Yekova ‘Nga Batasirani’

“Yekova naunda yo, ki nibatasi yo.”—TAM. 37:40.

1, 2. Gine nayugo nani nirengo nga Yekova nafu wasa furani na kini ngarasi rani?

NZEREME naanyenga kina rogo bangisa baha te. Wa uru aandu, nzereme bambu watadu nzereme ngua, si nagbisa agbisa wa sa na uru, angianga ka nye kina kubaha ya. Ono tie, Bakusi uru na kpotosende asanga asinoko te. (Mara. 3:6) Ziazia Kekeapai naya tipa ko wee “satise ti ko” te. (Yak. 1:17) Gi bangua arugute du rogo Ziazia Kekeapai re, si nafu wasa na kini ngarasi rani, gbe, ho ani agbiatirani ni na akpakarapai gbiati fudifudiapai. Tipagine?

² A wa ani afura tipaha rogo gu papara kekepai ye mbata fu gere, Yekova ayugu gupai nga ko nga ‘batasi’ ti agu aregbo i aakeka Ziazia Kekeapai ti ni. (Tam. 70:5) Ko naasanga asinoko te, ono ko naamanga agu apai amanga ko akidohe ka mangaha; sidu, airisiko areme na wene ndupai beyo ka kido kutiko nga ko nika ‘unda yo aundo na ki batasi yo.’ (Tam. 37:40) Rogo gini gene Yekova nabatasi gako amoyambu ti gi gaani regbo re? Wai rengbe ko ka batasa rani tigaani a?

Ko Abatasi Yo be Avurayo

3. Tipagine rengbe ani ti ni kadu naa kido nga, avura ga Mbori aboro arengbanga ka rugusa yó ti tungusa wene pangbangaa te?

³ Anga arungosi ho Satana aye nani sa aDezire Yekova nika sa yó i mbu iriso kina Yekova sa te, nga gu iriso rẽ ko nani. Fugo Mbori nakido rani niyaa: “Gu ũvura i ka mbakada ha kuti ro si adía nga be ro wa sa te, gu mirã aboro dunduko nikazinga kuti ro rago sarangbanga mo akíta ngbanga ha akita.” (Yes. 54:17) Avura ga Mbori aboro aima manga asadatise ka rugusa yó ti gayó sunge tungusapai ono ka i arẽnga ya. Oni wisigingo akpiapai ue.

4, 5. Gini sogote ga Yekova aboro agbiatiyo nani rogo 1918, na gine nangia sangbanaha?

⁴ Rogo 1918, ga Yekova aboro agbiatiyo ti agu arungosi abarumbatayo rogo pambori aye nani kutiyó tipa i mbu sunge tungusapai. Rogo Merekoko ti rameru 7, abazogo azinahe i zi J. F. Rutherford, nga gu kumba naangerakurii gu sunge tungusapai awirina aamangaha rogo zegino dunduko ti gu regbo re. Gu zinahe re adu a tipa i zi kura awirina kupati Rutherford. Vuru adiwi ue, i asaringbangaa niʹirairaha kuti Rutherford gbiati abadiangbako ki moi yó ku bambukiso yo tipa dungu agarã ya i ataburõ kuti irangbii. Ya mo gure ayugu gupai ngawee avurayo aima rugusa sunge tungusapai nyeanye kindi? Wagusa te!

⁵ Oni tingidapa gu ga Yekova kidohe nga: “Gu ũvura i ka mbakada ha kuti ro si adía nga be ro wa sa te.” Tunguotunguopai amangi rogo Marungu 26, rogo 1919 adiwi nasusi rimbua fuo zio yó aRutherford gbiati abadiangbako ku bambukiso yo, i akusi yó nidamana. Rogo gu garã naye fuo gure rogo Merekoko ti rameru 5, 1920, agbia abihe nga ziree gbua aboro agumbaha kutiyó, sidu, i ki do gu ngbangaa re kusayo. Agu awirina re amangisunge na gu ranirii nadu beyo ka susa na gu sunge nga ga Kindo kumbatayo. Gine nangia sangbanaha? Nirengo, natona ti gu regbo re, dungu aboro atona ka ye kurogo rengo yo daa ku areme! Gu boro si aida i tambua rimo ní tipa gipai re nga ‘batasirani.’—1 Kor. 3:7.

6, 7. (a) Gini ngbatunga tua aboro aguari nani kuti aDezire Yekova Germani yo ti regbo gu zogarago nangia ga aNazi, na gine nangia sangbanaha? (b) Gu vovo pangbangaa du tipa aDezire Yekova, si nga dezirepai tipa gine?

⁶ Ani wisigingo ue kpiapai awere. Rogo 1934, Hitler adiberã nga ko nika nyasa riipa aDezire Yekova Germani yo. Anga kungbo serekpo aboro gbua nangiaha te. Gako abanzengere atona ka zio aDezire Yekova rogo arago yasika. I amangi fuyó gbegberẽe; na ki imi dunguyo rogo agu abataya nangia ga agu aboro i azi yo ti regbo vura. Ya mo Hitler adu na diabese ki nyasi riipa aDezire Yekova rogo gi gako tua re? Ya mo ko arugusi sunge tungusa wene pangbangaa Germani yo? Wagusa te! Ti regbo gu rungosi re, awirina anaatungusapai atungusa nigbuko. Fuo gu zogarago nangia ga aNazi tii, i asusi kumbatayo na gayó sunge tungusapai. Areme, bange abatungusipa Kindo Germani yo ima susa 165,000. Berewe a, ‘batasirani’ aima digiso gu gako kidohe ko akidoho nga: “Gu ũvura i ka mbakada ha kuti ro si adía nga be ro wa sa te.”

⁷ Gu vovo pangbangaa du tipa aDezire Yekova nafu gu gopai furani nga Yekova aidanga ha fu aboro i runosi gako aboro wa du yó nibadona te. (Tam. 116:15) Ono tie, ginipai du tipa rani wa du ani nibasasa? Wai Yekova abanda rani wa du ani nibasasa?

Ya Mo Mbori Nabanda Yó ti Kpotoyo?

8, 9. (a) Wai ani aino gupai nga, Mbori akidongo he ka banda rani ti kpotorani ti aregbo dunduko te? (b) Ginipai si aida ani inihe aino?

⁸ Gupai ini ani he nga, wa du ani nibasasa, Mbori akidongo rani nga ko nikaa banda rani abanda ti kpotorani ti aregbo dunduko te. Gaani apai wakina ga agu aEbere nadu biata nga aguyo naká ki zanga iriso gu kpiahe rogo dahabu Bakindo Nebukadenesara aduaha. Agu aparanga nanaagunde ti Mbori re adunga na gu berã nga Yekova nika banda yó abanda ngba iiriwo gene be gu mbusa si adu nga bakindo nika fuhe fuyó te. (Oni gedi Daniere 3:17, 18.) Ono tie, apai aʹariatihe Yekova ki batasi yó be we gbigiwi. (Dan. 3:21-27) Ono zavura ti agu aregbo i aakeka Ziazia Kekeapai ti ni, anga aregbo dunduko Mbori anaabanda gako amoyambu ngba iiriwo gene te. Dungu ga Yekova ruru amoyambu nakpiki mbiko i aimi yó aimo.—Eb. 11:35-37.

⁹ Ginipai namanga areme tigaha? Wa duhe nga Yekova nga ‘batasi,’ ko rengbe arengba ka batasa boro rogo kerepai. Ya mo ani rengbe ka gumbaha si kidu nirengo singia Yekova narimiso tiko kurogo kurapai watadu ko arimisongo tiko tee? Oó, ani arengbanga te. Ono wa vura duhe wo, gu boro nabati wa vunde nibati kpakpu mbia yo rengbe arengba ka yawee Yekova du nabatasi ní. Ka boro gumba gupai re, si aidanga kura aboro wa ní nani te. Ti kina gu bangisa regbo re, si naida aida ani rugu tirani na gupai nga, dungu ruru aKristano naima kpiko ti regbo arungosi a wa si adu ti rago aNazi. Gu kurayo akpiki rogo gu kura kereapai namangi. (Batu. 9:11) Ani rengbe ka sana tirani ki yaa, ‘Yekova akpa akpa ti “batasa” gu ruru aboro nakpiki ni agbaaha re?’ Si arengbanga kadu wo te.

10, 11. Tipagine boro arengbanga ti ni ka batasa tiní ya, ono ginipai rengbe Yekova ka mangaha tipaha?

¹⁰ Ani makianga gipai re: Anga boro ho ka batasi tiní bekpio te, mbiko anga boro ho “rengbe na batasa mbisimoni be tandu Baatoro kpikpi aboro” nga muro te. (Tam. 89:48) Ono tie, ginipai du tipa Yekova? Dezire Yekova sa nga guri nabati gu kere rungosi aboro aNazi anaamangaha natingida gupai nari nangia Dezire Yekova agumbaha furi ti kura regbo. Ri agumba gu fuko re furi tipa ka fu wasa furi tipa agu abadiangbayo nakpiko rogo bataya nga ga agu aboro i azi yo ti regbo vura. Ri ayaa: “Kangia kpio rengbe ka zio aboro nyeanye kindi, si ka omehe susi ga Mbori, anga wo tee?” Nirengo, gu ome nga ga kpio, si asusanga ome gu boro nga Baenge unga te! (Tam. 36:9) Agu aboro dunduko du Adisi yo watadu murã yo, Yekova naberã payo aberã na ko azingisa yó azingisa dunduko.—Ruka 20:37, 38; Yugo. 20:11-14.

¹¹ Wa du rago re, Yekova namangapai amanga tipa gu unga nga ga gako amoyambu. Ani wisigingo agene biata ko ‘abatasa’ aboro ngbaha.

Yekova Nabanda Gaani Pagume Dagbarani Naako

12, 13. Tipagine duhe ti ni nga gu bandahe nga ga toro nyakipaha kisusi, na wai Yekova afu gu undo re?

¹² Yekova nabanda rani rogo toro yo, nga gupai nyakipaha gbe. Wangia ani ndikidi aKristano, ani ima rugatirani na gupai nga hee gu du kinaho nyakipa ki susi gu gaani raka du awere. Gu gaani ũkumuko nyakipaha gbe, si nga gaani pagume na Yekova. (Tam. 25:14; 63:3) Si wo, mbiko ka ani adunga na gu pagume re ya, ani dunga na wiri maabangirise tipa raka kumbatayo te.

¹³ Ani na ngbarago tirani mbiko Yekova ima fuka agu apai dunduko si aida si du berani tipa ani banda gu pagume re dagbarani naako. Ani na Fugoko berani, gako ziazia toro, na agu adungurati nga ga awirina du rogo zegino dunduko. Wai rengbe ani ka mangasunge na agi ahe fuku ko ho furani re? Ka ani awisigo Fugoko dedede zanga manga nyomoro ti ni, si nika sa gupai nga ani nyakasi gaani idapase gbiati gaani maabangirise. (Rom. 15:4) Ka ani aakpara fu Mbori tipa gako ziazia toro, si nika undo rani ani sovura kuti aʹasada tipa ka he rimiso tirani kurogo gu sino mangaapai aboro akapa akapa kuti ni. (Ruka 11:13) Ka ani nye kuti irisa agu arugute gu riko nga ga ruru kangara moyambu afuhe rogo agu abuku du mburuhe rii Ziazia Kekeapai kodihe na gu, gu riko re afuhe ti regbo adunguratise, na ti regbo kikindigi adunguratise, si nika sa gupai nga ani naagbia gu rigo nga ga toro “ti ragoho.” (Mt. 24:45) Ngbatunga agu ahe re nabanda rani rogo toro yo na kini undo rani ani nye mbembedii na Mbori.—Yak. 4:8.

14. Oni gumbanga gu pangbangaa nanyakasapa gu bandahe du rogo toro yo.

¹⁴ Ani dinga kpiapai sa nayugo gupai nga Yekova nabanda rani rogo toro yo. Gu kpiapai re, si tipa agu avunguagude ani afura tipa yó rogo gu papara kekeapai ye mbata fu gere. Bete aregbo tingbafuo gu regbo i agi gupai nga wiriyo nangia Theresa ri ingi, gu pangbangaa naye fuyó nga i aima imo ri.a Bari nayaa: “Mi aima kpara fu Yekova ko banda ri. Si naida mi kusi gupai mi aaokaha aoka mbata nga, mi abaki bangire tipa ndu gupai Yekova aakaraganga pai ti ni kuti gimi kpee ya fuo gia mi gupai nga i aima imo ri. Rengo ngaha nga, mi ima ino gupai nga Yekova akidongo rani nga ko nika banda rani wa du ani nibasasa ngba iiriwo gene te. Mi aakpara fuko kindi tipa ko ziasi apai bangire. Gupai fu wasa fere nga pa ruga mi tire na gupai nga, Yekova nabanda gako aboro rogo toro yo, ngawee ko nafuka agu ahe ani aidaha tipa ani banda gaani pagume nani dagbarani naako. Ngbatunga gu bandahe re nyakipaha gbe bambiko si rengbe ka ye na nyenye unga furani. Ka ani bihe were, Yekova aima banda Theresa; ri aamangasunge fuko niruru ri ti gu regbo ri akpi. Mi na ngbarago tire mbikopa gari raka kumbatayo, si ku vuru beko.”

Ko Abanda Yó na Akaza

15. Rogo gini agene rengbe Yekova ka undo rani ho kaza nazi rani ni?

¹⁵ Yekova rengbe arengba ka banda rani ‘auru gaani abarame’ a wa ko amangihe na Davide. (Tam. 41:3) Wa vura duhe nga, Yekova abandanga aboro ngba iiriwo gene ti gi gaani regbo re te, ko naundo rani aundo. Wai ko amangaha? Gu bangua arugute du rogo Fugoko, si rengbe arengba ka undo rani ani mangi agu adiaberã duna tatamana nibipa sunge husa kaza na gu kura apai. (Snz. 2:6) Rogo Ngbaõbambu Sinziri na Awake!, ani rengbe ka gbia agu apai yo nafura tipa gu kaza nafuda rani nga gu rengbe ka undo rani. Mbiko ga Yekova ziazia toro, ko rengbe ka fu “gu bakere tandu susi” furani tipa ani hi gupai nafuda rani na ki kakuti ruru mangapai apai ki vura nimangi rani wai vurũ. (2 Kor. 4:7) Fuo gbia ani ngbatunga gu undo re, si nika undo rani ka ani moinga berãrani dũ fuo kina gaani kaza kisusi gaani pagume na Yekova ya.

16. Wai wirina sa asovura na diabese kuti gako kaza?

¹⁶ Ani bingo gupai nadu tipa gu paranga ani nifura tipa ko rogo gu papara kekepai ye mbata fu gere. Rogo gu garã nangia 1998, i abi kere kaza tiko nga gu nasa kpotoko si yosora naabaha dunduko.b Ginipai ko amangihe ka sovura na diabese kuti gi gako kaza re? Ko nayaa: “Aregbo kinaho mi nidu rogo kere ima na omere ki bati mi ki bihe nga kina kpio nika ye na zereda fere. Ho mi abihe ni nga ome kaza ima fu rii ome re, mi fu kpee fu Yekova tipa ko fu ahe fere biata: nga zereda kpotoreyo, zerangbaduse, na hipai. Mi bi gupai nga Yekova ima karagapai sa agu akpee re. Zereda kpotoreyo nasa re mi naaberãkurii agu apai nafu wasa, wa pa raka rogo vovo zegino, yo mi nikaa ta ni, kini ri wene ariahe, na kini ta na gimi aborokporo berewe. Zerangbaduse naundo re mi hi agu apai pa yosora boro aye nani funi. Hipai naundo re mi nye niruru re ka mi amaanga kina pa gimi kaza ku berã re yo susi pa gimi pagume na Yekova ya. Gupai du tipa re, si teketeke wakinagu nadu tipa gu bake apapara Atambuahe nangia Davide, mbiko mi bihe nga Yekova aima banda re rii gimi barame.”—Yes. 35:5, 6.

Ko Afuku Ahe Fuyó

17. Gine Yekova nakido rani ka fuhe furani, na rogo gi kidohe yo re nga gine?

¹⁷ Yekova ima kidohe ka ngerafuo rani na aũzegino. (Oni gedi Matayo 6:33, 34 na AEbere 13:5, 6.) Gure ayugongo gupai nga ani sungu asungo ki zanga mangasunge tipa ka gbia agu ahe si aida si du berani te watadu ka sungo ya si nika ye nimomu te. (2 Tesa. 3:10) Gupai gu kidohe re ayugoho nga: Ka ani aagbata ga Mbori Kindo mbata rogo gaani raka, na kini mangisunge tipa ka gbia ahe, ani rengbe ka kido kube Yekova nga ko afuka agu ahe afuka furani nasongoda unga. (1 Tesa. 4:11, 12; 1 Tim. 5:8) Ko rengbe arengba ka fuka ahe furani tipa gaani azingo ngba gu gene ani aberãnga paha ya, isoke vuru be wirina watadu ní nafu sunge furani.

18. Oni gumbanga gu pangbangaa nayugo gupai nga, Mbori rengbe arengba ka fu ahe furani ti gu regbo du ani rogo zingo.

¹⁸ Ani tingidinga pa gu naagude adunga kumba beri ya ani nigumba pari rogo tonatona afugo rogo gu papara kekeapai ye mbata fu gere. Ho ri gbiati wiiri nga degude aga ni kurogo kura ba, si adu furi nikpakarapai ka gbia sunge-marã. Ri nayaa: “Mi anaandu tipa sunge tungusapai wiso, na kini gbata sunge-marã fuo susa bebere uru. Mi natingidapa gu uru mi andu kurogo bambu baga riahe tipa ka ngbe rebende. Mi aru kini ngana akpepasio, ono ka marã adunga bere ka mi ngbehe nani ya. Rago agberanga tire mbata wa si agbere tire ti gu regbo re te. Fuo mi karagatire ku kporo yo rogo gu uru re, mi abi gupai nga tii gimi mbaraza gii bambu yo ahi be asuari nga ga angbatunga akpepasio dunduko. Gu riahe re aundo rani tipa dungu adiwi. Mi akpari be ngbarago na ki tambua Yekova.” Gi wirinarani re agi gupai nga wirina du naye na agu asuari riahe re furi rogo gako ati. Ri ake waraga kusa fuko ki yaa: “Wa mi avura tambua ro bakere gbe rogo gu uru re, mi atambua Yekova a mbiko gu weneringise mo ayuguhe fere, si nasa re mi tingidipa gako nyemuse.”—Snz. 19:17.

19. Ti regbo bakere gberãngbii, gini kido ga Yekova amoyambu nikadu nani, na ginipai si aida ani diberã ka mangaha awere?

¹⁹ Si tie ziazia nga, agu apai Yekova amangihe ti agu aregbo i aakeka Ziazia Kekeapai ti ni na ti gi gaani regbo re a, si nafu ndupai furani ani kido kutiko nga ko rengbe arengba ka undo rani. Mbembedii kumbatayo ho bakere gberãngbii nika tona ni rogo ga Satana zegino, gu regbo re du, ani ka ida undo be Yekova susi gu nidumbata. Ga Yekova amoyambu adu naa kido kutiko rogo apai dunduko. I atumba riyo kidu na ngbarago mbiko regbo batasa yó ima mbeda. (Ruka 21:28) Wa du rago re, ka kina gini kereapai vura ye sa rani, si naida ani diberã kaa kido kina kuti Yekova, mbiko ani ini gupai nga ko asanga asinoko te, ko kindi nga ‘batasirani.’

[Gu rukutu kekeapai du bandu kpewaraga yo]

Oni Natingidaha?

• Wai rengbe Yekova ka batasa agu aboro nakpiki agbaakpio?

• Tipagine duhe ti ni nga gu bandahe nga ga toro, si nyakipaha kisusi?

• Gine gu ga Yekova kidohe du tipa ngerafuo rani na aũzegino ayugoho?

[Gu kpiahe du ti kpewaraga 14]

Fuo zio yó aRutherford gbiati abadiangbako rogo 1918, i ado gu ngbangaa kusayo i akehe kuti rimoyo na ki kusi yó kusayo bambukiso yo

[Gu kpiahe du ti kpewaraga 16]

Yekova rengbe arengba ka undo rani auru ‘gaani barame’