Ho gu Boro Akpi ni Mo Akpinyemuni

“Mi aarengbanga ka manga ai pai te ho kawire akpi ni gbakirigbakiri. Tifuo adiwi kusa, mi anaatingidapa ko si kini imisi re ni bakerehe, si kidu wa ka i ya i na rũpo re na kina sape. Ti kura aregbo, mi anidu na bakere zinga. Tipagine du kawire akpi ti ni? Rago aangbanga tire te mbiko mi abihe nga mi aadianga regbo kaa sungo na ko mbuko kindi ni ungako te.”—Vanessa, du Austroria yo.

KA SI du nga mo aima zanga gu boro mo akpinyemu ni rogo kpio yo, si rengbe ka du a nga mo aima gbiatiro na dungu apai wa: rungo kpotoseyo, du nisase, na ka ome adunga tiro ka manga ai pai ya. Isoke, mo aima du na zinga, gunde, na kini bihe nga si aaida mo mangipai amanga. Mo aima berã gupai a nga singia rẽhe arẽ boro naaraka kindi.

Anga gbegberẽpai nga ha ka du na rungo kpotoseyo te, ka si vura du vurũ tipa gbanga regbo. Si nayugo pa wai mo akpinyemu gu ga boro nakpi. Ono tie, ya mo mo rengbe ka gbia bete undo tipa ka diabe gamo rungo?

GUPAI RENGBE KA UNDORO MO HIPAI

Wa vura duhe nga, si rengbe ka du nga gamo igirã adigongo te, mo ima rengba ka gbia wasa ti agu aberãpai du re:

MO DI REGBO TIPA KA KPARA

Aboro dunduko naarungo rogo agene ni bakiakia na tipa bagiza regbo ni bakiakia a. Wa vura duhe wo, ho boro akpara ni si naundo ni ni gbia zereda ti gani igirã kpotoseyo. Vanessa, i nipepa ri kusayo, aya: “Mi anaakpara dedede, si anaaundo re ti gimi igirã.” Sofía, tameri akpi gbakirigbakiri, aya: “Si ima igirã fere ho mi aberã ni kurii gupai namangi, si wa ka boro azunda bangiri aro. Si ima kpakara boro hi gu igirã re, ono si nasa gu aro re tipa si hu.”

MO FURA TIPA AGU APAI MO ABERÃHA NA AGU NAMBUSA RO

Ti kura aregbo, mo ima rengba ka bihe nga si naida mo sungu nisaro. Ono ka hi rungo kpotose yo nisase, si wa asada ka tinda rõrõi tindiro nitiro. Jared du garãko nga bawe na saba, nga gu ko nazanga bako rogo kpio yo, aya: “Mi afura tipa agu apai naafuda re na kura aboro. Mi adu na tiko singia gupai mi aapehe adu na rogoyo ti ni, ono si adu ni wenepai ka fura tipa agu apai naafuda re.” Janice, i nipepa ri ti tonatona kekeapai, afura tipa gu kura undo: “Fura na kura aboro afu wasa fere ni kerehe. Mi abihe nga aboro ima rugatiyo na gupai namanga re, na mi ahi nga gimi arungo nisare te.”

MO IDI UNDO

Munganga sa ni dee aya: “Ho agu aboro narungo kpotoyo yo ambu gene ni fu agumeyo watadu abakureayo i undo yo tingbafuo kpio gayo boro, si nadu taata fuyo tipa i hi gayo arungo na ki dibehe.” Mo sa abakureamo i ini ginipai rengbe yo ka mangaha tipa ka undo ro; si ima rengba ka du nga i na nyemu ka undo ro ono i ainongo ginipai si aida i mangihe te—Asanza 17:17.

MO MBEDI NA MBORI

Tina aya: “Ho kumbami akpi ni gbakirigbakiri be kansa, mi aarengbanga ka pe agu apai naafuda re fuko berewe te, sidu, mi anaape apai dunduko fu kina Mbori! Mi anaasana Mbori na aˈuru dunduko tipa ko aundo re mi mangi agu apai ani anaamangaha mbata fu kumbami kpi. Yekova aundo re ngba dungu agene.” Tarsha, garãri adu nga 22 ho nari akpi ni aya: “Geda Ziazia Kekeapai na aˈuru dunduko afu wasa fere. Si anaafu wene apai fere tipa mi naaberãkurii he.”

MO NI BERẼPA ZINGABEKPIO

Tina ape gu kurapai berewe nga: “Ti tonatonaha, gu maabangirise nga ga zingabekpio aafunga wasa fere te mbiko mi aaida kumbami—na awire biata aaida bayo ti kina gu regbo re. Ono awere tingbafuo agarã biama, mi naka kuti gu maabangirise re. Si nasa re mi naaraka. Ho mi aberãpa biko ni berewe, si nafu zereda na ngbarago fere!”

Mo arengbanga ka hu ni kina boro ipo be gamo rungo te. Wa vura duhe wo, ga Vanessa kpiapai ima rengbe ka fu maabangirise foro, “Mo ima rengba kaa bihe nga mo ahu nga be gu rungo kpotoseyo re te, ono wa regbo nikaa susa mo adunga berewe na bakere gberãrago te.”

Mo tingidi gupai nga, mo nikaa tingidapa gu boro naakpi re atingida, ono raka kindi na nyanyakipaha. Na ga Yekova undo, mo ima rengba ka gbia ngbarago ti wene pabakure na gu raka du na rogoyo ti ni. Na barambeda, Mbori nika zingisa agu aboro naima kpiko. Ko naida mo du na rengba ka dungo gu gamo aboro berewe naima kpiko. Fuoho tie, gu igirã du kpotoroyo nika hu nyeanye kindi

Agu Averesi Nga ga Ziazia Kekeapai Rengbe ka Undoro

Mbori naberã pa gu gberãrago aberã du mo rogoho na gamo aume.

Bake papara Baibiri sa agumba gupai fu Mbori nga: “Mo uka aumere ku rogo ga mangu ime! Ati si ni keke he rogo ga kitabu yo, te?”—Atambuahe 56:8.

Mo ima rengba ka uka kpotoro yo fu Mbori.

“Mi nayugo pa gi fudifudipai fu [Mbori]. . . Ako Yekova,a mi nakpara foro.”—Atambuahe 142:2, 5.

Mo ima rengba kadu na maabangirise.

“Aboro azinga be kpio.”—Amokedi 24:15.

Mbori nakidohe ka zingisa gu dungu aboro kpiki, na ko nzunzu na nyemu ka manga gupai re.b—Eyobo 14:14, 15.

a Rimo Mbori nga Yekova rogo Ziazia Kekeapai yo.

b Ka mo aida ka ino kura apai tipa zingabekpio, mo bi wirikapai 30 nga ga gu buku nga Mo Raki Nyeanye Kindi na Ngbarago! aDezire Yekova akusihe na mo ima rengba ka kusaha gbua rogo www.jw.org/zne.