Oni Fu Irisa Fu Aguyo I Afu Asiahe Fuyo I Duna Pagbia Kurironi
“Oni írisi aboro dunduko. Oni kpí nyemu awirina. Oni gúnde ti Mbori. Oni írisi bakindo.”—1 PETERO 2:17.
1, 2. Waigu aboro abi pagbia areme? Tipagine?
“AGUDE na rengo beyo tipa apai dunduko. Irisa ho tipa avunguyo te,” wogu nagude akpari ni nunga. “Tikango Na agu Aboro Duna Pagbia Beyo” wogu gu dakadaka waraga i adikoho ti mburu tarambiri agumbaha. Gure gbua nga apai ue nayugopa gu sino namaapai areme, a wa ini oni paha nirengo. Zanga irisa avunguagude, abayugupai, abarogo aboro sa sunge, na zanga irisa gu kikindigipa aboro nga ga irangbii yo ima rengba na arago dunduko rogo zegino.
2 Kura aboro rengbe ka ka gupai re aka ki ya, “Ako tee, agu aboro du rogo agu aba nga ga pagbia arẽnga tipa mi fu irisa fuyo te.’ Ti kura regbo, si rengbe ka duni kpakarakpakarapai ka tikango gu gumbapai re. Ani nagbia tirani na apangbanga timburu kuraha nga gu nafura tipa iraira kikindigipa aboro nga ga irangbii yo, tipa agu abarogo aboro sa sunge duna ngbaduse, tipa agu abayugupai arẽnga ka yugopai ya, na tipa agu avunguagude nawasi awiriyo. Si ni pa ngbarago nga, kina bete aKristano gbua nabi agu aboro duna pagbia beyo rogo dungurati rogo gu gene re.—Matayo 24:45-47.
3, 4. Tipagine si aida tini aKristano duna irisa tipa agu aboro du rogo agu aba nga ga pagbia?
3 Ni aKristano, ani na “nyanyaki ndupai” (NW ) be rani nga gu si aida tini ani duna irisa tipa agu aboro duna gu pagbia beyo nga ga zegino. Gu mokedi nangia Pauro arugu aKristano i “rá ara dũ fu abaira tandu, bambiko tandu gbua te kina be Mbori; agu abaira tandu du ho kina Mbori namoi yo.” (ARomo 13:1, 2, 5; 1 Petero 2:13-15) Pauro ayugu wene ndupai a tipa duna irisa tipa gu pagbia du kporo: “Dere akumba, oni rá fu kina akumbaroni, wa re he rogo Gbia yo. Agude, oni gí sangba avunguroni rogo apai dũ, bambiko gere ngba rogo Gbia yo.” (AKorosaio 3:18, 20) Agu abaakumba nga ga dungurati yo ima rẽ tipa gaani irisa mbiko ‘ziazia toro amoi yo ni ababipai i nibanda ga Mbori dungurati.’ (Amokedi 20:28) Ani na irisa tipa gu pagbia nga ga aboro bambiko ho ani amangaha ni wo si nafu irisa fu Yekova. Sino rani ngaha, nga irisa ga Yekova pagbia dedede naye mbata rogo gaani raka.—Amokedi 5:29.
4 Na pa ga Yekova bakere pagbia berãrani yo, ani wisiginga gu kpiaapai nga ga gu bete aboro naadunga na irisa tipa agu aboro nadu na pagbia ya na gu bete yo nadu na irisa.
Zanga Irisa Nandu sa Zanga Ida ga Boro Pai
5. Gini berã nga ga zanga irisa Mikara ayuguhe tipa Davide, na gure andu na ri sa ginipai?
5 Rogo gu pangbanga nga ga Bakindo Davide, ani rengbe ka bi wai Yekova abi aguyo nabisirapa gu pagbia fu Mbori he. Ho Davide aaye ni na sanduki mokido ku Yerusarema yo, diako nga Mikara “[a]bi Bakindo [Davide] ko niguku nido gbere ku bangiri Yekova; ri ki payasi ko ku kpotori yo.” Si aidi Mikara nibi Davide angianga ni kina gari bairakporo sa ya, ono ni bakindo nga ga ringara a. Ono tie, ri akusi agu apai ri aberãha rogo gbegbere fugo: “Bakindo aYisaraere . . . [nidu] ni taataa ko areme, nga gu ko [ni]mbu kpotoko areme ku bangiri anagbindi nga gako amoyambu, wa kina gu mumungo aboro adada nga gayo zee ya!” Sangbana gipai re angia Mikara anye ni irazangada.—2 Samuere 6:14-23.
6. Waigu Yekova abi ga Kora zanga irisa tipa Gako mbedimbedi aboro?
6 Gu gbegbere kpiapai kisusi nga ga zanga irisa tipa gu pagbia nga ga siokrasia nga gu Mbori afuhe angia ga Kora. Ni ngbatunga awiri Koata, nga gu mamu ko anagbia ngbarago behe kaa mangasunge Yekova rogo Gako banye! Si ki vura du wo, ko abi irairapai ti Mose na Arona, nangia ga Mbori mbedimbedi abarumbatayo fu aYisaraere. Kora avo gbuu na gu kura asambiri nga ga aYisaraere yo kini bisirapa Mose na Arona niyaa: “Rimbasa aboro ni kparakpara yo ziazia dunduko, i ni ba sa sa dunduko, Yekova du dagba yo; tipagine tie oni atumba tironi ti ni ku ri gu gbuu nga ga Yekova?” Waigu Yekova abi ga Kora berã na ga agu aboro naasongoda ko? Yekova abi gi gayo mangapai re ni zanga irisa fu kina boro ko nitiko. Fuo Kora bi aguyo nadu ku giiko sende nambiri yo, Yekova agbarasi ko na we gbiati agu asambiri nadu 250.—Pa Geda Aboro 16:1-3, 28-35.
7. Ya mo gu “bawene amokedi kisusi” aduna ndupai beyo ka bisirapa ga Pauro pagbia?
7 Rogo gu ga aKristano dungurati nadu rogo bambata kama agarã, aboro aduho nga aguyo nanabisirapa gu pagbia nga ga siokrasia. Gu “bawene amokedi kisusi” nga aguyo nadu rogo gu dungurati nga ga Korinda aduna gu berã nga ga zanga irisa tipa Pauro. I abisirapa gako birĩ gumbapai, niyaa: “Ngbanyako rurungbura, fugoko adu nga ni he te.” (2 AKorindo 10:10; 11:5, NW ) Singia Pauro angia wene bagumbapai watadu ko adunga wo te, pai sa nga ko arẽ na irisa mbiko padu ko ni mokedi. Ono ya mo fugo Pauro adunga nirengo ni he te? Gu gako agumbapai gbayaga nga gu duni kekehe Baibiri yo nayugo gopai nga ko angia gu bagumbapai nananyasa kango ngba aboro. Oni ngere, ni sangbana gu guru sakapai nadu dagba Pauro na Erode Aguripa gu Ue ko, nangia gu boro ‘naini agu apai wenengaĩ nadu dagba aYudo,’ Pauro asa gu bakindo re ko yaa: ‘Mo nakpi nyemu ka sa re ni Kristano vuru guru regbo yo!’ (Amokedi 13:15-43; 17:22-34; 26:1-28) Si ki vura du wo, gu bawene amokedi kisusi nadu Korinda yo akitingbaanga ko ya fugo ko ni he te! Waigu Yekova abi gayo berã? Rogo tingidapai fu agu ababipai nadu rogo gu dungurati nga ga Efesa, Yesu Kristo afura wenengai bara agu aboro naka gupai nga ka pefuo aguyo “naya tipa tiyo amokedi nga yo, ka i adu nga wo ya.”—Yugoti 2:2.
Irisa Yo Zavura pa Gayo Zangarengba Vurũ
8. Waigu Davide ayugu gupai nga ko aduna irisa tipa gu pagbia Yekova afuhe fu Saura?
8 Dungu kpiaapai gu duho Baibiri yo tipa agu aboro nadu na irisa tipa agu aboro nadu na pagbia beyo, zavura ho agiyo re avura ingamangasunge ni na gayo pagbia watadu ki irasi gayo pagbia vurũ. Davide nangia guni sa dagba ngbatunga gu bawene kpiapai re. Bakindo Saura, nga guko ko anamangasunge ku tiibeko, aduna kpihe kuti Davide mbiko agu apai ko amanga na kini gbata gene ka imo ko. (1 Samuere 18:8-12; 19:9-11; 23:26) Si ki vura du wo, wa Davide avura duna mamu beko ka imo Saura, ko ayaa: “Ka Yekova idi nga ha mi mangi gi pai re fu gi gbia, nga ga Yekova mbedimbedi boro . . . [te], nga taã bere sa ko, wa du ko ni ga Yekova mbedimbedi boro.” (1 Samuere 24:3-6; 26:7-13) Davide aini gupai nga Saura angia ingahe, ono ko ambuhe fu Yekova ko saringbanga ko. (1 Samuere 24:12, 15; 26:22-24) Ko afuranga gbegberee bara Saura watadu ka fura fuko gbegberee te.
9. (a) Waigu Davide aberã ho Saura amanga ni fuko gbegberee? (b) Waigu rengbe ani ka gumba gupai nga ga Davide irisa koyo du Saura ni aduni ndikidihe?
9 Ya mo rago agbere ti Davide baraho i arungosi ko ni? “Airazuu nagbata mbisimore,” wogu Davide akparikpee fu Yekova. (Atambuahe 54:3) Ko akusi agu apai nadu ngbadukoyo fu Yekova: “Ako gi Mbori, mo bátasi re be avurare, . . . airaome nadungura tiyo kuti re. Ako Yekova, bambiko gi samungu te, na gi ingapai a te, i naora ki nitangara tiyo wa adu nga irairapai ku ri re ya. Mo gúari tie, ka unda re, mo bí he!” (Atambuahe 59:1-4) Oni aberãnga wa kina gure—nga oni amanganga gu boro duna pagbia beni gbegberee te, si ki vura du wo ni ki kpasaka ye na kpakarakpakarapai kindi fu roni? Davide akpanga ti fu irisa fu Saura te. Fuo kpio Saura, kuba gupai nga Davide niguku kuari ni ngbarago, ko abi bia kpee: “ASaura na Yonatana adu ni boro wene yo ni betedi yo wa i adu ni ungayo! . . . i aniipi ki susi adingimo, i adu na ome ki susi abahu. Oni nga awiri aYisaraere nga ade, oni kpári ni aume tipa saura.” (2 Samuere 1:23, 24) Nga gu bawene kpiapai tipa duna ndikidi irisa tipa ga Yekova mbedimbedi boro, wa Saura avura manga fu Davide gbegberee vurũ!
10. Gini wene kpiapai Pauro amangihe rogo irisa gu pagbia Mbori afuhe nga ga riigbu bipasunge, na gure andu sa ginipai?
10 Ti regbo aKristano, ani nabi gu bawene kpiaapai a nga ga agu aboro nadu na irisa tipa gu pagbia fu Mbori he. Ni kpiapai, ani dinga Pauro. Ko ayugu irisa tipa agu adiaberã gu riigbu bipasunge nga ga ga aKristano dungurati nga gu nadu rogo bambata kama agarã amangihe. Ti regbo ga Pauro yangara nduge ku Yerusarema yo, riigbu bipasunge afu rugute fuko ya ko girisi tiko gbayaga tipa ka yugo nani fu kura aboro nga ko na gbegbere berã berewe tipa ga Mose Ndika te. Pauro arengbe arengba ka berã ki ya: ‘Kina agu awirina re narugu re mbata mi guari kusayo Yerusarema yo ho gimi raka aduni ngbapai. Awere i naida mi yugu gupai gbayaga nga mi na irisa tipa ga Mose Ndika. Mi ima ke waraga fu AGaratio kini rugu yo i mbu manga sangba Ndika. Ka mi ndu tie ku yekaru yo, kura aboro rengbe ka zanga giarogo gupai yo mi ka mangaha, niberẽ gupai nga mi nangbe na azanga yeratise.’ Ono tie, si ziazia nga Pauro aberãnga ngba gu gene re te. Wa duhe nga pai adunga ho ka kuo agu andika nga ga aKristano te, ko airisi gu rugute re na ki mangi gupai gu riigbu bipasunge nadu rogo bambata kama agarã agumbaha. Gu sangbanaha namangi nibasa fuo ndu Pauro ku yekaru yo angia si aidi i batasi ko be rimbasa aYuda, na tingbafuo gure, ko amangi gara ue ku bambukiso yo. Ti digidoho, gupai Mbori akpinyemuhe aduni mangimangihe. Pauro amangi dezirepai fu iriiripa abamangisunge Kaisaria yo na irangbii ki tumo tipa gako nunguro ku Roma yo, yo ngaha re ko arengbe ni ka manga dezirepai fu kina boro Kaisara nitiko.—Amokedi 9:26-30; 21:20-26; 23:11; 24:27; AGaratio 2:12; 4:9, 10.
Oni Nayugo Irisa?
11. Waigu rengbe ani ka fu irisa fu agu aboro duna pagbia beyo nga ga zegino?
11 Oni nafu gu irisa rẽ tipa aguyo duna pagbia beyo? I naruga aKristano i “fú kina gu he fu yo dunduko du fu yo; . . . irisa fu gu ni du irisa fu ni.” Nirengo, gaani ranigose fu “abaira tandu” akodanga kina fu kufuta sa te, ono si naida ani irisi agu aboro duna pagbia beyo rogo gaani mangapai na gaani fugo. (ARomo 13:1-7) Ho ani agbia tirani ni na gu kikindigipa abamangisunge nga ga irangbii yo nga aguyo du arakaya, ani naamanga wai? Rogo gu papara ringara nga Chiapas, du Mexico yo, abazogo rogo kura dagbarago sa arogodi agu abino kusayo nadu tipa akporo 57 nga ga aDezire Yekova mbiko agu aKristano re aadunga ti manga kura apumbo nga ga pambori te. Ti regbo agu asakapai i amangihe tipa ka nyasa na gupai re, aDezire, nga aguyo nanivodi tiyo gigirii, zanga du kemukemu, aafura ti aregbo dunduko rogo gu gene duni iriirihe na rogo irisa. Fuo susa garã sa, i saringbanga fuyo ni wenehe. Sino yo afõngbadu bete agu aboro naabiyo gbanga yo i ni sakipai si ki sa yo i duna irisa tipa agu aDezire re da ti gupai nga i kini kpinyemu ka da a tigayo ni aDezire Yekova!
12. Tipagine duhe tini na nyanyakipaha dee duna ‘bakere irisa’ tipa kumbaari angianga idipase ya?
12 Waigu rengbe oni ka yugo irisa tipa gu pagbia fu Mbori he ku kporo? Fuo ko sakipai tipa gu kpiapai nga ga ga Yesu rungo be gbegbereapai, gu mokedi nangia Petero ayaa: “Kina a wo dere akumba, oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni.” (1 Petero 3:1, 2; AEfeso 5:22-24) Gupai Petero anyakasaha herẽ nga nyakapa gupai nga dee ra fu kumbaari na ‘bakere irisa,’ wa vura duhe nga ga kura akumbakuadee mangaapai nasa yo ka i rẽnga tipa ngbatunga gu irisa re vurũ ya. Ga diakumba sino nga ga irisa rengbe ka fõngbadu kumbaari yo nga gu kumba adunga na idapase ya ko di rengo kugume.
13. Waigu rengbe dereakumba ka irisa akumbaayo?
13 Rogo agu apai ke pati agi averesi re, Petero nagbe berãrani kuti gu kpiapai nga ga Sara, kumbaari, nangia Abarayama, angia gu kpiapai nga ga gu idapase nagbarii akuraha. (ARomo 4:16, 17; AGaratio 3:6-9; 1 Petero 3:6) Ya mo si naida gupai nga gu dereakumba du akumbaayo ni aidipase fu irisa gbua tooni fu akumbaayo ti gu irisa dere agu akumba adunga akumbaayo ni aidipase ya afuhe fu akumbaayo? Ginipai ka mangi ka si du nga mo agianga tiro na gamo bairakporo rii kurapai te? Yesu afu rugute nga gu rengbe ani ka mangasunge nani herẽ tipa apagbia dunduko: “Ka [“gu boro duna pagbia beni,” NW ] sosodi ro mo ndu ki ba ngbi sa [“mo mangisunge funi tipa mairo sa,” NW ], mo ídi he fu ni mo ki ndu ki ba ngbi [“mo ndu na ni tipa amairo,” NW ] ue.” (Matayo 5:41) Oni nairisa akumbaroni ni manga oni agu apai i akpinyemuhe? Kangia gere ni kpakarakpakaraha, oni gumba gupai oni aberãha tipa gupai re fuyo. Ka oni berẽnga gupai nga i ima ino gupai oni aberãha ya. Ono tie, ho oni agumba gupai ni fuyo oni aidaha, oni gumbaha rogo gu gene duna irisa. Baibiri naruga rani niyaa: “Oni fúra na undahe dedede, si ki hii na tikpo, si du oni ka ina ti ni ya wãi oni ka karaga[pai] . . . fu akuaroni.”—AKorosaio 4:6.
14. Du boro na irisa tipa avunguni nakoda gini apai?
14 Ginipai tipa roni tigaoni agude? Fugo Mbori naruga roni niyaa: “Agude, oni gí sangba avunguroni agia rogo Gbia, bambiko gi ru re. ‘Mo írisi bamo na namo’ (si nga bambata rugute na kidohe).” (AEfeso 6:1-3) Oni bi gupai nga gia oni sangba avunguroni na ndu sa na ‘irisa oni baroni na naroni.’ Gu pa-Giriki i asaha nga “irisa,” si na gu rogoyo nga “ka taasapa boro” watadu “ka bihe na kikipaha.” Sidu, duna giasangbaa naida kura apai be roni susi gu gbua nga kita kpakanahe kini mangi agu arugute nga ga vunguroni nga gu nawira rungaha bangironi te. Mbori naida gupai beroni nga oni taasipa avunguroni na ki bi gayo rugute na kikiipaha.—Asanza 15:5.
15. Waigu rengbe agude ka banda gayo irisa tipa avunguyo ka i vura berã gupai nga avunguyo mangi irairapai vurũ?
15 Ginipai ka oni mangihe, kangia avunguroni namanga agu apai nga gu naumbasi gaoni irisa tipa yo? Oni asadi ka bi apai a wa i abihe. Anga i “navungu ro[ni]” na ki mbakadi apai tipa roni tee? (Asanza 23:22) Anga nyemuse nasa yo i mangi apai tipa roni tee? (AEbere 12:7-11) Oni fura rogo irisa fu avunguroni, kini sakirogo gupai zezeredii oni aberãha. Ka i vura karagapai ngba gu gene oni aidangaha ya, oni ne gupai nga ga fura fuyo zanga irisa. (Asanza 24:29) Oni tingidipa wai Davide abanda gako irisa tipa Saura wa gu bakindo re avura mbu pekafuo agu arugute nga ga Mbori vurũ. Oni sana Yekova ko undo roni rogo mangapai sa gaoni aberã. “Oni úka kpotoroni yo ku bara bangiriko,” wogu Davide agumbaha. “Mbori nga bagbuko fu rani.”—Atambuahe 62:8; Abia Kpenunga 3:25-27.
Oni Duna Irisa Tipa Aguyo Nangbe Kumbatayo Rogo Apai
16. Ginipai rengbe ani ka wirikaha ti gu kpiapai nga ga zire abayugupai na amaraika?
16 Ziazia toro du nasia agu abaakumba nga ga dungurati yo, si ki vura du wo, i kindi nga aboro zangarengba na i namanga irairaapai amanga. (Atambuahe 130:3; Batungusipai 7:20; Amokedi 20:28; Yakoba 3:2) Ni sangbanaha, bete aboro rogo dungurati rengbe ka duna gberarago be abaakumba. Waigu si aida ani mangi ho ani aberã gupai ni nga i amanganga apai ngba ruru gene rogo dungurati te, watadu kandara wogu si awiraha? Oni bingo gu kparapai nadu dagba zire abayugupai na amaraika rogo bambata kama agarã: “Ono agu yo [zire abayugupai] bakere gbe nata fuo pa borose rogo nyemu biriko, ki nibasa pa abazogo. I agunde nga te, i napeka kina gu pai i akpi nyemu he tigayo, i nakiga nga ni gu rago i agberã ngbayo yo fu iriiri boro te. Ono amaraika tigayo wa du gayo ome na gayo tandu si ki[i] susi ga agu yo re, ono i aye nga na ngbanga ku barangba Gbia nigberẽ ngbayo yo kuti yo te.” (2 Petero 2:10-13) Baraho zire abayugupai aabisirapa “abazogo” ni—nga agu abaakumba i afu pagbia fuyo rogo gu dungurati nga ga aKristano rogo bambata kama agarã—amaraika tigayo abisiranga pa zire abayugupai, nga aguyo naakusa kparakaro dagba awirina te. Ni du amaraika rogo kikindigipa aba kuari na ki inipai tipa ruru sarangbanga kisusi aboro, i aima ino agu apai naamanga rogo dungurati. Si ki vura du wo, ‘ni fu yo irisa fu Yekova,’ i ambu sarangbanga kube Mbori.—AEbere 2:6, 7; Yuda 9.
17. Waigu rengbe gaoni idapase ka undo ho du apai ni nga gu oni aberãha ya abaakumba na ingahe rogo?
17 Ka si vura du nga i amanganga pai rogo gu gene ka i nimangihe rogo te, anga si naida gupai berani nga ani duna idapase kuti Yesu Kristo duni unga ko ni gu Rii dungurati nga ga aKristano tee? Ya mo ko ainonga pa agu apai namanga rogo gako adungurati nga gu du rogo zegino dunduko tee? Anga si naida gupai berani nga ani duna irisa tipa gu gako gene ko amangapai rogo na ki inipa gako tandu ka ngera kurii apai tee? Nirengo, ada nga ani ‘ka sapa ngbanga akuarani?’ (Yakoba 4:12; 1 AKorindo 11:3; AKorosaio 1:18) Tipagine ka oni ayenga tini na agu apai nafuda roni ku barabangiri Yekova rogo gaoni akparakpee ya?
18, 19. Ginipai rengbe oni ka mangaha ka oni berẽ gupai nga bakumba ingi?
18 Mbiko gu zangarengba nga ga aboro, kpakarakpakaraapai watadu fudifudiapai rengbe arengba ka kura. Aregbo rengbe ka du kinaho a nga gu rengbe bakumba ka inga, si kini sa kura aboro i duni fudifudiyo. Manga ani pai niipo ho du ani ni rogo ngbatunga apai wa gure ambakadanga gupai re te. Si rengbe ka saha si gbere berewe kisusi. Aguyo duna gu rugatinapai nga ga toro nasungudo Yekova ko rugu apai na ki fu gu rugute si aidaha ti gako regbo na rogo gako gene.—2 Timoteo 3:16; AEbere 12:7-11.
19 Ginipai ka mangi ka si du nga pai ho naba gberarago ti roni? Kuba gupai nga oni fura fu kura aboro tipaha rogo dungurati, tipagine ka oni andunga tini koyo du abaakumba ni rogo irisa tipa undo ya? Kuba gupai nga kaa bisirapai, oni gumba gupai fudi roni. Oni duna ‘nyemu yo’ ti roni, na oni ki banda gaoni irisa tipa yo wa oni akido kuti yo. (1 Petero 3:8) Ka oni penga gbegbere afugo ya, ono oni kido kuti gayo nyaka nga ga aKristano. Oni duna tambuahe tipa gu ngarasahe nga ga Kekeapai nga gu ka i fuhe fu roni ni weneringise. Na ka si wiri gupai nga gu kura rugapai kinaho si aida i mangihe, oni duna kido nga Yekova aruga yo aruga i mangi gupai duni wenehe na niruruhe.—AGaratio 6:10; 2 ATesaroniko 3:13
20. Ginipai ani ka wisigo rogo gu paparaha naye fuo gere?
20 Ono tie, gu kurapai kinaho si aida ani wisigihe nibipa irisa agu aboro duna pagbia beyo. Anga si naida gupai nga aguyo moi yo yo rogo agu aba nga ga pagbia i duna irisa tipa aguyo i angerafuo yo tee? Ani wisiginga gure rogo gu paparaha naye fuo gere.
Waigu ka Oni Karagapai?
• Gini wene ndupai du berani tipa irisa agu aboro duna pagbia beyo?
• Waigu Yekova na Yesu abi agu aboro airisanga gu pagbia fu Mbori he ya?
• Gini wene kpiapai du berani tipa agu aboro nadu na irisa tipa aguyo i afu pagbia fuyo?
• Ginipai rengbe ani ka mangaha kangia aguyo duna pagbia beyo kurirani wiri manga ingapai?
[Gu kpiaahe du ti kpewaraga 8-12]
Sara aduna bakere irisa tipa ga Abarayama pagbia na ri ki duna ngbarago
Mikara akpa ti irisa ga Davide pagbia ni gari bairakporo na ni bakindo
“Ka Yekova idi nga ha mi mangi gi pai re . . . nga taã bere sa . . . ga Yekova mbedimbedi boro [te]”
Tipagine ka oni aye nga tini na agu apai nafuda roni ku barabangiri Yekova rogo gaoni akparakpee ya?