Ani Mangipai Ringbisihe Kuti Ga Mbori Ringbisapai

“[Kristo] akpi tipa yo dunduko, ya agu yo du ni ungayo ka i du nga ni ungayo fu tiyo ya.”—2 AKORINDO 5:15.

1. Oni gumbanga gupai namangi ti gu regbo kura mokedi sa na gako abadiasunge aamanga gayo sunge amokedi.

MOKEDI du rimoko nga Aaron ayaa: ‘Gaani ũnduge nangia gu bambata ũnduge nada rogo gu gbaria nga ga Afirika tingbafuo digo gu vura nadu dagba aboro-ringara nisayo.a Tipa gbanga regbo, ani aarengbanga ka fura na aboro gu tooni dungurati nadu rogo gu gbaria re te, sidu ani kini baki kina bangirani tipa agu azingo nga ga awirina. Ani aye na ariahe, arokoo, na agu awaraga nasaka rogo Ziazia Kekeapai yo. Ani aye a na gu kasete vidio nga, Jehovah’s Witnesses—The Organization Behind the Name (ADezire Yekova, Gu Riigbu Du Kugii gu Rimo Re).b Dungu agu aboro nadu na nyemu bibi gu vidio re aye kurogo gu gbaria ani adu rogoho tipa ka bihe tii gu bakere bambu-nvuo aboro anaangimbaro tiihe. Ani amangihe bara ue rogo gu uru re. Dungu aboro atona wisigo Ziazia Kekeapai tingbafuo biyo gu vidio re. Nirengo, gupai ani amangihe re aima kusa wene sangbanaha.’

2. (a) Tipagine aKristano adiaberã ti ni ka manga ga Mbori sunge rogo gayo raka? (b) Gini asasanahe ani ka wisigoho awere?

² Tipagine Aaron na gako abadiasunge aidi ka manga ngbatunga gi nyanyaki sunge re ti ni? Gu tambuahe i adu nani tipa ga Yesu Kristo motumo tumorii, si nasayo i kpara gayó raka fu Mbori na ki asadi ka mangasunge na gayó raka ringbisihe kina kuti ga Mbori ringbisapai. Wakina yó, agu aKristano naima kpara gayó raka fu Mbori, i “ni ungayo fu tiyó” te, agu apai dunduko rengbe na omeyo, i namangaha “mbiko wene pangbanga.” (2 AKorindo 5:15; 1 AKorindo 9:23) I ima inoho nga, ho gi zegino re nika digo ni, agu amarã na kikiipa asunge dunduko du rogo gi zegino re, si adunga na sunge ti ni te. I naida ka mangasunge na gayó raka gbiati auwa-kpotoyo ringbisihe kina kuti ga Mbori ringbisapai. (Batungusipai 12:1) Wai rengbe ani ka manga gipai re? Wari rengbe ani ni ka gbia gu ngara gbiati ome si aidaha tipa ka manga gipai re? Na gini agene rengbe ani ngbaha ka mangasunge fu Mbori?

Gu Mangaapai Nandu Kina Kumbatayo

3. Gini banguapai si aidaha tipa ka manga gupai Mbori akpinyemuhe?

³ Tipa ndikidi aKristano, i namanga gupai Mbori akpinyemuhe rogo gayó raka daho i akpi ni. Si natona dedede na gu banguapai nga geda Ziazia Kekeapai na aʹuru dunduko, rimisotise kurogo gu Sukuru Nga ga Siokrasia, kodatise kuti sunge tungusapai, gbiati nduge kumbatayo sa zio bapatiza. Ho boro asona ni kumbatayo rogo agi apai re, si naida ní tingidi gupai gu mokedi nangia Pauro apehe ki yaa: “Mo berẽ pa agi apai re gbe; mo fú tiro sa ni kakaka dunduko; ga susa na apai ki du ni yuguyugu he fu aboro dũ.” (1 Timoteo 4:15) Anga gu sonakumbatayo re nayugo gupai nga boro nakiisopa tiní akiiso te, ono si nayugo gupai nga, boro ima ida ka manga gupai Mbori akpinyemuhe. Pa manga ani pai wa gure nayugo gupai nga, ani ima ida kina Mbori niyugu gene furani rogo apai naabaha dunduko, na ko namangaha wo susi wai rengbe ani ka mangaha.—Atambuahe 32:8.

4. Wai rengbe ani ka dia gunde kusayo tirani?

⁴ Ono tie, ka ani akeesa akeesa, watadu ka ani aberã tipa tirani nyanyakii, si rengbe arengba ka kiso gene berani ka ani asonanga kumbatayo rogo gaani sunge fu Mbori ya. (Batungusipai 11:4) Sidu, mbata fu ani gbia ndikidi ngbarago rogo mangasunge fu Mbori na fu akuarani, si naida ani dibe gu gunde du ani nani. Nikpiapai, Erik aaida ka mangasunge rogo gu dungurati aboro ape gu fugo rogoho dukia ti gako. Ono ko aabaka bangiriko na gupai nga: ‘Boro ya mo agu awirina re, i adia re kugume? Ya mo mi akpinyemuyo? I aida na mi?’ Ko ayaa: “Mi aye ka rugatire na gupai nga, si naida mi naabakabangire tipa awirina, angianga tipa tire ya. Mi adi gu bakabangirise mi adu nani tire kusayo na ki moiberãre sa kina gupai mi aida ka undo awirina rogoho. Mi akpari fu Mbori tipa undo na ki mangi gupai mi aida ka mangaha. Natona ti gu regbo re kada ku awere, mi ima gbia bakere ngbarago be gu sunge mi amangaha yo.” (ARomo 4:20) Ii, ka ani amangasunge fu Mbori na akuarani zanga gbangbati, ani gbia bakere ngbarago agbia.

5. Ka ani aida ka manga agu asunge nga ga Mbori, tipagine si aida ani sogimaha aso ti ni na rugatise? Oni yugunga ha na kpiapai.

⁵ Tipa ka manga agu asunge nga ga Mbori na kidu na diabese rogoho, si naida gupai a nga ani sogimaha aso wenengai na rugatise. Si aidanga ani du na bakere bape kurirani te, ani andu kadu nikanga fu gi zegino re, na ka ani adunga na regbo berani gbe tipa ka manga ga Mbori sunge ya. Ziazia Kekeapai natingida rani kini yaa: “Badibape nga kanga fu bafubape.” (Asanza 22:7) Ka ani akido kuti Yekova na ki peresipa agu apai nga ga toro mbatayo, si nika undo rani ani naabi apai ziazia. Nikpiapai, wirina nga Guoming na adawiriko ue naraka na navunguyo rogo gu rago duhe nikpakarapai rogoho ka dua bambu, watadu kaa tumo marã tipa bambu kaa raka tiihe. Si a nikpakarapai ka gbia kandara gu sunge-marã rengbe boro ka nye kuti ni. Gupai naundo yó i niiraki wenengai zavura ho adunga yó ni dunduko ngba sunge-marã ya, si nga, i dunduko nadungura marã tipa ka tumo marã bambu nani, na tipa ka gbia agu ahe nasongoda raka. Guoming ayaa: ‘Ti kura aregbo, ani naagbianga marã te. Ono wa si nivura duwo, ani naatungusapai kindi ni abazakigene, na kini ngere wenengai fuo narani. Ani na ngbarago mbiko gupai nga, narani azomianga rani ani mbu agu asunge nga ga Mbori tipa kaa mangasunge marã nyanyakii kaa ye na agu ahe furi anyakanga paha ya te.’—2 AKorindo 12:14; AEbere 13:5.

6. Gini kpiapai nayugo wai rengbe ani ka mbakada gaani raka si ndu kuti ga Mbori ringbisapai?

⁶ Ka si du nga oni ima rimiso tironi gbegberẽe kurogo gbata agu ahe nga ga zegino, singia marã du oni agbataha, si naida oni mangi bakere ariapai ka oni aida ka peresa ga Mbori ringbisapai mbatayo fu apai dũ. Oni arengbanga ka manga ngbatunga agu aʹariapai re rogo bangisa uru te. Na ka si du nga oni asadihe ka si andunga wenengai ya, ka oni berẽnga ha nga oni ima ti ya. Oni bingo gupai nadu tipa Koichi. Ko angia gu boro nanaadia bakere regbo kina ku ba mbaro yo. Ko awiriki Ziazia Kekeapai mbata fu garãko da ti ue-bawe, ono tipa gu dungu agarã naye fuoho re dunduko, ko afutiko sa kina ngi agu ambaro nga ga vidio na si ki moipai riko. Rogo kura uru sa, Koichi asana tiko ki yaa: ‘Ginipai mi amangaha awere? Garãre ima susa biata-bawe awere, ono nyanyakipa pai ho mi amangaha rogo gimi raka te!’ Ko atona wirika Ziazia Kekeapai berewe, na ki gbia undo be dungurati. Wa si avura du nga ko aamanganga ariapai nikina ipo bara sa te, si aarugusanga ko gene te. Fuo ko kpari fu Mbori kakaka, na ko ki gbia undo a be kura aboro, ko adibe gako bakabangirise. (Ruka 11:9) Koichi namangasunge awere ni moyambu-undo rogo dungurati.

Ani Mangihe Ringbisihe na Omerani

7. Tipagine si aida ti ni ani naamanga ga Mbori sunge ringbisihe na omerani?

⁷ Ka ani aida ka manga ga Mbori sunge, si naida ani mangihe na omerani dũ. Si aidanga ani mangi ndundu watadu kadu na nyomoro ti mangaha te. (AEbere 6:11, 12) Ono wa vura duhe wo, Yekova aidanga gupai nga ani mangisunge fuko omerani ki bati abata te. Ko aidanga berãrani du nifudifudihe be bakere sunge fuko a te. Ka ani ini gupai nga ani arengbanga ka nyasa ga Mbori sunge ngba gaani ome nisarani te, si nafu taarimo afu fuko, na si ki sa rani a ka ani mangingo gako sunge ki kpiakpi kurogoho ya. (1 Petero 4:11) Yekova aima kido rani nga ko nika fu ome afu furani ani mangi gako sunge, ono si aidanga ani fu tirani sani kisusi ome te. Ka ani asadingo ka mangapai susi wai ko aida ani mangihe ya. (2 AKorindo 4:7) Tipa ani rengbe kaa mangasunge kindi fu Mbori zanga omerani bati, si naida ani naamangaha ringbisihe na omerani.

8. Ginipai namangi ho paranga Kristano sa aaida ni ka mangasunge na omeri dũ fu Mbori na tipa ka undo tiri a, na gini ariapai ri amangihe?

⁸ Nikpiapai, Ji Hye naraka Asia yo amangisunge tipa agarã ue, nga gu sunge si aidi ri fu tiri afu sani. Ono tie, ri atamanga gi sunge re kini tungusipai ninazakigene. Fugori nayaa: ‘Mi aʹasadi tire ka mangasunge na omere dũ fu Yekova na tipa ka undo tire a, ono mi anaara gbua tipa asaa bisue rogo yuru sa. Niyangaraha, mi abi gupai nga omere ima bata rogo toroyo, mi kini gbia kina bete ngbarago gbua be agu apai nga ga toro.’ Tipa ri rengbe kaa mangasunge fu Yekova na ‘kpotoriyo dunduko, na mbisimori dũ, na gari berã dũ, gbiati omeri dũ,’ ri agbata gu sunge naadianga bakere regbo beri ya. (Marako 12:30) Fugori nayaa: ‘Wa gimi aborokporo avura kaa sosoda re mi zi gu sunge nikaa kusa bakere marã, mi aʹasadi tire ka peresapa ga Mbori pai mbatayo. Ono mi nagbia marã agbia nga gu rengbe mi ka ngbeka nyanyakipa ahe nani, wa gu nga wene rokoo. Na kpotore awere wenengai mbiko gupai nga mi nara wene rame ara yugu tipa dungu asaa! Mi nagbia ngbarago be gu sunge mi amangaha fu Mbori, na mi awere nyanyakii rogo toroyo. Si wo mbiko gupai nga, anga mi berewe rogo gu ba agu apai nga ga zegino nikaa gbeberã re fuoho te.’—Batungusipai 4:6; Matayo 6:24, 28-30.

9. Wai rengbe aboro ka karagapai sa gu wene pangbangaa ani atungusaha?

⁹ Anga aboro dunduko rengbe ka mangasunge ni abatungusipa Kindo ti aregbo dũ te. Ka si du nga oni nasovura aso kuti gbinza, kaza, watadu gu kura fudifudiapai tipa ka mangasunge fu Mbori, oni ini gupai nga, Yekova nabi gupai oni amangaha re na kikiipaha, ka si du nga oni namangaha na ngbaduroni yo dũ, ka si vura du nitoonihe vurũ. (Ruka 21:2, 3) Sidu tie, si aidanga ani bi gu ome na taatapaha ani amangaha ka undo kura aboro te, ka si vura du nga si aundongo aboro gbe te vurũ. Nikpiapai, ka si du nga ani kuru rogo bete akporo na tungusapai, ono ka ani abingo boro kandara sa duna nyemu gupai ani agumbaha ya, ginipai ka mangi? Fuo ga ani ku kpurani yo, agu aboro ani nindu ku kpuyo yo re rengbe arengba kaa fura tipa rani tipa dungu asaa, watadu dungu arame, ka si vura du vurũ nga i aadunga na nyemu gupai ani agumbaha re te! Si aidanga ani moibangirani nga, agu aboro dunduko nika gia wene pangbangaa, i nika ida aida nani te. (Matayo 13:19-23) Aguyo rengbe ka ida nani fuo bete regbo apai naʹariatihe rogo zegino watadu rogo gayo raka. Ka si vura du kina wai vurũ, ka ani amanga gupai rengbe omerani nani ba tungusapai yo, gure nga ani namanga ga Mbori sunge. Ani nga “ga Mbori abadiasunge.”—1 AKorindo 3:9.

10. Gini asunge rengbe agu aboro dunduko du rogo dungurati ka mangaha?

¹⁰ Kurigure, ani dunduko rengbe ka undo gaani aborokporo gbiati agu awirinarani nga ga toro yó. (AGaratio 6:10) Agu apai ani amangaha rengbe ka undo kura aboro bakere gbe, na tipa gbanga regbo. (Batungusipai 11:1, 6) Ho abaakumba na amoyambu-undo amanga agu asunge ni wenengai Mbori afuhe fuyó, i naundo agu aboro du rogo dungurati tipa gayo pagume na Yekova du ninyanyakihe, na agu asunge nga ga aKristano kini sono kina kumbatayo. Ziazia Kekeapai nakido rani nga, ka ani ‘amanga ga Gbia sunge zaaza dedede,’ gaani ‘sunge adunga gbua te.’—1 AKorindo 15:58.

Ani Peresipa ga Mbori Sunge Mbatayo

11. Gini asunge rengbe boro ka mangaha rogo ga Yekova riigbu?

¹¹ Wa ngia ani aKristano, ani nakpinyemu unga, na ani nakpinyemu ka taasarimo Mbori rogo agu apai dunduko ani amangaha. (1 AKorindo 10:31) Ka ani fu tirani ka tungusa gu wene pangbangaa nga ga Kindo na kini yugupai fu aboro i kakuti agu apai dunduko Yesu ayuguhe, ani nika bi gupai nga, badungu agene duho rengbe ani ka mangasunge fu Mbori ngbaha. (Matayo 24:14; 28:19, 20) Ani duadu a na amomu berani ka mangasunge rogo agu arago duna zingo aboro-sunge rogoho, singia rogo kura dagbarago, rogo gu rago aboro ape gu fugo rogoho dukia, watadu rogo kura ringara. Agu abaakumba na amoyambu-undo ataroganga adee ya, i rengbe arengba ka ndu tipa gu Sukuru Du Tipa Yugopai fu Amoyambu, na tingbafuoho, i ki ndu ka mangasunge rogo agu adungurati duna zingo nyanyaki aKristano rogoho, singia kina rogo gayo aringara watadu rogo kura ringara. Agu arogotise namangasunge tungusapai ti aregbo dunduko, i rengbe rengba ka rẽ tipa ka ndu tipa gu sukuru nga Gilead, nga gu du tipa yugopai fu amokedi i ndu ka mangasunge rogo kura aringara. Na bakere zingo kinaho tipa abaundosunge tipa i ndu ka mangasunge Beteere yo na sunge dudua abambu irisombori gbiati abe-basunge.

12, 13. (a) Wai rengbe oni ka diaberã tipa gu ngbatunga sunge oni aida ka mangaha? (b) Oni yugungo wai rengbe gu inohe gbiati birĩ-sunge boro agbiaha ti kura sunge ka undo ní tipa ní mangi kura asunge.

¹² Gini ngbatunga sunge si aida oni mangihe? Wadu oni niga Yekova amoyambu naima kpara tironi fuko, si naida oni naangera kina kubeko na gako riigbu tipa arugute ti aregbo dunduko. Gako “wene Toro” nika undo roni oni mangi wene adiaberã. (Nemaya 9:20) Gupai ninaamanga dedede nga, gu sunge boro amangaha, si nazakagene funi ní mangi kura sunge, na gu inohe gbiati birĩ-sunge boro nagbiaha ti gu sunge ní amangaha, si rengbe ka undo ní nimangi kura sunge nani kusa.

¹³ Nikpiapai, Dennis na diako nga Jenny anaaundo sunge dudua aBambu Kindo dedede. Ho bakere bavugumo amangi ni Amerika yo rogo gu garã nangia 2005, i afutiyo ka undo agu aboro gberango amangi yó re. Fugo Dennis nga: “Pa manga ani sunge na gu inohe gbiati birĩ-sunge ani agbiaha ti regbo dudua aBambu Kindo ka undo agu awirinarani nadu rogo zingo ima fu bakere ngbarago furani. Ani na bakere ngbarago mbiko gu tambuahe du agu aboro nani ani adudua akpuyo. Gu kura abadona nga ga aboro nadudua abambu, si na diabese gbe wagu du aDezire Yekova nani te. ADezire Yekova ima dudua badungu aBambu Kindo na akporo awere na ki mbakadi agu kina apaparaha akuadi be gu bavugumo re. Bangehe ima susa 5,300. Aboro nabi gipai re si kini iriwo airiwo tiyó. Si kini sa gupai nga i duna nyemu gu wene pangbangaa nga ga Kindo ani atungusaha fuyó.”

14. Ginipai si aida oni mangihe ka oni aida ka manga sunge Kindo ti aregbo dũ?

¹⁴ Ya mo oni rengbe ka mangasunge kindo ti aregbo dũ? Ka oni mangihe wo, oni gbia badungu amaku agbia. Ka si du nga agu apai du tipa roni awere, si arengbanga ka sa roni oni rimi gi sunge re te, isoke si naida oni mbakadi bete gaoni apai ambakada. Oni kpari fu Mbori a wa Nemaya amangihe ho ko aaida ni ka tona nyanyakipa sunge. Ko akpari ki yaa: “Ako Gbia, mi nazungadi ro . . . mo mangi pa ga moyambu areme.” (Nemaya 1:11) Fuoho, oni ki kido kuti “gu ko ninagia kpetambuahe,” kini mangipai ringbisihe na gupai oni asanahe tipaha. (Atambuahe 65:2) Tipa Yekova fu maku kurii gaoni asaditise ka mangasunge fuko gbe, si naida oni mangi gu asadatise re mbata. Bara sa kindi oni nadiberã ka mangasunge Kindo ti aregbo dũ, oni nye na kina gu gaoni diaberã re. Wa regbo nikaa susa, gaoni inohe nikaa sona a, na gaoni ngbarago kini kii akio kumbatayo.

Wene Raka

15. (a) Wai ani agbia undo ho ani afura ni na gu ga Yekova amoyambu naima ima kurogo rengo, na ho ani agedapai ni tipa yó? (b) Oni gumbanga pangbangaa sa dagba agu apangbangaa ngbaa tironi gbe nga gu du tipa ga Yekova moyambu.

¹⁵ Gini weneapai rengbe oni ka maabangironi tipaha ka oni amangapai ringbisihe kuti ga Mbori ringbisapai? Oni fura na agu amoyambu nga ga Yekova yó naima ima kurogo rengo, gbe, aguyo naima dia badungu agarã kutingba sunge Kindo ti aregbo dũ. I aima gbia badungu amaku be Yekova. (Asanza 10:22) I nika gumba gupai furoni nga, Yekova aazanganga ngerafuo yó i gbia agu ahe i adu na zingoho te, zavura ti kere aregbo vurũ. (AFiripoio 4:11-13) Natona rogo gu garã nangia 1955 ki da kurogo 1961, Ngbaõbambu Sinziri adu na agu apangbangaa rogoho nadu tipa gu raka nangia ga agu amoyambu nga ga Yekova yo. Agu aNgbaõbambu Sinziri re aduna gu riipai rogoho nga “Pursuing My Purpose in Life. [Manga Nyanyakipa Pai Rogo Gimi Raka.]” Tingbafuo gu regbo re kada ku awere, badungu apangbangaa i akekehe rogo Ngbaõbambu Sinziri tipa gu raka nga ga ga Yekova amoyambu. Agu apangbangaa re natingida rani na agu apai du rogo Ziazia Kekeapai rogo gu kitabu nga Amokedi. Ka oni aageda ngbatunga agu apangbangaa re, si nika sa roni oni yaa, ‘Gure nga gu ngbatunga raka mi aida ka rakaha!’

16. Gine nasa gu raka nga ga kura aKristano si du na rogoyo ti ni, na i kidu na ngbarago?

¹⁶ Aaron ani nifura tipa ko mbata, ko ayaa: “Afirika yo, mi agbia badungu paranga aboro nga aguyo naabitikpa kurogo kura aringara tipa ka gbia gu raka duna rogoyo ti ni. Ono guni ho nagbiaha te. Ono tipa rani tigaani, ani aamangapai ringbisihe kina kuti ga Mbori ringbisapai nitungusa ani gu wene pangbangaa nga ga Kindo, na ani kini raki gu raka duna bakere sunge, na rogoyo kidu ti ni. Ani ini gupai awere nzunzu nga, gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi.”—Amokedi 20:35, NW.

17. Tipagine si aida ti ni ani mangipai awere ringbisihe kuti ga Mbori ringbisapai?

¹⁷ Sidu, ginipai tipa roni tigaoni? Ginipai oni aida ka mangaha rogo gaoni raka? Ka oni adunga na sunge oni namoihe nigaoni sásá ya, agu apai nga ga zegino rengbe arengba ka rimo kurogo gu bangiriba re. Tipagine ka oni agbirisa gaoni raka ti ni na gi zegino nga ga Satana re? Barambeda kumbatayo, ho “bakere gberãngbi” nika su ni, aũkumuko adunga na sunge ti ni te, na boro ho nikadu rogo gu kikiipa bangiriba du ní rogoho areme te. Ono guhe nikadu na sunge ti ni nga, kina ga boro pagume na Yekova. Nairiwo gu ngbarago ani kadu nani mbiko gupai nga, ani aima mangasunge fu Mbori na fu kura aboro a, na kini mangipai ringbisihe kina kuti ga Mbori ringbisapai!—Matayo 24:21; Yugoti 7:14, 15.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Wai Yekova abi gu sunge ani amangaha fuko?

• Ho ani amangasunge ni fu Mbori na fu kura aboro ringbisihe kina kuti omerani, gini aundo ani agbiaha?

• Gini agene duho rengbe ani ka manga ga Mbori sunge ngbaha?

• Wai rengbe ani ka raka gu raka duna rogoyo ti ni?

[Gu kpiahe du ti kpewaraga 25]

Tipa kaa mangasunge kindi fu Yekova na ngbaduraniyo dũ, si naida ani mangihe ringbisihe na omerani

[Gu kpiahe du ti kpewaraga 26]

Badungu agene gu duho rengbe ani ka mangasunge ngbaha fu Mbori