Gini Regbo GA Mbori Kindo ka ye ti ni?
“GBIA, mo agasa ga aYisaraere ngbi fu yo wa du rago re?” (Amokedi 1:6) Abawiriki aduna nyemu ka ino gu regbo Yesu nika sigira gako Kindo ti ni. Areme, fuo susa agarã wa 2,000, aboro kindi na nyemu ka ino gu regbo ga Mbori Kindo nika ye ti ni.
Wa duhe nga ga Yesu meme tungusapai angia pa Kindo, si daada ani idi kuti gupai nga ko aima karagapai kuti gi sanahe re. Na nirengo, ko aima karagapai sani! Ko afura bara dunguhe tipa agu apai na gu regbo nika yugo ‘paye ko [“padu ko ho na ome kindo beko,” NW].’ (Matayo 24:37) Padu ko na ome kindo beko nikodikodihe naapa sigira gu Kindo nga ga Masiya. Ginihe nga padu Kristo ho na ome Kindo beko? Ani wisigingo gu rengo apai du biama nga gu Ziazia Kekeapai nayuguhe tipa padu Kristo ho na ome kindo beko.
1. Si adu nga padu Kristo ho na ome kindo beko atona fuo gbanga regbo fuo kpioko. Yesu agumba sanza ko afura rogoho tipa tiko nigu kumba nandu “ku rogo ringara yo tuturũ, ka dia ngbi.” (Ruka 19:12) Wai gu sanza nga ga sangbanebi re adigi? Si adu wa gere: Yesu akpi, ki zingi bekpio, na ki ndu kurogo gu ‘tuturũ ringara’ nga ngbangbaturũ. A wa Yesu afura tipaha kumbatayo rogo sanza wakina gure, si adu nga pa karaga ko tiko na ome kindo beko amanga “fuo rago ni gbanga ha.”—Matayo 25:19.
Fuo susa bete agarã kusa Yesu naga ku ngbangbaturũ yo, gu mokedi nangia Pauro akepai ki yaa: “Fuo tumo [Yesu] ni motumo tipa ingaapai bara sa kindi, ko . . . [asungu] pati kumbabe Mbori. Tona ti gu rago re ko nangera daho i ka manga avurako ni ni gbada nduko.” (AEbere 10:12, 13) Fuo Yesu da ngbangbaturũ yo, gbanga regbo atona i atona pido ko rogoho. Gu regbo pido ko re adigi ho Yekova Mbori amoiko ni ni Bakindo, ko kingia gu Bakindo aboro aapido ko. Gere nga gu regbo Kristo adi ome kindo kubeko. Ya mo aboro auru kpotosende arengbe ka rugatiyo naapa gu nyanyaki pa regbo re?
2. Padu Kristo na ome kindo beko nigupai ka i bihe nibangirise te. Oni tingidi gupai nga, Yesu aima fura tipa agu apai i ka ino padu ko ho na ome kindo beko mbikoho. (Matayo 24:3) Ya mo wa ka si adu nga padu Kristo ho na ome kindo beko nikadu nigupai aboro nika bihe abi, ka ndupai aduho tipa i fu agu apai i ka ino padu ko ho ti ni? Ani yugungo ho na kpiapai: Ani ya oni nandu ka bi bariwara-baime. Si rengbe kadu nga keke-keke-apai gudu ho dudua yo ho pangba gene tipa yugo rago nani, ono ya mo baraho oni ka da ni pangba gu baime re kini ngere riihe kpai zanga digidoho, oni abi kekepai i naduaha ki tai rii guanza kini yawee “Bariwara-Baime”? Wagusa te! Gine tigu ka i kepai ti ni ka yugobara gu baime re wa oni abihe abi na bangironi?
Yesu aaringbisanga pa gako duho na ome kindo beko nigupai rengbe aboro ka bihe nibangiriyo te, ono ko aundo yo i kparia gupai nikaa manga ngbangbaturũ yo ti gu regbo re. Rogo gu gene re, Yesu kini mo ka yaa: “Ga Mbori ngbi aye nga ni ngera nganganga te.” (Ruka 17:20) Wai tie ka gupai i aino pai ti ni re arengbe ka yugo gupai nga Kristo ho na ome kindo beko?
3. Si adu nga padu Kristo ho na ome kindo beko nikadu ti regbo gbegberẽ apai auru kpotosende ane. Yesu ayawee padu ko na ome kindo beko ngbangbaturũ yo ayugotihe auru kpotosende ane rogo avura, angbongi, abazigizo, ririakaza, na kuondiko. (Matayo 24:7-12; Ruka 21:10, 11) Ginihe narengbe ka ye na gi riko gbegberẽ apai re dunduko? Ziazia Kekeapai nayugoho nga Satana du si adu nga ko nika ye na gi gbegberẽ apai re dunduko, mbiko ko nga “gbia gi zegino re” na ngbaduko naima aima mbiko ko inihe nga gu regbo nye fuko koyo si nikina wiri guruhe wa Kristo naima tona zogarago nibakindo. (Yoane 12:31; Yugo 12:9, 12) Agu agopai nayugopa ga Satana zinga naapa du Kristo na ome kindo beko, si ima nge ti gi gaani regbo re. Natona rogo 1914, abakeke kuru pangbangaa aima ida kuti gupai ngawee apai aʹariatihe rogo gu garã re, mbiko mbata fu gu regbo re, apai aamanganga wo rogo zegino dunduko te.
Agi apai re naabaha rengbe kadu bangironi wakina gbegberẽ apangbangaa, ono si nigbegberẽhe te. Si nayugo gupai ngawee gu Kindo nga ga Masiya aima tona zogarago awere ngbangbaturũ yo. Fuo regbo ngbutuko, gi Kindo re nika zogarago ku auru kpotosende ane naabaha dunduko. Ono wai tie, rengbe aboro ka ino pa gu Kindo re tipa ka ruho ka ida na gaha zogarago na kadu ni avuruhe?
4. Padu Kristo ho na ome kindo beko nayugotihe rogo gu sunge tungusapai namanga rogo zegino dunduko. Yesu ayawee padu ko ho na ome kindo beko nikadu wakina “rago Noa.”a (Matayo 24:37-39) Noa aangianga kina bambakadi kurungba sa te, ono ko angia “batungusi rurupai” a. (2 Petero 2:5) Noa anaaza aboro kini yawee ga Mbori sapangbangaa ima mbeda kada. Yesu ape gupai ngawee gako abawiriki nikaa manga kina gu bangisa sunge nga ga za aboro re ti gu regbo ko nikadu ho na ome kindo beko. Ko agumba sangbanebi ki yaa: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga.”—Matayo 24:14.
A wa bi ani he rogo gu papara kekeapai ye mbata fu gere, ga Mbori Kindo nika gbarasa agu azogarago naabaha du rogo zegino. Sunge tungusapa Kindo nasa aboro i rugutiyo na gupai nga gi zogarago nga ga ngbangbaturũ re, si ima mbeda ka tona gaha sunge awere. Gu sunge re nafu momu fu aboro i oro be gu kpio naye na ki sa tiyó ni avuru gu Kindo re. Nyanyakipa sanahe nga, ginipai oni aberãha tigaoni tipa gipai re?
Ya Mo Pa ga Mbori Kindo Nga Wene Pangbangaa Furoni?
Gu pangbangaa Yesu aatungusaha, gu kura pangbangaa ho nafu maabangirise rengbe yó ka ringbisaha nani te. Fuo gu samungu namangi Edene yo bakuru kusayo dungu kutu agarã nasusi fuoho, Yekova Mbori aringbisipai tipa ka sigira gu zogarago nga gu nika rugusa apai niruruhe, na ki karaga aboro kurogo gu ringbisapai ko adu nani tipa aboro ti tonatonaha, nga kadu na nyenye unga beyo rogo paradizo kpotosende. Ginipai ngbaa gigihe kisusi gu nga, gi zogarago i aima kidopaha bakuru kusayo re, si namangasunge amanga awere ngbangbaturũ yo? Anga si nga gu kungbopai nawira rengo te, kina boro rengo du ngaha!
Awere, ga Mbori siasia Bakindo nazogarago dagba avurako. (Atambuahe 110:2) Rogo gi gbegberẽ zegino re nga gu naima ariatihe ti Mbori kusayo, Masiya nagbata agu aboro naida ka ye ka ino Mbori na kini irisiko ni “toro na rengo.” (Yoane 4:24) Gu maabangirise duho tipa raka nyeanye kindi tiibe gu zogarago nga ga ga Mbori Kindo, si fu ngbatunga arikaaboro dunduko, rukutu yó na sosono yó na angbatungayo. (Amokedi 10:34, 35) Ani nazungodi roni oni di gu baiiriwo momu du barabangironi re nigaoni. Oni wirikipai tipa ga Mbori Kindo awere, oni ki rengbe ka gbia ngbarago tiibe gu ruru zogarago re nyeanye kindi!—1 Yoane 2:17.
[Gu rukutu kekeapai du bandu kpewaraga yo]
a Agi afugo Yesu re naundo rani ani rugu gu iraira sakarogopai yo gu kura abasafugo Ziazia Kekeapai asaha ngbaha nibi gu fugo nga ‘padu Kristo ho na ome kindo beko.’ Gu kura sasa fugo naya tipaha wee si nga “pa ye Wiri boro,” ‘gu regbo,’ watadu “pa karaga ko tiko,” nga agu afugo dunduko nayugo gupai namanga vuru guru regbo. Oni kparia gupai nga, Yesu aafuranga tipa padu ko ho na ome kindo beko kuti regbo Ime Akangbii te, nga gupai namangi vuru guru regbo yo. Ono ko aringbisihe kuti “rago Noa,” nangia gbanga regbo. Wakina rago Noa, si adu nga padu Kristo ho na ome kindo beko nikangia gu regbo aboro nika dingiso tiyó na kina pa agu apai nga ga raka na ka i aidanga ka gia gu zahe ga Yesu abawiriki afuhe ya.