Ya Mo Oni Nazambuasi Akuaroni?

TI DIGIDO gu bagangara mbia nga Anti-Lebanon ku Sudiyo, bagangara mbia gu duho du basonaha wa amitiri 2,814. Rimoho nga Erumona. Rogo dungu adiwi rogo garã, misimisi morogumba nadada rii gu mbia yo re dunduko, si kini sa gupai nga, gu fofoi uturo ime naya riihe yo yuru, si satihe niʹime kini kusi ndomo. Gu ndomo re natoga niure kurii agu angua du tii mburuhe kusende, na kurii aʹati bakakue. Rogo gu ringara aYisaraere nadumbata, nga gu naanidu na gbanga ugure rogoho, gu ndomo re nanaasa angua si du pongopongo pavuru gu gangara re.

Rogo gu bia ga Mbori toro adu kugiipa bihe, babi gu bia re aringbisi gu kpamiatise nga ga airisi Yekova kuti “gu nduro du Erumone yo, nana ku auru abaagangara Siona!” (Atambuahe 133:1, 3) A wa Bagangara Erumona azambuasi angua gbiati gu kura kurukuru ahe, si naida ani naazambuasi agu aboro a ani agbiatirani naayó. Wai rengbe ani ka mangaha wo?

Yesu Anaazambuasi Aboro

Yesu Kristo anaafu bakere wasa fu aboro. Zavura ho boro aniduni na ko tipa wiri guru regbo gbua, ní aniima gbia wasa. Nikpiapai, fugo gu bake Wene Pangbangaa nangia Marako nayaa: “[Yesu] ki aka [agude] beko, ki moi beko auru yo, ki fu maku fu yo.” (Marako 10:16) Nairiwo wai gu rukutu agude re avura gbia ngbarago be Yesu ti gu regbo re!

Rogo gu yangara yuru Yesu adu auru kpotosende, ko azundu ndu gako abawiriki. Gako umbasitise aima iriwo ti gako abawiriki. Fuoho, Yesu aya fuyó wee: “Mi yugu [kpia]pai fu roni, oni nimangi wa mangi mi fu roni.” (Yoane 13:1-17) Nirengo, si aidi i du a na umbasitise. Wa vura duhe nga agu amokedi re aagianga rogo gupai wenengai Yesu agumbaha re te, sidu i ki tona tikango dagbayo tipa da nga bakumbayo nikina gu yuru re, ngbadu Yesu aimanga kuti yó te. Ono ko arugusi gayo berã nizerangbaduse. (Ruka 22:24-27) ‘Ho aboro agberẽ ngbayo yo ni fu Yesu, ko aagberãnga ngbakoyo fuyó te.’ Zavura ‘ho ko aaima ni, ko aaserãnga yó a te, ono ko afu tiko kube guko nasapa ngbangaa nzunzu.’ Si daada ani pekefuo ga Yesu kpiapai.—1 Petero 2:21, 23.

Yesu ayaa: “Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.” (Matayo 11:29) Oni bingo wai ngbaha boro wirikipai be Yesu. Ho agu aboro nadu rogo gako ringara agi agu apai ni ko aatungusaha bambutiria yo, kina iriwo apai nati tiyó. I ki yaa: “Wari ga gi kumba tatamana aye ni re, na gi gako apai du na tandu re?” (Matayo 13:54) Ka ani agedapai tipa ga Yesu raka na gu sunge ko amangihe auru kpotosende, si nika yugo badungu apai furani tipa wai rengbe ani ka zambuasi akuarani. Ani wisigingo wai Yesu amoi bawene kpiapai furani nibi gu wene afugo ko anaagumbaha gbiati wai ko anaaundo kura aboro.

Agu Afugo Nanyakasa Akuarani

Gbataka bambu kusayo ipi ti dua vovoho. Kina gu bangisapai du tipa gbataka he na dua he re du tipa agu afugo ani agumbaha. Wangia ani kpakpa aboro, ani dunduko namanga irairaapai amanga. Bakindo Soromo ayaa: “A nga ruru boro auru kpotosende no namanga wenepai, zanga manga ingaapai te.” (Batungusipai 7:20) Si nitaatapai boro ini gu irairapai kurani namangihe, na ní ki tona ka fura gbegberẽe kubara ní yo. (Atambuahe 64:2-4) Ono tipa kaa gumba wene afugo, si naida ani duadu na tatamana.

Agu afugo Yesu anaagumbaha, si anaanyakasa kura aboro anyakasa. Ko anaafu wasa fu aboro rogo toroyo nitungusa ko gu wene pangbangaa nga ga Kindo fuyó. (Ruka 8:1) Ko afu wasa a fu agu aboro nada nigako abawiriki niyugoko Bako fuyó. (Matayo 11:25-27) Si nga gupai badungu aboro agbe ti ni koyo du Yesu ni!

Ono tipa abakeapai na aFarusi tigayo, i aaberanga pa agu azingo nga ga aboro te. Yesu ayaa: ‘I nakpinyemu bairisa kporo pumbo yo, na ambata irisa bambutiria yo.’ (Matayo 23:6) I anaabisirapa agu aboro payo adu kusende kini yaa: “Gi rimbasa re nga agu yo aina nga rugute ya i tiwa yo [i nga aboro motiwa].” (Yoane 7:49) Nirengo, anga pai ho rogo gu fugo re ka zambuasi boro te!

Gupai ani agumbaha, si nayugo gupai du ngbaduraniyo gbiati gu ani aberãha, na gu bipai du ani nani tipa akuarani. Yesu ayaa: “Wene boro nakusa wene apai ti gu wene kumuko du ngbaduni yo; gbegberẽ boro nakusa gbigbita apai ti gu gbigbita kumuko du ngbaduni yo; bambiko ngba boro nagumba pai mbiko gu pai du ngbaduni yo kpaima.” (Ruka 6:45) Ono giniapai tie rengbe ani ka mangaha tipa ka sa gaani afugo si niizambuasi aboro azambuasi?

Pai sa rengbe ani ka mangaha nga, ani berẽ mbata fu tona ani fugo. Asanza 15:28 nayaa: “Berã ruru boro nawisiga pa karagapai.” Anga si naida gu wisigopai re di bakere regbo adia te. Ka ani berẽ kandara tooni mbata fu ani fura, ani rengbe arengba ka ino singia aboro agbia wasa be gupai re, watadu rago nika gberã agberã tiyó nani. Si naida ani sana tirani ki yaa: ‘Ya mo gupai mi aida ka gumbaha re, si nayugopa nyemuse? Ya mo rengo du ngaha, watadu mi aruganga tire naapaha wenengai te? Ya mo si nga “gu pai nakura ti kina ragoho”? Ya mo si afu wasa fu agu aboro mi nika gumbaha fuyó?’ (Asanza 15:23) Ka ani bi gupai nga gupai re afunga wasa fu aboro te, na regbo gumbaha ngaha a te, si naida ani asaditirani ka doho kusayo berãrani yo. Kuba gupai nga oni mbu gumba kina agu afugo afunga wasa fu aboro ya, tipagine ka oni agumbanga wene afugo ti ni kubaha ya, nga gu daada tipa gu regbo oni afura re? Gba sa fugo wakina “baso sa rũ he,” ono wene afugo tigaha “nafu husa.”—Asanza 12:18.

Gu kurapai rengbe ka undo berewe nga ka berãkurii agu apai nasa akuarani aidipase payo kii bangiri Mbori. Yesu ayaa: “Anga boro sa ka ye kono du mi ni gbua te, kina Buba nakedi re ka gbe ni.” (Yoane 6:44) Yekova nabi gu wene asino du rogo gako amoyambu yo dunduko nibasasa, zavura aguyo rengbe ani kaa biyo nga ngbanga asinoyo te. Ka ani asadi ka ino gu wene asino du tiyó, si nika sa rani ani nifura wenengai kubarayo yo.

Oni Undo Akuaroni

Yesu aima ino agu arungo dunduko nga ga agu aboro akurayo aamanga fuyó gbegberẽe. “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” (Matayo 9:36) Anga kina nungayo sa nazi Yesu te, ono ko aima mangapai a ka undoyo. Ko ayambu yó ki yaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni.” Ko akido yó a ki yaa: “Kii nga gi gonga te, na gi tindiro ni aakpura ha.”—Matayo 11:28, 30.

Ani naraka awere ti “gbegberẽ rago.” (2 Timoteo 3:1) Dungu aboro omeyo nabati be “berã pa zegino.” (Matayo 13:22) Aguyo kinaho nambu be gu kura fudifudiapai nafuda kina yó. (1 ATesaroniko 5:14) Wai rengbe ani ka fu wasa fu agu aboro du rogo zingo re? Wakina Kristo, ani rengbe arengba ka akpurasi gayo atindiro.

Gu kura aboro naagbata gene ka akpurasi gayo atindiro nigumba yó agu apai nafuda yó fu kura aboro. Ho gu boro du nifudifudi ní niye ni fuo rani tipa undo, ya mo ani nidegeturani wenengai ka gia agu apai nafuda ní? Tipa kadu nigu boro nadegatuni ninunga, si naida boro rugutini aruga nisani. Si nakoda gupai nga boro moiberã ní ka gia gupai gu kurani re agumbaha, angianga kaa berã tipa kina wai ní nika karagapai funi watadu wai ní nika mbakada gupai nafuda gu boro re ya. Ka ani amaaberã rani wenengai, kini ngana ní, na kidu na ngbarago kpakpuraniyo ti gu regbo daha ada wo, si nika yugo gupai nga, ani naberã pani aberã.

Rogo gu dungurati nga ga aKristano, badungu amomu duho tipa ka ngarasa akuarani aidipase. Nikpiapai, ho du ani ni pati adunguratise Bambu Kindo yo, ani rengbe ka gbata agu aboro nambu be akaza. Ani rengbe ka dia wiri aminiti naayó mbata fu dunguratise tona watadu tingbafuoho tipa ka fura naayó. Ani rengbe arengba a ka tingidapa agu aboro ayengo kuba gu Wisigo Buku Nga ga Dungurati ani naandu kurogoho ya. Ani rengbe arengba a ka yamba yó rogo terefuni watadu ka ke waraga fuyó tipa ka inopai tipa wai du kpotoyo, watadu tipa ka undoyo.—AFiripoio 2:4.

Agu aKristano nga abaakumba rogo dungurati na bakere sunge beyo. Ani rengbe arengba ka akpurasi gayo atindiro bakere gbe nikoda ani berani naayó sa, na kini mangi agu asunge dunduko i afuhe furani. Fugo Mbori nazungodi rani kini yaa: “Oni gí sangba gaoni abaakumba ki nira fu yo; bambiko i nangera tipa pa mbisimoroni, wa i ka ringbisa pai tipa roni; ya i ka manga gere ni ngbarago, ni rungo te: bambiko ka gi ngba nga fu roni te re.” (AEbere 13:17) Ka ani ayugo nyemu futise ka mangapai, si nika sa gupai nga ani fu wasa fu agu aboro “nazoga rago wenengaĩ,” nga agu abaakumba du rogo dungurati.—1 Timoteo 5:17.

Gaoni Wene Afugo Moipai

Ndomo naaye mbiko badungu misimisi ime ka boro agedanga ha ya, nga gu nazora yee ariyo. Aboro ainongo wari si aenga ni te. Teketeke a, tipa ani zambuasi akuarani, si ayengo mbiko manga bangisa bawenepai sa te, ono si naye mbiko gu badungu asino duwa ga Kristo ani ayugoho koyo du akuarani ni ti aregbo dunduko.

Pauro akepai ki yaa: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” (ARomo 12:10) Si naida ani mangi gi rugute Pauro afuhe re. Si naida ani naazambuasingo akuarani azambuasi na gaani afugo gbiati gaani mangaapai.

[Gu kpiahe du ti kpewaraga 31]

Gu boro nadegatuni ninunga, ní nazambuasi akurani

[Gu kpiahe du ti kpewaraga 32]

Gu ndomo naye rii Bagangara Erumona yo nazambuasi kurukuru ahe