Oni Du Nga Bambata Aboro Rogo Yugo Irisa
“Oni du nga bambata aboro rogo yugo irisa fu aboro.”—ROM. 12:10, NW.
1. Ginipai aboro amanganga ha berewe rogo dungu apapara zegino ya?
ROGO kura apapara zegino, si nga pa irisa rukutu agude kuku barabangiri sosono aboro. I natamangaha were, ka bagizo yó agbanga rii sosono aboro ya. Rogo gu dagbarago agude ayugo gi ngbatunga irisa re rogoho, anga irisa ngaha gude sa giini fu sosono boro te. Pa yugo aboro irisa wa gure natingida rani naapa ga Moize aNdiko. Gi Ndiko re adu na gu zinahe rogoho nga: “Oni arú ku ari bara bangiri gbinza aboro, ki niirisi kuru aboro.” (Pa Mot. 19:32) Si nafu kina gberarago nga, rogo dungu aba, aboro afunga irisa berewe fu akurayó te. Nirengo, payasipa aboro moipai rogo agi aʹuru re.
2. Ada Mbori aya ani fu irisa fuyó?
2 Fugo Mbori nanyakasa gupai nga aboro naafu irisa fu akurayó. Si naya furani wee ani fu irisa fu Yekova na fu Yesu. (Yo. 5:23) Si nazinahe furani a ani fu irisa fu gaani aborokporo na fu akuarani aidipase na fu agu aboro adunga na ani rogo idapase ya. (Rom. 12:10; Ef. 6:1, 2; 1 Pet. 2:17) Gine nga bete agu agene ani ayugu gupai ngbaha nga ani nafu irisa fu Yekova? Wai ani ayugo irisa fu akuarani aKristano? Ani wisiginga gi sanahe re na agu akuraha du waha.
Oni Fu Irisa fu Yekova
3. Gine nga nyanyakipa gene ka fu irisa fu Yekova ngbaha?
3 Nyanyakipa gene dagba akuraha ani afu irisa ngbaha fu Yekova nga kadu na irisa tipa rimoko. Nirengo, ani nga agu ‘aboro duna rimoko rirani.’ (Amo. 15:14) Si nirengo nga pa irisa ani du na rimo Yekova rirani, nga gu Mbori duna tanduapai dũ. Gu nebi nangia Mika ayaa: “Aboro dunduko ata ni ba sa sa na rimo gayo mbori, ono ani atá na rimo Yekova gaani Mbori nye anye kindi.” (Mika 4:5) Ani ‘natá na rimo Yekova’ nimanga ani nyanyaki asadatise kaa raka rogo aʹuru dunduko ngba gu gene ayenga na gbarasarimo kuti gu rimo du rirani re ya. A wa Pauro atingidi agu aKristano nadu Roma yo, ka ani arakanga ringbisihe kuti gu wene pangbangaa ani atungusaha ya, aboro ‘gbarasi rimo Mbori agbarasa.’—Rom. 2:21-24.
4. Wai oni abi gu momu nga ga manga dezirepai tipa Yekova?
4 Ani nafu irisa fu Yekova a nimanga ani dezirepai fu aboro. Bakuru kusayo, Yekova ayambu gu rikaaboro nangia aYisaraere i ye kadu nigako aDezire, ono i aidanga nani te. (Yes. 43:1-12) Wo i anaasamungu kuti Yekova “ki nizingisi ga Yisaraere Ziazia Ko.” (Tam. 78:40, 41) Yekova agindigo gu rikaaboro re niyangaraha. Ono tie, tipa rani tigaani areme, ani na tambuahe tipa gu momu du berani ka manga dezirepai tipa Yekova na ka yugo rimoko fu aboro. Ani namanga gupai re mbiko ani na nyemu Yekova tirani na kini idi rimoko du ziazia. Wa ani naima ino gu rengo du tipa Barani du ngbangbaturũ yo na tipa gako ringbisapai, wai rengbe ani ka mbu tungusapai tipa ko? Ani naberã wakinagu gu mokedi nangia Pauro aberẽ ho ko ayani wee: “I moi dingisaro ti re; bambiko rungo du fere ka mi atungusa nga wene pangbanga ya.”—1 Kor. 9:16.
5. Wai duhe nga kido kuti Yekova gbiati fu irisa fuko nandu kina sa?
5 Gu bake apapara Atambuahe nangia Davide ayaa: “Agu yo ini pa rimoro i nakida kuti ro, Ako Yekova, bambiko mo nambu nga agu yo nagbata ro te.” (Tam. 9:10) Kangia ani ima ino Yekova nirengo na kini bi rimoko na irisa, ani kido akido kutiko wagu gu gako ruru amoyambu nadumbata amangihe. Ka ani du na gi kido gbiati idapase re kuti Yekova, si nga gu kura gene ani afu irisa fuko ngbaha. Oni bingo wai Fugo Mbori ayugo gupai nga kido kutiko gbiati fu irisa fuko, si nandu kina sa. Ho agu aYisaraere nadumbata aafunga irisa ni fu Yekova ya, ko asana Moize ki yaa: ‘Rago adu wai agi aboro re kini payasi re? Rago adu wai ka i aidanga pare ya, zavura gu yuguyuguapai mangi mi ku dagbayo yo vurũ?’ (Geda 14:11) Ho ani akido ni kuti Yekova tipa ko banda rani na ki songodi rani ti regbo fudifudiapai, gure nga ani nafu irisa fuko.
6. Gine nafõngbaduraniyo ani fu irisa fu Yekova?
6 Yesu ayawee si naida pa fu irisa fu Yekova ye ngbadu boro yo. Wa Yesu aafura tipa agu aboro gayó irisombori adunga nzunzu ya, ko agumba gu fugo Yekova agumbaha nayaa: “Agi aboro re i nairisa re kina auru ngbayo; ono kpotoyo yo ti re tuturũ.” (Mt. 15:8) Nyemu Yekova nafõngbadu boro yo ní fu irisa fuko. (1 Yo. 5:3) Ani namaa gupai amaa a ku berã rani yo Yekova akido rani nani kini yaa: “Agu yo nairisa re mi aírisa yo [aírisa] a.”—1 Sam. 2:30.
Agu Aboro Nangbembatayo Rogo Apai, I Nafu Irisa fu Akurayo
7. (a) Tipagine si aida gupai ti ni nga agu awirina nangerakurii asunge naafu irisa fu agu aboro du kutii beyo? (b) Wai Pauro anaafu irisa fu akurako aidipase?
7 Gu mokedi nangia Pauro azungodi akurako aidipase ki yaa: “Oni du nga bambata aboro rogo yugo irisa fu aboro.” (Rom. 12:10, NW) Agu awirina du rogo gu ba nga ga ngerakurii apai rogo dungurati, i si aida i moi kpiapai rogo ‘yugo irisa’ fu agu aboro du tiibeyo. Nibi gupai re, si naida gupai ngawee agu aboro nangerakurii asunge i naamanga agu apai Pauro amoi kpiaha. (Oni gedi 1 ATesaroniko 2:7, 8.) Agu awirina nadu rogo agu adungurati Pauro andu kurogoho aima ino gupai ngawee ko aarengbanga ka sana yó i mangi gupai ko aaidanga ka mangaha ya te. Pauro anaafu irisa fu akurako aidipase na i kini fu irisa fuko a. Ho Pauro ayani wee: “Mi nazungadi roni tie, oni dú ni awiriki pa du wa mi,” dunguyo aima ida ka manga wo mbiko ko aima maa wene kpiapai fuyó.—1 Kor. 4:16.
8. (a) Gine nga nyanyakipa gene sa Yesu afu irisa ngbaha fu gako abawiriki? (b) Wai rengbe ababiapai areme ka pekafuo ga Yesu kpiapai?
8 Gu kura gene agu awirina nangerakurii asunge afu irisa ngbaha fu agu aboro du kutii beyo, si nga ka gumba ndu gupai fuyó agi abaakumba re aida ti ni i mangi gupai fuuyó ho fuyó watadu ndu gupai agi abaakumba re afu rugute ti ni. Ho i amangaha ni were, gure nga i nawirika Yesu. Nikpiapai, ho Yesu ayani fu gako abawiriki wee i kparikpee tipa Mbori kedi kura abamangisunge ku ati ke ahe yo, ko agumba nduhe fuyó. Ko ayaa: ‘Zuzuhe nibakerehe nirengo, ono abamangisunge nikina umbayo. Oni kpári tie fu gu Gbia du zuzuhe nigako, ko kedi abamangisunge kurogo gako ati zuzuhe.’ (Mt. 9:37, 38) Teketeke a, ho ko ayani fu gako abawiriki wee “oni ngére tie,” ko agumba nduhe ki yaa: ‘Bambiko oni ainanga nigu uru gaoni Gbia ka ye te.’ (Mt. 24:42) Dedede, anga Yesu anaagumba kina gupai sa fu gako abawiriki si aida i mangihe te, ono ko anigumba ndu gupai agumba si aida ti ni i mangihe. Rogo gi gene re, ko kini fu irisa fuyó. Si nga wene kpiapai fu agu aKristano nga ababiapai.
Oni Du na Irisa Tipa ga Yekova Dungurati
9. Da ani afu irisa funi ho du ani ni na irisa tipa gu dungurati nga ga aKristano du rogo zegino dunduko? Oni sakinga rogoyo.
9 Tipa ka fu irisa fu Yekova, si naida ani du na irisa tipa gu dungurati nga ga aKristano du rogo zegino dunduko na ka fu irisa a fu abaakumba. Ho ani aida rugute ni be gu riko nga ga ruru kangara moyambu, gure nga ani nayugo gaani irisa tipa ga Yekova mbakadapai. Rogo gu dungurati nga ga aKristano nadu rogo bambata sa kama agarã, gu mokedi nangia Pauro agbarasi ngbangaa fu agu aboro naafunga irisa fu agu amoyambu i amoi yó ya. (Oni gedi 3 Yoane 9-11.) Afugo Yoane nayugo gupai ngawee, anga kina zanga irisa sa aboro adu nani kuti ababiapai te, ono i anaabingo agu apai ababiapai anaayugoho na gayó arugute na irisa te. Si nipa ngbarago nga, dungu aKristano adunga wo te. Ho amokedi aduni tiunga, awirina dunduko nadu na irisa tipa agu akurayo nanaangbembatayo rogo apai.—Frp. 2:12.
10, 11. Oni sakinga rogoyo a wa duhe rogo Ziazia Kekeapai nga, si daada kura aboro du na apagbia beyo rogo dungurati.
10 Gu kura aboro nayawee wa duhe nga Yesu ayawee gako abawiriki dunduko nga “awirina,” si aidanga aboro du na pagbia beyo rogo dungurati te. (Mt. 23:8) Ono tie, Kuru Ndika na Vovo Ndika na dungu akpiapai rogoho nga ga agu aboro Mbori afu apagbia fuyó. Gu kuru apangbangaa du tipa gu iriʹiripa abaakumba nadumbata, aBasapungbangaa, gbiati agu abakindo nangia aEbere nadumbata, si nayugo gupai nga, Yekova aima fuka apagbia fu agu aboro nanaamangasunge kubako. Ho aboro anaafunga irisa ni fu agi aboro Mbori amoi yó re ya, ko anaafu mbusa afu fuyó.—2 Aba. 1:2-17; 2:19, 23, 24.
11 Wakina gure, agu aKristano nadu rogo bambata sa kama agarã aima idapa gu pagbia nadu be amokedi. (Amo. 2:42) Nikpiapai, Pauro anaafu rugute afu fu awirinako. (1 Kor. 16:1; 1 Tesa. 4:2) Wa si avura duwo, ko anaara ara fu agu aboro nadu na apagbia kuriko. (Amo. 15:22; Gara. 2:9, 10) Nirengo, Pauro aduna ruru bipai tipa gu pagbia nadu rogo dungurati.
12. Gini apai ue rengbe ani ka wirikaha tipa pagbia du paha rogo Ziazia Kekeapai?
12 Apai ue ani awirikaha be gipai re. Bambatapai nga, ruhe aru kuti Ziazia Kekeapai ‘ruru kangara moyambu’ moi akumba ti sunge rogo adungurati vurube Riigbu Bipasunge, na gu kurayo kidu na apagbia beyo kurii aguyo i amoi yó re. (Mt. 24:45-47; 1 Pet. 5:1-3) Uepai nga, ani dunduko, kodi agu akumba i namoi yó si aida ani fu irisa fu agu aboro duna apagbia kurirani. Gine nga agu agene rengbe ani ngbaha ka fu irisa fu agu aboro nangerakurii asunge rogo dungurati?
Yugo Irisa fu agu Ababiapai Ninaata Ata
13. Wai rengbe ani ka fu irisa fu abaakumba?
13 Pauro ayaa: “Ani nazungadi roni, awirina, oni íni agu yo namanga nyanyaki sunge dagba roni yo, ki du ri roni rogo Gbia kini rugu roni; oni ki niirisi yo bakere gbe ni nyemuse mbiko gayo sunge. Oni dú na zereda dagba roni yo.” (1 Tesa. 5:12, 13) Agu ababiapai ninaata ata, i nirengo du dagba agu ‘aboro namanga nyanyaki asunge.’ Sidu, si naida ani ‘naairisa yo bakere gbe.’ Gene sa dagba agu akuraha ani amangaha ngbaha nga ka manga agu arugute i afuhe furani. Ho babiapai afu arugute ni furani ye be gu riko nga ga ruru kangara moyambu, “gu tatamana naye ari yo” nika fõngbaduraniyo ani ‘ipi ka gia’ gu rugute re.—Yak. 3:17.
14. Wai agu aboro du rogo dungurati ayugo gupai nga i na irisa tipa agu ababiapai ninaata ata, na gine nga sangbanaha?
14 Ginipai ka ani mangihe ka si du nga i sana rani ani mangipai kia ti gu ani ainidi tirani nani? Pa fu ani irisa naida gupai ti kura aregbo nga ani sovura kuti gu sino nga ka ká ki yaa, “Ani naamanganga pai wa gure ane te” watadu, “Si rengbe arengba ka fu undo rogo kura aba, ono ka si undongo rani rogo gaani dungurati te.” Kuba gure, si naida ani mangi asadatise nyanyakii ka manga gupai gumbayo ho furani re. Pa maa ani gupai ku berã rani yo nga Yekova nga baira dungurati na Yesu nga riihe, si nika undo rani ani mangi gupai gumbayo ho. Ho agu aboro du rogo dungurati adia rugute ni na ngbarago be gu babiapai ninaata ata na ki mangihe, si nayugo gupai nga agu aboro re, i na irisa tiyó. Gu mokedi nangia Pauro atambua agu awirina nadu Korinda yo tipa gu irisa i afuhe fu Tito nangia gu babiapai naye ka bi yó na ko atambua yó a tipa wa i airisi sangbako. (2 Kor. 7:13-16) Areme, ani nagbia ngbarago rogo gaani sunge tungusapai wa ani amanga agu arugute agu ababiapai ninaata ata afuhe furani.—Oni gedi 2 AKorindo 13:11.
“Oni Irisi Aboro Dunduko”
15. Gine nga gu bete agene ani afu irisa ngbaha fu akuarani aidipase?
15 Pauro akepai ki yaa: “Ka mo zá nga sosono boro ya, ono mo zúngadi ni wa bamo. Aparanga ki du bangiro wa awirinamo, gbinza ade wa anamo, paranga ade wa adawiro rogo wene sino. Mo irisi . . . [agu adekurugbo nga] ndikidi adekurugbo.” (1 Tim. 5:1-3) Ii, Fugo Mbori nazungodi rani ani fu irisa fu agu aboro dunduko du rogo gu dungurati nga ga aKristano. Ono tie, ginipai ka oni mangihe ka si du nga zanga giatise kuru dagbaroni na wirinaroni? Ya mo gupai re asa roni ka oni funga irisa fu kuaroni Kristano ya? Watadu si aida oni aria gaoni berã ki kparia gu wene asino ní nga ga aKristano? Agu aboro gbe duna apagbia beyo, i si aida i du na irisa tipa awirinayo, ka i ‘adúnga ni abazogo kurii rimbasa akandoro ya.’ (1 Pet. 5:3) Nirengo, ani na dungu amomu berani ka fu irisa fu akuarani rogo gu dungurati nga ga aKristano mbiko agu aboro du rogoho, i na nyemuse.—Oni gedi Yoane 13:34, 35.
16, 17. (a) Tipagine duhe ti ni ninyanyakipa pai ani fu irisa fu agu aboro ani atungusapai fuyó na fu aguyo a aidanga na ani ya? (b) Wai ani ‘airisa aboro dunduko’?
16 Rengo ngaha nga, anga kina agu aboro sa du rogo dungurati si aida ani fu irisa fuyó te. Pauro akepai fu agu aKristano nadu ti ragoko ki yaa: “Momu nimángi rani tie, ani ki mangi gu pai amanga ngba angba fu aboro dunduko.” (Gara. 6:10) Nirengo, pa manga ani gu rugute re rengbe kadu nikpakarapai kangia gaani badiasunge watadu kuarani sukuru yo mangi furani gbegberẽe. Ti ngbatunga agu aregbo re, si naida ani tingidi agi afugo re: “Ka mo nizingisi nga tiro tipa amangi gbigbitapai ya.” (Tam. 37:1) Pa manga ani gu rugute re nika undo rani ani mangipai rogo irisa na asogo rani. Teketeke a, ho ani atungusapai ni, padu ani nibayee aboro nika undo rani ani mangipai “ni zera na irisa” na agu aboro dunduko ani agbia yó. (1 Pet. 3:15) Zavura kina gaani rokoo, si nayugo gupai ayugo nga ani nairisa agu aboro airisa ani atungusapai fuyó.
17 Gu rugute nga: “Oni írisi aboro dunduko. Oni kpí nyemu awirina. Oni gúnde ti Mbori. Oni írisi bakindo,” si ani aida ka mangaha ho ani amangapai ni na akuarani aidipase gbiati agu aboro a adunga na ani rogo idapase ya.—1 Pet. 2:17.
Gaoni Karagapai Nga Gine?
Wai rengbe oni ka yugo gaoni irisa:
• Tipa Yekova?
• Tipa agu abaakumba du rogo dungurati gbiati agu ababiapai ninaata ata?
• Tipa agu aboro du rogo dungurati?
• Tipa agu aboro ani atungusapai fuyó?
[Gu kpiahe du ti kpewaraga 23]
Agu aKristano nadu rogo bambata sa kama agarã aduna irisa tipa riigbu bipasunge
[Gu kpiahe du ti kpewaraga 24]
Abaakumba rogo aringara dunduko nafu irisa fu agu ababiapai ninaata ata, Riigbu Bipasunge amaa yó ti sunge