Yekova Nangera Angera Fuo Gako Sosono Amoyambu

“Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko.”—EB. 6:10.

1, 2. (a) Pa bi oni nvue ri boro yo rengbe ka tingida roni naapa gine? (b) Wai Yekova abi sosono aKristano?

HO ONI naabi sosono aboro ni rogo gaoni dungurati na nvue riyo yo, ya mo oni naatingida gupai Daniere abihe rogo yuguyugupai yo? Rogo gu yuguyugupai Yekova Mbori afuhe fu Daniere, Daniere abi Yekova na nvue riko yo. Ko akepai tipaha ki yaa: “Wa mi angera, i amoi ambatabakindo gu ko nga Bakuru Ko du ho kindi, asungu ri gako basunga; gako remu avuru avura wa morõgumba, mangeriko ki du wa ndikidi mange kandoro.”—Dan. 7:9.

² Ndikidi mange kandoro nidu gbe nivuvuruhe. Sidu, nvue gbiati gu fugo nga “gu ko nga Bakuru Ko du ho kindi,” si nayugo gupai nga, tonatona Mbori aadunga ti ni te, na ko nga bakere iratatamana. Agi apai re nasa rani ani fu bakere irisa fuko. Wai Yekova nga Bakuru Ko kisusi abi gako ruru sosono amoyambu? Fugo Mbori nayawee “nvue nga kpakpari taarimo fu boro; ni nibi he be kina gu pai nga ga rurupai.” (Snz. 16:31) Ii, ho Kristano agbinza ni nvue ki kuru ri ní yo, Mbori nabi gi sosono boro re nibawene ní. Ya mo oni nabi sosono aboro wa gu Yekova abi yó?

Tipagine Kii Payo ti ni Were?

3. Tipagine kiipa sosono aidipase ti ni bangirani?

³ Agu aboro du rogo gu Riigbu Bipasunge nga ga aDezire Yekova ni agu aboro du dagba gi gbinza aboro re, agu ababiapai ninaata ata na aguyo namangihe mbata, abazakigene, gbiati sosono abatungusipa Kindo, gbiati gu sosono awirina namangasunge niruru yó rogo adungurati. Si rengbe kadu nga oni ima inopa bete aguyo naaima digo nitungusi wene pangbangaa tipa dungu agarã na gayó akpiapai ki ngarasi paranga aboro i mbakadi gayó sino raka. Gu kura sosono akuarani aidipase aima digo nimangi bakere asunge rogo dungurati na ki ima hi arungosi mbiko tungusa yó wene pangbangaa. Yekova gbiati gu riko nga ga ‘ruru kangara moyambu’ nabipa gu sunge Kindo i amangihe mbata kusayo na gu i amangaha awere na nyanyakipaha.—Mt. 24:45.

4. Tipagine si aida ti ni ani naafu irisa fu sosono aKristano na kini kpari tipa yó?

⁴ Si naida ga Yekova amoyambu naafu irisa fu gu ngbatunga sosono amoyambu nga ga Yekova yó re. Nirengo, gu ga Mbori aNdiko i afuhe fu aYisaraere kube Moize nakodapa fu irisa fu sosono aboro kuti gunde ti Yekova nga si kina sa. (Pa Mot. 19:32) Si naida ani naakpara fu Mbori dedede tipa gi ruru aboro re na kini tambua Mbori tipa gu gayó asunge i amangaha mbiko nyemuse. Gu mokedi nangia Pauro akpari tipa akurako aidipase, paranga yó na sosono a.—Oni gedi 1 ATesaroniko 1:2, 3.

5. Wai rengbe ani ka gbia undo mbiko sungo ani na agu airisi Yekova nga sosono aboro?

⁵ Kurigure, agu aboro dunduko du rogo adungurati, i rengbe arengba ka gbia undo be kodatise na agi awirina re. Mbiko gayó wisigopai, kparia apai, na inohe rogo raka yo, agi airisi Yekova re aima dungura bakere inohe nga gu rengbe ka undo rani. I aima ino wai ka hipai na wai kadu na nunga, na i nayugo agu apai i awirikihe fu agu aboro duni agude fuyó, na si kini ye na bakere ngbarago na wasa fuyó. (Tam. 71:18) Tipa roni tigaoni nga aparanga, ka oni dunga ni airamungo ya, ono oni naasana yó tipa inohe.—Snz. 20:5.

6. Wai rengbe oni ka yugu gupai fu sosono aboro nga oni nabi yó na kikii payo?

⁶ Ya mo oni nasa sosono aboro i ini gupai nga oni nabiyo abi na kikiipayo a wa Yekova abiyo? Gene sa dagba agu akuraha rengbe oni ka manga gipai re ngbaha nga ka gumbapa wai fuyó oni akpinyemuyo tipa nye yó niruruyo, na ki tambua yó tipa agu arugute i afuhe furoni. Kurigure, wa oni amanga agu apai i agumbaha furoni, oni nayugo gupai fuyó nga oni nairisa yó airisa nirengo. Dungu sosono aKristano rengbe ka tingidapa agu arugute i agbiaha be agu akurayó nadu nisosono yó fuyó wa i adihe ki mangihe na ki gbia undo behe rogo gayó raka naabaha dunduko.a

Oni Yugu Wesewese Nyemuse Rogo Mangimangipai Yo

7. Ada nga gu bambata aboro Mbori nafu gu sunge fuyó nga i ningere fuo sosono aboro?

⁷ Gu bambata aboro Mbori nafu gu sunge fuyo nga ga ngerafuo sosono aboro, i nga agumeyo. (Oni gedi 1 Timoteo 5:4, 8.) Ko na ngbarago tiko ho i angera ni fuo gayó sosono aboro kini yugu nani nga i wakina Yekova rogo ngerafuo sosono aboro. Mbori nasongoda agu aboro asongoda nangerafuo gayó aborokporo na kini fu maku fuyó tipa gi gayó mangaapai re.b

8. Tipagine si aida ti ni adungurati ngerefuo gu sosono aboro du rogoho?

⁸ Teketeke a, Yekova na ngbarago tiko ho agu aboro du rogo dungurati aundo gu sosono aboro ni du rogo zingo nga aguyo adunga agumeyo ho nga aidipase ka undoyo ya watadu agumeyo kinaho, ono i aidanga ka undoyo te. (1 Tim. 5:3, 5, 9, 10) Wa agu aboro du rogo dungurati amanga gipai re, i nayugo nani nga i na ‘nunga [sosono akurayó] tiyó, na kini kpinyemu yo.’ (1 Pet. 3:8) Pauro aima fura tipa gi sunge nga ga ngerafuo sosono aboro rogo dungurati re ho ko ayani wee ka barapa boro sa aawoka, ‘kura apani naima aima nani dunduko.’ (1 Kor. 12:26) Ho ani amangapai ni wa gure tipa sosono aboro, si nayugo gupai nga ani namanga gu bangua arugute Pauro afura tipaha ki yaa: “Oni tindi ga akuaroni tindiro atinda, si oni ka digisa ga Kristo rugute ti ni.”—Gara. 6:2.

9. Gini atindiro gbinza aye nani kurii boro?

⁹ Gini atindiro sosono aboro atindaha? Dunguyo omeyo abata niipo. Si rengbe kadu nga i nabi tiyó ya ome beyo ka manga kandara rukutu asunge te, wa gu nga nduge ka bi munganga, ke waraga ka kedaha fu boro, giriso kporo, na manga riahe. Wa duhe nga sosono aboro na gomoro gbiati gomoro ime wa paranga aboro te, i rengbe ka bihe nga si aidanga i ririahe na kini mbiri ime wa gu nzunzu si aida i naamangaha te. Kinawo duhe tipa gu riahe nga ga toro. Si rengbe kadu nga bangiri sosono aboro angeranga berewe wenengai te na tuyo agianga pai wenengai a te si kini saha fuyó nikpakarapai ka degatuyo kuti agu apai awirina agumbaha rogo dungurati. Na si fuyó a nikina kpakarapai ka mbakada tiyó tipa ka ndu kupati dunguratise yo. Ginipai tie rengbe ani ka mangaha ka undo ngbatunga gu sosono aboro re?

Gu Gene Rengbe Ani ka Fu Undo Ngbaha

10. Gine rengbe abaakumba ka mangaha tipa gu sosono aboro du rogo dungurati gbia undo?

¹⁰ Rogo dungu adungurati, awirina nangerafuo sosono aboro ngba wene gene. Agu awirina duna nyemuse tiyó naundo yó rogo nduge ka ngbeka ahe fuyó, manga riahe fuyó, na kini girisi akpuyo. I naundo sosono aboro rogo wisigopai, i mbakadi tiyó tipa adunguratise, na tipa i naatungusapai dedede. Agu aDezire nga aparanga nagasa yo ku gene gayó apai yo na kini tindi yó na atarambiri. Ka singia kura sosono aboro arengbanga ka guari kusayo kporo te, i naundo yó tipa i gi agu apai du pati dunguratise yo rogo terefuni, watadu ka dehe kurogo akasete ki ye nani fuyó. Ho rengbe abaakumba arengba ni, i nabi gupai nga mbakadapai ima duho tipa ka mangapai tipa gu zingo du ti gu sosono boro du rogo dungurati.c

11. Oni gumbapa wai wirina sa na gako aborokporo aundo sosono wirinayo.

¹¹ AKristano dunduko nibasasa rengbe arengba a ka dia aboro kugume na ki gamuhe fuyó. Ho dia kura sosono wirina akpi ni, gene aadunga beko wa ka ko aatumo marã tipa bambu kaa raka rogoho te. Ko gbiati diako awisigi Ziazia Kekeapai na kura kumba sa. Gi kumba re aduna diako gbiati awiriko ue ni adegude. Gu kumba re adu na bakere bambu beko. Ko afu avuru bambu ue fu gu sosono wirina re. Gu wirina re asungu naayó tipa agarã 15, kini rihe sa, kini momu, na kidu na nyemuse dagbayó. Agu adegude re agbia bakere undo ti ga gu sosono wirina idapase re, na ti agu apangbangaa ko anaagumbaha fuyó. Ko agbia undo a mbiko sungo ko naayó. Ko asungu naayó daho ko akpi ni garãko nada nga 89. Agu awirina re natambua Mbori kindi tipa gu badungu amaku i agbiaha mbiko sungo yó na gu sosono wirina re. I ‘ahenga dia gayó mosoro’ mbiko undoyo ga Yesu Kristo bawiriki te.—Mt. 10:42.d

12. Gini apai rengbe oni ka mangaha tipa ka yugo gupai nani nga, oni naberãpa sosono aboro aberã?

¹² Si rengbe kadu nga gene beroni wa ka oni undo sosono awirina wa gi agu awirina re amangihe te, ono oni rengbe arengba ka undoyo i ndu ku ba dunguratise yo watadu ku gene tungusapai yo. Oni rengbe arengba a ka yamba yó ku kpuroni yo, na ki di yó fuo roni ho oni ataa nduroni ni. Oni rengbe ka ndu ka biyo, gbe, ho i awoka ni watadu ho nye yó ni ku bayo. Kurigure, si naida oni naabiyo ti aregbo dunduko ni agu aboro naima nyaka. Ka si du nga sosono Kristano ho berãni atasanga tihe wa ga gude ya, si naida oni sana ní asana tipa ní fura ho oni aida ni ka manga gu diaberã nabi pani. Zavura gu sosono aboro berãyo naima sa tihe wa ga gude, i naino aino singia aboro nairisa yó watadu i airisanga yó te.

Bangiri Yekova Agonga ti Gaoni Sunge Te

13. Tipagine duhe ti ni ninyanyakipa pai ani moiberã rani tipa agu aKristano nga sosono aboro?

¹³ Berãpa sosono aboro nga nyanyakipa pai. Sosono aboro nidu nirungorungo yó kpotoyo yo ho i abi gupai ni nga i arengbanga ka manga agu apai i anaamangaha amanga ho i aduni ni aparanga te. Nikpiapai, wirina duho namangisunge wenengai fu Yekova tipa agarã wa 50 na kidu a ninazakigene, kere kaza azi ri si ki sa gupai nga ri niisota asota tipa ka ndu tipa adunguratise. Ho ri aringbisi gu sunge ni ri anaamangaha mbata na wiri gu ri amangaha awere, ri ati nikina kpee. Ri adua riri kusende ki fura niʹaume ki yaa, “Bingidipai ho mi amanga awere te.”

14. Gini apai du rogo Atambuahe rengbe ka ngarasa gu ga Yekova amoyambu nga sosono aboro?

¹⁴ Ka singia oni nga sosono boro, oni naabi tironi wa gu wirina ani nagumba pari re? Regbo ho oni naaberãha ya Yekova ima mbu roni? Si nawira gupai nga bake apapara Atambuahe aberẽ wakina gure fuo raka ko tipa dungu agarã, mbiko ko azungodi Yekova ki yaa: “Ka mo bá nga re ku sa yo ti rago gbinza mi ya; ka mo mbú nga re ho omere ka nyasa ni ya. Ako Mbori, ho mi ka gbinza ni, mangerire ki du na nvue, ka mo mbú nga re ya.” (Tam. 71:9, 18) Nirengo, Yekova aaidanga ka mbu gu babi abia tambuahe re te, na ko ambunga roni a te. Rogo kura bia berewe, Davide agumbapa gako kido kuti Mbori. (Oni gedi Atambuahe 68:19.) Si naida oni du na gu kido nga, ka oni nye niruru roni fu Yekova, ko nikadu adu na oni kindi, na kini undo roni na aʹuru dũ.

15. Ginipai rengbe ka undo sosono aboro i naaberã kina wene aberã?

¹⁵ Agu apai dunduko oni amangihe na agu oni amangaha awere tipa ka fu taarimo fu Mbori, bangiriko agonga ti ni te. Ziazia Kekeapai nayaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko.” (Eb. 6:10) Ka oni naaberãnga gupai ngawee wa oni naima gbinza, sunge tironi berewe te ya. Oni naaberã kina weneapai tipa tironi. Oni naangi mbiko agu amaku du beroni na mbiko gu maabangirise du oni nani! Ani na ‘maabangirise berani tipa gaani apai kumbatayo,’ na Bamangirani du, fuu gu maabangirise re furani. (Yere. 29:11, 12; Amo. 17:31; 1 Tim. 6:19) Oni naaberãkurii gaoni maabangirise, oni asadi tironi kadu niparanga roni ngbaduroniyo na berãroni yo, na oni naabi tironi nga nyaki paroni anyaka rogo dungurati!e

16. Tipagine sosono bakumba sa aberẽ gupai ti ni nga si naida ko zoro ti sunge bakumba, ono wai gu rondo nga ga abaakumba angarasiko?

¹⁶ Ani bingo gupai du tipa kumba nga Johan du garãko 80 nga guko nanaangerafuo diako nga Sannie na kaza, ono awere, ri arengbanga berewe kaa ta te.f Awirinarani ni adee anaasungo pati Sannie tipa Johan rengbe kaa ndu kupati adunguratise yo na ku gene sunge tungusapai yo. Ono tie, bambeda kusayo, Johan abi tiko nga omeko ima bata, ko arengbanga berewe ka mangasunge nibakumba rogo dungurati te. Aume aangbiko bangiriko yo ho ko asanahe ni ki yaa: ‘Gini wiri ndupai duho tipa mi naamangasunge kindi nibakumba rogo dungurati? Anga wiri undo ho tire rogo dungurati te.’ Akurako abaakumba arugusi gupai bangiriko nga gako inohe gbiati ruru bipai ni agu apai du yó adu na zingo tipaha. I angarasiko ko naamangasunge kindi nibakumba ka gako sunge vura du tooni vurũ. Gipai re angarasi Johan ka ko mbunga mangasunge nibakumba rogo dungurati ya si ki ye na undo fu dungurati.

Yekova Nangera Angerafuo Sosono Aboro

17. Ginipai Ziazia Kekeapai akidoho fu sosono aKristano?

¹⁷ Ziazia Kekeapai nagumbaha ziazia ya sosono aboro rengbe arengba ka ngara rogo toro yo agu akpakarapai nga ga gbinza ki vura nimangi yó vurũ. Bake apapara Atambuahe ayaa: “Agu yo rũ yo rogo ga Yekova bambu . . . i azúka ti rago gbinza yo kindi, i ahi be tomehe ki nifuna.” (Tam. 92:13, 14) Gu mokedi nangia Pauro, navura kaa mbu be kaza tiikpotoko yo, ko ‘arungburanga te; wa gu kpotoko du zegi yo aavura kaa zirã vurũ.’—Oni gedi 2 AKorindo 4:16-18.

18. Tipagine si aida ti ni ani fu undo fu sosono akuarani aidipase na fu agu agumeyo nangerafuo yó?

¹⁸ Dungu gu kpiaapai namanga ti gi gaani regbo re, si nayugo gupai ngawee sosono aboro rengbe arengba kaa ‘zúka ti rago gbinza yo.’ Ono gu kpakaraapai akaza gbiati gbinza aye nani fu sosono aboro, si nafu kina abakabangirise fuyó zavura aguyo a agumeyo angera angera fuo yó. Ome agu aboro nangerafuo sosono aboro rengbe arengba ka bata a. Pai nitadu were, dungurati kini bihe nimomu na nigu sunge si aida si mangihe ninyemuse tipa gu sosono aboro re na tipa agu agumeyo naundo yó re. (Gara. 6:10) Ka pepai nimasaku, ho ani afu ngbatunga gu undo ni re, gure nayugo gupai nga ani naya fuyó wee “ka oni dú nga na zere ya, oni mbíki.”—Yak. 2:15-17.

19. Tipagine si aida ti ni ga Yekova ruru amoyambu naabi gu raka du kumbatayo naa kido?

¹⁹ Gbinza rengbe arengba ka maa ngbanda ti agu apai sosono Kristano amangaha. Ono tie, aregbo dunduko du Yekova adu na nyemuse tipa gako ruru amoyambu. Agi amoyambu re dunduko Yekova abi yó abi na nyanyaki payo, na ko ambunga yó wagusa te. (Tam. 37:28; Yes. 46:4) Yekova nikaa songoda yó asongoda kindi ka i vura gbinza vurũ.—Tam. 48:14.

[Gu rukutu kekeapai du bandu kpewaraga yo]

Gaoni Karagapai Nga Gine?

• Tipagine oni abi sosono aKristano ti ni na kikii payo?

• Wai rengbe ani ka manga sosono kuarani idipase rogo wesewese nyemuse?

• Gine rengbe ka undo ga Yekova sosono amoyambu i duna maabangirise tipa weneapai kumbatayo?

[Gu kpiahe du ti kpewaraga 23]

Agu aboro du rogo dungurati, i nabi sosono akurayó na kikii payo