Yekova Nga ‘Bafu-mosoro Fu Agu Aboro Nagbata Ko’

“Gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.”​—AEBERE 11:6.

1, 2. Tipagine rengbe bete kura ga Yekova amoyambu ti ni kaa sota na iraira aberã?

DEE nga Barbaraa akusi gupai nga: “Mi awere nga ga Yekova Dezire tipa agarã mbembedii wa 30, ono mi aaberãnga ha ya rẽ mi arẽ tipa i yambu re wo te. . . . Zavura gupai nga, mi amangisunge ninazakigene na ki mangi kura dungu kparakpara asunge, anga guho sa dagbaha nawiringa si asa re mi idihe ngbadureyo nga, mi nirengo arẽ i niyambu re ni Dezire te.” Keith agumba aberã teketeke a wa kina gure nga: “Mi anaaberã gupai ti kura regbo nga mi arẽnga ni Dezire te, bambiko ga Yekova amoyambu na dungu nduapai beyo kadu na ngbarago, ono mi adunga wa yo te. . . . Gere ada ti gupai nga mi duna gu berã nga mi nga boro ingapai, nga gu tie nagbarasi apai kisusi.”

² Dungu ga Yekova ruru amoyambu, nga aguyo nadumbata gbiati aguyo du awere tibarayo dunduko, nasota na aberã wa kina gure teketeke. Oni adunga na berã wo ti kura regbo? Si rengbe kadu nga fudifudiapai namanga roni nidunguhe, baraho si awira gupai ni nga agu akuaroni nga aidipase naraka na ngbarago zanga fudifudiapai. Nisangbana gipai re, oni rengbe arengba ka berã gupai nga, Yekova aidanga na gaoni pai te na oni arẽnga tipa ko naaberãpa roni a te. Ka oni ya gunga niipo kuti gu digisopai nga wodu gipai re ya. Ziazia Kekeapai nakido rani niyaa: “[Yekova] apayasi nga pa gu gberangbi nga ga rungorungo boro ki sogo ho a te; ko aoka nga kpakpuko ti ni te, ono ho ni akpari ni fu ko ku ari, ko agi he.” (Atambuahe 22:24) Agu afugo nebi du tipa Masiya re nayugo gupai nga, Yekova agianga kina kungba gia ga gako ruru aboro akpee sa te, ono ko nafu mosoro afu fuyo a.

3. Tipagine adunga ani ti ni nibandabanda rani be agu ambugo nga ga gi zegino re ya?

³ Anga boro ho sa du nibandabanda ni be agu ambugo du rogo gi zegino re te, zavura kina ga Yekova aboro vurũ. Ani naraka rogo gu zegino du bazogoho nga bangbasia basogo Yekova, nga Satana Bakitingbanga. (2 AKorindo 4:4; 1 Yoane 5:19) Kuba gupai nga i du nibandabanda yo ngba iiriwo gene, nirengo, ga Yekova amoyambu nga bambata sásá nga ga Satana. (Eyobo 1:7-12; Yugoti 2:10) Sidu, daati kina ga Mbori ringbisiringbisi regbo, si naida ani “zádi pai azada rogo rungosi” na ki “kpátagara kuti kpe kindi,” kidu naa kido ya Yekova nangera angera fuo rani. (ARomo 12:12) Si aidanga ani mbugene fu agu ambugo nga ga gi zegino re si sa rani ani berẽ gupai nga nyemu rani ti gaani Mbori nga Yekova te te!

Gu Kpiaapai Nga ga Hipai Nadumbata

4. Oni funga bete kpiaapai nga ga gu ga Yekova ruru amoyambu nahi fudifudiapai.

⁴ Si aidi dungu agu amoyambu nga ga Yekova yo nadumbata hi fudifudiapai. Nikpiapai, Ana aduna “imisiri ngbaduse” bambiko ri angia irazangada, nga gupai ri aberẽhe nga si adu teketeke wa kina gupai nga bangiri Mbori aima go tiri. (1 Samuere 1:9-11) Baraho gu naimi-aboro nangia Nakindo Izebere aagbata Eriya ni, gunde azi ko na ko ki kparikpee fu Yekova ki yaa: “Ako Yekova, pai di be re; mo di ungare ti re awere; bambiko a nga mi ngba ti abuba te.” (1 Abakindo 19:4) Na si adu nga gu mokedi nangia Pauro aima duna bakere gberarago tiko be gako zangarengba ho ko agumba gupai ni nga: ‘Ho mi akpinyemu manga wenepai ni, kina gupai du nigbegberehe nidu kpotoreyo.’ Ko agbia gupai kuti ni nga: “Ako, rungorungo boro nga mi!”​—ARomo 7:21-24, oni ringbisinga ha na NW.

5. (a) Wai i afu mosoro fu Ana, Eriya, gbiati Pauro? (b) Gini wasa rengbe ani ka gbiaha be Fugo Mbori ka ani asota na iraira aberã?

⁵ Rengo ngaha nga, ani ima ino gupai nga Ana, Eriya, gbiati Pauro, i dunduko ahipai tingba ga Yekova sunge, na Ko ki fu mosoro fuyo kpaima. (1 Samuere 1:20; 2:21; 1 Abakindo 19:5-18; 2 Timoteo 4:8) Wa si avura du wo, i asota na ngbatunga agu asino berã dũ nafuda aboro, nga gu nakoda rungo, zingo du boro na maabangirise, gbiati gunde. Sidu, ka si iriwonga tirani ya, kangia ti kura aregbo ani nidu na fudifudi aberã rirani yo. Ono tie, ginipai rengbe oni ka mangaha baraho gu fudifudiapai nga ga raka asa roni ni oni duna bakabangirise kangia Yekova nakpinyemu roni akpi nirengo ke? Oni rengbe arengba ka gbia wasa be Fugo Mbori. Nikpiapai, rogo gu papara kekepai ye mbata fu gere, ani awisigipai tipa sangba Yesu nga Yekova ima gida ‘mangerirani nibasasa dunduko.’ (Matayo 10:30) Agu afugo nangarasa boro re nayugo gupai nga, Yekova na bakere nyemu gako amoyambu tiko wa duku yo nibasasa. Oni tingidinga pa ga Yesu yugopai na kpiapai a tipa abavurukporo. Ka si du nga, anga guru ho sa dagba gu rukutu azire re nati kusande zanga Yekova inipai tipa ru te, tipagine ka ko rengbe ti ni ka zanga berãpa gaoni fudifudiapai?

6. Wai rengbe Ziazia Kekeapai kadu nimburu fu wasa fu agu aboro nasovura na iraira aberã?

⁶ Ya mo si ni gupai rengbe arengba ka manga nga ani nga kpakpa aboro, pa rani gu kii akio bangiri gu Bakusiahe duna tanduapai dũ nga Yekova Mbori? Ii, si rengbe arengba wo! Nirengo, dungu kekeapai kinaho rogo Ziazia Kekeapai nanyakasa gipai re wo fu rani. Nidia ani agi afugo Ziazia Kekeapai re ku ngbaduraniyo kini berẽkuriihe, ani rengbe arengba ka karaga kina gu fugo nga ga bake apapara Atambuahe berewe nga gu nayaa: “Wa du sakapai ku kpotore yo ni badungu he, gamo wasawasa apai nangarãsa mbisimore.” (Atambuahe 94:19) Ani wisiginga bete agi afugo wasa du rogo Fugo Mbori re, nga agu afugo nika undo rani ani rugutirani wenengai gbe na gupai nga kiipa rani akio bangiri Mbori, na gu nga ko afu mosoro afu fu rani wa ani kaa manga gupai ko akpinyemuhe kindi.

Ga Yekova Kparakpara “Ũkumuko”

7. Gini sangbanebi nafu wasa Yekova afuhe kungba Maraki fu gu rikaaboro gayo mangaapai adu nigbegberehe re?

⁷ Wasiwasipai aamanga dagba aYuda rogo bisue kama agarã M.B.K. Aboromotumo anaadia gbarigbari anyaa kini fu ra nimotumo ri bamotumo fu Yekova. Abasapungbangaa anaangbe na kina kura aboro rogo sapangbangaa. Soroka, gumba ziree, mangaapai nibiriki, gbiati manga bäri arengbe na rago dũ. (Maraki 1:8; 2:9; 3:5) Maraki agumba iiriwo sangbanebi tipa gi rikaaboro gayo mangaapai adu nigbegberehe re. Si adu nga, Yekova akaraga gako aboro akaraga berewe na ko ki idi na gayo apai fuo bete regbo kusa. Ani nageda gupai tipa yo nga: “I adú ni gimi yo, wo poi Yekova nga ga arimbasa ko, ni boro gimi ũkumuko ti gu rago ho mi ka manga pai ni, mi abánda yo a wa boro nabanda awirini nga agu yo namanga pa ni.”​—Maraki 3:17.

8. Tipagine rengbe gupai arengba ti ni du rogo Maraki 3: 17 kadu tipa bakere rimbasa aboro?

⁸ Ga Maraki sangbaanebi na vovo digisidigisihe ti ni nibipa agu apai du tipa agu aKristano du nimbedimbediyo nitoro, nga gu rikaaboro du bangeyo nga 144,000. Gu rikaaboro re nirengo nga ga Mbori kparakpara “ũkumuko,” watadu agu “aboro du ni kina ga Mbori yo.” (1 Petero 2:9) Ga Maraki sangbaanebi rengbe arengba a ka ngarasa gu “bakere rimbasa aboro” nga aguyo “[rundu] barangba mbatabakindo, na barangba Wiri Kandoro, ni ukadiukadi yo ni pusi remu.” (Yugoti 7:4, 9) Agiyo re nga bangisa badona avusende sa na mbedimbedi aKristano, tiibe babanda avusende sa nga Yesu Kristo.​—Yoane 10:16.

9. Tipagine du ga Yekova aboro ti ni fuko nga kparakpara “ũkumuko” watadu rikaaboro?

⁹ Wai Yekova abi agu aboro sia gupai nga ka mangasunge fuko? A wa kparia ani he rogo Maraki 3:17, ko nabi yo rogo gu gene gu baagude nakpinyemu wirini naabi ni rogoho. Na oni kparianga gu bawene afugo tambuahe nga gu ko aringbisipa gako aboro rogoho kini ya tipa yo wee i nga gako kparakpara “ũkumuko.” Gu kura sasa-afugo nake gu fugo re wa gere, “kina boro ndikidi gimi ũkumuko,” “gimi kikii geno ũkumuko kisusi,” gbiati “gimi kikii geno ambia-fongo.” Tipagine rengbe Yekova ti ni kaa bi agu aboro namangasunge fuko na payo nikikiihe wa gure? Tipa ndupai sa nga, ko nga gu Mbori nafu tambuahe afu tipa gu weneapai aboro amangaha. (AEbere 6:10) Ko nambeda na agu aboro namangasunge fuko na ngbaduyo yo dũ na kini bi yo nikparakpara yo.

10. Wai Yekova abanda gako aboro?

¹⁰ Oni rengbe ka berãpa gu kikiipahe du beroni nga gu oni abipaha nikparakpara ũkumuko? Ya mo oni naaʹasadanga tironi ka bandaha tee? Yekova naamanga kina gu bangisapai re tipa gako kparakpara “ũkumuko.” Rengo ngaha nga, ko abandanga gako aboro be agu aʹasada gbiati gbegbereapai dunduko du rogo raka te. (Batungusipai 9:11) Ono Yekova rengbe arengba, na ko abanda gako ruru amoyambu abanda rogo toroyo. Ko naafu gu ome fuyo i aidaha tipa ka hi ngbatunga aʹasada dũ. (1 AKorindo 10:13) Sidu, Mose aya fu gu ga Mbori aboro nadumbata nangia aYisaraere wee: “Oni dú nyanyaki ki du na bakere erã. . . . Yekova gaoni Mbori nga gu ko nandu na oni, ko ahé nga unda roni te, ko ambú nga roni a te.” (Pa Fu Rugute ni Ue he 31:6) Yekova nafu mosoro afu fu gako aboro. I nga kparakpara “ũkumuko” fuko.

Yekova Nga ‘Bafu-mosoro’ fu Aboro

11, 12. Wai pa fu ani tambuahe fu Yekova tipa gako sunge nigaani Bafu-mosoro narengbe ka undo rani ani sovura kuti agu aberã nga ga kapa?

¹¹ Gu kura gopai nayugo gupai nga, Yekova nabi gako amoyambu na kikiipayo nga ko nafu mosoro afu fuyo. Ko aya fu aYisaraere wee: “Oni . . . asadi re na gi pai re, wo poi Yekova nga ga arimbasa ko, si ngia mi azá abangiri angbangbaturũ tipa roni ki uka maku ku ri roni ka ba adu nga tipa ha ya.” (Maraki 3:10) Niyangaraha, si nirengo nga, Yekova afu nyenye unga afu fu gako amoyambu nimosoro. (Yoane 5:24; Yugoti 21:4) Gi bakere mosoro ka i arengbanga ka maagenoho re ya, si nayugopa bakio ga Yekova nyemuse gbiati gako weneringise. Si nayugo gupai a nga, ko nabi agu aboro abi nirengo na kikiipayo nasia gupai nga ka mangasunge fuko. Pa wirika ani wai kaa bi Yekova nigu gaani Bafu-mosoro duna weneringise , si rengbe ka undo rani ani sovura kuti akapa dunduko tipa gaani pagume naako. Nirengo Yekova nangarasa rani ani nibi ko ni Bafu-mosoro! Pauro akepai ki yaa: “Gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.”​—AEbere 11:6.

¹² Rengo ngaha nga, ani namangasunge fu Yekova bambiko ani nakpinyemu ko angianga gbua mbiko kina gupai nga ko nakidohe ka fu mosoro fu rani ya. Wa vura duhe wo, pa dia ani gu maabangirise du tipa gbia mosoro ku ngbadurani yo niirairapai watadu nisino gbangbati te. (AKorosaio 3:23, 24) Bambiko ga Yekova nyemuse tipa agu aboro nagbata ko kakaka gbiati gu bakere kio payo du bangiriko, si nasako ko guari nibambata boro ka fuka amosoro fu yo.

13. Tipagine du gu mbakadapai ti ni nga ga tumorii nigu bakere gopai kisusi nibipa ga Yekova nyemuse tipa rani?

¹³ Gu bakerepai kisusi nayugopa kiopa gupai rengbe ngbatunga aboro ka mangaha kumbatayo du bangiri Yekova nga, gu mbakadapai nga ga motumo tumorii. Gu mokedi nangia Yoane akepai ki yaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Gu mbakadapai nga ga gu motumo tumorii nangia ga Yesu Kristo natagbagatihe na gu berã nga kiinga parani bangiri Mbori te watadu ko akpinga nyemu rani te. Nirengo, kangia Yekova atumo tipa rani na babakere geno wa gure, nga ka tumo na gu unga nga ga bangisa Wiriko, si nayugo gupai nga, ko nakpinyemu rani akpi nirengo nyanyakii.

14. Gine nayugopa wai Pauro abipa motumo tumorii?

¹⁴ Sidu, kangia gbegbere aberã tona kaa ye ku berã roni yo, oni berẽkurii pa motumo tumorii. Ii, oni bi gi gamahe re wa si tipa kina boro roni nitironi be Yekova. Gure nga gupai gu mokedi nangia Pauro amangihe. Oni tingidinga gupai ko agumbaha: “Ako, rungorungo boro nga mi!” Ono tie, Pauro asusi kumbatayo na fugo ki yaa: “Mi natambua Mbori mbiko Yesu Kristo gaani Gbia,” ko nga Yesu “nakpi nyemu re, ki fu tiko tipa re.” (ARomo 7:24, 25; AGaratio 2:20, gu kekeapai du nibibirihe na nikikindigihe re, ani du kehe wo.) Nipe Pauro gipai re, anga ko aakiisopa tiko akiiso te. Ono ko aduna kina gu kido sa nga pako akii akio bangiri Yekova nibangisa boro sa. Wa kina Pauro, oni tigaoni a duwa ka oni bi motumo tumorii wa gaoni gamahe nisaroni naye be Mbori. Anga Yekova gbua nga gu Batasi duna kina ome sa te ono ko a nga gu Bafu-mosoro duna nyemuse.

Oni Bandatironi be ga Satana ‘Birĩ Mangaapai’

15-17. (a) Wai Bakitingbanga amangasunge nibirĩ na iraira aberã? (b) Ginipai nafu ngara rengbe ani ka gbiaha be gu pangbangaa namangi Eyobo?

¹⁵ Wa vura duhe wo, oni awira bihe nikpakarakpakarapai ka ida gupai nga, agu awasa ga Mbori toro adu kugiipa ke paha du rogo Fugo ko, si nirengo tipa roni. Oni rengbe ka berã gupai nga, gu mosoro nga ga raka nyeanye kindi rogo ga Mbori vovo zegino, si nga gupai rengbe kura aboro arengba ka gbiaha, ono oni nzunzu arẽnga tipaha te. Kangia wogu oni aberãha, ginipai rengbe oni ka mangaha?

¹⁶ Zanga kapa, oni ima rugatironi naapa ga Pauro arugute fu aEfeso nga gu nayaa: “Oni úkadi ga Mbori [a]ũvura dunduko oni ki rengbe ka ru aru sa ga bakitingbanga birĩ.” (AEfeso 6:11) Baraho ani aberãpa ga Satana agene ni nga gu ko azio aboro ngbaha, ngbatunga agu ahe duwa aũzegino gbiati meteka nawira ka ye niipo ku berã rani yo na si ki ruaru wo. Dungu ga Mbori aboro aima ti rogo agi aʹasada re rogo agu aregbo nadumbata na gu du awere. Ono tie, ka bangirani ya gonga ti gu kura birĩ mangapai nga ga Satana ya, nga gako asadatise ka sa aboro i idi kuti gupai nga, Yekova Mbori akpinga nyemu yo te.

¹⁷ Bakitingbanga nga bangbasia boro birĩ rogo mangasunge na ngbatunga agu aberã re rogo gako asadatise ka nyaga aboro kusayo ti Yekova. Oni tingidinga fugo Biridada fu Eyobo nga gu nayaa: “Waĩ tie rengbe boro kadu ni ruru ni ku bangiri Mbori? Watadu waĩ ka gu boro du gigiri de avungu ni? Mo ngere, zavura diwi taa nga ima ru te, akerekuru agira nga bangiri ko a te; waĩ susi ga boro nga kina sooro! na wiri boro nga kina gbirẽ!” (Eyobo 25:4-6; Yoane 8:44) Ya mo oni rengbe ka berãpa wai agu afugo re afu gberarago fu Eyobo? Sidu ka oni ya mbunga gene fu Satana ko bagunde watadu ko bagberarago tironi ya. Rogo gu kura gene, oni rugutironi naapa ga Satana abirĩ tipa oni kidu na wingbaduse gbiati ome ka sovura nyanyakii gbe ka manga gupai du niruruhe. (2 AKorindo 2:11) Tipa Eyobo, wa si avura du nga Yekova arugusi gu iraira berã nadu bangiriko, Yekova afu maku watadu mosoro fuko tipa gako hipai nikaraga ahe fuko bakioho adu wa bara ue kuba agu paha agbere beko.​—Eyobo 42:10.

Yekova “Nga Bahe ti Kpotorani Yo”

18, 19. Wai du Mbori “nga bahe ti kpotorani yo,” na rogo gini gene ko ‘naini apai dũ’?

¹⁸ Rengo ngaha nga, si rengbe kadu nikpakarakpakarapai ka gbataka agu aberã kusayo nafu gberarago ka si du nga si ima maapai rogo gaoni berã yo nyanyakii. Ono, wa vura duhe wo, ga Yekova toro rengbe arengba ka undo roni tooni tooni oni dibe gu ‘nyanyaki apai . . . i naakiisaha kuti gu inahe nga ga Mbori.’ (2 AKorindo 10:4, 5) Baraho iraira aberã aida ni ka furii omeroni, oni berẽnga kurii agu afugo nga ga gu mokedi nangia Yoane nga gu nayaa: “Si ani ka ina ti ni ya ani nga ga rengo rani, ki zeresi kpotorani yo barangba ko, ti gu pai kpotorani yo akuadi ngbanga rani kuti ni; bambiko Mbori nga bahe ti kpotorani yo, ini api dũ.”​—1 Yoane 3:19, 20.

¹⁹ Gine nga tiiworo gu fugoyo nga “Mbori nga bahe ti kpotorani yo”? Ti kura aregbo, ani rengbe ka bira tirani ku kpotorani yo, gbe baraho ani ainopa gaani azangarengba ni gbiati gaani arungbura na ani kidu na gberarago. Watadu si rengbe kadu nga bambiko gupai du tipa gaani sino raka, ani nidu gbe na kina gbegbere aberã tipa tirani, si kidu wa anga pai ho rengbe ani ka mangaha Yekova ki idi nani te. Afugo gu mokedi nangia Yoane nanyakasa gupai fu rani nga, ga Yekova bipai kii kisusi gaani aberã! Ko nangera angera kugii gaani iraira mangaapai yo na kini bi gu ndikidi weneapai abi rengbe ani ka mangaha. Ko ima ino gaani ndu mangaapai a gbiati agu apai ani aberãpa mangaha. Davide akepai ki yaa: “Ko ini pa bororani; ko natingida pa rani ya nvutu sende nga ani.” (Atambuahe 103:14) Ii, Yekova ima ino rani gbe susi gu ini ani tirani!

“Kpakpari Ngbanya” na “ga [Ab]akindo Fongo Asiapaapai”

20. Ginipai ga Yesaya sangbanebi tipa karaga aYuda ku ringara kpuyo yo ayugoho tipa wai Yekova abi gako amoyambu?

²⁰ Rogo gu nebi yo nangia Yesaya, Yekova afu gu maabangirise nangia ga karagatise berewe ku ringara kpuyo yo fu gu gako aboro nadumbata. Ho i aziyo ni ki ga naayo ku Babera yo, gi fugo wasa gbiati kidohe re nangia gupai nzunzu agi aboro nadu na gberarago tiyo re aaidaha! Ningera Yekova kumbatayo kuti gu regbo si adu nga aYisaraere akaragatiyo berewe ku ringara kpuyo yo, ko ayaa: “Oni adu ni kpakpari ngbanya bakindo ku be Yekova, ni ga [ab]akindo fongo asiapaapai a ku be gaoni Mbori.” (Yesaya 62:3) Yekova aukadi gako aboro na kikii gbiati irisa na agi afugo re. Kina gu bangisapai re a ko namangihe tipa gako rikaaboro nga agu aYisaraere nga ga toroyo areme. Si wa ka i ya ko akiisi payo bakere gbe tipa aboro dunduko fu irisa fuyo.

21. Wai rengbe oni kadu naa kido nga Yekova afu mosoro afu fu roni tipa gaoni gbanga hipai?

²¹ Baraho du bambata digisidigisi gi sangbanebi ni re rogo mbedimbedi aKristano yo, si nayugopa gu kikí Yekova afuhe kurii agu aboro dũ namangasunge fuko. Sidu, ho du oni ni na agu berã nga ga kapa singia Yekova naida na gaoni pai, oni tingidi gupai nga, zavura gupai nga kpakpa boro nga oni, paroni rengbe arengba ka kio bangiri Yekova wa “kpakpari ngbanya” na wa “ga [ab]akindo fongo asiapaapai.” Sidu oni naandu kumbatayo kindi ka sa ngbaduko si ningi nimanga oni kakaka asadatise kaa manga gupai ko akpinyemuhe. (Asanza 27:11) Nimanga oni he wo, oni rengbe kadu naa kido ya Yekova afu mosoro afu tipa gaoni gbanga hipai!

[Gu rukutu kekeapai du bandu kpewaraga yo]

Oni Natingidaha?

• Wai du ani nikparakpara “ũkumuko” fu Yekova?

• Tipagine duhe ti ni ninyanyakipa pai ka bi Yekova ni Bafu-mosoro?

• Gini ‘mangaapai nibirĩ ’ nga ga Satana si aida ani bandatirani bahe?

• Rogo gini gene du Mbori ni “bahe ti kpotorani yo”?

[Gu kpiahe du ti kpewaraga 23]

Pauro

Eriya

Ana

Fugo Mbori na agu aberã rogoho kpaima nafu wasa