Oni Undo Kura Aboro I gisangba Gupai Ziazia Kekeapai Ayugoho
“Gu i nimi rogo mbudu sende, i nga agu yo nigi gupai re mbiko weneringiyo na gu rengo du kpotoyo yo, i ki ka kuti ni, ki nizu azu rogo hipai.”—RUKA 8:15.
1, 2. (a) Gini ringbisapai i ambakadihe tipa gu buku nga What Does the Bible Really Teach? (b) Vuru agu agarã susi, wai Yekova afu maku kurii gu bakere asadatise nga ga gako amoyambu rogo sunge sa aboro ni abawiriki?
NAZAKIGENE ni Dezire Yekova afura tipa gu buku nga What Does the Bible Really Teach?a Ri ayaa: “Gi buku re nga bawene buku kisusi. Agu aboro mi naawisigo Ziazia Kekeapai naayó, si ima ngba tiyó bakere gbe. Kina wo ngbaha tire a. Gi buku re naundo boro tipa ní tona wisigo Ziazia Kekeapai na aboro kina boro ngbadimo kpuyo.” Sosono batakipande Kindo sa afura tipa kina gu bangisa buku re ki yaa: “Mi aima du na mamu bere tipa ka undo dungu aboro i ini Yekova vuru agu agarã 50 mi amangisunge tungusapai rogoho kakaka. Ono ruhe aru mi yaa, gi buku i amangihe tipa wisigo Ziazia Kekeapai na boro re, si nga bawene buku kisusi. Gu wene kpia aboro du rogoho na akpiapai, si nibawenehe kisusi.” Ya mo kinawo du gaoni bipai tipa gu buku nga Bible Teach re? I ambakadi gi buku du mburuhe rii Ziazia Kekeapai re tipa si undo roni oni digisi gu ga Yesu zinahe nayaa: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.”—Matayo 28:19, 20.
2 Zanga kapa, Yekova na ngbarago ka bi gu gako aDezire du bangeyo wa 6,600,000 i niʹirisi ga Yesu zinahe na nyemuhe, nga gu zinahe du tipa sa rikaaboro ni abawiriki. (Asanza 27:11) Yekova nafu maku afu gbaiga kurii gayó bakere asadatise. Nikpiapai, rogo gu garã nangia 2005, i atungusi wene pangbangaa rogo aringara nga 235, na bange agu aboro nawisigo Ziazia Kekeapai asusi 6,061,500. Nisangbana gipai re, dungu aboro ‘agi ga Mbori pai na ki idi kuti ni, i adianga ha wa fugo aboro te, ono a wa duhe nirengo nga Fugo Mbori.’ (1 ATesaroniko 2:13) Vuru agu agarã susi kusayo ue re, vovo abawiriki bangeyo nasusi bebere mirioni sigira gayó raka ringbisihe kuti ga Yekova arugute na ki kpara gayó raka fu Mbori.
3. Gini asanahe duho nibipa mangasunge na gu buku nga Bible Teach ani ka wisigoho rogo gi papara kekeapai re?
3 Oni agbianga ngbarago barambeda rogo sunge wisigo Ziazia Kekeapai na boro? Rogo zegino dunduko, badungu aboro kinaho du ‘niweneringiyo na kidu na rengo kpotoyo yo,’ nga aguyo nagia Fugo Mbori “i ki ka kuti ni, ki nizu azu rogo hipai.” (Ruka 8:11-15) Ani makianga wai rengbe oni ka mangasunge na gu buku nga Bible Teach rogo sunge sa aboro ni abawiriki. Ani nika wisigo asanahe biata rogo gaani sakapai: (1) Wai rengbe oni ka tona wisigo Ziazia Kekeapai na boro? (2) Gini agene yugopai ngbaa gbe? (3) Wai rengbe oni ka undo boro ka ní dunga ni kina wirikipai sa ya, ono ní da a nibayugu Fugo Mbori, nga gu du nikekehe rogo Ziazia Kekeapai?
Wai ka Tona Wisigo Ziazia Kekeapai na Boro
4. Tipagine rengbe kura aboro ti ni kadu na ndundu tipa wisigo Ziazia Kekeapai, na wai rengbe oni ka undoyo i di be gi ndundu re?
4 Ka oni andu gene oni kini bi ime-mai boro kini ya furoni wee oni gu agu riihe, oni duadu na ndundu tipa oni ka ba nduroni kurogo dogoro. Ono ka si du nga ambia kinaho i abafuhe bangiri gu ime-mai re tipa aboro ndu riihe, oni dunga na ndundu te. Kinawo duhe a tipa gu boro duna bakere sunge tiní, ní rengbe kadu na kina ndundu tipa ka wisigo Ziazia Kekeapai. Irakporo rengbe ka bihe nga si naida bakere regbo gbiati asadatise tipa ka wisigoho. Wai rengbe oni ka undo ní ní dibe ngbatunga gi ndundu re? Nimanga oni bete sakapai na ní niguruhe, oni rengbe ka mangasunge na gu buku nga Bible Teach tipa ka tona wisigo Fugo Mbori na ní dedede. Kangia oni mbakaditironi wenengai, agu akaragatise nibasasa oni ka mangaha fuo ní adu funi wakina gu mbia bafu yó ho bangiri ime tipa ní ndu riihe ka zio bakure na Yekova.
5. Tipagine si aida ti ni oni gedi gu buku nga Bible Teach?
5 Ono tie, mbata fu oni undo kura boro ní gbia undo rogo gu buku nga Bible Teach, si naida oni inidi tironi nani wenengai mbata. Ya mo oni gedinga gi buku re tona ti tonatona ki da ti digidoho? Kumba na diako adi gi buku re naayó ti regbo gayó ongoda ti sunge na kini gedihe ti agu aregbo i anaaongoda pavuru di. Ho gu dee nanaabagaahe rogo gu dagbarago re fu agu aboro ninaata kaa biko arago atona fugo ni naayó, ri akparia rimo gu buku nga What Does the Bible Really Teach? re. Ri ape gupai fuyó nga, gu bete asa susi kusayo, ri nifu kpee tipa kina ngbatunga gu sanahe du ti kpoto gu waraga re na ki sana Mbori tipa ko karagapai furi. Agi arogotise re aduna ngbarago tipa ka fu wirina gu buku re furi. Ya mo oni ‘ngbenga regbo’ tipa ka geda gi buku re, singia bara ue, baraho oni apido boro ni watadu ho oni aongoda ni basunge yo watadu sukuru yo? (AEfeso 5:15, 16 NW) Ka oni mangihe wo, oni nika inido tironi ainido na gi buku naundo rani rogo wisigo Ziazia Kekeapai na boro re na si ki rengbe ka fu mamu furoni tipa ka fura na aboro tipa gu riiapai du rogoho.
6, 7. Wai rengbe oni ka mangasunge na gu buku nga Bible Teach tipa ka tona wisigopai na boro?
6 Ho oni afu gi buku re ni fu boro gene tungusapai yo, oni mangisunge na wene akpiapai, averesi, gbiati agu asanahe du ti kpewaraga 4, 5 na 6. Nikpiapai, oni rengbe ka tona sakapai na gu sanahe nga, “nibi gu kpakarakpakarapai nafuda ngbatunga aboro areme, ginipai bi oni he tigaoni ya si rengbe ka undo aboro?” Fuo dega oni turoni wenengai kuti gani karagapai, oni gedi 2 Timoteo 3:16, 17, na ki saki gupai funi nga Ziazia Kekeapai nafu ndikidi ziga tipa gu kpakaraapai nafuda ngbatunga aboro. Fuoho, oni gbeberã ní kuti kpewaraga 4 na 5, na ki sana ní nga: “Nibi agu apai yugu yó ho nikpiapai rogo agi akpewaraga re, ginigu fudi roni gbe?” Ho ní nika yugo gu kuraha ni sa dagbaha yo, oni ki fu wirina gi buku re funi baraho oni kaa geda gu veresi ni rogo Ziazia Kekeapai nga gu nafura tipa gupai re. Fuo gure, oni gedi kpewaraga 6, na ki sana ní ki yaa, “Nibi agu asanahe du sita furayo tipaha vuru gi kpewaraga du re, ginigu oni aida i karagapai furoni kuti ni?” Ho gu boro re ka sia gu kuraha ni sa, oni ki yugu gu kapita funi nakaragapai kuti gu sanahe re, fuoho, oni ki mbu gu buku re funi, na ki mangi wene mbakadapai tipa ka karaga tironi berewe fuo ní tipa ka sakapai riipa gu sanahe re.
7 Gi tonatona fugo fura ani tipaha re, si naida si di aminiti bisue gbua. Vuru agu miniti du bisue re, oni ini gupai nabi gu irakporo re, na ki gedi averesi funi ue, nga gu nika sa gupai nga oni karaga tironi berewe fuo ní. Gaoni guru sakapai na irakporo rengbe kadu nga gu bawenepai nafu ngarasaro na wasa gbia ní he fuo ngbanga regbo. Nisangbana gipai re, zavura gu boro adunga regbo beni ya, ní rengbe arengba ka dia bete aminiti na oni wa oni ka undo ní ní tona nduge ngba ‘gu gene nandu koyo du unga ni.’ (Matayo 7:14) Fuo bete aregbo kusa, wa gu nyemupai du ti irakporo kaa sona, si naida oni kiisi gu regbo du tipa wisigopai a. Oni rengbe ka manga gipai re nisungo oni tipa ka wisigopai nigbangaha tipa gu regbo daada.
Agu Agene Yugopai Ngbaa Gbe
8, 9. (a) Wai rengbe oni ka mbakada gu boro oni awisigo Ziazia Kekeapai na ní tipa ní mangipai kuti gu fudifudiapai gbiati aʹasada rengbe ní ka gbia tiní nani? (b) Wari rengbe ani ni ka gbia agu ahe kaa ritanga be we ya tipa ka nyakasa gaani idapase nani?
8 Bara sa kindi gu boro re natona ka giasangba gupai Ziazia Kekeapai ayugoho, ní rengbe arengba ka gbia tiní na kpakaraapai nga gu rengbe ka kandasi ní rogo toroyo. Gu mokedi nangia Pauro ayaa: “I arúngosi agu yo dunduko ka kpi nyemu ka kuti sino Mbori wa du yo ni ungayo rogo Kristo Yesu yo a.” (2 Timoteo 3:12) Pauro aringbisihe kuti gu we rengbe ka zo bambu, agu aũhe ayanyakanga ya ki riti be we, ono agu aũhe duwa dahabu, feda na agu ambia kii genoho, ka si aritanga be we ya. (1 AKorindo 3:10-13; 1 Petero 1:6, 7) Tipa oni undo gu boro oni awisigo Ziazia Kekeapai na ní ní sonosi agu asino ka si vura du nga ní gbia tiní na kpakarapai ní ki rengbe arengba ka ru nyanyakii, si naida oni undo ní tipa ní sonosi gu idapase duwa agu ahe kaa ritanga be we ya.
9 Bake apapara atambuahe aringbisipa “gu gumbapai nga ga Yekova” kuti “gu feda i afurusi he rogo gbigiwi yo auru sende, ki furusi he bara saba.” (Atambuahe 12:6) Nirengo, Ziazia Kekeapai na dungu wene aũkumuko rogoho nga gu rengbe ani ka mangasunge nani tipa ka nyakasa gaani idapase. (Atambuahe 19:7-11; Asanza 2:1-6) Na gu buku nga Bible Teach, si nayugo wene sangbana mangasunge na Ziazia Kekeapai.
10. Wai rengbe oni ka gbeberã gu boro oni awisigopai na ní kuti Ziazia Kekeapai?
10 Ti regbo wisigopai, oni gbeberã gu boro nawisigo Ziazia Kekeapai re kuti agu averesi du rogo agu akapita nibasasa oni awisigoho. Oni mangisunge na asasanahe tipa ka undo bawiriki Ziazia Kekeapai ní girogo gu bangua averesi nga ga Ziazia Kekeapai na ki asadi tiní ka mangaha rogo gani raka. Oni bandatironi, ka oni gumbanga gupai funi si aida ní mangihe ya, kina ní diberã nitiní ka mangaha. Kuba gure, oni wiriki gu kpiapai nga ga Yesu. Ho gu kumba nangia bainiparugute asana Yesu ni, Yesu akaragapai fuko ki yaa: “I ake gini pai rogo rugute? Mo na geda ha wai?” Gu kumba re akaragapai kina rogo Ziazia Kekeapai, na Yesu ki undo ko tipa wai rengbe ko ka manga agu arugute re nitiko. Yesu amangisunge na kpiapai ka undo gu kumba re ko bi wai gu yugopai re arengbe ka manga ariapai rogo gako raka. (Ruka 10:25-37) Gi buku nga Bible Teach re na dungu akpiapai rogoho nga gu rengbe oni ka undo gu boro nani oni awisigo Ziazia Kekeapai na ní tipa ní fu tiní kaa manga agu andiko du rogo Ziazia Kekeapai yo.
11. Bange agenewaraga wai si aida oni wisigihe ti regbo awisigopai nibasasa?
11 A wa Yesu anaagumba agu afugo du taata tipa ka yugo agu apai nadu nikpakarakpakaraha tipa ka giarogoyo, kinawo a gi buku re amangasunge na agu afugo du taata tipa ka sakarogo Fugo Mbori yo. (Matayo 7:28, 29) Oni pekefuo gako kpiapai. Si naida oni mangisunge na agu afugo du taata baraho oni ayugopai ni fu boro. Oni yugupai fu boro na agu afugo rengbe ní arengba ka giarogoyo, si kidu niziaziaha, na niruruhe. Ka oni naaoranga ora gbua rihe ya. Kuba gure, oni mbu agu apai du tipa ní na wai du gani giarogopaiyo tipa ní diberã tipa bange gu agenewaraga si aida oni wisigihe ti regbo awisigopai nibasasa. Yesu aima ino gu giarogopaiyo nangia ga gako abawiriki na ka ko aidanga ka fura fuyó susi gu i arengbe ka zioho kuriyo yo tigu regbo ko anaayugopai fuyó ya.—Yoane 16:12.
12. Wai si aida oni mangisunge na gu zungudizungudiapai du 14 rogo gu buku nga Bible Teach?
12 Gu buku nga Bible Teach, si na zungudizungudiapai rogoho nga gu duna ariihe 14. Nibi gu nyemupai nga ga bawirikipai, na ní du oni nigani bayugupai, oni du si aida oni diberã tipa wai rengbe oni ka mangasunge na gi buku re wenengai ti regbo wisigopai. Nikpiapai, ka si du nga si nikpakarakpakaraha fu gu boro nawirikipai tipa ka giarogo gupai ní awirikaha, watadu ní na kura asanahe ngbani riipa kura apai nibi gu ida ní adu nani mbata, si daada oni gbeberã ní kurogo gu riiapai daada dagba gu zungudizungudiapai du 14 na ki mbu ní kina ní makiaha nitiní. Ngba kura gene, ní rengbe ka kpinyemu oni nyasi gu kapita anyasa dũ oni awisigoho ti bangisa regbo. Gu zungudizungudiapai re na wene riiapai rogoho nga ga Ziazia Kekeapai, wa ngbatunga gu nga “‘Soul’ and ‘Spirit’—What Do These Terms Really Mean? (‘Mbisimo’ na ‘Toro,’ Rogo Agi Apai re Nzunzu Nga Gine?)” na “Identifying ‘Babylon the Great’ (Wai ka Ino ‘Babera Duna Bakere Ome Ti Ni.’)” Oni rengbe arengba ka saka gu riiapai re na gu boro oni awisigo Ziazia Kekeapai na ní. Wa duhe nga asasanahe ho fuuyó ho tipa gi riiapai du nizungudizungudihe re te, si naida oni inidi tironi wenengai mbata na agu apai du rogoho tipa ka ru ho ka kusa agu asasanahe duna rogoyo ti ni.
13. Ginipai kparakpee amangaha rogo nyakasa idapase?
13 Atambuahe 127:1 nayaa: “Ka Yekova nadua nga bambu ya, agu yo nadua ha i namanga sunge gbua.” Sidu tie, wa oni ambakada tironi tipa ka wisigo Ziazia Kekeapai na boro, oni kpari fu Yekova ko undo roni. Gu kparakpee oni ka mangaha ti tonatonaha na ti digidoho, si naida si yugu gaoni dawedawe ngbanyaa na Yekova. Oni ngarasi gu boro nawirika Ziazia Kekeapai re tipa ní naakpara fu Yekova ko fu tatamana funi ní girogo Fugoko yo na ko fu ome funi tipa ní niimangi gako arugute. (Yakoba 1:5) Ka ní mangihe wo, ní nika gbia ome tipa ka hi aʹasada na kini sono kumbatayo nyanyakii rogo idapase.
Oni Undo Abawiriki Ziazia Kekeapai Tipa I Dani Abayugupai
14. Gini sona kumbatayo si aida abawiriki Ziazia Kekeapai mangihe?
14 Kangia gaani abawiriki Ziazia Kekeapai nika manga agu “apai dunduko” Yesu azinahe fu gako abawiriki i mangihe, si naida i sono kumbatayo ki guari ti wirika Fugo Mbori na ki sa tiyo ni abayuguhe. (Matayo 28:19, 20; Amokedi 1:6-8) Ginipai rengbe oni ka mangaha tipa gu boro nawirika Ziazia Kekeapai mangi ngbatunga gu sona kumbatayo rogo toroyo re?
15. Tipagine si aida ti ni oni ngarasi gu boro oni awisigo Ziazia Kekeapai na ní tipa ní ye kupati agu adunguratise nga ga aKristano?
15 Nibasa tingbafuo bambata wisigopai, oni yambu bawiriki Ziazia Kekeapai ní ye kadu pati agu adunguratise nga ga dungurati na oni. Oni sakirogoyo funi nga ba dunguratise nga gu ba oni agbia rabahe rogoho tipa ka duni abayugu Fugo Mbori. Fuo bete aposo, oni di bete aminiti fuo nyasa oni wirikapai tipa ka sakapai funi tipa gu ringbisapai du tipa agu arugute nga ga toro oni agbiaha ti regbo adunguratise nibasasa na ti regbo kikindigi adunguratise a. Oni fura na ngbarago tipa agu aundo oni agbiaha ti regbo agi adunguratise re. (AEbere 10:24, 25) Bara sa kindi bawiriki Ziazia Kekeapai natona kaa ye kupati adunguratise dedede, gure nga ní ima rengba kada nibayugu Fugo Mbori.
16, 17. Gini kura bete asásá duho rengbe gu boro nawirika Ziazia Kekeapai ka maaha na ki da ti ni?
16 Oni undo gu boro nawirika Ziazia Kekeapai ní sigira agu asásá si aida ní da ti ni. Nikpiapai, oni ngarasi ní ní gumba agu apai ní awirikaha fu abakureani gbiati agumeni. Berewe a, oni fu berã funi tipa ní moi gu sásá nga ga geda Ziazia Kekeapai naabaha dunduko. Kangia oni nika undo ní ní sigira geda Ziazia Kekeapai na ki kakuti gedaha dedede, si nika undo ní fuo ngbanga regbo kumbatayo fuo zio ní bapatiza. Kurigure, tipagine ka oni afunga berã ti ni fu gu boro nawirika Ziazia Kekeapai ní moihe nigaani sásá kaa tingida kandara veresi sa nga gu nakaragapai kuti gu bangua sanahe du rogo agu akapita nibasasa nga ga gu buku nga Bible Teach re ya? Nimanga oni he wo, ní nikadu ní ‘gu mangisunge adunga na zee ya, niyugu gupai nga ga rengo nzunzu.’—2 Timoteo 2:15.
17 Kuba gupai nga oni naayugo gupai funi gbua nga ní niipe averesi ngbarini watadu ka gumba gu mangupai si afura tipaha, oni ngarasi ní tipa ní naasaka wai kura averesi nga ga Ziazia Kekeapai afura baraho ní afu karagapai ní fu agu aboro nika sana ní tipa gaani idapase. Pa yugo oni he wo funi nimangimangi kpiapai rengbe arengba ka undo ní. Wa oni ka mangaha, oni du funi wa gumeni watadu gaani badiasunge nasana ní tipa ní sakipai riipa gani aida. A wa ní akaragapai, oni yugupai funi tipa wai rengbe ní ka karagapai fu aboro “ni zera na irisa.”—1 Petero 3:15.
18. Ho gu boro nawirika Ziazia Kekeapai narẽ ni kadu nigu batungusipai ataziongo bapatiza ya, gini kura aundo rengbe oni ka fuhe funi?
18 Fuo bete aregbo kusa, gu boro nawirika Ziazia Kekeapai re rengbe ka rẽ tipa ka rimiso tiní kurogo sunge tungusapai. Oni nyakasi gupai funi nga mamu du ngaha nga i idihe funi ní tona sunge tungusapai. (2 AKorindo 4:1, 7) Bara sa kindi abaakumba nadiberã nga gu boro nawirikapai re ima rẽ kadu nigu batungusipai ataziongo bapatiza ya, oni undo ní ní mbakadi gu tonatona fugo na boro du taata, na fuoho, oni ki gasi ní ku gene tungusapai yo. Oni ndu kumbatayo kaa undo ní rogo kparakpara agene nga ga tungusapai, na kini yugupai funi wai ka mbakadatise tipa gu karagatise fuo boro du na wene sangbanaha ti ni. Gaoni wene kpiapai nika undo ní wenengai ní mangihe wo.—Ruka 6:40.
“Mo Abátasa Tiro na agu Yo Nagia Paha Ngba Ro”
19, 20. Gini sásá si aida ani du nani berani, na tipagine?
19 Zanga kapa, si naida bakere ome tipa ka undo boro ní dati “gu inahe nga ga rengo.” (1 Timoteo 2:4) Ono tie, ngenga agu angbarago rengbe boro ka gbiaha rogo gani raka susi gu ní agbiaha mbiko undo ní boro ní gisangba gupai Ziazia Kekeapai ayugoho te. (1 ATesaroniko 2:19, 20) Nirengo, si niʹiiriwo mamu nga ani du niga “Mbori abadiasunge” rogo gi sunge tungusapai namanga rogo zegino naabaha re!—1 AKorindo 3:9.
20 Bara mbeda kumbatayo, Yekova nika mangasunge na Yesu Kristo gbiati amaraika tipa ka sarangbangaa agu aboro “aina nga Mbori ya, na agu yo agia nga sangba wene pangbanga nga ga gaani Gbia Yesu ya.” (2 ATesaroniko 1:6-8) Ga aboro raka awere ngbapai. Ya mo oni rengbe ka maaha nigaoni sásá kaa wisigongo Ziazia Kekeapai na boro kandara sa rogo gu buku nga What does the Bible Really Teach? A wa oni arimiso tironi kurogo gi sunge re, oni na mamu beroni ka ‘batasa tironi na agu aboro nagia paha ku ngbaroni.’ (1 Timoteo 4:16) Awere tie nzunzu nga gu regbo si aida ani undo aboro niipiipihe tipa i gisangba gupai Ziazia Kekeapai ayugoho.
Ginipai Wiriki Oni He?
• I akusi gu buku nga Bible Teach tipa gini ringbisapai?
• Wai rengbe oni ka tona wisigo Ziazia Kekeapai na boro nimanga oni sunge na gu buku nga Bible Teach?
• Gini agene yugopai ngbaa gbe?
• Wai rengbe oni ka undo gu boro nawirika Ziazia Kekeapai ní da nibayugu Fogo Mbori?
[Gu rukutu kekeapai du bandu kpewaraga yo]
a Si nga gu buku aDezire Yekova akusihe.
[Gu kpiahe du ti kpewaraga 11]
Ya mo oni namangasunge na gi buku re ngba ruru gene?
[Gu kpiahe du ti kpewaraga 11]
WHAT DOES THE BIBLE Really TEACH?