Yekova Nakpinyemu Ruru Sarangbangaa
“Mi Yekova nakpi nyemu ruru sarangbanga.”—YESAYA 61:8.
1, 2. (a) Ginihe nga “ruru sarangbanga” na ‘iraira sarangbangaa’? (b) Ginipai Ziazia Kekeapai agumbaha tipa Yekova na gu gako mangaapai nga ga ruru sarangbangaa?
RURU sarangbangaa nga ‘zanga ngbe na kina kura aboro, zanga soga kura aboro, mangapai kuti ndiko.’ Iraira sarangbangaa nga soga kura aboro, gbegberẽ mangapai, irairapai, manga aboro na gupai angbanga tiyó ya.
2 Mbembedii sa agarã 3,500 kusayo, Moize akepai tipa Yekova nga Bakindo zegino dunduko ki yaa: “Gako apai dunduko du ni ruru sarangbanga. Mbori nga irayososopai zanga irairapai.” (Pa Fu Rugute ni Ue he 32:4) Fuo agarã saba kama, ga Mbori toro asa Yesaya ko ke gi fugo du re nga: “Mi Yekova nakpi nyemu ruru sarangbanga.” (Yesaya 61:8) Rogo bambata sa kama agarã, Pauro apoi kuari ki yaa: “Irairapai ti Mbori? Wo te.” (ARomo 9:14) Kina rogo gu bangisa kama agarã re, Petero ayaa: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” (Amokedi 10:34, 35) Ii nirengo, “Yekova nakpi nyemu ruru sarangbanga.”—Atambuahe 37:28; Maraki 3:6.
Iraira Sarangbangaa
3. Wai iraira sarangbangaa atona auru kpotosende?
3 Gu mangaapai nga ga ruru sarangbangaa, ngenga ha areme te. Ani rengbe arengba ka rungo be iraira sarangbangaa kina wai gu kura aboro arungo behe rogo agu aba ani amangasunge rogoho, sukuru yo, be gaani abarumbatayo, na rogo gu kura agene a, zavura kpurani a. Rengo ngaha nga, anga vovopai nga gipai re te. Iraira sarangbangaa aye kurii ngbatunga aboro tona ti kina gu regbo bambata avungurani asamungu kuti Mbori na ki tona mangapai angianga kuti arugute ya, na gu boro nitoro nasamungu nga Satana Bakitingbanga kini tigi we ti ni. Si aarunga fu Adamu, Eva, na Satana i gberesipa gu iiriwo gamahe nga ga ranirii Yekova afuhe fuyó te. Gu gayó iraira mangapai re akusi bakere rungo na kpio fu ngbatunga aboro dunduko.—Bambata Pai 3:1-6; ARomo 5:12; AEbere 2:14.
4. Bagizo regbo wai iraira sarangbangaa nadihe ku dagba ngbatunga aboro?
4 Tipa garã wa 6,000 natona ti gu regbo aboro asamungu Edene yo, irairapai aima da nipapara ga ngbatunga aboro raka. Ngbaha angba ani idi kuti gupai re mbiko Satana du nga gu boro nazoga gi zegino re. (2 AKorindo 4:4) Iraziree nga ko kidu nibaha, nibagumba gbigbitapai na nibasovura kuti Yekova. (Yoane 8:44) Ti aregbo dunduko, wo ko naasa irairaapai si niimangi. Nikpiapai, ngbutuko mbata fu gu Ime Akangbii nadu ti rago Noa, Mbori abi gupai nga “ga aboro gbegberẽpai adu ni bakere he gbe auru kpotosende, na gu biapai dunduko nga ga berã du kpotoyo yo, si adu ni kina gbigbita ha kindi.” (Bambata Pai 6:5) Gu bangisapai re azugo a ti rago Yesu. Yesu ayaa: “Gu gbegberepai nga ga gu rago kina ha rengbe tipa ha,” nga gupai du rogoyo nga gu fudifudiapai duwa iraira sarangbangaa. (Matayo 6:34) Ziazia Kekeapai nafura zukazuka kini yaa: “Ũzegino dũ mongo niukaga omehe nimbu be ima kina ku awere.”—ARomo 8:22.
5. Tipagine du iraira sarangbangaa ti ni ti gi gaani regbo re susi gu nadumbata?
5 Sidu, gbegberẽpai akusi bakere irairamangaapai natona bakuru kusayo rogo gu raka nga ga aboro. Awere, sino raka ima gbera susi gu nadumbata. Tipagine? Bambiko gu sino raka du rogo gi zegino nga ga azangasinombori re, si ima dia dungu abawe agarã awere rogo gaha “kusa rago” na aboro kini mbu be gi “gbegberẽ rago” re wa si ambeda ka digo. Ziazia Kekeapai aima fura tipa gi regbo re kumbatayo ki yawee aboro “akpi kina nyemu tiyo, ki du ni airakpinyemumarã, airaruka, airarekangose, agberẽngba yo, . . . atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise.” (2 Timoteo 3:1-5) Ngbatunga gbegberẽ asino wa gure nakusa iraira sarangbangaa ngba arikoho dunduko.
6, 7. Gini bakere irairapai narungosi ngbatunga aboro ti gi gaani regbo?
6 Vurũ agi agarã susi kusayo 100 re, iraira sarangbangaa ima kio susi gu nadumbata. Bambata ndupai nga, agi agarã re dunduko angia kina agarã vura. Nikpiapai, bete abakeke kuru apangbangaa nape gupai nga, agu aboro nakpiki ti regbo Ue Vura Nga ga Zegino nisaha, bangeyo bangbanda amirioni 50 na amirioni 60, na badungu agu aboro nakpiki rogo gu vura re angia aboro-ringara nga akumba, na adee gbiati rukutu agude, nga agu aboro naarimisongo tiyó kurogo vura yo a ya. Tingbafuo nyasa gu vura re, badungu amirioni aboro kpiki be badungu avura, na badungu agu aboro nakpiko re nga kina aboro-ringara. Satana nasonosa gi ngbatunga iraira sarangbangaa re mbiko ko ima inoho nga Yekova nika dia adia beko barambeda. Gu sangbanebi nga ga Ziazia Kekeapai nayaa: “Bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”—Yugoti 12:12.
7 Gu bakio marã abanzengere agbirisaha rogo agarã nibasasa tipa gayó aũvura, bakioho nga amirioni bara amirioni, rogo marã Amerikani. Ono badungu amirioni aboro areme adunga na wene kporo beyo ya, adunga riahe beyo ya, na adunga wene rokoo tiyó ya. Ka si du nibawenepai ka i naaundo agu aboro re na gu marã i agberesaha ti kina aũvura re. Bange agu aboro adunga riahe beyo ya ima duwa birioni sa, baraho du kura aboro ni nani tigayo kpaima. Ringbisihe kuti gu tingidapai nga ga Yu-eni (UN), bange agude nga amirioni bisue nakpi na agarã dunduko be gomoro. Niiriwo gu irairapai re! Berewe a, oni berẽnga pa gu dungu agude i aimo ra nibafa yó ra kusayo vuseyo. Bange agu agude i abafa ra re tona ti amirioni 40 kuti 60 rogo agarã nibasasa! Nairiwo gu kere irairapai re!
8. Da rengbe ka ye na ruru sarangbangaa kurogo zegino?
8 Agu abazogo nga aboro arengbanga ka ye na ziga tipa gu badungu akpakarapai narungosi ngbatunga aboro areme te, na ariapai ho rengbe ka manga mbiko gu ome nga ga aboro a te. Fugo Mbori aima fura tipa gupai re kumbatayo ki yawee ti gi gaani regbo re, “gbegbere aboro agbérã ki susi na airanangahe a, ki ninangi aboro, aboro ki ninangi yo a.” (2 Timoteo 3:13) Iraira sarangbangaa nigupai ima maapai rogo sino raka nga ga aboro na si nikpakarapai tipa ka diaha kusayo. Kina gu Mbori nga ga ruru sarangbangaa ko rengbe ka diaha kusayo. Kina ko sa rengbe ka dia Satana kusayo, na adaimona gbiati gbegberẽ aboro.—Yeremaya 10:23, 24.
Kura Aboro Aima Fura Mbata Tipa Iraira Mangaapai
9, 10. Tipagine Asafa adu ti ni na gberarago?
9 Mbata kusayo, kura abakeke Ziazia Kekeapai anaabakabangiriyo nga tipagine Mbori arimisongo tiko ti ni kurogo agu apai nga ga ngbatunga aboro tipa ka ye na ruru sarangbangaa gbiati ruru mangapai ya. Nikpiapai, ani dinga kumba sa nadu ti gu regbo i aake Ziazia Kekeapai ti ni. Gu kekepai du barii Atambuahe 73 (NW), si na gu rimo rogoho nga Asafa. Si nawira wa si nafura tipa gu nyanyakipa kumba ningbatunga Revi nangia bataki manzigo pako agbarii ga akurako ti regbo gu zogarago nangia ga Bakindo Davide, watadu si nafura tipa agu abataki manzigo nadu rogo gu kporo Asafa adu nibariihe. Asafa na atitako asari badungu abia nga gu awiri aYisaraere anaabihe ti regbo gayó irisombori. Ono tie, ti kura regbo sa, gu bake Atambuahe re atona kadu na gberarago rogo toroyo. Ko abi gupai nga, ga gbegberẽ aboro akumuko aazugo kina kumbatayo, na i kidu na ngbarago rogo gayó raka yo, ka gbegberẽpai amanga nga yó ya.
10 Ani nageda gupai ko agumbaha kini yaa: “Mi akpi pai kuti airarekangose, ho mi anabi ga gbegberẽ aboro zereda ni. Bambiko a nga kpioyo na ima ti ni te; ono kpotoyo du na ome ki du rõrõrõ. I na fuda wa kura aboro te; i ni mbusimbusi yo wa kura aboro a te.” (Atambuahe 73:2-8) Ono kusa, gu bake papara Ziazia Kekeapai re aini gupai nga, gako bipai adu niirairaha. (Atambuahe 73:15, 16) Gu bake papara Atambuahe re aʹasadi ka ruga berãko ti gu bipai ko adu nani re, ono ko aarengbanga ka giarogo gupai nzunzu i ambusanga gbegberẽ aboro ti ni ya baraho ruru aboro arungo ni te.
11. Ginipai gu bake Atambuahe nangia Asafa arugutiko nani kusa?
11 Niyangaraha, gu ruru kumba nangia Asafa re arugutiko na gupai napido gbegberẽ aboro kumbatayo, nga Yekova arugusa gupai re arugusa. (Atambuahe 73:17-19). Davide akepai ki yaa: “Mo súngudi Yekova, ki ka kuti gako pai, ko akíisa pa ro mo di kumbo ringara; ho i ka gbarasa gbegberẽ aboro ni, mo abí he [abi].”—Atambuahe 37:9, 11, 34.
12. Ga Yekova ringbisapai nga gine tipa gbegberẽ mangapai na iraira sarangbangaa? (b) Na gaoni bipai nga gine tipa gipai Yekova nika mangaha tipa iraira sarangbangaa re?
12 Nirengo, ga Yekova ringbisapai du nga ka dia gbegberẽ apai kusayo na iraira sarangbangaa rogo gi zegino re ti gu regbo daa bangiriko. Gere nga gupai si aida ndikidi aKristano nitingidi tiyó nani ti aregbo dunduko. Yekova duwa ka ko di gu gbegberẽ aboro aidanga ka manga gupai ko akpinyemuhe ya, na ki fu mosoro fu agu aboro naraka kuti gupai ko akpinyemuhe. “Bangiriko ninabi ahe; puku bangiriko ninawisiga wiri aboro. Yekova ninawisiga ruru boro na gbegberẽ boro, ono mbisimoko nasoga airazuu. Ko aúka kingiriwe wa mai ku ri gbegberẽ aboro na mbia we . . . Bambiko Yekova du ni ruru ko; ko nakpi nyemu kina ruru mangaapai.”—Atambuahe 11:4-7.
Gu Vovo Zegino Nga ga Ruru Sarangbangaa
13, 14. Tipagine ruru mangapai na ruru sarangbangaa nika maapai ti ni rogo vovo zegino?
13 Ho Yekova nika gberesa gi gbegberẽ sino raka re ni du tii ga Satana zogarago, Ko akusa gu vovo zegino nga ga taarimo. Gu ga Mbori Kindo nga ga ngbangbaturũ, si nga guhe nikaa ngerakuriihe, nga gu Kristo aya fu apefuoko wee i niikpari tipaha. Ruru mangapai gbiati ruru sarangbangaa nika dia ba gbegberẽ mangapai gbiati iraira sarangbangaa, na gu regbo re du gu kparakpee re nika da ti rengo, nga gu kpee ani naakparaha kini yaa: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.”—Matayo 6:10.
14 Ziazia Kekeapai naruga rani tipa gu zogarago si aida ani moi bangirani tipaha, nga gu zogarago agu aboro duna ruru ngbaduyó yo akpinyemuhe. Si ki tadu wo, Atambuahe 145:16 kini du nidigisidigisihe, nga gu nayaa: “Mo [Yekova Mbori] naza bero, ki nimbisi gu nyemuhe nga ga unga ahe dunduko.” Kurigure, Yesaya 32:1 nayaa: “Oni ngére, bakindo [nga Kristo Yesu] azóga rago na rurupai, abazogo [nga aguyo nikaa mangasunge kuba Kristo auru kpotosende] ki nizogo rago na ruru sarangbanga.” Nibipa gu Bakindo nga Yesu Kristo, Yesaya 9:7 afura tipa ko kumbatayo ki yaa: “Kia pa gako zoga aboro na pa zereda digidaha adú nga ti ni te, auru ga Dawidi mbatabakindo, ku ri gako ngbi, ka nyakasa ha, na ka songoda ha na sarangbanga na rurupai tona awere na ku mbata yo nye anye kindi a. Gu kenapai nga ga Yekova nga ga arimbasa ko nikamanga gere.” Ya mo oni nabi tironi wai oni kaa raka tiibe gu ruru zogarago re?
15. Ginipai Yekova nika mangaha fu ngbatunga aboro rogo vovo zegino?
15 Rogo ga Mbori vovo zegino, ani apenga agu afugo du rogo Batungusipai 4:1 te, nga gu nayaa: “Were mi ki bi gu rungosiro dunduko aboro namanga tii uru no. Oni ngére, aume ki nigbadi bangiri agu yo yo i arungosi yo, boro adu nga ho sa ka ngarãsi yo te! Ono tandu adu kina ho tipa abarungosi yo, ono boro adu nga ho ka ngarãsi yo te.” Nirengo, si nikpakarapai furani ani ini wai ngbanya gu vovo zegino nga ga rurupai re nikadu mbiko gu zangarengba du ani nani. Gbegberẽpai adunga yo te; ono kina weneapai nikaa manga na aʹuru dunduko. Ii nirengo, Yekova nika rugusa agu apai arugusa dunduko du nigbegberẽhe, ko amanga gere susi kuho ani aberãpaha kuhoni. Nairiwo wai ruhe aru nga Yekova Mbori afu gako toro fu gu mokedi nangia Petero ko kepai ki yaa: “Mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.”—2 Petero 3:13.
16. Wai sigira yo “vovo angbangbaturũ” na rogo gini gene i nasigira “vovo kpotosende” areme?
16 Nirengo, “vovo angbangbaturũ” nga ga Mbori zogarago nga ga ngbangbaturũ du tiibe Kristo, na si awere nisigirasigiraha. Agu aboro nika raka auru “vovo kpotosende,” i nga gu vovo rika nga ga aboro du niruru airisimbori i adungura yó rogo gi yangara areme re. Bangeyo nambeda awere ka dati amirioni saba, rogo aringara wa 235 na rogo adungurati wa 100,000. Agi amirioni aboro re nawirika rurupai na gu ruru agene nga ga Yekova, na nisangbanaha, i na gu kodatise du mburuhe rii gu nyemuse nga ga aKristano. Aboro ima rugatiyo wenengai naapa gayó kodatise na gi gayó kodatise re ima dia gbanga regbo rogo zegino. Si nga gu kodatise gu kura aboro arengbanga ka gbiaha ya. Ngbatunga gu nyemuse na kodatise re, si nga kpia gu iiriwopai nika manga rogo ga Mbori vovo zegino, nga gu nikadu na ruru mangapai gbiati ruru sarangbangaa rogoho.—Yesaya 2:2-4; Yoane 13:34, 35; AKorosaio 3:14.
Satana Adunga na Diabese Te
17. Tipagine Satana nikaa dunga ti ni na diabese rogo gako yangara sovura kuti ga Yekova aboro ya?
17 Barambeda kumbatayo, Satana na apefuoko nika ye navura kuti airisi Yekova tipa ka nyasa rii payó. (Yezekere 38:14-23) Gure nikangia papara guhe Yesu afura tipaha ki yawee “bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Matayo 24:21) Ya mo Satana adu na diabese? Oó, ko adunga na diabese te. Fugo Mbori nakido rani kini yaa: “Yekova nakpi nyemu ruru sarangbanga; ko ambú nga pa gako ziazia aboro te. I abánda ruru aboro nye anye kindi, ono i aróga ngbatunga gbegberẽ aboro ku sa yo. Ruru aboro adía kumbo ringara, ki nye anye kindi.”—Atambuahe 37:28, 29.
18. (a) Wai Mbori nika karagapai sa gu vura Satana nika ye nani sa ga Gako aboro? (b) Tipagine ngbaha ti ni furoni ka fugö gu tingidapai du mburuhe rii Ziazia Kekeapai tipa wai kina ruru sarangbangaa nika nye rogo zegino?
18 Gu vura Satana nika soho na gako rimbasa kuti ga Yekova aboro re, si nikangia yangara sengahe. Yekova afura kumbatayo rogo Zakaraya ki yaa: ‘Gu ni nika zada roni ni nazada kina zende bangire.’ (Zekaraya 2:8) Si adu teketeke wa ka boro aata wiri beni kubangiri Yekova yo. Ko akaragapai nibasa na ki gbarasi agu amangi gbegberẽ apai re. Ga Yekova amoyambu na nyemuse, nikodikodiyo, na kidu na zereda, na ni agu aboro naraka kuti andiko auru kpotosende ane. Gu vura Satana nika soho kuti yó re adu zanga nduhe. Gu boro “nakpi nyemu ruru sarangbanga,” nga Yekova, ko ahinga gupai re te. Yekova nika zinga ka sovura kuba gako aboro ki imi avurayo kusayo nyeanye kindi, fuo gure, ko ki batasi agu aboro nairisoko nga ndikidi Mbori. Si ki tadu were, ka iraira mangaapai adunga berewe ya. Nairiwo gu baiiriwopai nika manga kumbatayo furani re!—Asanza 2:21, 22.
Gaoni Karagapai Nga Gine?
• Tipagine iraira sarangbangaa namoipai ti ni rogo zegino?
• Wai Yekova nika rugusa gupai du tipa iraira sarangbangaa auru kpotosende ane?
• Ginipai ngbaa tironi rogo gi wisigopai du tipa wai rurupai nika maapai kumbatayo auru kpotosende re?
[Gu kpiahe du ti kpewaraga 15]
Ga aboro gbegberẽ apai adu nibakerehe gbe mbata fu Ime Akangbii, kinawo a duhe rogo gi “kusa rago” re
[Gu kpiahe du ti kpewaraga 16]
Rogo ga Mbori vovo zegino, ruru sarangbangaa na ruru mangaapai nika dia ba gbegberẽ apai