Gini Undo Duho ti Du Boro Niruru Ni fu Akurani?

ANDIRIA aya fu bakureako nga Petero wee: “Gu marã mo azioho awere rogo gu basunge mo amangasunge rogoho re, si akionga te. Ka mo ndu ka zio sunge rogo kura basunge, mo agbia marã agbia nibakerehe ti gure.” Petero akaragapai fuko ki yaa: “Gupai mo agumbaha re, si rengbe arengba kadu nga rengo, ono mi aima digo nimangisunge fu agi aboro re tipa dungu agarã. Wo i naaundo re, sidu mi naida ka kakuti manga kina rurupai fuyo.” Andiria akaragapai fuko ki yaa: “Kakuti manga rurupai nga wene sino. Ono wa vura duhe wo, si nabengeta ro na marã!”

Kina rengo Andiria apehe. Dedede, kakuti manga rurupai fu boro watadu ranigose fu kura boro nabengeta ni abengeta na marã watadu si nadia marã adia beni.a Na berewe a, si naida regbo, ome, gbiati nunga akurase ka futise tipa ka mangapai niwenehe. Ya mo wee rẽhe arẽ wo ka kakuti manga rurupai fu akurase?

Tambuaha Kii Kisusi Ono Ngenga Amangihe Te

Rogo gu wisigopai riigbu sa amangihe Germani yo tipa weteka gu bipai nga ga aboro, gupai i abihe nga, 96 rii kama dagba agu aboro nakaragapai sani nabi padu niruruse niwene sino. Gu ue wisigopai gu riigbu re amangihe dagba agu aboro tona garãyo ti 18 dakuti 24 ayugu gupai nga, 2 dagba 3 nga ga bange agu aboro nakaragapai sani aberẽ gupai nga, padu niruruse nga “wenepai,” wa ka i ya, i abihe ni gupai ngbaangba.—⁠Allensbach Opinion Research Institute.

Wa vura duhe nga aboro natambua padu boro niruru ni ya si nga wenepai, watadu pa ra boro na goni fu kurani, si nidu nigu kurapai kia baraho daha ni nirengo tipa boro mangi rurupai fu kurani watadu ka ra na goni. Nikpiapai, rogo dungu aringara Putu yo, arogotise watadu aborokporo dedede naayugo sino du niruruse tooni gbua dagbayo. Abakure a niruru yo koyo du abadiangbayo ni te. Na gu padu niruruse nadumbata nanaabanda gu kodatise nadu dagba abamangisunge na gayo abairasunge watadu dagba ababagaahe na agu aboro nangbeka ahe rogoho, si aima go, si awere berewe te. Tipagine?

Ti kura aregbo, gu gbarakagbarakaapai nga ga raka nambu kina bete regbo watadu kina bete ome gbua fu boro tipa ni fu tini tipa ka manga agu asunge padu niruruse aidaha. Isoke agu aboro akurayo afu gberarago fuyo na gayo pagume ki ima zera dagbayo na kura aboro, i awere dindikodindiko tipa du niruru yo fu aboro. Aguyo rengbe ka sia kina gu raka nga, yangara gimi mi amangaha areme, gba mi adunga ho ti ni te, nga gu ngbatunga raka aidanga boro du niruru ni fu kurani ya.

Ka si vura du wai vurũ, ka boro kuti manga rurupai nigu beedipai aboro atambuapaha dedede gbe kisusi manga yo ho. Sidu, wa duhe nga wo du gipai re, ani wisiginga agi asanahe naye re: Ya mo si nafu undo ka kakuti manga rurupai fu kura aboro? Ka si du wo, da si aida ani du niruru rani funi, na rogo gini agene? Gini aundo watadu amamu du tipa ranigose, watadu du niruruse?

[Gu rukutu kekeapai du bandu kpewaraga yo]

[Gu kpiahe du ti kpewaraga 3]

Du niruruse nigu beedipai aboro atambuapaha dedede gbe kisusi manga yo ho