Oni Ini Wene Sino Fugodagbasee?

“GU WARAGA-NYEMUSE gu sosono kumba garãko adu nga 60 akehe.” Gupai re angia gu bangua riipai nangia ga gu mbaro abaangira (sweepstakes) nangia ga gu baigo marã du Japan yo i akehe tingbafuo bete agarã kusayo. Si angarasi aboro Japan nga aguyo garãyo atona ti 50 na kugii 60 yo i naagumba kina boro “ndikidi gayo aberã” fu gayo abadiarogatise. Nikpiapai, bangimbaro abaangira sa akepai fu diako ki yaa: “Pai gu duho ngbare mi aida ka gumbaha foro, ka mi gumbaha, mo rengbe arengba ka moma, ono ka mi agumbanga gupai re ya, mi abira tire abira, sidu mi nika gumbaha na fugore kuari nga: Tambuahe foro tipa mo adire nikumbaamo.”

Rogo sino aboro nibakiakia, kodihe kuti gu beteyo du Asia yo ku Uroyo, pa gumba boro kina boro agu apai du ngbaduniyo gbaiga nigupai naima zera. Wa vura duhe wo, dungu aboro bangeyo nasusi 15,000 aima ida kuti gu waraga-nyemuse gu sosono kumba re akehe. Aboro aima ida na gu waraga-nyemuse re bakere gbe na si ki sa gupai nga, i mangi kura mbaro-abaangira berewe, na i ki kusi kura abuku nisigirayo mburuhe rii gu waraga-nyemuse re. Gipai re nayugupa wai dungu kura aboro akpinyemu ka gumbapa agu apai du ngbaduyo yo tipa gu gayo abadiarogatise i akpinyemuyo gbe. Ono tie, gu kura aboro aidanga ka gumba agu apai du ngbaduyo yo fu gayo abadiarogatise te. Tipagine? Si rengbe kadu wo bambiko gupai nga, si naida bakere asadatise beyo na wene birĩ tipa kura aboro, gbiati gayo abadiarogatise i rugutiyo naapa agu apai du ngbaduyo yo.

Kumba du rimoko nga Hitoshi Kato, nga guko nake buku nafura tipa pa zoga yo boro ti sunge-marã ayawee, gu dungu mbutise namanga dagba gu sosono arogotise du Japan yo, si naaye gbe be adee bambiko gu gberarago i nidu nani tipa dungu agarã. Ko ayaa: “Ono tie, . . . si nga sangbana gupai a nga arogotise naafuranga tipa apai gbaiga ho i nigbiatiyo ni na kpakaraapai te.”

Ti gu regbo i azoga kumba ti sunge-marã, diako rengbe ka zeresa kina ngbako na gupai nga ri naida i mbutiyo. Si rengbe kadu nga agu arogotise re anaasakanga pai dagbayo tipa agu apai du ngbaduyo yo vuru gu dungu agarã yo i nadihe sa re te. Si rengbe arengba kadu nga gu kumba na diako re anaaʹasada tiyo aʹasada ka fura tipa agu apai du ngbaduyo yo dagbayo, ono tie, ka i arengbanga ka banda wene fugodagbase ya. Kuba gupai nga i naasonosa dawedawe ngbanyaa dagbatiyo, i anaabi tiyo ti aregbo dunduko i naima rimiso tiyo kina kurogo dogoda gbangagbanga akango.

Wai rengbe kumba na diako ka mbakada gayo zanga giatise rogo pazereda na i kini fura tipa agu apai du ngbaduyo yo ngba wene gene? Oni awira duadu na nyemu ka ino gupai nga, ani arengbanga ka gbia wene aberã rogo gu vovo buku bafu arugute tipa rogatise akehe te, ono ani rengbe ka gbiaha kina rogo gu kuru buku nga Ziazia Kekeapai nga gu aboro aima digo nibihe na nyanyakipaha tipa dungu kama agarã.