Oni Undo Agu Aboro Zere Rogo Toro Yo
“Ani mongo ngí angi na oni, bambiko mi bi gi kandoro naingi.”—RUKA 15:6.
1. Wai Yesu ayugu gupai nga ko angia wene babanda akandoro?
INAYAMBA Yesu Kristo nga “bakere babanda akandoro.” (Eb. 13:20) Ziazia Kekeapai aima fura tipa paye ko na ki yawee ko nikadu nigu babanda akandoro dukia nika mera kaa gbata “ingiingi akandoro.” (Mt. 2:1-6; 15:24) A wa rengbe babanda akandoro ka maa gani raka ngbapai tipa ka batasa kandoro, Yesu akpi tipa ka tumo rii agu aboro duwa akandoro naida ka gbia undo ti gako motumo.—Yo. 10:11, 15; 1 Yo. 2:1, 2.
2. Gine rengbe kadu nga gupai nasa aKristano i zere rogo toro yo?
2 Si nafu kina gberarago nga, bete agu aboro nadu na tambuahe tipa gu motumo Yesu afuhe na i ki kpara gayó raka fu Mbori, i berewe rogo dungurati te. Si rengbe kadu nga gberaragotise, akaza, gbiati gu kura apai nasa gupai nga i zere rogo toro yo. Ono tie, kinagu ka i du dagba ga Mbori rimbasa akandoro nga agura Davide afura tipa ra rogo Atambuahe namba 23, si ka i rengbe ka gbia zereda na ngbarago ti ni. Ko abibia ki yaa: “Yekova nga babandare, zingohe amánga nga re te.” (Tam. 23:1) Agu aboro du dagba ga Mbori rimbasa akandoro, i arungongo be zingo agu ahe nga ga toro te. Ono tie, anga wo duhe tipa agu aboro zere rogo toro yo te. Ada rengbe ka undoyo? Ginipai rengbe ani ka mangaha ka undoyo i karagatiyó ku dagba rimbasa akandoro?
Ada Rengbe ka Undoyo?
3. Nibi gupai Yesu agumbaha, wai rengbe ani ka batasa ga Mbori kandoro?
3 Bakere asadatise si aidaha tipa ka batasa ga Mbori kandoro. (Tam. 100:3) Yesu ayugu gipai re na kpiapai ho ko ayani: “Ka boro du na akandoro be ni 100, si ngia gu ru sa ki ingi, ni ki nihe agu ra du 99, ki nindu ku dagba abaagangara yo, ka gbata gu ru naingi te? Si ngia ni abi ru, ya mi fu roni ni rengo, ni angi angi tipa ru susi agu ra du 99 nainga nga ya. A wo Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.” (Mt. 18:12-14) Da rengbe ka undo agu aboro duwa akandoro zere rogo toro yo?
4, 5. Gini berã si aida abaakumba du nani koyo du ga Mbori akandoro ni?
4 Ka agu aKristano namangasunge ni abaakumba rogo dungurati aida ka undo gu kandoro zere rogo toro yo, si naida i moi gupai ku berãyo yo nga agu akandoro du rogo dungurati, ami nga ga Yekova akandoro naima kpara ga ami raka fuko ki sa tira ni ‘akandoro gako banambu.’ (Tam. 79:13) Si naida ababanda akandoro naangerafuo ngbatunga agu akandoro re niwesewese nyemuse. Nduge ka bi ra na ka fura na ami nafu undo afu. Agu afugo babanda akandoro apehe fura rengbe ka ngarasa ra rogo toro yo na ki ba nyemu gupai tira nga ami karaga tira ku dagba rimbasa akandoro.—1 Kor. 8:1.
5 Ababanda rimbasa akandoro na gu sunge beyo nga ka gbata agu akandoro zere rogo toro yo na ka undo ra. Gu mokedi nangia Pauro atingidi agu aKristano naamangasunge ni abaakumba rogo dungurati Efesa yo naapa ngerafuo akandoro ki yaa: “Oni bánda tironi na agu akandoro, Ziazia Toro asa roni ni ababandara, oni rígi ga Mbori kanisa nga gu ko angbe ni kureko [“nikure Wiriko,” NW].” (Amo. 20:28) Wakina gure a, gu mokedi nangia Petero angarasi abaakumba na agi afugo re: “Oni mbú ti ga Mbori rimbasa akandoro du dagba roni, nimangi sunge barumbatayo, mbiko du oni ni zizi roni kuti ni te, ono ni nyemuhe fu Mbori; tipa gbegberẽ ũkumuko a te, ono ni idapaha kpotoroni yo. Ka oni dú nga ni abazogo agu yo i aasia payo fu roni ya, ono oni dú ni kpiahe fu rimbasa akandoro.”—1 Pet. 5:1-3.
6. Tipagine duhe ninyanyakipa pai ti ni ani ngerefuo ga Mbori akandoro areme gbe?
6 Si naida ababanda akandoro wiriki Yesu nga “wene babanda akandoro.” (Yo. 10:11) Ko aabakabangiriko tipa ga Mbori akandoro na ki nyakasi gupai nga, si naida i naangera fuo ra ho ko ayani fu Simona Petero wee ko ‘nirigi gako wiri akandoro.’ (Oni gedi Yoane 21:15-17.) Areme gbe si aida i ngerefuo akandoro wa gure, mbiko Bakitingbanga ima kiiso gako asadatise ka sa ga Mbori aboro i mbu manga rurupai. Satana nagbia amomu ti gaani arungbura na kini mangisunge na zegino ka sa ga Yekova akandoro ami ndu ka manga irairapai. (1 Yo. 2:15-17; 5:19) Agu aboro naima zera rogo toro yo ngbaki bara yó gbe fu Satana, sidu, si naida ani undoyo i mangi agu arugute du tipa ‘peka toro.’ (Gara. 5:16-21, 25) Tipa ka undo ngbatunga agu akandoro re, si naida ani naakido kuti Mbori na kuti gu rugute gako toro afuhe na ki ini mangasunge wenengai na Fugoko.—Snz. 3:5, 6; Ruka 11:13; Eb. 4:12.
7. Wai nyakipa gupai nga, abaakumba naangera fuo agu akandoro du tiibeyo?
7 Babanda akandoro anidu na nugonugo ngau beni ní anaamangasunge nani ka yugo gene fu gani rimbasa akandoro. Ho akandoro anaakura ni kusayo ndugu ra yo watadu ami narimo koyo, ami ‘anaasusa tii gu ngau’ re na ní ki rengbe ka geda ra. (Pa Mot. 27:32; Mika 2:12; 7:14) Wakina gure a, gu Kristano nga babanda akandoro duwa ka ní ini bara ga Mbori akandoro du tii beni. (Oni ringbisinga ha na Asanza 27:23) Sidu, ngerafuo akandoro ningia gu nyanyakipa sunge gu gbuu nga ga abaakumba naasakapai tipaha. Gi ngerafuo akandoro re nakoda mbakadapai ka ndu ka undo gu kandoro zere rogo toro yo. Kina boro Yekova nitiko ayawee ko nika gbata gu gako akandoro agbata ingi na ki fu gu undo fura ami aidaha. (Yeze. 34:11) Sidu, Mbori na ngbarago tiko ho abaakumba aguari ni ka ndu ka gbata agu akandoro zere rogo toro yo na ki undo ra ami karaga tira ku dagba rimbasa ra yo.
8. Wai rengbe abaakumba ka undo akandoro?
8 Ho kuarani idipase awoka ni, ka bakumba ndu ka bi ní, si nika fu ngbarago funi na ki ngarasi ní. Kina gu bangisapai re rengbe kadu tipa gu kandoro nawoka rogo toro yo. Abaakumba rengbe ka geda averesi rogo Ziazia Kekeapai funi, ka yugo bete agu apai funi nadu rogo agu amagazini susi, ka peka gu bangua apai funi i agihe ti regbo dunguratise, ka kparakpee na ní, na ka manga gu kura apai. I rengbe ka gumba gupai funi nga agu aboro du rogo dungurati na nyemu ka bi ní ní nakaraga tiní. (2 Kor. 1:3-7; Yak. 5:13-15) Ndu ka bi ní, yamba ni rogo terefuni, na ke waraga funi ni agu apai rengbe arengba ka fu undo! Babanda kandoro nagbia ngbarago agbia a ho ní afu undo ni fu gu kandoro ingi kusayo ti rimbasa ra.
Kodabee Kuti Sunge
9, 10. Tipagine duhe ti ni nga, anga kina abaakumba sa si aida i undo agu akandoro zere rogo toro yo te?
9 Ani naraka rogo kere aregbo du aboro rogoho na dungu asunge beyo, sidu, gupai re rengbe arengba ka sa gupai nga ka ani iningo ya kuarani idipase ima bitikpa kusayo ti dungurati ya. (Eb. 2:1) Wa vura du apai were, gupai si aida ani inihe nga, ga Yekova akandoro na kikii para bangiriko. Ami dunduko nibasasa kii para akio bangiriko a wa duhe tipa apapara kpoto boro. Sidu, ani dunduko si aida ani naabakabangirani tipa awirinarani na kini ngerefuo yó. (1 Kor. 12:25) Ya mo oni naberã wakina gure?
10 Wa vura duhe nga abaakumba nangbembatayo rogo gbata agu akandoro zere rogo toro yo na kini undo ra, anga gu sunge re tipa kina yó sa te. Kura aboro rengbe arengba ka koda beyo naayó kuti gi sunge re. Si naida ani ngarasi agu akuarani naida undo ka karagatiyó ku dagba rimbasa akandoro. Wai rengbe ani ka undoyo?
11, 12. Wai rengbe yó ka fu momu furoni oni undo gu kandoro zere rogo toro yo?
11 Ti kura aregbo, abaakumba rengbe ka sia gu wirina duna inohe tipa ní ndu ka nungusa wisigopai na gu wirinarani nazere rogo toro yo re nga guni idi i fu undo funi. Ndu manga gu asadatise re nga ka undo agu aboro zere re i karagatiyo kuti gayó “bambata nyemuse.” (Yugo. 2:1, 4) Ani rengbe ka sonosa agi akuarani re rogo toro yo niwisigo ani agu apai naayó i akpaha ho i adunga ni na ani rogo dungurati ya.
12 Ka abaakumba ya furoni wee oni ndu ka wisigopai na gu kuaroni idipase nazere, oni kpari fu Yekova tipa ko fu maku kurii gaoni asadatise. Nirengo, “Mo fu pa ga mangaapai kina ku be Yekova, gamo aberã adu ni nyakasinyakasi he.” (Snz. 16:3) Oni berẽkurii agu averesi gbiati agu apai rengbe ka nyakasa gu idapase nga agu aboro si aida i undoyo rogo toro yo re. Oni berẽkurii gu kpiapai nangia ga Pauro. (Oni gedi ARomo 1:11, 12.) Pauro aduna nyemu ka bi agu aKristano nadu Roma yo tipa ka fuka agu ahe fuyó nga ga toro tipa i du nyanyakii. Ko aamaabangiriko a tipa ka ngarasa yó na i ki ngarasi ko a. Ya mo si aidanga ani du na kina gu bangisa sino re ho ani agbatagene ni ka undo gu kandoro ingi kusayo ti rimbasa ra tee?
13. Gine rengbe oni ka sakapai riipaha na gu boro zere rogo toro yo?
13 Ti regbo gaoni sakapai na ní, oni rengbe ka sana ní ki yaa, “Oni aini rengo wai?” Oni tingidi ní naapa gu ngbarago ní anaagbiaha mbata ho ní anaamangasunge ni fu Yekova, na kini ngarasi ní ní fura tipa gu weneapai nanaamanga ti regbo adunguratise, tingba sunge tungusapai, na ti regbo kikindigi adunguratise. Oni fura tipa agu aregbo ngbarago oni anidu nani na ní tingba ga Yekova sunge. Oni fura tipa gu ngbarago nasa roni oni mbedi na Yekova. (Yak. 4:8) Oni fura tipa gu tambuahe du oni nani fu Yekova tipa agu apai ko amangaha tipa rani, gbe, gu du tipa gu wasa gbiati maabangirise du ani nani ho du ani ni rogo fudifudiapai—Rom. 15:4; 2 Kor. 1:3, 4.
14, 15. Gini amaku rengbe ani ka tingida agu aboro naapaha naima zera rogo toro yo?
14 Si adu niwenepai ka oni tingidi gu boro nazere re naapa agu amaku ní anaagbia ngbarago behe mbata ho ní aduni rogo dungurati. Nikpiapai, ho ní aduni rogo dungurati, gani inohe aakio akio rogo Fugo Mbori na tipa gako ringbisapai. (Snz. 4:18) Ho ní ‘anaapeka toro’ ni, si adu funi taata ní sovura kuti aʹasada. (Gara. 5:22-26) Ho ní aduni na gigiri sangbakpotoniyo, si asa ní ní naakparakpee fu Yekova na kidu na ‘gu zereda nga ga Mbori nagasi rugatinapai dunduko, nabánda kpotorani yo na gaani berã rogo Kristo Yesu yo.’ (Frp. 4:6, 7) Oni moi ngbatunga agu apai re ku berã roni yo ho oni angarasa ní ni. oni du na nyemu ní tironi. Oni ngarasi ní rogo nyemuse ní karaga tiní ku dagba rimbasa akandoro.—Oni gedi AFiripoio 2:4.
15 Ka si du nga oni nga bakumba ndu ka bi arogotise zere rogo toro yo, oni rengbe ka ngarasa yó i tingidipa gu regbo i aini rengo ti ni. Ho i aini rengo ni, si adu niwenepai kini fu ngbarago fuyó na ki sa yó i ra niriyo behe. (Yo. 8:32) I aduna ngbarago wa i awiriki rengo tipa Yekova, tipa gako nyemuse na tipa gako ringbisapai. (Oni ringbisinga ha na Ruka 24:32.) Oni tingidi yó naapa gu pagume du dagba agu aboro kpara gayó raka fu Mbori na gu ngbarago i agbiaha mbikoho gbiati kparakpee. Oni ngarasi agu aboro zere rogo toro yo i di “gu wene pangbanga [berewe] . . . nga ga gu taarimo nga ga betedi Mbori.”—1 Tim. 1:11.
Oni Naayugo Nyemuse Fuyó Kindi
16. Oni funga gu kpiapai nayugo gupai nga, sangbana manga asadatise ka undo boro rogo toro yo, si nikina wenehe.
16 Ya mo agu apai gumba ani he re, si nafu undo? Ii. Nikpiapai, paranga sa atona tungusapai ho garãko aduni 12, ko azere rogo toro yo ho garãko adani 15. Ono tie, ko akaraga tiko sa ga Yekova sunge berewe. Ko amangisunge Betere yo tipa agarã 23, na ko mangi agarã awere 9 kutingba sunga bazakigene. Gu boro naundo ko bakere gbe ko karaga tiko angia bakumba. Ko aduna bakere tambuahe tipa gu undo i afuhe fuko re.
17, 18. Gini asino rengbe ka undo roni oni undo gu boro zere rogo toro yo?
17 Nyemuse nasa aKristano i undo agu akurayó zere rogo toro yo i karagatiyo kurogo dungurati. Yesu aya tipa apefuoko wee: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) Ii, i naino ndikidi aKristano ti nyemuse. Ya mo si aidanga ani yugu gu nyemuse re fu agu aKristano naima zio bapatiza, fuo gure, i ki zere tee? Wo si aidaha nirengo! Ono tie, tipa ani rengbe ka fu gu undo re, si naida ani duna gu kura asinombori tirani.
18 Ka si du nga si naida oni undo gu boro zere rogo toro yo, gini ngbatunga asino si aida oni du nani? Kupati nyemuse, si naida oni du na nunga, weneringise, zera, na hipai nigbangaha. Ngbaha angba nga oni du na gu sino nga ga mbupai ka si aidaha wo. Pauro akepai ki yaa: “Oni úkadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga. Ku ri agi apai re dũ oni úkadi nyemuse, nga gu ũvodatise nga ga ziaziapai.”—Koro. 3:12-14.
19. Tipagine daha ada ti ni ani mangi asadatise ka undo agu akandoro ingi ami karaga tira ku dagba rimbasa ra?
19 Gu papara kekepai naye fuo gere nika fura tipa gu ndupai nasa kura aboro i kparatiyo kusayo ti ga Mbori akandoro. Si nika yugo wai a si aida agu aboro du rogo dungurati di yó kugume. Wa oni ka wisigo gu papara kekepai re na kini berẽkurii gere, oni nika bi gupai nga si daada oni mangi asadatise ka undo agu awirina zere re i karagatiyo. Rogo gi zegino re, dungu aboro nadia gayó raka naabaha dunduko ka dungura aũkumuko, ono unga sa nga ga boro kiipaha kisusi agu amarã dunduko du rogo zegino. Yesu anyakasi gipai re rogo gu sanza ko agumbaha tipa gu kandoro naingi. (Mt. 18:12-14) Oni moinga gu berã re ku rironi yo wa oni amanga asadatise ka undo ga Yekova akandoro ami karaga tira ku dagba rimbasa akandoro.
Gaoni Karagapai Nga Gine?
• Gini sunge dube ababanda akandoro nibipa agu akandoro zere rogo toro yo?
• Wai rengbe oni ka undo agu awirina akodanga tiyó berewe na dungurati ya?
• Gini asino rengbe ka undo roni oni undo agu kandoro kpara tira kusayo ti rimbasa ra?
[Gu kpiahe du ti kpewaraga 17]
Ababanda akandoro namanga asadatise ka undo agu akandoro ingi ami karaga tira ku dagba rimbasa ra