Paranga Aboro, Oni Naatambua Yekova!

“Oni tambua Yekova kpotosende no, oni nga . . . paranga akumba na [oni nga ngasu] ade wa sa.”—ATAMBUAHE 148:7, 12.

1, 2. (a) Gini ngbatunga azahe dungu paranga aboro narugutiyo naapaha? (b) Tipagine si aidanga ti ni paranga aboro sogote agu azahe avunguyo azayo nani ya?

DEDEDE, paranga aboro ima rugatiyo wenengai naapa agu apai i ata idanga pa mangaha fuyo ya. Dunguyo rengbe ka gumbapa gu garã fu roni na ngbarago tiyo si aida i da ti ni mbata avunguyo nimo ka idaha fuyo i gurii bagene nisayo, pa gu regbo rengbe yo ka sungo dakuti ni yuru mbata fu ndu yo ka pi watadu gu garã rengbe yo ka idaha fuyo i gbe tarambiri ti ni. Ti kura aregbo paranga boro nabi gupai nga dungu gu gani apai ni asanahe tipaha na nyemuhe ni nagbia kina bangisa karagapai sani nga, “Mo sungu mbata daho mo ka sona ni.”

² Oni paranga aboro, oni ini gupai nga avunguroni nabi gupai nga si nipatatamana ka manga ngbatunga agu azahe re, isoke tipa ka banda roni. Oni ima inoho nirengo a nga, Yekova na ngbarago tiko ho oni airisa sangba avunguroni ni. (AKorosaio 3:20) Ono tie, ya mo oni naabi gupai nga, na agi azahe dunduko re oni ata tonanga ka raka “ndikidi” gaoni raka kindi tee? Ya mo i ká na manga gu nyanyakipa apai dunduko beroni da kinaho oni ka sona ni mbata? Ka gumba rengo, anga rengo ngaha te! Sunge kinaho namanga amanga awere nga gu nyakipaha kisusi agu amamu dũ oni awira kaa sungudo paha. Ya mo i nambugene fu roni tipa oni mangi gi sunge re? Gu ngba gbe nga i ambunga kina kungbo gene fu roni te, ono nirengo gu Mbori Kii Pako Kisusi, ko nitiko nayamba roni tipaha!

3. Gini kparakpara mamu Yekova ayamba aparanga tipa i du nani beyo, na gini asanahe ani nika wisigoho awere?

³ Gini sunge du ani afura tipaha? Oni kparia agu afugo du rogo gu veresi nga rii gi gaani papara kekepai re nga gu nayaa: “Oni tambua Yekova kpotosende no, oni nga . . . paranga akumba na [oni nga ngasu] ade wa sa, gbinza akumba na agude!” (Atambuahe 148:7, 12) Rogo gu veresi yo re du, du gu bakere mamu ni rengbe oni ka gbiaha: Oni rengbe arengba ka tambua Yekova. Wadu oni niparanga roni, ya mo oni na ngbarago kadu dagba amangi gu sunge re? Dungu paranga aboro duna ngbarago tipaha. Tipa ka ino gupai daha ada ti ni oni du na gu berã re, ani wisiginga asanahe biata. Bambata sanahe nga, tipagine si aida ti ni oni tambua Yekova? Uehe nga, wai rengbe oni ka tambuako wenengai? Biata sanahe nga, gini regbo oni ka rẽ tipa oni tona kaa tambua Yekova?

Tipagine Si Aida ti ni Ani Naatambua Yekova?

4, 5. (a) Kuti fugo Atambuahe namba 148, gini iiriwopai du ani rogoho? (b) Wai rengbe kusikusiahe nga gu afuranga ya, na aberãnga pai a ya narengbe arengba kindi kaa tambua Yekova?

⁴ Gu ndupai gbaarii akuraha ani atambua Yekova ti ni nga wee ko nga Bakusiahe. Atambuahe namba 148 naundo rani ani gbeberã rani kuti gi rengo re. Oni runga kandara tooni ka berãnga: Kangia oni mbedi na bakere badona aboro nga aguyo dunduko nabi wene bia na woro fugoyo kina kubanisa nga gu nafõngbaduseyo, ginipai ka oni berẽhe? Na ginipai ka oni mangihe ka si du nga afugo gu bia re nga agu afugo oni naima inoho ya rengo ngaha, si nagumba agu aberã oni nainihe ya si na nyanyakipaha, si nafu ngbarago, gbiati wasa? Ya mo oni rengbe kadu na nyemu ka wirika afugo gu bia re na ki kodi tironi na agu aboro nabihe? Badungu rani rengbe arengba ka manga wo. Sidu, Atambuahe namba 148 nayugo gupai nga, oni rogo gupai nawira kina gure ono ngbaa gbe kisusihe. Gu Atambuahe re naringbisapa bazagino rimbasa aboro, natambua Yekova dunduko kina kubanisa. Ono tie, wa oni nikaa geda gu Atambuahe re, oni rengbe ka kparia gupai du kia tigaha, ninaamanganga dedede ya. Ginipai du ngaha?

⁵ Dungu agu aboro nafu atambuahe ringbisi yo payo rogo Atambuahe namba 148 re arengbanga ka fura watadu ka sakapai a te. Nikpiapai, ani nagedapai tipa uru, diwi, akerekuru, misimisi morogumba, wige, gbiati agangara ya si natambua Yekova. Wai rengbe gi kusikusiahe adunga na unga rogoho re ya ka manga ngbatunga gupai re? (Veresi 3, 8, 9) Nirengo, rogo kina gu gene teketeke nga gu angua, gu unga ahe du ime yo, gbiati anyaa namangaha rogoho. (Veresi 7, 9, 10) Ya mo oni akparianga uru ho si ati ni na bawene rangihe, watadu ka ngera ku ariyo yuru ki bi diwi ho du u ni gidigidi u nindu dagba ndurumu akerekuru, watadu ka moma ningbarago ka bi anyaa ami ningimbaro, watadu si airiwonga tironi ka bi bawene kpakpurago? Sidu, oni aima “gia” gu bia nga ga tambuahe kusikusiahe nibihe. Agu ahe dunduko Yekova amangihe natingida gupai fu rani nga ko nga gu Bakusiahe duna tanduapai dũ, na anga kura boro ho rogo haurago dunduko duna bakere ome, na bakere tatamana, watadu duna bakere nyemuse wa ko te.—ARomo 1:20; Yugoti 4:11.

6, 7. (a) Atambuahe namba 148 naringbisapa gini kusikusiahe duna tatamana ya i natambua Yekova? (b) Tipagine rengbe ngbaduraniyo ka fõ rani ti ni ani tambua Yekova? Oni yugunga ha na kpiapai.

⁶ Atambuahe namba 148 naringbisapa tatamanatatamana kusikusiahe a ya i natambua Yekova. Rogo veresi 2, ani nabi ga Yekova “rimbasa” nga ga amaraika ngbangbaturũ yo i nitambua Ko. Rogo veresi 11, ngbatunga agu aboro duna ome wa abakindo gbiati abasapungbangaa, duna tandu kurii kura aboro, i nayamba yo i koditiyo na agu aboro nafu gu tambuahe re. Kangia agu amaraika duna bakere ome nagbia ngbarago rogo tambua Yekova yo, gini kungbo boro rengbe kadu na rengo beni ka yawee pani nikikiihe gbe ka ni tambuanga pa Yekova te? Fuo gure, rogo veresi 12 na 13, i nayamba roni a nga aparanga oni kodi tironi na kura kusikusiahe rogo fu tambuahe fu Yekova. Ya mo gupai re nafõngbaduroniyo oni mangihe wo?

⁷ Oni wisiginga yugopai na kpiapai sa. Kangia oni na bawene bakurearoni ti ni duna iiriwo birĩ beni, isoke rogo ngi ambaro yo, rogo mangimangi ahe yo, watadu rogo taka manzigo yo, ya mo oni rengbenga ka fura tipa ni fu gaoni aborokporo gbiati kura abakure tee? Zanga kapa, oni rengbe arengba. Sidu, pa ino ani agu apai dũ Yekova namangihe rengbe kadu na sangbanaha teketeke wa kina gure kurii rani. Nikpiapai, Atambuahe 19:1, 2 nayawee gu ndurumu akerekuru du ngbangbaturũ yo, ami “ninagumba pai.” Tipa rani tigaani, baraho ani aberã ni tipa gu iiriwoapai Yekova amangihe, ani arengbanga ka onga aonga zanga fura na kura aboro tipa gaani Mbori te.

8, 9. Gini nduapai Yekova aida ani tambuako tipaha?

⁸ Gu kura nyanyakipa ndupai kisusi du tipa tambua Yekova nga ko naida ani mangihe wo. Tipagine? Ya mo si wo mbiko ko naida tambuahe be aboro? Oó. Ani nga aboro rengbe arengba ka ida aboro tambua rani ti kura aregbo, ono Yekova na pako nitumbatumbaha kuari gbe susi rani. (Yesaya 55:8) Ko na zingo rugatiko na agu apai du tipa ko watadu du tipa asinoko te. (Yesaya 45:5) Ono, wa vura duhe wo, ko naida aida ani tambuako na ko na ngbarago ho ani amangaha ni. Tipagine? Ani wisiginga nduapai ue. Bambata ndupai nga, ko ima ino gupai nga, ani duwa ka ani tambuako. Ko amangi rani na gu zingo nga ga toro, nga gu zingo nga ga irisombori. (Matayo 5:3) Yekova na ngbarago ka bi rani ani nimbiisi gu zingo re, teketeke gbe wa kinagu rago naangba ti avunguroni ka bi roni oni niri gu riahe ini yo paha ya si niwenehe tipa roni.—Yoane 4:34.

⁹ Uepai nga, Yekova ima ino gupai nga si naida kura aboro nigi fugo rani ani nitambuako. Gu mokedi nangia Pauro ake agi afugo re fu gu paranga kumba nangia Timoteo ki yaa: “Mo bérẽ pa tiro, na ga yugopai; ki ka kuti agi apai re; bambiko manga mo wa gere mo abátasa tiro na agu yo nagia paha ngba ro.” (1 Timoteo 4:16) Ii, ho oni ayugopai ni fu kura aboro tipa Yekova Mbori, kini tambuako, si rengbe ka sa yo i ini Yekova a. Ngbatunga gu inohe re rengbe ka ndu naayo kurogo nyenye unga!—Yoane 17:3.

10. Tipagine ani aberã gupai ti ni nga ani duwa ka ani tambua Yekova?

¹⁰ Kura ndupai kinaho berewe kindi tipa tambua ani Yekova. Oni tingidinga pa gu yugopai na kpiapai du tipa gu bakurearoni duna iiriwo birĩ. Ka oni agia aboro i nigumba ziree tipa ni, kini gbarasi rimoni, ya mo oni manginga nyanyaki asadatise ka tambua ni tee? Sidu, gbarasarimo Yekova ima maapai rogo gi zegino re. (Yoane 8:44; Yugoti 12:9) Fuo duhe wo, agu aboro nakpinyemu ko nabi gupai nga, i duwa ka i gumba rengo tipa ko, ka rugusa gu irairaapai nani kura aboro agumbaha tipa ko. Ya mo oni tigaoni a, oni nakpinyemu ka yugo gaoni nyemuse gbiati tambuahe fu Yekova na ka yugo gupai nga oni naida ko ni gaoni Bazogo, kuba gu barikaka vurako nga Satana? Oni rengbe ka manga agu apai re dũ nitambua oni Yekova. Gu sanahe du fuo gure tie, si nga wai rengbe oni ka tambuako.

Gu Gene Kura Paranga Aboro Atambua Yekova Ngbaha

11. Gini kpiaapai nga ga Ziazia Kekeapai nayugo gupai nga, paranga aboro rengbe arengba ka tambua Yekova wenengai?

¹¹ Ziazia Kekeapai nayugo gupai dedede nga paranga aboro natambua Yekova ngba wene gene. Nikpiapai, aSurio azi degude sa nangia wiri boro aYisaraere tingba vura. Zanga gunde, ri amangi dezirepai fu dia bairari tipa ga Yekova nebi nangia Erisa. Gari afugo andu ki dati iiriwo mangapai, na si ki sa gupai nga nebi mangi nyanyakipa dezirepai. (2 Abakindo 5:1-17) Yesu amangi dezirepai a zanga gunde ho ko aduni nigude. Dagba gu ga Yesu apai dũ ko amangihe ho ko aduni nigude nga gu ka i akekehe rogo Ziazia Kekeapai, Yekova asia gu sa, nga gu ko amangihe ho garãko aduni 12, ti gu regbo ko asasana agu abayugupai nangia ga pambori yo nadu yekaru yo Yerusarema yo, na kina ngbayo ki zere be gako rugatise naapa ga Yekova agene.—Ruka 2:46-49.

12, 13. (a) Ginipai Yesu amangihe yekaru yo mbembedii kusayo mbata fu kpioko, na gini sangbanaha nadu kurii agu aboro nadu yo? (b) Ginipai Yesu aberẽhe tipa gu tambuahe agude afuhe?

¹² Ho Yesu aduni nisosono kumba, ko angarasi rukutu agude i naatambua Yekova. Nikpiapai, mbata fu kpioko na kina bete arame gbua, Yesu andu tipa bete regbo ku yekaru yo Yerusarema yo. Ziazia Kekeapai nayawee ko amangi “iiriwo apai” yo. Ko adandi agu aboro kuzagiyo nasa gu ziazia ba re ni yaro abatuka. Ko azaki bangiri airavurari na ki husi gbarigbari aboro a. Si adu nga, agu aboro nadu yo dũ, gbe aguyo nangia abarumbatayo rogo pambori, ka gipai re afõngbaduyo yo i tambua Yekova na Wiriko nga Masiya. Ono ni gupai nafu kina gberarago tie, dungu aboro ti agu aregbo re afunga ngbatunga agu atambuahe re te. I aima ino gupai nga Mbori nakedi Yesu, ono i aagunde agunde be abarumbatayo rogo pambori. Ono tie, badona sa nga ga aboro nafura gbaiga zanga gunde. Ya mo oni ini ada du nangia yo? Ziazia Kekeapai naya tipa yo wee: “Ono ho abairamotumo na abakeapai abi gu iiriwo apai ni . . . [Yesu] amangi . . . he, na wa agude apaa yekaru yo, ki ya, ‘Tambuahe fu wiri [Davide]!’ ngbaduyo ki niimi aima bakere; i ki ya fu . . . [Yesu], ‘Mo gi gu pai agi yo agumba ha re?’ ”—Matayo 21:15, 16; Yoane 12:42.

¹³ Agu aboromotumo re aberã gupai nga Yesu nika za agu agude aza naatambuako re ki ya i ongo. Ya mo ko aza yo? Kuba gure ko ambu yo i poi kuari susi gu nadumbata! Yesu akaragapai fu aboromotumo ki yaa: “Ii: oni ageda nga ha, ya ‘Mo rugu pa tambuahe zaa ku ngba rukutu agude na ahaamai’, te?” Si tie ziazia nga, Yesu gbiati Bako aduna ngbarago be ga rukutu agude tambuahe. Agu agude re aamanga gupai ka gu sosono aboro naduho dũ aamangaha. Rogo gayo aberã yo nga ga rukutu agude, si nawira apai dunduko aima du nibaziaziaha. I abi gi kumba re ko nimangi iiriwoapai, ko nifura na wingbaduse gbiati idapase, na ko kini yugu bakere nyemuse tipa Mbori na tipa gako aboro. Ko angia gu boro ko aya ko angia ni, nangia gu “wiri [Davide]” i akidohe tipa ko, nga Masiya. Fuo i fu mosoro fu agu agude re tipa gayo idapase, i adu a na gu kparakpara mamu beyo nga ga digiso sangbanebi.—Atambuahe 8:2.

14. Wai agu aome dube paranga aboro aundo yo i nitambua Mbori?

¹⁴ Gini apai rengbe ani ka wirikaha be ngbatunga gu kpiaapai re? Agu apai rengbe ani ka wirikaha si nga, paranga aboro rengbe arengba kadu ni agu aboro natambua Yekova ngba wene gene. I dedede na gu tandu tiyo nga ga bi rengo ziazia na giarogoyo kidu fuyo taata, na kini yugupa gayo idapase nyanyakii na kini mangihe zaaza. I a na gu tandu tiyo gumba yo paha rogo Asanza 20:29 nayaa: “Ga aparanga taarimo nga gayo ome.” Ii, oni nga aparanga na maku beroni nga ome gbiati nguru nga tandu ka mangaapai na ome, si nindikidi amamu tipa tambua Yekova. Wai zukazuka rengbe oni ka mangasunge wenengai na ngbatunga agi agamahe re?

Wai Rengbe Oni ka Tambua Yekova

15. Tipa ka tambua Yekova wenengai, gini ndu mangapai si aidaha?

¹⁵ Padu boro ngangara tipa tambua Yekova naenga kina ngbaduseyo. Oni arengbanga ka tambua Yekova wenengai ka singia oni namangaha gbua bambiko kura aboro naida oni mangihe te. Oni tingidi gupai nga, gu rugute kiipaha ti arugute dũ si nga gere: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Matayo 22:37) Oni tona ka ino Yekova nisaroni be wisigo oni Fugo ko nitironi? Gu wene sangbana nga ga gu ngbatunga wirika fugo Yekova re, si nga kadu na nyemuse tipa ko. Kuti sino raka, gu gene du tipa yugo gu nyemuse re nga kaa tambuako. Ka gaoni ndu mangapai ta du ziazia na nyanyakii kindi, gure nga oni ima mbakada tironi kaa tambua Yekova esuesu.

16, 17. Gine wene sino mangaapai amangaha rogo tambua Yekova? Oni ringbisinga paha na kpiapai.

¹⁶ Awere, zavura mbata fu berã oni gupai oni nika gumbaha, oni berẽpa wai oni nika mangaha. Wa ka si adu nga gu degude nangia wiri boro aYisaraere nadu ti rago Erisa re adu dedede na gbegbere sino, na zingo irisa, watadu ni irabiriki, ya mo oni naberãha ya ka agu aboro Suria nazi ri re adegetuyo kuti agu afugo ri agumbaha tipa ga Yekova nebi re? Si nawira gupai nga, ka i adegenga tuyo te. Teketeke a, aboro adegatuyo kuti roni gbe kinaho ka i bi gupai ni nga oni naa irisa, oni niruru roni, na oni na wene-sino tironi. (ARomo 2:21) Ani wisiginga kpiapai sa.

¹⁷ Degude sa rogo gu ringara du rimoho nga Portugal du garã ri 11, i anaafuda ri sukuru yo tipa ri niirisi agu aʹuru-ongoda naadunga bangiiri niruruhe kuti fugo Ziazia Kekeapai ya. Niirisa, ri asakirogo ndu gupai yo fu gari nayugupai si aidi ti ni ri ká ka irisa agu aʹuru re, ono gu nayugupai re amamu ri amoma. Wa regbo aandu, gu nayugupai re anaaʹasada kindi ka payasi pari, na kini sawia gari pambori. Wa si avura du wo, gu paranga degude re anaafu irisa kindi fu gari nayugupai. Fuo dungu agarã kusa, gu paranga wirina re aamangasunge ni nazakigene, nga gu boro namangasunge tungusapai ti aregbo dũ. Ti regbo bakere dunguratise sa, ri aangana aboro i nizi bapatiza na ri ki ini boro sa dagbayo. Gu boro re nangia gari kuru nayugupai! Fuo dungo yo tiyo na aume bangiriyo yo, gu sosono dee re aya fu gu paranga ri re wee, bangiiri agonga ti ga gu wirina re mangapai niirisa te. Gupai namangi nga, Dezire sa nidee andu fuo gu nayugupai re ku kpuri yo, na ri ki fura na gu wirina re tipa sino gi degude nadumbata ni gari degude-sukuru re. Nisangbana gipai re, gi nayugupai re atona ka wisigo Ziazia Kekeapai, na ri ki di gu rengo du rogo Ziazia Kekeapai kugume. Ii, gaoni sino mangaapai rengbe arengba kadu nigu gene duna ome tipa tambua Yekova ngbaha!

18. Ginipai rengbe paranga boro ka mangaha ka si du nga ni na ndundu ka tona fugo nakura aboro tipa Ziazia Kekeapai na tipa Yekova Mbori?

¹⁸ Ya mo oni nabihe ti kura regbo nikpakarakpakarapai ka tona afugo na kura aboro sukuru yo tipa gaoni ida? Anga oni nisaroni ti gu berã re te kura paranga aboro naberã wa kina gure a. Ono tie, mo gbe rengbe ka sa gupai nga kura aboro naasana ro tipa gamo ida. Nikpiapai, kangia si kuti ndiko na i ki idihe oni mangihe, tipagine ka oni ayenga ti ni na agu abuku moi yo mburuhe rii Ziazia Kekeapai, na kini gedihe ti regbo gu riahe nga ga uru watadu ti gu kura aregbo rengbe oni ka gedaha ti ni ya? Akuaroni awirikipai rengbe ka sana roni tipa gupai oni agedaha. Nikaraga oni pai fuyo na kini gumba agu apai fuyo oni abihe niwenehe, gudu rogo gu papara kekepai watadu gu buku oni agedaha, oni rengbe ka bi gupai nga, wene fugodagbase ima tona dagbaroni mbata fu oni inihe. Oni tingidipa sana akuaroni na asanahe tipa ka inopa gayo aida, nga agu akuaroni oni awirikapai naayo sukuru yo. Oni nidegeturoni niirisa, kini gumba agu apai fuyo oni nawirikihe rogo Ziazia Kekeapai. A wa agu apangbangaa duti kpewaraga 29 ayugoho, dungu paranga aboro natambua Mbori sukuru yo. Gipai re naye na bakere ngbarago fuyo na kini undo dungu aboro i ini Yekova.

19. Wai rengbe paranga aboro ka ye na wene sangbana rogo gayo tungusapai nitanga nani ti akporo?

¹⁹ Gu sunge tungusapai nga ka tanga nani ti akporo si nga gu duna wene sangbana kisusi tipa tambua Yekova. Kangia oni ata tonanga mangaha te, tipagine ka oni amaanga ha ti ni nisásá ya? Ka singia oni namangaha amanga, ya mo gu kura asásá ho rengbe oni ka maaha tipa tironi? Nikpiapai, kuba gupai nga kaa gumba kina gu bangisapai sa ti ngbadimo akporo nibasasa, oni gbata agene ka mbakadaha, nisana oni avunguroni gbiati gu kura aboro duna inohe tipa i fuku wene aberã fu roni. Oni wiriki wai ka mangasunge gbe na Ziazia Kekeapai, tipa gaoni nduge ka bi aboro berewe du na wene sangbanaha, na ka tona wisigo Ziazia Kekeapai na aboro. (1 Timoteo 4:15) A wa oni kaa tambua Yekova rogo ngbatunga agi agene re bakere gbe, kinawo a bakere gbe gaoni tungusapai nikadu na bakere sangbanaha ti ni, na kinawo a oni nika gbia bakere ngbarago be gaoni sunge tungusapai.

Gini Regbo Oni ka Rẽ Tipa Tona Tambua Yekova?

20. Tipagine adunga ndupai ho ti ni be aparanga ka berã gupai nga i rukutu kisusi tipa tambua Yekova ya?

²⁰ Tipa agu asanahe biata du rogo gi sakapai re, gu karagapai du kuti gu yangara sanahe, si du taata kisusi. Oni kparianga gu karagapai nga ga Ziazia Kekeapai du ngburungburu nayaa: “Mo nitíngidi pa Bamangiro a ti rago parangaro.” (Batungusipai 12:1) Ii, gu regbo du tipa tona tambua Yekova nga awere. Si fu roni nitaatapai gbe ka yaa: “Mi tooni kisusi ka tambua Yekova. Mi aruganga tire na pai te. Si naida mi sungu mbata daho mi nika sona ni.” Ka singia wo mo aberãha, anga mo nikangia gu bambata boro naberã wo te. Nikpiapai, gu paranga nangia Yeremaya aya fu Yekova wee: “Ako Gbia Mbori! Mo ngére, mi aina nga waĩ ka fura te, bambiko mi nga kina paranga.” Yekova akido ko ya ndupai adunga ho tipa ko gunde te. (Yeremaya 1:6, 7) Teketeke a wa kina gure, pai ho ka ani gunde behe ho ani atambua Yekova ni te. Anga kerepai ho rengbe ka ye sa rani nga gu ka Yekova arengbanga ka diaha naabaha kusayo ya te.—Atambuahe 118:6.

21, 22. Tipagine i aringbisapa agu aparanga natambua Yekova ti ni kuti ndomo, na wai gu ringbisapa he re angarasa boro?

²¹ Ani nazungadi roni paranga aboro, tona awere kaa ndu kumbatayo: Ka oni dunga na ndundu ka tambua Yekova ya! Awere wa du oni niparanga, si nga gu bawene regbo kisusi tipa koda oni tironi na agu aboro namanga gu banyanyakipa sunge namanga awere auru kpotosende. Ka oni mangi wo, oni nika da nipapara iiriwo badona, nga ga agu aboro du ngbangbaturũ yo gbiati aguyo du auru kpotosende natambua Yekova. Yekova na ngbarago tiko mbiko oni dagba agi aboro re. Oni kparianga agi afugo ziazia toro adu kugiipa kehe re bake papara Atambuahe agumbaha fu Yekova: “Gamo aboro afú tiyo foro zaaza rago ngbe mo kumbatayo fu gamo rimbasa aborovura. Ni iiriwo ziazia yo, gamo ariivura nga ga paranga aboro adu wa ndomo naati ngbatutu wiso.”—Atambuahe 110:3, NW.

²² Anga ho ndomo naaki ni kurekure rogo nzere-uru wiso si nidu na bawene kpiaha tee? Si nidu nivovoho, kini ki imaima, na ka boro arengbanga ka gida bangehe ya mbikopa ngehe. Wogu Yekova abi roni nga gu ruru paranga aboro natambua ko rogo gi gbegberẽ aregbo re. Si tie ziazia nga, gaoni siapai kaa tambua Yekova nasa ngbaduko yo si ningi. (Asanza 27:11) Sidu tie, oni paranga aboro, oni naatambua Yekova zanga kpa ti mangaha!

Gaoni Karagapai Nga Gine?

• Gine nga bete nyanyaki nduapai tipa tambua Yekova?

• Gini kpiaapai du rogo Ziazia Kekeapai nayugo gupai nga paranga aboro rengbe arengba ka tambua Yekova ngba wene gene?

• Wai rengbe paranga aboro ka tambua Yekova areme?

• Gini regbo aparanga arẽ tipa tona tambua Yekova, na tipagine duhe ti ni wo?

[Gu kpiahe du ti kpewaraga 18]

Kangia oni na bawene bakurearoni ti ni duna iiriwo birĩ, ya mo oni furanga tipaha fu kura aboro tee?

[Gu kpiahe du ti kpewaraga 21]

Kangia oni naida ka mbakada gaoni sunge tungusapai, oni sana gu Dezire duna wene inohe tipa arugute