“Bambata Zingabekpio” Aima Tona!

“Agu yo du ni kangbayo rogo Kristo yo ki guari mbata.” —1 ATESARONIKO 4:16.

1, 2. (a) Gini maabangirise duho tipa agu aboro naima kpiko? (b) Tipagine idi oni ti ni kuti zingabekpio? (Oni bi gu rukutu kekeapai du ti kpewaraga 29.)

“AGU . . . [aboro] du ni ungayo i ini he ya i akpí akpi.” Natona ho Adamu aingipai ni, gupai re ningia rengo. Vuru agu aregbo yo nga ga ga aboro raka dunduko, agu aboro dunduko i avunguyo ima ino gupai nga i akpi akpi niyangaraha, na dunguyo naabaka kina bangiriyo kini yaa: ‘Ginipai nika manga fuo gure? Ginipai du tipa kpikpi aboro?’ Ziazia Kekeapai nakaragapai kini yaa: “Kpikpi aboro aina nga pai te.”—Batungusipai 9:5.

² Wa duhe tie were, ya mo wiri maabangirise ho tipa agu aboro nakpiki? Ii, si kinaho. Nirengo, si duwa ka si duho ka si du nga Mbori nika digiso gako bambata ringbisapai tipa ngbatunga aboro. Vuru agu agarã susi, ga Mbori ruru amoyambu aduna idapase kuti ga Yekova kidohe tipa tita dee nga guko si adu nga ko nika imo Satana na ki mbakadi gu kereapai dunduko ko amangihe. (Bambata Pai 3:15) Dungu aboro naima kpiko. Kangia si naida i bi digisidigisi gu ga Yekova kidohe re gbiati agu akuraha, si naida i zingisi yó azingisa bekpio. (AEbere 11:13) Ya mo ngbatunga gupai re rengbe ka manga? Ii, si rengbe arengba. Gu mokedi nangia Pauro ayaa: “Ruru aboro azinga [azinga] be kpio na iraira yo a.” (Amokedi 24:15) Ti kura regbo sa, Pauro azingisi paranga rimoko angia Eutuko, nga guko nati ti gu bangiri bambu nadu ti gu biata vurubambu kuari na i “ki tumba [kina] kangbako.” Gi zingabekpio nga ga gi paranga re nga gu yangaraha dagba agu du ribua i akepaha rogo Ziazia Kekeapai.—Amokedi 20:7-12.a

3. Gini wasa kina boro oni nagbiaha be gu ga Yesu afugo du nikekehe rogo Yoane 5:28, 29, na tipagine?

³ Pa agu azingabekpio du ribua re nasa rani ani idi kuti ga Pauro afugo. Si nanyakasa gaani kido kuti gupai Yesu akido rani nani kini yaa: ‘Ragoho nada, ho aguyo ka gia fugoko [fugo Yesu] ni dunduko du rogo amurã yo, ki kuru.’ (Yoane 5:28, 29) Nangbaa agu afugo re! Nangbaa wai si afu wasa fu gu dungu aboro gayo aboro akpiki!

4, 5. Gini azingabekpio nibakiakia Ziazia Kekeapai nafura tipaha, na ginigu ani ka sakapai tipaha rogo gi papara kekeapai re?

⁴ Badungu agu aboro i ka zingisa yó, i akura ku auru kpotosende nga gu aboro nikadu rogoho na ngbarago tiibe ga Mbori Kindo. (Atambuahe 37:10, 11, 29; Yesaya 11:6-9; 35:5, 6; 65:21-23) Ono tie, si adu nga kura azingabekpio nika manga amanga mbata fu manga gupai re. Nibambatapai, si adu nga Mbori duwa ka ko zingisi Yesu Kristo bekpio tipa ko ndu ka fu ome gako motumo fu Mbori tipa rani. Yesu akpi rogo gu garã nangia 33 F.B.K., na Mbori ki zingisiko.

⁵ Fuo gure, gu “ga Mbori Yisaraere” nga mbedimbedi aKristano duwa ka i ndu fuo Yesu Kristo ku ngbangbaturũ yo ka gbia ko yo rogo gako taarimo nga ga ngbangbaturũ, yo i ‘kadu ni na [Yesu nga gayo] Gbia nyeanye kindi.’ (AGaratio 6:16; 1 ATesaroniko 4:17) I nayamba gupai re nga “zingabekpio dagba akangba” watadu “bambata zingabekpio.” (AFiripoio 3:10, 11; Yugoti 20:6) Ho gu bambata zingabekpio re nika nyasa ni, regbo nika da tie tipa i zingisi gu badungu amirioni aboro nakpiki tipa i tona raka auru kpotosende kidu na maabangirise ka gbia nyeanye unga rogo Paradizo. Sidu, singia gaani maabangirise si tipa raka ngbangbaturũ yo watadu si tipa ka raka auru kpotosende herẽ, ani na nyemu ka inopai tipa “bambata zingabekpio.” Gini ngbatunga zingabekpio ngaha? Gini regbo si nika manga?

“Gini Ngbatunga Kpotoboro?”

6, 7. (a) Mbata fu mbedimbedi aKristano ndu ku ngbangbaturũ yo, ginipai duwa ka si mangi? (b) Gini ngbatunga kpoto i ka zingisa yó nani?

⁶ Rogo gu ga Pauro bambata waraga ko akehe fu aKorindo, ko akusi sanahe tipa bambata zingabekpio ki yaa: “[I awirapa] zingisa kangba aboro wãi? I aye ni gini ngbatunga kpotoboro?” Fuo gure, ko akaragapai sa gu sanahe re ki yaa: “Gu he mo narũ tigamo si adu nga na ungaha te, kina ka si kpi. . . . Ono Mbori nafu kpotoho kina wa ko akpi nyemu he, . . . gu taarimo nga ga aũ ngbangbaturũ du sa, gu nga ga aũ kpotosende du akia.”—1 AKorindo 15:35-40.

⁷ Afugo Pauro nayugo gupai nga, agu aKristano du nimbedimbediyó nitoro duwa ka i kpiki mbata fu i ga ku ngbangbaturũ yo. Ti regbo kpio yó, gu kpotoyo nga ga borose nakaragatihe kurogo nvutu. (Bambata Pai 3:19) Mbori nazingisa yó ti gako ringbisiringbisi regbo, ki fu gu ngbatunga kpoto fuyó rẽ tipa raka ngbangbaturũ yo. (1 Yoane 3:2) Mbori nafu gu unga fuyó a zanga kpio. Anga si nga guhe i aima du nani ho i abatika yó ni te, si ki duwa i aima maa mbisimo kurogo yó yo nga guhe i aya tipaha wee si zanga kpio te. Pauro ayaa: ‘Zizirĩ boro naukadi zanga zirã.’ Zanga kpio nga gamahe be Mbori agu aboro du tipa bambata zingabekpio ‘aukadihe.’—1 AKorindo 15:50, 53; Bambata Pai 2:7; 2 AKorindo 5:1, 2, 8.

8. Wai ani aino gupai nga Mbori asianga agu aboro du bangeyo 144,000 rogo apambori nibakiakia te?

⁸ Aboro gbua 144,000 i nika zingisa yó ti regbo bambata zingabekpio. Yekova atona ka dungura yó rago Pendekote rogo gu garã nangia 33 F.B.K. ngbutuko fuo zingisa ko Yesu bekpio. I dunduko duna “rimoko [rimo Yesu] ni keke he ti ngbanda kpakpuyo, na rimo Bako a.” (Yugoti 14:1, 3) Sidu, anga i nadungura yó rogo apambori nibasasa te. I dunduko nga apefuo Kristo, na i dunduko duna rimo Bayo tiyó nga Yekova. Ho i azingisa yó ni, i nafu sunge fuyó ngbangbaturũ yo. Berẽberẽ pa mangasunge fu Mbori ngburungburu wa gure nga bawenepai fuyó nirengo.

Ya Mo Si Aima Digo Nimangi?

9. Wai Yugoti 12:7 na 17:14 aundo rani ani ini gu regbo pirapira bambata zingabekpio atona ti ni?

⁹ Gini regbo bambata zingabekpio nika manga? Nyanyaki gopai kinaho nayugoho nga si namanga amanga wa du rago re. Nikpiapai, ani ringbisinga akapita ue nga ga Yugoti. Nibambatapai, ani binga Yugoti kapita 12. Ani nageda gupai yo nga Yesu Kristo, i amoiko barambeda ni bakindo, ko gbiati gako ziazia amaraika asovura kuti Satana na gako adaimona. (Yugoti 12:7-9) A wa gi magazini re naagumbaha dedede, gu vura re atona rogo 1914.b Ono tie, oni kparia gupai nga, i afuranga tipa mbedimbedi apefuo Kristo ya i naako rogo gu vura re ngbangbaturũ yo te. Awere tie, oni kparianga Yugoti kapita 17. Ani nageda gupai yo ngawee fuo i gbarasi “Babera Duna Bakere Ome Ti Ni,” Wiri Kandoro nika diabe rikaaboro. Fuo gure, si nagbia gupai kutini nga: “Agu yo du na ko, i nikadia be yo a, nga agu yo i ayambu yo, du ni siasia yo, ni kangarã yo.” (Yugoti 17:5, 14, oni ringbisinga ha na NW.) Si naida gupai nga “agu yo i ayambu yo, du ni siasia yo, ni kangarã yo,” i ima zingisa yó bekpio ka si du nga si naida i kodi beyo na Yesu kurogo gi yangara vura kuti Satana re. Sidu tie, ruhe aru ani yawee gu mbedimbedi aKristano nakpiko mbata fu Aramegido, i nazingisa yó bangbanda 1914 na Aramegido.

10, 11. (a) Ada nga agu abaakumba du 24, na gine guni sa dagbayó ayuguhe fu Yoane? (b) Ginipai rengbe ani ka gumbaha mbiko gipai re?

¹⁰ Ya mo ani rengbe ka ino gu regbo nzunzu bambata zingabekpio atona ti ni? Wiri mboimboipai tipaha gudu rogo Yugoti 7:9-15, yo gu mokedi nangia Yoane aringbisipa gu ‘bakere rimbasa aboro [ni ko abi yó rogo yuguyugupai] ka boro agidanga yo wasa ya.’ Bakumba sa dagba aguyo du 24 ayugupai fu Yoane tipa ada nangia gu bakere rimbasa aboro re, na agi abaakumba re, i narukuba agu adikumbo na Kristo ngbangbaturũ yo du bangeyo nga 144,000.c (Ruka 22:28-30; Yugoti 4:4) Yoane nitiko aduna maabangirise tipa raka ngbangbaturũ yo; ono wa duhe nga ko adu kindi auru kpotosende ho gu bakumba re afura ni naako, sidu, ruhe aru ani yawee Yoane narukuba mbedimbedi aKristano auru kpotosende rogo gu yuguyugupai re, mbata fu i gbia gayó mosoro ngbangbaturũ yo.

¹¹ Ginipai tie rengbe ani ka gumbaha nibi gu rengo nga bakumba sa dagba aguyó du 24 ayugupai fu Yoane tipa ada nangia gu bakere rimbasa aboro re? Si nawira gupai nga, agu aboro du dagba agu abaakumba du 24 re, gayó sunge nga ka yugo agu arengo nga ga Mbori fu aboro areme. Tipagine duhe ti ni ninyanyakipa pai? Si wo mbiko gupai nga i ayugu ada nzunzu nangia bakere rimbasa aboro fu ga Mbori mbedimbedi amoyambu rogo 1935. Kangia i amangisunge na bakumba sa dagba aguyo du 24 re tipa ko gumba gu nyanyakipa rengo re fu Yoane, si nayugo gupai tie nga i aima zingisako ko ki ima ga ku ngbangbaturũ yo kandara mbata fu gu garã nangia 1935. Gure kini yugu gupai nga bambata zingabekpio aima tona tingbafuo 1914 na mbata fu 1935. Ya mo ani rengbe ka gumbaha zukazuka susi gure?

12. Oni sakinga rogo gupai yo si awira gupai ti ni nga bambata zingabekpio atona rogo Marungu watadu Zerekpe rogo 1918?

¹² Bara herẽ, si afu undo ka ani wisigi gu wiratise du dagba agu apai du rogo Ziazia Kekeapai. I ambedi Yesu Kristo ni Bakindo ga Mbori Kindo rogo gu garã nangia 29 F.B.K. Rogo Marungu watadu Zerekpe rogo gu garã nangia 33 F.B.K. Fuo susa agarã biata na beberehe kusa, i azingisiko nigu boro nitoro duna bakere ome tiní gbe. Ya mo si rengbe kadu tie ngawee, wa i asungusi Yesu rii mbatabakindo rogo gu garã nangia 1914, gu zingabekpio nga ga apefuoko atona fuo agarã biata na beberehe, rogo Marungu watadu Zerekpe rogo gu garã nangia 1918? Si rengbe arengba kadu wo. Wa Ziazia Kekeapai avuranga gumbaha wo ya, si nandu andu sa na agu averesi du rogo Ziazia Kekeapai nga gu nayugo gupai nga bambata zingabekpio atona ngbutuko fuo gu regbo Kristo adi ome kindo kubeko re.

13. Rogo gini gene 1 ATesaroniko 4:15-17 afu gu berã nga bambata zingabekpio atona ho Kristo adi ome Kindo ni kubako?

¹³ Nikpiapai, Pauro akepai ki yaa: “Agu rani ka du ni ungarani, ki nye daho Gbia ka ye ni [angianga kuti digido gu regbo ko kadu na ome Kindo te], ani andu nga mbata yo fu agu yo ti ni rame wa sa te. Bambiko Gbia nikazorã tigako ngbangbaturũ yo, na bakere tata ngba na fugo bakumba maraika, na ga Mbori kpangi. Agu yo du ni kangbayo rogo Kristo yo ki guari mbata; fuo gure agu rani ka du ni ungarani, ki nye anye, i amongo tuka rani na yo rogo mai yo ka gbia Gbia yuge yo. Ani ki du na Gbia tie nye anye kindi.” (1 ATesaroniko 4:15-17) Sidu tie, i azingisi gu mbedimbedi aKristano nakpiki mbata fu du Kristo ho na ome kindo beko tipa i ndu ku ngbangbaturũ yo mbata fu i zingisi aguyo du kindi niungayo vuru gu regbo du Kristo na ome Kindo beko re. Si kini yugu gupai nga, bambata zingabekpio aima tona ti gu regbo Kristo adi gu ome nga ga kindo kubeko na si kini ndu kindi kumbatayo ti “rago ye ko [‘gu regbo du ko na ome Kindo beko,’ NW].” (1 AKorindo 15:23) Kuba gupai nga bambata zingabekpio mangi ti regbo sa, si namanga vuru gbanga regbo yo.

‘I Ki Fu Apusi Remu Fuyo Nibasasa’

14. (a) Gini regbo gu yuguyugupai du nikekehe rogo Yugoti kapita 6 adigo? (b) Gine yuguyo ho rogo Yugoti 6:9?

¹⁴ Oni kparianga gu gopai a du rogo Yugoti kapita 6. Ani nabi Yesu yo nigu Bakindo natasovura kini di behe. (Yugoti 6:2) Gu kapita re nafura tipa arikaaboro i niso kere avura rogo arago yasika. (Yugoti 6:4) Si nafura a tipa angbongi nga gu rengbe na arago dũ. (Yugoti 6:5, 6) Kere agberangbii navugumo ngbatunga aboro na pandehe ti ni. (Yugoti 6:8) Kina boro agi apai dunduko i agumbaha nisangbanebi re, si du ninaamanga rogo zegino natona rogo 1914. Ono kurapai kinaho berewe namanga a. Gu kapita re nafura a tipa bamotumo. Tiimburu gu bamotumo re, ani nabi “mbisimo agu . . . [aboro] i aimi yo tipa ga Mbori pai na tipa gu dezire i aka kuti ni.” (Yugoti 6:9) Wa duhe nga mbisimo watadu “unga ahe du rogo kure he yo,” guhe nzunzu du bamotumo yo re, si nga kure ga Yesu ruru amoyambu nga aguyo i aimi yó tipa gayó tungusapai zaaza zanga gunde.—Pa Amotumo 17:11.

15, 16. Oni sakinga rogo ndu gupai duhe ti ni nga Yugoti 6:10, 11 nafura tipa bambata zingabekpio.

¹⁵ Wakina wai kure gu ruru kumba nangia Ebere aakpara, kure gi ruru aKristano nakpidipa gayó idapase re nakpara fu Mbori tipa ko iribape kureyo. (Bambata Pai 4:10) “I . . . [na]paa ni bakere fugo niya, ‘Ako ziazia ndikidi Baira, rago adu waĩ mbata mo nikasapa ngbanga agu yo naraka auru kpotosende ki iri bape kurerani?’” Ginipai namanga fuo gure? ‘I afu pusi remu fuyo nibasasa; ki ya fuyo wee i ongodi ngbutuko, daho i ka digiso pa gayo abadiasunge ni, na awirinayo, nga aguyo i ka imo yo wakina yo.’—Yugoti 6:10, 11.

¹⁶ Ya mo i azogo agi aremu re kurogo gu kure nadu tiimburu bamotumo? Wagusa te! I afuku agi aremu re fu agu aboro i auka kureyo rii bamotumo, ka pepai nimasaku. I afu gayó unga nimotumo nirimo Yesu na i awere ni agu aboro i aima zingisa yó ni atoro. Wai ani aino gupai re? Ti tonatona gu buku nga Yugoti, ani nageda gupai yo nga: “Gu ni ka di be pai, i aúkadi ni na pusi remu; mi agbándaka nga rimoni rogo kitabu unga yo wa sa te.” Oni tingidi gupai a nga, agu abaakumba du bangeyo 24 re “adu ni ukadiukadi yo ni pusi remu; akpakpari dahabu ki du riyo yo.” (Yugoti 3:5; 4:4) Sidu, fuo vura, angbongi, na riri akaza tona imo aboro auru kpotosende, agu aboro du dagba aguyo du bangeyo nga 144,000 nakpiki, nga aguyo gu kure du tiimburu bamotumo arukuba yó, i azingisi yó i ndu ku ngbangbaturũ yo na i ki ukadi yó na apusi remu nga gu narukuba kurapai.

17. Rogo gini gene agu aboro i afu apusi remu fuyó ‘aongoda’?

¹⁷ Si naida gupai nga, agu aboro i nazingisi yó barambeda re, i “ongodi” mbata. Si naida i pidi ga Mbori uru irabape na zerangbaduse. Si naida “gayo abadiasunge,” nga gu mbedimbedi aKristano du kindi auru kpotosende, i kakuti gayó ruru mangaapai kindi. Ho ga Mbori regbo sapangbangaa nika da ni, gu regbo ‘ongoda’ re kini nyasi. (Yugoti 7:3) Ti gu regbo re, agu aboro i aima zingisa yó, i akodabee na gu Gbia nga Yesu Kristo ka imo gbegberẽ aboro, kodihe na gu gbegberẽ aboro nauka kure agu aKristano nangia aboro-wenesa.—2 ATesaroniko 1:7-10.

Gupai Si Ayugoho Tipa Rani

18, 19. (a) Gini goapai duho nasa rani ani dakuti gupai nga bambata zingabekpio aima tona? (b) Wai du oni fuo ruga oni tironi na gupai du tipa bambata zingabekpio?

¹⁸ Fugo Mbori ayugonga gu ndikidi ramediwi nzunzu du tipa bambata zingabekpio te, ono si nayugo gupai ngawee si nikaa manga vuru gbanga regbo yo, nga gu regbo du Kristo na ome Kindo beko. Agu aboro i ka zingisa yó mbata, i nga gu mbedimbedi aKristano nakpiki mbata fu Kristo di ome Kindo kubeko. Wa gu regbo du Kristo na ome Kindo beko aandu kindi kumbatayo, i naʹaria gu mbedimbedi aKristano du niruru yó nga aguyo nanyasa gayó sunge auru kpotosende “ni ipo, wa pira bangirise” ki sa yó ni amaraika nga agu aboro ni atoro duna bakere ome tiyó. (1 AKorindo 15:52) Ya mo mbedimbedi aKristano dunduko nika gbia gayó mosoro nga ga raka ngbangbaturũ yo mbata fu gu vura nga Aramegido? Ani ainongo ho te. Ono tie, gupai ini ani he nga ti ga Mbori ringbisiringbisi regbo, agu aboro dunduko du bangeyo nga 144,000, i nika ru rii Bagangara Siona yo ngbangbaturũ yo.

¹⁹ Gu kurapai berewe ini ani he a nga bakere bange agu aboro du bangeyo nga 144,000 aima kpamiatiyo na Kristo ngbangbaturũ yo. Kina beteyo gbua du kindi auru kpotosende. Si nayugo gupai nirengo nga regbo ga Mbori sapangbangaa nambeda wa pai! Mbembedii kumbatayo, i nika gbarasa ga Satana zegino agbarasa. Na i ki ba Satana kurogo gu due zanga mburuhe. Fuo gure, zingabekpio tipa yangara aboro kini tona, na riimburu ga Yesu motumo, i kini sa ruru aboro i da nirengberengbeyo wa gu Adamu adumbata fu ingako pai. Gu ga Yekova sangbaanebi du nikekehe rogo Bambata Pai 3:15, si nadigo wadu rago re. Nangbaa gu maku ngaha nga ani naaraka ti gi regbo re!

[Gu rukutu kekeapai du bandu kpewaraga yo]

Oni Rengbe ka Sakarogoyo?

Wai agi averesi naye re aundo rani ani ini gu regbo “bambata zingabekpio” atona ti ni?

• Yugoti 12:7; 17:14

• Yugoti 7:13, 14

• 1 AKorindo 15:23; 1 ATesaroniko 4:15-17

• Yugoti 6:2, 9-11

[Gu kpiahe du ti kpewaraga 31]

Gini ngbatunga zingabekpio namanga mbata fu i zingisi gu dungu aboro nakpiki?