Agu Asanahe Ziazia Kekeapai Akaragapai Kutini

Gini ngbatunga boro nga Mbori?

Mbori nga toro, ka ani bingo ko te. Ko nakusi ngbangbaturũ, kpotosende na gu rakiraki ahe dunduko du rogoho. Boro ho nakusi Mbori te na tonatona ko ti ni a te. (Atambuahe 90:2) Ko naida aboro gbata ko na ki ini gu rengo du tipa ko.​—Oni gedi Amokedi 17:24-27.

Mbori nga gu boro rengbe ani arengba ka inoko ti rimoko. Ani rengbe ka ino bete asinoko ni wisigo ani agu ahe ko akusihe. (ARomo 1:20) Ono ka ani aida ka inoko wenengai, si naida ani wiriki Fugoko nga Ziazia Kekeapai. Si naundo rani ani ini wene asinoko.​—Oni gedi Atambuahe 103:7-10.

Mbori nabi iraira mangaapai wai?

Bakusirani nga Yekova nasoga iraira mangaapai. Na ko akusi aboro rogo kpiako yo. (Pa Fu Rugute ni Ue he 25:16) Si du nga ndu gupai dungu rani asoga irairapai ti ni. Gu iraira mangaapai ani abihe areme si ayengo be Mbori te. Mbori afu ranirii fu aboro. Si nafu kina gberarago tie nga, dungu aboro namangasunge na gu ranirii re ngba iraira gene na kini mangi irairaapai. Ngbadu Yekova ki niimi aima.​—Oni gedi Bambata Pai 6:5, 6; Pa Fu Rugute ni Ue he 32:4, 5.

Yekova nakpinyemu ruru mangaapai, na ko ambunga gene fu irairaapai si nimangi amanga kindi te. (Atambuahe 37:28, 29) Ziazia Kekeapai nakidohe nga barambeda Mbori nika nyasa riipa iraira mangaapai dunduko.​—Oni gedi 2 Petero 3:7-9, 13.