Fugo Yekova Niungaha
Memeapai Rogo ga Pauro Awaraga fu AKorindo
GU MOKEDI nangia Pauro aabakabangiriko bakere gbe tipa gu dungurati nadu Korinda yo. Ko agi gupai nga kparakaro adu dagba awirina yo. I ambu wasiwasi mangaapai ambu aboro naamangaha rogo dungurati. Gu dungurati re aima ke waraga a fu Pauro kini sanako tipa arugute riipa kura apai. Sidu, rogo gu garã nangia 55 F.B.K., ho ko aduni Efesa yo ti regbo gako biata nunguro nga ga mokedi, ko ake gako bambata waraga fu aKorindo.
Gu ue waraga si awiraha nga ko akehe fuo bete adiwi gbua fuo ke ko gu bambataha, si anyasi agu apai nadu ngbako ko aaida ka gumbaha fuyó. Wa duhe nga agu apai naamanga Korinda yo na rogo dungurati, si wakina gu namanga areme, sidu, agu awaraga ko akekehe re, si na nyanyakipaha furani areme.—Eb. 4:12.
‘Oni Ngére, Oni rú Nyanyakii’
(1 Kor. 1:1–16:24)
Pauro ayaa: “Oni mongo gumba pai sa.” (1 Kor. 1:10) ‘Anga kura mburuhe ho fuo gu nga Yesu Kristo’ i amaamburu asino aKristano riihe te. (1 Kor. 3:11-13) Pauro afura tipa gu irabäri nadu rogo dungurati ki yaa: “Oni kúsi gu gbegberẽ boro dagba roni yo re.” (1 Kor. 5:13) Pauro aya berewe wee: “Kpoto boro adu nga tipa pa meteka te, ono tipa Gbia.”—1 Kor. 6:13.
Pauro afu rugute nibipa rogatise na nibipa nye boro nibakuparanga watadu nidevurukporo. Si angia karagapai kuti “agu apai [aKorindo] ake pa ha.” (1 Kor. 7:1) Fuo fura Pauro tipa gu sunge nga ga ngerakurii kporo, tipa gu mbakadapai nga ga dunguratise, na tipa zingabekpio nga gupai nika henga manga ya, ko afu rugute ki yaa: “Oni ngére, oni rú nyanyaki rogo idapase. Oni dú wa akumba, oni dú nyanyaki.”—1 Kor. 16:13.
Akaragapai sa agu Asanahe Nga ga Ziazia Kekeapai:
1:21—Ya mo Yekova namangasunge nirengo na “mungo” tipa ka batasa aidipase? Oó. Wagusa te. Ono tie, wa duhe nga “zegino aina nga Mbori mbiko gaha tatamana te,” guhe ko amangasunge nani ka batasa aboro, aboro zegino nabihe wa pamungo.—Yo. 17:25.
5:5—Gupai nga “ka fu gi ni re fu Satana tipa gbarasa borose, toro bati,” rogoyo nga gine? Ho i akusa gu boro ni kusayo rogo dungurati mangi kere ingapai, ní nakaraga tiní berewe kurogo ga Satana zegino du nigbegberẽhe. (1 Yo. 5:19) Si ki tadu were, i kini fura tipa ní nga i ima funi fu Satana. Pa gbarasayó gu boro re, watadu pa kusa yó ni kusayo rogo dungurati nayugo gupai nga i di ní kusayo tipa gu gbegberẽ sino ní re ka mera fuo agu aboro du rogo dungurati tipa ka banda gaha toro, watadu gu wene sino moipai rogo gu dungurati re.—2 Tim. 4:22.
7:33, 34—Gine nga “agu apai nga ga zegino” arogotise abakabangiriyo tipaha? Pauro afura tipa agu apai nga ga raka si aida agu aKristano nga arogotise naabakabangiriyo tipaha. Si nakoda riahe, rokoo, bambu, ono angianga gu gbegberẽ apai du rogo zegino ya si aida aKristano nehe.—1 Yo. 2:15-17.
11:26—Ti gini aregbo si aida ani naatingida pakpio Yesu, na ani nikaa tingidaha ki “da” ti gini regbo? Pauro aayanga wee si naida i naatingida pakpio Yesu dedede te. Kuba gure, gupai ko agumbaha nga, ho mbedimbedi aKristano nikaani ri kpakuto ni ki mbiri imekakue nga gu du tipa Tingida Pakpio Yesu bara sa rogo garã rogo gu diwi nga Nisana ti rameru 14, gure nga i “nataka pande ga Gbia kpio.” I nikaa manga gipai re kindi “da ho ko ka ye ni,” watadu daho ko nika dia yó ni kugume ngbangbaturũ yo.—1 Tesa. 4:14-17.
13:13—Wai duhe nga nyemuse kiipaha ki susi idapase na maabangirise? Ho gu “ndikidi he, du aboro na maabangirise mbiko ho” adani ti rengo, na boro ki bi agu ahe nibangirini “i abi nga ni bangirise ya,” gi papara idapase na maabangirise re nanyasa. (Eb. 11:1) Nyemuse kiipaha ki susi idapase na maabangirise mbiko si tigaha nanyeanye kindi.
15:29—Gupai nga ‘i nabapatizi aboro kuba aguyo naima kpiko,’ rogoyo nga gine? Anga gupai Pauro aagumbaha nga agu aboro du niunga yó si naida i zi bapatiza kuba aguyo nakpiki zanga i zi bapatiza te. Gupai Pauro aagumbaha herẽ nga pa rimiso mbedimbedi aKristano kurogo gu raka nika sa yó i kakuti gayó ruru mangaapai dati kpio yó na i ki zingisi yó bekpio i raki ni agu aboro nga atoro.
Agu Apai Rengbe Ani ka Wirikaha:
1:26-31; 3:3-9; 4:7. Pa sambuo ani tirani rogo Yekova yo niumbasitise nasa gupai nga ani du na kodatise rogo dungurati.
2:3-5. Wa Pauro aatungusapai Korinda yo, nangia ga aGiriki gbata nga ga wirikapai, ko avura kaa bakabangiriko singia ko arengba ka zomia bete aboro i ye kurogo rengo ke. Ono tie, ko ambunga rungbura watadu gunde si gbarasipa gu sunge Mbori afuhe fuko te. Wakina gure a, si aidanga ani mbu agu apai nika kura sa rani si ká na ani ti tungusa gu wene pangbangaa du tipa ga Mbori Kindo te. Si naida ani ngere kube Yekova tipa undo.
2:16. Ka ani aida kadu na “ga Kristo berã,” si naida ani berẽ wa gu ko aberã, na ki ini apai dunduko tipa asinoko, na ka wirika gako kpiapai. (1 Pet. 2:21; 4:1) Si nirengo ninyanyakipa pai ani wisigi ga Yesu raka wenengai na gu sunge tungusapai ko amangihe.
3:10-15; 4:17. Si naida ani wisigi gu gene ani ayugopai ngbaha gbiati gaani sunge sa aboro ni abawiriki na ki mbakadihe. (Mt. 28:19, 20) Ka ani ainongo birĩ yugopai wenengai ya, gupai rengbe arengba ka manga nga, gu boro ani ayugopai funi, ní batinga be gu asada ka ye sa gani idapase te, sidu, gupai re ki fu bakere rungo furani ani ki bati wa ka boro bati “rogo we yo.”
6:18. Gu fugo nga “oni né pa bari,” si ayugongo pa ne kina por·neiʹa sa te, ono si nakoda agu ahe gbiati kekeapai nazingisa nyemu kodaba ti boro, wasiwasi mangaapai, sungo kini berẽpa kodaba, gu babuga nga ga nyemu kodaba dagba kumba na dee nga gu adanga fuyo i baha ya, gbiati agu apai dunduko rengbe ka sa boro ní mangi meteka..—Mt. 5:28; Yak. 3:17.
7:29. Si aidanga gupai ngawee arogotise rimisi tiyó kurogo agu apai nabi kina yó dagbayó ki moi agu apai nga ga Kindo rogo ue ba te.
10:8-11. AYisaraere aima ba gberarago ti Yekova ho i agumbarimo Moize ni na Arona. Si aidanga ani tona gu sino nga ga gumbarimo watadu kpakanahe te.
16:2. Ka si du nga ani aima ringbisapai tipa ka fu gamahe tipa ka songoda gu gaani sunge nga ga Kindo, si naida ani nifuhe ti aregbo dunduko wa ani aringbisihe zanga pirigo.
“Oni dú Ziazia”
(2 Kor. 1:1–13:14)
Pauro aya fu aKorindo wee i “vu” gu boro-ingapai nasa gani berã na “ki fu wasa fu ni.” Wa si avura du ngawee ga Pauro bambata waraga aba kina rungo ti aKorindo, Pauro angi mbiko gupai nga, si “aba rungo [tiyó] sa saberã.”—2 Kor. 2:6, 7; 7:8, 9.
Pauro angarasi aKorindo i ‘moipai rogo undahe’ a wa ‘i amoipai rogo apai yo dunduko.’ Fuo Pauro karagapai fu asogo aKristano, ko afu yangara rugute ki yaa: “Oni dú koyo zezeredi. Oni dú ziazia; oni wása; oni dú kina ku bani; oni súngu zezeredi. Mbori nga nyemuse nga ga zereda ko a, ki nidu na oni.”—2 Kor. 8:7; 13:11.
Akaragapai sa agu Asanahe Nga ga Ziazia Kekeapai:
2:15, 16—Wai du ani ni “fuõ Kristo”? Ani wo mbiko gupai nga, ani nandu kuti agu apai du rogo Ziazia Kekeapai na kini tungusihe fu aboro. Wa vura duhe nga gu pangbangaa ani atungusaha re, si nigbegberẽhe fu gbegberẽ aboro, si niwene fuõhe fu Yekova na fu agu aboro duna wene ngbaduyó yo.
5:16—Wai duhe nga mbedimbedi aKristano “aberã nga pa boro wa du pa borose” te? I abingo aboro rogo gu gene nga ga borose te, nga ka ngba na aboro mbiko kumuko yo, mbiko ngbatungayo, watadu mbiko gayó ringara te. Gupai nyakipaha bangiriyo nga, gayó pagume nga ga aKristano dagbayó na akurayó aidipase.
11:1, 16; 12:11—Ya mo Pauro agumbapa mungo fu aKorindo? Oó. Wo si adu te. Ono tie, kura aboro abiko wa gu boro nasambuo tiní asambuo na niʹiramungo mbiko gupai nadu fuko nidingisoro ko gumbaha tipa padu ko nimokedi.
12:1-4—Da “i atuka ni ku Paradiso yo”? Wa duhe nga kura boro ho Ziazia Kekeapai nagumba pani ya ní abi yuguyugupai wa gure te, na Pauro agumba gipai re fuo nyakasako padu ko nimokedi, si nawira gupai nga, ko aafura kina tipa tiko ya i adiko ku paradizo yo. Si nawira gupai nga, gu yuguyugupai gu mokedi re abihe, si angia gu paradizo nga ga toro du gu dungurati nga ga aKristano rogoho ‘ti gi digida rago’ re.—Dan. 12:1-4.
Agu Apai Rengbe Ani ka Wirikaha:
3:5. Gi veresi re nayugo gupai nga, Yekova nasa aKristano i rengbe ka mangasunge. Ko nasayo wo na Fugoko, gako ziazia toro, na gu gako riigbu du auru kpotosende. (Yo. 16:7; 2 Tim. 3:16, 17) Si naida ani naawisigo Ziazia Kekeapai wenengai na agu awaraga du mburuhe rii Ziazia Kekeapai, kini kpari kakaka tipa ziazia toro, na kini ndu kupati adunguratise dedede na kini mangi agu apai du yo.—Tam. 1:1-3; Ruka 11:10-13; Eb. 10:24, 25.
4:16. Wa duhe nga Yekova nambakada ‘gu tororani du ku vuru he yo waragoagira,’ si aidanga uru susi sa zanga ani mangi gupai rengbe ka nyakasa gaani pagume naako te.
4:17, 18. Ka ani atingida gupai nga “gaani gberãngbi du ni aakpura ha nga gu nanye ngbutuko,” si rengbe ka undo rani ani nye niruru rani fu Yekova ti regbo fudifudipai.
5:1-5. Nairiwo wai Pauro agumbapa agu aberã nga ga mbedimbedi aKristano tipa gu maabangirise du yó nani tipa ka raka ngbangbaturũ yo!
10:13. Gupai si aidaha gbe nga, ka i asianga rani ani ndu ka tungusapai rogo gu kura dagbarago du zingo abatungusipai rogoho gbe ya, si naida ani naatungusapai kina rogo gu dagbarago i asiaha tipa gaani dungurati.
13:5. Tipa ani ‘wisigi tirani singia ani rogo idapase yo,’ si naida ani wisigi sino rani singia si nandu kuti agu apai ani awirikaha rogo Ziazia Kekeapai. Tipa ‘ani asadi tirani,’ si naida ani wisigi wai du ani rogo toro yo, na wai nyaki gaani “berã nga ga makiapai” gbiati wai du gu gaani asunge nga ga idapase. (Eb. 5:14; Yak. 1:22-25) Ka ani andu kuti gu ga Pauro rugute re, si nika undo rani ani naata kindi rogo rengo yo.
[Gu kpiahe du ti kpewaraga 30]
Gine nga rogo gu fugo yo nga, “a wa oni ka niri gi kpokuta re, nimbiri he ti ngba gi inga re”?—1 Kor. 11:26