Ada Nika Bata Rogo Ga Yekova Uru?
‘Gu uru re naye nga gu nagbi wa gbigiwi.’— MARAKI 4:1.
1. Wai fugo Maraki aringbisapa digido gi gbegbere zegino re?
MBORI asa gu nebi nangia Maraki ko ke asangbanebi tipa gu iiriwo apai nika manga bambeda kumbatayo. Agi apai re nika kura sa aboro dunduko auru kpotosende. Maraki 4:1 afura kumbatayo ki ya: “Oni ngére, bambiko rago nikaye, si agbí wa gbigiwi, ho airaenda ka du ni wa kakarika na amangi gbegberẽpai dũnduko; gu rago nikaye azókoda yo, wo poi Yekova nga ga arimbasa ko, si du si ambú nga tarãha fu yo na behe a te.” Wai i ka gbarasa gi gbegbere zegino re dunduko? Si adu wa kina gu ngua gbarasi yo taraha ka si arengbanga berewe ka kura ya.
2. Wai gu kura averesi aringbisapa ga Yekova uru?
2 Oni vura sanahe ki ya, ‘Gini “uru” gu nebi nangia Maraki afura tipaha?’ Si nga kina gu bangisa uru gumba yo paha rogo Yesaya 13:9, nga gu nayaa: “Mo ngére, gu rago nga ga Yekova naye, ni kere he, na dingidingi ngbaduse na ngariangaria zinga, ka sa kpotosende ni ngbakungba na ka gbarasa aboro ingaapai rogo ho.” Zefania 1:15 naringbisapa gu uru re niyaa: “Rago dingidingi ngbaduse nga gu rago re, rago fudifudipai na rago dungbapai, rago gbarasahe na rago pa kungbaahe, rago bitimo na rago du iyo, rago adubo na nduunduu bitimo.”
“Bakere Gberãngbi”
3. Gine nga ‘ga Yekova uru’?
3 Rogo bakere digisidigisi sangba gu nebi nangia Maraki, ‘ga Yekova uru’ nga gu uru i ka inoho ti “bakere gberãngbi.” Yesu afura kumbatayo ki ya: “Bambiko ni gu rago re bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Matayo 24:21) Oni berẽnga pa gu fudifudiapai zegino naima gbiaha, natona rogo gu garã nangia 1914. (Matayo 24:7-12) Oni ngere, Ue Vura nga ga Zegino nisaha aimi aboro bangeyo asusi amirioni 50! Wa vura duhe wo, aboro nika bi gu banaru apai ti regbo “bakere gberãngbi” kii kisusi gure nga gu nika sa gu fudifudiapai namanga yo awere re ni kina kungbo rukutu apai gbua. Gu bakere gberangbii re, du a nga ga Yekova uru, adigo na Aramegido, kini digisi gi gbegbere zegino re.—2 Timoteo 3:1-5, 13; Yugoti 7:14; 16:14, 16.
4. Ho ga Yekova uru nika digo ni, ginipai nika ima manga ti gu regbo re?
4 Ti digido gu uru nga ga Yekova re, ga Satana zegino na agu aboro nasongodaha aima duni gbarasigbarasi yo. Guhe nika go mbata nga zire pambori. Fuo gure, Yekova ki zaki gako zinga kurii gu ga Satana riigbu nangera fuo mosoro na kurii gu sino mangaapai nga ga birĩ zogarago. (Yugoti 17:12-14; 19:17 ) Yezekere agumba sangbanebi ki ya: “I bafu gayo feda ku ngba agene bakporo, gayo dahabu du wa birikobiriko he; gayo feda na gayo dahabu arengba nga ka batasa yo rago gu uru nga ga ga Yekova dingidingi ngbaduse te.” (Yezekere 7:19) Nibipa gu uru re, Zefania 1:14 nayaa: “Gu bakere rago nga ga Yekova du mbembedi, si mbembedi ki niipisi tihe gbe.” Nibipa gupai Ziazia Kekeapai agumbaha tipa ga Yekova uru, si naida ani diberã ka mangapai na ngbanya kuti gupai Mbori akpinyemuhe.
5. Gine agu aboro nagunde ti rimo Yekova agbiaha?
5 Fuo si fura tipa gupai ga Yekova uru nika manga ga Satana zegino nani, Maraki 4:2 nake fugo Yekova niyaa: “Ono tipa agu roni nagunde ti rimore uru rurupai akúra fu roni na ngua husa aboro ti[i] he. Oni akúra ki niguku wa wiri abagara.” Gu “uru rurupai” re nga Yesu Kristo. Ko nga “gu imarago [nga ga toro] nga ga zegino.” (Yoane 8:12) Yesu nahasarago rogo gu gene nga ga husa aboro, bambataha nga, husa aboro rogo toroyo nga gu ani abi abi areme, fuo gure, ko ahusa akaza kpotose dunduko rogo vovo zegino. A wa Yekova agumbaha, agu aboro i ka husa yo “akúra ki niguku wa wiri abagara” ki duna ngbarago mbiko i ima husa yo be agu apai nazi yo ku bayo.
6. Gini pumbo nga ga diabese ga Yekova amoyambu nika gbia ngbarago behe?
6 Ginipai nika manga agu aboro nabasa gupai Yekova akpinyemuhe? Maraki 4:3 nayaa: “Oni asímba gbegberẽ yo ku sande, bambiko i adú wa kuke kpanduroni yo, ni gu rago mi ka manga pai, wo poi Yekova nga ga arimbasa ko.” Agu airisi Mbori nga aboro akodanga beyo kuti sunge gbarasa ga Satana zegino nga gu nika manga te. Gu fugo nga, “[i] asímba gbegberẽ yo ku sande,” si nga fugo sanza du rogoyo nga, i adu pati gu pumbo nga ga diabese nga gu i ka mangaha fuo nyasa ga Yekova uru. Bakere pumbo nga ga diabese aima manga mbata kusayo fuo i gbarasi ga Faro aborovura rogo Zamba Baime. (Gate 15:1-21) Pa dia Satana na gako zegino kusayo ti regbo bakere gberangbii asa gupai nga i mangi pumbo nga ga diabese tingbafuo ho. Gu ga Yekova ruru amoyambu nika bata rogo ga Yekova uru apaa kuari niyaa: “Ani dú na ngbarago ki ningi rogo gako bata.” (Yesaya 25:9) Nga gu bakere ngbarago nikangia ha ho i ka dia gbarasarimo ni kusayo ti ga Yekova bakere pagbia na ki girisi kpotosende tipa aboro raki na pazereda auruhe!
Agu Aboro Du Rogo Ngbiiakristano Nawirika AYisaraere
7, 8. Oni ringbisinga pa wai aYisaraere adu rogo toroyo ti regbo Maraki.
7 Agu aboro naye kini mangi pagume na Yekova nga aguyo namangasunge fuko, i kia ti aguyo adunga na gu pagume re beyo ya. Kinawo si adu ti gu regbo Maraki ake gako buku. Rogo gu garã nangia 537 Mbata fu Gaani Regbo, i akaraga yangara aYisaraere ku ringara kpuyo yo fuo i zi yo tipa agarã 70 ku Babera yo. Ono tie, rogo gu kama agarã naye fuo gure, gu rikaaboro i akaraga yo ku ringara kpuyo yo re atona kaa nyaga tiyo kurogo samungu kuti ndikidi pambori na kini mangi gbegbereapai. Dungu aboro dagba yo aawasi rimo Yekova, kini basa gako ruru andiko, kini birikosi gako yekaru nitumo yo na agu anyaa nangia airavurari, gbarigbari ra, na agura nadu na kaza, na ni mbu yo agu adia yo i amangi rogatise na yo ngba paranga yo.
8 Ni sangbana gupai re, Yekova aya fuyo: “Si du mi ambéda ti ni koyo du oni ni tipa sarangbanga; mi ki du ni ipiipi dezire kuti airasoroka, kuti airabari, kuti agu yo nazunga he ni zire, kuti agu yo narungosi ngbengbe boro sunge rogo pa gani mosoro, na dekurugbo na wirinyaure, na kuti agu yo natura yeye boro [kusayo], ka i agunde nga ti re ya . . . ‘Bambiko mi nga Yekova mi asa nga pa re wa sa te.’ ” (Maraki 3:5, 6) Wa si avura du wo, Yekova aayamba agu aboro dunduko nasa berã ti gayo gbegbere agene: “Oni káraga tironi kono du mi ni, mi ki karaga tire koyo du oni ni a.”—Maraki 3:7.
9. Wai sangba Maraki aduna bambata digisidigisihe?
9 Agu afugo re adu a nidigisidigisihe rogo bambata kama agarã ti Gaani Regbo. Yangara aYuda amangisunge fu Yekova na ki da ni papara vovo “rikaaboro” nangia mbedimbedi aKristano, nga aguyo nakodi aGendiria kusa. Ono bakere bange ndikidi aYisaraere agindigo Yesu. Si du Yesu aya tini fu aYisaraere wee: “Oni ngére, i he gaoni kporo fu roni ni bate.” (Matayo 23:38; 1 AKorindo 16:22) Rogo gu garã nangia 70 ti Gaani Regbo, a wa i aima gumbaha kumbatayo rogo Maraki 4:1, gu ‘uru nagbi wa gbigiwi’ aye kurii ndikidi aYisaraere. I agbarasi Yerusarema na gaha yekaru, na i naya aboro susi mirioni sa nakpiki be bakere gomoro, be gu vura nangaria be nyemu zoga aboro akurayo, na be agu abanzengere nangia aRomo. Ono tie, agu aboro namangisunge fu Yekova abati rogo gu gberangbii re.—Marako 13:14-20.
10. Rogo gini gene agu aboro du areme dunduko gbiakuti abarumbatayo rogo pambori awirika agu aYisaraere nadu rogo bambata kama agarã?
10 Ngbatunga aboro, na gbe, agu aboro du rogo Ngbiiakristano awiriki gu kpiapai nangia ga gu rikaaboro nangia aYisaraere rogo bambata sa kama agarã. Abarumbatayo rogo agu akanisa nga ga Ngbiiakristano gbiati agu aboro du rogoho naida na kina agu aida nga ga gayo apambori angianga gu rengo nga ga Mbori Yesu ayuguhe ya. Agu aboro gbe si aida i bira yo nga abarumbatayo rogo pambori. I aidanga ka mangasunge na rimo Yekova te, na i nadiaha kusayo a rogo gayo sasa afugo nga ga Ziazia Kekeapai. I nawasi Yekova na gu yugopai adunga mburuhe rii Ziazia Kekeapai ya, wa ngbatunga gu ga apagano yugopai nga ga rungosi aboro nyeanye kindi rogo we-iferno, ya Mbori nga Tirinita, ya mbisimo ni guhe zanga kpio, na gu nga ahe akuru nisaha. Rogo gi gene re, i kini bengete Yekova na gu irisa rẽ ko nani, a wa aboromotumo abengete ko nani ti rago Maraki.
11. Wai agu aboro du rogo agu apambori du rogo zegino ayugo da i amangasunge funi?
11 Ho yangara arame atona ni rogo 1914, agi apambori nga ga zegino nga gu agu aboro nayaa tipa tiyo i nga aKristano anungusaha re, ayugu da nzunzu i aamangasunge funi. Ti regbo agu avura ue nangia ga zegino, i angarasi agu aboro du rogo gayo apambori i ndu sa vura nga gu vura i asoho mbiko gu zanga giatise nadu dagba aringara na akuraha, ka si vura ida i imi agu aboro du rogo bangisa pambori na yo vurũ. Fugo Mbori nayugo agu aboro zukazuka nagiasangba Yekova na aguyo agianga ha ya: “Si nayugo awiri Mbori, na awiri bakitingbanga. Gu ni ka amanga nga rurupai ya ga Mbori ni nga ni te, na gu ni adu nga nyemu wirinani ti ni ya. Bambiko gi nga gu pangbanga oni agi ho pai aenge ni re, ya nyemu akuarani du ti rani; wa Kaina adu ni ga gbegberẽ ko ko ki imi wirinako te.”—1 Yoane 3:10-12.
Gu Sangbanebi Nadigo
12, 13. Gini asangbanebi ga Mbori amoyambu nadigisihe ti gi gaani regbo re?
12 Baraho Bambata Vura nga ga Zegino adigi ni rogo 1918, ga Yekova amoyambu arengbe ka bi gupai nga Mbori aima gbarasa ngbanga fu agu aboro nadu rogo Ngbiiakristano na fu gu kura zire apambori dunduko. Natona ti gu regbo re ka ndu kumbatayo, i anazinahe fu agu aboro nadu na ruru ngbaduyo yo niyaa: “Oni kúru yo du ri ni, gimi aboro, ka gaoni ngbanya dú nga na gari ingaapai ya, oni ka dia gari gberãngbi; bambiko gari ingaapai ada kina ku ngbangbaturũ yo, Mbori ki tingidi pa gari irairaapai.” (Yugoti 18:4, 5) Agu aboro nadu na nyemu mangasunge fu Yekova, i atona ka giriso yo ti agu abiriko nga ga zire pambori, na i ki susi kumbatayo na sunge tungusa wene pangbanga rogo zegino dunduko nga pangbanga gu Kindo i aima sigiraha, nga gu sunge si aida i nyasihe mbata fu digo gi gbegbere zegino re.—Matayo 24:14.
13 Gipai re amangi ka digiso gu sangbanebi du rogo Maraki 4:5, nga gu Yekova aya rogoho wee: ‘Oni ngére, mi akéda Eriya fu roni nga nebi mbata gu bakere iiriwo uru nga ga Yekova nika ye.’ Agu asangbanebi re aduna bambata digisidigisihe rogo gu sunge nangia ga Yoane bafu Bapatiza, nga guko Eriya aayugo pako kumbatayo. Yoane amangi gu sunge nadu wa ga Eriya ho ko anabapatizi aYuda ni nga aguyo nasa gayo berã ti agu aingapai i amangihe kuti gu mokido nangia ga Ndiko. Gu nyakipaha gbe nga, Yoane angia bambakadi gene fu Masiya. Ono tie, ga Yoane sunge adu gbua nga tonatona digisidigisi sangba Maraki. Baraho Yesu aayugo Yoane ni ni gu ue Eriya, ko ayugu gupai nga, kura sunge wa ga “Eriya” adu kinaho kumbatayo kindi.—Matayo 17:11, 12.
14. Gini nyanyakipa sunge du wa ka i mangihe mbata fu gi zegino re digi?
14 Gu sangbanebi nga ga Maraki ayugu gupai nga, gi bakere sunge nga ga Eriya re amanga mbata fu “gu bakere iiriwo uru nga ga Yekova.” Gu uru re adigo ti regbo gu vura nambeda ni kina boro ipo nika manga rogo gu uru nga ga Mbori nga guko duna Tanduapai dũ ti regbo Aramegido. Gere nayugo gupai nga, gu sunge du wa gu nangia ga Eriya nika ye mbata fu digo gi gbegbere zegino re na mbata fu tona gu Zogarago Tipa Agarã Kutu nga ga ga Mbori Kindo nga ga ngbangbaturũ tiibe Yesu Kristo i namoi ko ku auru mbatabakindo. Nirengo, apai namanga areme na ngbanya kuti gu sangbanebi re, mbata fu Yekova gbarasi gi gbegbere zegino re, gu vovo riko du areme nga ga Eriya, kodihe kuti agu amirioni aKristano duna gu maabangirise nga ga raka auru kpotosende namanga gu sunge zaaza nga ga karaga ziazia irisombori kubaha, kini taasirimo Yekova na kini yugu agu arengo nga ga Ziazia Kekeapai fu agu aboro du wa avusende.
Yekova Nafu Maku fu Gako Amoyambu
15. Wai Yekova atingidapa gako amoyambu?
15 Yekova nafu maku fu agu aboro namangasunge fuko. Maraki 3:16 nayaa: “[Ti gu regbo re] agu yo nagunde ti Yekova i ki nigumba pai dagba yo dedede; Yekova adege tuko ki nigi pa yo, i ake pai rogo kitabu tingidapai bara bangiriko tipa agu yo nagunde ti Yekova ki niberẽ pa rimoko.” Ka pepai ni sanza, natona ti Ebere, Mbori aima digo ni keke rimo aboro kurogo buku nga agu aboro ko ka tingida payo ka fu nyenye unga fuyo. Yekova naya fu agi aboro re wee: ‘Oni yé na sa dagba bawe nga ga rũhe dunduko ku baigaahe yo, ya riahe duho rogo gimi bambu; oni ki asadi re na gipai re ka bi singia mi azanga abangiri ngbangbaturũ fu roni ki uka amaku kuri roni ka ba adunga tipaha ya te.’—Maraki 3:10.
16, 17. Wai Yekova nafu maku fu gako aboro rogo gayo sunge?
16 Yekova ima fu maku nirengo fu agu aboro namangasunge fuko. Rogo gini gene? Gene sa nga ko ima kiiso gayo giarogopai yo tipa gako aringbisapai. (Asanza 4:18; Daniere 12:10) Gu kura gene nga ko sa gayo sunge tungusapai si duna zuzuhe tini kpaima. Dungu agu aboro duna ruru ngbaduyo yo ima kodatiyo kuti yo rogo ndikidi irisombori, na i dunduko nada ni ‘bakere rimbasa aboro dagba rikaaboro dunduko, na angbatunga yo, na aboro, na angbatunga afugo dunduko. I kini poi ni bakere fugo, niyaa, “Gaani bata ye be gaani Mbori nga guko sungu auru mbatabakindo, na be Wiri Vusende a!” ’ (Yugoti 7:9, 10) Gi bakere rimbasa aboro re aima kura gbaiga rogo iiriwo gene, na agu aboro namangasunge awere fu Yekova zaaza bangeyo ima susa amirioni sita rogo adungurati susi 93,000 rogo zegino dunduko!
17 Ani nabi ga Yekova maku a rogo gupai nga, aDezire Yekova nakusa agu abuku du amburuhe rii Ziazia Kekeapai nga gu kparaka yo ho kisusi kura abuku dunduko wa rago aenge. Wa du rago re, i nakusa awirina agu amagazini nga Ngbaõbambu Sinziri na Awake! nga amirioni 90 rogo adiwi nibasasa, Ngbaõbambu Sinziri rogo afugo 141, Awake! tigaha rogo afugo 87. Bange agu abuku nadu tipa wisigo Ziazia Kekeapai nga The Truth That Leads to Eternal Life, nga gu i akusihe rogo gu garã nangia 1968 na fuo gure i ki kparakaha, asusi amirioni 107 rogo afugo 117. Bange gu nga You Can Live Forever in Paradise on Earth, nga gu i akusihe rogo 1982, asusi amirioni 81 rogo afugo 131. Bange gu nga Gu Inohe Nandu sa Nyenye Unga nga gu i akusihe rogo 1995, ima susa amirioni 85 wa du rago re na rogo afugo 154. Bange gu burosua nga Gine Mbori Akpinyemuhe be Rani? nga gu i akusihe rogo 1996 na ki tona ka kparakaha ima da awere ti amirioni 150 rogo afugo 244.
18. Tipagine ani agbia ngbarago tini be gu zugo ahe wenengai nga ga toro aboro ki vura ni rungosi rani vurũ?
18 I aima digo nigbia ngbarago be gi zugo ahe wenengai nga ga toro re kere rungosi na yososo sogote yo ki vura nimangi be ga Satana zegino vurũ. Gipai re nayugo fugo Yesaya 54:17 ni parengo, nga gu nayaa: “Gu ũvura i ka mbakada ha kuti ro si adía nga be ro wa sa te, gu mirã aboro dunduko nikazinga kuti ro rago sarangbanga mo akíta ngbanga ha akita. Gere nga gu pai nikadu tipa agu amoyambu nga ga Yekova yo, na gayo rurupai nga gu du mbiko re, mi nga Yekova poi wo.” Nga gu ngbarago ngaha fu ga Yekova amoyambu ka ino gupai nga, bakere digisidigisi sangba Maraki 3:17 nadigo kuriyo: “I adú ni gimi yo, wo poi Yekova nga ga arimbasa ko, ni boro gimi ũkumuko ti gu rago ho mi ka manga pai ni.”
Mangasunge fu Yekova na Ngbarago
19. Wai du agu aboro namangasunge fu Yekova kia ti agu aboro amanganga sunge fuko ya?
19 Wa regbo asusa, gu kparakparapai du dagba ga Yekova ruru amoyambu na ga Satana yo niyuguyuguhe gbaiga. Maraki 3:18 afura kumbatayo tipa gipai re ki ya: “Oni ayéga berewe ka kparaka dagba rurupai na gbegberẽpai, na dagba gu boro namanga pa Mbori na gu boro amanga nga pa ko ya.” Gu sa dagba agu apai nakpara agi aboro re i du kia kisusi nga, agu aboro namangasunge fu Yekova namangaha na bakere ngbarago tiyo. Gu sa dagba gu nduapai nasa yo i duna ngbarago nga gu iiriwo maabangirise du yo nani. I nakido kuti Yekova na ngbaduyo yo dunduko ho ko aya ni: “Mi mangi vovo angbangbaturũ na vovo kpotosende a; i atíngida nga pa gu bambata apai te si ayé nga ku berãyo yo a te. Ono oni dú na ngbarago ki ningi nye anye kindi tipa gu pai mangi mi he re.”—Yesaya 65:17, 18; Atambuahe 37:10, 11, 29; Yugoti 21:4, 5.
20. Tipagine du ani tini nga agu aboro ngbaa rago tiyo kisusi?
20 Ani ima ida kuti gu ga Yekova mokido nga, gako ruru aboro abata abata rogo gako bakere uru na ko arimiso yo arimiso kurogo gako vovo zegino. (Zefania 2:3; Yugoti 7:13, 14) Na wa vura duhe nga, mbata fu gu regbo re bete kura aboro kinaho nika kpiko mbiko gbinza, kaza, watadu beno, Yekova nafura tipa zingisa ko yo i raki nyeanye kindi. (Yoane 5:28, 29; Tito 1:2) Sidu, wa vura duhe nga, ani dunduko duna fudifudiapai kina tini gbiati kpakarakpakaraapai ani ambu behe wa ani apido gi ga Yekova uru re, ani na wiri nduapai dunduko berani ka duni agu aboro du ngbarago tiyo kisusi kura aboro dunduko auru kpotosende.
Gaoni Karagapai Nga Gine?
• Gine nga ‘ga Yekova uru’?
• Wai agu apambori nga ga zegino awirika agu aYisaraere nadu mbata?
• Gini asangbanebi ga Yekova amoyambu adigisoho?
• Wai Yekova nafu maku fu gako aboro?
[Gu kpiahe du ti kpewaraga 29]
Gu Yerusarema nadu rogo bambata sa kama agarã ‘agbi wa gbigiwi’
[Gu kpiahe du ti kpewaraga 32]
Mbiko gayo iiriwo maabangirise, ga Yekova amoyambu na ngbarago tiyo nirengo