Diabe Gu Fudifudiapai Duti Tungusapai Nitanga Nani Ti Akporo
“Ani adu zukazuka rogo gaani Mbori yo ka gumba ga Mbori wene pangbanga fu roni rogo bakere kenapai.”—1 TESA. 2:2.
1. Gini fudifudiapai Yeremaya agbiatiko nani, na wai ko arengbe ka diabehe?
YEREMAYA angia boro wakina rani. Ho Yekova atingidi Yeremaya ni na gupai nga ko naida ka maako “ni nebi fu arikaaboro,” ko akpari kuari ki yaa: “Ako Gbia Mbori! Mo ngére, mi aina nga waĩ ka fura te, bambiko mi nga kina paranga.” Ono wa ko adu naa kido kuti Yekova, ko aidi ka manga gu sunge re. (Yere. 1:4-10) Tipa agarã susi 40, dungu aboro aaidanga na gu pangbangaa ko aagumbaha te, aguyo kini sogoko, kini sawia ko, na ki mangi ko a nizuũ. (Yere. 20:1, 2) Ti kura aregbo, ko aberẽpa mbu gu sunge ko aamanga re. Wa si avura duwo, ko aatungusa gu pangbangaa kindi badungu aboro aaidanga nani ya. Mbiko gu ome nga ga Yekova, ko amangi gupai ko aarengbanga ka mangaha nitiko ya.—Oni gedi Yeremaya 20:7-9.
2, 3. Wai gu ga Mbori amoyambu du awere agbiatiyo na fudifudiapai nawira gu nadu tipa Yeremaya?
2 Badungu ga Yekova amoyambu areme rengbe kadu wakina Yeremaya. Ho ani anaaberã ni kuriipa tungusapai nitanga nani ti akporo, agurani kinaho nayaa, ‘Gure nga gupai ka mi amanganga ha ya.’ Ono ho ani atingidi gupai ni nga Yekova du nakpinyemu ani tungusi wene pangbangaa, ani ado gu gunde nadu rogoraniyo kusayo na ki tona tungusapai zaaza. Wa vura duhe wo, dungu rani fudifudiapai aima gbia rani si kidu furani nikpakarapai tipa ani naatungusapai kindi. Rengo du nga gupai nzunzu nga, si nitaatapai tipa boro tona tungusapai nitanga nani ti akporo na kini mangihe kindi dati digido zegino te.—Mt. 24:13.
3 Ginipai ka mangi ka si du nga oni aima digo niwisigi Ziazia Kekeapai na aDezire Yekova na kini ndu kupati agu adunguratise nga ga dungurati, ono oni kidu na kina ndundu ka tona tungusapai nitanga nani ti akporo? Watadu ka si du nga oni nga Dezire Yekova naima zio bapatiza, ono si kidu furoni nikpakarapai ka tungusapai nitanga nani ti akporo, si ki vura du vurũ nga ome kina tironi ka mangaha wo? Si naida oni ini gupai nga, ngbatunga aboro dunduko nadia adia be gu fudifudiapai duti tungusapai nitanga nani ti akporo. Oni rengbe arengba a ka diabehe mbiko gu undohe nga ga Yekova.
Ani Do Gunde Kusayo
4. Gine naundo Pauro ko niitungusi wene pangbangaa zanga gunde?
4 Oni ima ino gupai nga, gu sunge tungusapai namanga rogo zegino dunduko, si amanganga mbiko ome boro watadu gu tatamana nga ga boro te, ono si namanga mbiko ga Mbori toro. (Zek. 4:6) Kina gu bangisapai re a du tipa gu sunge nga ga aKristano nibasasa. (2 Kor. 4:7) Oni bingo gupai nadu tipa Pauro. Ko atingidipa gu regbo aboro amangiko gbegberẽe na gu badiangbako i aamangasunge amokedi na ko, ki kepai ki yaa: “Ani adu zukazuka rogo gaani Mbori yo ka gumba ga Mbori wene pangbanga fu roni rogo bakere kenapai, ani nahi pai mbata, i namangi rani ni wasiro Firipoi yo.” (1 Tesa. 2:2; Amo. 16:22-24) Si rengbe ka iriwo airiwo tirani ka bi gupai nga, gu zaaza batungusipai nangia Pauro re, aregbo adu kinaho ko anaakeka akeka na pai tipa ka tungusapai. Ono tie, a wa duhe tipa rani dunduko, si aidi Pauro kido kina kuti Yekova tipa kaa tungusa wene pangbangaa zanga gunde. (Oni gedi AEfeso 6:18-20.) Wai rengbe ani ka pekafuo gu kpiapai nga ga Pauro?
5. Gini bambata he rengbe ka undo rani ani do gunde kusayo tirani?
5 Gu bambata he rengbe ka undo rani ani do gunde kusayo tirani nga kparakpee. Nazakigene sa ayaa: “Mi naakpara fu Yekova tipa ko undo re mi niifura naa wasa, ko undo re tipa mi niirimisi pai ku ngbadu aboro yo, na ko undo re mi niigbia ngbarago mbiko tungusapai. Nirengo, ga Yekova sunge du, angianga gaani ya, sidu, ani arengbanga ka mangapai zanga ko undo rani te.” (1 Tesa. 5:17) Ani dunduko si aida ani naakpara akpara kindi tipa gu undohe nga ga ziazia toro tipa kaa tungusapai zanga gunde.—Ruka 11:9-13.
6, 7. (a) Gini yuguyugupai Yezekere abihe, na rogoyo angia gine? (b) Ginipai gu yuguyugupai Yezekere abihe ayugoho fu ga Mbori amoyambu areme?
6 Gu kitabu nga Yezekere nayugo kurapai berewe rengbe ka undo rani ani naatungusapai zanga gunde. Yezekere abi yuguyugupai Yekova nafu kaĩkaĩ waraga na kekeapai ti kpakpuhe na giihe yo nga “biakpe na kpenunga na kperungo.” Yekova aya fuko wee: “Wiri boro, mo ri gi kaĩkaĩ waraga re nga gu fu mi foro ki hisi vuro na ni.” Gine gi yuguyugupai re ayuguhe? Si ayugu gupai nga si naida Yezekere rugutiko wenengai na gu pangbangaa ko andu ka gumbaha. Fugo gu nebi re nga: “Mi ki ri he, si ki du ngbare yo nzinziri wa nzeme anyege.” Gumba ga Mbori pangbangaa fu aboro angia pa ngbarago fu Yezekere, sidu, si anziri wakina nzeme anyege. Ko abihe nibakere mamu ka rukuba Yekova na ka manga gu sunge Yekova afuhe fuko, wa si avura du vurũ nga dungu aboro aaidanga ka gia gupai ko aagumbaha te.—Oni gedi Yezekere 2:8–3:4, 7-9.
7 Gi yuguyugupai re na nayugo nyanyakipa pai fu ga Mbori amoyambu areme. Ani a na pangbangaa berani si aida ani tungusihe, nga gu pangbangaa dungu aboro aidanga nani ya. Tipa ani naabi sunge tungusapai kindi nigu wene sunge Mbori afuhe furani, si naida ani naageda Ziazia Kekeapai wenengai na kini wisigihe. Ngbarangbara wisigopai arengba ka undo rani ani girogo Fugo Mbori yo wenengai gbe te. Anga si naida oni mbakadi gu gene oni ageda Ziazia Kekeapai ngbaha na kini wisigi Ziazia Kekeapai tee? Anga si naida oni naaberã kurii agu apai oni agedaha dedede tee?—Tam. 1:2, 3.
Wai ka Tona Sakapai na Aboro
8. Gini bete agene naundo kura abatungusipa Kindo i tona sakaapai na aboro ho i atungusapai ni rogo akporo?
8 Gupai nafuda dungu abatungusipai gbe nga, wai ka tona fugo na aboro ho i atungusapai ni nitanga nani ti akporo. Kina rengo du nga gupai nga, si nikpakarapai rogo kura adagbarago ka tona fugo na aboro. Gu kura abatungusipai nidu na wasa gbe ho i afura ni na aboro ka si du nga i tona fugo na wene afugo, fuoho, i ki fu trakte (tract) fu gu boro i nagbia ní kporo re, a wa ringbisi yó ho rogo gu sanduki du riihe nga, ‘Gene Sa ka Tona Sakapai na Aboro’ du kusende re. Gu kekepai du ti kpoto gu trakte re na gu kpiaarago na kpia aboro du ti ni rengbe arengba ka gbeberã irakporo, si kini zaki gene furani ani gumba ndu gupai ani niye ti ni, fuoho, ani ki kusi sanahe. Gu kura gene rengbe ani ka mangaha ngbaha nga ka yugo atrakte biata watadu biama fu irakporo na ki sana ní ní sia gu ngba tiní. Ono tie, anga gupai si aida ani mangihe nga ka kparaka kina kparaka atrakte sa te, watadu ka kparakaha rogo agu akporo dunduko ani andu kurogoho te. Ono gaani sásá nga ka tona gu sakaapai rengbe ka zaka gene ani tona wisigo Ziazia Kekeapai na aboro.
9. Tipagine du wene mbakadatise ti ni ninyanyakipa pai?
9 Singia gini gene ani nasiaha ka tungusapai ngbaha, wene mbakadatise rengbe ka undo rani ani duna wasa ho ani atungusapai ni nitanga nani ti akporo. Bazakigene sa ayaa: “Mi nidu na ngbarago gbe kinaho mi nambakadi tire ni wenengai. Si ninaasa gupai nga mi du na nyemu ka tungusapai ngba gu gene mi nimbakadihe.” Gu kura bazakigene ayaa, “Ho mi arugatire ni wenengai na agu apai du rogo agu awaraga mi andu ka fukaha fu aboro, si nasa gupai nga mi du zaaza ka fukaha.” Wa vura duhe nga si ngbaangba boro fugu gupai berãni yo ní andu ka gumbaha, badungu abatungusipai bihe nga gupai naundo gbe nga, boro fuguhe na fugoni kuari. Pa manga yó ho wo naundo yó i fu gu bawene he kisusi du beyo fu Yekova.—Koro. 3:23; 2 Tim. 2:15.
10. Ginipai rengbe ani ka mangaha tipa ka sa gu dunguratise du tipa sunge tungusapai si fu undo?
10 Gu dunguratise du tipa sunge tungusapai nasa gupai asa a nga gaani tungusapai kusi wenepai na ani ki gbia ngbarago ba gaani sunge yo. Ka si du nga gu veresi du tipa gu uru re nafura tipa tungusapai, ani rengbe arengba ka gedaha na ki sakipai riihe. Ono tie, gu wirina nanungusa gu dunguratise du tipa sunge tungusapai, si naida ko di bete regbo adia ka gumbapa wai rengbe yó ka tungusapai rogo gayó dagbarago, watadu ka gumba gupai rengbe ka undo rogo gu uru re. Si nika undo agu abatungusipai duho i mangi gu dezirepai duna wene sangbanaha ti ni. Ka abaakumba mbakaditiyo wenengai mbu regbo koyo kindi, watadu gu kura awirina nanungusa gu dunguratise du tipa sunge tungusapai, si rengbe ka undoyo i mangi agi apai re na ki nyasi dunguratise kina vuru regboho yo.—Rom. 12:8.
Degatue Naundo Aundo
11, 12. Wai rengbe degatue ninunga ka undo rani ani gumba wene pangbangaa fu aboro? Oni funga akpiapai.
11 Anga kina wene mbakadatise sa naundo rani ani tona sakapai na aboro ba tungusapai yo na ki rimisi pai ku ngbaduyó yo te, ono nyemuse naundo rani aundo a ani mangihe wo. Gene sa ani ayugo gu nyemuse re ngbaha nga, nidega ani turani wenengai. Babiapai sa ninaata ata ayaa: ‘Ho du ani ni na hipai, na kidu na nyemu ka gia gupai aboro agumbaha, si nasa aboro i du na nyemu gupai ani agumbaha, na si nayugo gupai nga nyemu yó kina tirani.’ Ka ani adegaturani ninunga, si rengbe ka zaka ngbadu gu boro yó ani afura na ní, a wa agu apangbangaa namangi du paha kusende re ayugoho.
12 Dee sa France yo akepai rogo waraga apangbangaa ki fura tipa agu aboro ue nangoka gari ngbadimo ndugu ngbutuko fuo kpio fogo wiiri. (Le Progrès, of Saint-Étienne) Ri aya rogo gu waraga re wee: ‘Mi aima ino nikina ipo ya aDezire Yekova du nangia agu aboro nangoka ngbadimo re. Mi ki ima mbakada tire tipa ka do yo nibirĩ, ono mi atuka bangire ki bi gu burosua nadu beyo. Gu burosua re aafura tipa ndu gupai Mbori ambu arungo ti ni si niimangi aboro. Sidu, mi adiberã ka idaha fuyó i rimi ku kporoyo tipa mi wegedi kango ngbayo. Ani asungu naayó tipa bagizo regbo susi saa sa. I adegetuyo nibakere nunga ka gia agu apai mi agumbaha, na ho i aaga ni, mi adu na bakere ngbarago. Sidu, mi ki ya fuyó i yeaye berewe ka bire.’ (Rom. 12:15) Fuo bete regbo kusa, gi dee re aidi ka wisigo Ziazia Kekeapai. Ani rengbe ka wirika dungu apai ti gupai nga, gupai gu dee re atingidihe tipa agu awirina nandu ku kpuri yo re angia wai i adegetuyo, angianga agu apai i agumbaha ya.
13. Wai rengbe ani ka aria gu gene ani agumba wene pangbangaa ngbaha ringbisihe kina kuti agu aboro ani agumbaha fuyó?
13 Ho ani adegaturani ni ninunga, gure nga ani nasa aboro i gumba ndu gupai furani i aida ga Mbori Kindo ti ni. Si nazaka gene furani ani gumba wene pangbangaa fuyó. Oni vura bi gupai nga agu abatungusipai gayó sunge akusa wene sangbanaha, i nga agu aboro nadegatuyo wenengai. (Snz. 20:5) I nayugo gayó ndikidi nyemuse tipa agu aboro i agbia yó ba tungusapai yo. Anga i naakeka kina rimo agu aboro sa i agbia yó na ki ke gayó adresi te, ono i naakeka agu apai akeka a du yó na nyemu ka inoho. Ho boro asana kura sanahe ni, i nandu ka weteka apai rogo Ziazia Kekeapai na rogo agu awaraga kangara moyambu akusaha, fuoho, i ki ndu niipo ka karagapai fu gu boro re. A wa gu mokedi nangia Pauro anaamangaha, i naʹaria gu gene i agumba wene pangbangaa ngbaha ringbisihe kina kuti agu aboro i agumbaha fuyó. (Oni gedi 1 AKorindo 9:19-23.) Gu ndikidi nyemuse re nasa aboro i duna nyemu wene pangbangaa, na si nayugokpia gu “weneringise nga ga gaani Mbori.”—Ruka 1:78.
Ani Duna Wene Bipai
14. Wa ani atungusapai, wai si aida ani yugukpia asino Yekova?
14 Yekova aima fu ranirii furani ka siapai, na si nayugo gupai nga ko nabi rani dunduko nibasasa na kikiipa rani. Wa vura duhe nga ko nga gu Mbori Duna Tanduapai Dũ, boro ho ko amanga ní ngbaome ní irisiko te, ono ko nazungodi aboro mbiko nyemuse, kini fu maku fu aguyo naida na gako agamunihe. (Rom. 2:4) Wangia ani abamangisunge fu Mbori, si naida ani mbakaditirani ka fu wene pangbangaa fu aboro ngba gu gene rẽ na gaani Mbori inapai ti agu aregbo dunduko ani amanga dezirepai. (2 Kor. 5:20, 21; 6:3-6) Tipa ani rengbe ka manga gupai re, si naida ani du na wene bipai tipa agu aboro du rogo gaani dagbarago. Gine rengbe ka undo rani ani duna wene bipai?
15. (a) Yesu aya fu gako amokedi i mangi ginipai ho ka aboro aidanga ni na wene pangbangaa ya? (b) Gine rengbe ka undo rani ani niberẽpa gbia agu aboro rengbe ka ida na wene pangbangaa?
15 Yesu arugu gako amokedi ka i dunga nifudifudiyo ho ka aboro aidanga ní na gu pangbangaa i agumbaha ya, ono i niiberẽpa gbia agu aboro rengbe ka ida na gu pangbangaa re. (Oni gedi Matayo 10:11-15.) Ka ani amaa gu tooni asásá rengbe ani arengba kada ti ni niipo, si rengbe ka undo rani rogo gipai re. Wirina sa ayawee ko wakina gu boro nagbata dahabu sendeyo. Ko ayawee ho ko nindu ni ku gene tungusapai yo, ko “naamaabangiriko tipa ka gbia dahabu rogo gu uru re.” Kura wirina ayawee gako sásá nga, ‘rogo aposo dunduko, ko naida ka gbia gu boro nika ida na wene pangbangaa, fuoho, ko ki karagatiko ka ndu ka bi gu boro re fuo arame tooni.’ Gu kura abatungusipai naaʹasadatiyo ka geda kandara veresi sa fu gu boro i nagbia ní kporo. Gini sásá duho rengbe oni ka maaha nga gu rengbe oni arengba kada ti ni?
16. Gini nduapai duho si aida ti ni ani naatungusapai kindi?
16 Anga kinaho sa aboro aida ni na gu pangbangaa ani agumbaha si ayugo gupai ni nga ani na diabese rogo tungusapai nitanga nani ti akporo te. Rengo du nga, sunge tungusapai nasa gupai nga agu aboro naida na wene pangbangaa gbia bata, ono kura nyanyakipa apai kinaho a si amangaha. Tungusapai nafu mamu furani ani yugu gaani nyemuse tipa Yekova. (1 Yo. 5:3) Si nasa gupai nga ka ani dunga na bape kure kurirani ya. (Amo. 20:26, 27) Si nasa azanga sinombori i ini gupai nga, ‘rago ga Mbori sapangbangaa da.’ (Yugo. 14:6, 7) Ono nibambatapai tie, tungusa wene pangbangaa nasa gupai nga aboro nitambua rimo Yekova auru kpotosende dũ. (Tam. 113:3) Sidu, singia aboro naida na gaani pangbangaa watadu i aidanga nani te, si naaida ani naatakapande ga Mbori Kindo kindi. Nirengo, gu ome dunduko ani amangaha kaa tungusa wene pangbangaa, Yekova nabihe na kikiipaha.—Rom. 10:13-15.
17. Ginipai aboro nika inoho ngbaome barambeda?
17 Wa vura duhe nga badungu aboro areme aidanga na gaani sunge tungusapai te, fuo regbo tooni, i nika bihe kia. (Mt. 24:37-39) Yekova aya fu Yezekere wee, ho agu asapangbangaa ko atakipandehe nika da ni ti rengo, aYisaraere “aina ha ya nebi adu dagba yo yo.” (Yeze. 2:5) Teketeke a, ho Mbori nika tona sapangbangaa gi zegino re ni, aboro nika ino gupai ngbaome nga, gu pangbangaa aDezire Yekova anaatungusaha, si aenge kina yo du bangisa ndikidi Mbori ni nga Yekova, na aDezire Yekova nangia agu aboro naafura kubako. Nairiwo gu mamu du berani nga ani du na rimoko rirani na ani nitungusi gako pangbangaa ti gi kere aregbo re! Mbiko gako ome, ani arengba rengba kaa diabe gu fudifudiapai duti tungusapai nitanga nani ti akporo.
Gaoni Karagapai Nga Gine?
• Wai rengbe ani ka do gunde kusayo tirani tipa ka tungusapai?
• Gine rengbe ka undo rani ani tona sakapai na aboro riipa Ziazia Kekeapai ho ani atungusapai ni nitanga nani ti akporo?
• Wai rengbe ani ka yugo ndikidi nyemuse tipa aboro?
• Gine rengbe ka undo rani ani duna wene bipai tipa agu aboro du rogo gaani dagbarago?
[Gu kpiahe du ti kpewaraga 17]
Gene Sa ka Tona Sakapai na Aboro
[Gu kpiahe du ti kpewaraga 17]
Wai rengbe oni ka tonaha
◼ Fuo fu oni sene fu irakporo, oni rengbe ka fu trakte funi na ki yaa, “Gupai mi naye ti ni fuo roni areme nga, mi naida ka sakapai na oni tooni riipa gupai duti gi kpewaraga re.”
◼ Watadu oni rengbe ka fu trakte ki yaa, “Mi niye ka bi roni areme tipa wiri bete regbo bambiko mi na nyemu ka ino gupai oni aberãha tipa gupai gi kpewaraga re agumbaha.”
Ka ní di trakte beroni:
◼ Oni sana taata sanahe sa tipa ka ino gani bipai tipa gupai du ti gu trakte re.
◼ Oni degeturoni wenengai, kini asadi tironi ka rugatironi na gu bipai nga ga gu boro re. Oni tambua ni tipa gupai ní nagumbaha.
Tipa ka ndu kumbatayo na fugo:
◼ Oni gedi veresi sa watadu ue ki sakirogoyo, ki aria gaoni fugo si ndu na gupai du gu boro re na nyemuhe.
◼ Ka boro duna nyemupai, oni fu buku funi na ki yugu wai funi ani naawisigo Ziazia Kekeapai na aboro. Oni mbakadipai na ní tipa ka ndu berewe fuo ní.