Ani Raki Gu Raka Duna Ndikidi Rogoyo Ti Ni

“Agu ahe dunduko du na omeonga ti ni si nitámbua Yekova!”—ATAMBUAHE 150:6.

1. Oni gumbanga wai paranga sa aagbata gene ka gbia gu raka duna rogoyo ti ni.

“KUMBA nga Seung Jina nasono Korea yo ayaa: ‘Mi awiriki sunge amunganga bambiko mi aaida ka undo aboro rogo gimi raka. Mi aberẽ gupai a nga, ka mi du ngba gu sunge nga ga amunganga, na kini gbia bakere marã, si nika fu ngbarago fere. Ono kina rago nagberẽ tire fuo bi mi gupai nga mi aundongo aboro rogo gimi sunge munganga gbe te. Si kini sa gupai nga mi mbu sunge munganga. Mi atona ka wirika sunge mbakada agu ahe nasa ngbarago ti aboro, na sunge keka akpiahe. Ono gu gimi sunge re a aaundongo aboro gbe te, mi kini bi tire nga iraringi du nga mi. Mi atona sunge yugopai, ono fuo regbo tooni, mi abi gupai nga kina apai mi arimisoho gbua kurii aboro yo, ono mi ayugongo gu ndikidi gene fuyó rengbe ka ndu naayó sa ngbarago te.’ A wa dungu aboro amangaha, Seung Jin aagbata gene ka gbia gu raka duna rogoyo ti ni.

2. (a) Gu fugo nga ka gbia gu raka duna rogoyo ti ni, rogoyo nga gine? (b) Wai ani aino gupai nga, Bakusirani aduna ringbisapai beko si du ko amoi rani ti ni ane?

² Pa gbia boro gu raka duna rogoyo ti ni nga ka ino ndu gupai ní araka ti ni, kidu na sunge beni ní aida ka mangaha rogo gani raka, kidu na pai beni ní naperesipaha mbatayo fu kura apai dũ. Ya mo boro rengbe kadu na ngbatunga gi ringbisapai re beni? Ii! Ní rengbe arengba. Wa Bakusirani akusi rani ki fu tatamana furani, na sangbakpotoyo, gbiati gu tandu nga ga berãpai, si nayugo gupai nga, ndupai kinaho ko akusi rani ti ni ku auru kpotosende ane. Si tie ziazia nga, ani rengbe ka gbia gu raka duna rogoyo ti ni ka ani araka ringbisihe kuti ga Bakusirani ringbisapai.

3. Ga Mbori ringbisapai tipa aboro nakoda gini apai?

³ Ziazia Kekeapai nayugo gupai nga, ga Mbori ringbisapai tipa rani nakoda badungu apai. Nikpiapai, gu iiriwo gene Mbori ambakadi rani ngbaha nayugopa gako nyemuse tipa rani angianga mbiko gupai nga ani mangi wenepai fuko ya. (Atambuahe 40:5; 139:14) Si ki tadu were, ka ani aida ka raka ringbisihe kuti ga Mbori ringbisapai, si naida ani kpinyemu akuarani angianga mbiko kina gu wenepai rengbe yó ka mangaha furani ya. (1 Yoane 4:7-11) Si naida gupai a nga ani ndu kuti gako arugute, nga gu naundo rani ani raki ringbisihe kuti gako ringbisapai nga ga nyemuse.—Batungusipai 12:13; 1 Yoane 5:3.

4. (a) Ginipai si aida ani mangihe tipa ka gbia gu raka duna rogoyo ti ni? (b) Gini bakerepai si aida boro mangihe rogo gani raka?

⁴ Mbori aringbisi gupai a nga, aboro niraki na ngbarago gbiati pazereda dagbayo, na i kidu a na pazereda dagbayo na gu kura ungaahe ko akusihe. (Bambata Pai 1:26; 2:15) Ono ginipai tie si aida ani mangihe tipa ka gbia ngbarago, ngbabase, gbiati zereda? Wakina gu gude naida kadu mbembedii na avunguru tipa kadu na ngbarago, na tipa ka ino gupai nga ngba baru angba, si naida ani duna wene pagume dagbarani na Barani du ngbangbaturũ yo kinawo a tipa ka raka gu raka duna rogoyo ti ni. (AEbere 12:9) Ani rengbe arengba kadu na gu ngbatunga pagume re dagbarani na Mbori, bambiko ko aima idaha furani ani mbedi naako, na ko nagia gaani akpee agia a. (Yakoba 4:8; 1 Yoane 5:14, 15) Ka ani ‘ata na Mbori’ rogo idapase yo na ani kidu ni abadiangbako, ani rengbe arengba ka sa ngbarago tiko na ki sa rimoko si du nitaasitaasihe. (Bambata Pai 6:9; Asanza 23:15, 16; Yakoba 2:23) Gure nga gupai si aida boro mangihe rogo gani raka. Bake apapara Atambuahe akepai ki yaa: “Agu ahe dunduko du na omeonga ti ni si nitámbua Yekova!”—Atambuahe 150:6.

Ginipai Oni Aida ka Mangaha Rogo Gaoni Raka?

5. Tipagine arunga ha ti ni boro peresipa aũzegino mbatayo ya?

⁵ Papara ga Mbori ringbisapai tipa rani nga, ani ngerefuo tirani gbiati gaani aborokporo wenengai. Gipai re nakoda berãpa agu azingo nga ga borose gbiati ga toro a. Ono tie, si aidanga ani fu tirani kina kubani kisusi te, agu apai nga ga borose andu ka furii gu nyanyakipa apai nga ga toro. (Matayo 4:4; 6:33) Si nafu kina gberarago nga, badungu aboro futiyo sa kina gbata aũzegino. Ono tie, ka ani aida ka mbiisa gaani azingo na kina aũzegino sa, si arengbanga ka manga te. Gu wisigopai i amangihe bambeda kusayo tipa ka dungura apangbangaa nibi agu airakumuko duna bakere marã beyo, si ayugu gupai nga, badungu agu airakumuko re “nabi tiyó nga ngbanga bayo te, na i nifudifudiyo, si ki vura du vurũ nga i nga abaworimo, na gayo bakere marã ki vura nimangi badungu apai fuyó vurũ.”—Batungusipai 5:11.

6. Gini rugute Yesu afuhe fu agu aboro naora fuo aũkumuko?

⁶ Yesu afura tipa “gu nangaahe nga ga ũkumuko.” (Marako 4:19) Wai rengbe aũkumuko ka nangahe? Si nasa aboro i berẽ gupai nga, i rengbe arengba ka gbia ngbarago behe, ono anga wo duhe te. Gu tatamanatatamana Bakindo nangia Soromo ayaa: “Gu ni nakpi nyemu marã, marã anyasa nga gani nyemuhe te.” (Batungusipai 5:10) Ono ya mo boro rengbe arengba ka merafuo aũzegino ono ní kini mangisunge amanga fu Mbori na ngbaduniyo dũ? Oó, si arengbanga ka manga te. Yesu ayaa: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a te.” Yesu aayanga fu gako abawiriki wee i dungura agu aũkumuko du sende no te, ono ko ayawee i dungura ‘aũkumuko ku ngbangbaturũ yo,’ du rogoyo nga ka sigira wene rimo yó na Mbori, nga guko ‘ini agu apai zingoho amanga yó, mbata i nika sanako ti ni.’—Matayo 6:8, 19-25.

7. Wai rengbe ani ka gbia “ndikidi unga”?

⁷ Gu mokedi nangia Pauro ake waraga fu gako badiasunge nangia Timoteo, ki fu nyanyaki rugute rogoho nibipa aũzegino. Ko aya fu Timoteo wee: “Mo nirúgu agu aboro aruga nakumuko . . , ka i mói nga bangiriyo ti ũkumuko wa si nago ni ipo a ya, ono koyo du Mbori ni nafu ahe fu rani u au ani ngi mbiko ho. . . . I só gima fu he, rago ki ngba angba ti yo sa fuka ha. I naiga wene nyanyaki he fu kina yo sa gu rago nikaye yo, i nye anye na gu unga nga ndikidi unga.”—1 Timoteo 6:17-19.

Gine Nga “Ndikidi Unga”?

8. (a) Tipagine badungu aboro aʹasada tiyó ti ni na omeyo dũ ka gbia aũkumuko gbiati kikiipa sunge? (b) Ginipai ngbatunga agu aboro re aruganga tiyó nani ya?

⁸ Badungu aboro naberãha nga gi unga du awere re, si nga gu yangara unga duho. Si kita duwo, i kini kpinyemu ka manga agu apai dunduko i aida ka mangaha kina awere, nga gu nakoda orafuo aũkumuko gbiati gbata kikiipa sunge. Tipa ka gbia agi apai re, badungu aboro nambupa gu ngbarago ka i agbiaha i kidu niparangayo, aguyo ki moi gayo raka ngbapai, aguyo nambu gayo aborokporo, na aguyo ki mbupa agu apai nga ga Mbori. Kina bete aboro gbua naino gupai nga, agu apai nga ga aũkumuko gbiati kikiipa sunge, si nga agu apai nayugo ‘gu toro nga ga zegino,’ nga gu gbegberẽ berã moipai rii badungu abirioni aboro yo na si kini sa yó i niimangi apai kia ti ga Mbori ringbisapai tipa rani. (1 AKorindo 2:12; AEfeso 2:2) Si du ani abi badungu aboro ti ni areme zanga ngbarago.—Asanza 18:11; 23:4, 5.

9. Ginipai aboro arengbanga ka mangaha ya, na tipagine?

⁹ Na ginipai tigaha rengbe ani ka gumbaha tipa agu aboro namangasunge tipa ka undo kura aboro, wa ngbatunga aguyo namangasunge nyanyakii tipa ka nyasa riipa gomoro, akaza, gbiati iraira mangaapai? Gu sunge i amangaha tipa ka undo kura aboro re, angianga tipa ka undo tiyó ya, si naaundo badungu aboro aundo nirengo. Ono wa i avura kaa manga bakere asadatise, i asanga gi zegino re si ki da niwenehe te. Tipagine gumba ani he ti ni wo? Gumba ani he wo mbiko “zegino dunduko du ni zogozogo ho be gbegberẽ ko,” nga Satana. Ko aidanga gi zegino re kuru niwenehe te.—1 Yoane 5:19.

10. Ti gini regbo ruru aboro nika gbia “ndikidi unga”?

¹⁰ Si nigbegberẽpai ka boro adunga na maabangirise beni berewe fuo kina gi zegino du awere re ya! Pauro akepai ki yaa: “Si ngia rogo kina gi unga re moi ani bangirani rogo Kristo, ani nga rungorungo aboro dagba aboro susi yo dunduko.” Agu aboro idi kuti gupai nga kina gi raka re nga gu yangara raka duho, i na gu berã nga, ‘ani rí he ki nimbiri he, bambiko gba ani akpí akpi.’ (1 AKorindo 15:19, 32) Ono pai kinaho nikadu kumbatayo, bambiko ‘mbiko ga Mbori kidohe, ani nangera tipa vovo angbangbaturũ na vovo kpotosende, nga gu ruru apai nika nye rogoho.’ (2 Petero 3:13) Ti gu regbo nikangiaha re, aKristano nika gbia guhe nga “ndikidi unga,” nga “nyenye unga,” singia ngbangbaturũ yo watadu auru kpotosende ane tiibe gu zogarago nga ga Mbori!—1 Timoteo 6:12.

11. Tipagine si aida ti ni ani mangi agu asunge nabipa ga Mbori Kindo?

¹¹ Kina ga Mbori Kindo sa nika mbakada ga aboro apai naabaha dunduko. Gu wene sunge kisusi si aida ani mangihe nga ka manga agu asunge nabipa ga Mbori Kindo. (Yoane 4:34) Ho ani amanga gu sunge re ni, ani nagbia ngbarago mbiko gu pagume du dagbarani na gu Barani du ngbangbaturũ yo. Ani nagbia ngbarago a mbiko manga ani sunge na badungu amirioni awirinani nga aguyo duna nyemu ka manga kina gu sunge re rogo gayo raka.

Ani Mbupa Kura Gaani Apai

12. Wai “ndikidi unga” nikadu kia ti gu unga du awere?

¹² Ziazia Kekeapai nayawee gi zegino du awere re “napaya apaya, na gaha nyemuhe.” Anga papara gi zegino re ho ti ni i nika he gbarasaha na gaha taarimo te, ono “gu ni ka amanga gu pai Mbori akpi nyemu he ni anye [a]nye kindi.” (1 Yoane 2:15-17) “Ndikidi unga” adunga wagu raka du awere aũkumuko ago ago rogoho niipo te, na du ngbarago rogoho nikina toonihe te, ono si nika nyeanye tigaha kindi. Si daada ani mbupa kura gaani apai tipa ka gbata gu unga re.

13. Wai kumba na diako ambupa kura gayo apai?

¹³ Oni bingo gupai du tipa kumba nga Henry na diako nga Suzanne. I na bakere kido kuti gu kidohe Mbori amangihe ki yawee agu aboro nika peresapa gako Kindo mbatayo fu apai dũ, ko aundo yó aundo. (Matayo 6:33) Si ki tadu were, i kini siapai kaa raka tii gu bambu genoho aakiongo ya tipa gupai nga guni sa nimangisunge tipa kaa tumo marã gu bambu re, regbo ki rengbe kadu beyo nibakerehe tipa ka manga agu asunge nga ga Mbori na agu awiriyo du ue ni adegude. (AEbere 13:15, 16) Bawene bakureayo sa aaruganga tiri na gupai i amangipai ti ni wa gure te. Ri aya fu Suzanne wee: “Nakureami, ka mo aida kaa raka tii wene bambu, si naida mo mbupa kura gamo apai ambu.” Ono tie, aHenry na Suzanne aima ino gupai nga, ka boro peresi Yekova mbatayo, si nika sa ní ní du “na gu kidohe nga ga gu unga du awere, na gu nikaye.” (1 Timoteo 4:8; Tito 2:12) Awiriyo asono ki da ni anatungusi wene pangbangaa ti aregbo dũ. Wa du yó dunduko, i nabihe nga he ho paha nagberẽ beyo te; ono i gbia bakere undo mbiko peresa yó pa “ndikidi unga” mbatayo fu apai dũ.—AFiripoio 3:8; 1 Timoteo 6:6-8.

Ka Oni ‘Kanga Kuti Gi Zegino Re Ya’

14. Ka bangirani go ti gu ringbisapai Mbori amangihe tipa rani, gini kereapai rengbehe ka ye nani?

¹⁴ Ono tie, ka bangirani go ti gu ringbisapai Mbori amangihe tipa rani, na bangirani ki go ti kakuti “ndikidi unga” nyanyakii, kereapai rengbe arengba ka manga. Gure nga ani ‘merẽ gene pa berãpa zegino na ũkumuko na nyemu ahe rogo gi unga re.’ (Ruka 8:14) Ka ani aberãpa gi “unga” du awere re kisusi ome, si rengbe ka sa rani ani rimisi tirani kurogo gi zegino re ki susi ome. (Ruka 21:34) Si nafu kina gberarago nga, badungu aboro zi ti gu gbina nga ga nyemu kumuko, na ‘i ki ingi ainga ti idapase, kini rupu tiyó arupa nidungu arungo.’ Gayó pagume na Yekova ki gberẽ a. Nairiwo gu bagbegberẽ apai ngaha naye mbiko zanga kakuti “ndikidi unga” nyanyakii re!—1 Timoteo 6:9, 10; Asanza 28:20.

15. Wai kura aborokporo sa agbia undo mbiko zanga ‘kakuti gi zegino re’?

¹⁵ Pauro arugu agu aboro ‘namangapai na gi zegino re ka i dunga wa aguyo kaakuti ni ya.’ (1 AKorindo 7:31) Keith na diako nga Bonnie aima irisa gi rugute re. Keith ayaa: ‘Mi adani Dezire Yekova ti kina gu regbo mi aanyasa gu sukuru nga ga rinde. Si aidi mi mangi siapai. Mi arengbe arengba kaa husa badungu aborokaza-rinde kini gbia bakere marã, ono ka mi amangihe wo, ka si agberesipa agu apai agberesa berani nga ga irisombori. Ono mi adiberã tipa kaa husa kina bete aboro gbua, tipa regbo rengbe kadu bere tipa ka ngerafuo gimi aborokporo wenengai rogo toroyo na rogo borose yo. Ani avungu agude bisue nga adegude. Wa vura duhe nga ani anaagbia kina bete marã gbua, ani awiriki wai ka banda marã. Si kini sa gupai nga ani naagbia agu ahe agbia zingoho amanga rani. Gaani ramukporo adu nibawenehe gbe. Niyangaraha, ani dunduko arimi sunge tungusapai ti aregbo dũ. Awere, awirani dunduko ima roga akumba, na i na bakere ngbarago tiyó. Aguyo biata vungu agude dunduko muambe. I na ngbarago rogo gayo ramukporo na akumbaayo, wa i naperesi ga Yekova ringbisapai mbatayo rogo gayo raka.’

Ani Peresi ga Yekova Ringbisapai Mbatayo

16, 17. Gini akpiapai nga ga agu aboro nangia airatatamana Ziazia Kekeapai afuhe furani, na gini ani aino yó ti ni?

¹⁶ Ziazia Kekeapai na apangbangaa rogoho du tipa agu aboro nanaaraka ringbisihe kuti ga Mbori ringbisapai, na aguyo nanaarakanga ringbisihe kuti ga Mbori ringbisapai ya. Aboro dunduko rogo arago dunduko rengbe ka wirikapai be agu apai namangi re, singia sosono aboro na paranga aboro, na angbatunga dunduko. (ARomo 15:4; 1 AKorindo 10:6, 11) Nimeroda adudua kikindigi agbata, ono ko amangihe wo nisogote kuti Yekova. (Bambata Pai 10:8, 9) Ono kura aboro kinaho namangi weneapai. Nikpiapai, wa Moize avurangia kikiipa boro Ezipeta yo, anga pakio pako ko aperesipaha mbatayo rogo gako raka te. Kuba gure, ko aabi agu asunge Mbori afuhe fuko na kikiipaha “susi agu aũkumuko nangia ga Ezipeta.” (AEbere 11:26) Si nawira gupai gbe nga, gu bafungua nangia Ruka aima undo Pauro gbiati kura aboro tipa i hu be gayo akaza. Ono gu bakerepai Ruka amangihe angia tungusa wene pangbangaa, na ko angia bake Ziazia Kekeapai a. Tipa Pauro tigako, aboro iniko nigu boro nangia “ga aGendiria mokedi,” angianga nibangbasia bainiparugute ya.—ARomo 11:13.

¹⁷ Aboro atingidanga pa Davide gbe nigu boro nangia basovura watadu batakundi na nibayango te, ono i natingida pako gbe nigu ‘boro ngbadu Yekova aaida na ní.’ (1 Samuere 13:14) Ani ini Daniere nigu boro nanaamangasunge niga Yekova nebi, angianga nigu boro nanaamangasunge fu gu irangbii nga ga Babera ya; ani ainongo Esetere nigu dee nangia nakindo Parasa te, ono nigu dee namoi wene kpiapai nga ga ngara gbiati idapase; ani ini aPetero, Andarea, Yakoba, na Yoane, niga Yesu amokedi, angianga ni agu abaziatĩo naini sunge zio atĩo wenengai ya. Na gu bakere kpiapai tie duho, si nga ga Yesu. Aboro iniko ni “Kristo,” angianga ni “basekengua” ya. (Marako 6:3; Matayo 16:16) Agi aboro re dunduko aini gupai nga, gu tatamana i adu nani, agu ahe nadu beyo, na agu asunge i adu ngbaha, si aaidanga si du nibambatapai rogo gayo raka te, ono kina mangasunge fu Mbori. I aini gupai nga, gu bakerepai rengbe yó ka mangaha rogo gayo raka si ki fu undo fuyó, si nga kadu nigu kumba watadu nigu dee nagunde ti Mbori.

18. Wai paranga Kristano sa adiberã ka mangasunge na gako raka, na ginipai ko ainihe kusa?

¹⁸ Seung Jin, ani nifura tipa ko kusayo, ko aima rugatiko na gipai re. Ko ayaa: ‘Kuba gupai nga mi fu omere dunduko sa kina sunge munganga, sunge mbakada ahe, watadu sunge yugopai, mi adiberã ka sa gimi raka si du na ngbanyaa dagbaha na gimi kparatise fu Mbori. Mi namangasunge awere rogo gu rago du zingo abayugu Ziazia Kekeapai rogoho, kini undo aboro i ndu ngbagene nyenye unga. Mi aberẽhe tigimi nga pa manga mi sunge Kindo ti aregbo dunduko asanga re mi mangisunge gbe na gu inohe mi agbiaha te. Ono awere, mi namangasunge awere bakere gbe na gu inohe mi nagbiaha rogo gimi raka. Mi naʹasada tire ka mbakada sino re tipa wa ka mi rengbe ka yugopai fu agu aboro du gayo sino raka kia. Mi bi gupai nga, ka ani moi ga Yekova ringbisapai si du nga gaani ringbisapai, si nika sa gupai nga gaani raka du na rogoyo ti ni.’

19. Wai rengbe ani ka sa gaani raka si du na rogoyo ti ni?

¹⁹ Wa ngia ani aKristano, Mbori aima fu gu inohe furani nafu maabangirise sa bata. (Yoane 17:3) Sidu tie, ka ani ‘dinga ga Mbori undahe gbua ya.’ (2 AKorindo 6:1) Kuba gure, ani sambuo Yekova ti gu regbo du ani niungarani. Ani gbandaka gu inohe nafu ndikidi ngbarago fu boro awere na ki ndu na ní sa nyenye unga. Ka ani mangihe wo, ani nika inoaino nga rengo du Yesu agumbaha ki yaa: “Gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi.” (Amokedi 20:35, NW) Si nika sa gupai nga, gaani raka du na rogoyo ti ni.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Gini bakerepai si aida boro mangihe rogo gani raka?

• Tipagine arunga ha ti ni boro peresipa aũzegino mbatayo ya?

• Gine nga gu “ndikidi unga” Mbori akidohe tipaha?

• Wai rengbe ani ka raka ringbisihe kuti ga Mbori ringbisapai?

[Gu kpiahe du ti kpewaraga 20]

Si naida aKristano mbupa kura gayo apai ambu