Ruru Inohe Rogo Fugo Mbori Nafu Wasa fu Rani

TIPA kura aboro, gupai Ziazia Kekeapai agumbaha tipa ga Mbori nyemuse gbiati inapai nakusa kina agu asanahe nafuda yo berãyo yo. I nasanahe niyaa: Kangia Mbori naida ka dia gbegbereapai kusayo, na ki ima ino wai ka mangaha, na ki duna ome tipa mangaha, tipagine gbegbereapai amaapai ti ni kindi kina kumbatayo? Tipa yo, gupai nafuda yo nga ka maa agu apai biata naye re zanga si tagbagatihe: (1) Mbori na ome apai dunduko beko; (2) Mbori nga boro nyemuse na ki duna weneringise; na (3) kereapai namanga kindi kina kumbatayo. I nasakapai berãyo yo niyaa, wa duhe nga gu yangarapai nga namba biata re namanga amanga zanga kangoho ti ni, si tie ziazia nga, kandara gu sa dagba agu akuraha du ue re arengbanga ka duni rengo te. Kuti gayo bipai, ya Mbori arengbanga ka dia gbegbereapai kusayo te watadu ko angeranga kuti pa mangaha te.

Fuo susa bete a’uru fuo gburuwa yo gu bambu bagaahe nangia the World Trade Center nadu New York yo, kikiipa barumbatayo rogo pambori Amerika yo ayaa: “Aboro aima digo kaa sana re . . . nibadunguhe rogo gimi raka tipa ndu gupai Mbori ambugene ti ni fu agberango na arungo si nimangi aboro. Si aidi mi idi gupai fuyo nga mi ainonga karagapai sani wagusate, na si nga kina boro gimi bere rengo.”

Ni sangbana gi fugo re, bakere bayugu agu aida nga ga apambori akepai ya rago angba tiko be ‘gu wene pambori’ gi barumbatayo rogo pambori re atungusihe. Ko aidi a na gu bipai nangia ga kura wene bawirikipai nga guko nakepai ki ya: ‘Pa zanga aboro rugatiyo na ndu gupai aboro arungo ti ni nga papara gupai a aboro aruganga tiyo ti ni na gupai du tipa Mbori ya.’ Ono ya mo si nzunzu nibagasigasipai ka rugatise na ndu gupai Mbori ambugene ti ni fu gbegbereapai si nimangi?

Pa Enga Gbegbereapai

Ni gupai du kia ti gu rengbe abarumbatayo rogo pambori ka gumbaha, Ziazia Kekeapai afuranga tipa ndu gupai Mbori ambugene ti ni fu gbegbereapai si nimangi ni gupai duni gasigasihe ka giarogoyo te. Banguapai tipa boro girogo gu sakapai du tipa gbegbereapai nga ka rugatise na gupai nga, Yekova akusanga zegino nigbegberehe te. Ko akusi bambata aboro ue nangia arogotise nirengberengbeyo zanga i duna ingapai. Yekova angere ka bi agu ahe ko akusihe ki bihe nga si aduni “wene he gbe.” (Bambata Pai 1:26, 31) Gu ringbisapai ko aida Adamu na Eva mangihe angia ka gbaraga gu Paradiso nangia ga Edene auru kpotosende dunduko, na ka hisoho na aboro i kini raki rogo ngbarago kina boro Mbori kini banda yo tiibe gako bakere pagbia.—Yesaya 45:18.

Gbegbereapai aenge ti gu boro ni toro Mbori akusi ko, wa ko avurangia ruru boro fu Mbori ho ko aenge ni, ko asonosi nyemu gupai kusa nga i irisi ko wa mbori. (Yakoba 1:14, 15) Samungu kuti Mbori ayugu tihe auru kpotosende, ho gi boro ni toro nga Satana re asa gu bambata arogotise ni nadu ue i kodi tiyo na ko rogo gako samungu. Kuba gupai nga aAdamu na Eva ra fu Mbori ka irisa gu gako arugute nadu ziazia, naazahe ti ri yo ngua ino wenepai na gbegberepai watadu ka zanga zadaha, i akafu bete zuzuhe ki rihe. (Bambata Pai 3:1-6) Ni manga yo ho were, anga i abasa kina sangba Mbori sa te, ono i ayugu gupai nani a nga i aida kaa ra niriyo.

I Akusi Ngbanga nga ga Ruru Sino Mangaapai Tipa I Sakihe

Gi samungu namangi Edene yo re akusi sakapai tipa ruru sino mangaapai, nangia nyanyakipa ngbanga tipa zegino dunduko. Agu asamungu nangia aboro re aduna kapa singia Yekova nazoga agu aboro ko akusi yo ngba ruru gene watadu ko azoganga yo wo te. Ya mo Bakusiahe aduna rengo beko ka ida gupai be ngbatunga aboro nga i gisangbako rogo apai dunduko? Ya mo ka aboro arengbe ka raka wenengai kisusi wa ka i aamangapai ngbariyo?

Yekova amangipai tipa gi kango nakuru tipa gako zogarago re ngba gu gene nayugupa gako ruru ringbisapai nga ga nyemuse, ruru sarangbanga, tatamana, na ome. Ko arengbe arengba ka mangasunge na gako ome ka gbarasa agu asamungu re nibasa. Ka gure awiri ruru sarangbanga, mbiko ko adu adu na rengo beko ka mangaha wo. Ono ka pa manga ko ho wo akaraganga pai sa gu sakapai nakuru tipa ruru sino mangapai re te. Ngba kura gene, ka si adu nga Mbori abasapa gu ingapai re abasa gbua. Ka ngbatunga gu gene mangapai re arengbe ka wira du fu kura aboro areme wa gu gene mangapai nga ga nyemuse. Wa ka si avura du wo, ka si akaraganga pai sa ga Satana ziree ya ka aboro arengbe arengba ka raka wenengai wa ka i aazoga tiyo nisayo te. Kurii gure, ya mo ka gu ngbatunga sino mangaapai re angarasinga kura aboro i nyaga tiyo kusayo ngba ga Yekova gene tee? Ka sangbanaha angia nyenye rungo.

Rogo gako tatamana, Yekova ambu aboro i ndu ngba gayo gene nisayo tipa bete regbo. Wa si avura du nga pa manga ko ho wo nika mbugene fu gbegbereapai si naamanga tipa bete regbo vurũ, pa manga ko ho wo afu mamu fu aboro i yuguhe singia i rengbe arengba ka zoga tiyo wenengai zanga Mbori, kini raki kuti gayo andiko nga ga gupai du niruruhe na gu nga irairaha. Sangbanaha ningia gine? Gu kuru pangbanga nga ga aboro ahi be pa soavura, iraira mangaapai, rungosi aboro, gbiati kura arungo. Pa tigo gu samungu niyangaraha aboro atonaha Edene yo kuti Yekova, nikangia wene ndupai fuko ko saringbanga bara sa kindi kuti agu aboro rimisi tiyo kurogo gu samungu re.

Vuru gi regbo tie re, Mbori ayugu gako nyemuse nifu ko Wiriko nga Yesu Kristo, ko fu unga ko ni motumo tumorii tipa ngbatunga aboro. Gipai re nasa agu aboro nga agisangbaa, i zaki yo kusayo be gu ingapai gbiati kpio naye kuriyo ni sangbana gu sarangbanga i asarihe kuti Adamu mbiko gako basasangbaa. Gu tumorii re ima zakagene sa nyenye unga fu agu aboro dunduko duna idapase kuti Yesu.—Yoane 3:16.

Yekova nakido rani na afugo wasa ya gu rungo namanga aboro si gbua tipa regbo ngbutuko. Bake Atambuahe akepai ki ya: “Bambiko fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te. Ono bayee aboro adía kumbo ringara, ki du na ngbarago tipa gu wenepia du kpaima.”—Atambuahe 37:10, 11.

Gu Raka Du Kumbatayo nga ga Ngbabase Gbiati Ngbarago

Digisidigisi sangba agu anebi nga ga Ziazia Kekeapai yo nayugo gupai nga, gu regbo Mbori ka digiso kaza, rungo, na kpio ti ni ima mbeda. Oni kparianga gu iiriwo mboimboi agu apai nika manga kumbatayo i afuhe fu gu mokedi nangia Yoane rogo yuguyugupai. Ko akepai ki ya: “Mi ki bi vovo ngbangbaturũ na vovo kpotosende; bambiko bambata ngbangbaturũ na bambata kpotosende aima nyasa, baime adu nga berewe a te. . . . Mbori anyé na [ngbatunga aboro] tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” Ni nyakasa maraika gupai nga, aboro rengbe arengbe ka kido kuti agi afugo re, ko aya fu Yoane wee: “Mo ké agi apai re, bambiko si nga ruru he nga rengo a.”—Yugoti 21:1-5.

Ono tie, ginipai tipa agu akutu amirioni aboro wenesa nakpiki natona ti regbo samungu Edene yo? Yekova akidohe ya ko nika karaga agu aboro nara awere rogo kpio yo kurogo unga. Gu mokedi nangia Pauro ayaa: “[Mi na]maa bangire koyo du Mbori ni ya ruru aboro azinga [azinga] be kpio na iraira yo a.” (Amokedi 24:15) Agi aboro re aduna gu maabangirise nga ga raka rogo gu zegino “ruru apai nikanye rogo ho.”—2 Petero 3:13.

Teketeke a wa ka gu baagude duna nyemu wirini tini ini gupai nga, pa gba kaza ti wirini nga gu oroho nika ima aima nika fu nyeanye undo fu wirini, ni nambu ni ambu i gba gu kaza re tini, kinawo a duhe tipa Yekova, ko mbu aboro i susi rogo gbegbereapai tipa regbo ngbutuko auru kpotosende, nga gu regbo ko aruga apai vuruhe. Wa vura duhe nga aboro narungo arungo nirengo, nyenye amaku napido agu aboro dunduko nagbata gene ka manga gupai Mbori akpinyemuhe. Pauro afura tipaha ki ya: “Bambiko ũzegino adu tii kungba pai, si akpi nga nyemu he te, kina mbiko gu ko nafu he ku tii he, nimoi bangirise ya i batasi ũzegino tigaha a be du ni ga zirã kanga sa kura gu taarimo nga ga awiri Mbori.”—ARomo 8:20, 21.

Gipai re nirengo nga pangbanga, ono angianga ngbatunga gu ani naabihe kpakpu terevizioni yo watadu ka gedaha rogo waraga pangbanga ya, ono si nga wene pangbanga. Si nga wene pangbanga kisusi ye be “Mbori wasa dunduko,” nga guko nangera angera nirengo fuo rani.—2 AKorindo 1:3.

[Gu kpiahe du ti kpewaraga 6]

Gu regbo susi, ima yugo gupai nga, ngbatunga aboro arengbanga ka zoga tiyo wenengai zanga Mbori te

[Gu kpiahe du ti kpewaraga 6 aye be aye be]

Aboro Somalia yo: UN PHOTO 159849/M. GRANT; atom bomb: USAF photo; bataya zizi aboro: U.S. National Archives photo