I Agumbapa Masiya

AYUDA aima digo nisungudi Masiya bambiko i aima ino agu apai Yesaya gbiati gu kura anebi akehe tipa ko. Ti gu regbo i avungu Yesu, badungu aYuda ‘aangera’ tipa Masiya bambiko i aini gupai nga ko ima mbeda ka ye. (Ruka 3:15) Agu asangbaanebi nga ga Ziazia Kekeapai aima fura a tipa ga Masiya raka sirisiri dunduko. Boro ho narengbe ka gumbapai wa gure nitiní te, watadu ka ringbisa agu apai i agumbaha dunduko tipa si mangi ti rago Yesu te.

Agu Apai Namangi Tipa Batika Yesu. Yesaya ape gupai nga ngasudee nika vunga Masiya, watadu Kristo. Fuo gu mokedi nangia Matayo keke gu iiriwoapai namangi tipa batika Yesu, ko ayaa: “Were agi apai ki mangi dunduko re, gu pai ki da ti rengo Gbia agumba ha ku ngba nebi, niya, ‘Oni ngére, ngasu de nikadu na gude, ki batika wiriri.’” (Matayo 1:22, 23; Yesaya 7:14) Yesaya ape gupai a nga Kristo nikangia ngbatunga Davide, na ki yambu kina boro rimo Yisai nangia ba Davide. Gupai re amangi a wa ko agumbaha. (Matayo 1:6, 16; Ruka 3:23, 31, 32) Sidu, mbata fu i batika Yesu, gu maraika nga Gaburere aya fu Maria nangia na Yesu wee: ‘Gbia Mbori amáa ko ni bakindo a wa titako adu nangia [Davide].’ —Ruka 1:32, 33; Yesaya 11:1-5, 10; ARomo 15:12.

Pa Ga Masiya Raka. Yesu agedi ga Yesaya sangbanebi bambutiria yo Nazareta yo. Papara gupai ko agedihe nayaa: “Ga Gbia Toro ti re, bambiko ko auka nzeme ku ri re mi tungusi wene pangbanga fu rungorungo aboro.” Ko ape gupai fu aboro nga, gu sangbanebi re adu tipa ko. Ko ayaa: “Areme da gi Ziazia Kekeapai re ti rengo.” (Ruka 4:17-21; Yesaya 61:1, 2) Yesaya afura a tipa wai Yesu nika husa aboro niumbasitise. Matayo akepai ki yaa: “Dungu aboro ki nipeke ko, ko ki husi yo dunduko, ko ki rugu yo ya ka i gumba nga pa ko ya, gu pai du ni digisidigisi he i agumba ha ku ngba Yesaya nga nebi, naya, . . . ‘Ko ati nga kangu na aboro te, ko apaa nga ku ari te; . . . ko akita nga kamakama nganzi te.’”—Matayo 8:16, 17; 12:10-21; Yesaya 42:1-4; 53:4, 5.

Pa Ga Masiya Arungosi. Yesaya ape gupai nga, badungu aboro nikaa idanga na Masiya ringara Yisaraere yo ya, ono ko nikadu wa “mbia kota” fuyó. (1 Petero 2:6-8; Yesaya 8:14, 15) Na nirengo, Yesu avura manga dungu iiriwoapai “ka i aida nga pa ko ya. Gu pai nga ga Yesaya nga nebi si da ti rengo, wa ko agumba ha ya, ‘Gbia, da idi pa gu pai i agia ngbarani?’” (Yoane 12:37, 38; Yesaya 53:1) Gu kurapai berewe nasa gupai nga ka aYuda idinga pako ya angia wee, gupai i aaberãha nga Masiya nika ye ki di gu zogarago kusayo nga ga aRomo nibasa na ki sigira gu Kindo nga ga Davide. Ono wa Yesu aye ki rungo na ki kpi, si asa badungu aYuda ka i idinga kuti gupai nga ko angia Masiya ya. Ono tie, Yesaya aima pe gupai nga, Masiya nika rungo arungo mbata fu ko da nibakindo.

Rogo ga Yesaya sangbanebi, Masiya aya tipa tiko wee: “Mi asa giire yo fu abataki re, . . . mi aoka nga kpakpure be zee na suka sure te.” Matayo agumba gupai namangi ho i aasarangbangaa Yesu ni ki yaa: “I ki nisukudi kpakpuko nituturã ko. Akura yo ki nita ko ni kpabeyo.” (Yesaya 50:6; Matayo 26:67) Yesaya ayaa: “I arungosi ko, i aumbasi pa ko, ka ko aza nga ngbako ya.” Kinawo si amangi nirengo. Pirato asana Yesu “ka ko akaraga nga pai fu ko wa sa a ya: wa si adu were si airiwo airiwo ti bazogo gbe.”—Yesaya 53:7; Matayo 27:12-14; Amokedi 8:28, 32-35.

Pakpio Masiya. Ga Yesaya sangbanebi aaringbisa tihe kindi ti regbo kpio Yesu na tingbafuoho a. Yesaya ayaa: “I akodi murãko na ga gbegberẽ aboro, rago kpioko ko adu na airakumuko.” (Yesaya 53:9) Wai gi sangbanebi re ada ti rengo? I kenge Yesu kuti ngua na airadii ue i ki kpiki. (Matayo 27:38) Fuo kpi Yesu, gu kumukokumuko boro Arimataya nangia Yosefa adi kangba ko ki kpisidihe rogo gako vovo murã. (Matayo 27:57-60) Niyangaraha tie, kpio Yesu adigisi nyanyakipa pai sa du rogo ga Yesaya sangbanebi. Yesaya afura tipa Masiya ki yaa: “Gi ruru moyambu adía pai ri dungu aboro mbiko gako inahe; ko aáka gayo irairaapai dũ.” Nirengo, kpio Yesu afu gu tumorii si aaidaha tipa ka dia ingaapai kusayo rii aboro.—Yesaya 53:8, 11; ARomo 4:25.

Agu Asangbaanebi Nada ti Rengo

Amokedi gbiati Yesu nitiko arogodi dungu apai gbe rogo ga Yesaya sangbanebi ki gumbaha tipa ka yugo gu boro nangia Masiya. Ono tie, anga kina gu kitabu nga ga Yesaya sa nafura tipa agu apai nika manga kumbatayo te. Badungu agu akitabu a du rogo Kuru Ndika nagumba apai kumbatayo tipa Yesu, tipa gako Kindo, na tipa gu weneapai gu gako Kindo re nika mangaha.a (Amokedi 28:23; Yugoti 19:10) Wai si adu nga agu asangbaanebi re duwa ka si da ti rengo? Yesu aya fu aboro wee: “Ka oni bérẽ nga ha ya mi aye ka gbarasa rugute ya na anebi a ya; mi aye nga ka gbarasa apai te [nga agu apai du rogo Kuru Ndika], mi aye ka digisa ha. Ya mi fu roni ni rengo, Daho ngbangbaturũ ka nyasa ni, na kpotosende, wiri toni he akpára nga ti rugute wa sa te, daho i ka digisa apai ni dunduko.”—Matayo 5:17, 18.

Yesu afura a tipa agu asangbaanebi si adu nga si nika ringbisa tihe mbata fu kpioko na fuo kpioko. (Daniere 9:27; Matayo 15:7-9; 24:15) Kurigure, Yesu na gako abawiriki afura tipa agu apai si adu nga si nika manga tingbafuo kpioyo, kodihe na agu namanga ti gi gaani regbo re. Gu papara kekeapai naye fuo gere, si nika fura tipa agu apai i agumbaha, na gu kura asangbanebi du rogo Ziazia Kekeapai.

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

“Ngasu de nikadu na gude, ki batika wiriri”

[Gu kpiahe du ti kpewaraga 5]

“Mi aoka nga kpakpure be zee na suka sure te”