Giarogo Agu Apai Du Rogo Ziazia Kekeapai Yo​—Si Nigupai Rengbe Oni Arengba ka Gbia Ngbarago Behe

ZIAZIA KEKEAPAI na nyanyakipa arengo rogoho yo nga gu naye be Mbori. Si nayugo ndu gupai furani ani araka ti ni, ndu gupai aboro arungo ti ni, na gupai nika manga kumbatayo tipa ngbatunga aboro. Si nayugo wai furani rengbe ani ka gbia ndikidi ngbarago, wai rengbe ani ka zio wene abakure, na wai rengbe ani ka mbakada gaani fudifudiapai ngba ruru gene. Gupai nyaki paha gbe nga, ani nawirikapai rogoho tipa Bakusirani nga Yekova, nga gu Barani du ngbangbaturũ yo. Ngbatunga gu inohe re nasa rani ani duna bakere ngbarago na ani ki ini ndu gupai ani araka ti ni.

I narigisapa gbia gu inohe du tipa Mbori rogo Ziazia Kekeapai kuti ririahe. Yesu ayaa: “Boro anye nga ni ungani mbiko kina riahe [sa] te, ono mbiko agu apai dunduko naye ngba Mbori yo.” (Matayo 4:4; AEbere 5:12-14) A wa nyakipa ri gu riahe nazambuasi kpoto rani na aʹuru dunduko tipa ani naaraka, kinawo a nyakipa geda ani Fugo Mbori dedede tipa ka gbia undo be gu ga Mbori kidohe du tipa nyenye unga.

Ani nagbia ngbarago be ririahe bambiko Yekova amangi rani ani naagbia ngbarago behe na bambiko si nanyasa gu gomoro ninaamanga rani. Ono tie, gu kura nyanyakipa pai kinaho si aida ani nyasi nani mbata ka ani aida ka gbia ngbarago. Yesu ayaa: “Aboro ngbarago nga agu aboro inipa gu gayo azingo nga ga toro.” (Matayo 5:3, NW) Ani rengbe arengba ka gbia ngbarago rogo raka yo, na ani rengbe arengba ka nyasa na gu gaani zingo nga ga toro nigia ani rogo Fugo Mbori yo wenengai.

Rengo ngaha nga, bete kura aboro naberãha nga si nikpakarakpakaraha tipa ka giarogo agu apai du rogo Ziazia Kekeapai yo. Nikpiapai, oni rengbe ka ida i undo roni tipa oni girogo gu papara Ziazia Kekeapai nafura tipa agu asino oni ainongo pai tipaha ya watadu gu kekeapai du nimasaku. Na berewe, gu kura sangbaanebi kinaho i akehe na agu afugo narukuba kura apai nga gu rengbe oni ka giarogoyo kinaho ka oni gbata kura averesi ni rogo Ziazia Kekeapai nga gu nafura riipa kina gu riipai re. (Daniere 7:1-7; Yugoti 13:1, 2) Wa vura duhe wo, oni rengbe arengba ka giarogo agu apai du rogo Ziazia Kekeapai yo nirengo. Wai rengbe oni ka rugatironi na gupai re ya si rengbe arengba ka manga wo?

Gu Ngbarago Rengbe Aboro Dunduko ka Gbiaha

Ziazia Kekeapai nga Fugo Mbori. Rogoho yo Mbori ape gupai ni furani ko akpinyemuhe. Ya mo ka Mbori arengbe ka fu gu buku furani ani arengbanga ka gedaha ki girogoyo ya watadu kina agu aboro wirikipai rogo kikindigi asukuru narengbe ka giarogoyo? Oó, Yekova aarengbanga kadu na ngbatunga gu gbegbere sino re te. Kristo Yesu ayaa: “Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni? Ka ni sana he tipa parakondo ni ki fu ngerembia fu ni? Wa du oni tigaoni nga gbegberẽ aboro ki ini pa gama wene ahe fu awironi, anga gu Baroni du ngbangbaturũ yo ko susi na gama Ziazia Toro fu agu yo nasana ko, te?” (Ruka 11:11-13) Ngba gi gene re, oni rengbe ka rugatironi na gupai nga, oni rengbe arengba ka giarogo agu apai du rogo Ziazia Kekeapai yo, na ka oni sana Mbori nirengo rogo kparakpee, ko fu gu undo afu furoni oni aidaha tipa ka giarogo Fugoko yo. Nirengo, zavura agude a, i rengbe arengba ka giarogo gu bangua yugoapai nga ga Ziazia Kekeapai!—2 Timoteo 3:15.

Wa vura duhe nga si naida bakere asadatise tipa ka giarogo agu apai du rogo Ziazia Kekeapai yo, manga ani he wo rengbe ka ye na gu sangbanaha nikadu ninyanyakihe, nga gu rengbe ka ngarasa rani. Fuo zinga Yesu bekpio, ko ayugu tiko fu gako abawiriki ue na ki gumbapai fuyo tipa agu asangbanebi nga ga Ziazia Kekeapai. Gu pangbangaa Ruka akehe nayaa: “Ko ki tona yugo agu apai fu yo dunduko tona ti ga Mose apai na ga anebi, na rogo Ziazia Kekeapai dunduko nga gu du tipa ko tigako.” Sangbanaha angia gine? Nigu nyemu re, wa abawiriki aaberãkurii agu apai i awirikihe be Yesu, i aya dagbayo: “Ani akigi akiga, ho ko afura ni na ani gene, wa ko ayugu Ziazia Kekeapai furani te?” (Ruka 24:13-32) Giarogo Fugo Mbori yo asa agi abawiriki nadu ue re i duna bakere ngbarago kisusi, bambiko si anyakasi gayo idapase kuti ga Mbori akidohe na si ki fu wene maabangirise fuyo tipa gayo raka kumbatayo.

Kuba gupai nga Fugo Mbori du nitindiro furani, pa gia ani rogoyo nigupai nagbeberã rani ani duna ngbarago mbikoho na si naa undo ti ni a, kidu nigupai nasa ngbarago tirani wa kina ri gu riahe nambiisa boro wenengai. Ginipai duwa ka oni mangihe tipa ka gbia ngbatunga gu giarogopaiyo re? Gi papara kekeapai naye re nika yugo wai furoni rengbe oni ka gbia ngbarago be “gu inahe nga ga [watadu gu inohe du tipa] Mbori.”—Asanza 2:1-5.

[Gu kpiahe du ti kpewaraga 4]

Wa kina gu baagude duna nyemuse koyo du awirini ni, Yekova nafu ziazia toro tipa si undo rani ani girogo agu apai wenengai du rogo Ziazia Kekeapai yo