Da Rengbe ka Ino agu Apai Du Kumbatayo?

“Mi nga Mbori, . . . . nataki pande pa digidapai ti tonatona rago na pa agu ahe ata manga nga ya bakuru yo.”—Yesaya 46:9, 10.

ROGO gi zegino du apai rogoho nikina irairaha re, aboro nawisigo gu apai namangi bakuru kusayo na gu namanga awere tipa ka ino agu nika manga kumbatayo. Aguyo naida ka ino wai gayó raka nikadu kumbatayo, na si nasayo i ndu ka sana amangi sangbaatoro tipa i karagapai fuyó. Aguyo nasoroka na akerekuru. Wenepai ho i naagbiaha nisangbana gipai re te. Ya mo si nigasigasipai tipa ka ino gupai nika manga kumbatayo tipa gi zegino re, gu nika manga tipa gaani aborokporo, na gu nika manga tipa rani nitirani? Ya mo boro rengbe ka ino gupai nzunzu du kumbatayo?

Rogo gu veresi du nikekehe kuari re, gu Mbori Duna Tanduapai Dũ nga Yekova afura tipa tiko fu Yesaya ki yawee ko nga gu boro rengbe ka ino agu apai du kumbatayo. Mbori aima gumbapa zaka agu aYisaraere nadu nizizi yó Babera yo naapa karagayo tiyó ku Yerusarema yo na ki dua yekaru berewe kubaha. Ko agumba gipai re kungba gu nebi nangia Yesaya. Wai ko aringbisipa agu apai si adu nga si nika manga? Yesaya aima yamba rimo gu boro nika ye ka zio Babera nga Kurese mbu agarã koyo wa 200. Kurigure, Yesaya aima gumba gupai Kurese nika mangaha tipa ka zio gu bakporo re, nga ka aria gu di nga Ferata si nifu kurogo gu kura rago kia, bambiko si nanaabanda gu bakporo re. Ko aima fura a tipa Kurese ya ko nika gbia angbadimo ngapa gu bakporo re nizakizakihe, wa ka si du fuko taata tipa ko rimi ka zio gu bakporo re.—Yesaya 44:24–45:7.

Ka ani ringbisi aboro na Mbori, gene beyo tipa i ini agu apai nika manga kumbatayo te. Gu tatamanatatamana Bakindo nangia Soromo akepai ki yaa: “Ka mo ábia nga tiro tipa gba ya, bambiko mo aina nga gu nikadu gba te.” (Asanza 27:1) Gupai ko agumbaha re nga kina rengo. Boro ho rengbe ka ino gupai nika manga tipa ní kumbatayo te. Gine nasa Mbori ko du kia ti aboro? Ko ima ino gu futufutuapai du tipa agu ahe dunduko ko akusihe, kodihe na gu mangapai nga ga aboro. Ka Mbori aida ka ino gupai boro nika mangaha kumbatayo watadu dungu aboro, ko rengbe arengba ka inoho ziazia kina wai si nika manga. Kurigure, ko na gene beko tipa ka manga kina gupai ko aida si mangi. Ho ko agumba agu apai ni rogo gako anebi nga gu nika manga, ko “nanyakasa gu fugo nga ga gako amoyambu [si dati rengo], ki nimangi gu rugapai nga ga gako abamokedi.” (Yesaya 44:26) Kina Yekova sa nirengo rengbe ka gumba gupai du kumbatayo.

Yesaya araki bakuru kusayo agarã susi 700 mbata fu i batika Yesu nga Masiya. Wa si avura duwo, ko aima gumba sangbanebi tipa paye Masiya. Ono tie, tona rogo 18 kama agarã ka ndu kumbatayo, agu aboro nawisigopai sirisiri tipa ka ino rengo apai atona bisira sangba gu kitabu nga ga Yesaya ya runga ha te. I nagumba gupai nga, gu sangbanebi nga ga Yesaya, anga i akehe mbata fu manga agu apai si afura tipaha te, ono kura boro kia nake agu apai re si naima manga. Ya mo ru fugoyo aru nzunzu? Rogo gu garã nangia 1947, aboro akoto bara gu kitabu nga ga Yesaya na gu kura akitabu nadumbata siimbia yo mbembedii na Baime Tikpo. Agu aboro ninaageteka ahe sendeyo gbiati gu kura bawene abawirikipai, i agumba gupai ngawee, gu kitabu re aima raka wa agarã 100 mbata fu i batika gu Masiya i agumba pako. Nirengo, Ziazia Kekeapai aima gumba gupai nika manga kumbatayo!

Yesaya gbiati gu kura abakeke Ziazia Kekeapai aarengbanga ka gumba kungbo sangbariyo yo nibi agu apai nika manga kumbatayo te. Ono i “agumba pai be Mbori, wa Ziazia Toro arugu yo.” (2 Petero 1:21) Rogo gu papara kekeapai naye fuo gere, ani nika fura yo sirisiri tipa gu raka nga ga Yesu Mbori aima gumbapaha rogo Yesaya yo. Fuani, ani nika wisigo agu apai Yesu na gako abawiriki afura tipaha tipa gi gaani regbo re na tipa kumbatayo.