Oni Rengbe Arengba ka Giarogo agu Apai Yo Du Rogo Ziazia Kekeapai
1. Oni Sana Bairaha Tipa Undo
Dee du Itaria yo du rimori nga Ninfa ayaa: “Regbo adu kinaho mi anaageda Ziazia Kekeapai mbata fu mi pi. Mi anaamangaha wo mbiko gupai nga, mi aini gupai nga Fugo Mbori du. Wa rago aavuranga ka ngba tire ka gedaha ya, mi aaida ka ino gupai nzunzu Mbori akehe rogo ziazia Kekeapai yo. Mi aʹasaditire tipa ka gedaha naabaha dũ. Ho mi atona gedaha ni, mi aagiarogoyo agia, ono kusa, mi kini da ti agu apaparaha mi aagianga rogoyo ya.”
YA MO kina gu bangisapai nadu tipa Ninfa, si du tipa roni? Wo duhe tipa badungu aboro. A wa duhe rogo gu kekepai ye mbata fu gere, Yekova Mbori nga baira Ziazia Kekeapai, na ko naida aida oni girogoyo. Ono wai tie rengbe oni ka giarogoyo? Gu bambatapai si aida oni mangihe nga ka sana Yekova ko undo roni.
Aboro abi ga Yesu abawiriki ni agu aboro naangianga ‘airatatamana na airainahe ya’ bambiko i aawirikanga pai rogo gu sukuru nadu tipa yugo pambori fu aboro te. (Amokedi 4:13) Ono wa si avura duwo, Yesu aya fuyó wee i aima rengba ka giarogo Ziazia Kekeapai yo. Wai ko agumbaha? Ko ayaa: “Gu Mounda, nga Ziazia Toro, gu ko Buba ka keda ko ni rimore, ko ayugo apai dunduko fu roni.” (Yoane 14:26) Mbori amangisunge na gako ziazia toro tipa ka kusa kpotosende na gu rakiraki ahe du auruhe. (Bambata Pai 1:2) Ko amangisunge a na gako ziazia toro si sa akumba 40 i keke gako berãpai rogo Ziazia Kekeapai. (2 Petero 1:20, 21) Kina gu bangisa toro re a naundo agu aboro naida ka giarogo agu apai yo du rogo Ziazia Kekeapai.
Wai rengbe oni ka gbia ga Mbori ziazia toro? Si naida oni sanahe asana tipaha. Nirengo, si naida oni kpatagara akpatagara kindi kuti sanahe. Yesu ayaa: “Oni sána he tipa he, i ki fu he furoni. . . . Wa du oni tigaoni nga gbegberẽ aboro ki ini pa gama wene ahe fu awironi, [anga] Baroni du ngbangbaturũ yo ko susi na gama Ziazia Toro fu agu yo nasana ko, te?” (Ruka 11:9, 13) Yekova nafu ziazia toro afu fu agu aboro nasanako tipaha. Gu zaaza ome re, rengbe arengba ka undo roni oni girogo agu apai i akehe rogo Ziazia Kekeapai bakuru kusayo. Ga Mbori toro ima rengba a ka fu tatamana furoni tipa oni mangi agu apai du rogo Ziazia Kekeapai rogo gaoni raka yo.—AEbere 4:12; Yakoba 1:5, 6.
Sidu tie, ho oni asungo ni ka geda Ziazia Kekeapai, oni kpari fu Mbori, ki sanako ko fu ziazia toro furoni tipa oni girogo agu apai yo oni ka gedaha.