Oni Wiriki Ga Yekova Agene

“Mo yúgu gamo agene fere . . . awere ya mi ini ro.”—⁠GATE 33:⁠13.

1, 2. (a) Tipagine Mose amangipai ti ni wa gu ko amangihe re ho ko abi Ezipeto ni ko nimangi gbegberee fu Ebere? (b) Tipa Mose du nibawene bamangisunge fu Yekova, ginipai si aidi ko wirikihe?

I ASONOSI Mose kua Faro yo na i ki yugu gu tatamana fuko abakindo Ezipeta anaabihe naapaha kuari gbe. Wa si avura du wo, Mose aima ino gupai nga, Ezipeto nangia ko te. Avunguko angia aEbere. Ho garãko adani ti 40, ko andu ka bi agu apai naamanga agumeko nangia aYisaraere. Ho Mose abi Ezipeto ni sa ko nimangi gbegberee fu Ebere, rago agbere tiko. Ko ayawa gu Ezipeto re ki imiko. Mose asia gupai nga ka ngbe na kina ga Yekova aboro na ki berẽhe ya Yekova aamangasunge naako ka batasa agumeko. (Amokedi 7:21-25; AEbere 11:24, 25) Ho gipai nadu tipa imo Mose boro re akuru ni kuyangura, agu aborokporo nangia ga bakindo yo abi Mose nibakuondiko, sidu, si kini idi ko oro ka bata. (Gate 2:11-15) Kangia si aida Mbori mangisunge na Mose, si aida ko rugutiko wenengai na ga Mbori agene. Ya mo ka Mose aidihe i yugupai fuko?—⁠Atambuahe 25:⁠9.

² Tipa gu kura agarã 40 naye fuo gu regbo re, Mose aaraka rogo gu ringara nangianga gako ya na kini mangisunge nibabanda avusende. Kuba gupai nga ngbadu Mose imi mbiko agumeko nangia aEbere abinga ko na irisa te, ko afu tiko gupai mangi ko Mbori ambugene fuhe. Wa dungu agarã avura susa nga gu boro adunga ho naidipa Mose vuruhe yo ya, ko aidihe Yekova yugupai fuko. Ho Mose akepai ni ki yaa: “Mose angia bayee boro ni rengo, ki susi agu aboro nadu ri kpotosende dunduko,” anga kiisopatise nangiaha te, ono ko akehe mbiko gu ome nga ga ziazia toro nadu kugii ko. (Pa Geda Aboro 12:⁠3) Yekova amangisunge na Mose ngba agu agene nadu naapaha kia. Ka ani agbata gene kadu nibayee aboro, Yekova afu maku afu fu rani.—⁠Zefania 2:⁠3.

I Afu Sunge fu Mose

3, 4. (a) Gini sunge Yekova afuhe fu Mose? (b) Gini undo Mbori afuhe fu Mose?

³ Rogo kura uru sa, gu maraika naamangasunge kuba Yekova afura fu Mose mbembedii na Bagangara Orebe rogo gu rago nga ga Sinai baime nambedi ka ke pati ni kirikiri. Gu maraika re aya fu Mose: “Mi bi gu imisiri nga ga gimi aboro du Ezipeta yo ni rengo, ki gi gayo kpe be gayo abanyakasi pa sunge, bambiko mi ini pa gayo aima, mi zorõ ka batasa yo be aEzipeto ka kusa yo rogo gu ringara re ku rogo wene kikii ringara, ku rogo gu ringara du adu na mamuanya na nzeme anyege kpaima.” (Gate 3:2, 7, 8) Nibi gipai re, sunge aduho be Yekova ko aida Mose mangihe, ono si aida Mose mangihe kina ngba gu gene Yekova aidaha.

⁴ Ga Yekova maraika aafura kindi niyaa: “Mo ye tie, mi . . . kedi ro koyo du Faro ni, mo kusi gimi aboro nga awiri aYisaraere Ezipeta yo.” Mose aduadu dindikodindiko. Ko abi tiko nga ko arẽnga te, na kina kutiko nisako nirengo, ko arẽnga te. Ono tie, Yekova akido Mose ki yaa: “Mi adu[adu] na mo ni rengo.” (Gate 3:10-12) Yekova afu ome fu Mose ko mangi iiriwoapai nga gu nangia gopai ka yugo gupai nani nga Mbori nirengo nakedi ko. Si aidi wirina Mose nangia Arona gasi ko tipa kaa fura kubako. Si adu nga, Yekova nika yugo agu apai ayugo fuyo si aida i nigumbaha na gu i kaa mangaha. (Gate 4:1-17) Ya mo Mose arengbe ka manga gu sunge re wenengai niruru mangaapai?

5. Tipagine gu sino berã nangia ga aYisaraere aye ti ni na kpakarakpakarapai fu Mose?

⁵ Ti tonatonaha, agu abaakumba nangia ga aYisaraere yo aidi kuti Mose na Arona. (Gate 4:29-31) Ono tie, nikina ipo, “ga awiri aYisaraere abarumbatayo” abira Mose na wirinako ya aMose na Arona sa yo ‘rimoyo gbere’ ngba Faro na gako amoyambu. (Gate 5:19-21; 6:⁠9) Ho aYisaraere aakura ni kusayo Ezipeta yo, kina iriwo rago nati tiyo baraho i abi aEzipeto ni i nidofuo yo na gayo angbagida vura. Wa Zamba Baime adu barabangiri aYisaraere na angbagida vura kidu ku giiyo yo, i abi tiyo wa aEzipeto ima kengeda yo, na i ki tona ka bira Mose. Ginipai ka oni amangihe wa ka oni adu yo? Wa aYisaraere avuranga du na akurungba beyo ya, Mose azinahe fu aboro i tumba nduge ka si Zamba Baime ku mbitiyo a wa Yekova arugu ko nani. Fuo gure, Mbori kini mo ka kparaka agu aime nga ga Zamba Baime kurogoho ue ki mbu ugu rago tipa aYisaraere si ku mbitiyo.—⁠Gate 14:1-22.

Gupai Paha Anyaki Kisusi Pabatasa Aboro

6. Ginipai Yekova anyakasipai tipaha ho ko afu sunge ni fu Mose?

⁶ Ho Yekova afu sunge ni fu Mose, ko anyakasi nyakapa rimoko fuko. Pa irisa aboro gu rimo re, na ka fu irisa fu gu Boro duhe kurii ni angia nyanyakipa pai. Ho Mose asana Yekova ni tipa rimoko, Yekova aya fuko: “Mi nikadu nigu boro mi kadu nga ni.” Kurii gure, si aidi Mose ya fu awiri aYisaraere wee: “Yekova nga ga abamo Mbori, nga ga Abarayama Mbori, nga ga Yisaka Mbori, nga ga Yakoba Mbori, kedi re kono du oni ni.” Yekova agbia kurapai kuti gure ki yaa: “Gi nga rimore re kindi, wo i ka tingida pare fu arika ngbatunga aboro dunduko.” (Gate 3:13-15, oni ringbisinga ha na NW .) Yekova kindi nga gu rimo Mbori gako amoyambu naini ko ti ni rogo zegino dunduko.—⁠Yesaya 12:4, 5; 43:10-12.

7. Ginipai Mbori angarasi Mose ko naamangaha kindi wa Faro avurangia irarukö vurũ?

⁷ Ho aMose na Arona akuru ni kubarabangiri Faro, i agumba gu pangbangaa i akedi yo nani ti rimo Yekova. Ono Faro aya nirukö wee: “Da nga Yekova, ka mi gi sangbako ki idi fu aYisaraere i ndu? Mi aina nga Yekova te, mi aída nga aYisaraere ndu a te.” (Gate 5:1, 2) Faro angia boro sakparakpa na ni irabiriki, wa si avura du wo, Yekova angarasi Mose ko naagumba asangbako fuko kindi. (Gate 7:14-16, 20-23; 8:1, 2, 20) Mose abi gupai nga, ko aima imisa ngbadu Faro na gako afugo. Ya mo wiri wenepai aduho ti dogoda nduge kindi fuo Faro? AYisaraere aima duna nyemu i batasi yo. Ono Faro aima ká nyanyakii. Ginipai ka oni amangihe wa ka i aya oni nangia Mose?

8. Gini undo naye fu aboro be gu gene Yekova amangipai ngbaha rogo gu ngbangaa nadu tipa Faro, na wai si aida agu apai re duna ome kurii rani?

⁸ Mose agumba kura pangbangaa niyaa: “Ya Yekova nga ga aEbere Mbori wẽ, ‘Mo idi fu gimi aboro i ndu ka manga pare.’ ” (Gu kekeapai du nibibirihe na nikikindigihe re, ani du kehe wo.) Mbori aya berewe wee: “Wa mi arengbe [arengba] ka taa bere ki mangi ro na gamo aboro na tata kaza, ka i adi ro ku sa yo ri kpotosende; ono tipa kina gi pai re mi aidi he ti ni mo nye ni ungaro, nga ka yugo pa gi tandu, i ki taki pande pa rimore rogo kpotosende . . . dunduko.” (Gate 9:13-16) Mbiko gupai Yekova aandu ka mangaha na gu boro sakparakpa nangia Faro re, ko aringbisipai ka yugo gako ome ngba gu gene nikadu nikpiapai fu agu aboro dunduko nabisira pako. Si adu nga gipai re nika koda Satana Bakitingbanga, nga gu boro Yesu Kristo aya tipa ko kusa wee ko nga ‘bakindo gi zegino re.’ (Yoane 14:30; ARomo 9:17-24) A wa i afura tipaha kumbatayo, i aima takapande rimo Yekova rogo zegino dunduko. Ga Yekova hipai nigbangaha asa gupai nga, i banda aYisaraere gbiati bakere bange kura aboro nibakiakiayo nakodi tiyo naayo kurogo irisoko. (Gate 9:⁠20, 21; 12:⁠37, 38) Natona ti gu regbo re kaa ndu kumbatayo, pa takapande rimo Yekova aima fu undo fu amirioni aboro berewe nga aguyo nadi ndikidi irisombori kugume.

Mangapai na Aboro Nyakarii

9. Wai ga Mose aboro ayugu zingo irisa tipa Yekova?

⁹ AEbere aima ino rimo Mbori. Mose anaayamba gu rimo re ho ko anaafura ni naayo, ono i anaayugonga wene irisa tipa gu Boro gu rimo re adu kurii ni te. Ngbutuko fuo batasa Yekova aYisaraere Ezipeta yo ngba iiriwo gene, ginipai i amangihe ho i abinga wene mbirimbiri ime ni ya? I agumba rimo Mose. Fuo gure, i ki kpakanahe tipa riahe. Mose aza yo ya gi gayo kpakanahe re adunga gbua kina kutiko na kuti Arona sa te, ono si adu kuti Yekova. (Gate 15:22-24; 16:2-12) Yekova afu aNdiko fu aYisaraere tiimburu Bagangara Sinai yo, na ko ata fuhe kini mangi iiriwoapai. Ono tie, nibasasangbaa, agi aboro re amangi kpia wiri bagara rogo dahabu na kita irisoho kini ya tipaha wee si nga “pumbo fu Yekova.”—⁠Gate 32:1-9.

10. Tipagine du gu ga Mose sanahe ti ni du nikekehe rogo Gate 33:13 ninyanyakipa pai fu agu aKristano nga ababiapai areme?

¹⁰ Wai si aaida Mose mangipai na agu aboro kina boro Yekova nitiko aringbisi payo ni airanyakarii? Mose azungadi Yekova ki yaa: “Mi nakpara foro, ka ngia mi ngba bangiro, mo yúgu gamo agene fere awere ya mi ini ro ki ngba bangiro a.” (Gate 33:13) Wa agu aKristano nga ababiapai angerafuo gu ga Yekova aDezire du areme, i tigayo nga gu rimbasa avusende duna umbasitise kisusi gu rikaaboro nangia agu aYisaraere nadumbata re. Wa vura duhe wo, agi abaakumba re nakpara fu Mbori wa kina gure niyaa: “Ako Yekova, mo yúgu gamo apai fere; mo yúgu pa gamo agene fere.” (Atambuahe 25:⁠4) Gu inohe du tipa ga Yekova agene du ababiapai nani, si nasa yo i naamanga apai ngba gu gene duna ngbanyaa na Fugo Mbori na duna ngbanyaa a na asinoko.

Agu Apai Yekova Akpinyemuhe be Gako Aboro

11. Gini arugute Yekova afuhe fu Mose, na tipagine du ani ti ni na nyemuhe?

¹¹ Yekova aima gumba agu apai ko akpinyemuhe be gako aboro ho i aduni tiimburu Bagangara Sinai yo. Kusa, Mbori afu seke-seke kpakakpaka ambia ue fu Mose nadu na aRugute Bawe riihe nikekehe. Wa Mose aazora ri gu gangara yo re, ko abi aYisaraere i niirisi meeme kpia wiri bagara, sidu ko ki bafu gu kpakakpaka ambia re kusande niʹimisiringbaduko si ki kukuodi tukutuku. Yekova ake agu aRugute Bawe re berewe kpakpu gu kura kpakakpaka ambia yo Mose asekehe. (Gate 32:19; 34:⁠1) I aʹarianga agi arugute re te tona ti gu bambata regbo i afuhe ti ni. Si aidi Mose naamangapai na ngbanyaa kuti sangbaha. Mbori anyakasipa gu ngbatunga boro a du Ko nga ni ziazia fu Mose, ngba gi gene re ko kini yugu wai fu Mose si aida ko naamangapai nigu boro namangasunge kuba Mbori. Wa vura duhe nga aKristano tii ga Mose aNdiko te, agu apai Yekova agumbaha fu Mose du rogo agu andiko re, si na dungu bambata bangua arugute rogoho nga gu i aʹarianga ha ya na du kindi tipa agu aboro dunduko nairiso Yekova i naamangaha. (ARomo 6:14; 13:8-10) Ani wisiginga bete agi arugute re.

12. Ginipai si aida aYisaraere mangihe nibipa ga Yekova sanahe tipa aboro futiyo kaa iriso kina ko sa?

¹² Futise ka iriso kina Yekova sa. Ho Yekova anyakasi gupai ni nga ko naida aboro fu tiyo kaa iriso kina ko sa, gu rikaaboro nangia aYisaraere adu kinaho kini gihe. (Gate 20:2-5) AYisaraere aima bi gu bazagino goapai naayugo Yekova nindikidi Mbori. (Pa Fu Rugute ni Ue he 4:33-35) Yekova aima gumbaha ziazia ya ka kura rikaaboro vura kaa manga kina gini apai tigayo, ko arengbanga ka hi irisokpiaahe watadu manga sangbaatoro dagba gako aboro te. Si aidanga i yugu kina kpiapai gbua tipa ra yo nigoyo fuko te. Si adu nga, i dunduko si aida i kpinyemu Yekova na ngbaduyo yo dũ, na mbisimoyo dũ, na omeyo dũ. (Pa Fu Rugute ni Ue he 6:5, 6) Si adu nga si nika koda gayo afugo, gayo sino mangaapai, na nirengo, gayo apapara raka naabaha dunduko. (Pa Amotumo 20:27; 24:15, 16; 26:⁠1) Yesu Kristo agumbaha ziazia a ya Yekova naida aboro futiyo kaa iriso kina ko sa.—⁠Marako 12:28-30; Ruka 4:⁠8.

13. Tipagine si aida aYisaraere irisi sangba Mbori ti ni dunduko zanga kpara gu sa, na ginipai duwa ka si fõngbaduraniyo ani gisangbako? (Batungusipai 12:⁠13)

¹³ Oni irisi ga Yekova arugute zanga kpara gu sa. Si aidi i tingidi aYisaraere na gupai nga, ho i arimi gu pagume ni na Yekova nangia ga mokido, gure angia i aima manga mozunga kaa irisa fugo ko zanga kpa. I anaagbia ngbarago be bakere ranirii, ono tie rogo agu apai Yekova afu arugute fuyo tipaha, si aida i gisangbako zanga kpa. Pa manga yo ho wo ka yugu gopa gayo nyemuse tipa Mbori na ka si aundo yo a gbiati awiriyo, bambiko ga Yekova arugute dunduko adu tipa fu undo fuyo.—⁠Gate 19:5-8; Pa Fu Rugute ni Ue he 5:27-33; 11:22, 23.

14. Wai Mbori anyakasi nyakapa peresa aYisaraere agu apai nga ga toro kumbatayo rogo gayo raka?

¹⁴ Oni peresi agu apai nga ga toro mbata rogo gaoni raka. Mbori aidanga gupai fu gu rikaaboro nangia aYisaraere i mbu ngerafuo agu apai nga ga borose si diba regbo agu apai nga ga toro beyo te. Si aidanga aYisaraere mbu gayo raka dunduko tipa orafuo kina kungbo taata apai te. Yekova akpara regbo rogo aposo nibasasa nga gu ko ayambuhe niziaziaha, nga gu regbo si aida i naamanga kina agu apai nakoda iriso ndikidi Mbori rogoho. (Gate 35:1-3; Pa Geda Aboro 15:32-36) Rogo agarã nibasasa, i akpara kura aregbo tipa kaa manga kparakpara kikindigi adunguratise rogoho. (Pa Amotumo 23:4-44) Si adu nga, agi aregbo re nika fu amamu fu aYisaraere i nitingidipa ga Yekova iiriwo mangaapai rogoho, tipa i nitingidi yo naapa gako agene rogoho, na tipa i niyugu gayo tambuahe fuko tipa gako weneringise fuyo rogoho. Baraho agu aboro re aayugopa gayo ra nigose ni fu Yekova, ka si aundo yo i naasona rogo gunde ti Mbori na kini kiisi gayo nyemuse tipa ko na si ki undoyo a i naata ngba gako agene. (Pa Fu Rugute ni Ue he 10:12, 13) Gu wene bangua arugute du rogo agu atori re naundo ga Yekova amoyambu areme.—⁠AEbere 10:24, 25.

Si Naida Ani Du na Atambuahe Tipa Asino Yekova

15. (a) Tipagine padu Mose na tambuahe tipa asino Yekova arengbe ti ni ka undo ko? (b) Gini asanahe rengbe ka undo rani ani berẽ dudungurõ kurii asino Yekova nibasasa?

¹⁵ Padu Mose na tambuahe tipa asino Yekova arengbe ka undo ko a rogo gako mangaapai na aboro. Gate 34:5-7 nayawee Mbori ata susa barabangiri Mose kini takipande asinoko kini yaa: “Yekova, Yekova, nga Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo, naka kuti inapai tipa aboro ni dungu akutu yo, navu aboro ti irairapai na ti samungu na ti ingapai, nga gu ko ka asara nga ngbanga fu aboro ingapai wa sa ya, nambusa wiri aboro na atitayo tipa gu irairapai nga ga abayo, da kina ho rikayo ka du ni biata na biama.” Oni dinga regbo ka berãkurii agu afugo re. Oni sananga tironi ki yaa: ‘Gine nga rogo agi asino re nibasasa? Wai Yekova ayuguhe? Wai rengbe agu aKristano nga ababiapai ka yugo agi asino re? Wai si aida agi asino re nibasasa du na ome kurii agu apai ani amangaha wa du ani nibasasa? ’ Ani wisiginga kina bete kpiaapai gbua.

16. Wai rengbe ani ka kiiso gaani tambuahe tipa ga Mbori inapai, na tipagine du pa manga ani he wo ti ni ninyanyakipa pai?

¹⁶ Yekova nga gu “Mbori du adu na nunga aboro na undahe ti ko.” Kangia oni na gu buku beroni nasakarogoapai nga Insight on the Scriptures, tipagine ka oni agedanga gupai ti ni si agumbaha tii gu riipai nga “Mercy (Inapai)” ya? Watadu ka manga wetekapai nimanga oni sunge na gu buku nga Watch Tower Publications Index watadu gu mbakadapai nga ga kompiuta nga Watchtower Library (CD-ROM).a Oni rengbe ka mangasunge na gu buku nayugobara kura averesi nga agu nafura tipa kina bangisapai tipa si yugubara kura averesi fu roni du tipa inapai. Oni nika bi gupai nga, kupati akpurasi gu mbusa fu yo ho fu boro, ga Yekova inapai nakoda wesewese nyemuse. Si nasa Mbori ko guari ka manga gupai nika zeresa gu ima du gako aboro rogoho. Nigopai tipa gipai re, Mbori anaafu aũborose fu aYisaraere gbiati agu ahe nangia ga toro fuyo ti regbo gayo gbanga nunguro kurogo Ringara Mokido. (Pa Fu Rugute ni Ue he 1:30-33; 8:⁠4) Yekova anaambupai fuyo nigako inapai ho i animangi ingapai ni. Ko anaayugo inapai fu gu gako aboro nadumbata. Kinawo a gbe si aida gu gako amoyambu du areme yugu nunga akurayo!—⁠Matayo 9:13; 18:⁠21-35.

17. Wai pa ruga ani tirani naapa ga Yekova weneringise asonosa ndikidi irisombori?

¹⁷ Yekova nakpura gako inapai na weneringise. Wai rengbe oni ka sakarogo gu fugoyo nga “weneringise”? Oni ringbisinga ha na agu averesi nafura tipa Yekova ya ko na weneringise tiko. Ziazia Kekeapai nayugo gupai nga, gu weneringise nga ga Yekova nakoda berãpa agu aboro ninyemuse adunga gene beyo ya du dagba gako aboro. (Gate 22:26, 27) Rogo aringara dunduko, ayeaye gbiati kura aboro rengbe kadu nga agu aboro adunga gene beyo ya. Ho Yekova aayugopai ni fu gako aboro tipa i zanga ngbe na kina kura aboro ono i yugu weneringise fu agu aboro duwa aguyo gumba ani payo re, ko atingidi yo na gupai nga, kinawo i adumbata ni ayeaye ku ringara Ezipeta yo. (Pa Fu Rugute ni Ue he 24:17-22) Ginipai tipa rani tigaani areme niga Mbori aboro? Pa manga ani weneringise nika koda rani na kura aboro na ki ye na kura aboro sa iriso Yekova.—⁠Amokedi 10:34, 35; Yugoti 7:9, 10.

18. Ginipai ani awirikaha nibipa agu angbanda Yekova amoihe fu aYisaraere tipa gayo mangaapai na kura rikaaboro?

¹⁸ Ono tie, si aidanga gupai nga aYisaraere naaberãpa kura rikaaboro rogo weneringise si kisusi gayo nyemuse tipa Yekova gbiati gako andiko ruru mangaapai te. Si ki ta du were, i ayugupai fu aYisaraere ka i dinga gu sino mangaapai nangia ga gu rikaaboro nake pati yo ya, watadu gayo asino irisombori na gayo wasiwasi sino raka a ya. (Gate 34:11-16; Pa Fu Rugute ni Ue he 7:1-4) Kina gu bangisapai re a du tipa rani areme. Si naida ani du niziazia aboro, a wa du gaani Mbori ziazia nga Yekova.—⁠1 Petero 1:15, 16.

19. Wai pa ruga ga Yekova aboro tiyo naapa ga Yekova bipai tipa iraira mangapai narengbe ka banda yo?

¹⁹ Tipa Mose rengbe ka rugatiko wenengai naapa ga Yekova agene, ko agumbaha ziazia fuko ya wa vura duhe nga Ko aidanga naapa ingapai te, ono ko azinganga niipo te. Ko nambu regbo ambu fu aboro tipa i wiriki gako agene tipa kaa mangaapai ringbisihe kuti ni. Ho boro asa gani berã ni ti gu ingapai mangi ni he, Yekova nambupai ambu funi tipaha, ono ko ahenga fu mbusa fu gu boro rẽ na gu kere ingapai mangi ni he te. Ko aza Mose ki ya fuko wee agu apai aYisaraere amangaha, si arengbe arengba ka ye na gbegbere sangbanaha kurii awiriyo gizo kumbatayo, singia niwene sangbanapai watadu gbegberehe. Padu ga Yekova aboro na tambuahe tipa gako agene rengbe ka banda yo ti bira yo ko tipa agu apai kina yo nisayo aye nani kuriyo watadu ka bira ko ya ko nakeesa akeesa rogo gako mangaapai.

20. Gine rengbe ka undo rani ani naamangapai ngba ruru gene na akuarani aidipase gbiati agu aboro ani agbia yo tingba gaani sunge tungusapai? (Atambuahe 86:⁠11)

²⁰ Ka oni aida ka kiiso gaoni inohe tipa ga Yekova agene, oni susi kumbatayo kindi kaa weteka apai na kini berẽkurii agu apai oni agedaha rogo Ziazia Kekeapai. Oni wisiginga bawene apapara asino Yekova wenengai wa duhe nibakiakia. Oni ta kparakpee kini wisigi wai rengbe oni ka wirika mangapai wa Mbori na ka ringbisa gaoni raka wenengai gbe na gako ringbisapai. Gipai re nika undo roni oni ne aũkota, oni naamangapai ngba ruru gene na akuaroni aidipase, na ka undo kura aboro i ye ka ino gaani bawene sino Mbori na ka kpinyemu ko.

[Gu rukutu kekeapai du bandu kpewaraga yo]

Ginipai Wiriki Oni He?

• Tipagine si adu ti ni fu Mose ninyanyakipa pai ko du nibayee boro, na tipagine si aida ti ni ani du nibayee rani a?

• Gini wenepai namangi mbiko dogoda gumba afugo Yekova fu Faro?

• Gine nga gu bete nyanyakipa bangua arugute i ayuguhe fu Mose na si aida ani wirikihe a?

• Wai rengbe ani ka kiiso gaani giarogopai tipa ga Yekova asino?

[Gu kpiahe du ti kpewaraga 9]

Mose agumba ga Yekova pangbangaa niruru mangapai fu Faro

[Gu kpiahe du ti kpewaraga 10]

Yekova ayugu agu apai fu Mose ko akpinyemuhe be aboro

[Gu kpiahe du ti kpewaraga 12]

Oni berẽkurii asino Yekova