Gaani Kikindigi Adunguratise Namanga Bakere Dezirepai Tipa Rengo
1. Agu apumbo aYisaraere anaamangaha anaafu momu fuyo i berẽkurii gini nyanyakipa apai na kini sakihe?
1 Agu aYisaraere nadumbata anaadunguratiyo bara biata rogo garã sa tipa kikindigi apumbo. Wa vura duhe nga kina akumba si adu fuyo nindiko i du pati ni, si anaamanga gbe nga aborokporo dunduko naandu ku Yerusarema yo tipaha. (Pa Rug. 16:15, 16) Agu aregbo re nangia wene aregbo tipa ka berãkurii nyanyakipa apai nga ga toro na ka sakaha. Gini bete nyanyakipa apai du nangiaha? Gu sa nga Yekova nga boro gamahe na boro nyemuse. (Pa Rug. 15:4, 5) Gu kuraha nga ani rengbe arengba ka kido kutiko tipa arugute na bandahe. (Pa Rug. 32:9, 10) AYisaraere arengbe ka berãkurii gupai a nga wangia yó agu aboro duna rimo Yekova riyo, si naida i naaraka ringbisihe kuti gako rurupai. (Pa Rug. 7:6, 11) Areme, gu gaani kikindigi adunguratise ani naamangaha na agarã dũ naundo rani wakina gure.
2. Wai gu bakere dunguratise naye nika undo rani ani girogo agu arengo yo nga ga Ziazia Kekeapai wenengai?
2 Kikindigi Adunguratise Naundo Rani Ani Girogo Rengo yo Wenengai: Ti regbo gaani kikindigi adunguratise nga ga aˈuru biata, ani naagia agumbapai, adrama kidu, mangimangi akpiapai, gbiati sasana aboro nga gu naundo rani ani girogo gu nyanyakipa arengo nga ga Ziazia Kekeapai wenengai. (Yo. 17:17) Bakere sunge ima manga awere tipa gu bakere dunguratise naye nga ga aˈuru biata. Ga Yekova riigbu nambakada agu ariahe nga ga toro nga gu daada nzunzu tipa gi regbo ani araka awere ti ni re. (Mt. 24:45-47) Ya mo mo namaabangiro kakaka tipa agu apai nika manga ti regbo gu bakere dunguratise re?
3. Gini apai rengbe ani ka mangaha tipa ka gbia undo gbe ti regbo bakere dunguratise?
3 Ani rengbe ka gbia undo gbe ka ani du pati gu dunguratise re na kini moiberãrani rogo agu aˈuru nikadu biata re dunduko. Oni gumbaha fu gaoni abairasunge tipa i fu regbo furoni oni ye tipaha. Oni asadi tironi ka ra wenengai rogo agu ayuru du mbata fu aˈuru bakere dunguratise tipa oni ki rengbe ka maaberãroni wenengai. Dungu aboro bi gupai nga pa ngana yó bagumbapai na kini keke memeapai naundoyo i moiberãyo ti regbo bakere dunguratise. Ka oni mbunga terefuni si fudi roni watadu kura aboro ya. Oni he fugo, kekapai na terefuni, rihe, watadu mbira gu he angianga ime ya dunguratise nimangi.
4. Wai rengbe avunguagude ka undo awiriyo i gbia undo ti regbo bakere dunguratise?
4 Rogo agarã sabiti, ho aYisaraere anidunguratiyo ni ka gia andiko i nigedihe ti regbo Pumbo Abasura, gayo “rukutu agude” adu na kina yó tipa ka ‘giapai, ki niwirikihe.’ (Pa Rug. 31:12) Ani nagbia ngarasaro agbia ho ani abi aborokporo ni i nasungu wa sa pati bakere dunguratise na awiriyo kini moiberãyo wenengai! Rogo agu anyemu dunduko nga ga bakere dunguratise, si ngba angba oni ngererii gu memeapai oni nikekehe ki fura tipaha na gaoni aborokporo. Wa duhe nga “mungo du ni vovo ho ku kpoto gude yo,” si adu niwenepai ka avunguagude asinziri awiriyo, kodihe na aguyo naima sona tooni, ti regbo gu ongoda nga ga bebere uru na ho du yó ni bambu rame yo ti marã, angianga ka ‘mbuyo nisayo ya.’—Snz. 22:15; 29:15.
5. Wai gaani wene mangaapai bambu rame yo ti marã afonga rengo?
5 Gaani Wene Mangaapai Nafõnga Rengo: Gaani wene mangaapai rogo gu gbata du bakere dunguratise rogoho nafonga rengo afonga. (Tito 2:10) Ho duhe ni nga awirina zoro bambu rame yo ti marã, agu abamangisunge du yo nabi gu wene mangaapai abi nga ga awirina nibi wai i andu kuti agu arugute du yo na wai i amangapai na hipai gbiati weneringise na agu aboro du yo. (Koro. 4:6) Ho agu awirina be-basunge akediyo i ndu ka sakapai na aira bambu gugorö, narugupasunge nga ga gu ba re aya fuyo: “Ani ima kpinyemu kadu na gaoni aboro ane bambiko i nga bawene aboro. I namangapai niirisa na weneringise, na i namangapai na gaani abamangisunge niirisa. Na i nairisa gi ba re airisa.”
6. Wai rengbe ani ka fonga rengo ngba gu gene ani avo rokoo rogo gu gbata du bakere dunguratise rogoho?
6 Ho ani avo gaani karete ni nga ga bakere dunguratise, anga si nayugopa gaani bakere dunguratise sa fu aboro te, ono si namanga dezirepai amanga a fu agu aboro nabi rani. Agu aboro du rogo gu gbata ani amanga bakere dunguratise rogoho rengbe ka bi gupai nga, agu aboro navo gu karete re i vo tiyo nigigirihe na niiriirihe, angianga nigu wasiwasi votise moipai rogo zegino ya. (1 Tim. 2:9, 10) Sidu tie, si naida ani moiberãrani wenengai tipa gaani votise na mbakadatise ho du ani ni rogo gu gbata du bakere dunguratise rogoho, kodihe na ho ani andu ni ka raka rogo agu abambu nga ga marã. Si ngbanga ani vo sorondu watadu agu afariro duna gidigidi goroho ho ani ayeni ka da rogo agu aba re te. Ka si vura du nga gaani bakere dunguratise namanga kpaangba rago, si naida gaani votise du nikina iriirihe. Ka ani idi ka ura rokoo ka vo kuraha fuo nyasa bakere dunguratise tipa ka ndu ku mataamu yo, si naida ani tingidi gupai nga ani kindi nga agu aboro naye tipa bakere dunguratise na si naida ani vorokoo nikina iriirihe.
7. Gini gene duho rengbe ani ka gbia ngbarago na akuarani ngbaha ba bakere dunguratise yo?
7 Ti regbo agu apumbo namaanga na agarã dũ, aYisaraere anaagbia bakere ngbarago mbiko kodayo yó tiyo na gu kura airisi Yekova nanaaye rogo kura apapara zegino, na gipai re asa gupai nga i du nikpamiakpamiayo. (Amo. 2:1, 5) Ti regbo gaani kikindigi adunguratise nga ga aˈuru biata, ani nidu nikpamiakpamia rani na agu awirinarani naye rogo kura arago. Gi bawene kpamiatise nga ga gu paradizo nga ga toro re naairiwo airiwo ti agu aboro nabi rani. (Tam. 133:1) Kuba gupai nga ka mbu ba bakere dunguratise ka ndu ka gbata riahe rogo kura rago ti regbo ongoda, si angbaangba gbe ka ani di gaani wiri riahe kina kporoyo tipa wa ka ani rengbe ka gbia regbo ka gbia kura awirina na ka fura naayo!
8. Gini nduapai duho si aida ani fu tirani ti ni ka undo sunge ka ani rengbe nani?
8 Ho aboro abi wai ni ani ambakadaapai wenengai tipa gaani bakere dunguratise, kina iriwoho nati tiyo, gbe ho i aino gupai ni nga agu aboro dunduko namanga agu asunge nga ga bakere dunguratise guni ho i atumo ni tipaha te. Ya mo mo rengbe ka ‘fu tiro zaaza’ tipa ka mangasunge ti regbo bakere dunguratise? (Tam. 110:3) Aborokporo naabayo naamangasunge sa dedede tipa ka raba awiriyo i nifu tiyo ka undo sunge. Ka si du nga mo nga boro zee, mangasunge ti regbo bakere dunguratise nga wene gene tipa ka gbia kura awirina nga aguyo ye rogo kura rago. Wirina sa afu tiri ka undo sunge ba bakere dunguratise yo. Fuoho, ri ayaa: “Kina gimi aborokporo sa gbiati wiri bete anakureami mi aini yó ba gu dunguratise yo re. Ono ho mi afu tire ni ka girisorago, mi atona ka ino badungu awirina nga akumba na adee! Si angia bawenepai kisusi!” Pa za ani ngbadurani tipa kura aboro niundo ani sunge ba bakere dunguratise yo naye na bakere ngbarago. (2 Kor. 6:12, 13) Ka si du nga mo aafunga tiro ka undo sunge mbata te, mo sana abaakumba tipa wai rengbe mo ka rẽ tipa ka undo.
9. Wai ani ka yamba aboro tipa bakere dunguratise?
9 Oni Yambu Kura Aboro I Ye ka Gia Rengo: Mbu aposo koyo biata kuti bakere dunguratise, ani nika manga tua ka yamba aboro tipa bakere dunguratise, a wa ani naamangaha mbata. Adungurati nika manga bakere asadatise tipa ka kparaka waraga yamba aboro wenengai gbe rogo gayo dagbarago. (Oni bi gu sanduki nga “Wai Ani ka Kparaka Waraga Yamba Aboro?”) Gu yangara waraga yamba aboro ka nye berani, si naida ani ye nani ku ba bakere dunguratise yo. Si nika ida ani mangisunge nani ka manga dezirepai fu agu aboro du rogo gu gbata du bakere dunguratise rogoho.
10. Oni gumbanga agu apangbanga nayugoho nga gu tua ani amangaha na agarã du ka kparaka waraga yamba aboro nakusa wene asangbanaha akusa.
10 Ya mo aboro naaye tipa gu kikindigi adunguratise ani naamanga tua na agarã dũ ka yamba aboro tipaha? Ti regbo kura bakere dunguratise sa, bambakadi ba aboro aundo kura kumba na diako tipa i gbia basungo. I aya fuko wee i agbia waraga yambahe na “ki bihe nga gupai i ayambayo tipaha re ngba angba.” I andu na gayo tarambiri tipa akirometere susi 300 tipa ka da ba bakere dunguratise yo! Kura wirina aatungusapai rogo akporo ki fu waraga yamba aboro fu gu kumba naadu wa ko aduna nyemu ka inopai tipa bakere dunguratise. Ri adi regbo ka saka gupai naako naadu rogo gu waraga yamba aboro re. Fuo bete arame, ri abi gu kumba re babakere dunguratise yo na bakureako sa, na i kidu na vovo waraga beyo sa nga gu nakuru ti regbo gu bakere dunguratise re!
11. Tipagine duhe ti ni ninyanyakipa pai ani naandu tipa gu gaani kikindigi adunguratise ani naamangaha na agarã dũ?
11 Agu apumbo aYisaraere anaamangaha na agarã dũ angia gu wene mbakadapai naye be Yekova nga gu nanaaundo yó i “nimangi pako ni ndikidi rengo na rurupai.” (Yos. 24:14) Wakina gure a, nduge tipa gu gaani kikindigi adunguratise ani naamangaha na agarã dũ naundo rani ‘ani naata rogo rengo yo’ na si nga nyanyakipa papara gaani irisombori. (3 Yo. 3) Yekova funga maku afu kurii gu asadatise nga ga agu aboro dunduko nakpinyemu rengo tipa i ye tipa gu bakere dunguratise nga ga aˈuru biata re na ki gbia bakere undo ti ni!
[Blurb on page 3]
Gaani wene mangaapai rogo gu gbata du bakere dunguratise rogoho nafonga rengo afonga
[Blurb on page 4]
Mbu aposo koyo biata kuti bakere dunguratise, ani nika manga tua ka yamba aboro tipa bakere dunguratise
[Box on pages 2-5]
Atingidapai Tipa Gu Bakere Dunguratise Nga ga 2012
◼ Regbo: Dunguratise nikaa tona saa 9:20 rogo agu aˈuru biata re dunduko. Ho manzigo nika tona ni, ani dunduko si aida ani sungu rii gaani abasungo tipa ka tona dunguratise wa sa na akuarani ngba iriiri gene. Dunguratise nika digo Rago Bisue na Rago Nzengu nyemu saa 4:55. Ono tipa Rago Poso, si adigo saa 3:40.
◼ Dika Basungo: Boro rengbe ka dika basungo fu kina agu aboro ní aye naayo gene sa watadu ní asungo naayo sa kporo na agu aboro ní awisigo Ziazia Kekeapai naayo.—1 Kor. 13:5.
◼ Riahe Nga ga Bebere Uru: Ani nahõpai beroni, oni di gaoni riahe kina kporoyo nga gu oni nika rihe bebere uru, angianga ka mbu ba dunguratise kaa ndu ka gbata riahe rogo kura rago ti regbo ongoda ya. Si naida oni ndu na riahe rogo gu he ka i moihe amaa kutii basungo yo, angianga ka ndu nani rogo gu badugbo hee nika ka aka na gene be aboro ya. Si aidanga oni di riahe na basombe watadu rogo gu ũtinda ahe i ambakadihe rogo gizaza te.
◼ Agamahe: Ani rengbe ka yugo gaani tambuahe tipa bakere dunguratise nifu ani gu gamahe paha aye kina boro ngbaduraniyo tipa gu sunge awirina amangaha rogo zegino dunduko. Ka si du nga boro fu tieke nga ga marã nigamahe ti regbo bakere dunguratise, si naida ní ke gupai nga i fu gu marã re fu “International Bible Students Association,” watadu ní ke rimo gu basunge nga ga aDezire Yekova du rogo gu ringara re.
◼ Béno na Tunguotunguopai: Ka si du nga tunguotunguopai mangi, wa gu nga kaza so boro nga gu naida ipiipi undo, si naida i pehe fu gu boro nambakada ba aboro, ní nika tingida agu awirina nani namangasunge na aziga tipa i ini pa igira gupai re gbiati gu ziga si aida i fuhe niipo tipaha. Ka si du nga ome gu kaza re ima kio, agu awirina namangasunge na aziga re nika yamba gu tarambiri ninaatinda aborokaza ku bambungua yo tipa i ye ka ndu na ní koyo.
◼ Ngua Kaza: Ka si du nga ngua kaza ho oni naadiaha, si naida oni ye aye nani mbiko si adunga ba bakere dunguratise yo te. Si aidanga i ba ambereke rũ aboro kurogo agu aũgugudo i nika rogaha aroga berewe rogoho ka ndu ka kusukoho mbatayo te, si andu ka rũ boro.
◼ Arakata: Rogo agarã nibasasa dunduko, wo aboro ahoka be gu ngbatunga arakata i avodaha. Si naida ani sia gu rakata nika sa rani ani naandu andu wenengai.
◼ Agu Anzeme Nafũ Afũ Gbe: Ani naamanga kura gaani kikindigi adunguratise tii gu bambu kina amakana azeresa rago rogoho. Ka singia ngbatunga gu rago re du du oni rogoho, si adunga ninyemuse ka oni mbedi agu anzeme nafũ afũ gbe te mbiko si rengbe ka zingisa agu akaza nga ga agu aboro nawoka be kaza-onga na kura akaza duwa ngbatunga gere.—1 Kor. 10:24.
◼ Pefuo Boro: Si naida oni mangisunge na gu fuomu nga, Please Follow Up (S-43) tipa ka kekapa agu apai rogoho du tipa gu boro naadu na nyemu rengo tiní nga guni oni amangi dezirepai funi ti regbo bakere dunguratise nga ga aˈuru biata. Si naida abatungusipai dunduko nibasasa ye na gi fuomu re sa watadu ue kupati bakere dunguratise yo. Oni rengbe ka fuka agi afuomu re fuo hiiso oni he fu agu aboro du rogo gu basunge nga ga Ba Awaraga (Book Room) watadu fu gu bakeapai nga ga gaoni dungurati ho oni ka karaga tironi ni ku kpuroni yo.—Oni bi gu Gaani Sunge Nga ga Kindo nangia ga Ngbangba 2011 ti kpewaraga 3.
◼ Amataamu: Si naida ani taasirimo Yekova rogo gaani wene mangapai ti gu regbo ani ari riahe mataamu yo. Rogo dungu aba, si nisino aboro boro mbu wiri marã fu gu boro niye na riahe funi. Kangia wo duhe rogo gaoni dagbarago, oni mangihe amanga wo.
◼ Undo Sunge: Agu aboro naida ka undo sunge, si naida i fu rimoyo kurogo gu Basunge Du Tipa agu Aboro Naida Nitiyo ka Fu Undo. Agu agude du garãyo 16 na kusende, i ima rengba ka fubee a tipa ka undo sunge, ono si naida i mangisunge sa na kina avunguyo watadu gu ngangara boro avunguyo naidihe i mangisunge na ní.
[Box on page 6]
Wai Ani ka Kparaka Waraga Yamba Aboro?
Tipa ka nyasa gaani dagbarago na kparaka waraga yamba aboro, si angbaangba ka ani fura niguruhe. Ani rengbe ka pepai wa gere: “Sene. Ani nakparaka gi waraga yamba aboro re rogo arago dunduko tipa ka yamba aboro i ye tipa bakere dunguratise. Gamo gere. Mo abi dungu apai rogo gi waraga re tipa gu bakere dunguratise re.” Oni fura zaaza. Ho oni kaa kparakaha ni ti digido aposo, oni rengbe arengba ka kparaka amagazini a ho daada ada ni.