Oni Yugu Kina Gupai Nzunzu Ziazia Kekeapai Ayugoho
“Oni ndú . . . ki sa arikaaboro dunduko ni abawiriki, . . . ki nirugu yo.”—MATAYO 28:19, 20.
1. Ginipai rengbe ani ka gumbaha tipa kumuko Ziazia Kekeapai?
FUGO Yekova, nga Ziazia Kekeapai, si nga buku sa dagba mbaku abuku yo na si a i akparakaha bakere gbe rogo zegino kisusi kura abuku dunduko. I sa kandara paparaha kurogo afugo susi 2,300. Susi ribua bawe rii kama nga ga bange agu aboro naraka auru kpotosende du nani beyo kina rogo gayó afugo.
2, 3. (a) Tipagine du vunduvunduapai ti ni tipa gu yugopai nga ga Ziazia Kekeapai? (b) Gini asanahe ani ka wisigoho?
2 Amirioni aboro nageda apapara Ziazia Kekeapai na aʹuru dunduko. Aguyó aima gedaha naabaha dunduko bara dunguhe tona ti sisihe bani ki da ti sisihe bani. Dungu akutu ariko nga ga apambori nayawee i namaa mburu gayo yugopai kina rii Ziazia Kekeapai, ono i aidanga na gupai si ayugoho te. Gu kurapai berewe naye na vunduvunduapai kuti gipai re nga gu zanga giatise du dagba agu aboro du kina rogo bangisa pambori. Kura aboro nayawee pa enga Ziazia Kekeapai, gbiati pa nyakapaha, si na ngbanyaa dagbaha na sangbaatoro. Dungu aboro nabihe wa ziazia buku tipa kaa zungahe nani watadu tipa maaha bambu gumba-ngbangaa yo tipa aboro naamaa beyo riihe ka gumba rengo.
3 Nirengo, Ziazia Kekeapai nga gu buku duna fugo Mbori rogoho na niguhe duna ome ti ni, watadu si nga gu buku duna pangbangaa rogoho tipa ngbatunga aboro. (AEbere 4:12) Wa du ani ni aDezire Yekova, ani naida aboro wiriki gupai Ziazia Kekeapai ayugoho. Ani na ngbarago tirani ka manga gu sunge Yesu Kristo afuhe fu apefuoko ho ko ayani wee: “Oni ndú . . . ki sa arikaaboro dunduko ni abawiriki . . . ki nirugu yo.” (Matayo 28:19, 20) Rogo gaani sunge tungusapai, ani nagbia ruru ngbadu aboro yo agbia nga aguyo nabaka kina bangiriyo be gu vunduvunduapai nga ga pambori nga gu rengbe na rago dũ rogo zegino. I naida ka ino rengo tipa Bakusirani na i kini idi ka ino gupai Ziazia Kekeapai agumbaha tipa raka. Ani makianga asanahe biata nga gu naye na bakabangirise fu dungu aboro. Rogo agu apai re nibasasa, ani nika kparia gu irairapai abarumbatayo rogo pambori agumbaha, na ani nika bi gupai nzunzu Ziazia Kekeapai ayugoho. Agu asanahe re gere: (1) Ya mo Mbori nangera angera nirengo fuo rani? (2) Tipagine du ani ti ni rogo gi Zegino re? (3) Ginipai ninaamanga rani ho ani akpiko ni?
Ya Mo Mbori Nangera Angera Nirengo Fuo Rani?
4, 5. Tipagine aboro aberã gupai ti ni nga Mbori angeranga fuo rani te?
4 Ani tonanga ha na gu sanahe nga, Ya mo Mbori nangera angera nirengo fuo rani? Si nafu kina gberarago nga, dungu aboro naberãha ya karagapai sa gu sanahe re nga oó. Tipagine i aberãha ti ni wa gure? Bambatapai nga, i naraka rogo gu zegino hi be asogote, avura, na arungo. I nayaa: ‘Wa ka si nidu nga Mbori nangera angera nirengo fuo rani, ka ko enga gi ngbatunga kere arungo re si naamanga aboro te.’
5 Gu kura ndupai aboro aberã gupai ti ni nga Mbori angeranga fuo rani te, si nga abarumbatayo rogo pambori nasa aboro i niiberẽhe wo. Ginipai abarumbatayo rogo pambori naagumbaha dedede ho gberango amanga ni? Ho awiri dee ue akpiki ni be gu béno nga ga tarambiri, gari batungusipai ayaa: “Kina Mbori nakpinyemuhe wo. Ko du niidi kadu na kura amaraika ue.” Ho abarumbatayo rogo pambori afu ngbatunga akaragapai ni wa gure, gupai i amangaha nirengo nga i nabira Mbori tipa gu gbegbereapai namanga. Ono tie, gu bawiriki nga Yakoba akepai ki yaa: “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” (Yakoba 1:13) Yekova Mbori ayengo na gupai du nigbegberehe kuti aboro nirengo te. Nirengo, ‘si turũ aturo ti [ndikidi] Mbori ka manga irairapai.’—Eyobo 34:10.
6. Da du ku gii gu gbegberẽ apai na rungo du rogo gi zegino re?
6 Wa duhe nga Mbori nangera angera fuo aboro, tipagine tie du dungu gbegberẽ apai na arungo ti ni? Ndupai sa dagba akuraha yo nga ngbatunga aboro bakere gbe aima ká gupai nga Mbori du nigayo Bazogo, ka i aidanga ka ra kutii gako ruru arugute ya. Zanga aboro inihe, i dunduko nara kutiibe vura Mbori nga Satana, bambiko “zegino dunduko du ni zogozogoho be gbegberẽ ko.” (1 Yoane 5:19) Pa ino ani gupai re nasaha taata ani girogo gupai du gbegberẽ apai ti ni ho. Satana nga gbigbita boro, irasogote, iranangahe, na nigbegberẽ sino boro. Sidu, ani namaabangirani nga aboro zegino nika yugokpia gu sino ayugo nga ga gaha bazogo. Si airiwongo te, si du du badungu gbegberẽ apai ti ni areme rogo zegino!
7. Gine nga bete ndu agu arungo namanga rani?
7 Gu zangarengba nga ga aboro, si nga kura ndupai naye na agu arungo namanga rani. Aboro ingaapai naʹasada kadu kurii akurayo, na dedede, sangbanaha nga avura, kereapai, na arungo. Batungusipai 8:9 nafura tipaha kina boro bangirihe yo niyaa: “Boro nidu . . . ni gbia ku ri kura ni ka imisa ni.” Gu kura ndupai naye na arungo fu aboro, si nga “rago gbia kuti mamu.” (Batungusipai 9:11) Aboro dedede nagbia agberangbii mbiko i rogo kere rago ti gbegberẽ regbo.
8, 9. Wai ani aino gupai nga Mbori nangera angera fuo rani?
8 Si nga pa wasa ka ino gupai nga Yekova ayengo na arungo fu aboro te. Ono ya mo Mbori nirengo namaa berãko amaa fuo agu apai namanga rani rogo gaani raka? Gu karagapai nafu ngbarago nga ii! Ani nainoho ya Yekova nangera angera fuo rani mbiko gu fugoko naye be gako toro, si nagumba ndu gupai furani ko ambu aboro ti ni i merefuo gbegberẽ mangimangi apai. Gupai Mbori ambu aboro ti ni i merefuo gbegberẽ mangimangi apai, si nakoda nduapai ue: pa gako bakere pagbia naapa ka aboro kuti gayo ruru mangaapai. Wa duhe nga Yekova nga Bakusiahe duna tanduapai dũ, si fuko nidingisoro ko gumba ndu gupai furani ko ambu gene ti ni fu arungo te. Ono wa vura duhe wo, ko nayugo nduhe ayugo bambiko ko nangera angera fuo rani.
9 Ani makianga gu kura gopai nayugo gupai nga, Mbori nangera angera fuo rani. Ziazia Kekeapai nayawee ho ko abi gupai ni nga gbegberẽ apai aima maapai auru kpotosende ti regbo Noa, ‘ngbaduko aimi aima.’ (Bambata Pai 6:5, 6) Ya mo ga Mbori berã tipa gbegberẽ apai areme kia? Oó, bambiko ko asanga asinoko te. (Maraki 3:6) Ko nasoga iraira mangaapai asoga na kini sogo gupai nga rungo naamanga aboro. Ziazia Kekeapai nayugo gupai nga, Mbori nika mangapai amanga barambeda tipa ka dia gu fudifudiapai kusayo naye nisangbana gu zogarago nga ga aboro na be gu maapai kurii aboro nga ga Bakitingbanga. Ya mo anga gu gopai re nakata-mange turani yo nga Mbori nangera angera fuo rani tee?
10. Wai Yekova aberã tipa agu apai aboro arungo behe?
10 Abarumbatayo rogo pambori nafu gbegberẽ bipai tipa Mbori ho i ayani wee gu kereapai namanga rani, Mbori naringbisihe wo. Kuba gure, Yekova na nyemu ka digiso agu apai aboro arungo behe. Bambata Petero 5:7 nayawee “mbiko ko naberã pa roni [aberã].” Si nga gupai nzunzu Ziazia Kekeapai ayugoho!
Tipagine Du Ani ti ni Rogo Gi Zegino Re?
11. Giniapai agu apambori du rogo zegino agumbaha dedede tipa ga aboro raka auru kpotosende?
11 Ani makianga gu ue sanahe awere nga gu nairiwo ti dungu aboro nga, Tipagine du ani ti ni rogo gi zegino re? Agu apambori du rogo zegino nafu karagapai dedede nga aboro naraka auru kpotosende herẽ gbua tipa wiri guru regbo. I nabi gi zegino re wakina ba-ongoda watadu papara nunguro kurogo kura rago. Bete abarumbatayo rogo pambori nayugo gu zire yugopai nga, rogo kura uru sa, Mbori nika gberesa kpotosende agberesa. Nisangbana gu yugopai re, dungu aboro dakuti gu digisopai ngawee si niwenepai i gbia ngbarago be wene raka kindi awere mbiko kina kpio napido yó. Ginipai nzunzu Ziazia Kekeapai ayugoho tipa ndu gupai du ani ti ni rogo gi zegino re?
12-14. Ginipai Ziazia Kekeapai ayugoho nibipa ga Mbori ringbisapai tipa kpotosende na tipa ngbatunga aboro?
12 Mbori na bawene ringbisapai beko tipa kpotosende na tipa ngbatunga aboro. Ko “amanga nga . . . [kpotosende] ni kungba he te,” ono “ko ambakadi he [tipa] aboro niraki rogo ho!” (Yesaya 45:18) Kurigure,Yekova ‘amoi amburu kpotosende ka i agbisanga ha waragoagira ya’ watadu si nika nye anye kindi. (Atambuahe 104:5) Pa wirika ani agi apai re tipa ga Mbori ringbisapai tipa kpotosende na tipa ngbatunga aboro, si naundo rani ani gi ndu gupai du ani ti ni rogo gi zegino re.
13 Bambatapai Kapita 1 na 2 nayugo gupai nga Yekova aduna bakere rubangirise rogo mbakada kpotosende tipa ngbatunga aboro naaraka auruhe. Niyangaraha, Mbori abi agu ahe dunduko ko amangihe rogo yangara uru kusaahe, oni ngere “si kidu ni wene he gbe.” (Bambata Pai 1:31) Mbori ki moi bambata kumba na dee, nangia Adamu na Eva, rogo bawene ati nangia Edene na ki fu bawene ariahe fuyo kpaima. Mbori ki ya fu gi bambata aboro re: “Oni zúga azuga, ki nge ange, ki hisi kpotosende . . . ki zogo ho.” Si adu nga i batika rengberengbe agude, na ki kiisi gayo ngbanda kporo si rengbe na arago dunduko rogo zegino na kini zogo anyaa rogo nyemuse.—Bambata Pai 1:26-28.
14 Ga Yekova ringbisapai ngawee ko naida ngbatunga aboro naaraka auru kpotosende nyeanye kindi. Fugo Mbori nayaa: “Ruru aboro adia kumbo ringara, [na] ki nye anye kindi.” (Atambuahe 37:29) Ii, gupai Mbori aaidaha nga ngbatunga aboro gbia ngbarago be nyenye unga rogo Paradizo kpotosende. Gure nga ga Mbori ringbisapai, na si nga gupai nzunzu Ziazia Kekeapai ayugoho!
Ginipai Ninaamanga Rani Ho Ani AKpiko Ni?
15. Ginipai dungu apambori rogo zegino ayugoho tipa gupai ninaamanga rani ho ani akpiko ni?
15 Awere, ani sakinga pai tipa gu biata sanahe nga gu naye na abakabangirise fu dungu aboro: Ginipai ninaamanga rani ho ani akpiko ni? Dungu apambori rogo zegino nayugo gupai nga, kura he kina rogo boro yo naraka kindi fuo kpio ní. Bete ariko nga ga apambori ka kindi kuti gu berã nga Mbori nambusa gbegberẽ aboro ambusa rogo iferno. Ono ya mo rengo ngaha? Gine nzunzu Ziazia Kekeapai ayugoho tipa kpio?
16, 17. Ringbisihe kuti Ziazia Kekeapai, gini sino apai ninaamanga ti regbo kpio?
16 Fugo Mbori nayaa: “Agu . . . [aboro] du ni ungayo i ini he ya i akpí akpi, ono kpikpi aboro aina nga pai te, kura mosoro du nga fu yo a te.” Wa duhe nga kpikpi aboro “aina nga pai te,” ka i ginga pai te, ka i bingo he te, ka i ininga pai te, na ka i berẽnga pai a te. Gu mosoro i anaagbiaha mbata, i agbianga ha berewe wagu tooni te. Wiripai ho du tipa yo berewe te! I arengbanga ka manga kandara wiri sunge te! Kurigure, “gayo nyemuse ima kpi na gayo sogote na gayo kpihe a,” i arengbanga ka yugo nyemuse watadu sogote te bambiko i ti ni te.—Batungusipai 9:5, 6, 10.
17 Gupai Ziazia Kekeapai agumbaha tipa gipai re, si taata na kidu ziazia nga, kpikpi aboro arakanga rogo kura rago kindi fuo kpioyo te. Gu kura he ho naguari rogo kpotorani yo ti regbo kpio rani naraka kindi tipa ka rimo kurogo kura kpoto i batikaha berewe, wa gu ida nga ga kura aboro te. Ani yugungo ho na kpiapai ngba gi gene re: Gu raka ani agbia ngbarago behe, si wakina mirawe nga ga baro. Ho mirawe abiso ni, si andunga kurogo kura rago te, gupai namanga gbua nga si nabiso.
18. Ho bawiriki Ziazia Kekeapai aino gupai ni nga kpikpi aboro ainingo pai te, gini digisopai ní ada kuti ni?
18 Oni berẽnga pa gupai gu rengo re ayugoho. Ho bawisigi Ziazia Kekeapai aino gupai ni nga kpikpi aboro ainongo pai te, ní nada kuti gu digisopai nga pai ho gu imisiringbaduse gbiati gu zinga nadu ti agu atitaní nakpiki narengbe ka mangaha te, i arengbanga ka fuda ní te. Sidu, i arengbanga ka fu mbusa funi te. Na ní naruga tiní na gupai nga, agu agumení nakpiki arengbanga ka giapai te, ka i bingo he te, ka i furanga te, na ka i berẽnga a te. Sidu, anga i nisayo rogo paragotorio watadu gu ba i aya tipaha wee si nga ba-mbusa aboro na we te. Ono tie, Ziazia Kekeapai nayugo gupai nga, gu kpikpi aboro dunduko du rogo ga Mbori tingidapai yo, i azinga azinga. Nangbaa gu maabangirise re!—Yoane 5:28, 29.
Vovo Buku Tipa Gaani Sunge
19, 20. Wadu ani ni aKristano, gini sunge du berani, na gini buku duho naundo rani rogo wisigo Ziazia Kekeapai i ambakadihe tipa sunge tungusapai?
19 Ani makia kina agu asanahe biata dungu aboro ainongo karagapai tipaha ya. Rogo agi apai re nibasasa, gupai Ziazia Kekeapai ayugoho, si ziazia na zukazuka. Nairiwo gu ngbarago ka ani gbiaha ka ani tungusi gu rengo re fu agu aboro naida ka ino gupai Ziazia Kekeapai ayugoho! Ono badungu nyanyakipa asanahe duho agu aboro duna ruru ngbaduyó yo aida ka gbia akaragapai tipaha. Wadu ani ni aKristano, ani na gu sunge berani nga ka undoyo i gbia karagapai tipa ngbatunga agu asanahe re.
20 Si nikpakarapai ani yugu gu rengo nga ga Ziazia Kekeapai ngba gu gene du ziazia na si ki zi ngbadu aboro yo. Tipa ka undo rani ani mangipai tipa gu kpakarapai re, ‘ruru kangara moyambu’ ima mbakada buku tipa ani naamangasunge nani rogo gaani sunge tungusapai nga ga aKristano. (Matayo 24:45-47) Gi buku re na akpewaraga 224 rogoho, na rimoho nga What Does the Bible Really Teach?
21, 22. Gine nga gu bete nyanyakipa apapara gu buku nga What Does the Bible Really Teact? nagbeberã rani?
21 ADezire Yekova akusi gi buku re ti regbo gu gayo Kikindigi ADunguratise Nangia ga Aʹuru Biata riihe adu nga, “Giasangba Mbori,” nga gu namangi rogo agu agarã nangia 2005 na 2006. Gi buku re na dungu apai tipaha nibakiakia. Nikpiapai, gaha tonatona afugo rogo akpewaraga bisue na si niwenehe tipa tona wisigo Ziazia Kekeapai na boro kpuni yo. Si nawiraha nga, si adu furoni taata ka tona sakapai na aboro na gu kpia aboro gbiati agu averesi du patihe. Oni rengbe arengba ka mangasunge na gi paparaha re ka yugo gupai nani fu gu boro oni awisigopai na ní re tipa wai rengbe ní ka ino bara akapita na averesi rogo Ziazia Kekeapai.
22 Gu gene i ake gi buku re ngbaha, si taata na ziazia. I ima manga asadatise ka rimisopai ku ngbadu bawisigipai yo nikoda yó ní kurogo gu sakapai re. Akapita nibasasa duna asanahe nitonatona afugo gbiati sanduki ti digido papara kekepai. Sanduki na akaragapai nga ga Ziazia Kekeapai rogoho tipa agu asanahe du ti tonatona papara kekeapai. Bawene kpiaahe na gu keke-keke-apai du tipaha wa sa na keke kpiaapai rogo gi buku re nika undo gu bawisigi Ziazia Kekeapai re ní zi gi vovo berã re kuriní yo. Wa vura duhe nga agu apai du rogo gu buku re i akehe rogo taata afugo, zungudizungudiapai gu du kinaho nika undo roni oni wisigi nyanyakipa riiapai 14 sirisiri ka gu bawisigi Ziazia kekeapai re aida kura apai.
23. Gini aberã fuuyó ho nibipa wisigo Ziazia Kekeapai na boro rogo gu buku nga Bible Teach?
23 I ambakadi gu buku nga Bible Teach ka undo rani ani yugupai fu aboro du gayó inohe nga ga sukuru nibakiakia na gayo apambori a nibakiakia. Kangia gu bawisigi Ziazia Kekeapai re na wiri inohe tipa Ziazia Kekeapai te, oni nikaa wisigo kapita susi bara sa tipa ka nyasaha na ní. Ka oni oronga na ní rii apai ya, ono oni asadi tironi ka sa pai si zi ngbaduni yo. Kangia ní agianga rogo gu yugopai na kpiapai fuuyó ho funi rogo gu buku re te, oni sakipai tipaha funi watadu oni fu kura kpiapai. Oni mbakaditironi wenengai, oni asadi tironi ka mangasunge na gi buku re wenengai, na oni kpari fu Mbori tipa ko undo roni oni ‘naayugo rengo nzunzu.’—2 Timoteo 2:15.
Oni Duna Tambuahe Tipa gu Nyanyakipa Amamu Re
24, 25. Gini kikiipa mamu Yekova nafuhe fu gako aboro?
24 Yekova fu nyanyakipa amamu fu gako aboro. Ko undo rani ani ini gu rengo du tipa ko. Ka ani zanganga duna tambuahe tipa agu mamu re ya! Nirengo, Mbori aima oka gako ringbisapai be airarukö ono ko akusihe fu aboro umbasitise. Nibi gipai re, Yesu ayaa: “Mi natambua ro, Ako Buba, Gbia ngbangbaturũ na sende, bambiko mo aoko agi apai re bangiri airatatamana na arugutinapai, ki kusi he fu fogo agude.” (Matayo 11:25) Pa manga boro sunge fu Yekova, nga Bakindo Zegino dunduko, si nigu mamu angenga be aboro ya.
25 Mbori fu kura mamu furani a nga ani yugupai fu kura aboro tipa ko. Oni tingidi gupai nga, aboro agumbanga rengo tipa ko te, ono kina aziree i naayugoho tipa ko. Si ki ta du were, dungu aboro kini mo kaa bi Yekova wakina kere boro, kini berẽ gupai nga ko angeranga fuo rani te na ko amaanga berãko fuo aboro a te. Wa duhe tie were, oni na nyemu ka rugusa gi irairaapai re bangiri aboro? Oni naida gupai nga agu aboro duna ruru ngbaduyó yo rogo arago dunduko, i ini rengo tipa Mbori? Nirengo, si naida oni yugu gupai nga oni nagiasangba Mbori nitungusa oni pai zaaza na kini yugu gupai fu kura aboro Ziazia Kekeapai agumbaha riipa nyanyakipa apai. Agu aboro nagbata rengo, i naida ka ino gupai nzunzu Ziazia Kekeapai ayugoho.
Gaoni Akaragapai Nga Gine?
• Wai ani aino gupai nga Mbori nangera angera fuo rani?
• Tipagine du ani ti ni herẽ auru kpotosende?
• Ginipai ninaamanga rani ho ani akpiko ni?
• Gini apapara gu buku nga Bible Teach ngbaa tironi gbe?
[Gu kpiahe du ti kpewaraga 7]
Kuari ku kumbabee yo, degude: © Bruno Morandi/age fotostock; ku garebee yo, dee: AP Photo/Gemunu Amarasinghe; kusende ku kumbabee yo, agu aboro naoro be vura: © Sven Torfinn/Panos Pictures
[Gu kpiahe du ti kpewaraga 7]
Ziazia Kekeapai nayugo gupai nga, arungo nika nyasa anyasa barambeda
[Gu kpiahe du ti kpewaraga 9]
Ruru aboro araka rogo Paradizo nyeanye kindi