, kuti agu ahe adu nga be ni ya te.”—2 AKorindo 8:12.
“Zuzuroni ti Roni”
20, 21. (a) Gini zuzuahe ga Mbori akanga akusaha? (b) Wai Yekova afu mosoro fu agu aboro namanga gupai ngbaa kisusi rogo gako sunge fuko?
20 Padu ani nga akanga fu Mbori ayenga na rungosi fu rani te. Kuba gure, si nazaka rani be ngbatunga gu sunge kanga nga ga rungo nabengeta rani na ngbarago. Pauro akepai ki yaa: “Awere i kusi roni be ingapai oni ki du ni akanga fu Mbori, zuzuroni ti roni sa ziazia pai, digidaha nga nyenye unga.” (ARomo 6:22) Pa manga ani sunge ni akanga fu Mbori naye na gu zuzuhe fu rani nga ziazia apai nga gu ani agbia sangbanaha rogo gu sino mangaapai du gigirii. Kurii gure, si nandu na ani sa nyenye unga kumbatayo.
21 Yekova nagama ahe kpaima fu gako akanga. Ho ani amanga gupai ni ngbaa kisusi rogo ndu gako sunge fuko, ko ‘nazaka abangiri ngbangbaturũ’ na kini uka ‘amaku kuri rani ka ba adunga tipaha ya.’ (Maraki 3:10) Nairiwo gu ngbarago nikangiaha ani naamangasunge fu Yekova nigako akanga nyeanye kindi!
Oni Natingidaha?
• Tipagine ani asa tirani ti ni niga Mbori akanga?
• Wai ani ayugo gupai nga ani nara naa gorani ka manga gupai Mbori akpinyemuhe?
• Tipagine si aida ti ni ani mbakaditirani ka maa gupai Yekova akpinyemuhe mbata fu gaani?
• Tipagine si aidanga ti ni ani ‘ngere kusayo’ fuo agu apai ani aima mbuhe ya?
[Gu kpiahe du ti kpewaraga 14]
Gu mbakadapai nadu tipa gu sunge kanga nadu ringara aYisaraere yo kina boro nisani aniidi ka mangaha angia mboimboi gupai nadu kumbatayo tipa gu sunge kanga nga ga aKristano
[Gu kpiahe du ti kpewaraga 15]
Ani nada niga Mbori akanga ho ani azio bapatiza ni
[Gu kpiahe du ti kpewaraga 15]
AKristano namaa gupai Mbori akpinyemuhe mbata rogo gayo raka