Ginipai Padu Kristo Ho Na Ome Kindo Beko Ayugoho Furoni?

“Gine i ka ina pa ga ye ti ni [“padu mo ho ti ni na ome kindo bero,” NW], na pa digida rago [“regbo digiso agu apai nga ga zegino,” NW]?”—MT. 24:3.

1. Gini wene sanahe ga Yesu abawiriki asanako nani?

AGARÃ susi awere mbembedii kuti 2,000 tingbafuo gu regbo ga Yesu abawiriki biama asanako nirondo ho i asungu ni rii Bagangara Aeraya yo. I asanako ki yaa: “Mo gúmba nga ha fu rani, ni gini rago agi apai ka manga re? gine i ka ina pa ga ye ti ni [“padu mo ho ti ni na ome kindo bero,” NW], na pa digida rago?” (Mt. 24:3) Rogo gu sanahe re, abawiriki amangisunge na wene afugo ue nga, ‘padu mo ho na ome kindo bero’ na “regbo digiso agu apai nga ga zegino.” Ginipai agi afugo re ayugoho?

2. Gine nga rogo gu fugoyo nga ‘regbo digiso apai’ gumbayo ho rogo gu Sasa-Fugo Ziazia Kekeapai nga New World Translation, nga gu Ziazia Kekeapai rogo pa-Zande aya tipaha wee “digida rago”?

² Ani furanga mbata tipa gu ue fugo nga “digida rago” nga sasa gu fugo Giriki nga syn·teʹlei·a, du ruru sasaha nga ‘regbo digiso apai.’ Rogo gu Sasa-Fugo Ziazia Kekeapai nga New World Translation, i sa gi fugo re yo rogo aba dunduko nga ‘regbo digiso apai.’ Te’los, nga gu fugo Giriki duwa kinaha, i asaha nga “digidopai.” Gu kparakparapai du dagba agi afugo du ue re, ani rengbe ka ringbisaha kuti gu gumbapai watadu tungusapai mangiyo ho Bambu Kindo yo. Regbo digiso gu gumbapai re nga regbo gumba yangara paparaha, nga gu bagumbapai adia bete regbo tipa ka tingida agu aboro du pati dunguratise naapa agu apai ko niima digo nigumbaha na ki yugu wai rengbe yó ka maaha rogo mangapai yo. Digido gumbapai nga gu regbo bagumbapai aguari kusayo rii tambara yo. Wakina gure a, nibi wai Ziazia Kekeapai agumbaha, gu fugo nga “digida rago,” si nafura tipa gu bagizo regbo nandu kuti digido agu apai nga ga zegino.

3. Giniapai namanga ti gu regbo du Kristo na ome kindo beko?

³ Na ginipai tigaha tipa “ye” Kristo, nga sasa gu fugo Giriki nga pa·rou·siʹa,a du ruru sasaha nga ‘padu Kristo ho na ome kindo beko’ nga gu gako abawiriki asanako tipaha? Gi padu Kristo ho na ome kindo beko re atona ho i amoiko ni ni Bakindo ngbangbaturũ yo rogo gu garã nangia 1914 na gu regbo re kini ndu kindi kumbatayo da ti digido “bakere gberãngbi,” nga gu regbo ko ka ye ka gbarasa gbegberẽ aboro. (Mt. 24:21) Dungu apai nibakiakia namanga ti gi regbo du Yesu ho na ome kindo beko re, nga agu apai nakoda “kusa rago” nga ga gi gbegberẽ zegino re, dungura siasia aboro, naapa gayó zingabekpio i kini ga naayó ku ngbangbaturũ yo. (2 Tim. 3:1; 1 Kor. 15:23; 1 Tesa. 4:15-17; 2 Tesa. 2:1) Ani rengbe ka yawee gu bagizo regbo nga “regbo digiso agu apai nga ga zegino,” (syn·teʹlei·a), si kina sa na gu regbo du Kristo ho na ome kindo beko, (pa·rou·siʹa).

Gbanga Regbo

4. Wai du padu Yesu ho na ome kindo beko awiratihe na gupai namangi ti rago Noa?

⁴ Gu rengo nga pa·rou·siʹa nayugopa gu regbo du nigbangaha, si na ngbanyaa dagbaha na gu fugo Yesu agumbaha nibi padu ko ho na ome kindo beko. (Oni gedi Matayo 24:37-39.) Oni kparia gupai nga, Yesu afuranga tipa padu ko ho na ome kindo beko kuti gu guru regbo Ime Akangbii adihe ti rago Noa te. Kuba gure, ko aringbisihe kuti gu gbanga regbo nandu ki dati regbo Ime Akangbii. Agu apai nadu vuru gu regbo re angia gu regbo Noa atona mbakada kurungba na kini tungusipai, daho Ime Akangbii ayeni niyangaraha. Agu apai re adi dungu agarã naima susa 50. Wakina gure a, padu Kristo ho na ome kindo beko nakoda agu apai nikaa manga ki dakuti digido bakere gberãngbii.—2 Tesa. 1:6-9.

5. Gu pangbangaa du rogo Yugoti kapita 6, wai si ayugo gupai nga, padu Yesu ho na ome kindo beko nga gbanga regbo?

⁵ Gu kura asangbaanebi nayugo gupai ziazia nga padu Kristo ho na ome kindo beko nga gbanga regbo angianga kina paye ko ka imo gbegberẽ aboro ya. Gu buku nga Yugoti nafura tipa Yesu ko nioro rii pusi farasi na i ki fu kpakpari fuko. (Oni gedi Yugo. 6:1-8.) Fuo maa yó kpakpari Bakindo ri Yesu yo rogo 1914, Ziazia Kekeapai nagumba pako ya ko “ta kura nidi be apai, ki ndu ka dia be apai.” Fuo gure, gu pangbangaa re nayugo gu kura abandu-rii-afarasi i nipekefuoko, nga agu afarasi duna arangi kpotora nibakiakia. Agi afarasi gbiati abandu-rira re, ami nayugopa apai. Guru sa nayugopa vura, guru kini yugupa zingo riahe, na gu yangarai kini yugupa ririakaza, nga agu apai dunduko naima digo nimangi rogo gi gbanga regbo i afura tipaha ‘nikusa rago’ re. Ani nabi digisidigisi gu sangbanebi re ti gi gaani regbo re.

6. Wai yugoti kapita 12 aundo rani ani girogo padu Kristo ho na ome kindo beko?

⁶ Yugoti kapita 12 nafu gu kura futufutuapai tipa pa sigira ga Mbori Kindo ngbangbaturũ yo. Rogo gu kapita re, ani nageda pa gu vura namangi ngbangbaturũ yo. Mikaere, nga Yesu Kristo rogo gako ba ngbangbaturũ yo gbiati gako amaraika asovura kuti Bakitingbanga na gako adaimona. Nisangbana gi vura re, i aba Satana na gako adaimona ku auru kpotosende no. Gu pangbangaa re nape gupai furani ngawee, natona ti gu regbo re, Satana na bakere zinga tiko “bambiko ko ini he ya kina bete rago nye fu ko.” (Oni gedi Yugoti 12:7-12.) Si tie ziazia nga, si adu nga “rungo” nika maapai auru kpotosende fuo sigira yó gu Kindo nga ga Kristo ngbangbaturũ yo.

7. Ginipai gu ue Atambuahe afura tipaha, na gini momu furayó tipaha rogoho?

⁷ Gu ue Atambuahe nafura a nisangbanebi tipa pa maa yó Yesu ni Bakindo rii Bagangara Siona yo. (Oni gedi Atambuahe 2:5-9; 110:1, 2.) Berewe a, gi Atambuahe re nayugo gupai ngawee regbo kinaho i afuhe fu abakindo zegino kodihe na avuruyo i ra kutiibe ga Kristo zogarago. I nazungadi yó i ‘dú ni airatatamana’ na kidu ni agu aboro nika “wirika pai” be abatakipande gu kindo re. Vuru gu regbo yo re, “aboro maku nga agu yo dunduko nafu tiyo ku be ko [Mbori]” nimanga yó sunge fu Yekova na fu gako Bakindo ko nasiako. Sidu tie, gu regbo du Yesu ho na ome kindo beko re, si nga regbo momu fu agu abazogo re gbiati avuruyo mangi gu ariapai si aida i mangihe rogo gayó raka yo.—Tam. 2:10-12.

Agu Apai I Ainopa Apai ti Ni

8, 9. Ada narengbe ka ino agu apai i aino padu Kristo ho ti ni na ome kindo beko na ki rugutiyo nani?

⁸ Ho aFarusi asana Yesu ni tipa gu regbo Kindo ka ye ti ni, ko akaragapai fuyó ki yawee si ayengo i kini bihe si ‘ningere nganganga’ wa gu i aberãha te. (Ruka 17:20, 21) Si adu nga agu aboro adunga na ndikidi idapase ya, i arengbanga ka rugatiyo na gipai re te. Ya mo gene adu beyo ka i arengbe ka rugatiyó nani ngbaha? I aaidanga kina kandara pa Yesu ya ko nikadu nigayó Bakindo kumbatayo te. Ada tie narengbe ka ino agu apai i aino ti ni nga Kristo ho na ome kindo beko na ki rugutiyo naapa nyakapaha?

⁹ Yesu agumba gupai fu gako abawiriki ngawee i abi agu apai abi i ainopa apai ti ni ziazia a wa i naabi “we gumba naikpira ni gbanga ha ngbangbaturũ yo.” (Oni gedi Ruka 17:24-29.) Si nafu ngbarago furani ka bi gupai nga, Matayo 24:23-27 nakoda gu bangisapai re kuti gupai i aino padu Kristo ho ti ni na ome kindo beko.

Gu Rikaaboro Nika Rugatiyo na agu Apai I Ainopa Apai ti Ni

10, 11. (a) Gini sakarogopaiyo i afuhe bakuru kusayo nibipa gu “rika aboro” furayo tipa yó rogo Matayo 24:34? (b) Zanga kapa, ada ga Yesu abawiriki aini gupai tipa yó nga i nangia gu “rika aboro” Yesu aafura tipa yó?

¹⁰ Mbata kusayo, gi magazini nga Ngbaõbambu Sinziri re anaasaka rogopaiyo kini yawee rogo bambata sa kama agarã, ‘gi rikaaboro’ furayo tipa yó rogo Matayo 24:34 re, i angia “gu rikaaboro nangia aYuda naaraka ti gu regbo re.”b Gu sakarogopaiyo re adaada bambiko gu fugo Yesu amangisunge nani nga “gi rika aboro re,” si aangianga fugo tambua rimose te, na rogo dungu aba, Yesu anaaya tipa yó wee gi “gbegberẽ” rikaaboro re. (Mt. 12:39; 17:17; Mk. 8:38) Sidu, abakeke gi magazini nga Ngbaõbambu Sinziri re abihe nga rogo gu digisidigisihe du ti gi gaani regbo re, Yesu aafura tipa gu gbegberẽ “rika aboro” adunga na ndikidi idapase ya nga aguyo si adu nga i nika bi “regbo digiso agu apai nga ga zegino” (syn·teʹlei·a) na ki bi digido zegino a (teʹlos).

¹¹ Rengo du ngaha nga, ho Yesu amangisunge ni na gu fugo nga “rika aboro,” ko afura tipa gu gbegberẽ aboro nadu ti ragoko. Ya mo kina gu bangisa rogoyo re nadu berãko yo ho ko agumba agu afugo ni du rogo Matayo 24:34 re? Ani tingidinga pa gu ga Yesu abawiriki naye fuoko “ni rondo.” (Mt. 24:3) Wa duhe nga Yesu aagumbanga gbegberẽ afugo tipa gi “rika aboro” re ho ko aafura ni fu gako abawiriki te, si nayugo gupai zanga kapa nga, agu amokedi re aima rugatiyo na gupai ngawee i gbiati akurayó abawiriki nangia papara gu “rika aboro” Yesu afura tipa yó re nga aguyo si adu nga i akpikongo dunduko te “daho agi apai ka díga ni dunduko . . . re.”

12. Gine agu apai du pati agu averesi re ayugoho tipa gu “rika aboro” Yesu aafura tipa yó?

¹² Riimburu ginipai rengbe ani ka ye kuti gu digisopai re? Niwisigo ani agu apai du pati agu averesi re wenengai. A wa duhe nikekehe rogo Matayo 24:32, 33, Yesu ayaa: ‘Were oni wíriki sanza ti vurumo: nigu rago behe narungbura ki moi akpehe, oni niinihe ya kita nambeda; a wo oni a, nigu rago oni ka bi agi apai re dunduko, oni ki ini ya ko mbedi, ko ngbadimo.’ (Oni ringbisinga ha na Marako 13:28-30; Ruka 21:30-32.) Fuo gure, ani nageda gupai rogo Matayo 24:34 nga: ‘Ya mi furoni nirengo, gi rikaaboro re agónga te daho agi apai re dunduko ka díga ni.’

13, 14. Tipagine rengbe ani ti ni ka yawee gu “rika aboro” Yesu aafura tipa yó angia gako abawiriki?

¹³ Yesu ayawee gako abawiriki du i ka mbeda yó niziazia toro, na nikangia agu aboro nikada kuti gi digisopai re ho i ka bi “agi apai [ni] re dunduko.” Sidu, si daada ani yawee Yesu aafura tipa gako abawiriki, ho ko agbia gu kurapai ni kuti fugoko nga: ‘Gi rikaaboro re agónga te daho agi apai re dunduko ka díga ni.’

¹⁴ Wangia ga Yesu abawiriki aidipase, si adu nga i abingo kina agu apai i ainopa apai ti ni sa te, ono i agiarogoyo agia a na ki inipa wai nyakipaha a. Si adu nga i nika ‘wirikapai’ ti agu apai i ainopa apai ti ni re na ki “ini” ndikidi rogoyo. Si adu nga i ainoho aino wenengai nga “ko mbedi, ko ngbadimo.” Kina rengo du nga agu aYuda naadunga na idapase ya gbiati gu ruru mbedimbedi aKristano nadu rogo bambata sa kama agarã abi kina tooni digisidigisi gi ga Yesu afugo re, ono kina mbedimbedi aKristano sa narengbe ka ino apai be agi apai re, na narengbe ka ino ndikidi rogoyo.

15. (a) Ada du dagba gu “rika aboro” Yesu afura tipa yó naraka ti gi gaani regbo re? (b) Tipagine ani arengbanga ti ni ka ino bagizo gu regbo gi “rika aboro” re nika raka rogoho ya? (Oni bi gu sanduki du ti kpewaraga 25.)

¹⁵ Tipa agu aboro adunga na gu inohe nga ga toroyo ya, i naberãha nga, anga pai ho namanginga kini ‘ngere nganganga’ nibipa agu apai i aino padu Kristo ho na ome Kindo beko te. I nayawee apai dunduko nandu kina sa a wa si naaye bakuru kusayo. (2 Pet. 3:4) Ono tipa mbedimbedi awirina Kristo tigayo, nga gu riko nga ga Yoane du ti gi gaani regbo re, i ima rugatiyo naapa gipai i ainopa apai ti ni duwa ikpirogumba re na ki ini gupai nzunzu si ayugoho. Gi mbedimbedi aKristano du ti gi gaani regbo re wa du yó niriko, i du du dagba gu “rika aboro” nikaa kpikongo naabayo dunduko ya ‘daho agi apai re dunduko ka díga ni.’c Si kini fu gu berã furani ngawee, bete mbedimbedi awirina Kristo nikadu kinaho ti unga auru kpotosende ho bakere gberãngbii nika tona ni.

‘Oni Naangera Angera Kindi’

16. Ginipai si aida ga Kristo abawiriki naabayo mangihe?

¹⁶ Wa vura duhe were, si naida ani mangi kurapai amanga kuba kina ruga ani tirani naapa agu apai i ainopa apai ti ni. Yesu ayaa: ‘Gupai mi agumba furoni kinaha mi agumba fu aboro dũ, oni naangéra angera kindi.’ (Mk. 13:37) Gipai re ninyanyakipa pai furani dunduko singia ani nga mbedimbedi aKristano watadu ani dagba bakere rimbasa. Agarã ima susa awere wa 90 tona ho i amoi Yesu ni ni Bakindo ngbangbaturũ rogo 1914. Wa vura duhe nikpakarapai furani tipa kaa ngera angera kindi, si nigupai si aida ani mangihe amanga. Pa ruga ani tirani na gupai nga Kristo kinaho na ome kindo beko wa ani avuranga bi ko ya naundo rani ani mangihe wo. Si nasa rani a ani rugutirani na gupai nga, barambeda kumbatayo, ko nika ye ka gbarasa avurako ‘ti gu saa ani aberãnga paha nga si du ko ka ye ti ni ya.’—Ruka 12:40.

17. Wai si aida gi giarogopaiyo re mangi rani, na ginipai si aida ani diberã ka mangaha?

¹⁷ Pa ruga ani tirani naapa du Kristo ho na ome kindo beko naundo rani ani naamanga gu gaani asunge nga ga Kindo niʹipiʹipihe. Ani ima ino gupai nga, Yesu gu duho awere ni Bakindo ngbangbaturũ yo na ko aima tona gu zogarago re rogo gu garã nangia 1914. Barambeda kumbatayo, ko nika ye ka gbarasa gbegberẽ aboro na ki mangi bakere ariapai rogo gi zegino re naabaha dunduko. Sidu tie, si naida ani diberã tipa kaa manga gu nyanyakipa sunge ko afura tipaha kumbatayo ho ko ayani wee: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga [“digido zegino ki da,” NW].”—Mt. 24:14.

[Gu rukutu kekeapai du bandu kpewaraga yo]

Gaoni Karagapai Nga Gine?

• Wai ani aino gupai nga, padu Kristo ho na ome kindo beko nga gbanga regbo?

• Ada nainopai tipa padu Kristo ho na ome kindo beko na ki rugutiyo nani?

• Ada du dagba gu rikaaboro furayó tipa yó rogo Matayo 24:34?

• Tipagine ani arengbanga ti ni ka ino bagizo gu regbo nzunzu nga ga “gi rika aboro” re ya?

Ya Mo Ani Rengbe ka Ino gu Bagizo Regbo “Gi Rika Aboro” Re Nika Raka Vuruhe Yo?

Gu fugo nga “rika aboro,” i namangasunge nani dedede tipa ngbatunga rikaaboro du agarãyo nibakiakia kini raki ti gu regbo gu kura apai aamanga. Nikpiapai, Gate 1:6 nayaa furani wee: ‘AYosefa ki kpiki na awiribako dunduko na gu rika ngbatunga yo nadu ti gu rago re dunduko.’ Garã Yosefa na awirinako adu nibakiakia ono i adu na bangisa inohe tipa agu apai nanaamanga ti rago yó. Rogo gu “rika ngbatunga” nangia ga Yosefa re, gu kura awiribako aduho i abatika yó mbata fuko. Gu kurayo adu kindi ti unga tingbafuo kpio Yosefa. (Bam. P. 50:24) Na gu kura boro dagba gu “rika ngbatunga yo” re angia Benyamina i abatika ko fuo batika yó Yosefa na ko avura raka tingbafuo kpio Yosefa.

Sidu, ho i amangasunge ni na gu fugo nga “rika aboro” tipa ka yugo gupai nadu tipa agu aboro naaraka ti gu kura regbo sa, i arengbanga ka fura tipa gu bagizo regbo nzunzu i araki rogoho te, ono gupai ini yó ho nga digido gu regbo re kina ti ni, si adunga nigbangaha kisusi ome te. Sidu tie, wa Yesu aamangasunge na gu fugo nga “rika aboro” a wa duhe nikekehe rogo Matayo 24:34, anga birĩ ino okõokõpai Yesu afuhe fu gako abawiriki tipa i mangisunge nani si undo yó i ini gu regbo “kusa rago” nika digo ti ni te. Kuba gure, gupai Yesu aanyakasapaha fuyó angiawee i ainongo “gu uru na gu saa” re wasa te.—2 Tim. 3:1; Mt. 24:36.

[Gu kpiahe du ti kpewaraga 26]

Fuo maa Yekova Yesu ni Bakindo rogo 1914, i ayugu ko nigu boro ‘nadia be apai’

[Gu kpiahe du ti kpewaraga 28]

‘Gi rikaaboro re agónga te daho agi apai re dunduko ka díga ni’