Oni Yugupai fu Awironi Ya Mo Mo Naakpi Akuaro Wagu Awiriba Yosefa Adu?

ANI furanga tipa kpihe. Ya mo mo abingo tiro mo nisogo boro mbiko gupai nga kura aboro nayawee ní nga wene boro, ní nibawene ní, watadu ní navoda tiní wenengai?a— Ka si du nga pai naamanga amanga wa gure, gure nga mo nakpi gu boro re akpi.

Ka si du nga avunguagude nakpinyemu kina kura gude sa kisusi akurai, agu akurai re rengbe kaa kpi ru akpi. Ziazia Kekeapai nafura tipa agu aboro kpihe adu kpuyo, na si ki ye na kerepai. Ani bingo gu kerepai si aye nani, na ki wisigingo gupai rengbe gupai namangi re ka yugoho furani.

Kumba adu yo rimoko angia Yakobo. Awiriko adu 12. Gu wiriko nangia namba 11, rimoko angia Yosefa. Awiriba Yosefa anaakpiko akpi. Mo ini gupai i anaakpiko ti ni?— I anaakpiko mbiko gupai nga, bayo nangia Yakobo anaakpinyemu ko susi wai ko anaakpinyemu yó. Bayo ambakadi bawene rokoo a na azehe ti ni fu Yosefa. Yakobo anaakpinyemu Yosefa gbe “bambiko ko adu ni gako wiri gbinza,” na ko angia bambata wiri Raere. Raere nangia gu diako ko akpinyemu ri gbe.

Ho ‘awiriba Yosefa abihe ni ya bayo nakpinyemu ko ki susi yó dunduko, i kini sogo Yosefa asoga.’ Rogo kura uru sa, Yosefa aya fu abako na awiribako wee, ko rari mosumo i dunduko nitumuso fuko, zavura bako a. Si atadu were, “awiribako ki nikpi ko akpi,” na bako ki zako a ti gumba ngbatungapai wa gure.—Bambata Pai 37:1-11.

Ti kura regbo sa, ho garã Yosefa aduni 17, awiribako amere tuturũu ka riga akandoro na ameme. Sidu, Yakobo ki kedi Yosefa koyo ko ndu ka inopai tipa yó. Ya mo mo ini gupai badunguyo aidi ka mangaha ho i abi Yosefa ni ko niye fuoyo?— I aidi ka imoko! Ono awiribako ue aaidanga i imiko te, nangia Rubena na Yuda.

Ho i abi ababagiahe ni i nindu ku Ezipeta yo, Yuda aya fu awiribako wee: ‘Ani bagi ko fuyó.’ Awiribako aidihe ka i aimongo ko ya, ono ki bagi kina bagibagi ko. I aimi meme ki zogo ga Yosefa rokoo kurogo kureru. Wa i aga ki yugu gu rokoo re fu bayo, ko azo wowo ki yaa: “Kere nya riti ko.”—Bambata Pai 37:12-36.

Fuo raka Yosefa Ezipeta yo tipa bete regbo, Faro nangia bazogo Ezipeta atona ka kpinyemuko gbe. Gipai re amangi mbiko gupai nga, Mbori aundo Yosefa ko kusi sangba amosumo ue Faro ararihe. Bambata mosumo adu tipa anaabagara saba naadunga na kaza tira ya, na agura saba nadu na kaza tira kidu ningorokonyangorokonya ra. Gu ue mosumo adu tipa wene zarazara nganu saba na gbegberẽ zarazara nganu saba a. Yosefa ayawee sangba agu amosumo ue re dunduko nga, garã ida riahe nikadu saba, garã gberãngbii kidu a saba. Faro amoi Yosefa ko ningere kuriipa dungura riahe rogo agu agarã ida riahe re na ki igihe tipa agu agarã nikangia ga gberãngbii.

Ho gberãngbii ayeni nga ga gomoro, agume Yosefa naaraka tuturũu aduna bakere zingo riahe. Yakobo akedi awiriko bawe nangia aunvuru i ndu ku Ezipeta yo ka ngbe riahe. I andu ki bi Yosefa, ono ka i ainongo ko ya. Mbata fu Yosefa yugu tiko fuyó, ko aʹasadi yó na ki bi gupai nga, i aduna bakere gberarago mbiko gupai i amangiko nani nga ka baga ko re. Fuoho, Yosefa ki yugu tiko fuyó. Nairiwo gu ngbarago i adu nani ka bi tiyó berewe!—Bambata Pai, tona ti kapita 40 ki dati digido kapita 45.

Ginipai rengbe mo ka wirikaha tipa kpihe rogo gi pangbangaa re?— Kpihe rengbe ka ye na kerepai, na si rengbe arengba a ka sa boro ní idi ka manga kina boro wirinani gbegberẽe! Ani gedinga Amokedi 5:17, 18 na Amokedi 7:54-59 ka bingo gupai kpihe asa aboro i mangi ga Yesu abawiriki nani.— Wa ani nagedi gipai re, ya mo mo bi gupai si aidanga ti ni ani naakpi akuarani ya?—

Yosefa araki tipa agarã 110 ko ki kpi. Ko abatika agude, awiriko ki batika, na atitako ki batika agude a mbata fu kpiko. Si nirengo nga, Yosefa aima ruga agu agude re i nikpinyemu tiyó dagbayó, na ka i naakpingo akurayó ya.—Bambata Pai 50:22, 23, 26.

[Gu rukutu kekeapai du bandu kpewaraga yo]

[Gu kpiahe du ti kpewaraga 15]

Asanahe:

❍ Gine nga kpihe?

❍ Gine kpihe asa awiriba Yosefa i mangi ko nani?

❍ Tipagine Yosefa ambupai ti ni fu awiribako?

❍ Ginipai rengbe ani ka wirikaha be gi pangbangaa re?