Ani Rengbe Arengba Ka Gbia Undo Rogo Hipai
“Ya ani ti agu yo naru nyanyaki dati digida pai ya betedi aboro du [nga yó].” —YAKOBO 5:11.
1, 2. Gine nayugo gupai nga, ga Yekova ringbisapai tipa Adamu aadunga nga ko rungo te?
ANGA ruru boro ho naida ka rungo be ima-kpotose te, zavura kina Bakusirani nga Yekova Mbori, ko aidanga aboro rungo a te. Ani rengbe ka ino gipai re ti gu regbo ani awisigo gu Fugoko gako toro adu kugii pakehe, na ki kparia gupai namangi tingbafuo kusako kumba na dee. Bambatapai nga, Mbori akusi kumba. “Yekova Mbori ki mangi kumba rogo nvutu sende, ki ongo onga unga ku õko yo; kumba ki du ni unga mbisimo.” (Bambata Pai 2:7) Adamu adu nirengberengbe boro ti kpotoko na berãko, na si adu nga kaza gbiati kpio adunga tipa ko te.
2 Na ginipai tigaha nadu tipa gako raka? Ziazia Kekeapai naya tipaha wee: “Yekova Mbori ki moi ati ku uroyo Edene yo; ko ki moi gu kumba koyo ko amangi ko. Yekova Mbori ki mangi angua dunduko si nisono ti sende, nga gu ngba bi he nga gu ngba tipa riahe, na ngua unga a bebere ati yo, na ngua ina wenepai na gbegberẽpai.” (Bambata Pai 2:8, 9) Nirengo, Adamu adu na bawene kpuko ti ni. Rungo aadunga Edene yo te.
3. Gini maabangirise bambata arogotise adu nani?
3 Bambatapai 2:18 natingida rani na pai niyaa: “Yekova Mbori ki ya, ‘Ngba nga ha kumba sungu ni sa ko te; mi ambákada mounda rengbe tipa ko.’” Fuani, Yekova akusi bawene rengberengbe dee fu Adamu, tipa ka sa ko ko du na maabangirise tipa gu ramukporo nga ga ngbarago. (Bambata Pai 2:21-23) Ziazia Kekeapai natingida rani kindi niyaa: “Mbori ki fu maku fu yo, Mbori ki ya fu yo, ‘Oni zúga azuga, ki nge ange, ki hisi kpotosende berewe ki zogo ho.’” (Bambata Pai 1:28) Gu bambata aboro re aduna gu mamu beyo nga ka gbaraga gu Paradizo nadu Edene yo re daho ka gi kpotosende re asatihe ni dunduko niparadizo. Na si adu nga i abatika agude na wene kpotoyo, na ka i arungongo ya. Nairiwo wai gu bawene tonatona raka re angba!—Bambata Pai 1:31.
Tonatona Arungo
4. Nibi wai du sangba kuru apangbangaa, ginipai du ziazia tipa ngbatunga aboro?
4 Ono tie, ho ani awisigo gu pangbangaa ni du tipa ngbatunga aboro, si nayugo gupai furani nga kerepai aima manga nga gu nasa gupai nga apai da nibagbegberẽhe. Dungu gbegberẽ apai aima manga, na ngbatunga aboro ima rungo nikerehe gbe. Vuru agu agarã nasusi, atita Adamu na Eva dunduko aima digo niwoki, nigbinza, na niyangaraha, i kini kpiki. Gu zegino ani araka rogoho areme, si ima turo ti gu paradizo si aaida i hiisihe na aboro ngbarago. ARomo 8:22 naringbisapa gupai du tipa gipai re zukazuka niyaa: “Ũzegino dũ mongo niukaga omehe nimbu be ima kina ku awere.”
5. Wai bambata avungurani akusi rungo fu ngbatunga aboro?
5 Ani arengbanga ka bira Yekova tipa gu bakere rungo naima digo nimangi tipa gbanga regbo re te. (2 Samuere 22:31) Si naida ani bira aboro mbiko i du paparaha kuvuru beyo. “I mangi kere gbegbere mangaapai susi; a nga gu ni sa namanga wenepai te.” (Atambuahe 14:1) Ti kina tonatonaha, apai adu nibawenehe fu bambata avungurani. Gupai si aidaha beyo tipa agi apai re nindu kumbatayo kindi angia giasangba Mbori, ono Adamu na Eva asia gupai nga i naida ranirii zanga Mbori. Wa duhe nga bambata avungurani aima kusa goyo kusayo tii ga Yekova arugute, i aarengbanga kadu berewe nirengberengbe yó te. Si adu nga gayó raka nikaa gbera kina kumbatayo daho i nika kpiko ni. Rogo gi gene re, i kini mo ka mbu zangarengba furani.—Bambata Pai 3:17-19; ARomo 5:12.
6. Ginipai Satana amangihe tigako nga gu nakusi rungo?
6 Gu kura boro berewe narimisi tiní kurogo gu tonatona rungo re angia gu boro nitoro Mbori amangiko i ayamba ko nga Satana Bakitingbanga. Yekova afu ranirii fuko. Ono tie, ko aingi mangasunge na gu ranirii re tipa ka sa aboro i niirisoko. Ono tie, kina Yekova sa si aida aboro naairisoko angianga guhe kina ko akusihe ya. Satana nangia gu boro nazomia Adamu na Eva i gbata ranirii zanga Yekova, ki mangi tiyó “wa kina Mbori, niini wenepai na gbegberẽpai.”—Bambata Pai 3:5.
Kina Yekova Sa Duna Rengo ka Zoga Aboro
7. Gine sangbana samungu kuti Yekova nayuguhe?
7 Sangbana gu samungu re nayugo gupai nga, kina Yekova sa nga Bakindo Zegino dunduko, duna rengo beko ka zoga aboro, na kina gako zogarago sa du niruruhe. Agu akutu agarã susi kusayo, si yugu gupai nga, Satana nga “gbia gi zegino re.” Na gi gako zogarago re, si ima kusa gbegberẽ apai, irairaapai gbiati zuũ. (Yoane 12:31) Gu kere zogarago nga ga wiri aboro nga gu du tiibe Satana, si ayugu gupai a nga si arengbanga ka zoga aboro ngba ruru gene te. (Yeremaya 10:23) Sidu, agu azogarago naabaha dunduko aboro aberãpaha angianga ga Yekova ya, si naadunga na diabese te. Gu kuru pangbangaa nga ga aboro nayugo gupai nga, kina boro rengo du ngaha.
8. Ga Yekova ringbisapai nga gine tipa gu ngbatunga azogarago dunduko nga ga wiri aboro, na wai ko nika digiso gi gako ringbisapai re?
8 Wa duhe nga Yekova aima mbu kutu agarã tipa aboro asadi ka zoga tiyó nisayo zanga ko, ko na rengo beko ka dia agu azogarago dunduko kusayo du auru kpotosende mbiko undo ti ni te, na ki moi kina gako zogarago kubaha. Sangbanebi nafura tipa gipai re niyaa: “Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, . . . Si akúadi agi angbi re rukutu ki digisi he dunduko, si ki nye anye kindi.” (Daniere 2:44) Gu zogarago nga ga adaimona na gu nga ga aboro, si ago ago kusayo, kina ga Mbori Kindo nga ga ngbangbaturũ sa nika nye kini zogo kpotosende naabaha. Kristo nikangia gaha Bakindo, na ko azogarago na gako abadiazogarago du namba yó nga 144,000, nga gu ruru aboro i nadiyo kina auru kpotosende ane.—Yugoti 14:1.
Gu Undo Du ti Hipai
9, 10. Wai Yesu awiriki giasangba be agu apai ko ahihe?
9 Si nafu kina ngbarago furani ka wisigo gu rẽ-na-sunge du agu aboro nani nika zogarago rogo gu Kindo nga ga ngbangbaturũ. Bambatapai nga, Kristo Yesu nitiko aima yugo wai rẽ ko kadu ni Bakindo. Ko aima dia badungu agarã nga gu ani ainongo pai tipaha ya na Bako nga Yekova kini mangi gupai Bako akpinyemuhe, kidu nigako “bangbasia boro sunge.” (Asanza 8:22-31) Ho Yekova ambakadipai ni tipa Yesu ye ku auru kpotosende ane, ko aakánga ha te. Auru kpotosende ane, ko anaafura na aboro tipa ga Yekova bakere pagbia gbiati gako Kindo. Yesu amoi wene kpiapai furani nirako na goko kutiibe ga Yekova bakere pagbia.—Matayo 4:17; 6:9.
10 I arungosi Yesu na ki imiko niyangaraha. Ti agu aregbo Yesu anaatungusapai, ko aima bi gu rungo nanaamanga ngbatunga aboro. Ya mo undoho ko agbiaha ti gu rungo ko abi aboro i nirungoho re na ti gu rungosi kina boro ko nitiko agbiatiko nani? Ii, AEbere 5:8 nayaa: “[Wa] ko avura du ni Wiri [Mbori], . . . ko awiriki pa giasangba be agu apai ko ahi.” Agu apai namangi Yesu auru kpotosende, si asako ko du na bakere rugatinapai gbiati nunga. Kina boro ko nitiko aima bi gupai nadu tipa ngbatunga aboro. Ko anidu na nunga agu aboro tiko nanidu rogo arungo na ki rugutiko na gupai nga si naida ko ye ka batasa yó. Oni kparianga wai gu mokedi nangia Pauro anyakasi gipai re rogo gu buku nga AEbere. Ko ayaa: “Si du si arengbe ti ni fu ko ko du rogo apai dũ wa kina awirinako, ya ko rengbe na du ni gu gbiamotumo du na inapai na ngarã ti ni tipa agu apai nga ga Mbori, ka gbata ũmotumo tipa gu ingaapai nga ga aboro. Bambiko wa ko adu ni asadiasadi ko tigako ki hi apai be he, ko rengbe na unda agu yo du ni asadiasadi yo.” “Ani adu nga na gu gbiamotumo be rani arengba nga na rungo na ani tipa gaani rungbura ya, te; ono i aima asada ko rogo apai dunduko wa kina rani, ono ko adu nga na ingapai te. Si du tie ani gbisi mbembedi ni erã ku pati gu mbatabakindo nga ga undahe, ya ani di inapai, ki bi undahe si unda rani rogo rago zingo.”—AEbere 2:17, 18; 4:14-16; Matayo 9:36; 11:28-30.
11. Agu abakindo du ni aboromotumo a i narogodi yó auru kpotosende ane, wai gu inohe du yó nani nika undo yó i du ni abazogo?
11 Ani rengbe ka pe kina gu bangisapai re a tipa agu aboro du bangeyo nga 144,000 nga aguyo “i atumo” yó auru kpotosende ane tipa i du niga Kristo Yesu abadiazogarago rogo gu Kindo nga ga ngbangbaturũ. (Yugoti 14:4) I dunduko i abatika yó nikina aboro auru kpotosende ane, i ki sono kina rogo gi zegino hi be arungosi re, na i aima gbiatiyo na agu arungo re a. Dunguyo i aima rungosi yó, na i ki imi gu kurayo mbiko kakuti gayo ruru mangaapai fu Yekova na kini pekefuo Yesu. Ono ‘ka zee amánganga yó mbiko dezire gayó Gbia ya, ono i ahipai ahi gbe rogo wene pangbangaa yo.’ (2 Timoteo 1:8) Agu apai namangi yó auru kpotosende ane asayo i duna inohe tipa ka ru ngbangbaturũ yo ka sapangbangaa aboro niruruhe auru kpotosende ane. I na nunga tiyó, weneringise, na kidu barambeda tipa ka undo aboro.—Yugoti 5:10; 14:2-5; 20:6.
Agu Aboro Duna Maabangirise ka Raka Auru Kpotosende
12, 13. Agu aboro duna maabangirise ka raka auru kpotosende, gini undo rengbe yó ka gbiaha ti hipai?
12 Ya mo gu rungo du awere re, si rengbe ka kusa wenepai rogo agu aboro yo duna maabangirise tipa ka raka nyeanye kindi rogo paradizo kpotosende, nga gu akaza, arungo, na kpio nikaa dunga rogoho ya? Anga ima gbiati kere egerã nga gu rungo aye nani, si nigupai ka boro kpinyemuhe te. Ono ho ani ahi agi arungosi re ni, si nanyakasa gu wene sino du tirani na kini sa rani ani du na ngbarago.
13 Oni kparianga gupai Fugo Mbori agumbaha tipa gipai re: “Ka oni vura hi apai ahi mbiko rurupai, airamaku [watadu, aboro ngbarago] nga oni.” “Ka i agbarasa rimoroni mbiko rimo Kristo, airamaku nga oni.” (1 Petero 3:14; 4:14) “Maku fu roni [watadu, aboro ngbarago nga oni] ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re. Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe.” (Matayo 5:11, 12) “Maku [watadu, ngbarago] du fu gu boro naru nyanyaki rogo asada, bambiko ho i ka bi gani pai ni si rengbe, i afu . . . kpakpari unga fu ni.”—Yakoba 1:12.
14. Ginipai du tipa gu rungo nasa airisi Yekova i du na ngbarago?
14 Anga kina boro ndikidi arungo nga gupai rengbe ka sa rani ani du na ngbarago te. Ani nagbia ngbarago na wasa mbiko ino ani gupai nga, ani narungo mbiko manga gupai Yekova akpinyemuhe na kini pekefuo Yesu. Nikpiapai, rogo bambata sa kama agarã, i aba kura amokedi ku bambukiso yo, fuoho, i ki ndu naayó kubarabangiri ga aYuda kikindigipa agbia-ngbangaa na kini bisira payó tipa tungusapa Yesu Kristo. I ataki yó na ki mbuyo i ga. Gini berãpai i adu nani? Gu pangbangaha du rogo Ziazia Kekeapai, si naya furani wee “i ki guari tie barangba abororondo, rago ningba angba ti yo mbiko wa ya yo i re are nahi wasiro tipa rimoko.” (Amokedi 5:17-41) Anga i adu na ngbarago mbiko gu terẽ i ataki yó nani na gu igira kpotoyo adu nani te. Ono mbiko i arugutiyo nani nga gipai re mangiyo mbiko i akakuti gayó ruru mangapai fu Yekova na kini pekefuo Yesu.—Amokedi 16:25; 2 AKorindo 12:10; 1 Petero 4:13.
15. Wai rengbe gu hipai du ani nani awere ka undo rani kumbatayo?
15 Ka si du nga ani nika hi arungosi na ruru berã, si rengbe ka nyakasa gu hipai du rogo rani yó. Gure nika nyakasa rani ani rengbe ka hi agu arungosi du kumbatayo. Ani nagedapai rogo Ziazia Kekeapai nayaa: “Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ; niini ya asada gaoni idapase namanga zadapase.” (Yakoba 1:2, 3) Teketeke a, ARomo 5:3-5 natingida rani niyaa: “Rago ngba ti rani a na gaani rungosi; ani ini ya rungosi namaa hipai; hipai namaa inahe; inahe namaa maabangirise; maabangirise afu nga rani sa zee te.” Kina wai ani ahi aʹasada mbiko padu ani ni aKristano, kinawo a ani ka rẽ tipa ka hi agu aʹasada du kumbatayo rogo gi kere zegino re.
Yekova Atumo Rani Atumo
16. Ginipai Yekova nika mangaha fu agu abakindo na aboromotumo narungo awere mbiko gayó idapase?
16 Ka si vura du nga pa gaani ahe agberẽ berãni mbiko agu arungosi nagbia rani mbikopa kaani kuti gu raka nga ga aKristano, ani rengbe kadu na ngbarago nga Yekova azanganga tumo rani na ahe susi gu paha nagberẽ berani re te. Nikpiapai, tipa agu aboro namaabangiriyo ka ga ku ngbangbaturũ yo, gu mokedi nangia Pauro akepai tipa yó ki yaa: “Oni . . . [a]du na ngbarago ho i agbu gaoni ahe ni, wa ini oni he ya oni na wene ahe be roni susi gure nga nyenye he” nga zogarago rogo ga Mbori Kindo. (AEbere 10:34) Oni berẽnga pa gu ngbarago i nikadu nani tiibe gu rugapai nga ga Yekova na ga Kristo nikodayo tiyo ka gbaraga iiriwo amaku kurii agu aboro nika raka rogo vovo zegino. Nairiwo wai ruu agu afugo gu mokedi nangia Pauro akehe fu ruru aKristano nga gu nayaa: “Mi gedi gu hika apai du wa du rago re ka si are nga na ringbisa ha na gu taarimo i ka yugo ho ti rani ya.”—ARomo 8:18.
17. Ginipai Yekova nika mangaha fu agu aboro namaabangiriyo tipa raka auru kpotosende ane nga aguyo nairisoko ngba ruru gene?
17 Teketeke a, ka si vura du nga agu aboro duna maabangirise tipa ka raka auru kpotosende pa gayó ahe gberẽ beyo watadu kina yó mbupaha tipa kaa iriso Yekova, ko atumo yó atumo nibakerehe gbe rogo gupai ko ka mangaha kumbatayo fuyó. Ko nika fu gu rengberengbe unga fuyó adunga digidoho ti ni ya rogo paradizo kpotosende. Rogo gu vovo zegino re, Yekova “awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.” (Yugoti 21:4) Nairiwo gu bawene maabangirise re! He ho rengbe ani ka mbuhe rogo gi zegino re tipa ka manga ga Yekova sunge rengbeyó ka ringbisaha na gu iiriwo maku nika ye te, nga gu Yekova nika fuhe fu gako ruru amoyambu nga aguyo nahi arungosi.
18. Gini afugo wasa Yekova nafuhe furani rogo Fugoko yo?
18 Agu arungosi ani ka hihe dunduko, si arengbanga ka gbirisapa gaani ngbarago nga ga nyenye unga rogo ga Mbori vovo zegino te. Nirengo, arungo naabaha nika digo adiko mbiko gu bawene iiriwo raka nikadu rogo vovo zegino. Yesaya 65:17, 18 nayaa: “I atíngida nga pa gu bambata apai te si ayé nga ku berãyo yo a te. Ono oni dú na ngbarago ki ningi nye anye kindi tipa gu pai mangi mi he re.” Nisangbana gipai re, si arengbe arengba fu Yakoba nangia wirina Yesu ko yaa: “Ya ani ti agu yo naru nyanyaki dati digida pai ya betedi aboro du [nga yó].” (Yakoba 5:11) Ii, ka si du nga ani rengbe arengba ka hi agu aʹasada du awere, si nayugo gupai nga, ani rengbe arengba ka gbia undo awere na kumbatayo a.
Gaoni Karagapai Nga Gine?
• Wai rungo atona manga ngbatunga aboro?
• Gine rungo nika ye nani fu agu aboro duna maabangirise ka zogarago kumbatayo gbiati araki auru kpotosende?
• Tipagine rengbe ani ti ni kadu na ngbarago awere wa vura duhe nga ani narungo arungo vurũ?
[Gu kpiahe du ti kpewaraga 18]
Bambata avungurani aduna wene raka naapido yó kumbatayo
[Gu kpiahe du ti kpewaraga 20]
Agu arungosi Yesu abihe, si nasako ko du niwene Bakindo na niwene gbiamotumo
[Gu kpiahe du ti kpewaraga 22]
‘Rago angba angba ti amokedi mbiko wa i ahi wasiro tipa rimo’ Yesu