Ka Oni Kparanga Guhe Mbori Akpamiaha Ya

“Si du i nadu nga ti ni ue berewe ya, i ki du adu sa. Were gu Mbori akpamia re ka boro kpara nga ha ya.”—MATAYO 19:6.

1, 2. Ringbisihe kuti Ziazia Kekeapai, na ka gumba rengo nzunzu, tipagine duhe ti ni nga apai rengbe arengba ka fuda arogotise ti kura aregbo?

ONI bingo gi kpiapai re. Oni ima mbakadatironi tipa ka ndu gbanga nunguro na ngbagida. Ya mo oni rengbe ka gbia fudifudiapai ngba gaoni nunguro? Si du nipa mungo ka boro berẽ gupai nga wiripai ho rengbe ka fuda ní gene te! Nikpiapai, mai rengbe ka ná nibakerehe si ki sa gupai nga oni tona nduge yee na kini ndu na rugatise. Watadu ngbagida rengbe ka gberã beroni gene ka gene adunga beroni wa ka oni mbakadi ru ya, si ki sa gupai nga oni gbe ru ku pangba gene yo tipa ka gbata gu boro rengbe ka mbakada ru. Ya mo ka apai mangi wa gure, oni rengbe ka bira tironi ki yawee ka oni aini wo ka oni atonanga nunguro ya, na oni kini idi ka mbu gu ngbagida re bangiri gene kini karaga tironi? Oó, wagusa te. Ho oni andu gbanga nunguro ni, gupai oni amaaha ku berã roni yo nga apai rengbe arengba ka fuda roni gene na oni ki gbata agene tipa ka diabe agu apai re.

² Kina gu bangisapai re a du tipa rogatise. Fudifudiapai duwa ka si mangi, na si du nipa mungo ka agu aboro naida ka rogatiyo berẽ gupai nga apai dunduko nikaa ndu nikina wenehe rogo gayó ramukporo. Rogo 1 AKorindo 7:28, Ziazia Kekeapai napehe ape ziazia kini yawee akumbakuadee na dereakumba, “pai afúda boroyo afuda.” Tipagine duhe ti ni wo? Si namanga wo mbiko gupai gbua nga aboro dunduko nga airazangarengba, na ani naraka ti “gbegberẽ rago.” (2 Timoteo 3:1; ARomo 3:23) Sidu, zavura agu arogotise ngbaa dagbayo wa bee na ngbaa, na i kidu wenengai rogo toroyo, i rengbe arengba ka gbiatiyo na fudifudiapai ti kura aregbo.

3. (a) Wai badungu aboro rogo zegino abi rogatise? (b) Tipagine aKristano adiaberã ti ni ka nye ni arogotise ho i arogatiyo ni?

³ Rogo gi zegino du awere re, ho arogotise agbiatiyo ni na atagbagapai rogo gayó ramukporo, gupai i aida ka mangaha niipo nga ka mbutiyo. Rogo dungu aringara, mbutise nga gupai omehe naima kio kisusi. Ono tie, ndikidi aKristano nambakada agu atagbagapai du dagbayo, angianga ka zubo behe ya. Tipagine i amangaha ti ni wo? I namangaha wo bambiko i nabi rogatise nigu ziazia gamahe naye be Yekova. Yesu afura tipa arogotise ki yaa: “Gu Mbori akpamia re ka boro kpara nga ha ya.” (Matayo 19:6) Nirengo, pa raka aboro ringbisihe kuti gu rugute re nitaatapai te. Nikpiapai, agume boro gbiati gu kura aboro, kodihe na bete abafurugute tipa rogatise, i naangarasa arogotise dedede tipa i mbutiyo ho tagbagapai akura ni dagbayo, nga gu mbutise Ziazia Kekeapai aidanga nani ya.a Ono aKristano ini gupai nga, si nibawenepai kisusi aboro nye ni arogotise kuba gupai nga i mbutiyo ningbaduse. Nirengo, si ninyanyakipa pai arogotise diberã ti kina tonatonaha ka manga apai dunduko ringbisihe kina kuti ga Yekova gene, angianga kuti gu rugute nga ga aboro ya.—Asanza 14:12.

Diabe Fudifudiapai

4, 5. (a) Gini fudifudiapai rengbe arogotise ka gbiatiyo nani rogo gayó ramukporo? (b) Tipagine gu bangua arugute du rogo Fugo Mbori yo aundo ti ni zavura ho fudifudiapai akura ni rogo gu ramukporo nga ga arogotise?

⁴ Gupai si aidaha nzunzu nga arogotise naamaa berãyo ti aregbo dunduko fuo gayó rogatise. Gipai re nakodapa mbakadayó gu rukutu atagbagapai nakura dagbayo. Ono tie, rogo kura akporo, badungu fudifudiapai rengbe arengba ka kura nga gu rengbe ka gbarasa ramukporo. Ti kura aregbo, oni rengbe ka kpinyemu ka sana gu bakumba asana nga Kristano tipa undo, nga guni duna kina diani ti ni, na ní ki ima ino badungu apai tipa ramukporo. Ono ka apai vura manga wa gere, anga si nayugo gupai nga gaoni rogatise ima gburuwa te. Ono si nayugo gupai nga, pa raka aboro ringbisihe kuti gu bangua arugute nga Ziazia Kekeapai, si rengbe ka sa yó i dibe gu fudifudiapai rengbe ka kura.

⁵ Nidu Yekova ni Bakusi aboro na ni Baenge gu ringbisapai du tipa rogatise, ko ima ino agu apai kisusi rani rengbe ani ka mangaha tipa ka sa gaani ramukporo nga ga kumba na diako si du niwenehe. Sanahe nakura tie nga, Ya mo ani adegaturani sa agu arugute du rogo Fugoko yo na kini mangihe? Ka ani mangihe wo, ani gbia undo agbia nirengo. Yekova aya fu gu gako aboro nadumbata kusayo wee, “Akõ! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime.” (Yesaya 48:18) Pa raka arogotise ringbisihe kuti agu arugute nga ga Ziazia Kekeapai rengbe ka sa gupai nga gayó ramukporo du niwenehe. Ani bingo gu rugute mbata Ziazia Kekeapai afuhe fu akumbakuadee.

“Oni Kpí Nyemu Adiaroni”

6. Gini rugute Ziazia Kekeapai afuhe fu akumbakuadee?

⁶ Gu waraga gu mokedi nangia Pauro akehe fu aEfeso, si na arugute rogoho ziazia fu akumbakuadee. Ko akehe ki yaa: “Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha. Kina wo ka akumba kpí nyemu adiayo a wa boroyo. Gu ni nakpi nyemu diani ni nakpi nyemu tini. Bambiko a nga boro sa nasoga boroni te, kina mbu ti ni na banda ha, wa kina Kristo na kanisa a; Gu ni nikpí nyemu diani wa du oni ni ba sa sa, wa kina tini.”—AEfeso 5:25, 28, 29, 33.

7. (a) Gine si ada si du dagba agu ahe gu rogatise nga ga aKristano aru riihe? (b) Wai si aida akumba naakpinyemu adiayo?

⁷ Pauro aafuranga tipa gu rukutu atagbagapai dunduko rengbe ka kura dagba kumba na diako te. Kuba gure, ko afura tipa kina gupai rengbe ka mbakada agu atagbagapai nga ga arogotise nifura ko tipa guhe du dagba agu ahe gu rogatise nga ga aKristano aru riihe. Guhe re nga nyemuse. Nirengo, i fura tipa nyemuse bara sita rogo agu averesi du kuari re. Ho Pauro ayani fu akumbakuadee wee ‘i kpinyemu adiayo,’ kuti gu fugo i ake bambata fugo Ziazia Kekeapai rogoho, si ayugu gupai nga i niikpinyemu yó akpi kindi. Zanga kapa, Pauro aini gupai nga pa rimiso boro tiní kurogo nyemuse akpura ti nye rogo nyemuse. Wo duhe nirengo, gbe, rogo gi “kusa rago [watadu yangara arame]” re, nga gu regbo “aboro akpi kina nyemu tiyo” rogoho, na i kingia “aguaurundika.” (2 Timoteo 3:1-3) Ngbatunga gu gbegberẽ asino re nagbarasa badungu aramukporo areme, ono gu kumbakudee nakpinyemu diako nzunzu, ko ambunga ngbatunga gu gbegberẽ apai nga ga zegino re si gbarasi riko yo te.—ARomo 12:2.

Wai Rengbe Oni ka Ngerafuo Diaroni?

8, 9. Ngba gini agene gu kumbakudee nga Kristano angerafuo diako?

⁸ Ka si du nga oni nga gu kumbakudee nga Kristano, wai rengbe oni ka zanga berã kina pa tironi, ono kini yugu ndikidi nyemuse tipa diaroni? Rogo agu afugo Pauro agumbaha fu aEfeso a wa ani nibihe kuari re, ko afura tipa agu apai ue si aida oni mangihe, nga oni rigi diaroni, na kini bi ri na nyanyaki pari na kini banda ri wenengai, a wa oni naamangaha tipa kpotoroni. Wai rengbe oni ka riga diaroni? Gene sa dagba agu akuraha nga, nifu oni agu ahe furi zingoho amanga ri. Pauro akepai ki yaa: “Gu ni ka aberã nga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.”—1 Timoteo 5:8.

⁹ Ono tie, badungu apai si aidaha angianga kina gu gbua nga kaa ye na riahe ku kporo, watadu kaa sopa bino ku ngbari, kini ngbe rokoo furi, na ki dua bambu kuri ri ya. Tipagine duhe ti ni wo? Si wo bambiko kumbakudee rengbe kaa manga agu apai amanga wenengai tangara ani he kuari re, ono ka ko amaanga berãko tipa agu azingo du ri nani tipa gu nyemuse nga ga nunga du dee nani tipa kumba ya. Na ka ko amaanga berãko a tipa gu gari azingo nga ga toro ya. Pa ngera oni fuo ri ngba agi agene ani nagumbapaha berewe re nga nyanyakipa pai. Nirengo, badungu agu aKristano nga akumba, i na badungu asunge beyo tipa agu apai nabipa dungurati. Ono padu kumba na badungu asunge beko nga ga dungurati ayugongo gupai nga si naida ko mbu ngerafuo gu sunge Mbori afuhe fuko wa du ko nibairakporo te. (1 Timoteo 3:5, 12) Bete agarã kusayo, gi magazini re afura tipa gipai re ki yaa: “Nibi gupai Ziazia Kekeapai aidaha, ani rengbe ka yawee ‘ngerafuo akandoro natona kina kporoyo.’ Ka bakumba rogo dungurati angeranga fuo gako aborokporo ya, i rengbe arengba ka dia gu mamu beko nga ga bakumba re.”b Si tie ziazia nga, si nibanyanyakipa pai oni ngerefuo diaroni, ti kpotori, kini moi berã roni tipa gu nyemuse nga ga nunga ri aidaha beroni. Na gbe, kini ngerefuo ri rogo toroyo.

Ginipai Pa Bi Oni Diaroni na Nyanyaki Pari Ayugoho?

10. Wai rengbe kumbakudee ka bi diako na nyanyaki pari?

¹⁰ Ho oni angera ni fuo diaroni wenengai, gure nga oni nakpinyemu ri na kini bi ri na nyanyaki pari. Badungu agene duho rengbe oni ka mangaha ngbaha. Nibambatapai, oni di regbo ka sungo na ri wenengai, angianga kini merẽ kita migo kina we niyego bebere yuru ya. Ka oni aidanga ka sungo na ri kporo ya, gu nyemuse du ri nani tipa roni rengbe arengba ka zera. Oni ini gupai a nga, gu regbo oni aberãha nga si diaroni aida oni dihe ka sungo na ri, na wai si aida oni berẽ pari, si rengbe kadu nga anga wo ri aidaha nzunzu te. Si aidanga kumba ya gbua wee ko nabi diako abi na nyanyaki pari nikungbo panderu-ngbaru te. Ono si naida diaroni bihe abi nga nyaki pari anyaka bangironi. Pauro akepai ki yaa: “Ka boro gbatanga kina gupai ngbaa tiní ya, ono gu ngbaa ti kurani a.” (1 AKorindo 10:24, NW) Nidu oni nigu kumbakudee nakpinyemu diani, si naida oni bi gupai nga oni ima rugatironi wenengai na agu azingo nga ga diaroni.—AFiripoio 2:4.

11. Wai gu gene kumba amanga fu diako ngbaha narengbe ka gberesapa gako pagume na Yekova gbiati dungurati?

¹¹ Gu kura gene berewe rengbe oni ka yugo nani ngbaha nga oni nabi diaroni na nyanyaki pari nga, kaa fura furi na kini mangi ri wa fogogude. (Asanza 12:18) Pauro akepai fu agu aKristano nadu Korosai yo ki yaa: “Akumba, oni nikpí nyemu adiaroni ka ngbaduroni ími nga fu yo ya.” (AKorosaio 3:19) Buku sa naya wee, agu afugo Pauro du ti digidoho re, i rengbe ka gumbaha ngba kura gene ki yaa, “ka oni sanga ri wa kanga ya.” Gu kumba namanga diako gbegberẽe zanga bi rungori kini mangihe nigbuko watadu gbaiga, si ayugongo ho wagu tooni nga ko nabi ri na nyanyaki pari te. Ka ko amanga fu diako gbegberẽe, ko rengbe arengba ka gberesa gako pagume na Mbori. Gu mokedi nangia Petero akepai fu akumbakuadee ki yaa: “Oni rá kporo na . . . [adiaroni] na rugatinapai, nifu irisa fu de wa arengba nga ome de na ga kumba ya, na wa du oni ni adi gu undahe nga ga unga wa sa na yo; [tipa] ka pai dingisa nga gaoni kpe ya.”c—1 Petero 3:7.

12. Ginipai rengbe gu kumbakudee nga Kristano ka wirikaha be gu kpiapai du tipa wai Yesu anaamanga gu dungurati nga ga aKristano?

¹² Ka oni bingo gu nyemuse du diaroni nani tipa roni na taatapaha ya. Oni kido ri ki ya oni nikaa kpinyemuri akpi kindi daho oni ka kpi ni. Yesu amoi kpiapai fu agu aKristano nga akumbakuadee rogo gu gene ko aamangasunge ngbaha na gu dungurati nga ga aKristano. Ko aangerafuoho ninunga, zezeredii, na kidu na mbupai, zavura ho apefuoko aamanga gupai ni bara dunguhe ko aaidanga nani ya. Si du Yesu aya ti ni fu aboro wee: “Oni yé fuo re, . . . bambiko bayee boro nga mi nga irazerangbaduse, oni ki bi ongoda tipa mbisimoroni.” (Matayo 11:28, 29) Niwirika gu kpiapai nga ga Yesu, si naida gu kumbakudee nga Kristano naamanga diako kina ngba gu gene Yesu anaamanga dungurati ngbaha. Gu kumba nabi diako nzunzu na nyanyaki pari, kini yuguhe rogo fugoyo na rogo mangapai yo, ko nga gu boro diako abi ongoda mbiko ní.

Gu Dereakumba Naraka Ringbisihe Kuti Arugute

13. Gini bangua arugute du rogo Ziazia Kekeapai nga gu rengbe ka undo dereakumba?

¹³ Ziazia Kekeapai na bangua arugute rogoho a nga gu rengbe ka undo dereakumba. AEfeso 5:22-24, 33 nayaa: “Dere akumba, oni nirá ara fu akumbaroni, wa fu Gbia. Bambiko kumbani nga rini, a wa du Kristo ni ri kanisa, du ni tiko ni batasi kanisa nga boroko. Ono wa ra kanisa fu Kristo, dere akumba rá a wo fu akumbayo ti apai dunduko. . . . Dia boro nigunde agunde ti kumbani.”

14. Tipagine gu bangua rugute nga ga Ziazia Kekeapai tipa padu adee kutiibe akumbaayo ayugongo gupai ti ni nga kiingo pa adee te ya?

¹⁴ Oni kparianga wai Pauro anyakasi gupai nga si naida dereakumba ra fu akumbaayo, na kini irisi yo. I natingida diakumba na gupai nga ri ra kutiibe kumbaari. Gipai re na ngbanyaa dagbaha na gu mbakadapai nga ga Mbori. Gu rakiraki ahe dunduko du ngbangbaturũ yo na gu du auru kpotosende herẽ, boro kinaho du kuriihe. Zavura kina Yesu, ko nara kutiibe Yekova Mbori. (1 AKorindo 11:3) Rengo ngaha nga, gu kumbakudee namangasunge ngba wene gene na gu pagbia du ko nani kurii diako, ko nasaha furi taata ri nye kutii beko.

15. Gini bete arugute du rogo Ziazia Kekeapai fu dereakumba?

¹⁵ Pauro ape gupai a nga, “dia boro nigunde agunde ti kumbani.” Si naida gu diakumba nga Kristano yugu gu “bayee toro du zezeredi,” si aidanga ri naamangapai nirukö kini bisirapa kumbaari watadu ka furiko te. (1 Petero 3:4) Gu diakumba nga vurumbori, ri namangasunge nyanyakii tipa ka sa gayó ramukporo si du wenengai, na si kini sa gupai nga kumbaari du niiriiri ko dagba aboro. (Tito 2:4, 5) Ri naʹasada tiri nyanyakii kaa fura wenengai kubara kumbaari yo, na ka ri amanganga wiripai kandara tooni ya nga gu rengbe ka sa gupai nga ka aboro irisingo ko ya. Ri namangasunge nyanyakii a tipa ka sa gupai nga agu apai ko nadiberã tipa ka mangaha, si nduandu wenengai.—Asanza 14:1.

16. Ginipai rengbe gu dereakumba nga aKristano ka wirikaha be agu akpiapai nga ga Sara na Rebeka?

¹⁶ Padu gu dee nga Kristano na gu bayee toro du zezeredii ayugongo gupai nga ri he fura tipa pai watadu nyakingo pa agu apai du berã ri yo te te. Gu dereakumba nangia avurumbori ti agu aregbo nadumbata kusayo, wa ngbatunga aguyo nangia Sara na Rebeka, i naguari nibambata boro ka fura tipa gupai i abihe si nindu gbegberẽe, na Ziazia Kekeapai nayugo gupai nga Yekova aima ida na gupai i amangihe re. (Bambata Pai 21:8-12; 27:46–28:4) Si naida dereakumba gumba agu apai agumba fu akumbaayo nafuda yó kpotoyo yo. Ono tie, si naida i mangihe wo niirisa, angianga ngba gu gene nika zogosapa akumbaayo azogosa kusende ya. Ka i mangihe wo, i rengbe ka bi gupai nga ngbatunga gu fugo re nikadu nibawenehe tu akumbaayo yo, na si ki kusi wenepai.

Gupai Mozunga Amangaha

17, 18. Gini bete agene rengbe akumbakuadee na dereakumba ngbaha ka sovura kuti gu asadatise nga ga Satana ka gberesa gu ramukporo nga ga arogotise?

¹⁷ Rogatise nga gu mozunga boro amangaha tipa ka ndu kutini daho ní nika kpi ni. Sidu tie, si naida kumba na diako du na nyemu ka sa gayó ramukporo si du wenengai. Ka kumba asungongo na diako kini fura riipa apai ya, si rengbe ka sa wiri tooni tagbagapai si sono ki zi ngbangbaturũ. Dedede, arogotise nambu fura dagbayo ho wiri tagbagaapai asona ni, si kini sa gupai nga boro zi pai ku ngbaduniyo, na kini sogo kurani. Kura arogotise kinaho nagbata gene tipa i mbutiyo, si rengbe kadu nga nirimiso yó tiyó kurogo nyemuse na kura boro berewe kia. Yesu azahe ki yaa: “Gu ni nangana de ni nyemu ri ni ima manga bari na ri kpotoni yo.”—Matayo 5:28.

¹⁸ Gu mokedi nangia Pauro afu rugute fu aKristano, kodihe na aguyo nga arogotise, ki yaa: “Oni zingi, ka oni ingi nga ya; ka uru ti nga gaoni zinga ya. Ka oni mbákadi nga gene fu bakitingbanga ya.” (AEfeso 4:26, 27) Gu kere vura rani nga Satana, ko naʹasada ka mangasunge na agu azanga giatise rengbe ka kura dagba aKristano tipa ka sa yó i mangi ingapai. Ka oni mbunga ko ko duna diabese ya! Ho atagbagapai akura ni, oni weteke agu apai Ziazia Kekeapai agumbaha tipa ga Yekova bipai tipa ngbatunga agu apai re, kini mangisunge na agu abuku du mburuhe rii Ziazia Kekeapai. Oni mbakadi apai zezeredii na oni kini gumba kina boro rengo. Oni wisigi tironi na agu arugute nga ga Yekova, ka bihe singia oni nandu kutini nzunzu. (Yakoba 1:22-25) Oni diberã kaa ta na Mbori kindi ni arogotise, na ka oni mbunga boro watadu kurahe si kpara guhe ti kuraha Mbori aima kpamiaha ya.—Mika 6:8.

[Gu rukutu kekeapai du bandu kpewaraga yo]

Oni Natingidaha?

• Tipagine duhe ti ni nga zavura gu ramukporo nga ga agu arogotise nga aKristano, si rengbe arengba kadu na fudifudiapai rogoho?

• Wai rengbe kumba ka ngerafuo diako na kini bi ri na nyanyaki pari?

• Ginipai rengbe diakumba ka mangaha ka yugo nani nga ri nagunde agunde ti kumbaari?

• Wai rengbe arogotise ka nyakasa gu mozunga i amangihe nga ga rogatise?

[Gu kpiahe du ti kpewaraga 24]

Si naida kumba ningere fuo diako wenengai, angianga ti kina kpotori ya, ono rogo toroyo a

[Gu kpiahe du ti kpewaraga 25]

Gu kumba nabi diako na nyanyaki pari, ri nabi ongoda mbiko ko

[Gu kpiahe du ti kpewaraga 26]

Gu dereakumba nga aKristano nagumba agu apai niirisa nafuda yó kpotoyo yo fu akumbaayo