“Fugo Nakparaka Rani, Ono Ani Nikpamiakpamia Rani Rogo Nyemuse”

Batasa Aboro. Bata. Tipa dungu akama agarã, aboro aima digo nikpinyemu ka uka omeyo be gayo atindiro gbiati abakabangirise. Wai rengbe ani ka sovura kuti agu akpakarapai nga ga raka na ki dibehe? Ya mo regbo ho i nika batasa aboro ti ni? Ka si du nga regbo kinaho, wai du i nika batasa aboro?

GURE nangia gu banguaapai i afura tipaha ti regbo gu bakere dunguratise nga ga aDezire Yekova nga gu namangi tipa aʹuru biata. I atona manga gi dunguratise re rogo kura arago rogo Merekoko 2006. Bangua rii gu dunguratise re adu nga, “Regbo Batasa Aboro Ima Mbeda Kada!”

Gi bakere dunguratise re amangi rogo kura aringara ribua badungu akutu aboro rogo kura aringara ki ndu sa ni. Rogo Bamburu na Buza 2006, gi dunguratise re amangi Prague yo, nga gu bakere gbata nga ga Czech Republic; si ki mangi Bratislava yo, nga gu bakere gbata nga Slovakia; si ki mangi Chorzow yo na Poznan yo, nga agu agbata du Poland yo;a na si ki mangi rogo agbata bisue Germani yo, nga Dortmund, Frankfurt, Hamburg, Leipzig, na Munich. Agu aboro nadu pati agi adunguratise re dunduko, ka i kodi yó bangeyo ima susa 313,000.

Gini ngbatunga sino agu aboro nadu pati agi adunguratise re adu nani? Giniapai aboro atakipandehe tipa yó? Na wai agu aboro nadu pati agi adunguratise re adu fuo nyasaha?

Mbakadatise

Agu agino naye tipa bakere dunguratise gbiati agu aDezire Yekova du rogo gu rago si amangi rogoho, i aima ino nga gu dunguratise re nikadu niguhe ka paha agonga bangiri boro ya. Gu mbakadapai i amangihe tipa ka gbia abambu rame tipa agino angia nyanyaki sunge. Nikpiapai, tipa gu bakere dunguratise i amangihe Chorzow yo, agu awirina du Poland yo adi agino ku kpuyo yo wa 13,000 dagba agu agino naye Putu yo ku Uroyo. Agino aye kupati gu dunguratise re Armenia yo, Belarus yo, Estonia yo, Georgia yo, Kazakhstan yo, Kyrgyzstan yo, Latvia yo, Lithuania yo, Moldova yo, Russia yo, Tajikistan yo, Turkmenistan yo, Ukraine yo, United States yo, na Uzbekistan yo.

Badungu agi agino re aima tona mbakadatiyo tipa agi adunguratise re mbu adiwi koyo kindi. Tatiana, nga natungusi wene pangbangaa ti aregbo dũ Kamchatka yo, du Russia yo, ri atona mbakada tiri tipa gi dunguratise re mbu garã sa koyo kindi. Tipa kada Chorzow yo kadu pati gi bakere dunguratise re, ri andu amairo dunduko nga 6,500. Nibambataha, ri agu na tiyara tipa asaa bisue; fuo gure, ri ki ndu na gatara tipa arame biata; niyangaraha, ri ki ndu na tarambiri tipa asaa 30 tipa kada yo.

Badungu akutu aboro nafutiyo ka mbakada ba agi adunguratise re, ki sa kikindigi aba ngimbaro na apatihe kirikiri si da ni agu aba daada tipa irisombori rogoho. (Pa Fu Rugute ni Ue he 23:14) Nikpiapai, Leipzig yo, agu aDezire Yekova du rogo gu rago re agirisi kikii ba ngimbaro wenengai, na i ki yawee i nika girisoho agiriso berewe fuo nyasa bakere dunguratise. Si ki ta du wa gere, agu aboro nangerakurii gu ba ngimbaro re aya fuyó wee wa i nayawee i nika girisorago agiriso berewe, i atumongo marã tie berewe nga gu ka i atumoho tipa wegarago te.

Yamba Aboro

Adungurati nga ga aDezire Yekova rogo zegino dunduko natakipande gu Bakere Dunguratise riihe angia “Regbo Batasa Aboro Ima Mbeda Kada!” Agu aboro dunduko nambakadi tiyó tipa kadu pati agu abakere dunguratise apai adu tipaha kia, i akoditiyo zaaza ka manga tua tipa ka yamba aboro. I aamanga gi tua re kindi da ku nyemu rogo gu yangara uru nadumbata fu tona bakere dunguratise. Ya mo gi sunge i mangihe zaaza re akusi wene asangbanaha?

Dezire Yekova sa Poland yo du rimoko nga Bogdan agbia gbinza kumba sa naaida ka ndu kupati gu dunguratise re, ono ko ayawee gu wiri marã du beko, ko arengbanga ka ndu amairo 75 ngbaha ku Chorzow yo te. Ono mamu amangi nga, kura tarambiri kinaho aDezire Yekova atumo marã tipaha tipa si tindi yó kupati dunguratise yo. Si adu nga basungo nikadu adu vuru tarambiri yo boro nikaa sungongo riihe ya. Fugo Bogdan nga: “Ani aya fu gu kumba re wee ka ko ye ngbawiso saa 5:30 kupati tarambiri yo, ani nduandu naako ka ko atumongo marã ya.” Gu kumba re amangihe kinawo ki ndu kupati gu bakere dunguratise re. Fuo ga ko ku kpuko yo fuo nyasa bakere dunguratise, ko ake waraga fu agu awirina nandu naako re ki yaa: “Fuo du mi pati gi dunguratise re, mi ima diaberã ka mbakada gimi raka awere.”

Prague yo, kumba sa naasungo rogo gu bambu rame ti marã agu agino naye Britain yo aasungo rogoho ape gupai ni kura nyemu fuyó nga, nigu uru re, ko niima ndu kupati bakere dunguratise yo. Gine nasako ko ndu koyo? Gu kumba re ayawee, abatungusipai nibakiakia bawe ko aagbia yó, i kini yayambuko ko ye kupati gu dunguratise re, ko kini bihe nga wa aboro bawe nayambu ko, si naida ko ndunga andu! Rago aima ngbatiko na agu apai ko agihe yo, sidu, ko kidu na nyemu ka ino kura apai berewe.—1 Timoteo 2:3, 4.

Agu Ariahe Nga ga Toro

Gu dunguratise re afura tipa wai rengbe ani ka diabe gu kpakaraapai du rogo raka yo. Agu arugute du rogo Ziazia Kekeapai asakirogo wai yo rengbe ani ka diabe fudifudiapai na wai rengbe ani ka hi agu akuraha.

Gbinza aboro, airawokote, agu aboro gayo aboro nakpiki, watadu agu aboro duna kura fudifudiapai tiyó, i agbia bakere ngarasaro rogo Ziazia Kekeapai yo ti regbo gi bakere dunguratise re si ki sa gupai nga i duna maabangirise rogo raka yo. (Atambuahe 72:12-14) Arogotise gbiati avunguagude agi agu arugute nga ga Ziazia Kekeapai tipa wai rengbe yó kadu na ngbarago rogo gayo ramukporo na wai rengbe yó ka sonosa agude ami kuru niwene aboro kumbatayo. (Batungusipai 4:12; AEfeso 5:22, 25; AKorosaio 3:21) Agu aKristano nga aparanga, nga aguyo akurayo asosoda yó sukuru yo i mangi wa yó, ono i kini gbia wene arugute kporoyo na ba adunguratise yo rogo Fugo Mbori, i agbia wene arugute nibipa wai rengbe yó ka ‘ora be ga paranga gbegberẽ nyemuahe.’—2 Timoteo 2:22.

Ndikidi Awirina Rogo Zegino Dunduko

Ti aregbo dunduko, aDezire Yekova naagbia wene arugute nga ga Ziazia Kekeapai ba gayo adunguratise yo. (2 Timoteo 3:16) Ono tie, gupai nasa gi kikindigi adunguratise re si du kia angia, gu nyemuse aboro adu nani dagbayo tipa agu awirinayo i aabingo kpakpuyo mbata ya. Agi adunguratise apai adu tipaha kia re, i amangi agumbapai yo rogo dungu afugo aboro, tipa aboro dunduko rengbe arengba ka giaha. Rogo agu aʹuru biata re dunduko, aboro Riigbu Bipasunge nga ga aDezire Yekova amangi agumbapai, na agu atingidapai i amangihe nibipa kura aringara nasa gayo agumbapai si du nibawenehe gbe. Agi agumbapai na atingidapai i amangihe re, aboro adu kinaho naasakarogoyo kurogo kura afugo aboro tipa aboro dunduko gihe.

Agu agino naye rogo kura aringara, i aduna bakere ngbarago tipa ka bi agu awirinayo du rogo kura aringara. Boro sa dagba agu agino re ayaa: ‘Wa vura duhe nga aboro aagumba agu afugo dukia akurayo agianga ha ya, si aadunga nikpakarapai te. Ono si nasa gupai nga agu aʹuru re du nibawene aʹuru kisusi. Agu agino naye, i aye rogo aringara nibakiakia, ono wa si avura duwo, i adu dunduko nikodikodiyo rogo bangisa idapase.’ Agu aboro nadu pati gu bakere dunguratise i amangihe Munich yo, i aya tigayo wee: “Fugo nakparaka rani, ono ani nikpamiakpamia rani rogo nyemuse.” Wa si avura du nga agu aboro nadu pati agu adunguratise re aye rogo agu aringara du nibakiakia, na i kini gumba agu afugo dukia, i abi gupai nga i adu nzunzu dagba ndikidi abakureayo, nga agu awirinayo nga akumba na adee.—Zekaraya 8:23.

Afugo Tambuahe

Gu mai naaná dedede ti regbo agu adunguratise nadu Poland yo re ayugu gu sino berã gbiati hipai agu agino nadu yo adu nani. Anga kina mai sa nasa gupai nga rago du nigbegberẽhe te, ono rago aima zera a nikerehe. Bazera-rago adu nga 14°C. Wirina naye United States yo ayaa: “Wa mi atona nduge atona kindi kupati kikindigi adunguratise yo, mi aabingo gbegberẽ wege gbiati zere wa gu nadu rogo agu aʹuru re te. Si asa gupai nga ka mi ginga agu apai i aagumbaha ya. Ono gu badungu aboro nadunguratiyo naye rogo aringara nibakiakia, na gu sino mangaapai i adu nani, gbiati gayo wene sino, na wai i adi akurayo kugume, si nasa gupai nga ka boro berẽnga pa zere watadu mai ya. Ka bangirise gonga ti gi bakere dunguratise nadu re te!”

Gupai ka bangiri agu aboro nagumbapa aboro Poland agonga ti ni ya nga, pa tingida yó aboro naapa kusa gu buku rogo pa aboro Poland nga Insight on the Scriptures. Si nangia gu mosoro i agbiaha wa i ahi zere gbiati mai. Pa kusa yó gu buku a nga Live With Jehovah’s Day in Mind asa bakere ngbarago ti aboro rogo agu arago dunduko i amangi gu bakere dunguratise rogoho riihe adu nga, “Regbo Batasa Aboro Ima Mbeda Kada!”

Badungu agu aboro nadu pati gu bakere dunguratise re nikaa tingidapaha atingida a mbiko kura apai berewe. Wirina sa du rimori nga Kristina, nga boro Czech, ri afu tiri tipa ka gasa agu agino naye rogo kura aringara na tarambiri. Ri ayaa: “Ho ani aakparaka ni, wirina sa nidee aʹaria re kugii rago yo, ki dungo re, ki ya fere wee: ‘Oni aima ngerafuo rani nibawenehe! Oni anaaye na riahe kina boro koyo ani asungu ni, kini ye na mbirimbiri ime a furani. Bakere tambuahe furoni tipa gaoni nyemuse.’” Gu riahe ri agumbapaha re angia gu riahe nga ga bebere uru i aamangaha fu agino. Wirina sa ayaa: ‘Gi sunge manga-riahe re angia gu sunge ani aamanganga ha mbata ya. Ani anaakparaka bange riahe wa 6,500 rogo uru sa. Si aba kina nunga tirani ka bi wai badungu aboro afu tiyó tipa ka undo sunge, kodihe na agude a.’

Wirina sa nidee naguari Ukraine yo ka ndu ku Chorzow yo tipa bakere dunguratise ayaa: “Ani na bakere tambuahe tipa gu nyemuse du akuarani aidipase nani tipa rani gbiati gayo wene sino. Fugo ho ka ani gumbaha ka yugo gaani tambuahe nani te.” Annika nga boro Finland du garãri muambe ake waraga fu gu be-basunge nga ga aDezire Yekova du Poland yo ki yaa: “Gu bakere dunguratise re aima iriwo susi wai mi aaberãha nga si nikadu. Si nibawenepai kisusi tipa kadu rogo ga Yekova riigbu, bambiko si nasa gupai nga boro zi bakure na aboro rogo zegino dunduko!”—Atambuahe 133:1.

Fugo Kura Aboro

Mbata fu uru tona bakere dunguratise, i adi agino na tarambiri tipa i ndu ka biko arago. Rogo kura gbaria sa rogo gu gbata nga Bavarian, agu agino re azoro vurukporo aBambu Kindo. Agu aDezire Yekova nadu rogo gu rago re adi yó kugume. Kura dee sa nangianga Dezire Yekova ya naata na kura badona agino sa rogo agu arago re, ngbari aima zera be gu nyemuse nga ga awirina agu awirina re adu nani dagbayo. Gino sa ayaa: ‘Ho ani aagani ku bambu rame yo ti marã, gu dee naata na ani re ayawee ani adu kia ti gu kura abadona aboro naabiko arago. Ani avodi arokoo wenengai, na aboro dunduko kini gi tiyó wenengai na agu aboro naangerakurii gu badona re. Aboro aamangapai dunduko rogo zereda. Boro ho naagumba gbegberẽ afugo te. Kina ngbari naazere ka bi gupai nga aboro zi bakure nikina ipo na agu aboro i aabingo yó mbata ya.’

Wirina naamangasunge rogo gu Basunge Nga ga Tingida Apangbangaa ba gu dunguratise yo nadu Prague yo, ayaa: “Rago Poso wiso, gu baramu naangerakurii agu aborisi naye ka banda rago, ko aye ka bi rani. Ko abi gupai nga kina zereda nadu dagba aboro dunduko. Ko ayawee pai ho ka ko mangihe te, wa du aboro dunduko na kina pazereda dagbayo. Ko ape gupai a nga agu aboro du kpuyo pati gu rago bakere dunguratise adu rogoho re, i asanako asana tipa ka ino agini aboro du nadunguratiyo wa gure. Ho ko ayani fuyó wee aDezire Yekova du, i auka kina omeyo. Gu baramu re ayaa: ‘Ka aboro naamanganga pai wa gu aDezire Yekova amangaha kandara tooni, ka si idinga aborisi du ti ni berewe rogo zegino te.’”

Badungu Aboro I Aima Batasa Yó!

Fugo Mbori nga Ziazia Kekeapai, si nga kuburi dagba ngbatunga aboro, bambiko si nasa gupai nga aboro koditiyo sa ni aKristano rogo zereda. (ARomo 14:19; AEfeso 4:22-24; AFiripoio 4:7) Gu kikindigi adunguratise apai adu tipaha kia nga ga “Regbo Batasa Aboro Ima Mbeda Kada!” si nayugu gupai nga rengo du nga gipai re nzunzu. I aima batasa aDezire Yekova be gu kura apai narungosi zegino areme. Bete agu apai aDezire Yekova aima diaha kusayo dagbayo nga gu nambusa zegino areme nga, zanga hipai fu kura aboro, imisiringbaduse, gbiati soga agu aboro du ngbatunga yó kia. I nasungudo gu regbo agu apai re nika guari kusayo rogo zegino dunduko.

Agu aboro dunduko nadu pati gi kikindigi adunguratise re, i abi gu kodatise nadu dagba aDezire Yekova, si ki vura du vurũ nga i aye rogo aringara nibakiakia na gayo asino raka kidu a kia. Gipai re ayugutihe nzunzu fuo nyasa adunguratise. Aboro dunduko naata beyo, kini dudungo akurayo, na kini de asura. (1 AKorindo 1:10; 1 Petero 2:17) Fuo du yó na bakere ngbarago, na mbiko ino yó gupai nga regbo batasa aboro be arungosi ima mbeda kada, i karagatiyó kurogo akpuyo na bakere ngbarago na ki diberã ka zada “gu pai nga ga unga” nyanyakii.—AFiripoio 2:15, 16.

[Gu rukutu kekeapai du bandu kpewaraga yo]

[Box/​Gu sura du ti kpewaraga 10]

Afugo 25 Nafura Kina Sa

Rogo gi kikindigi adunguratise nadu ribua re, i aafura rogo gu fugo aboro gu ringara re agumbaha. Ti regbo gu kikindigi adunguratise nadu Germani yo, i aamanga agumbapai amanga a rogo gu kura afugo 18. Dortmund yo, i amangi agumbapai rogo pa-Arabi, pa-Farsi, pa aboro Portugal, pa aboro Spain, gbiati pa aboro Russia; Frankfurt yo, i amangihe rogo pa-Ngirisi, Faransée, na pa aboro Serbia/pa aboro Croatia; Hamburg yo, i amangihe rogo pa aboro Denmark, pa aboro Dutch, pa aboro Sweden, na Tamil; Leipzig yo, i amangihe rogo pa aboro China, pa aboro Poland, na pa aboro Turkey; na Munich yo, i amangihe rogo pa-Giriki, pa-Tiriani, na Fugo Nibee Nga ga Germani. Prague yo, i amangihe rogo pa aboro Czech, pa-Ngirisi na pa aboro Russia. Bratislava yo, i amangihe rogo pa-Ngirisi, pa aboro Hungary, pa aboro Slovakia gbiati Fugo Nibee Nga ga Slovakia. Chorzow yo, i amangihe rogo pa aboro Poland, pa aboro Russia, na pa aboro Ukraine, gbiati Fugo Nibee Nga ga Poland. Poznan yo, i amangihe rogo pa aboro Poland gbiati pa aboro Finland.

Agi afugo re dunduko adu nga 25! Nirengo, agu aboro nadu pati agu adunguratise re, i aagumba agu afugo du nibakiakia, ono wa si avura duwo, i adu nikpamiakpamiayo rogo nyemuse

[Gu kpiahe du ti kpewaraga 9]

Agu agino naye Croatia yo ku Frankfurt yo aduna ngbarago ka bi gu Ziazia Kekeapai nga “New World Translation” rogo payo