Wai Rengbe Ani ka Diabe gu Imisiri Nga ga Kpio Boro?

“[Awiri Yakobo] nangia akumba dunduko na agu yo nangia ade i ki mo ka ngarasa ko; ono ko aka pa ngarasa ko. Ko ki ya, ‘Oõ, mi andu ku murã yo na kina kpe wire.’ Bako ki nikpari tipa ko ni aume.”—BAMBATA PAI 37:35.

GU IRIʹIRI BAKUMBA nangia Yakobo re, ko arungo bakere gbe ho i agumba gupai ni fuko nga wiriko kpi. Ko aaida ka rungo dati kpioko. Wakina Yakobo, si rengbe kadu bangironi nga gu imisiri naye fu boro be pakpio badiangbani, si nigupai agonga ya. Ya mo ho du boro ni na bakere gberarago tiní wa gure, si nayugo gupai ngawee ní na idapase tee? Wagusa te!

Ziazia Kekeapai nafura tipa Yakobo nigu kumba nadu na idapase. I natambua rimoko kodihe na rimo bako nangia Yisaka na titako nangia Abarayama tipa gayó idapase nagbarii ga akurayó. (AEbere 11:8, 9, 13) Oni ngere, ti kura regbo sa, ko asota na maraika yuru sasasa tipa ka gbia maku be Mbori! (Bambata Pai 32:24-30) Si ziazia tie nga, Yakobo angia gu boro nadu na nyanyaki pagume dagbako na Yekova. Ginipai tie rengbe ani ka wirikaha be gu rungo Yakobo adu nani be pakpio wiriko? Pa rungo boro be pakpio badiangbani atagbaganga tihe na gu nyanyaki idapase du ní nani kuti Mbori te. Si nga sino aboro boro rungo be pakpio badiangbani.

Gine Nga Rungo Watadu Nunga?

Rungo be pakpio boro nga gu nunga namanga ní. Ani bingo gupai namangi Leonardo ho garãko aduni 14. Bako akpi nitunguotunguoho. Bangiri Leonardo aagonga ti gu uru tame nako agumba gu pangbangaa re fuko te. Ti bambata regbo, ko aidanga ya rengo nangiaha te. Ko abi kangba bako abi kporo kpee yo, ono ka si awiranga rengo bangiriko ya. Tipa adiwi wa sita, Leonardo arengbanga ka kpara te. Ko anaabi tiko dedede wa ko napido bako ko ye basunge yo. Si adi ko wa garã sa mbata ko nika ino ya bako aima kpi nirengo. Ho ko aini he ni nga bako ima kpi nirengo, ko abi tiko nisako. Paye ko ku kporo ki zanga bi boro anaatingida ko na pakpio bako. Wo ko anaakpara ti ngbatunga agu aregbo re. Nairiwo wai kpio adi bako beko!

Nunga be pakpio badiangbase rengbe arengba ka kio wa gu si adu tipa Leonardo re. Gu wene pangbangaa duho, si nga boro rengbe arengba ka hu be agi apai re. Ono tie, si rengbe ka dia gbanga regbo. A wa duhe nga bakere oro nadia gbanga regbo ka wi, kinawo duhe tipa nunga pakpio boro. Pa wasa boro tingbafuo kpio badiangbani nadia adiwi, watadu agarã a. Ono gu kere ima du oni nani ti tonatonaha, si nazera fuo bete regbo kusa, agu apai nga ga raka ki tona ka karagatihe berewe kubaha tooni tooni.

Ho boro afura ni tipa gu rungo gbiati nunga du ní nani tipa pakpio badiangbani, si naundo ní ní tona ka gbia wasa na ka ino wai rengbe ní ka diabe gani arungo. Gu boro kpi, ní berewe pati rani te. Sidu, si naida ani mangi asadatise ka inido tirani na raka zanga gu boro re. Pa gumba ani pa gu rungo du kpotoraniyo fu akuarani rengbe ka ye na wasa furani. Rengo ngaha nga, anga aboro dunduko nagumbapa gayó arungo ngba bangisa gene te. Ono tie, pai ho sa nga rengo: Hi gu rungo re zanga gumbapaha fu kura aboro naye na kina kaza fu berã boro, ngbaduniyo, na ti kpotoni. Ono tie, wai rengbe oni ka kpara rungo roni ngba ruru gene? Ziazia Kekeapai na wene akpiapai rogoho.

Sovura na Diabese Kuti Nunga

Dungu agu aboro narungo kpotoyo yo, i bi gupai ngawee, pa fura yó tipa gayó arungo fu akurayó, si nayeaye na wasa fuyó. Oni kparianga afugo gu kumba nangia Eyobo, nga gu kumba awiriko dunduko bawe akpiki na gu kura agberango ki ti kuriko. Ko ayaa: “Torore nambu be agu apai namanga ungare. Mi akpara pa gi baka bangirise akpara zaza. Mi afu rogo gu nirãnirãpai du torere yo.” (Eyobo 1:2, 18, 19; 10:1) Oni kparia gupai nga, Eyobo ayawee si aidi ko ‘kparipa’ gako arungo. Wai ka oni kparipa gaoni arungo? Ko ayawee ko ‘afura afura’ tipaha.

Paulo, nako akpi, ayawee: “Pai sa dagba agu apai naundo re mi gbia wasa fuo kpio nina nangia mi anaafura afura tipa ri.” Sidu, pa fura oni tipa gaoni rungo fu badiangbaroni rengbe ka ye na wasa furoni. (Asanza 17:17) Fuo navungu Yone kpi, ri ahõpai be akurari aKristano i naaye dedede ka bi ri. Ri ayaa: “Pa fura mi fuyó nazeresi gu ima mi adu nani.” Oni a wo, oni rengbe ka bihe nga pa gumba oni pa gaoni arungo fu gu boro nadegatuni rengbe ka zeresa gu ima du oni nani.

Pa keka oni awaraga fu abakurearoni rengbe arengba ka undo roni. Agu aboro duhe fuyó nikpakarapai tipa ka fura tipa gayó arungo, i rengbe ka bihe taata tipa ka kekapaha fu abadiangbayo. Tingbafuo kpio Saura na Yonatana, Davide ake bia kpenunga nayugupa gu rungo ko adu nani. Gi bia kpenunga re ada kusa nipapara gu kitabu nga ga Ziazia kekeapai du rimoho nga Ue Samuere.—2 Samuere 1:17–27.

Kpee rengbe arengba a kadu nga kura gene oni agumbapa gaoni rungo ngbaha. Ziazia Kekeapai nayaa: “Were ahe na regboho ti ni dunduko, rago du ho tipa apai ni ba sa sa dunduko . . . rago kpara ni aume [a].” (Batungusipai 3:1, 4) Regbo kpio badiangbarani nga “rago kpara ni aume.” Anga kpara niʹaume nga pazee te. Ziazia Kekeapai nafura tipa dungu ruru akumba na adee nayugupa gayó anunga nikpara yó niʹaume. (Bambata Pai 23:2; 2 Samuere 1:11, 12) Nikpiapai, Yesu Kristo ‘akpari niʹaume’ ho ko ambedi ni na muro bakureako nangia Razaro, nakpi ka fuoho aturongo ya.—Yoane 11:33, 35.

Nunga kpio boro nadia gbanga regbo, mbiko si nitaye aye kini go. Oni tingidi gupai ngawee, anga pazee ngaha oni kpari niʹaume te. Dungu aboro bi gupai ngawee ka i yugupa gayó nunga nikpara yó niʹaume, si naundo yó i gbia wasa.

Oni Mbedi na Mbori

Ziazia Kekeapai naya furani wee: “Oni mbédi na Mbori, ko ki mbedi na oni.” (Yakobo 4:8) Bangua gene rengbe ani ka mbeda na Mbori ngbaha, si nga rogo kparakpee yo. Ka oni bingo kparakpee na taatapaha ya! Ziazia Kekeapai nagumba agi afugo wasa re niyaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” (Atambuahe 34:18) Si nakido rani a kini yaa: “Mo bá ga tindiro ku auru Yekova, ko asóngoda ro [asóngoda].” (Atambuahe 55:22) Oni berẽnga tipa gipai re. A wa ani nigumbaha mbata, dungu aboro bihe nga si nafu undo afu ho i afura ni fu abakureayo tipa agu apai nafuda yó. Ya mo oni aberãnga ha ya si nafu undo bakere gbe ka oni gumba agu apai nafuda roni fu Mbori nga gu boro nakido rani ka fu wasa furani tee?—2 ATesaroniko 2:16, 17.

Paulo, ani nifura tipa ko, ko ayaa: “Ho mi anibihe ni nga mi arengbanga ka hi gu nunga re te, mi anikuku ka kpara fu Mbori. Mi anikpari fuko tipa ko undo re.” Paulo aima rugatiko na gupai ngawee kparakpee fu Mbori anaaundo ko aundo. Oni a wo, oni rengbe arengba ka bihe nga nikaragapai kuti gaoni akpee, “Mbori wasa” rengbe arengba ka ngarasa roni na ki fu ome furoni oni dibe gaoni arungo.—2 AKorindo 1:3, 4; ARomo 12:12.

Gu Maabangirise Du Tipa Zingabekpio

Yesu ayaa: “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.” (Yo. 11:25) Ziazia Kekeapai nayugo gupai nga, kpikpi aboro araka raka berewe.a Ho Yesu aduni auru kpotosende, ko ayugu gupai nga tandu kina beko ka zingisa kpikpi aboro. Ti kura regbo sa, ko azingisi degude garãri adu 12. Ginipai avunguri amangihe? Si ‘airiwo airiwo tiyo bakere gbe.’ (Marako 5:42) Ho Yesu Kristo nikaa zogarago ni rogo gako Kindo, ko nika zingisa dungu aboro tipa i naaraka auru zezeredi kpotosende. (Amokedi 24:15; 2 Petero 3:13) Oni berẽnga pa gu ngbarago aboro kadu nani ho Mbori nika zingisi abadiangbayo ni fuyó!

Claudete, nga gu dee wiiri nga Renato akpi ho tiyara ati ni naayó, ri amoi sura ko riihe tipa kaa bihe. Ri nita bi gu sura re kini yawee, ‘Ani abi tirani abi berewe fuo gu regbo Mbori nika zingisa aboro bekpio.’ Leonardo naatingidapa bako dedede nga ko azinga azinga rogo gu vovo zegino Mbori nakidopaha. Ii, gu maabangirise du tipa zingabekpio, si nga gupai nafu ndikidi wasa fuyó na fu gu badungu aboro agumeyo nakpiki. Kina gu bangisapai re rengbe kadu tipa roni a.

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Pa gumba oni pa gaoni arungo fu gu kura boro rengbe arengba ka fu wasa furoni

[Gu kpiahe du ti kpewaraga 5]

Keka paha fu kura aboro rengbe arengba ka fu wasa

[Gu kpiahe du ti kpewaraga 5]

Geda oni pa gu maabangirise du tipa zingabekpio rengbe arengba ka fu wasa furoni

[Gu kpiahe du ti kpewaraga 6]

Yesu akidohe ki yawee ko azingisa agu aboro azingisa idi pako

Oni Fu Wasa fu Kura Aboro

“[Mbori] nafu wasa fu rani rogo gaani gberãngbi yo dunduko, ya ani rengbe na fu wasa fu agu yo du rogo gu gberãngbi . . , mbiko gu wasa Mbori angarasi rani na ni.”—2 AKorindo 1:4.

Dungu ndikidi aKristano ini rengo agu afugo re ti kina boro agu apai namangi tipa yó. Fuo i gbia gu wasa aboro afuhe fuyó tipa i wasa tingbafuo kpio abadiangbayo, i abihe nga i ima rengba ka ngarasa gu kura aboro na ki fu wasa fuyó.

Ani bingo gupai namangi tipa dee nga Claudete, nga gu dee ninaandu dedede kaa tungusapai fu aboro rogo Ziazia Kekeapai. Mbata fu wiiri kpi, ri aima digo nindu kaa bi dee wiiri akpi be kaza. Rago aima ngba ti gu dee re wa Claudete anaaye ka bi ri, ono ri aberẽhe ki ya Claudete arengbanga ka rugatiri nzunzu naapa gu ime ri adu rogoho be pakpio wiiri te. Ono tie, ngbutuko fuo kpio wiri Claudete, gu dee re andu ka bi ri na ki yawee ri aye ka bihe singia Claudete nye kindi kuti gari idapase fuo kpio wiiri. Kina ngbari nazere ka bi gupai nga Claudete anye kindi kuti gari idapase. Gu dee re nawisigo Ziazia Kekeapai awere dedede na Claudete na kini gbia bakere wasa rogo Fugo Mbori.

Fuo kpi ba Leonardo, ko adiberã ka wirika fugo nibee tipa wa ka ko fu wasa fu airangbiongo na agu afugo du rogo Ziazia Kekeapai. Ko bi gupai nga, gi gako asadatise re ima undoko bakere gbe. Ko nayaa: “Pai sa dagba agu akuraha nga gu undo re mi dibe gi nunga nga nyemu undo airangbiongo i wirikipai tipa Mbori. Mi ima dia bakere regbo gbiati ome tipa ka undo yó rogoho. Gu gberarago mi adu nani asatihe ningbarago ho mi abi gu bambata boro ni mi aawisigo Ziazia Kekeapai na ní ní nazi bapatiza! Ka pe rengo, gu regbo re du nangia bambata regbo fere tingbafuo kpio buba mi agbia ndikidi ngbarago.”—Amokedi 20:35.