Paradizo Nika Da Barambeda!

“Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” —Mt. 6:9, 10.

Badungu aboro ini gi kparakpee re ti gu rimoho nga “Barani” watadu Ga Gbia Kpee, na si nafu maabangirise fu rikaaboro. Rogo gini gene?

A wa Ga Gbia Kpee ayugoho, ga Mbori Kindo nika manga gupai Mbori akpinyemuhe auru kpotosende a wa si amanga ngbangbaturũ yo awere. Gupai Mbori akpinyemuhe nga ka karaga paradizo kpotosende berewe kubaha. (Yugoti 21:1-5) Boro gine nzunzu nga ga Mbori Kindo, na wai si nika karaga paradizo berewe kubaha auru kpotosende ane?

Ndikidi Zogarago

Ga Mbori Kindo nga ndikidi zogarago. Tipa zogarago nimangisunge wenengai, si naida abazogo, andiko, na agu aboro si azoga yó. Ya mo ga Mbori Kindo na agi apai re behe? Oni kparianga agu akaragapai Ziazia Kekeapai afuhe tipa agi asasanahe naye re nga:

Ada nga abazogo rogo ga Mbori Kindo? (Yesaya 33:22) Yekova Mbori asia Wiriko nga Yesu Kristo tipa ko naangerakurii gu Kindo re. (Matayo 28:18) Tii gu rugapai nga ga Yekova, Yesu ima siaka aboro du namba yó niringbisiringbisihe “dagba angbatungayo, na angbatunga afugoyo, na aboro, na arikaaboro dunduko” ki sa yo ni abakindo tipa i zogorago naako “auru kpotosende.”—Yugo. 5:9, 10.

Gini ngbatunga andiko ga Mbori Kindo namoihe fu gaha azogo? Bete gu kura andiko naida gupai nga avuru gu Kindo re guari ka mangaha. Yesu ayugupa gu ndiko nyakipaha gbe dagba akuraha ho ko ayani wee: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro.”—Matayo 22:37-39.

Gu kura andiko naida na gupai nga, agu azogo nga ga gu Kindo nga ga Mbori re mbu manga gu kura apai. Nikpiapai, Ziazia Kekeapai nafura ziazia niyawee: “Ka i nángi nga roni ya; watadu airameteka, na airisikpiahe, na airabari, na azapu tiyo na akumba, na airadĩ, na akpihe, na akpibuda, na airasengahe, na agu yo naroga ga aboro ahe be yo ni aura, i adía nga kumbo ga Mbori ngbi te.”—1 AKorindo 6:9, 10.

Ada nga agu azogo du tiibe ga Mbori Kindo? Yesu aringbisi payo kuti akandoro. Ko ayaa: “Ami agía fugore agia; rimbasara adú adu sa, babanda akandoro ki du sa.” (Yoane 10:16) Tipa boro du nigu zogo du tiibe ga Mbori Kindo, si aidanga ní gumba kina gupai gbua ngawee ní napekafuo gu Wene Babanda Akandoro apeka nga Yesu te, ono, si naida ní mangi gupai amanga ko agumbaha. Ko ayaa: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.”—Matayo 7:21.

Sidu tie, avuru ga Mbori Kindo nairiso rimo Mbori nga Yekova a wa Yesu anaamangaha. (Yoane 17:26) I nairisa gu zinahe Yesu afuhe tipa i yugupai fu aboro tipa “gi wene pangbanga nga ga ngbi [“kindo,” NW] re.” (Matayo 24:14; 28:19, 20) I nayugo ndikidi nyemuse tipa akurayó a.—Yoane 13:35.

“Gbarasa agu Yo Nagbarasa Kpotosende”

Agu apai namanga rogo zegino awere, si nayugo gupai nga, ga Mbori Kindo ima mbeda tipa ka manga bakere ariapai auru kpotosende ane. Wai ini ani gipai re? Agarã susi awere wa ue kuti kusayo wa Yesu afura tipa agu akpiapai nika yugo nani nga “ga Mbori ngbi [“kindo,” NW] mbedi.” (Ruka 21:31) A wa ani nifura tipaha rogo gu papara kekeapai niye mbata fu gere, agu apai i aino apai ti ni re, si ho awere gbaiga rogo zegino dunduko.

Gini kurapai nika ye fuo gure? Yesu akaragapai niyaa: “Bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Mt. 24:21) Gere nga gu gberango naye mbiko gu mangapai nga ga aboro te. Kuba gure, Mbori du namangapai tipa ka “gbarasa agu yo nagbarasa kpotosende.” (Yugoti 11:18) Gbegberẽ aboro na agu airagbangbati ima mbeda ka gbarasa kpotosende re, Mbori “amófa yo amofa zegino.” Ono kina airarengo, namanga gupai Mbori akpinyemuhe, i nika “nye rogo ho.”—Asanza 2:21, 22.

Wene ndupai du be Yekova tipa ko mangi ngbatunga gupai re. Tipagine? Oni bingo gi kpiapai re: Oni berẽnga gupai nga oni na bambu rame ti marã beroni nga logi. Gu kura aboro naaraka rogoho, i nga wene sino aboro natumo gaoni marã atumo ti regboho na kini ngerefuo gu bambu re wenengai. Ono tie, gu kurayo nga amangi gbegberẽ apai na ngbanga sinoyo te, na i aidanga ka tumo gaoni marã te na i nagbarasapa gu kura ahe agbarasa du rogo gu bambu i araka rogoho re. Wa oni avura kaa zayo, i aidanga ka gipai ngbaroni te. Ginipai rengbe oni ka mangaha? Wa duhe nga oni nga ira gu kporo re, gene kina beroni tipa ka kusa gu gbegberẽ aboro re kusayo.

Teketeke a, wa duhe nga Yekova Mbori nga gu boro nakusi kpotosende na agu ahe dunduko du auruhe, ko na rengo beko tipa ka sia gini ngbatunga aboro ko aida i raki auru kpotosende ane. (Yugoti 4:11) Ga Yekova ringbisapai nga ko naida ka rogoda gu gbegberẽ aboro kusayo aidanga ka manga gupai ko akpinyemuhe ya na kini gbarasipa gu rengo nga ga kura aboro.—Atambuahe 37:9-11.

Karaga Paradizo Kubaha

Mbembedii kumbatayo, ga Mbori Kindo tiibe Yesu Kristo nika zogarago auru kpotosende. Yesu afura tipa gi vovopai re ya si nga “ho i ka sa ahe ni dunduko ni vovo ho.” (Matayo 19:28) Wai sino apai nikadu auru kpotosende ti gu regbo re? Ani bingo agu akidohe du rogo Ziazia Kekeapai naye re:

Atambuahe 46:9. “Ko namanga pai, vura nyasi digida kpotosende no.”

Yesaya 35:1. “Ngbakungba na gu rago ugu auga adu na ngbarago, ngbi ngume angi ki mbumba na mbumbuda ahe.”

Yesaya 65:21-23. “Gimi siasia aboro ará zezeredi tipa gbanga rago mbiko gu mangapai nga ga beyo. I amánga nga sunge gbua te, i abátika nga agude tipa tunguotunguo gbudagbuda te.”

Yoane 5:28, 29. “Ragoho nada, ho agu yo ka gia fugoko [fugo Yesu] ni dunduko du rogo amurã yo, ki kuru.”

Yugoti 21:4. “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.”

Gupai Nasa Rani Ani Idi Kuti Ni

Oni idi kuti agu akidohe nga ga Ziazia Kekeapai? Ziazia Kekeapai aima fura tipa gipai re kumbatayo ya dungu aboro nika idanga ha ya. Si ayaa: “Ti yangara arame airasawia nikaye ki nipeke agu apai boroyo akpi nyemu he, niya, ‘Wari du gu kidohe ni tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.’” (2 Petero 3:3, 4) Ono tie, runga gupai nga ga ga agu airasawia re te. Ani wisigingo apai gbua biata nga gu nasa rani ani idi kuti gupai Ziazia Kekeapai agumbaha:

(1) Mbori aima rimiso tiko mbata kurogo agu apai nga ga aboro. Gu Ime Akangbii nadu ti rago Noa nga wene kpiapai.—2 Petero 3:5-7.

(2) Fugo Mbori aima fura zukazuka tipa agu apai namanga ti gi gaani regbo re rogo zegino dunduko.

(3) Anga ahe dunduko “nanye wa si adu rago tonatona manga ahe” te. Kpotosende na agu ahe du auru re nagberã agberã susi gu nadumbata.

(4) I natungusa “wene pangbanga nga ga ngbi [kindo]” rogo zegino dunduko, si kini yugu gupai ngawee ‘digida zegino’ ima mbeda kada.—Matayo 24:14.

ADezire Yekova nayamba roni oni ye ka tona wisigo Ziazia Kekeapai naayó nga Fugo Mbori, tipa wa ka oni wiriki kura apai tipa gu maabangirise du tipa nyenye unga nga gu nikadu fu aboro dunduko tiibe ga Mbori Kindo. (Yoane 17:3) Ii, wene raka napido ngbatunga aboro kumbatayo. Gu regbo ngbaa kisusi, si ima mbeda kada! Oni adu dagba agu aboro nikadu yo?

[Gu kpiahe du ti kpewaraga 7]

Agu aboro nayawee apai nika nye a wa duhe awere re, i ima inga nikerehe

[Gu kpiahe du ti kpewaraga 8]

Oni adu dagba agu aboro nikadu yo?